Kuv yug hauv lub nroog Kuanpej Xiti (Quebec City) hauv lub xeev Kuanpej tebchaws Kanada. Lub xeev Kuanpej hais lus Fab Kis xwb. Kuv txiv hu ua Lu-is, kuv niam hu ua Zelia. Kuv niam thiab kuv txiv peb sib hlub heev. Kuv txiv yog ib tug neeg uas tsis tshua hais lus tiamsis nyiam nyeem ntawv heev. Ho kuv nyiam sau ntawv thiab xav tias ib hnub twg kuv yuav ua ib tug tub sau ntaub ntawv.

Muaj ib hnub thaum kuv muaj li 12 xyoos, ib tug txivneej uas ua haujlwm nrog kuv txiv hu ua Ludaus Xuxis (Rodolphe Soucy) thiab nws tus phoojywg tuaj xyuas peb ntawm peb tsev. Thaum ntawd kuv tsis paub ntau txog Yehauvas Cov Timkhawv thiab kuv los yeej tsis xav paub txog lawv txojkev ntseeg. Txawm li ntawd los, kuv nyiam qhov uas lawv txawj siv phau Vajlugkub los teb peb tej lus nug. Kuv niam thiab kuv txiv los yeej nyiam heev, peb thiaj pib kawm Vajlugkub.

Lub sijhawm ntawd kuv kawm ntawv hauv lub tsev kawm ntawv Kav Tos Liv. Muaj tej zaud, kuv nrog cov tub kawm ntawv tham txog tej uas kuv kawm hauv phau Vajlugkub. Tiamsis thaum cov xibhwb qhia ntawv uas yog cov txiv plig hnov tias kuv ua li ntawd, lawv tsis ua zoo muab phau Vajlugkub los qhia tias tsis muaj li kuv hais. Ib tug xibhwb cia li iab hiam kuv tab meeg sawvdaws tias kuv yog ib tug neeg phem. Qhov no yeej ua rau kuv ntxhov siab kawg. Tiamsis kuj ua rau kuv pom tias lub tsev kawm ntawv txojkev ntseeg tsis qhia raws li phau Vajlugkub, kuv yuav tsum tsis txhob mus kawm ntawv ntawd lawm. Kuv niam thiab kuv txiv los kuj pom zoo, kuv thiaj hloov tsev kawm ntawv lawm.

Kuv tseem kawm Vajlugkub tiamsis kuv tsis ua dabtsi ntau rau Yehauvas rau qhov kuv ntshai mus tshaj tawm ib lub tsev rau ib lub tsev. Lub tshawj Kav Tos Liv tswj kav ntau tsav ntau yam thiab lawv tawm tsam peb txojkev mus tshaj tawm heev. Maulis Duplexis (Maurice Duplessis) uas yog tus nom hauv Kuanpej los kuj sib raug zoo nrog lub tshawj Kav Tos Liv thiab txhawb lawv ua phem  rau peb. Twb yog li ntawd, thiaj muaj neeg coob coob ua phem thiab ntaus Yehauvas Cov Timkhawv. Lub sij hawm ntawd, cov Timkhawv yuav tsum muaj siab tawv tiag lawv thiaj mus tshaj tawm tau.

Kwvtij Yauhas Les (John Rae) yog ib tug uas kawm tiav Kev Kawm Vajlugkub Kile-a pab 9, nws yog tus pab kuv tsis ntshai mus tshaj tawm lawm. Yauhas txawj tshaj tawm heev thiab nws yog ib tug neeg siab ntev thiab txo hwjchim, kuv xav mus cuag nws thaum twg los tau. Yauhas tsis niaj hnub qhuab ntuas kuv, tiamsis kuv kawm tau ntau yam los ntawm nws tus qauv zoo. Rau qhov Yauhas tseem kawm hais lus Fab Kis xwb ces muaj ntau zaus kuv thiaj li nrog nws mus tshaj tawm thiab pab nws hais lus Fab Kis. Qhov uas kuv nrog Yauhas ua ke li no pab tau kuv txiav txim siab los ua Yehauvas ib tug Timkhawv. Kaum xyoo tom qab kuv los paub cov Timkhawv, kuv mam ua kevcai raus dej rau lub 5 Hlis tim 26 xyoo 1951.

Peb lub koom txoos me me hauv Kuanpej Xiti feem coob yog cov tho kev. Lawv tej qauv zoo pab kuv ua ib tug tho kev. Lub sijhawm ntawd, peb tsis nqa peb tej ntaub ntawv nrog peb thaum peb mus tshaj tawm. Yog li ntawd peb yuav tsum paub siv phau Vajlugkub zoo. Kuv thiaj rau siab ntso kawm kom kuv paub cov nqi Vajlugkub uas yuav pab tau kuv qhia qhov tseeb. Txawm li ntawd los, muaj coob tus tsis kam nyeem tej phau Vajlugkub uas lub tshawj Kav Tos Liv tsis pom zoo.

