Ak milechell er a Quebec City, el mats er a beluu er a Canada el rechad er ngii a melekoi a tekoi er a French. A demak me a delak el Louis me a Zélia, a kmal mle ungil lomekerreu er ngak. A demak a mle sekemerur el chad e kmal mle soal menguiu a babier. E ngak a kmal mle soak el meluches a babier, e millatk el mo journalist er a ta er a klebesei.

Ngar a bekord el 12 a rekik, e a Rodolphe Soucy, el chad er a urerel a demak, me a ta er a sechelil a uleldingel e mei er a blimam. Tirkang a mle Sioning er a Jehovah. Ngdimlak a ungil klemedengei er ngak el kirir a Resioning, e dirrek el dimlak ksemeriar er a klechelid er tir. Me nguaisei, engdi ngmle mechas a renguk er a melemalt el rolel a longer a ker lousbech er a Biblia. A demak me a delak me ngdirrek el mle mechas a rengrir, me aki kilengei er a omesubel a Biblia.

Sel taem e ak ngar a skuul er a Katolik. Me ngar ngii a taem e ak mengedecheduch er tirke el kimdak el skuul el kirel a tekoi el ksuub er a Biblia. A cherengel a taem e tirke el prist el sensei a mlo medengei a tekoi el kusaod. Ngdimlak lousbech a Bades el lochotii el kmo ngcheleuid a tekoi el kusaod, engdi a ta er tir a di mla er mederir a rokui el ngalek er a skuul e oltelechakl er ngak el kmo ak chad el omtok! Tiang a kmal mle meringel el blekeradel engdi ngmlo uchul a ungil tekoi, e le ak mlo mtebengii el kmo tia el skuul a dimlak lolisechakl a tekoi el ngar a Biblia. Me ngmle kirek el mo diak kngar tia el skuul. Me sera lekengei a demak me a delak, e ak mlora ta er a skuul.

Ak millemolem el mesuub a Biblia, engdi ak mle meoud lolengeriakl e le ak mle medakt loldingel a obliil. A Ikelesia er a Katolik a kmal mle mesisiich lomtok er tia el ureram er a berkel a klumech. A Maurice Duplessis, el mengeteklel a balatiks er a beluu er a Quebec, a milsebechakl er a ikelesia. Me ngullengeseu er a remekngit el chad el omecheracheb  e dirrek loldechelakl er a Resioning. Me ngar tia el taem e a Resioning a kmal mle kirir loba blekeu lomerk er a klumech.

A odam el John Rae el tilobed er sel ongetiu el class er a Gilead a ngilsukak el mo diak kmedakt. Ngikang a kmal mle ngariou a rengul lodam e medemedemek a blekerdelel me ngmle beot er a rechad el mo er ngii. Ngdimlak leblechoel lomeklatk er ngak, engdi ak bai siluub a betok er a ungil kerebai er ngii. Ngii el John a mle metitur el melekoi a tekoi er a French, me ak mle blechoel lobengkel loldingel a obliil e ullengeseu er ngii el mo meduch er tia el omelekoi. Me ngar aike el temek lobengkel e a John a ngilsukak me ngmlo sebechek el tibir er a renguk el mo ta er a Sioning er a Jehovah. Me a teruich el rak er a uriul er a bo kteloi er a Resioning, e ak mlo metecholb er a May 26, 1951.

A ruumesingd el chedal a kekerei el ongdibel er kemam er a Quebec City, a mle pioneer. Me a ungil kerebai er tir a rirellak el mo soak el pioneer. Sel taem e aki oldingel obliil el di uluusbech er a Biblia. Ngdimlak a babier me ngmle kiram el mo meduch lousbech a Bades el mengedecheduch, me ak millasem el mo ungil mesuub a bades er a Biblia el mo ngosukak er a omesiungek. Me nguaisei, engdi te betok el chad a mle chetirir el menguiu a ngii di el oidel a Biblia el dimlak lekengei a Ikelesia er a Katolik.

