Anase vaʼekue Canadápe peteĩ siuda héravape Quebec. Ko siuda opyta peteĩ provínsia héravape avei Quebec, oñeñeʼẽhápe francés. Che tuakuéra Louis ha Zélia imbaʼeporã ha cherayhueterei vaʼekue. Che túa hiʼotĩeterei ha oleeseterei vaʼekue. Che katu ajepokuaa vaʼekue askrivi heta mbaʼe, ha aipota vaʼekue oiko chehegui periodísta chetuicha rire.

Arekórõ guare 12 áñorupi, Rodolphe Soucy, peteĩ che túa kompañéro de traváho oho ógape peteĩ iñamígondi. Haʼekuéra testígo de Jehová. Che ndaikuaái vaʼekue heta mbaʼe umi Testígogui, ha nacheinteresaguasúi vaʼekue upe rrelihión. Péro cheimpresiona mbaʼéichapa trankílo porãnte orrasona orendive, ha oipuru porã la Biblia ombohovái hag̃ua umi pregúnta rojapóva chupekuéra. Che tuakuéra ohecharamoiterei avei upéva, upévare roñepyrũ rostudia la Biblia hendivekuéra.

Upérõ che aike kuri peteĩ eskuéla katólikape, ha añemongeta jepi che kompañerokuérandi umi mbaʼe aaprendévare la Bíbliagui. Péro upéi umi profesór, haʼéva saserdóte, opilla ore roñeʼẽha umi mbaʼére. Oipuru rangue la Biblia ohechauka hag̃ua oĩ vaiha la haʼéva, haʼekuéra oñepyrũ heʼi enterove rovake che haʼeha peteĩ rrevélde. Upe moméntope atĩeterei ha añeñandu vai kuri, péro amo ipahápe upéva tuicha chepytyvõ. Upéva rupive ahechakuaa umi mbaʼe omboʼéva pe eskuéla rrelihiósa oñemoĩha la Biblia omboʼévare, ha ndahavéima vaʼerãha upe eskuélape. Upévare che tuakuéra omeʼẽ chéve permíso ava hag̃ua de eskuéla.

Asegi vaʼekue astudia la Biblia, péro mbegueterei aprogresa akyhyjégui asẽ hag̃ua apredika ogahárupi. Upe tiémpope ojerrespetaiterei vaʼekue pe Iglésia Katólika heʼíva, ha haʼekuéra oñemoĩ mbarete vaʼekue pe predikasiónre. Hiʼarive, Maurice Duplessis, peteĩ  polítiko omanda guasúva Quebécpe, oapoja kyreʼỹ vaʼekue chupekuéra. Upéicha rupi, umi hénte opersegi ha oataka jepi voi umi Testigokuérape. Upévare upe tiémpope, Testigokuéra tekotevẽ kuri ipyʼaguasu osẽ hag̃ua opredika.

Oĩ vaʼekue peteĩ ermáno tuichaiterei chepytyvõva anivéma hag̃ua chepyʼamirĩ predikasiónpe. Haʼe héra John Rae, ha oho vaʼekue Eskuéla de Galaádpe, pe kláse 9-pe. John ikatupyryetereíramo jepe, haʼe iñumílde ha igústo vaʼekue ñañemongeta hendive. Haʼe ningo saʼieterei oñemoñeʼẽ vaʼekue chéve cheakonseha hag̃ua, péro tuichaiterei chepytyvõ iñehémplo rupive. Jóhnpe oforsaiterei vaʼekue pe francés, upévare pyʼỹinte che aha hendive predikasiónpe ha aipytyvõ chupe opredikakuaa hag̃ua francéspe. Ahasa rupi heta tiémpo hendive, upéva chepytyvõ ajedesidi hag̃ua oikotaha chehegui testígo de Jehová. Upévare ajevautisa el 26 de mayo de 1951, 10 áño añepyrũ haguépe añemongeta umi Testígondi.

Ore kongregasión oĩva Quebécpe michĩ vaʼekue, péro upépe la majoría haʼe vaʼekue prekursór. Haʼekuéra tuicha chemokyreʼỹ amoñepyrũ hag̃ua avei che prekursorádo. Upe tiémpope, la Biblia añoite roipuru vaʼekue ropredika hag̃ua ogahárupi. Ndoroipurúi rupi puvlikasión ropredika hag̃ua, tekotevẽ kuri orevakeáno roipuru hag̃ua la Biblia. Upévare añehaʼã aaprende umi téxto chepytyvõtava adefende hag̃ua umi mbaʼe omboʼéva la Biblia. Upéicharõ jepe, oĩ vaʼekue heta hénte ndoleeséiva umi Biblia ndoaprovái vaʼekue pe Iglésia Katólika.

