GU KEKEAPAI DU TIPA WISIGOHO 5
Ani Nika Ndu na Mo
“Ani ndú na mo, bambiko ani gi he ya Mbori du na oni.”—ZEK. 8:23 NW.
BIA 26 Oni Amangihe Fere
AGU APAI DU ROGO GI KEKEAPAI RE *
Gu kura akandoro (“akumba bawe”) na gu pa momu beyo nga ga iriso Yekova wa sa na mbedimbedi aKristano (“boro Ebere”) (Oni bi genewaraga 1-2)
1. Ginipai Yekova agumbaha nga si nika manga ti gi gaani regbo re?
YEKOVA agumba gupai kumbatayo tipa gaani regbo nga: “Akumba bawe nikazada ga gu boro Ebere baukadi, ki ya, ‘Ani ndú na mo, bambiko ani gi he ya Mbori du na oni.’” (Zek. 8:23, NW) Gu fugo du ane nga “Boro Ebere” narukuba agu aboro Mbori nambediyo na ziazia toro. I nayamba yo ayamba a nga “ga Mbori Yisaraere.” (Gara. 6:16) “Akumba bawe” narukuba agu aboro du na maabangirise tipa ka raka nyeanye kindi auru kpotosende. I ima ino gupai nga Yekova ima sia gi badona nga ga mbedimbedi aKristano re na i nabihe nga si nipa momu ka irisoko wa sa na yo.
2. Waigu “akumba bawe” ‘andú na’ mbedimbedi aKristano?
2 Wa vura duhe nga ka ani iningo rimo gu mbedimbedi aKristano dunduko du auru kpotosende areme te, * agu aboro du na gu maabangirise nga ga raka auru kpotosende ima rengba ka “ndú” na mbedimbedi aKristano. Ngba gini gene? Ziazia Kekeapai nagumba gupai nga “akumba bawe” “nikazada ga gu boro Ebere baukadi, ki ya, ‘Ani ndú na mo, bambiko ani gi he ya Mbori du na oni.’” Gi veresi nga ga Ziazia Kekeapai re fura tipa boro Ebere sa. Ono gu fugo nga “mo” gbiati “oni” nayugopa dungu aboro. Gere nayugo gupai nga anga boro sa du nga gu boro Ebere re te ono gu boro Ebere re narukuba gu badona dunduko nga ga mbedimbedi aKristano. Agu aboro angianga mbedimbedi aKristano ya nairiso Yekova wa sa na mbedimbedi aKristano. Ono tie, i abingo mbedimbedi aKristano wa gayo abangbembatayo te, bambiko i ima rugatiyo na gupai nga Yesu nga gayo Bangbembatayo.—Mt. 23:10.
3. Gini asanahe ani nika karagapai kutini rogo gi kekeapai re?
3 Wa duhe nga mbedimbedi aKristano kindi dagba ga Mbori aboro areme, kura aboro ima rengba kaa bakabangiriyo nga: (1) Waigu si aida mbedimbedi aKristano naabi tiyo? (2) Waigu si aida ani naamangapai na agu aboro nari kpakuto na kini mbiri imekakue ti regbo Tingida Pakpio Yesu? (3) Ya mo si naida ani naabakabangirani ka bange agu aboro nari kpakuto na kini mbiri imekakue aakio kina kumbatayo? Gi kekeapai re nika karagapai kuti agu asanahe re.
WAIGU SI AIDA MBEDIMBEDI AKRISTANO NAABI TIYO?
4. Gini zahe du rogo 1 AKorindo 11:27-29 si aida mbedimbedi aKristano berẽkuriihe nyanyaki, na tipagine?
4 Si naida mbedimbedi aKristano berẽ nyanyaki kurii gu zahe du rogo 1 AKorindo 11:27-29. (Oni gedihe.) Waigu rengbe mbedimbedi Kristano kadu na “gbegberẽ berã” kini ri kpakuto na kini mbiri imekakue ti regbo Tingida Pakpio Yesu? Ni rengbe kadu wo ka si du nga ni nari kpakuto na kini mbiri imekakue ono ka ni arakanga ringbisihe kuti ga Yekova ruru arugute ya. (Eb. 6:4-6; 10:26-29) Mbedimbedi aKristano ima ino gupai nga si naida i nye ni ruruyo ka i aaida ka gbia “gu ringbisiringbisi he du ku mbata yo sa dia gu mosoro du ti ga Mbori yambahe ari yo rogo Kristo Yesu yo.”—Frp. 3:13-16.
