1. Yehova aahimmye exeeni eniiraneya okathi ahu ola?

YEHOVA aahihimya itthu siniiraneya okathi ahu ola oriki: “Mahiku awo, wa khula mutthu òYuda, amalapo mulokó a maloko othene anonvara metto emuhimeryaka wira: ‘Nimphavela wottharani, mana nokupali wira Muluku ori ni nyuwo’”. (Zak. 8:23) “Mutthu òYuda” onilavuliwa yoolepa ela, anithoonyerya atthu yaale Muluku aathanlale awe ni munepa wootteela. Nave annihimmwa okhala “aIsarayeli a Muluku”. (aGal. 6:16, Waataana wa Naanaano) Vano “amalapo mulokó”, anithoonyerya atthu otheene arina nlipelelo na okhalaka mahiku otheene mparayiisu valaponi. Awo annisuwela wira yookhala egrupu Yehova othanlale awe ni annoona okhala eparakha omurumeela vamosa ni atthu oothanliwa.

2. “Amalapo mulokó” ‘anatthara’ sai ale oothanliwa?

² Nnaamwi vahiweryaneyaka osuwela masina a khula mutthu othanliwe olelo-va, * ale arina nlipelelo na okhalaka valaponi, ‘annatthara’ ale oothanliwa. Moota xeeni? Biibiliya onihimya wira “amalapo mulokó” yaarowa “onvara metto [muYuda] emuhimeryaka wira: ‘Nimphavela wottarani, mana nokupali wira Muluku ori ni nyuwo’”. Eveersu ela enimulavula muYuda mmosa paahi. Masi nuulumo noowi “nyuwo” anihimmwa atthu anceene. Eyo enooniherya wira muYuda ola khontaphulela mutthu mmosa, masi onitaphulela egrupu yotheene ya ale oothanliwa. Tthiri ale ahithanliwe annimurumeela Yehova vamosa ni ale oothanliwa. Muhiliyale wira, awo khanaathokorerya ale oothanliwa ntoko ahooleli aya, maana annisuwela wira Yesu tori Muhooleli aya.​—Math. 23:10.

3. Mwaha ola, ninrowa waakhula makoho xeeni?

 ³ Okhala wira eriyari ya atthu a Muluku olelo-va aakhala ale oothanliwa, atthu akina anniikoha so: (1) Ale oothanliwa aniixoona sai? (2) Naathokoreryeke sai ale anikhuura ephaawu ni aniwurya eviinyu nihiku na Wuupuwelela? (3) Niireke nihaana oxanka mwaha woowi nummuru na atthu anikhuura ithoonyeryo iyo ninnincerereya? Mwaha ola, ninrowa waakhula makoho awo.

4. Xeeni ale oothanliwa anireerela aya wuupuwelela vanceene nlopolo nri 1 aKorinto 11:27-29, ni nthowa xeeni?

⁴ MaKristau oothanliwa ahaana wuupuwela vanceene nlopolo nri 1 aKorinto 11:27-29. (Mmusome.) Moota xeeni mutthu oothanliwa aarowa awe okhuura ‘vohiphwanela’ ithoonyeryo sa Wuupuwelela? Akhala wira onnikhuura ephaawu ni owurya eviinyu variki ohiiwelelaka malamulo a Yehova. (aHéb. 6:4-6; 10:26-29) Ale oothanliwa annisuwela wira yaaphavelaka ‘ophwanya otthuveliwa anihaneliwaya [ni] Muluku wirimu oryawe, mwa Yesu Kristu’ aahaana ovikaniha ororomeleya.​—aFil. 3:13-16.

