Canada nacionpi kaq Quebec llaqtachapim tayta-mamaywan yacharqani. Taytaypa sutinqa Louismi, mamaypañataqmi Zelia, paykunaqa kuyakuqllañam karqaku. Taytayqa achka qillqakunatam ñawinchaq, ñuqañataqmi anchata munaq kani qillqakuna qillqayta, chayraykum wiñaruspay chayna llamkaypi llamkayta munarqani.

Chunka iskayniyuq wataypi kachkaptiymi wasiyman hamururqaku iskay testigokuna, hukninmi karqa taytaypa llamkaqmasin Rodolphe. Ñuqaqa manam anchatachu yacharqani Jehova Diospa testigonkunamantaqa, manataqmi yachaytapas munarqanichu. Ichaqa chaypim qawarqani imapas tapukuyniykumanta bibliawan sumaqllataña chaynataq kuyakuyllawanña yachaykachiwasqankuta. Chaywanmi anchata kusikurqaniku, chayraykum tayta-mamayqa bibliamanta yachayta qallaykurqaku.

Chaypiqa escuelallapiraqmi kachkarqani, escuelaypiqa achka curakunam yachachiwaqku. Chaymi warmamasiykunaman bibliamanta willayta qallaykuptiy chay curakunaqa piñakuwarqa, chayraykum huk punchaw warmamasiykunapa qayllanpi paykunamanta huk kaqnin qaqchaparuwarqa. Chaywanmi musyarurqani bibliapa nisqanman hina mana yachachisqankuta. Chaymi tayta-mamayta nirqani chay escuelamanta hurquwaspanku huk escuelamanña churawananpaq.

Bibliamantaqa hinallam yachachiwarqaku, ichaqa wasin-wasin Diosmanta willakuq rinaypaq niykuwaptinkum mancharikurqani. Chay tiempopim llaqtaypi curakunawan autoridadkuna hukllawanakuruspanku Jehova Diospa testigonkunata llumpayta chiqnikuspanku  maqapaqku hinaspa ñakarichiqku. Chaykunaraykum manchakuq kani Diosmanta willakuq riyta.

Chayna kachkaptiymi iñiqmasinchik John Rae yanapaykuwarqa. Payqa yacharqam Diosmanta imayna willakuyta, hinaspapas huk law nacionkunapi Diosmanta willakunanpaq yachachisqam karqa. Chayna yachachisqa kaspanpas mana hatun tukuqmi karqa. Ichaqa frances rimayta mana anchata yachasqanraykum chay rimayniyta yachachiq kani, kuskataqmi Diosmantapas willakuq kani. Paywan hukllawakusqayqa yanapawarqam ñuqapas pay hina Diosmanta willakunaypaq. Chaymi 22 wataypi kachkaspay bautizakurqani. Chayqa karqa testigokunata riqsisqaymanta 10 wata pasaytañam.

Huñunakusqaypiqa yaqa llapankum iñiqmasinchikkunaqa 70 horata Diosmanta willakuqku. Chayna kasqankum ñuqatapas yanapawarqa 70 horata Diosmanta willakunaypaq. Chay watakunapiqa manam qillqanchikkunaqa karqaraqchu, chaymi bibliallawan runakunamanqa Diosmanta yachachiq kaniku. Chayraykum ñuqaqa anchata kallpanchakurqani bibliamanta allinta yachanaypaq, chaynapi pipas Diosmanta tapuwaptin imam kaqta yachachinaypaq. Ichaqa curakuna mana munasqankuraykum achka runakuna bibliataqa mana ñawinchayta munaqkuchu.

23 wataypi kachkaspaymi Simone Patriwan casarakururqani, payqa Diosman sunqum karqa. Casarakuruspaykum Montreal llaqtaman astakururqaniku. Casarakurusqaykumanta manapas watallanmantaqmi warmachayku Lisepas nacerurqa. Ñuqaqa casarakunaypaqmi precursor kayta saqirurqani. Chaywanpas iskayniykum kallpanchakurqaniku kapuqllaykuwan kawsakuspa Diosmanta willakunaykupaq. Chaynapi aylluntin Jehova Diosta yupaychanaykupaq.

