Quebec llaqtapin nacerani, chayqa Canadá nacionpin tarikun, chaypi tiyaq runakunaqa francés simitan rimaranku. Papaypa sutinmi karan Louis, mamaypa sutintaq karan Zélia, paykunaqa sumaqtan uywawaranku. Papayqa k’umuykukuq runan karan gustarantaq leey. Noqamanqa qelqaymi gustawaran, munaranitaqmi periodista kayta.

12 wataypi jina kashaqtiymi wasiykuman visitamuwaranku Rodolphe Soucy amigonpiwan, payqa papaypa llank’aqmasinmi karan. Paykunaqa Jehová Diospa testigonkunan kasqaku. Testigokunamantaqa manan yacharanichu, manataqmi religionninkumanta yachayta munaranichu. Ichaqa admirakuranin sumaq sonqo kasqankumanta, Bibliawan tapuykunaman allinta kutichisqankumantawan. Tayta-mamaypas admirakurankun, chaymi paykunawan Bibliata estudiarayku.

Chay tiempopin iglesia católica escuelapi estudiasharani. Mayninpin compañeroykunawan Bibliamanta yachashasqayta parlarani. Profesorniykunaqa sacerdotekunan karanku, jinan paykunaqa yacharusqaku rimasqaymanta. Jujnin profesortaq compañeroykunaq qayllanpi niwaran: “Qanqa iglesiaq contranpin jatarishanki”, nispa. Chhaynapi tarikuyqa sasan noqapaq karan, ichaqa chayraqmi entienderani escuelaypi religionmanta yachachiwasqankuqa mana Bibliaq yachachisqanman jinachu kasqanta. Chaymi manaña munaranichu chay escuelapi estudiayta, jinan tayta-mamayta nirani juj escuelaman cambiawanankupaq.

Bibliamanta yachachiwasharankuña chaypas manan iñiyniypi ñaupariranichu, wasin-wasinta Diosmanta willayta manchakusqayrayku. Iglesia católica nisqaqa atiyniyoqmi karan, nishutataq jark’akuran Diosmanta willasqanchista. Maurice Duplessis runan  Quebec llaqtapi autoridad karan, payqa iglesia catolicatan apoyaran. Chaymi askha runakuna Testigokunata k’amiranku mayninpitaq maqarankuraq. Chay tiempopi Diosmanta willanapaqqa mana manchakuqmi pipas kanan karan.

John Rae hermanonchismi yanapawaran manchakuyniyta atipanaypaq, payqa Galaad escuelamanmi riran. Askha watakunaña Diosta servisharan chaypas, k’umuykukuq llamp’u sonqo runan karan. Maynillanmi imayna ruwanaypaq imatapas niwaq, ichaqa ejemplonmi allinta yanapawaran. Sasatan francés simita rimaran, chaymi sapa kutilla paywan kuska Diosmanta willaq rirani, chay simi rimayta yachananpaqtaq yanaparani. Paywan purisqaymi yanapawaran Jehová Dios servinaypaq. Jinan 1951 watapi 26 mayo p’unchaypi bautizakurani, chayqa karan chunka wata Testigokunata reqsisqay qhepamanñan.

Quebec llaqtapi iñiq t’aqaykuqa juch’uyllan karan, yaqa llapankutaqmi askha horakuna Diosmanta willaqku, chaymi noqapas chayta ruwarani. Chay tiempopi wasin-wasinta Diosmanta willanaykupaqqa Bibliallatan usarayku. Manan qelqanchiskunaqa karanchu chaymi Bibliamanta allinta yachachinayku karan. Jinan kallpachakurani askha textokunata umaypi jap’inaypaq, chaywan Diosmanta allinta yachachinaypaq. Askha runakunan ichaqa iglesia catolicaq mana autorizasqan Bibliakunata mana leeyta munarankuchu.

1952 watapin Simone Patry hermanawan casarakurani, paypas Quebec llaqtamantan karan. Jinaspa Montreal llaqtaman tiyaq ripurayku, manaraq juj wata pasashaqtintaq Lise ususiyku naceran. Manaraq casarakushaspaymi pisi horakunallataña Diosmanta willarani, chaywanpas esposaywan kuskan kallpachakurayku pisillawan kausanaykupaq, chhaynapi atisqaykuman jina familiaywan kuska Diospa llaqtanpi yanapakunaykupaq.