Sera 1952, e ak mlo bechil a Simone Patry, el blak a rengul el odos er a ongdibel er ngak. Aki millukl el mora Montreal, e di mle chelsel a ta el rak e ngmlo er ngii a ngelekam el redil el Lise. Ngmlo diak kusiou el pioneer er a telkib el uriul er aki bo bechiil, engdi ngak me a Simone a millasem el omekbeot er a rolel a klengar er kemam me bo lsebechel klou a temam el telungalek el meruul er a omesiungam.

Teruich el rak er a uriul e ak liluut el mo omdasu a menglou er a omesiungek. E sera 1962, e ak mlora ta el buil a klemengetel el Skuul el Kirir a Rudam el Oldingel a Ongdibel me a Remechuodel me a Remesiou er a Ongdibel er a Canada Bethel, e mlo kiei lobengkel a odam el Camille Ouellette. A blakerreng er a Camille el kirel a omesiungel a kmal chilsir a renguk, e le ngikang a bechiil e dirrek loungalek. Sel taem e te kmal mle kesai a rudam me a rudos er a beluu er a Quebec el pioneer e osisiu el taem e te oungalek, engdi tiaikid el tekoi a lurruul er ngii a Camille. Me ngar sel temam el dmak e ngmillisiich er ngak el mo melatk er tia el blekeradel. Me a uriul er a sesei el buil, e ak mlo mtebengii el kmo ngsebechek el lmuut el mo mesiou el regular pioneer. A rebebil a ulemdasu el kmo tiang a diak lungil luldasu, engdi ak mlo rullii e mle ulterekokl a renguk el kmo a Jehovah a mo omekngeltengat er ngak a lsekum ak lmuut el kilungii a omesiungek.

Sera 1964, e ngak me a Simone a mlukngerachel el mo mesiou el special pioneer er a Quebec City el belumam, e millemolem el mesiou el sesei el rak. Tiaikid el taem e ngtelkib el mla mo ungil a ureor er a berkel a klumech, engdi te ngar ngii a rechad el dirk ulemtok er kemam.

A ta el chodochosong er a Sebadong, e a rebulis a mildechemak el omerk er a klumech er a kekerei el beluu er a Sainte-Marie el di kmeed er a Quebec City. A ta el bulis a ngilikak el mora blil a bulis e osisebak er a kelebus, e le ngak el uleldingel obliil el diak a permit er ngak. Me a uriul e te ngilikak el mora medal a chad er a kerrekeriil el Baillargeon el lemedakt er ngii a rechad. Nguleker er ngak el kmo ngtecha chad er a llach er kau. Me sera kuuchais er ngii el kmo ng Glen How, * el merael chisel el chad er a llach er a Resioning, e ngdilu el kmo: “Ngtechang! Ngilechang!” Ngika el Glen How a odam er kid el ble lodengelii a rechad el kmo ngkmal meduch el chad er a llach el ullengeseu el mesebechakl er a Resioning er a Jehovah. Me ngdi mle telkib, e a kort a otebedii a tekoi el kmo a ultutakl el mlei er ngak a mlo diak a belkul.

A ultok er tia el beluu er a Quebec el kirel a ureram a mlo uchul me ngmle meringel er kemam el metik er a ungil el lengiil el blai. Ngdi ta el blil a mlai el diak a ongeald er ngii a mlo sebecham lousbech er ngii. Me sel temel a klou el kelekolt e a rudam a ousbech er a ta el oil heater. Me aki mo kldibel el iliuekl er ngii el sesei el sikang er a uchei er a lomuchel a miting e kauchais a ungil tekoi el dilubech er aki momerk er a klumech.

Nguchul a klou el deurreng sel domes a ungil tekoi el mla meketmokl er a chelsel aika el mereko el betok el rak. Sera 1960, engdi mle kesai e mekekerei a ongdibel er a Quebec City, me a Côte-Nord, me a dirrek el Gaspé Peninsula. Engdi chelechang e ngmla mo er ngii a rekmal betok el rudam me a rudos el mo kldibel er a chelsel a betok el klebokel el Blil a Ongdibel.

