1. მუ იწინასწარმეტყველ იეჰოვაქ ჩქინ დროშ გურშენ?

იეჰოვაქ ჩქინ დროშ გურშენ იწინასწარმეტყველ: „არძა ნინაშ ხალხშე ვით კოჩ მანგარო ქიმეთხუნს ხეს იუდეველიშ კართეს დო უწინს: თქვანწკუმა ართო მოლურთ, მუშენდა გამგონებნა, თქვანწკუმა რენია ღორონთ“ (ზაქ. 8:23). თე მუხლის მოშინაფილ „იუდეველ“ მეუთითენს თინეფშა, მიდგას ღორონთ მუშ წმინდა შურით გიშაგორუნს ცხებულეფო. თინეფს „ღორონთიშ ისრაელ“ ხოლო ჯოხონა (გალ. 6:16). „ვით კოჩ“ მეუთითენს თი კათაშა, მიდგას დედამიწას მარადიულო ცხოვრებაშ იმენდ უღჷ. თინეფს უჩქნა, ნამდა იეჰოვაქ გიშეგორ ცხებულეფიშ თე ჯგუფ დო არჩქილენა, ნამდა დიდ პატი რე თინეფწკუმა თანამშრომლობა.

2. მუ გაგებათ „გილურს“ „ვით კოჩ“ ცხებულეფწკუმა ართო?

² მართალ რე, შეიოლებერ ვა რე თითოულ ცხებულ ქრისტიანიშ სახელ მიჩქუდან, მით ამდღა დედამიწას რე, * მარა დედამიწას ცხოვრებაშ იმენდ უღნან თინეფს, შეულებნა ცხებულეფწკუმა ართო „გილართან“. მუჭო რე თენა შეიოლებერ? ბიბლია იჩიებ, ნამდა „ვით კოჩ მანგარო ქიმეთხუნს ხეს იუდეველიშ კართეს დო უწინს: თქვანწკუმა ართო მოლურთ, მუშენდა გამგონებნა, თქვანწკუმა რენია ღორონთ“. მართალ რე, თე ბიბლიურ მუხლიშ პირველ ნაწილს მოშინაფილ რე ართ იუდეველ, მარა ბოლო ნაწილს ნაცვალსახელ „თქვანწკუმა“ მრავლობით რიცხვის რე დო მეუთითენს ართშე მეტ პიროვნებაშა. თენა ნიშნენს, ნამდა იუდეველს ხვალე ართ პიროვნება ვარინ, ცხებულეფიშ მთელ ჯგუფ იგულისხმებ. თინეფ, მიდგას დედამიწას ცხოვრებაშ იმენდ უღნა, ცხებულეფწკუმა ართო ომსახურნა  იეჰოვას. მარა, თინეფს ცხებულეფ წინამძღოლეფო ვემიორჩქნა, მუშენდა არჩქილენა, ნამდა იესო რე თინეფიშ წინამძღოლი (მათ. 23:10).

3. ნამ კითხვეფიშ პასუხეფს გებგენთ თე სტატიაშე?

³ ამდღა ღორონთიშ ხალხ შქას ცხებულ ქრისტიანეფ დიო ხოლო რენა, ათეშენ ნამთინე შილებე ფიქრენდას: 1) მუ დამოკიდებულება ოკო უღდან ცხებულეფს მუნეფიშ დუდწკუმა? 2) მუჭო ოკო მივექცუათ თინეფს, მით გოშინაშ ონჯუას სიმბოლოეფს ღებულენს? 3) ოკო ბწუხენდათო თიშე, ნამდა იძინანს თინეფიშ რიცხვ, მით სიმბოლოეფს ღებულენს? თე კითხვეფიშ პასუხეფს თე სტატიაშე ქიგებგენთ.

4. 1 კორინთელეფიშ 11:27—29-ს ინოჭარილ ნამ გაფრთხილებაშე ოკო დეფიქრან ცხებულეფქ დო მუშენ?

