1. Persia markan reyipampi parlañatakejj ¿kunas wakisïna?

 NAYRA tiemponsa Persia markan jakkasma ukham sañäni. Ukapachanakanjja, reyimp parlañ munirinakajj Susa markankiri reyin palacioparuw sarapjjerïna. Ukampis jumatï jan permisonïkasina reyin ukar mantasmäna ukhajja, ¿kunas pasaspäna? Jiwayataw uñjasismäna (Est. 4:11).

2. ¿Diosajj jupar kunjam jakʼachasiñassa muni?

² Jehová Diosajj janiw Persia markan reyinakapjamäkiti, ukatwa Jupar wal yuspärtanjja. Jehová Diosajj taqe gobernante jaqenakat sipansa jukʼamp munañanïkchisa, Juparojj kuna horasas parltʼasiñatak jakʼachasiskaksnawa. Diosajj jan ajjsaras jupamp parltʼassna ukwa muni. Cheqas jupajj Taqe Kun Luriri, Taqe Chʼamani, Taqe Kunjjar Munañani ukham uñtʼatäkchisa, “Awki” sasin Jupar jakʼachassna ukwa muni (Mat. 6:9). Ukham jakʼachasiñas munatapat ¡walpun kusistanjja!

3. ¿Kunatsa Jehová Diosarojj “Awkija” sasin sissna, kuna toqenakatsa aka yatichäwin yatjjataskañäni?

³ Diosaw jakañ churistu, ukatwa Juparojj “Awkija” sasin sissna (Sal. 36:9). Niyakejjay Diosajj Awkisächejja, Juparojj istʼañasapuniwa. Kuntï maykistu ukanak phoqañäni ukhajja, wali musparkañ bendicionanakwa katoqañäni (Heb. 12:9). Mä bendicionajj akawa: wiñayatakiw yaqhepajj alajjpachan jakapjjani, yaqhepasti aka oraqenwa wiñay jakapjjarakini. Jichhürunakansa ukhamarakiw Diosan bendicionanakap katoqtanjja. Aka yatichäwinjja, kunjamsa Jehová Diosajj wali munasir Awkïtap uñachtʼayistu ukwa uñjaskañäni, ukatsti janipuniw jaytanukkistaniti sasin kunatsa confiysna uksa uñjaskarakiñäniwa. Nayraqatjja, alajjpachankir Awkisajj wal munasistu sum uñjarakistu sasin kunatsa sissna uka toqetwa yatjjatañäni.

4. Munasir Awkirjam Jehová Diosar uñjañajja, ¿kunatsa yaqhepatak chʼamakejja?

⁴ ¿Munasir Awkirjam Jehová Diosar uñjañajj jumatak chʼamakiti? Yaqhep jaqenakajja, Dios nayraqatan janis kunäpkaspa ukhamwa amuyasipjje. Taqe Chʼamani Diosajj janis sapa maynit llakiskaspa ukhamwa amuyapjjaraki. Ukampis wali munasiri Awkisajj janiw ukham amuyañas munkiti. Jupaw jakañ vida churistu, Jupar jakʼachassna ukwa munaraki. Pablojj Atenas markan uka toqet parlkasajja, Jehová Diosat akham sänwa: “Jupajj janiw sapa mayni jiwasanakat jayankkiti” sasa (Hech. 17:24-29). Kunjamtï mä wawajj wali munasir awkipar jan ajjsaras jakʼachaskejja, ukhamarakiw jiwasajj Diosar jakʼachasiñasa, ukwa Diosajj muni.

5. ¿Kunsa mä kullakan experienciapat yateqsna?

⁵ Yaqhepatakejja, ¿kunatsa Jehová Diosarojj munasir Awkiparjam uñjañajj chʼamarakïspa? Jupanakarojja tatapas janiw munasiñamp uñjkänti, yamas yaqheparojj uñisipjjänwa. Mä kullakajj akham siwa: “Tatajajj wal toqerïtu. Ukatwa Bibliat yateqkayäta ukhajja, alajjpachankir Awkir jakʼachasiñajj nayatak wali chʼamäna. Ukampis Jehová Diosar uñtʼjjayäta ukhajj janiw ukham amuyjjayätti” sasa. ¿Jiwasajj niya ukhamanti uñjasiraktanjja? Ukhamächi ukhajja, wali munasir Awkirjamaw Jehová Diosar uñjaraksna, Jupjam yaqha awkejj janiw utjkiti.

