1. Mang e yog Jehovah nra buch ko ngiyal’ ney ni gad bay riy?

KE YIIYNAG Jehovah murung’agen e ngiyal’ ney ni gad bay riy ni ke gaar: “Ragag e pumoon u urngin mit e thin ko pi nam e yad ra kol e mad rok reb e pumoon nib Jew, me lungurad, ‘Gamad baadag ni nggu uned ngomed, ya kug rung’aged ni bay Got romed.’” (Zek. 8:23, NW) Fare “Jew” ni kan weliy murung’agen u roy e be yip’ fan e piin ke dugliyrad Got nga gelngin nib thothup. Ku yima yog “fare Israel rok Got” ngorad. (Gal. 6:16, NW) Fa ‘ragag i pumoon’ e be yip’ fan e piin yad be athapeg e yafos ni manemus u fayleng. Yad manang ni ke tow’athnag Jehovah e re ulung i walag ney ni kan dugliyrad, ma rogon u wan’rad e yad ba tow’ath ni ngar pigpiggad e pi walag ney ngak Got u taabang.

2. Uw rogon ni ma ‘un’ fa ‘ragag i pumoon’ ngak e piin kan dugliyrad?

² Yugu aram rogon ndabiyog ni ngad nanged fithingan urngin e piin kan dugliyrad ni ka yad bay u fayleng e ngiyal’ ney, * machane piin yad be athapeg e yafos u fayleng e rayog ni ngar “uned” ngak e piin kan dugliyrad. Ni uw rogon? Be yog e Bible nre ‘ragag i pumoon’ ney e “yad ra kol e mad rok reb e pumoon nib Jew, me lungurad, ‘Gamad baadag ni nggu uned ngomed, ya kug rung’aged ni bay Got romed.’” Re thin nu Bible ney e be weliy murung’agen taareb e Jew. Machane, fa gal bugithin ni “ngomed” nge “romed” e be yip’ fan boor e girdi’. Re n’ey e be yip’ fan nre Jew ney e gathi kemus ni taabe’, ya be yip’ fan fare ulung i Kristiano ni kan dugliyrad. Piin gathi yad boch e piin kan dugliyrad e yad ma pigpig e piin kan dugliyrad ngak Jehovah u taabang. Machane, darur ted ni piin kan dugliyrad e aram e piin nib ga’ rorad, ya yad manang ni Jesus e ir e En nib Ga’ rorad.​—Matt. 23:10.

3. Mang boch e deer ni gad ra weliy e fulweg riy u lan e re article ney?

³ Bochan ni bay boch e Kristiano ni kan dugliyrad ni ka yad bay u fithik’ e girdi’ rok Got u fayleng e ngiyal’ ney ndawor ranod nga tharmiy, ma sana rayog ni nge lemnag boch i gadad e pi deer ni baaray ni be gaar: (1) Mang e susun nge lemnag e piin kan dugliyrad u rarogorad?  (2) Susun nge uw rogon e ngongol rodad ngak e piin yad ra kay e flowa mar unumed e wain u nap’an fare Puguran? (3) Gur, bay rogon ni nge magafan’dad ni faanra ka be ulul ni nge yoor e piin yad be kay e flowa mar unumed e wain u nap’an e Puguran? Gad ra weliy e fulweg ko pi deer ney u lan e re article ney.

4. Mang ginang ni bay ko 1 Korinth 11:27-29 nsusun e ngari fal’eg e piin kan dugliyrad i lemnag, ma mang fan?

⁴ Piin kan dugliyrad e susun ni ngar ra fal’eged i lemnag fare ginang ni kan pi’ ni bay ko 1 Korinth 11:27-29. (Mu beeg.) Uw rogon nrayog ni nge kay be’ ni kan dugliy e flowa me unum e wain u nap’an e Puguran “ndariy fan u wan’”? Rayog ni nge buch e re n’ey ni faanra kay e flowa me unum e wain u nap’an e Puguran machane der fol ko pi motochiyel rok Jehovah. (Heb. 6:4-6; 10:26-29) Piin kan dugliyrad e yad manang ni faanra ‘nge yog puluwon ngorad, ni aram e pong ni ke ta’ Got ngorad u daken Kristus Jesus ni nga ranod ko yafos ni bay u tharmiy,’ ma aram e thingar ra pared ni yad ba yul’yul’.​—Fil. 3:13-16.

