1. Персияныҥ каанына јолыгарга турган кижи нени эдер учурлу болгон?

СЛЕР бойоорды б. э. озо V чакта, јебрен Персияда јадып турганаар деп сананып ийзеер. Слерде каанга јаан учурлу куучын бар. Оныҥ учун слер Персияныҥ Сузы деген тӧс калазына барып јадыгар. Је каанга јолыгарга, озо баштап оныҥ јарадузын алар керек. Оноҥ башка слерди ӧлтӱрип салардаҥ айабас! (Эсф. 4:11).

2. Биске Иеговага баштанарга јеҥил бе?

² Је Иегова Персияныҥ каанына тӱҥей эмес деп билерге, кандый јакшы! Бистиҥ Кудайыс јердеги кандый да башчынаҥ бийик те болзо, бис оныла кандый ла ӧйдӧ куучындажар аргалу. Кудайыс бисти оныла кемнеҥ де, недеҥ де коркыбай куучындажып турзын деп кӱӱнзейт. Темдектезе, Кудайда Улу Јайаачы, Кӱчтӱдеҥ Кӱчтӱ ле Бий Кайракан деп титулдар бар. Је ол бисти Ого јӱрегиске јуук сӧслӧ «Ада» деп баштанарына кӱӱнзедет (Матф. 6:9). Иегованыҥ бисле јылу ла јуук колбуларлу болорго турганынаҥ јӱрегис томулат!

3. Бис нениҥ учун Иеговага Ада деп баштанар аргалу, бу јӧрмӧлдӧ нени шӱӱжерис?

³ Бис Иеговага Ада деп баштанар аргалу, нениҥ учун дезе ол биске јӱрӱм берген (Сар. 36:9). Кудай бистиҥ Адабыс болордо, бис ого сӧсуккур болор учурлу. Бис оныҥ сӧзин угуп турзаас, ол биске сӱреен јакшы алкыштар берердеҥ айабас (Евр. 12:9). Мындый алкыштардыҥ бирӱзи — ӱргӱлјиге јерде эмезе теҥериде јӱретен ижемји. Је кезик алкыштарды бис эмди де аладыс. Бу јӧрмӧлдӧ Иегова Адабыс бисти канайып кичееп турганы шӱӱжилер. Анайда ок Ол бисти качан да артыргыспас деп, нениҥ учун бӱдӱп турганыс кӧрӱлер. Је озо баштап, теҥеридеги Адабыстыҥ бисти сӱӱп ле  кичееп турганына бис нениҥ учун бӱдӱп турганысты кӧрӱп ийектер.

4. Кезик улуска нениҥ учун Иеговага, Адабыска чылап баштанарга кӱч болот?

⁴ Слерге Иегова Кудайга, Адабыска чылап баштанарга кӱч пе? Кезик улус бойын Иегованаҥ коркышту јабыс ла неге де турбас кижи деп бодойт. Андый улус Кӱчтӱдеҥ Кӱчтӱ Кудай олорго ајару эдер деп бӱтпей јат. Је бистерди сӱӱп турган Адабыс бисти анайып сананзын деп кӱӱнзебей турган. Ол биске јӱрӱм берген ле бисти Оны табып алзын деп кӱӱнзейт. Апостол Павел бу шӱӱлтени айткан кийнинеҥ, Афины јериниҥ улузына Иегова «кажыбыстаҥ ла ыраак эмес» деп јартап берген (Ап. ижи 17:24—29). Кудайдыҥ кӱӱнзегениле болзо, бала сӱӱштӱ адазына канайып баштанат, биске де Кудайга анайып баштанар керек.

5. Бир христиан эјениҥ учуралынаҥ неге ӱренип јадыс?

⁵ Кезик улуска, адазыныҥ сӱӱжин кӧрбӧгӧнинеҥ улам, Иеговага Адага чылап баштанарга кӱч болот. Бир эјениҥ учуралын кӧрӱп ийектер. Ол айдат: «Адам меге коркышту кату баштанатан. Оныҥ учун Агару Бичикти ӱренип баштаарымда, меге Иегованы теҥеридеги Адабыс деп сананарга кӱч болгон. Је Кудайла јууктада таныжып аларымда, санаам солына берген». Слерге Иеговага Адага чылап баштанарга кӱч пе? Кӱч болзо, санааркабагар. Слер де оныла јууктада таныжып баштазаар, Иегова — јердиҥ ӱстинде эҥ ле јакшы Ада деп, бӱдӱп баштаарыгар.