33 wataypi kachkaspayñataqmi punta apaqkunapaq escuelaman rirqani, chay escuelaqa karqa betel wasipim. Chaypim riqsirurqani iñiqmasinchik Camille Ouelletteta, paypas churiyuqmi kasqa. Ichaqa churiyuq kaspanpas precursor kaytam munarqa, chaymi ñuqatapas Camilleqa kallpanchawarqa kaqmanta precursor kanaypaq. Chay watakunapiqa churi-wawayuq kaspa precursor kayqa sasam karqa,  chaymi churi-wawayuq precursorkunaqa aslla karqaku. Camillepa kallpanchaykuwasqanwanmi manapas unaymanta kaqmanta precursor kayta qallaykurqani. Ichaqa achkaqmi niwarqaku aylluypaq llamkayta chaynataq precursor kayta mana atinaymanta, ñuqam ichaqa mana iskayrayaspa Jehova Diospi hapipakurqani.

35 wataypi kachkaptiymi llaqtaykuman kutispa precursor especial kanaykupaq niykuwarqaku, chaywanqa anchatam kusikurqaniku. Autoridadkunawan curakunaqa hinallam harkakurqaku Diosmanta willakuytaqa, ichaqa manañam ñawpaqta hinañachu. Chayraykum mana sasachakuspalla Diosmanta willakuq kaniku.

Ichaqa Quebec llaqtapa hichpan llaqtachapi Diosmanta willakuchkaptiymi, qunqayllamanta policiakuna carcelman aparuwarqaku. Chaymantañataqmi juezpa despachunman apawarqaku, chaymi juez tapuwarqa: “¿Pitaq qampa rantikipi rimanqa?”, nispa. Hinaptinmi ñuqañataq nirqani: “Iñiqmasiy Glen Howmi”, nispay. * Chaywanmi juezqa mancharikurqa, hinaspam niwarqa: “Payqa manam qampa rantikipiqa rimanmanchu”, nispa. Chaynataqa niwarqa iñiqmasinchik Glenta manchakusqanraykum, payqa ancha riqsisqam karqa iñiqmasinchikkunapa rantinpi rimasqanrayku. Chaymi manapas unayllamanta carcelpi manaña kanaypaq niwarqaku.

Quebec llaqtapi chiqniwasqanchikraykum sasa karqa maypi huñunakunapaq wasita tariyqa. Chaymi maypi huñunakunaykupaq mana tarisqaykurayku carrokunata churanankupiña huñunakurqaniku. Chaymantapas Quebec llaqtapiqa chirinan ukum llumpa-llumpayta chirikun, chaymi manaraq huñunakuykuna qallaykuchkaptin ninapi qunikuq kaniku. Chayna qunikuspaykum kallpanchanakuq kaniku.

Ancha-anchatam kusikuniku Quebec llaqtapi achka testigokunaña kasqankumanta. Ñawpaqkunataqa Quebec llaqtapa muyuriqninpiqa asllam karqanchik, kunanmi ichaqa achka-achkaña kachkanchik.

41 wataypi kachkaptiymi niykuwarqaku llaqtan-llaqtan watukuq kanaykupaq. 3 watamantañataqmi niykuwarqaku llaqtan-llaqtan watukuqkunataña kallpanchanaykupaq. Chay watakunapiqa ancha-anchatam yacharqani iñiqmasinchik Laurier Saumurmanta * chaynataq iñiqmasinchik David Splanemanta. * Davidwanqa sapa hatun huñunakuy tukuytam imaynata aswan allinta yachachinaykumanta ninakuq kaniku. Huk kutipim niwarqa: “Yachachisqaykiqa  suma-sumaqllañam karqa, ichaqa allinmi kanman tukuy imamanta mana rimayniki”, nispa. Chayna niwasqanqa anchatam yanapawarqa sumaqtaña yachachinaypaq.

Ñuqaykutaqa llaqtan-llaqtan watukuqkunata kallpanchanaykupaqmi niwarqaku. Ichaqa Quebecpi achka iñiqmasinchikkuna riqsiwasqankuraykum chayaruptiykuqa ñuqaykuwan Diosmanta willakuyta munaqku, ñuqatapas paykunawan kuska willakuyqa anchatam kusichiwaq. Ichaqa manam chaypaqchu rirqaniqa aswanqa llaqtan-llaqtan watukuqta kallpanchanaypaqmi. Chayna willakusqayta qawaspanmi llaqtan-llaqtan watukuq iñiqmasinchik niykuwarqa: “Sumaqmi iñiqmasinchikkunawan Diosmanta willakusqaykiqa, ichaqa ñuqatapas kallpanchawanaykim”, nispa. Chayna niykuwasqanqa anchatam yanapawarqa.