Kuv yuav pojniam xyoo 1952. Kuv tus pojniam hu ua Ximoos Patilis (Simone Patry). Nws yog ib tug muam uas hlub Yehauvas heev. Wb sib ntsib hauv peb lub koom txoos. Tom qab wb sib yuav, wb tsiv mus nyob hauv lub nroog Mootilia (Montreal). Tsis ntev tom qab ntawd wb yug tau wb tus mentxhais hu ua Lis (Lise). Txawm tias kuv tso tseg tsis thov kev ua ntej Ximoos wb sib yuav lawm los, wb tseem ua lub neej yoojyim thiab ua li wb ua tau mus tshaj tawm nrog lub koom txoos.

Twb tau 10 xyoo lawm, kuv mam xav tias kuv yuav rov ua ib tug tho kev dua. Xyoo 1962, tau muaj Kev Kawm Rau Cov Kwvtij Tuav Haujlwm rau cov txwj laus hauv lub Npe-ee uas nyob hauv tebchaws Kanada. Kuv tau mus koom txojkev kawm no thiab nrog Kwvtij Kamis Ulev (Camille Ouellette) nyob ua ke ib lub hlis. Qhov uas nws kub siab lug mus tshaj tawm pab tau kuv heev rau qhov nws los kuj muaj pojniam menyuam ib yam li kuv thiab. Nyob hauv lub xeev Kuanpej mas lub sijhawm ntawd yeej tsis tshua muaj cov kwvtij nkauj muam uas twb muaj menyuam lawd es tseem ua ib tug tho kev thiab. Tiamsis Kwvtij Kamis hais tias nws yuav ua ib tug tho kev. Nws txhawb kom kuv ua tib zoo xav thiab ua tib zoo xyuas seb kuv puas rov ua tau ib tug tho  kev dua. Hli puav tom qab kuv xav hais tias kuv yeej ua tau, kuv thiaj rov ua ib tug tho kev dua. Muaj ib txhia xav tias kuv yuam kev lawm, tiamsis kuv tso siab tias Yehauvas yeej yuav pab kuv mus tshaj tawm kom tau ntau ntxiv.

Xyoo 1964, Ximoos thiab kuv wb tau ua 2 tug tho kev tshwj xeeb xyoo puav rau hauv Kuanpej Xiti uas yog wb lub qub zog. Lub sijhawm no, yoojyim zog rau peb mus tshaj tawm lawm tiamsis tseem muaj ib txhia tawm tsam thiab.

Muaj ib hnub tav su dua, kuv raug ntes hauv lub zos Xeej Malis (Sainte-Marie) uas yog ib lub zos me me tsis deb ntawm Kuanpej Xiti. Tus tub ceev xwm coj kuv mus kaw tom tsev ceev xwm vim kuv tsis muaj ntaub ntawv tso cai rau kuv mus tshaj tawm ib lub tsev rau ib lub tsev. Tom qab ntawd, lawm coj kuv mus rau tus tu plaub tug hu ua Npailazoo (Baillargeon) uas yog ib tug neeg txaus ntshai heev. Nws nug kuv tias leejtwg yog kuv tus kws lij choj. Thaum kuv hais tias yog Klees Hauj (Glen How) * ua rau nws ntshai heev thiab hais tias: “Aub, ua cas tseem yog nws thiab lauj!” Nws ntshai rau qhov Klees Hauj yog cov Timkhawv ib tug kws lij choj uas tau pab cov Timkhawv hais yeej ntau rooj plaub lawm. Tsis ntev xwb ces lawv txawm los hais rau kuv tias kuv tsis raug txim dabtsi lawm.

Hauv Kuanpej nyuaj heev rau peb nrhiav tau chaw zoo rau peb tej kev sib txoos vim neeg tawm tsam peb tes haujlwm heev. Peb tsuas nrhiav tau ib lub tsev nres tsheb los ua chaw sib txoos. Lub tsev no tsis muaj cua sov. Lub caij ntuj no, cov kwvtij siv ib lub qhov cub rauv roj los ua kom lub tsev sov. Peb niaj zaus tuaj ntsauv lub qhov cub ntawd li ob peb txoos teev ua ntej kev sib txoos thiab sib txhawb zog.