5. Waigu si aida mbedimbedi aKristano naabi tiyo?
5 Ga Yekova ziazia toro naundo gako amoyambu i du na umbasitise, angianga i du na rukö ya. (Ef. 4:1-3; Koro. 3:10, 12) Sidu, mbedimbedi aKristano abingo ho nga i ngba kisusi kura aboro te. I ima ino gupai nga Yekova afunga bakere ziazia toro fu mbedimbedi aKristano kisusi gu ko afuhe fu gu kura gako amoyambu te. I abingo ho nga i gi rogo agu arengo yo nga ga Ziazia Kekeapai kisusi kura aboro te. Na i arengbanga ka gumba gupai fu kura boro nga ni ima da ni mbedimbedi Kristano na si naida ni tona ri kpakuto na kini mbiri imekakue ti regbo Tingida Pakpio Yesu te. Kuba gure, i ima rugatiyo na gupai nga kina Yekova sa nasia aboro tipa i ndu ku ngbangbaturũ yo.
6. Ringbisihe kuti 1 AKorindo 4:7, 8, waigu si aida mbedimbedi aKristano naamangapai?
6 Wa vura duhe nga mbedimbedi aKristano nabihe nipa momu nga i sia yo i ndu ku ngbangbaturũ yo, i aberãnga gupai nga si naida kura aboro ni mangipai na yo ngba kparakpara gene te. (Frp. 2:2, 3) I ima ino gupai a nga ho Yekova ambedi yo ni na ziazia toro, ko aasanga gupai nga aboro dunduko ini gupai mangi te. Sidu, si arengbanga ka kpakara bangiri mbedimbedi Kristano te ka si du nga gu kura aboro aaidanga kuti gupai nga i ima sia ni ni mbedimbedi Kristano te. Ni ima ino gupai nga Ziazia Kekeapai nagumba gupai furani nga ka ani idinga ni ipo kuti gu boro naya Mbori ima fu kparakpara sunge fu ni ya. (Yugo. 2:2) Mbedimbedi Kristano aidanga ka gbeberã aboro kuti tini te. Sidu, ni agumbanga gupai fu agu aboro ni agbiayo ti bambata regbo nga ni nga mbedimbedi Kristano te. Na ni amanganga rukö na ni fu kura aboro te.—Oni gedi 1 AKorindo 4:7, 8.
7. Ginipai mbedimbedi aKristano ane mangaha, na tipagine?
7 Mbedimbedi aKristano abingo ho nga si naida i naadia regbo na kina akurayo mbedimbedi aKristano te, si du wa ka i ya i rogo kura kparakpara badona te. I aˈasadanga ka gbata gu kura mbedimbedi aKristano tipa wa ka i fura tipa wai i nambedi yo na ziazia toro na tipa ka wisigo Ziazia Kekeapai kina sa te. (Gara. 1:15-17) Ka mbedimbedi aKristano aamanga ngbatunga agu apai re, kodatise dunga rogo dungurati te. I nimangingo pai ringbisihe kuti ziazia toro nga gu naundo ga Mbori aboro i du na zereda gbiati kodatise te.—Rom. 16:17, 18.
WAIGU SI AIDA ANI NAAMANGAPAI NA MBEDIMBEDI AKRISTANO?
Si aidanga ani mangipai na mbedimbedi aKristano watadu gu kura aboro nga aguyo nangbembatayo rogo apai yo wa ka i ya i nga abaworimo te (Oni bi genewaraga 8) *
8. Tipagine si aida ani du ti ni na rubangirise nibipa gu gene ani amangapai ngbaha na agu aboro nari kpakuto na kini mbiri imekakue ti regbo Tingida Pakpio Yesu? (Oni bi gu kekeapai du bandu waraga yo.)