⁴ ცხებულეფქ სერიოზულო ოკო დეფიქრან გაფრთხლებაშე, ნამუთ ინოჭარ 1 კორინთელეფიშ 11:27—29-ს (წეკითხით). მუჭო შილებე ცხებულქ გოშინაშ ონჯუას, „ვაკუთვნუნ თეშ“ მიღას სიმბოლოეფ? თენა თაშ იჸუაფ, მუჟამსით პიროვნება გოშინაშ ონჯუას ღებულენს სიმბოლოეფს, მარა ვა ცხოვრენს იეჰოვაშ მაღალზნეობრივ ნორმეფით (ებრ. 6:4—6; 10:26—29). ცხებულეფს ჯგირო არჩქილენა, ნამდა ართგურეფქ ოკო ქუდოსქიდან დო თეშნერო,  ინჭუან „ღორონთშე ზეციურ მოწოდებაშ ჯილდოშა ქრისტე იესოშ საშვალებათ“ (ფილ. 3:13—16).

5. მუ დამოკიდებულება ოკო უღდან ცხებულეფს მუნეფიშ დუდწკუმა?

⁵ იეჰოვაშ წმინდა შურ ოხვარ მუშ ართგურ მსახურეფს, ამაყეფ ვარინ თანდაბალეფ რდან (ეფეს. 4:1—3; კოლ. 3:10, 12). ათეშენ, ცხებულეფ ვა ფიქრენა, ნამდა შხვეფშე უჯგუშეფ რენა. თინეფს ჯგირო უჩქნა, ნამდა იეჰოვა ცხებულეფს ვარზენს თიშე უმოს მეტ წმინდა შურს, ვინემ მუშ შხვა მსახურეფს. თინეფს ვემიორჩქნა, ნამდა შხვეფშე უჯგუშო ინანჭუნა ბიბლიურ ჭეშმარიტებას. თეს გეძინელ, ვართ შხვას ურაგადნა, ნამდა ცხებულეფ რენა დო გოშინაშ ონჯუას სიმბოლოეფიშ მეღება ოკო დიჭყას. თეშ მანგიორო, თინეფ თანდაბლურო აღიარენა, ნამდა ხვალე იეჰოვა გიშაგორუნს ხალხის ზეცას ოცხოვრებელო.

6. მუჭოთ 1 კორინთელეფიშ 4:7 დო 8-ს ჭარჷ, მუჭო ოკო მიქცუან ცხებულ ქრისტიანეფქ?

⁶ მართალ რე, ცხებულეფს არჩქილენა, ზეციურ მოწოდება დიდებულ პატი რე, მარა თანაქრისტიანეფშე განსაკუთრებულ პატიცემას ველნა (ფილ. 2:2, 3). ცხებულეფს უჩქნა, მუჟამსით იეჰოვაქ გიშაგორ თინეფ, თენა შხვეფშა ვა გუცხადებ. ათეშენ, ცხებულ პიროვნებას ვა უკვენს, მუჟამსით ნამთინეს უჭირს თიშ დაჯერება, ნამდა თინა ცხებულ რე. თის არჩქილე, ნამდა ბიბლია მომწოდენა, ხეთე ვა დუჯერათ თის, მით იჩიებ, ნამდა ღორონთშე განსაკუთრებულ პასუხიშმგებლობა აფჷ მეღებულ (გამოცხ. 2:2). ცხებულ ქრისტიანს ვაკო ყურადღება მუშ დუდშა გეგნიღას, ათეშენ მიდგას შეხვადუნ ირ კოჩის ვა ურაგად, ნამდა ზეციურ მოწოდება უღჷ. მუშო ოკო რაგად, თინა შხვეფწკუმა ვეცქვანს მუშ ზეციურ მოწოდებათ (წეკითხით 1 კორინთელები 4:7, 8).

7. მუს ურიდანა დუდის ცხებულეფ დო მუშენ?

⁷ ცხებულ ქრისტიანეფ ვა ფიქრენა, ნამდა ხვალე შხვა ცხებულეფწკუმა ოკო უღდან ურთიერთობა, ითამ არძაშე გიშართილ ჯგუფიშ წევრეფ რდან. თინეფ ვა გორნა შხვა ცხებულეფს თი მიზანით, ნამდა ზეციურ მოწოდებაშ გურშენ რაგადუან ვარდა ჩამოაყალიბან ბიბლიაშ გურაფაშ კერძო ჯგუფეფ (გალ. 1:15—17). ცხებულეფ თაშ ქიმიქციებდეს-და, თენა კრებაშ ართობას ეცილებუდ. თეშნერო, ღორონთიშ წმინდა შურს ვემეჩანდეს მოქმედებაშ საშვალებას, ნამუთ ოხვარ ღორონთიშ ხალხის, უღდან მშვიდობა დო ართობა (რომ. 16:17, 18).