Peb zoo siab heev uas ntau xyoo dhau los no muaj neeg coob heev los ntseeg. Lub caij 1960, tag nrho thaj tsam ntawm lub nroog Kuanpej Xiti, Khauj Naus (Côte-Nord), thiab raws tej ntug dej ntawm Nkaxipes (Gaspé Peninsula) tsuas muaj lub puav koom txoos me me xwb. Tiamsis nimno, peb muaj kwvtij nkauj muam thoob plaws cov thaj tsam no thiab lawv tau mus sib txoos rau hauv tej Tsev Nceeg Vaj uas zoo nkauj heev.

Xyoo 1970, Ximoos nrog kuv mus ua tes haujlwm saib xyuas thaj tsam. Ces xyoo 1973, wb tau mus ua tes haujlwm saib xyuas cheeb tsam. Thaum kuv ua tej haujlwm no, kuv kawm tau ntau yam heev los ntawm ntau tus kwvtij xws li Lauyes Xaumiyees (Laurier Saumur) * thiab Davi Xaple (David Splane). * Nkawd ob leeg puavleej ua tus mus ncig xyuas cov koom txoos. Thaum rooj sib txoos dhau lawm, Davi thiab kuv los sib tham seb lwm zaus wb yuav ua li cas wb thiaj ua tau zoo dua qub. Kuv nco qab muaj ib zaug nws hais rau kuv tias: “Li-oos, kuv nyiam koj zaj lus qhuab qhia xaus kawg. Koj hais tau zoo tiamsis yog kuv no kuv yuav muab ua 3 zaj hais.” Nws hais li ntawd rau qhov kuv hais ntau dhau lawm. Yog kuv hais kom tsawg thiab qhia lub ntsiab kom meej yuav zoo dua.

 Cov kwvtij saib xyuas cheeb tsam lub luag haujlwm yog mus txhawb cov saib xyuas thaj tsam. Tiamsis cov tshaj tawm coob tus hauv Kuanpej paub kuv zoo. Yog li ntawd, muaj ntau zaus thaum kuv mus ncig xyuas cov thaj tsam, cov kwvtij xav kom kuv nrog lawv mus tshaj tawm. Kuv nyiam nrog lawv mus tshaj tawm tiamsis qhov ntawd ua rau kuv tsis muaj sijhawm ntau nrog tus saib xyuas thaj tsam ua ke. Muaj ib zaug, ib tug saib xyuas thaj tsam thiaj hais rau kuv tias: “Yeej zoo heev uas koj nrog cov kwvtij ua ke, tiamsis nco ntsoov tias lub limtiam no yog kuv lub. Kuv los yeej xav tau kev txhawb zog thiab!” Tus kwvtij cov lus ntuas no pab tau kuv kawg li.

Tu siab kawg uas xyoo 1976, kuv tus pojniam Ximoos cia li mob hnyav heev thiab tau tas sim neej lawm. Nws yog ib tug pojniam zoo uas hlub lwm leej lwm tus, thiab hlub Yehauvas kawg nkaus. Qhov uas kuv niaj hnub mus tshaj tawm pab kuv nyiaj taus kuv txojkev quaj ntsuag. Kuv ua Yehauvas tsaug uas nws pab kuv nyiaj dhau lub sijhawm ntawd. Ib ntus tom qab, kuv yuav dua ib tug pojniam tshiab hu ua Kalelees Eli-aus (Carolyn Elliott). Kalelees yog ib tug muam uas kub siab tho kev thiab hais lus Askiv. Nws tuaj pab tshaj tawm hauv thaj tsam Kuanpej. Kalelees yog ib tug neeg tsis muab hlob, nws nyiam pab lwm leej lwm tus, feem ntau nws pab cov uas txaj muag lossis xav tias tsis muaj leejtwg hlub lawv. Nws los kuj pab tau kuv heev thiab thaum wb mus ncig xyuas tej koom txoos.

Lub 1 Hlis xyoo 1978, kuv tau mus qhia thawj thawj rooj Kev Kawm Rau Cov Tho Kev hauv Kuanpej. Kuv txhawj heev rau qhov kuv tsis tau kawm dua los thiab kuv tsis tau pom tej ntaub ntawv yuav siv los qhia. Ib puas tsav yam tshiab tag nrho rau kuv thiab cov kawm. Tiamsis kuv zoo siab heev uas cov tuaj kawm coob tus twb tho kev ntev lawm, txawm hais tias kuv yog tus qhia los kuv kuj kawm tau ntau yam ntawm lawv.