8 Waigu si aida ani naamangapai na mbedimbedi aKristano? Gupai nga boro ngba tirani ni kerehe na kini fu irisa fu ni ni bakerehe ima rengba kadu ni gbegberẽpai ka si vura du nga gu boro re nga mbedimbedi wirina Kristo vurũ. (Mt. 23:8-12) Ho Ziazia Kekeapai afura ni tipa abaakumba, si nangarasa rani nga ani wiriki “gayo idapase,” ono si agumbanga gupai furani nga ani ima rengbe ka sa ai boro ni gaani bangbembatayo te. (Eb. 13:7) Si nirengo nga Ziazia Kekeapai nagumba gupai nga gu kura aboro kinaho “re na irisa susi.” Ono si wo mbiko gupai nga i “nazoga rago wenengaĩ” na i “namanga sunge rogo tungusapai na yugopai” nyanyaki, angianga mbiko gupai nga i nga mbedimbedi aKristano ya. (1 Tim. 5:17) Ka ani aatambua yo ni bakerehe gbe na kini gbeberã rani kutiyo gbe, ani ima rengba ka ba zee tiyo. * Watadu gu gberẽ agberã gbe nga ani ima rengba ka sa yo i da ni airarukö. (Rom. 12:3) Boro ho dagbarani yo si aida ni mangi ai gupai rengbe ka sa boro sa dagba mbedimbedi awirina Kristo yo ni mangi ngbatunga gu kere ingahe re te!—Rk. 17:2.
9. Waigu rengbe ani ka yugo irisa fu mbedimbedi aKristano?
9 Waigu rengbe ani ka yugo irisa fu agu aboro Yekova ambeda yo na ziazia toro? Ani arengbanga ka sanayo tipa wai i ada ni mbedimbedi aKristano te. Gere nga gupai nabi kina pa boro, adunga rengo berani ka ino pai tipaha ya. (1 Tesa. 4:11; 2 Tesa. 3:11) Na si aidanga ani berẽ gupai nga gayo badia rogatise, avunguyo, watadu gu kura gayo aborokporo ima da a ni mbedimbedi aKristano te. Boro adianga gu maabangirise nga ga raka ngbangbaturũ yo be gani aborokporo te. Ni nagbiaha be Mbori. (1 Tesa. 2:12) Na si naida ani ne sana agu asanahe rengbe ka ba gberãrago ti kura aboro. Ni kpiapai, ani arengbanga ka sana dia mbedimbedi Kristano tipa gari bipai nibipa raka auru kpotosende ane nyeanye kindi zanga kumbari te. Gu kurapai berewe nga, ani ima rengba kadu na bakere kido nga rogo vovo zegino, Yekova nika mbisa “gu nyemuhe nga ga unga ahe dunduko.”—Tam. 145:16.
10. Waigu ani abanda tirani ka ani ne gupai nga ga “bi aboro na kiki payo kisusi”?
10 Ka ani aabingo mbedimbedi aKristano nga i payo nanyaki kisusi ga gu kura aboro ya, gure nga ani nabanda tirani a. Ngba gini gene duhe wo? Ziazia Kekeapai nagumba gupai furani nga gu kura mbedimbedi aKristano ima rengba ka zanga nye ni ruruyo. (Mt. 25:10-12; 2 Pet. 2:20, 21) Ono ka ani ne gupai nga ga “bi aboro na kiki payo kisusi,” ani pekenga fuo kura aboro te, zavura agu aboro nga mbedimbedi aKristano, agu aboro aboro naima inoyo wenengai, watadu agu aboro naima iriso Yekova tipa gbanga regbo. (Yuda 16, NW) Na, ka i adunga ni ruruyo berewe ya watadu ka i mbu dungurati, ani ambunga gaani idapase kuti Yekova watadu ka mbu irisoko te.