6. Матфей 11:27-ле болзо, Иегова биске оны сӱӱштӱ Ада деп оҥдоорго канайып болушкан?

⁶ Иегова бисти Оны сӱӱштӱ Ада деп сананарга јеҥил болзын деп кӱӱнзейт. Оныҥ учун Агару Бичикте Кудайдыҥ Уулыныҥ, Иисустыҥ, айткан сӧстӧри ле эткен керектери бичилип калган. (Матфей 11:27 кычырыгар.) Иисустыҥ кылык-јаҥы Адазыныҥ кылык-јаҥына тӱп-тӱҥей болгон, оныҥ учун ол мынайып айткан: «Мени кӧргӧни, Аданы кӧргӧни ол» (Иоанн 14:9). Иисус Иегованы Ада деп кӧп айдып туратан. Оныҥ Иеговага Ада деп баштанып турганы, јӱк ле тӧрт Евангелиени де алза, 200 кире катап туштайт. Иисус Ада деп сӧсти нениҥ учун андый кӧп тузаланган? Шылтактардыҥ бирӱзи — Иисус улусты Иегова чындаптаҥ ла бисти сӱӱп турган Ада деп бӱдӱмјилеерге кӱӱнзеген (Иоанн 17:25, 26).

7. Иегованыҥ Иисуска баштанганынаҥ, бис Кудай керегинде нени билип аладыс?

⁷ Иегованыҥ Иисуска баштанганынаҥ, Кудай керегинде нени билип аладыс? Иегова Иисустыҥ мӱргӱӱлин јӱк ле јаантайын угуп туратан эмес, је мӱргӱӱлдерине каруузын берип туратан (Иоанн 11:41, 42). Иисус кандый ла ченелтелерде Адазыныҥ сӱӱжин ле болужын јаантайын сескен (Лука 22:42, 43).

8. Иегова Иисуска канайып болушкан?

⁸ Иисус јӱрӱмди ого Адазы берген ле Ол оныҥ јӱрӱмин кичееп турган деп билер болгон. Оныҥ учун мынайып айткан: «Адамныҥ Бойында [«болужыла», ЈТ] тирӱ јӱрӱп јадым» (Иоанн 6:57). Иисус бойыныҥ Адазына бир де алаҥзыбай бӱткен. А Иегова ого јӱрӱмине керектӱ ӱзе немени берген. Је эҥ керектӱзи, Иегова Иисуска кӧгӱс јанынаҥ болушкан (Матф. 4:4).

9. Иегова Иисусты тыҥ сӱӱп турганын канайып кӧргӱскен?

⁹ Иегова сӱӱштӱ Ада, оныҥ учун Иисуска јаантайын болужар деп сӧзин берген (Матф. 26:53; Иоанн 8:16). Иегова Иисусты каршу јетиргедий ончо не-немедеҥ корулабаган да болзо, Ол ого ончо ченелтелерди ӧдӧргӧ болушкан. Иисус оныла болуп турган кыйын-шыра кыска ла ӧйгӧ болор деп билер болгон (Евр. 12:1, 2; [12:2, ЈТ]). Иегова Иисусты сӱӱп турганын јап-јарт кӧргӱскен: ол Иисусты  угуп туратан, оныҥ керексиништерин јеткилдеген, анайда ок ӱредип, болужып туратан (Иоанн 5:20; 8:28). Эмди, теҥеридеги Адабыс бойыныҥ андый ла сӱӱжин биске канайып кӧргӱзип турганын кӧрӱп ийектер.

10. Сарын 66:19, 20-ле болзо, Иегова биске сӱӱжин канайып кӧргӱзет?

¹⁰ Иегова бистиҥ мӱргӱӱлдеристи угуп јат. (Сарын 66:19, 20 кычырыгар *.) Ол бисти канча катап мӱргӱӱрине, не керегинде мӱргӱӱрине ле мӱргӱӱлдердиҥ узуны канча кире болорына бойыска ээжилер тургуссын деп кӱӱнзебей јат. Карын бисти Ого канча ла кире кӧп мӱргӱп турзын деп кӱӱнзедет (1 Фес. 5:17). Бис ого кандый ла ӧйдӧ, кандый ла јерде мӱргӱӱр аргалу. Оныҥ ижи кӧп тӧ болзо, ол бисти јаантайын лаптап угарга белен. Мыны оҥдоп баштайла, бис Кудайды оноҥ тыҥ сӱӱп јадыс. «Мен Иегованы тыҥ сӱӱп јадым, нениҥ учун дезе Иегова мениҥ ӱнимди... угуп јат» — деп, сарнаачы айткан (Сар. 116:1).