Áño 1952-pe amenda peteĩ ermána ifiélvare hérava Simone Patry. Ore roĩ vaʼekue la mísma kongregasiónpe Quebécpe, péro upéi rova Montreálpe. Ha un áño romenda haguépe onase che rajyʼi Lise. Che ningo aheja vaʼekue che prekursorádo romenda riremínte, péro upéicharõ jepe Simone ha che roñehaʼã roiko sensillomínte, ikatu hag̃uáicha ore família oapoja ikatúva entéro umi mbaʼe ojejapóva ore kongregasiónpe.

Diez áño haguépe ae añepyrũ jey apensa sériamente ajapo jey hag̃ua che prekursorádo. Áño 1962-pe aha kuri Eskuéla del Ministério del Rréinope, ojejapóva ansianokuérape g̃uarã ha ipukúva un mes. Upe eskuéla ojejapo kuri Betel de Canadápe, ha añeasigna akomparti hag̃ua peteĩ koty peteĩ ermáno héravandi Camille Ouellette. Ko ermáno ningo ikyreʼỹeterei vaʼekue predikasiónpe ha upéva cheimpresionaiterei, koʼýte haʼe orekóma rupi hembireko ha ifamiliakuéra. Upe tiémpope, Quebécpe ndaiporiguasúi vaʼekue túa térã sy ojapóva iprekursorádo omongakuaa aja ifamiliakuérape, péro upéva kuri Camille méta. Pe eskuéla aja, haʼe chemokyreʼỹ apensa porã hag̃ua che situasiónre, ha unos mése haguépente ahechakuaa ikatuha añepyrũ jey che prekursorádo. Oĩ vaʼekue  heta opensáva ndadesidiporãi hague, péro che lomímonte aha rei hese. Aikuaa kuri Jehová katuete chevendesitaha añehaʼã haguére ajapo hetave mbaʼe iservísiope.

Áño 1964-pe, Simone ha che roñenombra prekursór espesiál, ha roñeasigna roservi hag̃ua Quebécpe, pe siuda ronase haguépe. Heta áñore roservi kuri upépe, ha upe tiémpope iporãvéma kuri la situasión ojepredika hag̃ua, péro lomímonte oĩ mimi gueteri la oñemoĩva orerehe.

Peteĩ sábado kaʼaru, peteĩ polisía chejagarra peteĩ siuda héravape Sainte-Marie, ko siuda michĩ ha namombyrýi opyta Quebécgui. Pe polisía cheraha komisaríape ha chemoinge peteĩ kalavósope apredika rupi ogahárupi arekoʼỹre permíso. Upéi ajegueraha peteĩ hués renondépe. Pe hués héra vaʼekue Baillargeon, ha nemongyhyjéma voi emaña haguénte hese. Haʼe oporandu chéve mávatapa la che avogádo, ha che amombeʼu chupe haʼetaha Glen How, * peteĩ avogádo Testígo ikonosidoitereíva. Ohendúrõ guare upe téra, pe hués oñemondýi ha heʼi: “¡Nde! ¡Anínati péa!”. Ermáno Glen How ikonosído vaʼekue odefende rupi heta Testígope ha ogana haguére hetaiterei káso. Upe riremínte, pe trivunál oikuaaukáma chéve ojerretira hague umi akusasión oĩva che kóntrape.

Oĩ rupi heta oñemoĩva orerehe Quebécpe, ijetuʼu vaʼekue oréve rotopa hag̃ua peteĩ lugár ikatúva roalkila rojapo hag̃ua umi rreunión. Ore kongregasión michĩ vaʼekue, ha peteĩ lugár añoite rotopa roñembyaty hag̃ua: Peteĩ koty anteve ojepuru vaʼekue de estasionamiénto. Ko lugár ningo ituja, ipínta vaieterei ha ndorekói vaʼekue kalefaksión. Upévare inviérnope, roʼyeterei jave, umi ermáno omyendy peteĩ estúfa oipurúva aséite oiko hag̃ua. Ore pyʼỹinte roñembyatými pe estúfa jerére unas kuánta óra oñepyrũ mboyve umi rreunión, ha romombeʼu heta experiénsia oremokyreʼỹetereíva.