8. მუშენ ოკო მიღდან გაწონასწორებულ დამოკიდებულება თინეფიშ მიმართ, მით გოშინაშ ონჯუას სიმბოლოეფს ღებულენს? (ქოძირით სქოლიო).

⁸ მუჭო ოკო მივექცუათ ცხებულ და დო ჯიმალეფს? სწორ ვეჸუაფ განვადიდათ პიროვნება  თიმწკუმა ხოლო, მუჟამსით თინა ქრისტეშ ცხებულ ჯიმა რე (მათ. 23:8—12). ბიბლია უხუცესეფწკუმა დაკავშირებით მომწოდენა, ნამდა მივაჸუნათ „თინეფიშ რწმენაშ მაგალითის“, მარა თინა ვამრაგადნა, ნამდა ადამიან წინამძღოლო მიფრჩქინათ (ებრ. 13:7). მუჭოთ ბიბლია იჩიებ, ნამთინე „ჟირ თისხი პატიშ ღირს“ თიშენ რე, ნამდა „ჯგირო ხემძღვანელენა კრებას“ დო „სიტყვა დო გურაფაშ საქმეს ბრელს ხანდენა“ დო ვართ ხოლო თიშენ, ნამდა ცხებულეფ რენა (1 ტიმ. 5:17). ათეშენ, ცხებულეფს განვადიდენთ დო ზედმეტ ყურადღებას ქიმვაქციენთ-და, თინეფს უხერხულს ქინვოჸოთანთ. * მუთ არძაშ უმოს უფრაშ რენ, შილებე ჩქინ გურშენ გეამაყან (რომ. 12:3). მითინ ვემიბკორინუანდით თიცალ მუდგარენიშ კეთებას, მუდგაშ გურშენ ქრისტეშ ცხებულ ჯიმა თეცალ სერიოზულ შეცდომას დუშვენდჷ! (ლუკ. 17:2).

9. მუჭო შემლებნა ვოძირათ, ნამდა პატის ფცენთ ცხებულეფს?

⁹ მუჭო შემლებნა ვოძირათ, ნამდა პატის ფცენთ ცხებულეფს? მაგალთო, ჩქი ვა ვოკითხუთ თინეფს, მუჭო მეხვადეს, ნამდა ცხებულეფ რენა. თენა პირადულ საკითხ რე დო თეშ რჩქინაშ უფლება ჩქი ვა მიღნა (1 თეს. 4:11; 2 თეს. 3:11). ჩქი ოკო ვეფიფქრათ, ნამდა ცხებულ ქრისტიანიშ მეუღლე, მშობლეფ ვარდა ოჯახიშ შხვა წევრეფ ხოლო ცხებულეფ რენა. ზეციურ მოწოდებას პიროვნება მემკვიდრეობათ ვარინ ღორონთშე ღებულენს (1 თეს. 2:12). თეს გეძინელ, ჩქი დუდ ოკო ავარიდათ თიცალ კითხვეფიშ დასმებას, ნამუთ გურს უჭუანს შხვეფს. მაგალთო, ჩქი ოკო ვა ბკითხათ ცხებულ ქრისტიანიშ ოსურს, მუს გინაფლენს, მუჟამსით ფიქრენს, ნამდა ახალ ქვეყნიერებას ქომონჯ გვერდით ვაჸვენუ. ჩქი შემლებნა დარწმუნებულ ვორდათ, ნამდა ახალ ქვეყნიერებას იეჰოვა დაკმაყოფილენს „ირ ცოცხალ არსებაშ სურვილს“ (ფსალმ. 145:16).

10. მუჭო დეფცვენთ ჩქინ დუდის, მუჟამსით ადამიანეფიშ განდიდებას დუდის ავარიდენთ?