6. Mateo 11:27 textorjamajja, ¿kunjamsa Jehová Diosajj wali munasir Awkirjam jupar uñjañatak yanaptʼawayistu?

⁶ ¿Kunjamsa Jehová Diosajj wali munasiri Awkirjam jupar uñjañatakejj yanaptʼawayistu? Mä toqetjja, Bibliaruw Jesusan arunakapsa luräwinakapsa qellqayäna, ukhamatwa yanaptʼawayistu (Mateo 11:27 liytʼañataki). Jesusajj aka oraqenkaskäna ukhajj Awkipjam chuymanïtapwa uñachtʼayäna, ukatwa akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). Jesusajja, walja kutiw Jehová Diosan munasir Awkïtap qhanañchäna. Mateo, Marcos, Lucas, Juan libronakanjja, mä 165 kutiw Jehová Diosarojj “Awki” sasin säna. ¿Kunatsa Jesusajj Jehová Diosat walja kuti parlpachäna? Jehová Dios Awkisajj qhawqha munasirisa uk yatipjjañapatakiw jaqenakar yanaptʼañ munäna (Juan 17:25, 26).

7. ¿Jehová Diosajj kunjamtï Yoqapar uñjkäna ukat kunsa yateqsna?

⁷ Jehová Diosajj kunjamsa Jesucristo Yoqapar uñjäna, kunsa ukajj yatichistu uk yatjjatañäni. Diosajj Yoqapan oracionanakap istʼapunirïnwa, kuntï maykäna uksa phoqarakïnwa (Juan 11:41, 42). Jesusajj kunayman jan walinakansa uñjaskchïnjja, qhawqsa Jehová Diosajj jupar munasïna yanaptʼarakïna uk sum amuyäna (Luc. 22:42, 43).

8. ¿Kunjamanakatsa Jehová Diosajj Jesusar yanaptʼäna?

⁸ Jesusarojj Awkipaw jakañ vidsa kunanakatï jakañatakejj munaski ukanaksa churäna, Jesusajj uk sum amuyäna. Ukatwa Diosat akham säna: “Nayas jupïpan jakaskaraktjja” sasa (Juan 6:57). Jesusajj taqe chuymaw Awkipar confiyäna. Jehová Diosajja kunatï jakañatakejj wakiskäna ukanakwa jupar churäna. Taqe kunat sipansa, Jupat jan jitheqtañapatakiw yanaptʼäna (Mat. 4:4).

9. ¿Kunjamsa Jehová Diosajj Jesusar wal munasitap uñachtʼayäna?

⁹ ‘Awkijaw taqe kunan yanaptʼitani’ sasin confiyañapatakiw Jehová Diosajj Jesusar yanaptʼäna, ukhamatwa wali munasir Awkïtap uñachtʼayäna (Mat. 26:53; Juan 8:16). Jehová Diosajj janis Jesusarojj taqe jan walinakat jarkʼaqkchïnjja, aguantañapatakiw yanaptʼäna. Jesusajj ak sumwa yatïna: jan walinakan  uñjasiñapäkäna ukajj mä jukʼa tiempotakikïñapänwa (Heb. 12:2). Jehová Diosajja, Jesusarojj oracionanakap istʼasa, kunatï jakasiñatak wakiski uk churasa, yatichasa, yanaptʼasaw sum uñjatap uñachtʼayäna (Juan 5:20; 8:28). Jichhajja, kunjamsa alajjpachankir Awkisajj ukham uñjarakistu uka toqet yatjjatañäni.

10. Salmo 66:19, 20 qellqatarjamajja, ¿kunjamsa Jehová Diosajj jiwasar munasitap uñachtʼayistu?

¹⁰ Jehová Diosajj oracionanakas istʼiwa (Salmo 66:19, 20 liytʼañataki). Jehová Diosajj janiw “mä qhawqha kutikiw orasiñama” sasajj siskistuti, jan ukasti ‘oración lurapjjapunim’ sasaw sistu (1 Tes. 5:17). Kawkjansa kuna horasasa, Jupar respetompi mayisiskaksnawa. Jehová Diosajj oracionanakas istʼatap amuytan ukhajja, jukʼampiw Jupar jakʼachastanjja. Salmo qellqer mä chachajj akham sänwa: “Nayajj Tatituruw munasta, mayisitajjar istʼatap layku” sasa (Sal. 116:1).

