1. Itini i nolitengan a Pirsiya, ano sapicadaaw to pinengneng no hongti o kantangay a demak han?

HARATENGEN hena, itiniay kiso i ˈayaw no 2500 miheca maˈorip i Pirsiya. Iraay ko cecay demak fafanaˈen ko hongti, orato tayra kiso i Susa. Kawra caka pilifok to pihayda no hongti, matalaway kiso miˈaraw cingraanan. Ano patelas saan kiso miˈaraw cingraanan, o sakapatay alatek.—Istir 4:11.

2. Tokel ni Yihofa ano masasowal kita Cingraanan sasamaan ko harateng hani?

² Taˈangayay ko kasasiroma ni Yihofa to hongti no Pirsiya. Soˈlin mikikakaay ko ˈakawang Ningra to mikowanay no hekal, kawra mihamhamay kitaanan miingid Cingraanan, tada o aakoˈiden ita Cingra! Tokel ni Yihofa rihaday ko falocoˈ ita a masasowal Cingraanan. Soˈlin o kasapaan a misangaˈay a Tapang, malefotay ko ˈicel, saˈakawangay a mikowanay Cingra, kawra makalimay cingra tano damsayay a pangangan Cingraanan to ‘Wama.’ (Matay 6:9) Makalimay ci Yihofa ira ko ngaˈayay kalalaˈed ita Cingraanan, tada mitemeray to falocoˈ ita!

3. (1) Hano ngaˈay kita pala ‘Wama’ ci Yihofaan hani? (2) Toniya lalakaw mamilengo to maanan hani?

³ Pala ‘Wama’ ci Yihofaan, o matatodongayto, samanen o pipowalan no ˈorip Cingra. (ˈOlic 36:9) O Wama ita Cingra, iraay ko ˈinorong ita midofdof Cingraanan. Ano midofdof kita Cingraanan i, wa milifok to makapahay a raheker i noikoran, tinakoen itini i kakarayan anca i fafekang no sera milifok to tahadaˈocay a ˈorip. (Hipray 12:9) Anini, ano midofdof kita Cingraanan wa adihayay ko haepoc. Oniya lalakaw mamilengo, sidaˈitay a wama ci Yihofa wa samaan a midipot kitaanan, ato  hano ngaˈay pakasoˈlinen ita, cowa ko mamifalah Cingra kitaanan. Salakat nengnengen ita ko pina wacay, mitadtad ci Yihofa tangongolay ko olah, ciharatengay kitaanan.

4. Hano pasangar ko roma tamdaw palo Wama a minengneng to Kawas hani?

⁴ Pasangaran nanay kiso palo Wama to Kawas han? Harateng no roma tamdaw tada ˈakawangay ko Kawas, mimingay ko niyah sanay, mansa pasangar a pakasoˈlin to caciharateng ko Kawas cangraanan. Kawra cowa kaolah ci Yihofa mihaen ko harateng ita, pafeli Cingra to ˈorip kitaanan, makalimay ngaˈay ko kalalaˈed ita Cingraanan. Na pasowalay ci Pawlo to Atin a tamdaw to malecaday a sowal, somowalayho cingra ci Yihofa ‘cowa pilaay to kahacecay a tamdaw.’ (Dmak 17:24-29) Makalimay ci Yihofa miingid kita Cingraanan, malecad o piingid no wawa to sidaˈitay a wama.

5. Mikitini nalifetan no cecay fafahiyan salikaka mananam iso ko maanan?

⁵ O roma tamdaw pasangaray pala Wama ci Yihofaan, samanen o wama nangra cowa paihkal to olah ato ciharateng cangraanan. Sowal no cecay fafahiyan salikaka: “O wama ako, miceriday mapoˈi takowanan, mansa i satapang minanam kako to Fangcalay Cudad i, pasangaray pala Wama ci Yihofaan. Ikor matongal ko kafanaˈ ci Yihofaan, mafalicayto ko harateng ako.” Ano mahaenay ko harateng iso i, aka calemcem. Ano misongilaˈ kiso mafanaˈ Cingraanan, mamahapinang to o sangaˈayay a Wama ci Yihofa.