¹⁰ ცხებულ ქრისტიანეფს შხვეფშე უმოს ყურადღებას ვემვაქციენთ-და, თეთ ჩქინ დუდის ხოლო დეფცვენთ. მუშენ იფჩიებუთ თეს? ბიბლია მირაგადნა, ნამდა შილებე ნამთინე ცხებულქ ბოლოშა ართგურქ ვა დოსქიდას (მათ. 25:10—12; 2 პეტ. 2:20, 21). ათეშენ ადამიანეფს ვა განვადიდენთ-და, შხვეფს დღას ვემიფრჩქინანთ ჩქინ წინამძღოლეფო, ვა უღჷ მნიშვნელობა თინეფ ცხებულეფ რენა დო ვარ თი ქრისტიანეფ, მით ბრელ ხან რე ომსახურ იეჰოვას ვარდა თი ქრისტიანეფ, მიდგას ბრელ იჩინენს (იუდ. 16). თი შემთხვევას ხოლო, მუჟამსით თინეფ ართგურეფ ვა დოსქიდნა დო კრებას ხოლო ქიდიტენან-და, ჩქი ვართ რწმენას ვოდინუანთ დო ვართ იეჰოვაშ მსახურებას მივოტენთ.

11. მუჭო ითირუ წანეფიშ დინახალე თინეფიშ რიცხვ, მით სიმბოლოეფს ღებულენს?

¹¹ წანეფიშ დინახალე ირკენდჷ თინეფიშ რიცხვ, მით სიმბოლოეფს ღებულენდჷ. მარა ბოლო წანეფს თინეფიშ რიცხვ ირიათო იძინანს. ოკო მაწუხენდანიო თე საკითხ? მუშო ოკო რაგად, ვარ! მორთ გუვარჩუათ თეშ მუსხირენ მნიშვნელოვან მიზეზი.

12. მუშენ ოკო ვა მაწუხენდან თინა, ნამდა გოშინას ონჯუას სიმბოლოეფს ბრელ ღებულენს?

¹² „იეჰოვა იჩინენს მუშის“ (2 ტიმ. 2:19). იეჰოვას უჩქჷ მი რე ცხებულ, მარა თი ჯიმალეფს, მით გოშინაშ ონჯუას კოროცხუნა თინეფიშ რიცხვის, მით სიმბოლოეფს ღებულენს, ვა უჩქნა, სინამდვილეს მი რე ცხებულ. თაშ ნამდა, სიმბოლოეფს თინეფ ხოლო ღებულენა, მიდგას მიორჩქ, ნამდა ცხებულ რე, მარა სინამდვილეს ვა რე. მაგალთო, ნამთინექ, მით დუდშე სიმბოლოეფს ღებულენდჷ, უმოს გვიანო მიოტუ თეშ კეთება.  ნამთინეს შილებე ფსიქიკურ დო ემოციურ პრობლემეფიშ გურშენ მიორჩქ, ნამდა ქრისტეწკუმა ართო იმეფენს ზეცას. არგამა რე, ჩქი ვა მიჩქნა კონკრეტულო მუსხი ცხებულ რე დოსქილადირ დედამიწას.

13. მირაგადნანო ბიბლია კონკრეტულო მუსხი ცხებულ იჸუაფ დოსქილადირ დედამიწას, მუჟამსით დიდ გასაჭირ ქიდიჭყაფუ?

¹³ მუჟამსით იესო ქუმურს, თინა დედამიწაშ შხვადოშხვა კუნთხუს მახორუ ცხებულეფს ზეცაშა მიდეჸონანს (მათ. 24:31). მუჭოთ ბიბლიაშე ბგებულენთ, ბოლო დღალეფს ცხებულეფიშ ჭიჭე რიცხვ იჸუაფ დოსქილადირ დედამიწას (გამოცხ. 12:17). მარა ბიბლიას ვა რე მოჩამილ, კონკრეტულო მუსხი ცხებულ იჸუაფ დოსქილადირ დედამიწას, მუჟამსით დიდ გასაჭირ ქიდიჭყაფუ ვარდა თე დროს სო იჸუაფნა თინეფ.

14. მუს ბგებულენთ რომაელეფიშ 9:11 დო 16-შე ცხებულეფიშ გიშაგორუაშ გურშენ?

