1. Gin ango ma onongo mitte ni ngat moni otim wek olok ki kabaka me Percia?

GO KONG ni itye ka kwo i lobo Percia mwaki ma romo 2,500 angec. Imito lok ki kabaka me lobo meno i kom gin mo, ci iwoto wa i boma me Cuca ka ma kabaka bedo iye. Ento ma peya iloko ki kabaka, myero kong inong twero ki bote. Ka itemo lok kwede ma pe kilwongi alwonga, ci kineki woko!​—Esta 4:11.

2. Jehovah mito ni wawiny nining ka odok i kom lok kwede?

² Pud dong watye ki pwoc ya ni Jehovah pe tye calo kabaka me Percia! Jehovah rwomme lamal loyo laloc mo keken ma dano, ento en jolowa me lok kwede i cawa mo keken. En mito ni wabed agonya me lok kwede. Me labolle, kadi bed Jehovah tye ki nying me dog tic madongo calo Lacwec, Won Twer Ducu, ki Rwot en mito ni walok kwede kun walwonge ni “Wonwa.” (Mat. 6:9) Pud dong yomo cwinywa ya ni Jehovah mito ni wawiny ni watye cok kwede!

3. Pingo watwero lwongo Jehovah ni “Wonwa,” dok ngo ma wabinyamo i pwony man?

³ Pore me lwongo Jehovah ni “Wonwa”​—pien en aye Wang It me kwowa. (Jab. 36:9) Kit ma en tye Wonwa-ni, omyero wawinye. Ka watimo gin ma en openyowa me timo, ci wabinongo mot mapol. (Ibru 12:9) I kin mot magi tye iye kwo ma pe tum, i polo nyo i lobo. Watye bene ka nongo mot kombeddi. Pwony man binyamo gin ma nyuto ni Jehovah obedo Wonwa ma lamar ki dok tyen lok mumiyo watwero bedo ki gen ni en pe biwekowa i kare me  anyim. Ento mukwongo, kong wanyamu pingo watwero bedo ki gen ni Wonwa me polo marowa matek dok paro piwa.

4. Pingo jo mukene ginongo tek me neno Jehovah calo Wongi?

⁴ Tika inongo ni tek me neno Lubanga calo Woru? Jo mukene giwinyo calo rwomgi tidi dok konygi pe ka kiporogi ki Jehovah. Gitye ki gung cwiny ka Lubanga Won Twer Ducu paro piwa ki acel acel. Ento, Wonwa ma lamar-ri pe mito ni wawiny kit meno. En ominiwa kwo dok mito ni wabed ki wat macok kwede. I nge tito lok ada man, lakwena Paulo otito bot jo ma gubedo ka winyo lokke i Atene ni Jehovah “pe tye cen ka mabor ki bot ngat acel acel i kinwa.” (Tic 17:24-29) Lubanga mito ni ngat acel acel i kinwa olok kwede kit ma latin cito kwede bot lanyodone ma lamar.

5. Ngo ma wapwonyo ki i gin mutimme i kom laminwa mo acel?

⁵ Jo mukene ginongo ni tek me neno Jehovah calo Wongi pien wongi ma onywalogi pe onyuto botgi mar. Nen kong lok pa laminwa mo acel. En owaco ni: “Babana onongo maro yetowa adada. I kare ma acako kwano Baibul akwana, onongo tek bota me winyo ni acok ki Wora me polo. Ento i kare ma angeyo Jehovah maber, man olokke.” Tika in bene iwinyo kit meno? Ka tye kit meno, ci bed ki gen ni i nge kare mo in bene ibineno Jehovah calo Wego ma pud dong ber loyo.

6. Ma lubbe ki Matayo 11:27, yo acel mene ma Jehovah okonyowa kwede wek wanene macalo Wonwa ma lamar?

⁶ Yo acel ma Jehovah okonyowa kwede me nene macalo Wonwa ma lamar aye ki gwoko lok pa Yecu ki ticce i Baibul. (Kwan Matayo 11:27.) Yecu olubo kit pa Wonne macok adada ma oweko en onongo twero waco ni: “Ngat ma oneno an dong oneno Won.” (Jon 14:9) Yecu pol kare onongo loko i kom tic pa Lubanga macalo Wego. I Jiri angwen-ni keken, Yecu otiyo ki nying lok ni “Won” tyen ma romo 165 me lok i kom Jehovah. Pingo Yecu oloko tutwal i kom Jehovah? Tyen lok acel aye ni wek dano guye ni Jehovah obedo Wego ma lamar.​—Jon 17:25, 26.

