Xinkʼiy pa Quebec, rech ri tinamit Canadá pa ri lugar riʼ ri e winaq kechʼaw pa francés. Ri nutat ubʼiʼ Louis ri nunan ubʼiʼ Zélia, sibʼalaj xinkaj. Ri nutat qas ta ktzijonik xuqujeʼ sibʼalaj utz krilo kusikʼij uwach wuj. Are kʼu ri in utz kwilo kintzʼibʼanik rumal laʼ kwaj kinux periodista.

Are chiʼ kʼo 12 nujunabʼ, xeʼul e kebʼ achijabʼ che qachʼabʼexik jun chke are Rodolphe Soucy che rachiʼl ri nutat pa ri uchak. Are testigo rech Jehová. In wetaʼm ta más chkij ri Testigos xuqujeʼ qas ta kwaj kwetaʼmaj chrij ri kikojonem. Are kʼu utz xwil ri kibʼantajik xuqujeʼ ri utz kkibʼan che ukojik ri Biblia che utzelexik uwach ri qapreguntas. Ri nutat nunan xuqujeʼ utz xkilo, rumal laʼ xqaj xyaʼ jun etaʼmanik chqe chrij ri Biblia.

Pa ri tiempo riʼ tajin kinbʼe pa jun tijobʼal católica. Are kʼu jujun taq mul kinchʼaw kukʼ ri e wachiʼl chrij ri tajin kwetaʼmaj pa ri Biblia. Jun qʼij ri ajtijabʼ, che e kʼamal bʼe re ri kojonem católica, xketaʼmaj ri tajin kinbʼano. Jun chke ri e kʼamal bʼe, xubʼij che xa kinnimaj ta ri taqanik re ri tinamit xuqujeʼ ri tajin kinbʼij are utz taj. Paneʼ sibʼalaj xqayaj qibʼ are kʼu wariʼ kʼo xinutoʼ wi, rumal che xinchʼobʼo che ri kikʼutunem ri e kojonem che kkʼut chilaʼ junam ta rukʼ ri kubʼij ri Biblia. Rukʼ wariʼ xinchʼobʼo che kʼo ta rumal che kinkʼojiʼ chilaʼ. Ri nutat nunan xinkesaj pa ri tijobʼal riʼ.

Xinya ta kan retaʼmaxik chrij ri Biblia, are kʼu chanim taj xinkʼiy pa ri nukojonik rumal che kinxibʼij wibʼ kinbʼe che utzijoxik ri utzij ri Dios. Ri Iglesia católica sibʼalaj ktaqan pa kiwiʼ ri e winaq  xuqujeʼ sibʼalaj itzel kkilo che kqatzijoj ri utzij ri Dios. Maurice Duplessis, are ri nabʼe kʼamal bʼe re ri kojonem católica re ri tinamit Quebec, che xux jun tobʼanel político re ri Iglesia. Rukʼ ri utobʼanik, ri e winaq kkibʼan kʼax chke ri Testigos. Rumal laʼ kajwataj kowil kʼuxaj rech kyaʼ ubʼixik ri utzalaj taq tzij.

Jun qachalal che xinutoʼ che resaxik ri xibʼin ibʼ are ri qachalal John Rae, che xubʼan graduar ribʼ pa ri novena clase re ri Tijobʼal re Galaad. Paneʼ sibʼalaj kʼo retaʼmabʼal, sibʼalaj utz are chiʼ jun ktzijon rukʼ. Xa jujun taq mul xuya pixabʼ chwe, are rukʼ ri utzalaj ukʼutbʼal kubʼij ronojel. Rumal che qas ta kkunik kchʼaw pa francés, amaqʼel xinel rukʼ che utzijoxik ri utzij ri Dios rech kintoʼ rukʼ ri chʼabʼal francés. Ri tiempo che xinkʼojiʼ rukʼ John xinutoʼ rech xwaj xinux testigo rech Jehová. Qʼaxinaq chi lajuj junabʼ che nabʼe mul xintzijon kukʼ ri Testigos, pa ri 26 re mayo 1951 xinbʼan nuqasanjaʼ.

Pa ri alaj qacongregación re ri tinamit Quebec e kʼo kʼi precursores. Ri utz kikʼutbʼal xubʼano che xinmaj ri precursorado. Pa ri tiempo riʼ, are chiʼ kqatzijoj ri utzij ri Dios cho taq ja xaq xiw kqakoj ri Biblia. Rumal che e kʼo ta qawuj, rajawaxik qas utz kqabʼan che ukojik ri Biblia. Rumal laʼ xinkoj nuchuqʼabʼ che retaʼmaxik versículos che xinutoʼ che utoʼik uwiʼ ri qastzij kubʼij ri Biblia. Are kʼu, e kʼi winaq kkaj taj kkisikʼij uwach ri Biblia we kʼo ta ri upermiso ri Iglesia católica che, ri kbʼix imprimátur che.