¹⁴ იეჰოვა პირადო გინოჭყვიდუნს, მუჟამ ოკო გიშაგორას ცხებულეფ (რომ. 8:28—30). იეჰოვაქ ცხებულეფიშ გიშაგორუა იესოშ გათელებაშ უკულ დიჭყჷ. მუჭოთ იძირენ, პირველ საუკუნეს არძა ქრისტიან ცხებულ რდუ. მარა უკულიან წანეფს, თინეფიშ უმენტაშ, მით ამტკიცენდჷ, ნამდა ქრისტიანეფ რდეს, სინამდვილეს ვა მეჸუნდეს ქრისტეს. თეშ უმკუჯინუო, თე წანეფიშ დინახალე იეჰოვა ცხებულეფო გიშეგორუნდჷ ნამთინეს თინეფშე, მით ჭეშმარიტ ქრისტიანეფ რდეს. თინეფ „ქობალიშ კაკალს“ გუდეს, ნამდგაშენ იესოქ თქუ, ნამდა „ღვანძგილწკუმა“ ართო მირდუდეს (მათ. 13:24—30). თე ბოლო დღალეფს, იეჰოვა აგრძელენს თინეფიშ გიშაგორუას, მით 144000-იშ ნაწილ იჸუაფ. * ათეშენ, იეჰოვა ნამთინეს ცხებულეფო აღსასრულშახ ხოლო გეგშაგორუნს-და, მუთუნნერ საფუძველ ვა მიღნა, თიშ სიბრძნე ეჭვიშ  თუდო გივორინუათ (წეკითხით რომაელები 9:11, 16) *. ჩქი კურცხას ოკო ვორდათ, ნამდა ვა ვაგურათ თი მუშეფს, მით იესოქ მუშ ართ-ართ იგავს მიშინუ. თინეფქ უკმაყოფილება გიმოხანტეს თიშ გურშენ, ნამდა ბატონქ ართნერო გინუგ მუჭოთ მუნეფს, თეშ თინეფს ხოლო, მიდგაქ ბოლოს დიჭყჷ მუშობა (მათ. 20:8—15).

15. ქორენ დო ვარ არძა, მიდგას ზეციურ მოწოდება უღჷ, მათეშ 24:45—47-ის მოშინაფილ „ართგურ დო გონიერ მონაშ“ ნაწილ? გენწყით.

¹⁵ არძა, მიდგას ზეციურ მოწოდება უღჷ, ვა რე „ართგურ დო გონიერ მონაშ“ ნაწილ (წეკითხით მათე 24:45—47). მუჭოთ პირველ საუკუნეს, თეშ ამდღა ხოლო იეჰოვა დო იესო მუსხირენ ცხებულ ჯიმაშ საშვალებათ ოგურუანს შხვეფს. პირველ საუკუნეს ღორონთიქ მუსხირენ ცხებულ ქრისტიან გიმირინუ ქრისტიანულ-ბერძნულ წერილეფიშ ოჭარალო. ამდღა ხოლო, ხვალე მუსხირენ ცხებულ ქრისტიანს უღჷ პასუხიშმგებლობა, „ნამდა დროულო ქიმეჩას საზრდო“ ღორონთიშ ხალხის.

16. მუ დიგურეთ თე სტატიაშე?

¹⁶ მუ გებგით თე სტატიაშე? იეჰოვაქ გინოჭყვიდ, ნამდა მუშ ხალხიშ უმენტაშიქ მარადიულო იცხოვრას დედამიწას დო თინეფიშ ჭიჭე ნაწილქ ზეცას იცხოვრას, ნამდა იესოწკუმა ართო იმეფას. იეჰოვა აჯილდოენს მუშ არძა მსახურს, მუჭოთ „იუდეველს“, თეშ „ვით კოჩის“; ღორონთ თინეფშე ართნერო ითხინს მორჩილებას დო ართგურობას. არძაქ ოკო გიმირჩქინას თანდაბლობა. თინეფქ ართო ოკო იმსახურან დო უღდან ართობა. თეს გეძინელ, თითოულქ ირნერო ოკო ვეცადათ, ნამდა ხე ქეშუნწყუათ მშვიდობას და დო ჯიმალეფ შქას. მუთ უმოს ხოლოს ვორეთ აღსასრულწკუმა, მორთ არძაქ ვემსახურათ იეჰოვას დო მივაჸუნათ ქრისტეს, მუჭოთ „ართ ოჭყიშალიშ“ წევრეფქ (იოან. 10:16).