YA MO SI NAIDA ANI NAABAKABANGIRANI TIPA BANGE AGU ABORO NARI KPAKUTO NA KINI MBIRI IMEKAKUE?
11. Ginipai ninaamanga tipa bange agu aboro nari kpakuto na kini mbiri imekakue ti regbo Tingida Pakpio Yesu?
11 Tipa dungu agarã, bange agu aboro nanaari kpakuto na kini mbiri imekakue pati Tingida Pakpio Yesu aazora kina kusende. Ono vuru agu agarã susi bambeda kusayo, bange agu aboro nari kpakuto na kini mbiri imekakue nakio kina kumbatayo na agarã dunduko. Ya mo si naida ani bakibangirani tipa gipai re? Oó. Ani sakingo pai tipa bete nyanyakipa apai nga gu si aida ani moihe ku berãrani yo.
12. Tipagine si aidanga ani bakibangirani na pa bange agu aboro nari kpakuto na kini mbiri imekakue ti regbo Tingida Pakpio Yesu ti ni ya?
12 “[Yekova] ini agu yo nga gako yo.” (2 Tim. 2:19) Agu awirina nageda bange agu aboro nari kpakuto na kini mbiri imekakue pati Tingida Pakpio Yesu wa Yekova te, bambiko i ainongo da nzunzu nga mbedimbedi Kristano te. Sidu, bangeyo nakoda agu aboro naberã gupai nga i nga mbedimbedi aKristano ono i nga mbedimbedi aKristano te. Ni kpiapai, gu kura aboro kinaho nanaari kpakuto ari mbata na kini mbiri imekakue ono kusa i kini mbuhe. Si rengbe kadu nga agu akurayo na wiri kpakarapai riyo yo si kini sa gupai nga i berẽ gupai nga i nika zogarago na Kristo ngbangbaturũ yo. Si tie ziazia nga, ani ainongo bange gu mbedimbedi aKristano nzunzu nye auru kpotosende te.
13. Ya mo Ziazia Kekeapai gumbapa bange gu mbedimbedi aKristano nika du auru kpotosende ho bakere gberãngbi nika tona ni?
13 Mbedimbedi aKristano nika duadu rogo dungu apapara kpotosende ho Yesu nika ye ni ka dia yo ku ngbangbaturũ yo. (Mt. 24:31) Ziazia Kekeapai nagumba gupai agumba nga rogo yangara arame, bange mbedimbedi aKristano nika nye gbua tooni auru kpotosende. (Yugo. 12:17) Ono si agumbanga pa bange gu mbedimbedi aKristano nika nye ho bakere gberãngbi nika tona ni te.
Ginipai rengbe ani ka manga ha ka boro ri kpakuto na ki mbiri imekakue ti regbo Tingida Pakpio Yesu? (Oni bi genewaraga 14)
14. A wa i nayuguhe rogo ARomo 9:11, 16, ginipai si aida ani rugutirani na ni nibipa sia mbedimbedi aKristano?
14 Yekova du nadiaberã tipa gini regbo si aida ko sia mbedimbedi aKristano ti ni. (Rom. 8:28-30) Yekova atona sia mbedimbedi aKristano fuo zinga Yesu be kpio. Na si nawira gupai nga rogo bambata sa kama agarã, ndikidi aKristano dunduko nangia mbedimbedi aKristano. Rogo agu agarã dunduko nangbefuo gure, badungu agu aboro naaya i nga aKristano anaapekanga fuo Kristo nzunzu te. Wa si avura du wo, vuru agu agarã yo re, Yekova ambedi gu bete aboro na ziazia toro nangia ndikidi aKristano. I adu wakina gu morũ Yesu agumba gupai nga si nika sona dagba rende. (Mt. 13:24-30) Rogo gi yangara arame re, Yekova nandu kindi kumbatayo kaa sia agu aboro nika du ni papara gu mbedimbedi aKristano du bange yo nga 144,000. * Sidu, ka si du nga Mbori diberã ka sia bete agu aboro re mbata fu digido zegino, si ni rengo nga si aidanga ani kapa kuti gako tatamana te. (Oni gedi ARomo 9:11, 16.) * Si naida ani du na rubangirise ka zanga mangapai wa agu abamangisunge Yesu afura tipa yo rogo gako asanza. I akpakanahe tipa wai bairayo amangipai na agu aboro natona mangasunge kusa.—Mt. 20:8-15.