6. Mikitini i Matay 11:27, samaanay ci Yihofa padama kitaanan mihapinang to o sidaˈitay a Wama Cingra hani?

⁶ Samaanay ci Yihofa padama kitaanan mihapinang to sidaˈitay a Wama Cingra hani? Mitilidan Ningra ko nalifetan ni Yis i Fangcalay Cudad. (ˈOsien ko Matay 11:27.) Malefotay ko paihkal ni Yis to capeling no kakarayan Wama, mansa ngaˈay a pasowal cingra: ‘Ano pakaˈaraw takowanan, o pakaˈaraway to Wama.’ (Yohani 14:9) Roma i, marariday ci Yis somowal, malo Wama, midemakay ci Yihofa to maanan a demak. Itini i sepat Ratoh a Cudad, kina 200 pangangan ci Yis ci Yihofaan to Wama. Iraay ko araaw ningra mihen to demak, o papadama to tamdaw palo Wama a minengneng ci Yihofaan.—Yohani 17:25, 26.

7. Pakayni picada ni Yihofa to wawa ningra ci Yisan, wa mahapinang ita o masamaanay a Wama Cingra hani?

⁷ Pakayni picada ni Yihofa to wawa ningra ci Yisan, mahapinangay ita, cowa ko kararid aca ni Yihofa mitengil to satolon ni Yis, pacaˈofayho to satolon ningra. (Yohani 11:41, 42) Mihaenay, ano tahalifa ci Yis to maanan a pasangar i, macadaay ningra ko olah ato sadama no Wama.—Luka 22:42, 43.

8. Itiniay i maanan a pakayraan midimokosan ni Yihofa ci Yis hani?

⁸ Sowal ni Yis ‘pakayniay i Wama ko kaˈorip’ ningra, tatodong i, cowako pafeli aca ni Yihofa to ˈorip, midamaayho to sakaˈorip ningra. (Yohani 6:57) Misarocoday ko falocoˈ ni Yis mitadiˈec to Wama, ano ci Yihofato midimokosay to sakaˈorip ni Yis. Kalimlaan i, padamaanho ni Yihofa ci Yis mitafo to madimadiay.—Matay 4:4.

9. Samaanay ci Yihofa paihkal to maolahay ato midimokosay ci Yisan hani?

⁹ O sidaˈitay a Wama ci Yihofa, mansa pakasoˈlin ci Yis, o papadama ko Wama cingraanan. (Matay 26:53; Yohani 8:16) Soˈlin haien ni Yihofa ci Yis tahacada to roray, kawra padadotocay Cingra padama ci Yisan mihadidi i pasangaray. Pakasoˈlinay ci Yis, micada cingra to masakenaay a roray ono cecayay aca liyad. (Hipray 12:2) Mitengilan ni Yihofa ko satolon ni Yis, midimokos to saali ningra, pahatatanam ato padama cingraanan, paihkalay  to soˈlinay maolah ci Yihofa ci Yisan. (Yohani 5:20; 8:28) O mamilengo kita, sasamaan ci Yihofa tano mahecaday a pakayraan midimokos kitaanan.

10. Mikitini ˈOlic 66:19, 20, samaanay ci Yihofa paihkal to ciharatengay a maolah kitaanan hani?

¹⁰ Midohingaay ci Yihofa mitengil to satolon ita. (ˈOsien ko ˈOlic 66:19, 20.) Pakalalokay Cingra kitaanan mihadak to nafalocoˈan, micerid a mitolon Cingraanan. (1 Tisalonika 5:17) Wa ngaˈay kita tano mangodoay a waywayan micerid a mitolon Cingraanan. Ci Yihofa cowa ko aawa ko toki mitengil to satolon no mita, ano hacowato midohingaay Cingra mitengil to sowal ita. Ano mahapinang ita mitengilan ni Yihofa ko satolon ita i, wa matongal a maolah Cingraanan. O mitiliday to ˈOlic sanay: ‘Maolahay kako ci Yihofaan, samanen mitengilay Cingra to ngiha no mako.’—ˈOlic 116:1.

