Canadá llajtapi Quebec pueblopimi huacharircani. Chaipica francés shimitami parlancuna. Ñuca yayitu Louis, ñuca mamita Zeliaca achcatami cꞌuyajcuna carca. Ñuca yayituca parlanata mana tanto munashpapish liyinatami achcata munarca. Pero ñucaca escribinata munashcamantami periodista tucusha nircani.

12 huatacunata charijpimi ñuca yayapaj compañero Rodolphe Soucyca paipaj amigohuan ñucanchij huasiman shamurca. Paicunaca testigo de Jehovami carcacuna. Pero testigo de Jehovacunamantaca mana imata yachasha nircanichu. Shinapish ñucaman, ñuca yaya mamaman cꞌuyaita ricuchijpi, tapushcacunatapish Bibliahuan cutichijpimi paicunahuan yachai callarircanchij.

Ñuca colegiopica católico religionmantami yachachijcuna carca. Huaquinpica Bibliamanta yachacushcatami ñuca compañerocunamanca huillarcani. Chaitami profesorcunaca yachaj chayarcacuna. Paicunaca curacunami carca. Shuj curaca ñuca ima nishcacunata Bibliahuan chꞌimbapuranapaj randica compañerocunapaj ñaupajpimi canca malcriado huambrami cangui nirca. Chashna rimajpimi chai colegiopi Bibliamanta panda yuyaicunata yachachicushcata intindircani. Chaimantami shujtaj colegiopi estudiangapaj ñuca yaya mamata permisota mañarcani.

Bibliamanta yachashpami catircani. Pero huasin huasin huillanata manchashcamantami mana utca bautizarircani. Chai punllacunapica Iglesia catolicaca achca autoridadtami charirca. Shinallataj Maurice Duplessisca Quebec llajtata jatun mandajmi carca. Paica catolicocunatami apoyaj carca. Chaimi achca gentecunata tandachishpa  testigo de Jehovacunataca llaquichircacuna. Chai tiempopica huillangapajca mana manchaj canami minishtirirca.

Escuela de Galaadmanta clase 9-pi graduarishca huauqui John Raemi manchaita mishachun ñucataca ayudarca. Achca experienciata charishpapish paica humilde, alli shungumi carca. Johnca huaquinllapi consejashpapish paipaj alli ejemplohuanmi ñucataca ayudarca. Shinallataj francés shimita mana tanto yachajpimi paihuan huillanaman llujshishpa paitaca ayudarcani. Huauqui Johnhuan predicacujpimi paipish bautizarichun ñucataca animarca. Testigocunata rijsishca 10 huatacuna qꞌuipami 26 de mayo de 1951 huatapi bautizarircani.

Quebec congregacionpica achca precursorcunami tiyarca. Paicunami precursor tucuchun animarca. Chai tiempopica publicacioncunata mana charishcamantami Bibliahuan yachachingapajca alli prepararij carcani. Diospaj yachachishcacunata difindingapajmi huaquin versocunataca de memoria yacharcani. Shinapish tauca gentecunaca Iglesia catolicapaj permisota mana charishpaca Bibliataca mana liyijcunachu carca.

1952 huatapimi Quebec llajtamanta Diosta alli sirvij Simone Patry huarmihuan cazararcani. Chai huashaca Montreal llajtapimi causanaman rircanchij. Manaraj huatayajpimi Lise shuti ushushita charircanchij. Cazarangapaj asha tiempo faltajpi precursor canata saquishpapish, ñuca huarmisitahuanca minishtirishcallahuanmi causarcanchij. Chashnami congregacionpi ayudangapaj tucui pudishcata rurarcanchij.

10 huatacuna pasashca huashami cutin precursor canata yuyarcani. 1962 huatapimi Canadá llajtapi tiyaj Betelpica ancianocunapaj Escuela del Ministerio del Reino tiyarca. Chai escuelamanmi ñucataca shuj quillata invitarcacuna. Betelpica Camille Ouellette huauquihuanmi shuj cuartopi saquirircanchij. Huauqui Camilleca huarmiyuj, huahuacunayuj cashpapish Diosmanta huillanatami achcata munaj carca. Chai tiempopica Quebec llajtapi causaj ashalla huauqui panicunaca huahuacunayuj cashpapish precursorcunami carca. Pero Camilleca precursor canatami munarca. Paica ñucatapish huaquin cambiocunata rurachunmi animarca. Chaimantami asha quillacuna qꞌuipaca cutin precursor tucurcani. Huaquincunaca canca precursor canataca mana pudinguichu  nishpami desanimachircacuna. Pero precursor tucungapajca Jehová Dios ayudanatami tucui shunguhuan crircani.