5. Mang e susun nge lemnag e piin kan dugliyrad u rarogorad?

⁵ Gelngin Jehovah nib thothup e ma ayuweg e pi tapigpig rok ni nge sobut’an’rad, ma gathi nge tolangan’rad. (Efe. 4:1-3; Kol. 3:10, 12) Ere piin kan  dugliyrad e darur lemnaged ni ka yad ba fel’ ko tin ka bay e girdi’. Yad manang ni gathi kab gel gelngin Jehovah nib thothup ni ma pi’ ngorad nga rogon ni ma pi’ ngak yugu boch e tapigpig rok. Ku darur lemnaged ni kab fel’ rogon ni yad manang fan e tin riyul’ u Bible nga rogon ni manang e tin ka bay e girdi’. Ku dariy ba ngiyal’ ni yad ra yog ngak be’ ni ke dugliy Got facha’, ere rayog ni nge tabab i kay e flowa me unum e wain u nap’an e Puguran. Ya yad manang ni kemus ni yigoo Jehovah e ir e ma mel’eg e piin yad ra un ko yan nga tharmiy.

6. Susun nge uw rogon e ngongol rok e pi Kristiano ni kan dugliyrad nrogon ni be yog e 1 Korinth 4:7, 8?

⁶ Yugu aram rogon ni manang e piin kan dugliyrad nri yad ba tow’ath ni ke yag e binem e athap ngorad ni ngar uned ko yan nga tharmiy, machane darur lemnaged nsusun e nge thil rogon e ngongol rok e tin ka bay e girdi’ ngorad. (Fil. 2:2, 3) Ku yad manang nnap’an ni dugliyrad Jehovah, ma de weliy murung’agen ko tin ka bay e girdi’. Ere be’ ni kan dugliy e dabi gin ngay ni faanra bay boch e girdi’ ndabi mich u wan’rad ko som’on ni ir bagayad e piin kan dugliy. Manang ni be yog e Bible ni faanra bay be’ ni be yog ni ke pi’ Got yugu reb e maruwel ngak nib thil, ma yugu dab da gurgad nge mich e re n’ey u wan’dad. (Rev. 2:2) Maku reb e, reb e Kristiano ni kan dugliy e dabun ni ngan n’uf nga lang. Ere nap’an nra mada’nag be’ ko yay nsom’on, ma dabi yog ngak ni ir bagayad e piin kan dugliy. Bin th’abi ga’ fan riy e dabi weliy murung’agen e re n’ey ngak yugu boch e girdi’ nib uf ngay.​—Mu beeg e 1 Korinth 4:7, 8.

7. Mang e ra siyeg e piin kan dugliyrad ndab rrin’ed, ma mang fan?

⁷ Pi Kristiano ni kan dugliyrad e darur lemnaged nsusun e ngaur chaggad yugu boch e walag ni kan dugliyrad u taabang ni gowa yad girdien reb e ulung ni yugu ba thil. Darur gayed yugu boch e walag ni kan dugliyrad ni bochan e ngaur weliyed murung’agen e n’en ke buch rorad u nap’an ni kan dugliyrad ara ra sunmiyed boch e ulung ngorad ni ngaur filed e Bible u taabang. (Gal. 1:15-17) Faanra rin’ e piin kan dugliyrad e pi n’ey, ma dabiyog ni nge par e ulung nib taareb. Maku reb e, ra yan i aw ni yad be togopuluw nga gelngin Got nib thothup, ni aram e re gelngin ni ma ayuweg e girdi’ rok Got ni ngar pared u fithik’ e gapas nge taareban’.​—Rom. 16:17, 18.