Umi áño ohasa vaʼekuépe, ojehupyty hetaiterei mbaʼe porã predikasión rupive, ha igustoiterei jahecha upéva. Por ehémplo, áño 1960 rupi sólamente oĩ vaʼekue unos kuánto kongregasión michĩva Quebec jerére, pe sóna héravape Côte-Nord ha península de Gaspé. Koʼág̃a g̃uarã katu umi lugárpe oĩma hetaiterei ermáno ha ermána, ha oñembyaty hikuái umi Salón del Reino iporã porãvape.

Áño 1970-pe, Simone ha che roñeinvita roservi hag̃ua de superintendénte de sirkuíto. Upéi, 1973-pe roñeinvita roservi hag̃ua de superintendénte de distríto. Umíva umi áñope aaprende kuri hetaiterei mbaʼe umi superintendénte ikatupyrývagui, por ehémplo ermáno Laurier Saumur * ha David Splane. * Opa rire káda asambléa, David ha che romeʼẽ vaʼekue ojupe algúno konsého ikatu hag̃uáicha romehora romboʼe lája. Chemanduʼa peteĩ vuéltape David heʼi hague chéve: “Léonce, chegusta kuri pe último diskúrso rejapo vaʼekue. Oikoite añete, péro che ajapótama kuri 3 diskúrso aipurúrire entéro umi informasión nde reipuru vaʼekue”. Che ningo ajepokuaámi amoinge hetaiterei informasión ajapo jave la che diskúrso, upévare tekotevẽ kuri menove ajere haʼe hag̃ua la kósa.

 Umi superintendénte de distríto oreko kuri la rresponsavilida omokyreʼỹvo umi superintendénte de sirkuítope. Péro heta puvlikadór oĩva Quebécpe chekuaa porã vaʼekue, upévare pyʼỹinte ojapose chendive aktivida avisita jave umi sirkuíto. Igustoiterei kuri chéve asẽ apredika hendivekuéra, péro amboykéma raʼe ahávo umi superintendénte de sirkuítope. Peteĩ vuéltape, peteĩ superintendénte mborayhúpe chemomanduʼa: “Iporãiterei ningo rehasa tiémpo la ermanokuérandi, péro anína nderesarái ko semána nde rejuha hína che rendápe. ¡Che aikotevẽ avei ánimo!”. Upe konsého oñemeʼẽva chéve mborayhúpe chepytyvõ kuri cheekilivradove hag̃ua.

Áño 1976-pe oiko peteĩ mbaʼe nahaʼarõietéva ha ambyasyetereíva. Simone, che rembireko ahayhuetéva ou hasyete ha omano chehegui. Haʼe ningo chemoirũ porãiterei vaʼekue pórke ohayhueterei vaʼekue Jehovápe, ha siémpre ojesakrifika ermanokuéra rehehápe. Haʼe omano rire, asegi vaʼekue asẽ meme predikasiónpe, ha upéva tuichaiterei chepytyvõ ambohasamie hag̃ua la che mbaʼembyasy. Aagradese avei Jehovápe, pórke haʼe siémpre oĩ kuri che ykére upe moménto ijetuʼuetévape. Tiémpo rire, amenda jey peteĩ ermána héravare Carolyn Elliott. Haʼe ningo peteĩ prekursóra ikyreʼỹetereíva oñeʼẽva inglés, ha ou vaʼekue Quebécpe oservi hag̃ua oĩvehápe nesesida. Umi ermánope g̃uarã ningo ifásil oñemongeta hendive pórke haʼe ijeheʼaiterei, ha ohechauka añetehápe oñeinteresaha hapicháre, koʼýte umi hiʼotĩvare ha oñeñandúvare haʼeño. Carolyn ningo tuichaiterei chepytyvõ aservi aja de superintendénte.

Enero de 1978-pe ojejerure chéve aĩ hag̃ua de instruktór pe primera Eskuéla de Prekursórpe ojejapótavape Quebécpe. Che akyhyjeterei kuri pórke núnka ndaháiva upe eskuélape, ha ni ndahechajepéi vaʼekue pe lívro ojepurúva pe eskuelarã. Upévare entéro mbaʼénte ipyahu chéve ha avei umi estudiántepe g̃uarã. Haʼetépe pe primera klásepe oĩ vaʼekue heta prekursór ivaletereíva. Che haʼéramo jepe pe instruktór, hetaiterei mbaʼe aaprende vaʼekue umi estudiantekuéragui.