Chunka watan pasaran jujmanta askha horakunata Diosmanta willanaypaq. 1962 watapin Betelman rirani nombrasqa qharikunapaq escuelaman, chayqa juj killan karan umalliqkunapaq. Chaypin kaq cuartollapi alojakurayku Camille Ouellette hermanowan. Payqa esposayoq wawakunayoqmi karan, chaywanpas allintan kallpachakuran Diosmanta willananpaq. Chay tiempopiqa Quebec llaqtapiqa pisi iñiqmasikunallan  wawayoq kashaspa askha horakunata Diosmanta willaqku. Camille hermanopas chaytan ruwayta munaran. Kuska alojasqa kashaqtiykun payqa niwaran: “Atiwaqmi askha horakunata Diosmanta willayta”, nispa. Jinan pisi killakuna pasayllata chayta ruwarani. Wakinqa manan allinpaqchu chay ruwasqayta qhawariranku, noqan ichaqa mana iskayaranichu, yacharanin Jehová Dios yanapawananta.

1964 watapin Simone esposaytawan nombrawaranku tukuy tiempoykuwan Diosmanta willanaykupaq, jinaspa niwaranku Quebec llaqtaykuman kutipunaykupaq. Chaypin askha watakuna Diosta servirayku. Chay tiempopiqa manañan nishutañachu Diosmanta willasqaykuta jark’akusharanku.

Juj sábado tardentan Sainte-Marie juch’uy llaqtapi juj policía puestoman apawaspa carcelpi wisq’awaran wasin-wasinta Diosmanta willasqayrayku. Chaymantataq Baillargeon juezman apawaranku, chay runaqa manchakunapaq jinan karan. Paymi tapuwaran pichus abogadoy kananta, jinan nirani: “Glen How” *, nispa. Jinan juezqa mancharikuspa niwaran: “Paychu kanqa, amayá”, nispa. Glen How hermanoqa allin reqsisqan karan iñiqmasinchiskunata allinta defiendesqanmanta. Jinan juezqa pisi tiempollamanta kacharipuwaran.

Quebec llaqtapi Diosmanta willasqanchista jark’asqankuraykun sasata tarirayku juñunakuykunapaq localta. Iñiq t’aqaykuqa juj garajepin juñukuran. Chiri tiempopi q’oñikunaykupaqmi iñiqmasikunaqa querosenewan funcionaq calentadorta jap’ichiqku, jinaspa manaraq juñunakuy qallarishaqtin calentadorpa muyuriqninpi tiyaspa, Diosta servisqaykumanta imakunachus pasawasqankuta willanakurayku.

Anchatan kusikuni Diospa llaqtan yapakusqanta rikuspay. 1960 watakunapiqa iskay kinsa juch’uy iñiq t’aqakunallan Quebec, Côte-Nord, Gaspé llaqtakunapi karan. Kunanmi ichaqa askha iñiqmasikuna kan, sumaq localkunapitaq juñukushanku.

1970 watapin esposay Simonetawan nombrawaranku iñiq t’aqakunata visitanaykupaq, 1973 watapitaq nombrawaranku watukuq umalliqkunaq llank’asqanta qhawarinaypaq. Chay watakunapiqa allintan yanapawaranku juj watukuq umalliqkuna, wakinmi karan Laurier Saumur, * David Splane * hermanokuna. Sapa asamblea pasaytan Davidwan parlarayku imapichus allinyanaykupaq. Juj kutipi niwasqantan yuyashani, paymi niwaran: “Léonce allintan rimamuranki, ichaqa imaymanamantan rimaramunki”, nispa. Noqaqa imaymanamantan rimaq kani juñunakuypi yachachishaspaqa chaymi entiendenankupaq jinalla rimanay karan.

Watukuq umalliqkunata qhawariqqa watukuq  umalliqkunatan kallpachanan karan. Quebec llaqtapin ichaqa askha iñiqmasikuna reqsiwaranku, jinan watukuq umalliqkunata visitashaspay iñiqmasikuna noqawan Diosmanta willaq lloqsiyta munaranku. Kusisqan paykunawan lloqsirani, ichaqa manan tiempoy aypawaranchu watukuq umalliqkunata allinta kallpachanaypaq. Chaymi juj watukuq umalli munayllata niwaran: “Allinmi iñiqmasikunata yanapasqaykiqa, ichaqa kay semanaqa noqatan yanapawanayki, noqapas munanin kallpachawanaykita”, nispa. Chay niwasqanqa allinmi karan.