8. Mang fan nib t’uf ni ngad kol ayuwgad u rogon e ngongol rodad ngak e piin yad ma kay e flowa mar unumed e wain u nap’an e Puguran? (Kum guy e footnote.)

⁸ Susun nge uw rogon e ngongol rodad ngak e pi walag ni pumoon nge ppin ni kan dugliyrad? De fel’ ni ngad n’ufed be’ nga lang ni yugu ba pag rogon ni mus ni faanra ir reb i walagen Kristus ni kan dugliy. (Matt. 23:8-12) Nap’an nra weliy e Bible murung’agen e piin piilal, ma ma yog ni ngad ‘folgad u rogon ni ur pired nib michan’rad ngak Got,’ machane der ma yog nrayog ni ngad ted reb e girdi’ ni ir e ba ga’  rodad. (Heb. 13:7) Riyul’ ni be yog e Bible ni bay boch e girdi’ ni ‘bay rogon’ ni ngar ni tay farad. Machane, fan ni gad ma rin’ e re n’ey e bochan nib “fel’ e maruwel ni yad be tay” maku ba “gel e machib ni yad be tay nge thin rok Got ni yad be fil ngak e girdi’,” ma gathi bochan e yad boch e piin kan dugliyrad. (1 Tim. 5:17) Faanra ud n’ufed e piin kan dugliyrad nga lang ni yugu ba pag rogon, ma rayog ni ngad k’aringed e tamra’ ngorad. * Ma bin th’abi gel e kireb riy e rayog ni ngad k’aringed yad nge tolangan’rad. (Rom. 12:3) Dariy bagadad ni baadag ni nge rin’ ban’en nrayog ni nge k’aring reb i walagen Kristus ni kan dugliy ni nge rin’ ban’en nib gel e kireb riy!​—Luke 17:2.

9. Uw rogon ni ngad daged ni gad be tayfan e pi Kristiano ni kan dugliyrad?

⁹ Uw rogon ni ngad daged ni gad be tayfan e piin ke dugliyrad Jehovah? Ba mudugil ndab da fithed ngorad ko uw rogon ni kan dugliyrad. Re n’ey e dariy rogon ngodad, ere dariy rogon ni ngad guyed rogon ni ngad nanged murung’agen. (1 Thess. 4:11; 2 Thess. 3:11) Maku reb e, susun e dab da lemnaged ni figirngin ara leengin e pi walag ney, ara gallabthir rorad, ara yugu boch i girdien e tabinaw rorad e ku yad boch e piin kan dugliyrad. Biney e athap e der ma yag ngak be’ u daken e tabinaw rok, ya Got e ir e ra pi’ ngak. (1 Thess. 2:12) Susun e ku dab ud fithed boch e deer nrayog ni nge kirebnag laniyan’ boch e girdi’. Bod nsusun e dab da fithed ngak leengin reb e walag ni pumoon ni kan dugliy ko uw rogon u wan’ e ngiyal’ ni baaram nra par u fayleng ni manemus ndaki moy e pumoon rok. Bin riyul’ riy e, rayog ni ngari pagan’dad nnap’an ni gad ra yan nga lan e bin nib beech e fayleng, ma ra gaman urngin ban’en nra pi’ Jehovah ngodad ‘nge yan i aw ni ke fel’ u wun’dad ni gad gubin e tin ni nge yog ngodad.’​—Ps. 145:16.

10. Uw rogon ni ka gad be ayuwegdad ni faanra dab ud pied boch e girdi’ nga lang ko thin ara rogon e ngongol rodad ngorad?