11. ¿Kunjamsa Jehová Diosajj oracionanakas istʼi?

¹¹ Jehová Diosajj janiw oracionanakas aleqak istʼkiti, jan ukasti kuntï mayktan ukarjamaw yanaptʼistu. Apóstol Juanajj akham sistuwa: “Jiwasatï munañaparjam kunsa mayiñäni ukhajja, jupajj istʼistaniwa” sasa (1 Juan 5:14, 15). Diosajj janiw kunjamtï munktan ukarjamapunejj oracionanakas istʼkistaniti. Jupajja, kunas jiwasatak jukʼamp walïspa uk sum yati, ukatwa awisajj kuntï mayktan ukarjam jan lurkiti, awisasti mä qhawqha tiempo suytʼañaswa munaraki (2 Cor. 12:7-9).

12, 13. ¿Kunjamsa Diosajj kunatï wakiski ukanak churistu?

¹² Jehová Diosajj kunatï wakiski ukanakwa churistu. Familiani awkinakarojj kun lurapjjañaptï mayki ukwa Jupajj luraraki (1 Tim. 5:8). Diosajja, kunatï wawanakapan sum jakasipjjañapatakejj munaski ukanakwa churi. Janiw manqʼatsa, isitsa, utatsa llakisiñas munkiti (Mat. 6:32, 33; 7:11). Niyakejjay wal munaschistojja, jutïrin kunatï jakasiñatak munaskani ukanak katoqañasatakisa janïräkipanwa wakichjje.

¹³ Ukampis taqe kunat sipansa kunanakatï Jupar serviñatakejj munaski ukanakwa churistu. Khitis Jupajja, kunas aka oraqetak amtapajja, jaqejj kuna amtampi luratätansa, kunas jutïrin pasani taqe ukanakwa Diosajj Biblian qhanañchistu. Awk taykasampi jan ukajj yaqha jilat kullakanakampiw Jupa toqet cheqa yatichäwinak yatichayistu. Jichhajj jilïr irpirinak taypi jan ukajj Diosar taqe chuyma servir yaqha jilat kullakanak taypiw munasiñampi yanaptʼaskakistu. Ukhamarakiw tantachäwinakanjja jiwasarusa jilat kullakanakasarusa Diosajj mä familiarjam yatichistu. Taqe ukhamanakatwa mä Awkjam sapa maynit llakisitap uñachtʼayistu (Sal. 32:8).

14. ¿Kunatsa Jehová Diosajj yatichistu, kunjamsa yaticharakistu?

¹⁴ Jehová Diosajj yatichistuwa. Jiwasajj pantjasiri jaqëtanwa, janiw Jesusjam jan juchan jaqëktanti. Ukatwa yatichañatakejja, alajjpachankir munasir Awkisajj wakiski ukhajj cheqañchistu. Arup taypejj akham sasaw amtayistu: “Jehová Diosajj khitinakarutï munaski ukanakarojj cheqañchiwa” sasa (Heb. 12:6, 7). Diosajj kunaymanitwa cheqañchistu. Awisajj Biblia liytʼasa, jan ukajj tantachäwin istʼasaw kunan cambiañasas wakisispa uk amuyassna. Awisasti jilïr irpirinakaw wakisitarjam cheqañchapjjarakistaspa. Jehová Diosajj kunjamjjay cheqañchchistani, Jupajj munasiñatwa cheqañchistani (Jer. 30:11).

15. ¿Kunjamanakatsa Jehová Diosajj yanaptʼistu?

¹⁵ Jehová Diosajj jan walinak aguantañatakiw yanaptʼistu. Kunjamtï mä munasir awkejj  wawanakapar cuidkejja, ukhamarakiw alajjpachankir Awkisajj jan walinakan uñjastan ukhajj cuidistu. Jupat jan jitheqtañasatakejj espíritu santopampiw yanaptʼistu (Luc. 11:13). Ukhamarusa llakimpi jan aynachtʼañasatakiw Diosajj yanaptʼarakistu. Sañäni, kunjamas jutïrin jakasjjañäni ukwa qhanañchistu, uk yatiñaw jan walinak aguantañatakejj yanaptʼistu. Kuna jan walinakantï tʼaqesisktan taqe ukanakjja, munasir Awkisajj qʼal chhaqtayjjani, askichjjarakiniwa. Jan walinakan uñjasktan ukanakajj mä qhawqha tiempotakikiwa, ukampis Jehová Diosan bendicionanakapajj wiñayatakiwa (2 Cor. 4:16-18).