Ngak me a bechik el Simone a ngiluu a okedong el mo meruul er a circuit work er a rak er a 1970. E sera 1973, e aki mlodurech el mo meruul er a district work. Me ngar aike el rak, e ak siluub a betok er a remeduch el rudam el ua Laurier Saumur * me a David Splane, * el dul milsiou el odam el oldingel a ongdibel. Me ngar a bek el ulebengelel a meklou el ongdibel, e ngak me a David a dmak el mesaod a rolel e aki lmuut el mo ungil lolisechakl. Ak dirk melatk er a ta el taem el David a dilu er ngak el kmo: “Léonce, ngkmal mle soak sel ulebongel el cheldechedecham. Ngkmal ungil, engdi ngsebechek lousbech aike el tekoi el mulsaod el kutmokl a edei el cheldecheduch!” Ngar ngii a blekerdelek el soak el mesaod a kmal betok el tekoi er a cheldechedechak. Me ngmle kirek el mesuub el mo mengesadel a tekoi el kusaod.

Tirke el district overseer a mlukngerachel el mo melisiich er a rudam el circuit overseer. Me nguaisei, engdi a rebetok el publisher er a Quebec a mle ungil medengelkak. Me te mle blechoel sorir loureor lobengkek er sel taem el bo kuldingel a ongdibel er tir. Me alta e ngkmal mle ungil a renguk el teloi er a rudam  loldingel, engdi tiang a mlo uchul e ngmlo diak a temek lobengkel ngike el circuit overseer. Me a ta el taem, e ngmle ungil a tekingel a ta el circuit overseer el kmo: “Ngkmal lungil e le ke mengoit a temem el kirir a rudam, engdi lak mobes, kau a mlei el kirem el oldingel er ngak. Ak dirrek lousbech a omelisiich!” Tia el ungil uleklatk a ngilsukak el mo meruul a tekoi el tabesul.

Ngklengiterreng e le sera 1976 e ngdilubech a klou el kerior. A betik er a renguk el bechik el Simone a mlo smecher er a oberaod el secher e mlad. Ngkmal mle ungil bechiil redil el mle blechoel el melatk er a rechad e dirrek el kmal mle betik a rengul er a Jehovah. Me ngulekiu sel kuruul er a omesiungek e ngrirellak el mo mechelaod a renguk, me ak mereng a sulel a Jehovah el kirel a ngelsuil er a chelsel tia el mle meringel el taem. A uriul e ak mlo bechil a Carolyn Elliot, el blak a rengul el pioneer el melekoi a tekoi er a Merikel, el mlei er a Quebec el me olengeseu el kirel a ureor er a berkel a klumech. Ngika el Carolyn a kmal beot er a rechad el mo er ngii e dirrek el semeriar lolengeseu er a rechad, el ileakl tirke el sekemerur me a lechub e te sabisi. Ngkmal ngilsukak er sera bo lobengkek el meruul er a ureor el merael loldingel a ongdibel.

Sera January 1978, e ak mlodurech el mo olisechakl er a kot el Skuul el Kirir a re Pioneer er a Quebec. Ak kmal mle bekikl e le ngketengek el meruul er tia el tekoi, e tiang a dirrek el mle beches el tekoi el kirir a rengalek er a skuul. Engdi ngkmal mle ungil tia el skuul e le ngbetok er tirka el ngalek er a skuul a mle meklou a klemedengei er tir el pioneer. Me alta e ak ullisechakl er tir, engdi ak bai ngilai a betok el klubelek er tir!

A uriul el ngar a rak er a 1978, e a “Victorious Faith” el International Convention a mlo er ngii er a Montreal’s Olympic Stadium. Tiang a mle kot el klou el ongdibel el mlo er ngii er a Quebec, el kuk mle betok er a 80,000 el chad a mlei er ngii. Ak mlukngerachel el mo oureor er a News Service Department er tia el ongdibel. Me ak milengedecheduch er a rebetok el journalist e kmal mlo dmeu a renguk er a loluches a betok lungil tekoi el kired. Te mle interview er kemam el ngar er a TV me a razio el kuk  betok er a 20 el sikang, e dirrek el uleltobed a betok el dart el babier. Me tiang a kmal mle klou el sioning el kired!