11. Иегова бистиҥ мӱргӱӱлдериске карууны канайып берет?

¹¹ Теҥеридеги Адабыс бистиҥ мӱргӱӱлдеристи јӱк ле угуп турган эмес, је мӱргӱӱлдериске каруузын да берип јат. Апостол Иоанн бисти мынайып бӱдӱмјилеген: «Оныҥ табыла нени суразабыс, Ол бисти угуп турган» (1 Иоанн 5:14, 15). Је бу сӧстӧр, Иегова карууны јаантайын ла бистиҥ сураганыс аайынча берер деп кӧргӱспей јат. Биске не керек болуп турганын Ол бистеҥ јакшы билер, оныҥ учун кезикте ол «Јок» деп айдат, је кезикте, бисти эмеш сакып алзын деп кӱӱнзейт (2 Кор. 12:7—9).

12, 13. Теҥеридеги Адабыс бистиҥ керексиништеристи канайып јеткилдейт?

¹² Иегова бисти јеткилдеп јат. Ол адаларга тургузып турган некелтелерди бойы да бӱдӱрип јат (1 Тим. 5:8). Иегова бойыныҥ балдарына јӱрӱмине керектӱ ончо немени берип јат. Ол бисти нени јиир, нени кийер, кайда јадар деген сурактарга санааркабазын деп кӱӱнзейт (Матф. 6:32, 33; 7:11). Керек дезе бисти сӱӱп турган Адабыс, Иегова, бистиҥ келер ӧйисти де сананып салган.

¹³ Је эҥ керектӱзи Иегова бисти кӧгӱс јанынаҥ кичееп јат. Бойыныҥ Сӧзинде ол биске Бойы керегинде ле Бойыныҥ амадузы керегинде, анайда ок јӱрӱмниҥ учурын ла келер ӧйдӧ не болорын јартап берген. Ол биске кажыбыска ла, чындыкты баштапкы ла катап ада-энебистеҥ эмезе Кудайла таныжарга болушкан ӧскӧ кандый бир кижидеҥ угуп турарыста, ајару эткен. Эмди ол биске јуундагы аксагалдардыҥ сӱӱжи ажыра эмезе кӧгӱзи тереҥ ӧскӧ дӧ ака-эјелер ажыра ајару эдип, оноҥ ло ары болужып јат. Бого ло коштой, Иегова бисти христиан туштажулар ажыра ӱредет. Анда бис кӧгӱс билегисле кожо ӱренип јадыс. Бу дезе, Адабыстыҥ биске болужып турган јӱк ле кезик аргалары (Сар. 32:8).

14. Иегова бисти нениҥ учун ӱредет ле мыны канайып эдет?

¹⁴ Иегова бисти ӱредип јат. Бис Иисуска кӧрӧ, толо кемдӱ эмезис. Оныҥ учун сӱӱштӱ Адабыс бисти ӱредип јат, керек тушта тӱзедип те јат. Агару Бичикте мынайып айдылат: «Иегова кемди сӱӱйт, оны тӱзедет» (Укаа 3:12). Иегова бисти башка-башка эп-аргалардыҥ болужыла тӱзедер аргалу. Темдектезе, Агару Бичикти кычырып тура эмезе јуунныҥ туштажуларындагы программаны угуп тура, биске бойыстыҥ санаабысты эмезе кылык-јаҥысты солыыр керек деп  оҥдоп ийедис. Эмезе биске аксагалдар болужардаҥ айабас. Иегова бисти канайып та тӱзедип турза, мыны јаантайын акту сӱӱжинеҥ улам эдет (Иер. 30:11).

15. Иегова бисти канайып корулап јат?

¹⁵ Иегова бистерге ченелтелердиҥ ӧйинде болужат. Канайып ада кижи балдарына кӱч ӧйлӧрдӧ болужат, анайып ла теҥеридеги Адабыс биске ченелтелерди ӧдӧргӧ болужат. Иегова бисти бойыныҥ агару тыныла кӧгӱс каршудаҥ корулап јат (Лука 11:13). Анайда ок теҥеридеги Адабыс биске эмоциональный јанынаҥ болужат. Темдектезе, келер ӧйгӧ сӱрекей јакшы ижемји берет. Бу ижемји уур-кӱчтерди ӧдӧргӧ болужып јат. Сананып ийзеер де: бисте кандый да кӱчтер болзо, Иегова биске јетирилген кандый ла каршуны јоголтып салар. Бисте болуп турган кандый ла ченелтелер кыска ла ӧйгӧ болор, а Иегованыҥ алкыштары дезе, ӱргӱлјиге болор! (2 Кор. 4:16—18).