Upe rire avei upe áñope ojejapo pe asambléa internasionál “Fe victoriosa” pe Estadio Olímpico de Montreálpe. Péva ningo pe asambléa tuichavéva roreko vaʼekue Quebécpe, ha upérõ oñembyaty jepe mas de 80.000 persóna. Che añeasigna vaʼekue  añeʼẽ hag̃ua pe asambléare umi periodísta ha rreporterokuérandi, ha avyʼaiterei ahechávo oñeñeʼẽ porãiterei hague ñanderehe umi notísiape. Umi entrevísta ojapo vaʼekue hikuái oñembohasa téle ha rrádiope, ha umi mbaʼe ombohasa vaʼekue hikuái ohupyty voi mas de 20 óra. Avei umi diáriope osẽ hetaiterei artíkulo oñeʼẽva pe asambléare. Upéicha rupi, hetaiterei hénte oikuaave Jehovápe ha avei ipuévlope.

Áño 1996-pe oiko peteĩ kámbio tuichaitereíva chéve g̃uarã. Che ningo aservi vaʼekue território francéspe ajevautisa guive, péro upe áñope añeasigna aservi hag̃ua de superintendénte de distríto Toróntope, umi kongregasión ha sirkuíto oĩvape ingléspe. Che akyhyjeterei kuri ajapo hag̃ua diskúrso upe idiómape pórke ahachea vaipaite la inglés. Tekotevẽ kuri añemboʼe meme Jehovápe ha akonfiave hese.

Añepyrũtarõ guare aservi território ingléspe akyhyjeterei vaʼekue, péro koʼág̃a haʼekuaa añetehápe avyʼaiterei hague umi 2 áño aservírõ guare Toróntope. Carolyn heta ipasiénsia cherehe ha chepytyvõ añeñandu porãve hag̃ua añeʼẽvo inglés, ha umi ermáno avei tuicha chepytyvõ ha chemokyreʼỹ. Pyaʼe voi rokonsegi kuri heta ore amigorã.

Che ningo ajapo vaʼerã heta mbaʼe aprepara hag̃ua pe asambléa de sirkuíto. Upéicharamo jepe, pe viernes oñepyrũ mboyve pe asambléa, siémpre asẽ vaʼekue una órarupi predikasiónpe kaʼaruete. Ikatu oime algúno oñeporandu raʼe mbaʼérepa ajapo upéva peteĩ asambléa mboyve, hiʼarive arekóta hetaiterei traváho pe asambléa aja. Péro che ahechakuaa upéva chemokyreʼỹetereiha pórke añemongeta porã jepi umi héntendi, ha upéva ojapo porãiterei cherehe. Koʼag̃aite peve, siémpre añandu avyʼaveha asẽ rire apredika.

Áño 1998-pe, che ha Carolyn roñeasigna roservi hag̃ua de prekursór espesiál Montreálpe. Heta áñore añenkarga vaʼekue unas kuánta kósare, umíva apytépe aorganisa ojepredika hag̃ua umi lugár oĩháme heta hénte. Avei añemongeta umi periodístandi amyesakã hag̃ua ndasiertoiha heta mbaʼe vai opensáva jepi umi hénte Testigokuérare. Koʼág̃arupi Carolyn ha che vyʼápe ropredika umi hénte ova ramóvape Canadápe, pórke haʼekuéra oaprendeseve jepi mbaʼépa omboʼe la Biblia.

Ojapóma ningo 68 áño ajevautisa hague, ha apensávo umi mbaʼe ahasa vaʼekuére aservívo Jehovápe ahechakuaa haʼe tuichaiterei chevendesi hague. Avyʼaiterei ningo ikatu haguére ahayhuve pe predikasión, ha ikatu rupi aipytyvõ hetápe oikuaa hag̃ua Jehovápe. Che rajy Lise ha iména omongakuaapa rire ifamiliakuérape, haʼekuéra oñepyrũ iprekursorádo rregulár. Chembovyʼaiterei ahechávo mbaʼéichapa haʼe osegi iguápa ha ikyreʼỹ predikasiónpe. Prinsipálmente aagradese umi ermáno chepytyvõ vaʼekuépe iñehémplo ha ikonsehokuéra rupive. Haʼekuéra ningo chepytyvõ ikatu hag̃uáicha areko peteĩ amista imbaretevéva Jehovándi, ha avei añatende porã hag̃ua heta asignasión oñemeʼẽ vaʼekuére chéve. Ahechakuaa ñande ikatuha ñakumpli peteĩ asignasión oñemeʼẽva ñandéve, sólamente jajeroviárõ Jehová espíritu sántore (Sal. 51:11). Aagradese joʼa joʼa Jehovápe omeʼẽ haguére chéve pe priviléhio tuichaitéva amombaʼeguasu hag̃ua pe héra porãite (Sal. 54:6).