Ñucanchij huacharishca llajtapimi 1964 huatapica ñucatapish ñuca huarmitapish precursores especiales tucuchun nombrarcacuna. Chaimi achca huatacunata Diosta sirvircanchij. Chai llajtapica ñaupa shinaca Diosta sirvichunca mana tanto jarcajcunachu carca.

Shuj sábado chishitami Quebec cꞌuchullapi saquirij Sainte-Marie llajtapica huasin huasin huillacurcani. Chaimi huillangapaj permisota mana charijta ricushpa shuj policiaca comisariopajman apashpa carcelpi churarca. Chai qꞌuipaca juez Baillargeonpaj ñaupajmanmi pusharcacuna. Chai jueztaca tucuicunami manchajcuna carca. Cai juezca: “Cantaca cai juiciopica pitaj difindinga” nishpami tapurca. Ñucaca Glen How * abogadomi ñucataca difindinga nircanimi. Cai juezca mancharishcami “Yayitulla, ¿pai?” nirca. Cai huauquica achca huauqui panicunatami tucui laya juiciocunapi ayudashpa ganaj carca. Asha tiempo qꞌuipallami tribunalpi juzganataca anchuchirca.

Quebec llajtapica Diosmanta huillachunmi jarcajcuna carca. Chaimantami Diosta adorangapaj shuj alli pushtuta mana alquilai tucurcanchij. Huauqui panicunahuan Diosta adorangapajca carrota huaquichina ucutami alquilarcanchij. Chaipica dimastij chiri cashcamantami querosenahuan cunuchij shuj maquinata charircanchij. Tandanacuicuna manaraj callarijpimi huaquin horascunataca maquina muyundijpi animachij experienciacunamanta parlanacuj carcanchij.

Chai huatacunapica Quebec cꞌuchullapi saquirij Côte-Nord, península de Gaspé llajtacunapica ashalla congregacioncunami tiyarca. Pero mana shaicushpa predicashcamantami cunanca achca congregacioncuna mirarishca. Tandanacuna huasicunapish maravillami can. Chaita ricushpami cushilla sintirinchij.

1970 huatapimi ñucata, ñuca huarmitaca congregacioncunata visitachun cacharcacuna. Cutin 1973 huatapimi superintendente de distrito cachun nombrarcacuna. Chai tiempopica Laurier Saumur * y David Splanemi * superintendentecuna carca. Paicunamanta, shujtaj superintendentecunamantami achcata yacharcani. Jatun tandanacui tucurishca qꞌuipami huauqui Davidpish ñucapish alli yachachijcuna cangapaj imapi mejorana cashcata parlanacuj carcanchij. Shuj cutinca paica cashna nishpami consejarca: “Léonce, cambaj tucuri conferenciaca alajami carca. Pero can yachachishcahuanca ñucaca quimsa conferenciacunatami ruraiman carcani” nircami. Chashna consejajpimi ima shina yachachinataca cuentata curcani.

 Superintendente de distritocunaca congregacioncunata visitaj superintendentecunatami animajcuna carca. Ñucaca Quebec llajtamanta publicadorcunapajca rijsishcami carcani. Chaimi congregacioncunata visitaj superintendentecunata visitanaman rijpica huaquin publicadorcunaca huillanaman ñucahuan llujshijcuna carca. Chaimantami superintendentecunahuanca mana achca tiempota pasaj carcani. Shuj cutinca shuj superintendentemi cꞌuyaihuan ñucataca: “Huauqui panicunahuan pasanaca allimi can. Pero cai semana ñucata visitanata ama cungaringui. Ñucapish animota cuchunmi minishtini” nircami. Cai huauquipaj consejomantaca achcatami yacharcani.

