Iạ nalahirẹ̌ su Quebec City, provinsi Quebec, su Kanada. Katewe, daerah ene měpẹ̌pakẹ bawerang Prancis. Matimadẹ̌ku, Louis dingangi Zélia, sěbạe makěndagẹ̌ dingangu mapia si siạ. I papạku kai taumata meang, kụ i sie puluang mẹ̌basa bukẹ̌. Iạ puluang měmohẹ dingangu mapulu makoạ wartawan.

Su tempong umurẹ̌ku 12 su taunge, Rodolphe Soucy, hapị i papạku su tampạ pělahal᷊ẹ̌kang, diměnta su wal᷊eng i kami dingangu sěngkatau hapịe. I rẹ̌dua kai Sahiding Yehuwa. Iạ tawe masingkạ mal᷊awọ soal u Sahiding Yehuwa, kụ iạ madiri makasingkạ soal u agama ene. Katewe, iạ naherang ual᷊ingu i sire mapia dingangu něpakẹ cara masuẹ̌ su akal᷊ẹ̌ su tempong simimbahẹ̌ manga kakiwal᷊ong i kami něpakẹ Alkitapẹ̌. I papạ dingangi mamạku lai naherang. Hakị u ene, i kami setuju něnětạ něngěndung Alkitapẹ̌.

Su tempo ene iạ měsẹ̌sikol᷊ah su sikol᷊ah Katolik. Pẹ̌sěngsul᷊ẹ, iạ měbẹ̌běke su manga hapịku su kělasẹ̌ soal u apa seng niěndungangku su tempong něngěndung Alkitapẹ̌. Samurine, manga guru, i sire kai pastor, nakasingkạ soal u ene. Piạ sěngkatau bọu i sire něnoke si siạ su těngong kělasẹ̌, iạ wade pemberontak. Katewe, i sie tawe něpakẹ Alkitapẹ̌ gunang měnodẹ bukti apa niweraku ene nẹ̌sal᷊a. Maning ene nakakoạ si siạ stres, iạ sěběnarẹ̌e nakaěbạ gunane. Iạ nakasingkạ apa nitěntiro su sikol᷊ah soal u agama tawe nẹ̌tatahino dingangu apa niul᷊ị u Alkitapẹ̌. Iạ nasadarẹ̌ iạ harusẹ̌ suměbang bọu sikol᷊ah ene. Ual᷊ingu nakaěbạ izin bọu matimadẹ̌ku, iạ něngal᷊ing sarang sikol᷊ah wal᷊inẹ.

Iạ turusẹ̌ něngěndung Alkitapẹ̌, katewe iạ tawe někoạ lawọ kemajuan ual᷊ingu matakụ měnginjilẹ̌ bọu wal᷊e sarang bal᷊e. Su tempo  ene, Gaheda Katolik piạ pengaruh sěbạe matoghasẹ̌ kụ mawěngsing su hal᷊ẹ̌ měnginjilẹ̌. Maurice Duplessis, těmbonangu politikẹ̌ su Quebec, mědẹ̌dal᷊ahapị mapia dingangu manga těmbonangu Gaheda. Ual᷊ingu piạ dukungan těmbonangu politikẹ̌ ene, lawọ taumata mělẹ̌hinakang Sahiding Yehuwa dingangu měnděndariha si sire. Hakị u ene, manga Sahiding Yehuwa harusẹ̌ bahani tadeạu botonge měnginjilẹ̌.

Saudara John Rae, lulusan Sekolah Gilead kělasẹ̌ kasione, nẹ̌tul᷊ung si siạ limawang pěndang matakụ. John kai saudara piạ lawọ pengalaman. I sie masikome naung, masanạ naung, dingangu gampang pẹ̌bisarang. Tawe masau i sie měgělị sasasa langsung si siạ, katewe ia něngěndung mal᷊awọ bọu i sie. John tawe tumanịu malancarẹ̌ mẹ̌bisara werang Prancis, hakị u ene iạ masau měndingang si sie měnginjilẹ̌ dingangu mẹ̌tul᷊ung si sie. Ual᷊ingu masau mědal᷊ahapị dingangi John, iạ němutusẹ̌ gunang makoạ Sahiding Yehuwa. Iạ nibaptisẹ̌ tanggalẹ̌ 26 Mei 1951, mapul᷊o taung dongkeng iạ nẹ̌sombang dingangu Sahiding Yehuwa.