Xyoo 1978, tau muaj Rooj Sib Txoos Rau Ntau Tebchaws rau hauv lub chaw ncaws pob loj hauv lub nroog Mootilia (Montreal’s Olympic Stadium). Lub rooj sib txoos no yog lub uas loj tshaj plaws, tsis tau muaj dua li no ib zaug li nyob hauv Kuanpej. Muaj  tshaj li 80,000 tus tuaj koom. Kuv yog tus uas nrog cov tub xov xwm tham txog peb lub rooj sib txoos. Kuv zoo siab heev uas lawv sau tej yam zoo txog peb. Lawv muab tej uas lawv nrog peb tham tso tawm hauv TV thiab xov tooj cua tshaj li 20 txoos teev rau sawvdaws pom thiab mloog, thiab muab luam tawm hauv tej ntaub ntawv xov xwm ntau pua zaj. Twb yog li ntawd, neeg thiaj li paub txog Yehauvas thiab nws cov Timkhawv coob zuj zus tuaj.

Txij thaum kuv ua kevcai raus dej los kuv pab cov kwvtij hauv Kuanpej uas hais lus Fab Kis xwb, tiamsis xyoo 1996 muaj ntau yam hloov rau kuv. Kuv raug xa mus saib xyuas cheeb tsam Askiv hauv lub nroog Thaulatau (Toronto). Kuv tsis xav tias kuv ua tau tes haujlwm no thiab kuv ntshai cev lus qhuab qhia ua lus Askiv rau qhov kuv hais tsis tau lus Askiv zoo. Kuv yuav tsum thov Vajtswv heev dua qub thiab tso siab tias Yehauvas yuav pab kuv.

Thaum kuv yuav mus ua tus saib xyuas cheeb tsam hauv Thaulatau, kuv yeej txhawj kawg li. Tiamsis nimno kuv zoo siab heev tias kuv tau mus pab cov kwvtij nkauj muam ntawm thaj tsam Thaulatau tau 2 lub xyoos. Kalelees ua siab ntev pab kom kuv tsis ntshai hais lus Askiv thiab cov kwvtij los yeej pab thiab txhawb kuv kawg nkaus. Tsis ntev xwb, wb twb muaj phoojywg tshiab coob coob lawm.

Kuv muaj ntau yam npaj rau lub rooj sib txoos. Txawm li ntawd los kuv tseem niaj zaus mus tshaj tawm li ib txoos teev rau Hnub 5 (Friday) thaum hnub poob lawm. Tej zaum ib txhia yuav xav hais tias, ‘Ua cas tseem yuav mus tshaj tawm ua ntej lub rooj sib txoos?’ Tiamsis thaum kuv nrog tibneeg tham txog phau Vajlugkub ua rau kuv zoo siab thiab txhawb tau kuv lub zog heev. Nimno los thaum kuv mus tshaj tawm yeej tseem ua rau kuv zoo siab heev thiab.

Xyoo 1998, Kalelees wb raug xa rov qab mus rau hauv lub nroog Mootilia, mus ua 2 tug tho kev tshwj xeeb. Tau ntau xyoo los no, kuv txoj haujlwm yog pab nrhiav chaw rau cov kwvtij mus tshaj tawm ntawm tej chaw uas muaj neeg coob dua kev thiab nrog cov tub xov xwm tham txog tej uas neeg totaub yuam kev txog Yehauvas Cov Timkhawv. Kalelees wb nyiam qhia Vajlugkub rau cov neeg txawv tebchaws uas nyuam qhuav tsiv tuaj nyob hauv Kanada thiab xav paub txog phau Vajlugkub.

Kuv zoo siab heev thaum kuv xav txog 68 lub xyoos txij thaum kuv ua kevcai raus dej los. Yehauvas pub koob hmoov ntau heev rau kuv. Nws pab kom kuv nyiam mus tshaj tawm. Kuv zoo siab heev uas kuv pab tau coob tus los paub qhov tseeb. Thaum kuv tus ntxhais Lis thiab nws tus txiv nkawd cov menyuam loj tag lawd, nkawd kuj los ua 2 tug tho kev lawm thiab. Thaum kuv pom kuv tus ntxhais kub siab lug mus tshaj tawm txoj xov zoo ua rau kuv zoo siab kawg. Kuv kuj ua tsaug rau cov kwvtij Khixatia uas ua qauv zoo rau kuv xyaum thiab rau lawv tej lus qhuab ntuas. Lawv pab kom kuv txojkev sib raug zoo nrog Yehauvas ruaj khov thiab pab kuv ua tau kuv tej haujlwm rau Yehauvas. Kuv ua tau tej luag haujlwm uas Yehauvas lub koom haum muab rau kuv los twb yog muaj Yehauvas lub hwj huam dawb huv pab kuv. (Phau Ntawv Nkauj 51:11) Kuv ua Yehauvas tsaug rau qhov koob hmoov uas nws pub kuv los paub nws thiab qhuas nws lub npe.​—Phau Ntawv Nkauj 54:6.