11. Samaanay ci Yihofa pacaˈof to satolon ita hani?

¹¹ Ci Yihofa cowa ko pitengil aca to satolon ita, pacaˈofayho kitaanan. Mikiˈokay ci Yohani kitaanan: ‘Ano tooren ita ko araaw no Kawas micangacang to maanan, oha tatengilen Ningra kita.’ (1 Yohani 5:14, 15) Manaokaniw, o pakayraan ni Yihofa a pacaˈof, cowa kalecad o milongocan ita alatek. Mafanaˈay Cingra o maanan ko sangaˈayay no mita, mansa cowa pihai to saali no mita to latekay, anca papitala kitaanan to cecay liyad.—2 Korinto 12:7-9.

12-13. Wama ci Yihofa itiniay maanan a pakayraan midimokos kitaanan hani?

¹² Mirenecay ci Yihofa to masakenaay a saali no mita. Sowal ni Yihofa o dadimokosen no wama ko wawa, patirengay Cingra to taˈarawan. (1 Timoti 5:8) Pafeliay Cingra to sakaˈorip ita, cowa ka ciharateng pakayni i kakaenen, rikoˈ ato kitiraan a cariraw kita. (Matay 6:32, 33; 7:11) O sidaˈitay a Wama ci Yihofa, oha papadadotoc Cingra a midimokos kitaanan no ikor.

¹³ Kalimlaan i, padamaay ci Yihofa kitaanan mitafo to madimadiay. Pakayni i Fangcalay Cudad, pasifanaˈ kitaanan i Cingraanan ato araaw Ningra, pacipinangho kitaanan to tatodong maˈorip ato hatokel no ikor. Ciharatengay Cingra kitaanan, mansa pakaynian Ningra i wama wina ato roma salikaka, padama kitaanan minanam to soˈlinay kimad ato mafanaˈ Cingraanan. O sidaˈitay a malohemay malitengay ato matenesay a salikaka padamaay kitaanan padadotoc a macakat. Roma i, malacafayay kita to salikaka itini kasaˈopoan micada to sapasifanaˈ ni Yihofa. Tano hatiniay a pakayraan, pacipinangay ci Yihofa kitaanan to sano Wamaay a olah Ningra.—ˈOlic 32:8.

14. Ci Yihofa hano mirikec kitaanan hani? Samaanay Cingra mirikec kitaanan hani?

¹⁴ Pahatatanamay ci Yihofa kitaanan. Cowa ko malefotay kita, cowa kalecad ci Yisan. Mansa ano pahatatanam ko kakarayan Wama kitaanan i, mirikecay kitaanan. Sanay ko Fangcalay Cudad: ‘Mirikecan ni Yihofa ko kaolahan Ningra a tamdaw.’ (Hipray 12:6, 7) Adihayay ko pakayraan ni Yihofa a mirikec. Tinakoen, ano miˈosi kita to Fangcalay Cudad anca mirienang to saˈopo i, wa mahapinang itini maanan a pakayraan iraay ko sasalofen no niyah alatek. Roma i, patalipaˈelalay anca painiay ko malohemay malitengay kitaanan. Ano samaanto ko pirikec ni Yihofa kitaanan, iraay ko olah Ningra a mihaen to demak.—Yirimiya 30:11.

15. Samaanay ci Yihofa padama kitaanan misiˈayaw to sapalifet hani?

¹⁵ Padamaay ci Yihofa kitaanan misiˈayaw to sapalifet. O kakarayan a Wama malecad o sidaˈitay a wama wa padama to wawa miremo to pasangaray. Pafeliay Cingra kitaanan to  fangcalay saocor, padama kitaanan tahatolas a madimadi. (Luka 11:13) Padamaayho Cingra kitaanan miremo to matoleday a harateng. Tinakoen, pafeliay kitaanan to makapahay a hatokel, ho ngaˈay kita mihadidi to pasangaray. Ano o maananto ko malifaay ita a sapalifet, o sidaˈitay a Wama wa misongilaˈ a miadah to dokaˈ ita noikor. O macadaay ita anini a masakenaay a roray ono cecayay aca liyad, nikawrira o sapafeli ni Yihofa a saparaheker o tahadaˈocay.—2 Korinto 4:16-18.