Sidang i kami su Quebec City kai sidang kadodọ, kụ kal᷊awokange anạu sěmbaụ sene perintis. Ual᷊ingu piạ pẹ̌tatěnoěng mapaelẹ̌ bọu i sire, iạ nakoạ perintis. Su tempo ene, i kami měnginjilẹ̌ bọu wal᷊e sarang bal᷊e kětạeng měpẹ̌pakẹ Alkitapẹ̌. I kami harusẹ̌ měpakẹ Alkitapẹ̌ limembong matahuěna. Hakị u ene, i kami nẹ̌tawakal᷊i měhafalẹ̌ manga ayatẹ̌ tadeạu botonge tumatawang katěngadẹ̌ měpakẹ Alkitapẹ̌. Katewe, lawọ taumata madiri mẹ̌basa Alkitapẹ̌ mạeng bal᷊inẹ Alkitapẹ̌ bọu Gaheda Katolik.

Su taung 1952, iạ nẹ̌kawing dingangi Simone Patry, sěngkatau saudari masatia bọu sidang Quebec City. I kami něngal᷊ing sarang Montreal, kụ su ral᷊ungu sěntaung, i kami nakaěbạ anạ wawine arenge Lise. Maning iạ seng něngědo merintis su tempong maraning mẹ̌kawing, iạ dingangi Simone nẹ̌tawakal᷊i tatapẹ̌ měbiahẹ̌ sederhana tadeạu botonge měkoạ lawọ hal᷊ẹ̌ su pelayanan dingangu su sidang.

Su apang seng mapul᷊o taung něngědo merintis, iạ nẹ̌tiněna gunang saụ merintis. Su taung 1962, iạ timol᷊e Sekolah Pelayanan Kerajaan gunang Penatua su Betel Kanada, karěngụe sěmbul᷊ang. Sene iạ sěngkamarẹ̌ dingangu sěngkatau saudara arenge Camille Ouellette. I Camille masěmangatẹ̌ su pelayanan maning seng piạ anạe sěmbaụ. Ene nakakoạ si siạ naherang. Cita-citang i Camille kai makoạ perintis. Su tempo ene, su Quebec, sěbạe mahal᷊i anaụ sěmbaụ mělẹ̌hiking anạ apidu  merintis. Camille němahangsang si siạ gunang mẹ̌tiněna situasiku. Pira wul᷊ang bọu ene, iạ nẹ̌pěndang iạ seng sadia saụ merintis. Pirang katau saudara naul᷊ị putusangku tawe nihino, katewe iạ tatapẹ̌ merintis. Iạ mangimang Yehuwa sarung měngal᷊amatẹ̌ tawakal᷊iku gunang měkoạ lawọ hal᷊ẹ̌ su pelayanan.

Su taung 1964, iạ dingangi Simone nakoạ perintis istimewa su Quebec City, tampạ asal᷊i kami. Taunge i kami melayani sene. Su tempo ene, sasal᷊ukạ seng tawe mal᷊awọ, katewe bědang piạ pirang katau měnděndarihạ si kami.

Piạ su sahěllo, su Kaehẹ̌ mal᷊ukadẹ, iạ nisamẹ su Sainte-Marie, sěmbaụ soa kadodọ maraning Quebec City. Sěngkatau petugas nẹ̌bawa si siạ sarang kantor polisi kụ něnuẹ̌ si siạ su penjara ual᷊ingu iạ něnginjilẹ̌ bọu wal᷊e sarang bal᷊e tawẹ apa izin. Bọu ene, iạ niwawa sarang sěngkatau hakim arenge Baillargeon. I sie hakim makạtatakụ. Hakim ene nẹ̌kiwal᷊o i sai sarung makoạ pengacaraku. Su tempong iạ nẹ̌sěbạ areng i Glen How, * sěngkatau pengacara Sahiding Yehuwa nikěnalẹ̌ u taumata lawọ, i sie natakụ kụ naul᷊ị, ”Aduh, i sie saụ!” Su tempo ene, lawọ taumata masingkạ saudara Glen How kai mapaelẹ̌ tumatawang kasus hukum Sahiding Yehuwa. Tawe nararěna bọu ene, pengadilan naul᷊ị kěbị tuntutan gunang iạ seng nisawụ.

Ual᷊ingu lawọ taumata su Quebec mawěngsing su hal᷊ẹ̌ měnginjilẹ̌, i kami masigěsạ makaěbạ tampạ sewang gunang paketang měngibadah. Sidang i kami kětạeng nakaěbạ garasi těbe kụ sene tawẹ apa pemanas ruangan. Gunang měnětị ruangan garasi ene su musim dingin, anạu sěmbaụ měpẹ̌pakẹ pemanas lẹ̌lohongu lana. Pirang kaorasẹ̌ těntal᷊ang pěngangibadang bědang tawe nitětạ, i kami mẹ̌komol᷊ẹ̌ mělikụ pemanas ene apidu mẹ̌bawěke pengalaman makatoghasẹ̌.