5. MaKristau oothanliwa aniixoona sai?

⁵ Munepa wootteela onnaakhaliherya arumeyi otheene a Yehova okhala oowiiyeviha ohiya wiixinnuwiha. (aÉf. 4:1-3; aKol. 3:10, 12)  MaKristau oothanliwa khanuupuwela wira aakhalana efaita yinceene waavikana maKristau makina. Awo annisuwela wira Yehova khaavanhe munepa wootteela munceene waavikana arumeyi akina. Nave, khanuupuwela wira annisuwela ikeekhai sinceene sa mBiibiliyani waavikana arumeyi akina a Yehova. Nave-tho, khanaaleela atthu akina wira aathanliwa ni anrowa opacerya okhuura ithoonyeryo nihiku na Wuupuwelela. Tthiri, moowiiyeviha annisuwela wira Yehova paahi tonaathanla ale anrowa okhalaka wiirimu.

6. Moovarihana ni 1 aKorinto 4:7, 8, maKristau oothanliwa aniithokorerya sai?

⁶ Nnaamwi ale oothanliwa asuwelaka wira eparakha yuulupale avahiwe aya, awo khanuupuwela wira ahaana othokoreriwa mwa enamuna ya vameekhaaya. (aFil. 2:2, 3) Nave annisuwela wira okathi Yehova aathanlale awe, owo khaamulenle mutthu mukina. Nto awo khanitikinihiwa vaavo mutthu mukina ohinikupali awe wira awo aathanliwa. Nave annisuwela wira Biibiliya onnintumererya wira nihaakuveleke omukupali khula mutthu onihimya wira Muluku onvaha eparakha ya vameekhaaya. (Wis. 2:2) MaKristau oothanliwa khaniphavela wira avuwihiweke. Nto vaavo anivaanela aya ni atthu akina, awo khanaaleela wira aathanliwa wira yakhaleke wiirimu. Moohaanyiherya, awo khaniikukumiha ohoolo wa atthu akina.​—Mmusome 1 aKorinto 4:7, 8.

7. Itthu xeeni maKristau oothanliwa anisyaka aya ni nthowa xeeni?

⁷ MaKristau oothanliwa khanuupuwela wira ahaana otthekula ni maKristau oothanliwa akhwaaya paahi, anakhala ntoko wira aniirela mpantta egrupu ya vameekhaaya. Nave khaniimananiha owaavya maKristau makina oothanliwa wira alavuleke myaha sinivarihana ni othanliwa waya aahiiso opaka egrupu ya omusoma Biibiliya ya atthu oothanliwa. (aGal. 1:15-17) Tthiri muloko khiwaarowa okhala wowiiraana vaakhanle wira maKristau oothanliwa annipaka eyo. Maana eyo khenivarihana ni munepa wootteela, yoowo onaakhaliherya arumeyi a Muluku okhala oowiiraana.​—aRom. 16:17, 18.

8. Xeeni vari aya vooloka okhalana ephoole enamuna nnaathokorerya ahu ale oothanliwa? (Nwehe enoota.)

⁸ Naathokoreryeke sai anna ni arokora oothanliwa? Ti voohiloka omuttittimiha mutthu mootepana, hata ori ene munnawe Kristu oothanliwa. (Math. 23:8-12) Vaavo Biibiliya onaalavula awe axitokweene, onnintumererya wira ‘mutakiheke wamini waya’ masi khonihimya wira nihaana waatthara apinaatamu ntoko ahooleli ahu. (aHéb. 13:7, Biblia Solempwa sa  Muluku) Ekeekhai wira Biibiliya onihimya wira nihaana ‘wattittimihiwa valupale’ atthu akina. Nihaana opaka eyo, mwaha woowi “aniwettiha orattene” ni ‘annihawela muteko w’olaleya ni wo wixuttiha’ ohiya mwaha woowi toothanliwa. (1 Tim. 5:17) Akhala wira munootepaka omuttottopela ni onvuwiha munna oothanliwa, owo onoopacerya okhalana moonelo woohiloka. * Nave pooti okhumelela etthu yootepexa otakhala, maana owo onrowa opaceryaka wiixinnuwiha. (aRom. 12:3) Tthiri khuuvo mutthu oniphavela owiiriha annawe Kristu oothanliwa opaka etthu eyo yoohiloka!​—Luka 17:2.