Pa 1952, xinkʼuliʼ rukʼ Simone Patry, jun sukʼalaj qachalal re ri tinamit Quebec. Xojbʼe pa Montreal, are chiʼ majaʼ kqʼax jun junabʼ xkʼojiʼ jun alaj qalkʼwal ali, ubʼiʼ Lise. Paneʼ nuyaʼom chi kan ri precursorado are chiʼ xa jubʼiqʼ chi kraj kojkʼuliʼk, xqakoj qachuqʼabʼ rukʼ Simone rech kkʼojiʼ ta más jastaq qe rech kqakoj más qachuqʼabʼ che ubʼanik ri jastaq che kʼo ubʼanik rukʼ ri congregación.

Xqʼax lajuj junabʼ rech xinchomaj we kinmaj chi jumul ri precursorado. Pa 1962, xinbʼe pa ri Betel re Canadá pa ri Tijobʼal rech ri Ministerio del Reino, jun etaʼmanik che kyaʼ chke ri e kʼamal bʼe che kuchʼij jun ikʼ. Chilaʼ, xinkʼojiʼ pa jun cuarto rukʼ jun qachalal ubʼiʼ Camille Ouellette. Sibʼalaj xinmayo rumal che sibʼalaj kukoj uchuqʼabʼ che utzijoxik ri utzij ri Dios, paneʼ kʼo rixoqil xuqujeʼ e ralkʼwal. Pa ri tiempo riʼ, xa kebʼ oxibʼ qachalal re ri tinamit Quebec e precursores che  kʼo kifamilia. Camille kraj che kinmaj chi jumul ri precursorado rumal laʼ xuya nuchuqʼabʼ rech kinbʼano. Chiʼ xqʼax ri tiempo, xwilo che kinkunik kinux chi jumul precursor. E jujun qachalal xubʼan kebʼ kikʼuʼx we qas utz ri kinchomaj ubʼanik, are kʼu xinya ta kan ubʼanik ri xinchaʼo, qas wetaʼm che Jehová kinutewchiʼj rumal che kinkoj más nutiempo che utzijoxik ri uTzij.

Pa 1964, Simone xuqujeʼ in xojux precursores especiales pa Quebec, ri tinamit jachiʼ xojalax wi. Chilaʼ xojpatanin wi kʼi junabʼ. Pa taq ri qʼij riʼ, paneʼ qʼatem uwach ri utzijoxik utzij ri Dios, ri e jastaq riʼ tajin ksukʼumatajik.

Ri bʼenaqʼij re ri sábado, xinchap pa ri tinamit re Sainte-Marie, are jun alaj tinamit che kʼo chunaqaj ri tinamit Quebec. Jun policía xinukʼam bʼik xuqujeʼ xinuya pa cárcel rumal che kʼo ta nupermiso rech kintzijoj ri utzij ri Dios. Tekʼuriʼ, xinukʼam bʼi chuwach ri qʼatal tzij ubʼiʼ Baillargeon, jun achi sibʼalaj nim ubʼanik. Xutaʼ chwe jachin kintowik are chiʼ kinok chuwach ri qʼatbʼal tzij. Are chiʼ xinbʼij che are Glen How, * che are jun abogado Testigo che sibʼalaj etaʼmatal uwach, rukʼ xibʼin ibʼ xubʼij: «No, ri areʼ no». Glen How qas etaʼmatal uwach rumal che e utoʼm e kʼi qachalal xuqujeʼ chʼakanaq pa ri qʼatbʼal tzij. Qʼaxinaq chi ri qʼij, ri qʼatal tzij xinuchʼabʼej xubʼij chwe che kʼo ta chi numak chkiwach.

Rumal che qʼatem uwach ri qachak pa ri tinamit Quebec, qas kʼax uriqik utz taq ja jachiʼ kbʼan wi ri qariqbʼal ibʼ. Ri alaj qacongregación xaq xiw xuriq jun qʼelalaj ja che sibʼalaj tew upam. Rech kqamiqʼisaj qibʼ are chiʼ qas kubʼan tew, ri e qachalal xkitzukuj jun calentador che kukoj aceite. Are chiʼ majaʼ kumajij ri qariqbʼal ibʼ, kqasutij rij ri calentador pa jujun taq horas rech kojmiqʼik xuqujeʼ kojchʼaw chrij utz taq jastaq che qakʼulmam pa ri qakʼaslemal.