¹⁰ Faanra dab ud ngongolgad ngak e piin kan dugliyrad u reb e kanawo’ nra m’ug riy ni kab ga’ farad ngak e tin ka bay e girdi’, ma aram e ku gad be ayuwegdad. Ni uw rogon? Be yog e Bible ni bay boch e piin kan dugliyrad nrayog ni nge dab kur pared ni yad ba yul’yul’. (Matt. 25:10-12; 2 Pet. 2:20, 21) Machane faanra dab ud pied boch e girdi’ nga lang ko thin ara rogon e ngongol rodad ngorad, ma aram e dariy ba ngiyal’ ni gad ra n’uf yugu boch e girdi’ nga lang nib pag rogon nib muun ngay e piin kan dugliyrad, ara piin boor e girdi’ ni manangrad, ara piin ke n’uw nap’an ni kar pigpiggad ngak Jehovah. (Jude 16) Ma faanra yan i ba ngiyal’ nda kur pared ni yad ba yul’yul’ ara ra chuwgad ko ulung, ma dabi war e michan’ rodad ngak Jehovah ara da talgad ko pigpig ngak.

11. Mang e be buch u urngin e piin yad be kay e flowa ma yad be unum e wain u nap’an e Puguran?

¹¹ Ke yan boor e duw ni be buchuuw i yan e piin yad be kay e flowa ma yad be unum e wain u nap’an e Puguran. Machane nap’an fapi duw ni ka fini yan, ma yibe guy ni be yoor e pi girdi’ ney. Ere gur, bay rogon ni nge magafan’dad ko re n’ey? Danga’. Ngad weliyed fan ndariy rogon ni nge magafan’dad ngay.

12. Mang fan nsusun e dabi magafan’dad nga urngin e piin yad be kay e flowa mar unumed e wain u nap’an e Puguran?

¹² “I Somol e manang e piin ni yad girdien.” (2 Tim. 2:19) Pi walag ni pumoon ni yad ma theeg urngin e piin ma kay e flowa me unum e wain u nap’an e Puguran e yad ba thil ngak Jehovah ni bochan e dar nanged ko mini’ e piin nriyul’ ni kan dugliyrad. Ere re namba ni baaram ni yad be theeg e ba muun ngay e piin yad be lemnag ni kan dugliyrad machane bin riyul’ riy e danga’. Bod ni, bay boch e girdi’ ni ur ked e flowa ma yad be unum e wain u nap’an e puguran me yan i boch nga tomuren mar talgad. Ku bay boch e girdi’ ni be sikirkireb lolugen ara bay e magawon rorad u rogon ni yad ma lem, ma aram mar lemnaged ni yad boch e  piin yad ra un ngak Kristus ko gagiyeg u tharmiy. Bin riyul’ riy e, dad nanged ko ri uw urngin e piin kan dugliyrad ni ka yad bay u fayleng e chiney.

13. Be yog e Bible urngin e piin kan dugliyrad ni yad ra moy u fayleng u nap’an nra tabab fare gafgow nib ga’, fa?

¹³ Boor e nam u fayleng nra moy e piin kan dugliyrad riy u nap’an nra yib Jesus i kunuyrad nga ranod nga tharmiy. (Matt. 24:31) Be yog e Bible ni kemus nri in e pi girdi’ nem ni kan dugliyrad e yad ra magey u fayleng u nap’an e tin tomuren e rran. (Rev. 12:17) Machane, der yog ko uw urngin e pi girdi’ ney e ra moy u nap’an nra tabab fare gafgow nib ga’.