16. ¿Adanajj alajjpachankir Awkipar jan istʼkäna ukhajj kunas pasäna?

¹⁶ Adanajj jan istʼkäna ukhajj kunsa Diosajj luräna ukanwa munasiñap uñjtanjja. Adanan jan istʼasitap laykojja, jupasa wawanakapasa janiw Diosan familiap taypinkjjapjjänti (Rom. 5:12; 7:14). Ukampis Jehová Diosajj Adanan wawanakapar yanaptʼañwa amtäna.

17. Adanajj jan istʼkäna ukhajja, ¿kunsa Diosajj ukaratpach luräna?

¹⁷ Jehová Diosajj Adanar castigkchïnsa, Adanan wawanakapar yanaptʼañatakiw ukaratpacha mä promesa luräna. Istʼasir jaqenakajj mayampiw Diosan familiap taypinkjjapjjañapäna (Gén. 3:15; Rom. 8:20, 21). Ukasti wali munat Yoqapan jiwatapjjaruw phoqasïna. Yoqapar sacrificiot loqtasaw jiwasar wal munasitap uñachtʼayistu (Juan 3:16).

18. Jehová Diosat jitheqtawaystan ukhajja, ¿kunatsa ‘Diosajj wawaparjamaw munasistu’ sasin confiysna?

¹⁸ Pantjasiri jaqëkstansa, Jehová Diosajj familiap taypinksna ukwa muni, janiw mä problemäksnas ukham uñjkistuti. Awisajj kapasakiw Jupar llakisiyjjsna jan ukajj mä tiempo Jupat jitheqjjsna, ukhamäkchinisa Jehová  Diosajj jupar kuttʼañas suyaskakiniwa. Herencia tukuntir waynat parlasaw qhawqsa Jehová Diosajj munasistu uk Jesusajj qhanañchäna (Luc. 15:11-32). Herencia tukuntir waynan tatapajj yoqapan kuttʼaniñap suyaskakïnwa. Yoqapajj kuttʼanjjäna ukhajj wali kusisitaw utar katoqjjäna. Jiwasatï Jehová Diosat jitheqtawaystan, ukampis arrepentisisin Diosar kuttʼañ munstan ukhajja, alajjpachankir Awkisajj wal katoqañ munistu, janiw ukat pächasiñasäkiti.

19. Adanan juchap laykojj kuna jan walinakantï uñjasktan ukanak askichañatakejja, ¿kunsa Jehová Diosajj lurani?

¹⁹ Adanan juchap laykojj jan walinakanwa uñjastanjja, ukampis alajjpachankir Awkisajj taqpachwa askichjjani. Adanajj juchachaskäna ukhajja, Jehová Diosajj 144.000 jaqenakaruw reyïpjjañapataki sacerdotëpjjañapataki ajlliñ amtäna. Jupanakaw Jesusamp chikajj alajjpachat apnaqanipjjani. Machaq mundonjja, Jesusampi uka ajllitanakampiw istʼasir jaqenakarojj jan juchani jaqer tukuñ yanaptʼapjjani. Qhep qhepa yantʼa pasirinakarojja, Diosajj wiñay jakañ churani. Aka oraqejj jan juchani jaqenakampi phoqantatäjjani ukhajj alajjpachankir Awkisajj wal kusisini. Uk uñjañajj ¡wali sumapunïniwa!

20. ¿Kunjamsa Diosajj jiwasar wal munasitap uñachtʼayistu, kuna toqetsa akjjar jutki uka yatichäwin yatjjataskañäni?

²⁰ Jehová Diosajj jiwasar wal munasitapwa uñachtʼayawayistu. Jupjam wali suma Awkejj janiw utjkiti. Jupajj oracionanakaswa istʼi, kunatï jakañatakisa Jupat jan jitheqtañasatakisa wakiski ukwa churistu. Ukhamarakiw yatichistu, yanaptʼarakistu. Ukatjja wali suma bendicionanakwa jiwasatak wakichaski. Alajjpachankir Awkisajj walpun munasistu, sumwa uñjarakistu, ¿janit ukajj wali kusiskañäki? Wawanakapjamajj kunjamsa Diosarojj jiwasar munasitapat yuspärsna ukwa akjjar jutki uka yatichäwin yatjjataskañäni.