Sibʼalaj utz rilik are chiʼ e qʼaxinaq ri junabʼ sibʼalaj utz bʼanom che utzijoxik ri utzij ri Dios. Pa taq ri junabʼ sesenta, xaq xiw e kʼo jujun alaj taq congregaciones chunaqaj ri tinamit Quebec, ri lugar re Côte-Nord xuqujeʼ ri península re Gaspé. Kimik, pa ri lugares riʼ e kʼo kʼi qachalal, che kkimulij kibʼ pa jeʼlalaj taq Ja rech Ajawbʼal.

Pa 1970, xbʼix che Simone xuqujeʼ in che kojtobʼan che solinel re circuito, pa 1973 xbʼix chqe che kojtobʼan che solinel re distrito. Pa ri e junabʼ riʼ, sibʼalaj kʼi xwetaʼmaj chkij nikʼaj chik solinelabʼ che kʼo nim ketaʼmabʼal, junam rukʼ Laurier Saumur * xuqujeʼ David Splane. * Are chiʼ kkʼis ri e riqbʼal ibʼ, David xuqujeʼ in kqaya pixabʼ chbʼil qibʼ rech kojux utz taq ajtijabʼ. Knaʼtaj chwe che jumul xubʼij chwe: «Léonce, sibʼalaj utz xinta ri kʼisbʼal chʼabʼal. Are utz, are kʼu rukʼ ronojel ri xabʼij in xinbʼan ta riʼ oxibʼ chʼabʼal che». In amaqʼel kinya  ubʼixik kʼi jastaq, rumal laʼ rajawaxik xaq xiw kinbʼij ri qas nim ubʼanik.

Jun chke ri uchak ri solinel re distrito are uyaʼik kichuqʼabʼ ri solinelabʼ re circuito. Are kʼu e kʼi publicadores re Quebec ketaʼm nuwach, rumal laʼ are chiʼ kinbʼe che kisolixik ri circuitos kkaj kinel kukʼ che utzijoxik ri utzij ri Dios. Sibʼalaj utz kwilo kinbʼe kukʼ, are kʼu qas ta kinkʼojiʼ rukʼ ri solinel re circuito. Jumul, jun solinel re circuito xunaʼtasaj chwe rukʼ loqʼoqʼebʼal: «Utz che katkʼojiʼ kukʼ ri e qachalal, are kʼu ksach ta chawe che wajun semana riʼ wech in. In xuqujeʼ rajawaxik kyaʼ nuchuqʼabʼ». Ri xubʼij chwe xinutoʼ rech xux utz ri nuchomanik chrij ri tiempo kinkoj kukʼ ri e qachalal.

Pa 1976 xinkʼulmaj jun kʼax pa nukʼaslemal. Ri loqʼalaj wixoqil xyawajik tekʼuriʼ xkamik. Rumal ri nimalaj uloqʼoqʼebʼal che ri Jehová xux jun utzalaj wachiʼl pa ri nukʼaslemal. Ri xintow chuwach ri bʼis are ukojik más nutiempo che utzijoxik ri utzij ri Dios, rumal laʼ kinmaltyoxij che ri Jehová rumal ri uloqʼoqʼebʼal xuqujeʼ ri utobʼanik xuya chwe pa ri tiempo riʼ. Qʼaxinaq chi ri tiempo, xinkʼuliʼ rukʼ Carolyn Elliott, jun qachalal precursora, che kchʼaw pa inglés xuqujeʼ xtobʼan pa ri tinamit Quebec. Are jun utzalaj ixoq che qas kok il chke ri e nikʼaj chik, más na chke ri qas ta kechʼawik o kkinaʼ che kʼo ta kachiʼl. Are jun nimalaj tobʼanik chwe in, rumal che in solinel.

Pa enero 1978, xbʼix chwe che kinux ajtij re ri nabʼe Tijobʼal rech ri Chak rech Precursor re ri tinamit Quebec. Sibʼalaj xinxibʼij wibʼ, rumal che ri kʼutunem are kʼakʼ chwe in xuqujeʼ chke ri tijoxelabʼ. Are kʼu ri qas utz are che e kʼo kʼi precursores nim ketaʼmabʼal. Rumal laʼ, paneʼ in are ri ajtij, kʼi jastaq xwetaʼmaj kukʼ ri tijoxelabʼ.