9. Ninrowa wooniherya sai wira ninnaattittimiha maKristau oothanliwa?

⁹ Ninrowa wooniherya sai wira ninnaattittimiha ale athanliwe aahiiso woottihiwa ni Yehova? Nisyakaka waakoha moota athanliwe aya. Xontte, muhiliyale wira owo mwaha wa mutthu mwaneene, nto nyuwo khamuneemereriwa ni khamurina ehakhi yoosuwela mwaha owo. (1 aTes. 4:11; 2 aTes. 3:11) Nave nihuupuweleke wira mwaaraya, iyaya, aahiiso amusi aya, nave toothanliwa. Musuweleke wira othanliwa wira mutthu akhaleke wiirimu khonaamweliwa mmapeleni nnakhala khonihiyeraniwa. Maana Muluku paahi tonaathanla. (1 aTes. 2:12) Nave nihaana osyaka opaka makoho yaarowa waanyoonyiha atthu akina. Mwa ntakiheryo, vaarowa okhala voohiloka omukoha mwaarawe munna oothanliwa wira, munoonela sai okhala mahiku otheene valaponi iyanyu ori ene wiirimu? Othene ahu, nihaana okupali wira elapo esya, Yehova onimwaavaha itthu sotheene “atthu othene”.​—Esal. 145:16.

10. Ninrowa wiikhapelela sai vaavo ninsyaka ahu waatthara ale ‘aniwepesa atthu’?

¹⁰ Vaavo nihintepa ahu waavaha efaita anna oothanliwa waavikana atthu akina, ninniikhapelela vanceene. Mwaha wa xeeni? Mwaha woowi, Biibiliya onihimya wira aakhala maKristau oothanliwa ahinrowa ovikaniha ororomeleya. (Math. 25:10-12; 2 Ped. 2:20, 21) Nave nihaana osyaka waatthara ale ‘aniwepesa atthu’ aphavelaka mureerelo aya paahi. Pooti wira, awo annisuweliwa vanceene, toothanliwa aahiiso akhumme khalai omurumeela Yehova. (Yuda 16) Akhala wira nnaatthara ale oothanliwa, okathi ahinroromeleya aya aahiiso ohiya ekeekhai, hiyo nave pooti ohiya omurumeela Yehova moororomeleya.

11. Exeeni eniiraneya ni nummuru na atthu anikhuura ithoonyeryo sa Wuupuwelela?

¹¹ Mwa iyaakha sinceene, nummuru na atthu ale anikhuura ithoonyeryo ninnitepa wuncerereya. Masi iyaakha iya sookiserya, khula mwaakha nummuru nlo nnootepa wuncerereya. Niireke nihaana oxanka? Nnaari. Nrowe niwehe nthowa naya vahinreerela aya oxanka.

12. Xeeni vahinreerela aya oxanka mwaha woowuncerereya nummuru na atthu anikhuura ithoonyeryo sa Wuupuwelela?

¹² “Apwiya [Yehova] annasuwela atthu ari awaya”. (2 Tim. 2:19) Moovirikana ni Yehova, anna anaakontari ale anikhuura ithoonyeryo sa Wuupuwelela, khanimusuwela mutthu othanliwe mwekeekhai. Nto nummuru nno aakhala atthu anihimya wira aathanliwa, variki ahithanliwe. Mwa ntakiheryo, atthu akina khalai yaakhuura ithoonyeryo iyo, muhoolo mwaya yaahihiya. Atthu akina annikhuura ithoonyeryo iyo mwaha woowi khakhanle saana mmuupuweloni, nto anikupali wira anrowa olamulelaka vamosa ni Yesu wiirimu. Tthiri eyo enooniherya wira khaninsuwela nummuru na maKristau oothanliwa nlelo ari valaponi.

13. Niireke Biibiliya onnihimya nummuru na MaKristau oothanliwa anrowa okhala valaponi ohalaka okathi vakhaani opacerya maxakha maalupale?