Sěbạe mal᷊uasẹ̌ nakasilo hasilẹ̌ mapaelẹ̌ bọu hal᷊ẹ̌ měnginjilẹ̌ su ral᷊ungu pul᷊one su taunge. Su taung 1960 taraị, kětạeng piạ piram baụ sidang dararodọ su Quebec City, wilayah Côte-Nord, dingangu Semenanjung Gaspé. Katewe orasẹ̌ ini, piạ nal᷊iu bọu darua wilayah su manga daerah ene, kụ anạu sěmbaụ botonge měngibadah su manga Banalang Kararatuang masadadạ.

Iạ nakaěbạ tugasẹ̌ gunang makoạ pengawas wilayah su taung 1970. Bọu ene, su taung 1973, iạ nakaěbạ tugasẹ̌ nakoạ pengawas distrik. Su pira taung ene, iạ něngěndung mal᷊awọ bọu saudara-saudara apang matahuěna, kere i Laurier Saumur * dingangi David Splane. * Su tempo ene, i sire lai pengawas wilayah. Sabang acara kebaktian masue, iạ dingangi David měbẹ̌bawěke soal u kerea tadeạu cara i kami měněntiro makoạ limembong mapaelẹ̌. Iạ nakatahěndung su sěngkatempo i David naul᷊ị si siạ, ”Léonce, iạ mal᷊uasẹ̌ dimaringihẹ̌ nasẹ̌u pěngěngsuenge. Ene sěbạe mapaelẹ̌, katewe bahan nasẹ̌ ene sal᷊ạe botonge makoạ tatělu nasẹ̌, ang?” Biasane iạ měnẹ̌nambah  lawọ informasi su nasẹ̌ku. Hakị u ene, iạ harusẹ̌ mẹ̌tawakal᷊i tawe měnambah lawọ informasi su nasẹ̌ku.

Pengawas distrik piạ tanggung jawab gunang měnoghasẹ̌ pengawas wilayah. Katewe, lawọ penyiar su Quebec sěbạe kěnalẹ̌ si siạ. Hakị u ene, su tempong iạ mẹ̌tiwo si sire, lawọ penyiar mapulu měnginjilẹ̌ dingangku. Iạ sěbạe mal᷊uasẹ̌ měnginjilẹ̌ dingangi sire, katewe ene nakakoạ si siạ tawe něpakẹ lawọ tempo dingangu pengawas wilayah. Sěngsul᷊ẹ tempo, sěngkatau pengawas wilayah něgělị laingatẹ̌ si siạ, ”Sěbạe mapaelẹ̌ i Brur něpakẹ tempo dingangu anạu sěmbaụ, katewe abe kiwul᷊ei, i Brur diměnta misa ini gunang mẹ̌tiwo si siạ. Iạ lai harusẹ̌ toghaseng.” Sasasa makěndagẹ̌ ene nakatul᷊ung si siạ limembong seimbang.

Su taung 1976, barang tawe tẹ̌tiněnang dingangu sěbạe nakasusah naungku nariadi. I Simone, kawingku, nasakị mawěhạ kụ nate. I sie kawing sěbạe luar biasa ual᷊ingu rela berkorban dingangu makěndagẹ̌ si Yehuwa. Maning sěbạe lụl᷊ahunsusah, iạ limembong natoghasẹ̌ ual᷊ingu tatapẹ̌ sibukẹ̌ su pelayanan. Samurine, iạ nẹ̌kawing dingangi Carolyn Elliott. I sie kai perintis měpẹ̌pakẹ bawerang Inggris kụ diměnta su Quebec gunang melayani su tampạ mahal᷊i penyiar. Carolyn kai mahimumu dingangu sěntiniạ mapadul᷊i su taumata wal᷊inẹ, kahumotongange su taumata meang dingangu nẹ̌pěndang tawẹ apa hapị. I sie masau mẹ̌tul᷊ung si siạ su kanandụu hal᷊ẹ̌ keliling kẹ̌koateng i kami.

Su Januari 1978, iạ nirorongang gunang měněntiro su kělasẹ̌ humotong Sekolah Dinas Perintis. Iạ sěbạe gụgěnggang ual᷊ingu bědang tawe pernah timol᷊e sikol᷊ah ene arau nakasilo bukẹ̌ pẹ̌paketang gunang sikol᷊ah ene. Hakị u ene, kěbị buhu si siạ dingangu su siswa. Untung siswane kai manga perintis piạ lawọ pengalaman. Maning iạ měnaněntirone, iạ něngěndung mal᷊awọ bọu manga siswa!

Bọu ene, su taung 1978 lai, Kebaktian Internasional ”Iman yang Berkemenangan” nikoạ su Stadion Olimpiade Montreal. Ene kai kebaktian kaguwạkenge nikoạ su Quebec. Taumata apang diměnta sene nal᷊iu wọu 80.000 su  kataune. Iạ nakaěbạ tugasẹ̌ mẹ̌tul᷊ung su Departemen Layanan Berita. Iạ nakaěbạ kesempatan mẹ̌bisara su lawọ wartawan. I sire něwawancara si kami su televisi dingangu su acara radio, kụ tempo nipakẹ gunang wawancara ene kai nal᷊iu wọu 20 su kaorase. I sire lai němohẹ hasụe artikel soal u kebaktian ene. Ini kai kesaksian sěbạe mapaelẹ̌!