1976 watapin sinchi llakipi tarikurani. Munakusqay esposaymi sinchita onqospa wañupuran. Payqa jujkunamantan llakikuq, anchatataqmi Jehová Diosta munakuran. Jehová Diosta tukuy tiempoywan servisqaymi yanapawaran llakikuywan ama ñit’ichikunaypaq, jinaspapas Diostan “gracias” nini yanapawasqanmanta. Watakuna pasaytan Carolyn Elliott hermanawan casarakurani, payqa tukuy sonqowan askha horakunata Diosmanta willaq, inglés simitan rimaran Quebec llaqtamantaq yanapakuq jamuran. Payqa jujkunatan munakuran, chaymi pipas facil-llata payman rimaykuq, astawanqa manchalikuna. Allintan yanapawaran iñiq t’aqakunata visitasqaypi.

1978 watapin niwaranku Quebec llaqtapi askha horakunata Diosmanta willaqkunapaq escuelapi yachachinaypaq, chay escuelaqa chayllaraqmi qallarisharan. Llakisqan kasharani, manan yacharanichu chay escuelata imayna apariyta, alumnokunapaqpas sasan karan. Ichaqa chay escuelapin kasharanku unayña askha horakunata Diosmanta willaq iñiqmasikuna. Chaymi paykuna allinta yanapawaranku.

Chay watallapitaqmi Montreal llaqtapi askha nacionkunamanta asamblea aparikuran “Iñiyniyoq runaqa imatapas atipanmi” nisqa. Manan chay jina asambleaqa Quebec llaqtapi aparikuranchu, chaypin 80.000 más runakuna juñukuranku. Noqaqa periodistakunaman willaymantan encargakurani. Askha periodistakunawanmi  rimarani, maytan kusikurani televisionpi radiopi ima noqanchismanta allinta rimaqtinku. 20 horas masmi radiopi televisionpi entrevistawasqanku lloqsimuran, periodicopipas pachajninpin willakuykuna lloqsimuran. ¡Askha runamanmi willakuran!

Bautizakusqaymantapachan Quebec llaqtapi Diosta servirani, chaypiqa francés simitan rimaqku. 1996 watapin ichaqa niwaranku Toronto llaqtapi inglés simita rimaq iñiqmasikunata yanapanaykupaq. Noqaqa “manan atisaqchu” nispan nirani, manchakuranitaqmi inglés simipi juñunakuypi yachachiyta. Astawanmi Diosmanta mañakunay karan, confianaytaqmi karan yanapawananpi.

Chaywanpas iskay watan Toronto llaqtapi kusisqa yanapakurani. Esposaymi pacienciawan yanapawaran inglés simita allinta rimanaypaq, iñiqmasinchiskunapas yanapawarankun. Chaymi pisi tiempollapi mosoq amigokunayoq kapurayku.

Iskay p’unchay asambleakuna aparikunanpaqmi viernes p’unchaykuna imaymanata alistanay karan, chaywanpas viernes tardenkunatan Diosmanta willaq lloqsirani. Wakinqa tapukurankupaschá: “¿Imaraykutaq chayta ruwaran sabadota domingotawan asambleapi imaymana ruwanankuna kashaqtin?”, nispa. Reparakuranin runakunaman Diosmanta willasqay kallpachawasqanta. Kunanpas kusisqan kani chayta ruwaspay.

1998 watapin esposaytawan nombrawaranku Montreal llaqtapi tukuy tiempoykuwan Diosmanta willanaykupaq. Askha watakunan yanapakurani runakunaq kasqanpi Diosmanta willay aparikunanpaq, chaymantapas televisionpi radiopi periodistakunawanmi parlarani, chhaynapi iñiqmasinchiskunata runakuna amaña yanqamanta cheqnikunankupaq. Kunanqa Carolyn esposaywanmi waj nacionmanta jamuq runakunata Diosmanta yachachishayku, chay runakunaqa Bibliamantan yachayta munanku.

68 watakunañan Jehová Diosta servishani bautizakusqaymantapacha, chayta yuyarispan Diosta anchata agradecekuni. Anchatan kusikurani Diosmanta willaspay, askha runakunata Diosta reqsinankupaq yanapasqaymantapas. Munakusqay ususiy Lisepas qosanwan kuskan wawankunata uywasqanku qhepaman askha horakunata Diosmanta willashanku. Maytan kusikuni ususiy tukuy sonqowan Diosmanta willashallasqanta rikuspay. Chaymantapas askha iñiqmasikunan ejemplonkuwan rimapayawasqankuwan ima yanapawaranku Jehová Diosta astawan munakunaypaq, llaqtanpi imaymanapi yanapakunaypaqpas. Allintan yachani Diospa llaqtanpi ima ruwaypipas yanapakunapaqqa Diospa espiritunta necesitasqanchista (Sal. 51:11). Manan sayk’uymanchu Diosta “gracias” niyta sutinta jatunchanaypaq yanapawasqanmanta (Sal. 54:6).