7. Gin ango ma wapwonyo i kom Jehovah ki i kit ma en otero kwede ki Wode?

⁷ Nen kong gin ma wapwonyo i kom Jehovah ki i kit ma en otero kwede ki Wode, Yecu. Jehovah kare ducu onongo winyo lega pa Yecu. En onongo pe winyo lega pa Yecu keken ento bene gamogi. (Jon 11:41, 42) I peko mo keken ma Yecu okato ki iye, en onongo ngeyo ni Wonne marre dok tye ka konye.​—Luka 22:42, 43.

8. I yo ma nining ma Jehovah omiyo bot Yecu jami ducu ma mitte?

⁸ Yecu oye ni Wonne aye Wang It ki Lagwok kwone i kare ma en owaco ni: “An abedo kwo pi Won.” (Jon 6:57) Yecu onongo geno Wonne i yo ducu, dok Jehovah omine jami ma mitte pi kwo. Ma dong pire tek loyo, Jehovah okonyo Yecu me gwoko genene.​—Mat. 4:4.

9. Jehovah onyuto nining ni etye Wego ma maro dok paro pi Yecu?

⁹ Macalo Wego ma lamar, Jehovah oweko Yecu ongeyo ni etye ki cwak pa Wonne. (Mat. 26:53; Jon 8:16) Kadi bed Jehovah pe ogwoko Yecu ki i kom jami ducu ma twero wanne, ento en okonye me ciro peko. Yecu onongo ngeyo ni peko mo keken ma en etye ka kato ki iye tye pi tutunu. (Ibru 12:2) Jehovah onyuto ni eparo  pi Yecu ki winyo legane, mine jami ma mitte, pwonye, ki konye. (Jon 5:20; 8:28) Kong dong wanenu kit ma Wonwa ma i polo gwokowa kwede i yo magi bene.

10. Ma lubbe ki Jabuli 66:19, 20, Jehovah nyuto nining ni emarowa?

¹⁰ Jehovah winyo legawa. (Kwan Jabuli 66:19, 20.) En pe oketo kigeng i kom bor pa legawa ki gin ma walego pire; en cuko cwinywa me lega bote kare ki kare. (1 Tec. 5:17) Watwero lega bot Lubangawa i cawa mo keken, ki ka mo keken ma watye iye. Tic mapol ma Jehovah tye kwede pe genge winyo legawa; en kare ducu tye atera dok keto cwinye ka winyowa. Ka waniang ni Jehovah winyo legawa, ci marwa pire bene dongo. Laco Jabuli owaco ni: “Amaro Rwot [Jehovah], pien en owinyo kokona.”​—Jab. 116:1.

11. Jehovah gamo legawa nining?

¹¹ Wonwa pe winyo legawa keken ento bene gamogi. Lakwena Jon ocuko cwinywa ni: “Ka walegge gin mo kun walubo gin ma en mito, ci en winyo legawa.” (1 Jon 5:14, 15) Ngene kene ni, Jehovah pe oromo gamo legawa i yo ma wamito kwede kikome. En ngeyo gin maber loyo piwa, pi meno i kare mukene lagamme tye ni pe nyo nongo en mito ni kong wadi cwinywa.​—2 Kor. 12:7-9.

12-13. I yo mapatpat ango ma Wonwa me polo miniwa jami ma mitte?

¹² Jehovah miniwa jami ma mitte pi kwo. En lubo gin ma en mito ni wege mukene gutim. (1 Tem. 5:8) En miyo jami ma mitte pi kwo pa lutinone. En pe mito ni wabed ki par mukato kare woko pi cam, ginaruka, nyo kabedo. (Mat. 6:32, 33; 7:11) Macalo lanyodo ma lamar, Jehovah bene oketo yub me cobo mitiwa ducu i kare me anyim.

¹³ Ma dong pire tek loyo, Jehovah miniwa jami me cwiny wek wabed ki wat maber kwede. En otiyo ki Lokke, Baibul me tittiwa lok ada madok i kome, yubbe, tyen lok me kwo, ki gin ma bitimme i anyim. En onyuto miti i komwa i kare ma wacako pwonyo lok ada nyen, dok otiyo ki lunyodowa nyo ngat ma okwano Baibul kwedwa me konyowa wek wangeye maber. Dok en pud tye ka medde ki konyowa kun tiyo ki luelda me kacokke kacel ki omege ki lumege mukene ma guteggi i yo me cwiny. Medo i kom meno, Jehovah pwonyowa kun tiyo ki cokke ma wabedo kwede cabit ducu, ka ma wanongo iye pwony kacel ki omegiwa ki lumegiwa. I yo magi ki mukene, Jehovah nyuto mitine macalo wego i kom wan ducu.​—Jab. 32:8.