47 wataypi kachkaptiymi kuyasqay warmichay wañukullarqa. Payqa kuyakuqllañam karqa, anchatataqmi yanapallawarqapas, Jehova Diostapas anchatam kuyarqa. Chaymi wañukuptinqa ancha-anchata llakikurqani, ichaqa llumpayta mana hukmanyarunaypaqmi Jehova Diosmanta willakusqay yanapawarqa. Chayna llakipi tarikullaptiypas Jehova Diosqa manam saqillawarqachu. Chayna kachkaspaymi kaqmanta casarakururqani Carolyn Elliottwan. Payqa anchatam kallpanchakuq Diosmanta willakunanpaq, hukkunatapas anchatam yanapaq. Ñuqatapas anchatam yanapawarqa llaqtan-llaqtan watukusqaypi.

Quebecpim 1978 watapi precursorkunapaq escuela karqa. Chaymi chay escuelaman riqkunata yachachinaypaq niykuwarqaku. Quebecpiqa manam haykapipas chayqa ruwakurqachu, ñuqapas manam chayna escuelamanqa rirqanichu, chaymi imaynata yachachinaymantaqa mana sumaqtachu yacharqani. Ancha allinmi karqa achka watakunaña precursor kaqkuna  chaypi kasqankuqa. Ñuqa yachachiq kaptiypas paykunam anchata yanapaykuwarqaku.

Hina chay watallapim Montreal llaqtapi hatun huñunakuy apakurqa. Chay huñunakuymanqa huk law nacionkunamantapas achka iñiqmasinchikkunam hamurqaku, chayqa suma-sumaqmi karqa. Chaypim niwarqaku periodistakunawan rimaspa yanapakunaypaq. Yaqa tukuy punchawmi paykunawan rimarqani. Radiopipas chaynataq televisionpipas rimarqakum chay hatun huñunakuyninchikmantaqa. Chaypi ñuqanchikmanta sumaqllataña rimasqankuwanmi ancha-anchata kusikurqani.

67 wataypi kachkaptiymi Toronto llaqtaman rinaykupaq niykuwarqaku. Toronto llaqtapiqa yaqa llapallan runakunam inglesta rimanku, ñuqam ichaqa mana yacharqanichu. Chayraykum manchapakuq kani huñunakuykunapi yachachiyta. Chaymi yanapaykuwananpaq Jehova Diosta mañakuq kani.

Toronto llaqtapiqa 2 watam qipakurqaniku, chayqa ancha kusikunapaqmi karqa. Ingles rimaywan sasachakuptiypas warmichaymi mana amispa anchata yanapawarqa. Iñiqmasinchikkunapas anchatam kallpanchawarqaku. Chaymantapas achka iñiqmasinchikkunawanmi riqsinakurqaniku.

Huk-iskay punchawllaña hatun huñunakuy apakunanpaq kachkaptinpas Diosmanta willakunaypaqmi lluqsiq kani. Chaytaqa ruwaq kani anchata kallpanchawasqanraykum. Kunanpas chayqa anchatam kallpanchawan.

69 wataypi kachkaptiymi niykuwarqaku Montreal llaqtapi precursor especial kanaykupaq. Niwarqakutaqmi achka runakunapa kasqanpi Diosmanta willakunankupaq iñiqmasinchikkunata yanapanaypaqpas. Chaymantapas chay tiempopiqa yanqakunatam rimaqku Jehova Diospa testigonkunamanta. Chayraykum niwarqaku wayra wasipi llamkaqkunawan, chaynataq periodicokunapi willakuqkunawan rimanaypaq. Chaynapi paykunapas ñuqanchikmanta sumaqta yachaspanku yanqakunata manaña rimanankupaq. Kunanqa Canadaman chayllaraq hampukuqkunamanmi Jehova Diosmanta willakuchkaniku, paykunaqa uyariwankum.

68 wataña Jehova Diosta yupaychasqaywanmi kusisqa tarikuni. Kusisqataqmi tarikuni Jehova Diosta riqsinankupaq achka runakunata yanapasqaywanpas. Churiypas warmankunata qispirachisqan qipamanmi qusanwan kuska precursor regular kayta qallaykurqaku. Chayqa anchatam kusichiwarqa. Ancha kusisqataqmi tarikuni iñiqmasinchikkuna tukuy imapi yanapaykuwasqanwanpas. Chaymantapas tukuy imapi yanapakuytaqa atirqani Jehova Dios yanapawaptillanmi (Sal. 51:11). Ancha-anchatam Jehova Diosta agradecekuni paymanta willakunaypaq yanapaykuwasqanmanta (Sal. 54:6).