16. O pitowakang ni Atam mikayatay to maanan a teloc hani?

¹⁶ Mikitini i pisaysay ni Yihofa to pitowakang ni Atam a demak, mahapinangay ita tada maolahay Cingra kitaanan. Ikor no mitowakang ci Atam i, cowato ko paro no lomaˈ ni Yihofa cingra ato teloteloc ningra. (Loma 5:12; 7:14) Kawraan cowa ka falahen ni Yihofa kita.

17. Ikor no mitowakang ci Atam, kalikiaay ci Yihofa midemak to maanan?

¹⁷ Ikor no misayfang ci Yihofa ci Ataman, cowa ka silikor sato to teloteloc ni Atam. Kalikiay Cingra mihadak to sakiˈok, ngaˈay ko midofdofay a tamdaw malo taˈangayay paro no lomaˈ Ningra. (Satapangan 3:15; Loma 8:20, 21) Pakayni i mihadakan ni Yis a sapatefoc, palaˈosian ni Yihofa koniya sakiˈok. Pakayni kitaanan a kinafalah to ˈorip no kanonoˈan a wawa, misawacayay konini to tangongolay ko olah Ningra kitaanan.—Yohani 3:16.

18. Ano na mararaway ko demak ita i, hano ngaˈay pakasoˈlin cowa ko mamifalah ci Yihofa kitaanan hani?

¹⁸ Cowa kalefot kita, kawra makahiay ci Yihofa pacomod kitaanan i paro no lomaˈ Ningra, cowa ko kaafadan saan a minengneng kitaanan. O papatoled kita Cingraanan anca mararaw ko demak alatek, kawra cowa ka pifalah Cingra kitaanan. Na patinakoay ci Yis to malafelay a wawa mitadtad to o sidaˈitay a Wama ci Yihofa. (Luka 15:11-32) Itini sapatinako,  halamham sanay koya wama minokay ko wawa. Ikor minokayay koya wawa, matomesay ko damsay noya wama a mihamham cingraanan. Ano na mararaway ko demak ita i, pasasiyorayto nohatini, wa ngaˈay rihaday ko falocoˈ ita, o sidaˈitay a Wama i kakarayan o mamahemek a micada kitaanan.

19. Sasamaan ci Yihofa palahdaw to pairaan ni Atam a kihcod a dokaˈ hani?

¹⁹ Saikor o papalahedawen no kakarayan Wama ko pairaan ni Atam a kihcod a dokaˈ no mita. Ikor no mitowakang ci Atam, misaˈosiayto ci Yihofa to mamalacafay ko 144,000 tamdaw ci Yisan mala hongti ato saysi i kakarayan. Itini faelohay hekal, ci Yis ato 144,000 tamdaw wa padama to midofdofay a tamdaw patikol a malefot. Dotoc, o patikolay malefot a tamdaw wa tahalifa to saikoray a sapalifet, ano madimadi cangra to Kawas, papafelien no Kawas cangra to tahadaˈocay a ˈorip. Itiya, o maˈaraway no kakarayan Wama i fafekang no sera a tamdaw sahtoay o malefotay a wawa Ningra, maedeng o lalipahak. Tada fangcalayto konini!

20. (1) Samaanay ci Yihofa paihkal to tangongolay ko olah Ningra kitaanan? (2) Dotoc a lalakaw wa milengo to maanan?

²⁰ O sangaˈayay a Wama ci Yihofa, tangongolay ko olah ato kaciharateng kitaanan. Midohingaay Cingra mitengil to satolon ita, mirenec to sakaˈorip ita, padamaho kitaanan mitafo to madimadiay. Pahatatanamay Cingra kitaanan, midipot kitaanan, pairaayho to makapahay hatokel ita. Mafanaˈ to ciharatengay a maolah ko kakarayan Wama kitaanan, tada dihkoay ko falocoˈ. Dotoc a lalakaw wa milengo, wa samaan kita a pacoˈay to olah no kakarayan a Wama.