Pa ri junabʼ riʼ, xbʼan jun Asamblea Internacional ubʼiʼ «Fe victoriosa» pa ri Estadio Olímpico re Montreal. Xux ri nim riqbʼal ibʼ más nim bʼanom pa Quebec, xeʼopan más che ochenta mil winaq. In xinchakun pa ri Departamento  re Servicio re Noticias. Xintzijon kukʼ kʼi periodistas, sibʼalaj xinkikotik are chiʼ xwil ri utz taq tzij kkibʼij ri e winaq pa ri medios de comunicación. Pa más che veinte horas xbʼan entrevistas pa ri radio xuqujeʼ pa ri televisión, xuqujeʼ kʼi mul xechʼaw chrij wariʼ pa ri prensa. Rukʼ wariʼ sibʼalaj xyaʼ ubʼixik chrij ri Jehová.

Pa 1996, kʼo xkʼextaj pa ri nukʼaslemal. Chiʼ nubʼanom chi nuqasanjaʼ, in elinaq ta bʼik pa ri tinamit Quebec, chilaʼ ri winaq kechʼaw pa francés. Are kʼu xintaq bʼi pa jun chi tinamit ubʼiʼ Toronto chilaʼ ri e winaq kechʼaw pa inglés. Xinnaʼo che kinkun ta che wajun chak riʼ rumal che kinkun ta más kinchʼaw pa inglés xuqujeʼ kinxibʼij wibʼ kinya chʼabʼal pa inglés. Rajawaxik che amaqʼel kinbʼan nuchʼawem xuqujeʼ kinkubʼa más nukʼuʼx chrij ri Jehová.

Kinkunik kinbʼij che nuqʼaxem utzalaj kebʼ junabʼ pa Toronto. Carolyn qas in nutoʼm rech kinchʼaw pa inglés, ri e qachalal xkiya ri kitobʼanik xuqujeʼ xkiya nuchuqʼabʼ. Chanim xqariq utzalaj taq qachiʼl.

Pa taq viernes bʼenaqʼij are chiʼ majaʼ kumaj ri nim riqbʼal ibʼ re circuito, paneʼ kʼi chak kbʼanik rech utz kel ri riqbʼal ibʼ, utz kwilo kinel cho taq ja che utzijoxik utzij ri Dios. Weneʼ e jujun kkichomaj jasche kinbʼe che utzijoxik utzij ri Dios paneʼ latzʼ nuwach pa ri semana riʼ. Are kʼu xwetaʼmaj che sibʼalaj kuya nuchuqʼabʼ are chiʼ kintzijon kukʼ ri e winaq. Kimik riʼ xuqujeʼ utz kwilo kinel che utzijoxik utzij ri Dios.

Pa 1998, Carolyn xuqujeʼ in xojtaq bʼi che precursores especiales pa Montreal. Pa kʼi taq junabʼ xinbʼan kʼi uwach taq chak, jun chke are kwil ri kbʼan che utzijoxik utzij ri Dios jachiʼ e kʼo wi e kʼi winaq xuqujeʼ kintzijon kukʼ ri medios de comunicación rech kwesaj ri chomanik che qastzij taj kkibʼij ri winaq chkij ri testigos rech Jehová. Kimik, Carolyn xuqujeʼ in kqatzijoj ri utzij ri Dios chke winaq che keʼopan pa Canadá rumal che utz kkilo kketaʼmaj chrij ri Biblia, sibʼalaj utz kqil wariʼ.

Are chiʼ kinchoman chrij ri sesenta y ocho junabʼ che nubʼanom chi nuqasanjaʼ, sibʼalaj kinmaltyoxin che ri Jehová. Qas kinkikotik rumal che xinkunik xintzijoj ri utzij ri Dios xuqujeʼ xinkunik xentoʼ e kʼi winaq rech kketaʼmaj ri qastzij. Tekʼuriʼ ri numiʼal, Lise, xuqujeʼ ri rachajil are chiʼ xenimar ri e kalkʼwal xuqujeʼ xeʼux precursores regulares. Qas kinkikot rumal Lise rumal che uyaʼom ta kan ri ukikotemal che utzijoxik utzij ri Dios. Kinmaltyoxij chke ri e qachalal che xinkitoʼ rukʼ ri kikʼutbʼal xuqujeʼ rukʼ ri utz taq pixabʼ che xkiya chwe rech xinkʼiy pa ri nukojonik xuqujeʼ rech kinbʼan ri chak che xinriq pa ri utinamit ri Dios. Xwetaʼmaj che kojkunik kojux sukʼ chuwach ri Jehová we kqaya bʼe che ri uxlabʼixel kukʼam qabʼe pa ri qachak (Sal. 51:11). Kintanabʼa ta kan uyaʼik maltyoxinik che ri Jehová rumal che xuya bʼe chwe rech xintobʼan che uyaʼik uqʼij ri ubʼiʼ (Sal. 54:6).