A klou el omelodech el kirek a mlo er ngii er a 1996. Ak mlodurech el mo mesiou er a ongdibel el melekoi a tekoi er a Merikel el ngar a Toronto er a uriul er a kmetecholb e kusiou el ngar a ongdibel el melekoi a tekoi er a French er a Quebec el betok el rak. Ak ulemdasu el kmo ngdiak rredemelel tia el omesiou e le ngmle meringel er ngak loltobed a cheldecheduch e le ngdiak kungil melekoi a tekoi er a Merikel. Me ngmle kirek el blechoel el meluluuch e dirrek el mo mui el ultuil er a Jehovah el kirel a ngeso.

Ak mle bekikl er a uchei er a kumuchel el mesiou el ngar tia el district engdi chelechang e ngsebechek el melekoi el kmo ngkmal mle dmeu a renguk er aike el eru el rak el kusiou el ngar tia el beluu er a Toronto. Engdi a Carolyn a mle klou a rengul el ngosukak el mo diak kmedakt el melekoi a tekoi er a Merikel, me a dirrek el rudam a kmal ullengeseu e dirrek el millisiich er ngak. Me ngdi mle mereched el mo er ngii a rebetok el beches el sechelimam.

Uldimukl er a betok el ureor me a omengetmokl el kirel a assembly el mo er ngii er a weekend, e ak mle blechoel el mengoit er a ta el sikang er sel kebesengei er a Friday el oldingel a obliil. Me a rebebil a locha mlo melatk el kmo, ‘Ngera uchul me ke mo oldingel er a temel a assembly?’ Engdi ak miltebengii el kmo ngmelisiich er ngak sel kuldingel e kungedecheduch er a rechad. Me lmuut er chelechang, me ngdirk uchul a deuil a renguk sel kteloi er a ureor er a odingel.

Ngar a 1998, e ngak me a Carolyn a mlodurech el mo mesiou el special pioneer er a beluu er a Montreal. Me ngmle betok el rak el ngerechelek a mle uldimukl er a omekrael er a ileakl el rolel a dousioning er a buai, e oureor lobengkel a news media el mesmechokl a cheleuid el uldesuir a rechad el kirir a Resioning er a Jehovah. E chelechang e ngdmeu a rengmam el omerk er a klumech el mora rechad er a ngodech el beluu el dirk millukl el mei er a Canada, el tir a semeriar el mesuub a lmuut el betok el kirel a Biblia.

Me sel kumes el beduluriul er aika el mereko el 68 el rak er a kmetecholb e bo kusiou er a Jehovah, e ak melechesukak el kmal ngeltengat. Ngkmal klou el klengeltengat e le ak milsuub el mo dmeu a renguk lomerk er a klumech e dirrek el ngilsuterir a rebetok el mo medengelii a klemerang. A ngelekek er a Lise me a bechil er a lokuruleterir a rengelekir el mo meklou, e te ulemuchel el mesiou el regular pioneer. Me sel kumes er a blakerreng er ngii er a omesiungel e ngmeral mo dmeu a renguk. Ak ileakl el mereng a sulir a rekldemek el Kristiano el kirel a ungil kerebai er tir me a mellomes el ulekrael el lebilskak el mlo uchul a okurulel a klereng er ngak, e dirrek el ngilsukak el mo meduch el meruul a kakerous el rolel a omesiou. Ak mla mo medengei el kmo ngdi mo sebeched el lomolem a ngerachel el moterekokl er kid a lsekum kede ultuil er a ngelsuil a chedaol reng er a Jehovah. (Psa. 51:11) Me ak dirk melemolem el mereng a sulel a Jehovah el milskak tia el ileakl el techellek el mo oldanges er a ngklel!​—Psa. 54:6.