Dongkeng nibaptisẹ̌, iạ melayani su wilayah měpẹ̌pakẹ bawerang Prancis su Quebec. Katewe, su taung 1996, piạ pẹ̌bawal᷊ui gěguwạ. Iạ nirorongang gunang makoạ pengawas distrik su manga sidang werang Inggris su daerah Toronto. Iạ nẹ̌pěndang tawe memenuhi syarat gunang měkoạ tugasẹ̌ ene. Iạ lai matakụ měnasẹ̌ ual᷊ingu tawe lancarẹ̌ mẹ̌bisara su werang Inggris. Iạ harusẹ̌ limembong masau mẹ̌doa dingangu limembong měngumbala si Yehuwa.

Maning su tempo ene iạ sěbạe gụgěnggang, iạ samurine sěbạe mal᷊uasẹ̌ botonge melayani karěngụe dua taung su Toronto. I Carolyn masabarẹ̌ nẹ̌tul᷊ung si siạ tadeạu limembong percaya diri gunang mẹ̌bisara werang Inggris, kụ anạu sěmbaụ lai turusẹ̌ nẹ̌tul᷊ung dingangu něgělị sěmangatẹ̌ si siạ. I kami langsung nakaěbạ lawọ hapị buhu.

Maning piạ tugasẹ̌ měnadia kebaktian dingangu měkoạ haghing kegiatan wal᷊inẹ, iạ masau měnginjilẹ̌ bọu wal᷊e sarang bal᷊e karěngụe sěngkaorasẹ̌ sabang Sambaiang bawělo. Aramanung piạ u mětẹ̌tiněna, ’Kawe nụe harusẹ̌ měnginjilẹ̌ mạeng diěllone sarung masibukẹ̌ gunang kebaktian?’ Katewe, iạ nakapěndang natoghasẹ̌ mạeng mẹ̌sombang dingangu taumata apang mapulu dumaringihẹ̌ su tempong iạ měnginjilẹ̌. Sarang orasẹ̌ ini, iạ sěntiniạ mal᷊uasẹ̌ mạeng seng bọu něnginjilẹ̌.

Su taung 1998, iạ dingangi Carolyn nakaěbạ tugasẹ̌ nakoạ perintis istimewa su Montreal. Karěngụe pira taung, iạ hanesẹ̌ makaěbạ tugasẹ̌ měngatorẹ̌ pengabaran khusus lai měhal᷊ẹ̌ dingangu media massa gunang měnul᷊idẹ̌ tiněna nẹ̌sal᷊a wọu lawọ taumata soal u Sahiding Yehuwa. Iạ dingangi Carolyn mal᷊uasẹ̌ ual᷊ingu něnginjilẹ̌ su taumata apang něngal᷊ing sarang Kanada. I sire biasane mapulu makasingkạ mal᷊awọ soal u Alkitapẹ̌.

Mạeng mẹ̌tahěndung 68 taung iạ nakoạ Sahiding Yehuwa, iạ nakapěndang sěbạe nial᷊amateng. Iạ sěbạe mal᷊uasẹ̌ ual᷊ingu samurine botonge mal᷊uasẹ̌ měnginjilẹ̌ dingangu nẹ̌tul᷊ung lawọ taumata nakasingkạ katěngadẹ̌. Su apang anạku, i Lise, dingangu kawinge bọu něhiking manga anạ i rẹ̌dua, i rẹ̌dua něnětạ nakoạ perintis biasa. Naungku sěbạe mal᷊uasẹ̌ nakasilo anạku tatapẹ̌ masěmangatẹ̌ su pelayanan. Iạ lai sěbạe mal᷊uasẹ̌ ual᷊ingu piạ lawọ anạu sěmbaụ nakoạ pẹ̌tatěnoěng dingangu něgělị sasasa mapaelẹ̌ si siạ. Ene kěbị nakakoạ si siạ sauneng kakạranine dingangi Yehuwa lai botonge melayani si Sie su haghing bentuk pelayanan. Iạ seng nakapěndang i kitẹ botonge tatapẹ̌ masatia měkoạ sěmbaụ tugasẹ̌ mạeng i kitẹ měngumbala su rohkẹ̌ masusi bọu i Yehuwa. (Mz. 51:11) Iạ turusẹ̌ makitarimakasẹ si Yehuwa ual᷊ingu i Sie něgělị si siạ kehormatan gunang mẹ̌dalo areng’E!​—Mz. 54:6.