16. Баштапкы кижи Адам сӱӱштӱ Адазына удура барарда не болуп калды?

¹⁶ Иегова Адабыстыҥ сӱӱжин, кӱч айалгада болуп калган јердеги балдарына канайып болушканынаҥ кӧрӱп јадыс. Баштапкы кижи Адам теҥеридеги Адазына удура барып, Иегованыҥ ырысту билезинеҥ бойыныҥ јерин јылыйтып салган. Мынаҥ улам бала-барказыныҥ да Иегованыҥ билезине киретен аргазын айрып салган (Рим. 5:12; 7:14). Је Иегова улусты болуш јок артыргыспаган.

17. Адамныҥ тӱймеениниҥ кийнинеҥ Иегова тӱрген ле нени эткен?

¹⁷ Иегова Адамды кату-каруузына да тургускан болзо, је оныҥ бала-барказына болужарга кӱӱнзеген. Оныҥ учун Кудай сӧсуккур улусты бойыныҥ билезине кыйалта јогынаҥ кайра экелер деп, тӱрген ле сӧзин берген (Баш. 3:15; Рим. 8:20, 21). Мыны эдерге Иегова сӱӱген уулын, Иисусты, толынты тайылгага  берерге озодоҥ шӱӱп алган. Иегова бис учун бойыныҥ Уулын бергениле бисти тыҥ сӱӱп турганын кӧргӱскен (Иоанн 3:16).

18. Иегова бисти, кезикте оноҥ ыраап та турзаас, оныҥ балдары болзын деп кӱӱнзеп турганын кайдаҥ биледис?

¹⁸ Бис толо кемдӱ эмес те болзоос, Иегова бисти бойыныҥ билезине кожуп аларга кӱӱнзейт. Ол биске бир де чаптыксынбай јат. Кезикте бис оны ачындырып ийедис эмезе оноҥ ыраап јадыс, је Иегова бистеҥ чӧкӧбӧй јат. Иисус Иегова Адабыстыҥ јаан сӱӱжин кӧргӱзерге, бойыныҥ адазын таштап, јӱре берген уул керегинде тем куучындаган (Лука 15:11—32). Бу темдеги ада, уулы качан бирде кайра јанып келер деп, ижемјизин јылыйтпаган. Качан уулы јанып келерде, адазы ого удура јӱгӱрип, оны тыҥыда кучактап јат. Анайып ла бис Иегованаҥ ыраап, је кийнинде кинчегисти алынган болзоос, сӱӱштӱ Адабыс бисти кайра јанып келеристи сакып турган деп, алаҥзыбас аргалу.

19. Иегова Адамныҥ јылыйтканын канайып орныктырар?

¹⁹ Бистиҥ Адабыс Адамныҥ јылыйтып салганын ойто орныктырып салар. Иегова Адамныҥ тӱймеениниҥ кийнинеҥ бойыныҥ билезине 144 000 кижини кийдирип аларга шӱӱп алган. Бу улус оныҥ Уулыла кожо каандар ла абыстар болуп башкарар. Јаҥы телекейде Иисус, анайда ок оныла кожо башкаратандар сӧсуккур улуска толо кемине једерге болужар. Кудай улустыҥ сӧсуккурын кӧрӧргӧ, калганчы ченелтени эткен кийнинде, олорго ӱргӱлји јӱрӱм сыйлаар. Ол тушта бистиҥ Адабыс толо кемдӱ уулдарыла-кыстарыла толгон јерди кӧрӱп, тыҥ сӱӱнер! Бу сӱрекей јакшы ӧй болор.

20. Иегова биске сӱӱжин канайып кӧргӱзет? Келер јӧрмӧлдӧ нени шӱӱжерис?

²⁰ Иегова бисти тыҥ сӱӱп јат. Ол эҥ ле јакшы Ада. Кудай бистиҥ мӱргӱӱлдеристи угуп јат ла бистиҥ кандый ла керексиништеристи — акча-манат та јанынаҥ, кӧгӱс те јанынаҥ јеткилдеп јат. Ол бисти ӱредип те јат, биске болужып та јат. Анайда ок ол биске сӱрекей кӧп јакшы сыйлар белетеп салган. Иегова Адабыс бисти сӱӱп ле кичееп турган деп билерге, кандый јакшы! Келер јӧрмӧлдӧ, бис Кудайдыҥ балдары болуп, ого сӱӱжисти канайып кӧргӱзер аргалу деген сурак шӱӱжилер.