1976-huatapica ñuca cꞌuyashca huarmisita Simonetaca shuj millai ungüimi japirca. Chaimi anchayashpa huañurca. Paica shujtajcunata ayudashcamanta, Jehová Diostapish cꞌuyashcamantami shuj alli huarmi carca. Pai huañujpica Diospajta ruranapi ocuparishpami ñaupajman catircani. Jehová Dios ñucaman fuerzata cushpa ayudashcamantami achcata agradicini. Tiempo huashaca Carolyn Elliott huarmihuanmi cazararcani. Carolynca precursora, inglés shimita parlajmi carca. Paica Quebec llajtapimi sirvinaman shamushca carca. Ñuca huarmisitaca sololla cajcunata, parlanata manchajcunatami cꞌuyaihuan ayudanata yachan. Chaimantami congregacioncunata ñuca visitacujpica paipish shujtajcunata animashpa ayudarca.

1978 huatapica punta cutinmi Quebec llajtapi precursorcunapaj escuela tiyarca. Chai escuelapi yachachichunmi ñucataca cacharcacuna. Shinapish cai yachaicuna mushuj cashcamantami mancharcani. Chaipica achca experienciata charij precursorcunami tiyarca. Paicunata yachachishpapish paicunamantami achcata yacharcani.

1978 huatallapitajmi Quebec llajtapi Estadio Olímpico de Montrealpica “Fe victoriosa” nishca jatun tandanacuita charircanchij. Cai tandanacuipica chꞌican chꞌican llajtacunamanta 80 mil yalli  gentecunami tandanacurcanchij. Quebec llajtapica mana nunca chashna tandanacujcunachu carcanchij. Ñucataca periodistacunahuan parlachunmi mingarcacuna. Chaimi achca periodistacunahuan parlarcani. Periodistacunaca televisionpi, radiopipish 20 horas yallitami jatun tandanacuimanta parlachun ñucanchijta entrevistarcacuna. Shinallataj periodicocunapipish jatun tandanacuimantaca achca cutinmi escribircacuna. Allicunallata parlajpimi dimastij cushicurcani.

Bautizashca punllamantami Quebec llajtapi francés shimipi sirvircani. Shinapish 1996 huatapica Toronto llajtapi sirvichunmi cacharcacuna. Chaipica inglés shimitami parlajcuna carca. Cai shimita mana yachashcamantami conferenciacunataca mana alli intindichishachu nishpa mancharircani. Chaimantami Yayitu Diostaca cutin cutin ayudahuai nishpa mañarcani.

Asha sinchi cajpipish Toronto llajtapimi ishqui huatacunata cushilla sirvircanchij. Ñuca huarmisita Carolynca inglesta alli parlachunmi pacienciahuan ayudarca. Shinallataj huauquicunaca animota cushpami ayudarca. Chaimi achca amigocunata charircanchij.

Jatun tandanacui fin de semanata tiyagrijpipish viernes chishitami huasin huasin huillanaman llujshij carcani. Maijancunaca ‘jatun tandanacuipi achca trabajota charishca jahuaca ¿imamantataj huillanaman llujshin?’ nishpachari tapurishcangacuna. Paicuna chashna yuyajpipish gentecunahuan alajata parlashcamantami cushilla sintirircani. Cunan punllacunapish huillanaman llujshishpaca contentomi sintirini.

1998 huatapica ñucata, ñuca huarmitaca Montreal llajtapi precursores especiales shina sirvichunmi nombrarcacuna. Achca huatacunataca aeropuertopi, librocunata cꞌatuj feriacunapi ima shina predicanata ricuchunmi mingarcacuna. Shinallataj testigo de Jehovacunamanta ama panda yuyaicunata nichunmi periodistacunahuan parlaj carcani. Cunanca Canadá llajtapimi ñuca huarmihuan shujtaj llajtamanta shamujcunaman huillacunchij. Paicunaca Bibliamantami ashtahuan yachanata munancuna.

68 huatacunatami Jehová Diostaca cushilla sirvishcani. Predicashcamanta, gentecunatapish Diosta rijsichun ayudashcamantami contento sintirini. Ñuca ushushi Lisepish paipaj cusahuanmi huahuacunata huiñachishca qꞌuipaca precursores tucurcacuna. Ñuca ushushipish predicanata manataj saquishcamantami cushilla sintirini. Shinallataj sinchi feta charingapaj, Dios mingashcacunata pajtachingapaj, huauqui panicuna alli ejemplocunahuan ayudashcamantami achcata agradicini. Jehová Dios paipaj espíritu santohuan ayudanata crishpallami Dios mingashcacunataca pajtachishun (Salmo 51:11). Yayitu Dios paita sirvichun saquishcamantami dimastij agradicini (Salmo 54:6).