14. Mang e ba t’uf ni ngad nanged u rogon ni yibe mel’eg e piin kan dugliyrad nrogon ni be tamilangnag e Roma 9:11, 16?

¹⁴ Jehovah e ir e ra dugliy e ngiyal’ ni nge mel’eg e piin kan dugliyrad. (Rom. 8:28-30) I tabab Jehovah i mel’eg e piin kan dugliyrad u tomuren nni faseg Jesus ko yam’. Be m’ug nnap’an e bin som’on e chibog, ma gubin e Kristiano ni yad boch e piin kan dugliyrad. Tin migid e chibog nga tomuren e re ngiyal’ i n’em, ma yooren e piin yad ma yog ni yad boch e Kristiano e gathi riyul’ ni yad boch i gachalpen Kristus. Yugu aram rogon, ma nap’an e pi duw nem, ma ka be mel’eg Jehovah e tin riyul’ e Kristiano u fithik’ e pi girdi’ nem ni ngar manged boch e piin kan dugliyrad. Pi girdi’ ney e yad boch fapi wheat ni faani yog Jesus nra tugul u fithik’ fapi pan. (Matt. 13:24-30) Nap’an e tin tomuren e rran, ma ka be ulul Jehovah ni nge mel’eg e piin yad ra mang bang ko fare 144,000. * Ere faanra dugliy Got ni nge son nge taw ko ngiyal’ ni kari chugur ko tomur mfini mel’eg boch e piin ngar uned ko re ulung ney, ma dariy rogon ni nge maruwar u wan’dad ko rib puluw e n’en ke rin’ fa danga’.  (Mu beeg e Roma 9:11, 16.) * Thingar da kol ayuwgad ndab da ngongolgad ni bod fapi girdien e maruwel ni bay murung’agrad u lan fare fanathin rok Jesus. Ra gun’gun’gad ni bochan e n’en ke rin’ e masta rorad ni fan ngak e tin baaram i girdien e maruwel nra bad ko maruwel ni yad ba tomur.​—Matt. 20:8-15.

15. Gubin e piin kan dugliyrad ni yad bang ko “fare tapigpig nib yul’yul’ ma ba gonop” ni bay murung’agen ko Matthew 24:45-47, fa? Mu tamilangnag.

¹⁵ Gathi urngin e piin yad be athapeg e yan nga tharmiy ni yad bang ko “fare tapigpig nib yul’yul’ ma ba gonop.” (Mu beeg e Matthew 24:45-47.) Ngiyal’ ney e be fanay Jehovah nge Jesus in e walag ni pumoon ni ngar pied e tin nib t’uf ara ngar skulnaged e pi tapigpig rok Got ni bod rogon ni ur rin’ew u nap’an e bin som’on e chibog. Kemus nri in e pi Kristiano ni kan dugliyrad e ni fanayrad u nap’an e bin som’on e chibog ni ngar yoloyed e Pi Babyor ko Bible nni Yoloy Nsom’on ni Thin ni Greek. Ere ku arrogon e ngiyal’ ney ni kemus nri in u fithik’ e pi Kristiano ni kan dugliyrad e kan tayrad ni ngaur pied gan e pi tapigpig rok Got “ko ngiyal’ ni yima pi’ riy.”

16. Mang e kam fil ko re article ney?

¹⁶ Mang e kad filed ko re article ney? Ke dugliy Jehovah ni nge pi’ e yafos ni manemus u fayleng ngak yooren e tapigpig rok, me pi’ e yafos ni manemus u tharmiy ngak in e tapigpig rok ni ke mel’egrad ni ngar uned ngak Jesus ko gagiyeg. Ma tow’athnag Jehovah urngin e pi tapigpig rok, ni aram e piin be yip’ fan fare pumoon nib “Jew” nge piin be yip’ fan fa ‘ragag i pumoon.’ Taareb rogon e motochiyel nib m’agan’ ngay ni ngar folgad riy mu kur pared ni yad ba yul’yul’. Yad gubin nthingar ra pared nib sobut’an’rad. Maku yad gubin nthingar ra pigpiggad ngak u taabang nib taareban’rad. Yad gubin nthingar ra guyed rogon ni ngar mon’ognaged e gapas u lan e ulung. Chiney ni gad be chugur i yan ko tomur e ngad athamgilgad ni gad gubin ngad ululgad ko pigpig ni gad be tay ngak Jehovah, ma gad lek Kristus ni gad “taab ran’ i saf.”​—John 10:16.