 ¹³ Anookhala maKristau oothanliwa mipantta sinceene sa olumwenku okathi Yesu onrowa awe waakuxa aaroihaka wiirimu. (Math. 24:31) Biibiliya onihimya wira okathi wa mahiku ookiserya yaamukhala maKristau oothanliwa vakhaani valaponi. (Wis. 12:17) Masi khonihimya nummuru na maKristau oothanliwa anrowa okhala valaponi ohalaka okathi vakhaani wira maxakha maalupale apacerye.

14. Ntoko onooniherya awe aRoma 9:11, 16, nihaana osuwela exeeni voohimya sa enamuna anithanliwa aya ale oowoottihiwa?

¹⁴ Yehova tonithanla okathi wowaathanla ale oowoottihiwa. (aRom. 8:28-30) Yehova opacenrye waathanla maKristau oowoottihiwa nuumala omuhihimuxa Yesu. Nto vanikhala ntoko wira maKristau otheene a eseekulu yoopacerya yaari oothanliwa. Okhuma okathi owo orowa muhoolo, atthu akina yaihimya okhala maKristau yaahihiya omutthara Kristu. Hata vari siiso, okathi ene yoowo, Yehova aanaathanla atthu vakhaani yaale yeettela ekeekhai. Awo yaari ntoko etriku, yeeyo Yesu aahimmye awe wira yaarowa wunnuwaka eriyari ya nthakathaka. (Math. 13:24-30) Mahiku ala ookiserya, Yehova onnivikaniha waathanla atthu anrowa wiirela mpantta egrupu ya 144.000. * Nto akhala wira Muluku onnaathanla atthu akina nihinatthi ophiya wanikisa, khuuvo mutthu okhanle oowaaphukela ankhili awe. (Mmusome aRoma 9:11, 16.) * Tthiri nihaana okhalana ephoole wira nihikhalane moonelo mmosaru yaarina aya alopwana akina a  nlikanyiho na Yesu. Awo yaaniixinliha mwaha wa enamuna mwaneene ematta aathokorenrye awe atthu akina yaavanre muteko okathi vakhaani paahi, khuliviwa esisapo emosaru.​—Math. 20:8-15.

15. Niireke maKristau otheene oothanliwa aniirela mpantta egrupu ya “murumeyi òroromeleya ni ànkhili” onilavuliwa Matheyo 24:45-47? Mutthokiherye.

¹⁵ Khahiyo wira maKristau otheene arina nlipelelo na okhalaka wiirimu aniirela mpantta egrupu ya “murumeyi òroromeleya ni ànkhili”. (Mmusome Matheyo 24:45-47.) Ntoko eseekulu yoopacerya, Yehova ni Yesu annaarumeela anna vakhaani wira yaavaheke yoolya ya omunepani aahiiso awiixuttiheke atthu anceene. Egrupu yaamukhaani paahi ya maKristau oothanliwa a eseekulu yoopacerya ti yaarumeeliwe wira alepe Soolempwa sa eGriki sa eKristau. Olelo-va, maKristau vakhaani paahi oowoottihiwa tarina muritti ‘wowàkawela yolya okathi aya’ arumeyi otheene a Muluku.

16. Mwaha ola, mwiixuntte exeeni?

¹⁶ Mwaha ola niixuntte exeeni? Yehova oothanla waavaha okumi woohimala valaponi arumeyi awe anceene. Nave ohaavaha atthu vakhaani paahi eparakha ya orowa okhalaka wiirimu wira yalamuleleke vamosa ni Yesu. Tthiri Yehova onnaatthuvela arumeyi awe otheene, akhale ale anithoonyerya “mutthu òYuda” aahiiso ale anithoonyerya “amalapo mulokó”. Owo oniphavela wira igrupu iyo piili siiweleleke malamulo awe ni ovikaniha ororomeleya. Otheene ahu nihaana okhala atthu oowiiyeviha. Nave, nihaana omurumeela Yehova mowiiraana. Nave-tho otheene ahu nihaana wiimananiha okhaliha murettele ni anna ni arokora. Tthiri vaavo nintepa ahu waattamela wanikisa wa olumwenku ola, nihaana wiimananiha omurumeela Yehova ni omutthara Kristu ntoko “nikoto nimosa”.​—Yoh. 10:16.