15. Ya mo mbedimbedi aKristano dunduko nga papara gu “kangara moyambu” i nafura tipa yo rogo Matayo 24:45-47? Oni sakingo rogo yo.
15 Anga agu aboro dunduko du na gu maabangirise nga ga raka ngbangbaturũ yo du nga papara “kangara moyambu” te. (Oni gedi Matayo 24:45-47.) AYekova na Yesu namangasunge areme na bete awirina gbua tipa ka riga watadu ka yugopai fu badungu aboro kina wai si adu rogo bambata sa kama agarã. Kina bete aKristano gbua rogo bambata sa kama agarã i amangisunge na yo tipa i ke Vovo Ndika. Areme, kina bete mbedimbedi aKristano du gu tindiro beyo nga ga fu ‘riahe ti ragoho’ fu ga Mbori aboro.
16. Ginipai mo nawirikihe rogo gi kekeapai re?
16 Ginipai gi kekeapai re nayuguhe furani? Yekova ima diaberã ka fu nyenye unga fu badungu gu gako aboro du auru kpotosende na ki fu raka ngbangbaturũ yo fu gu bete aboro nika zogarago na Yesu. Yekova nafu mosoro fu gako amoyambu dunduko, fu “boro Ebere” wa sa na “akumba bawe”—na ko naida gupai beyo nga i mangipai kuti bangisa andiko sa na ki nye ni ruruyo. I dunduko si aida i nye ni aboro umbasitise. I dunduko si aida i irisiko wa sa na ki nye ni kodikodi yo. Na ani dunduko si aida ani mangi nyanyaki asadatise tipa ka manga zereda na awirinarani. Wa ani ambeda kuti digido gi zegino re, ani dunduko dinga berã adia kaa iriso Yekova na kini pekefuo Kristo wa ‘rimbasa akandoro’ sa.—Yo. 10:16.
^ ekeb. 5 Rogo gi garã re, Tingida Pakpio Kristo nika manga Rago Ue, rogo Zerekpe ti rameru 7. Waigu si aida ani bi agu aboro nari kpakuto na kini mbiri imekakue ti regbo Tingida Pakpio Yesu? Ya mo si naida ani bakibangirani ka si du nga bange agu aboro nari kpakuto na kini mbiri imekakue nakio kina kumbatayo? Ani nika gbia akaragapai kuti agi asanahe re rogo gi kekeapai re, nga gu du mburuhe rii gu kekeapai naadu rogo gu Ngbaõbambu Sinziri nangia ga Ngi 2016.
^ ekeb. 2 Ringbisihe kuti Atambuahe 87:5, 6, Mbori ima rengba ka yugo rimo agu aboro kumbatayo dunduko nika zogarago na Yesu ngbangbaturũ yo.—Rom. 8:19.
^ ekeb. 8 Oni bi gu sanduki nga, “Nyemuse ‘Amanga Nga Gu pai Angba Nga ya Te’” rogo gu Ngbaõbambu Sinziri, nangia ga Ngi 2016.
^ ekeb. 14 Wa vura duhe nga Amokedi 2:33 nayugo gupai nga ziazia toro naye vurube Yesu, Yekova du nasia aboro ni basasa.
^ ekeb. 14 Ka oni aaida ka ino kura dungu apai, oni bi “Asanahe be Agedihe” rogo gu Ngbaõbambu Sinziri nangia ga Merekoko 1, 2007, si rogo pa-Ingirisi.
BIA 34 Ta Rogo Rengo
^ ekeb. 56 SAKAPAI TIPA ASURA: Mo berẽnga pa wai ka si du ni zanga pa irisa ka ndurumo aboro ke gu wirina na diako ye rogo rii-basunge ti regbo bakere dunguratise kaa dia sura na yo!!