14. Pingo Jehovah pwonyowa, dok en timo man nining?

¹⁴ Jehovah pwonyowa. Wan pe watye calo Yecu ma onongo pe ki roc. Dong macalo but pwonywa, Wonwa ma lamar-ri miniwa pwod ka mitte. Lokke poyo wiwa ni: “[Jehovah] pwonyo jo ma en maro.” (Ibru 12:6, 7) Jehovah tirowa i yo mapol mapatpat. Me labolle, gin mo ma wakwano i Lokke nyo wawinyo ki i cokke twero tiro tamwa. Nyo gwok kony ma wamito twero bino ki bot luelda. Labongo paro pi kit ma Jehovah tirowa kwede, wiwa myero opo ni mar aye tugo cwinye kare ducu me miniwa tira.​—Jer. 30:11.

15. I yo mapatpat ango ma Jehovah gwokowa kwede?

¹⁵ Jehovah konyowa me ciro can. Kit macalo wego ma lamar konyo lutinone ka gitye ka kato ki i kwo matek, Wonwa me polo bene konyowa ka watye ka kato ki i  atematema. En miniwa cwiny mere maleng me gwokowa ki i gin mo keken ma twero balo watwa kwede. (Luka 11:13) Jehovah bene gwokowa ka cwinywa otur. Me labolle, en miniwa gen mamwonya. Genwa pi anyim konyowa me ciro kwo matek. Tam kong: Kadi bed jami maraco otimme i komwa, Wonwa ma lamar-ri bicango bur mo keken ma wanongo. Atematema mo keken ma watye ka kato ki iye tye pi tutunu, ento mot ma Jehovah biminiwa birii matwal.​—2 Kor. 4:16-18.

16. Ngo ma otimme i kare ma Adam okwero winyo Wonne ma lamar-ri?

¹⁶ Waneno gin ma nyuto ni Jehovah marowa i kit ma en odok kwede i kare ma Adam ojemo i kome. I kare ma Adam ojemo i kom Wonne me polo, en orwenyo mot me bedo dano me ot pa Jehovah, pire ki pi lutinone. (Rom. 5:12; 7:14) Ento, Jehovah otimo gin mo me konyo likwayo pa Adam.

17. I nge jemo pa Adam, ngo ma Jehovah otimo cutcut?

¹⁷ Jehovah omiyo pwod ki Adam, ento en pe oweko likwayo pa Adam ma peya ginywalogi-ni labongo gen. Cutcut en ocikke ni dano ma luwiny gibidoko jo me otte doki. (Acak. 3:15; Rom. 8:20, 21) Jehovah oyubo man kun jenge i kom ginkok pa Wode me amara, Yecu. Jehovah onyuto kit ma en marowa kwede ki miyo Wode piwa.​—Jon 3:16.

18. Pingo watwero bedo ki gen ni Jehovah mito ni wabed lutinone, kadi bed warwenyo woko ki bote pi kare mo?

¹⁸ Kadi bed watye ki roc, Jehovah mito ni wabed jo me ode, dok en pe nenowa calo jo ma konyogi tek. Watwero turo cwinye nyo bene rwenyo pi kare mo, ento  Jehovah pe ilo cinge woko i komwa. Yecu onyuto kit ma Jehovah maro kwede lutinone matek ki miyo lapor i kom latin murwenyo. (Luka 15:11-32) Wego ma i lapor-ni pe orwenyo genne ni wode nino mo bidwogo. I kare ma wode odwogo, wonne ojole ki yomcwiny. Ka warwenyo ki bot Jehovah ento wangut i kom balwa, ci watwero bedo ki gen ni Wonwa ma lamar-ri tye atera me jolowa.

19. Jehovah biyubo jami maraco ma obino macalo adwogi me bal pa Adam nining?

¹⁹ Wonwa biyubo jami ducu ma oballe macalo adwogi me bal pa Adam. I nge jemo pa Adam, Jehovah oketo yub me wilo jo 144,000 ki i lobo wek gucit i polo ka tic macalo luker ki lulamdog kacel ki Wode. Yecu ki luloc luwote gibikonyo dano ma luwiny me doko jo ma gipe ki roc i lobo manyen. I nge loyo atematema me agikki, Lubanga biminigi kwo ma pe tum. I nge meno Wonwa bibedo ki yomcwiny me neno ka lobo opong ki awobene ki anyirane ma gipe ki roc. Meno pud dong bibedo kare me deyo ya!

20. I yo mapatpat ango ma Jehovah onyuto kwede ni emarowa matek, dok ngo ma wabinyamo i pwony ma lubo man?

²⁰ Jehovah onyutiwa ni emarowa matek. En aye Wego maber loyo. En winyo legawa dok miniwa jami ma mitte pi kwowa, jami me kom ki jami me cwiny. En pwonyowa dok konyowa. En bene tye ki mot mapol mabeco piwa i anyim. Pud dong yomo cwinywa adada me ngeyo ni Wonwa marowa dok paro piwa! Pwony ma lubo man binyamo yo ma wan lutinone watwero nyuto ni watye ki pwoc pi marre.