1. Фарс шаһынын һүзуруна чыхмаг үчүн нә тәләб олунурду?

ТӘСӘВВҮР ЕДИН КИ, сиз 2500 ил өнҹәки дөврдә Фарс шаһлығында јашајырсыныз. Өлкәнин шаһы илә бир мәсәлә барәдә данышмаг үчүн онун игамәтҝаһынын јерләшдији Шуш шәһәринә јола дүшүрсүнүз. Рүсхәт алмадан шаһын һүзуруна чыхмағы ағлыныза белә ҝәтирмирсиниз. Ахы бу сизин һәјатыныз баһасына баша ҝәлә биләр (Әст. 4:11).

2. Јеһова Онунла мүнасибәтләримизин неҹә олмасыны истәјир?

² Нә јахшы ки, Јеһова Аллаһ һәмин Фарс шаһы кими дејил. Һеч бир һөкмдар ҝүҹдә-гүввәтдә Јеһоваја тај ола билмәз, бунунла белә, О, истәнилән ан бизи динләмәјә һазырдыр. Јеһова истәјир ки, биз Она јахынлашмаға чәкинмәјәк. О, Улу Јарадан, Күлли-Ихтијар, Гүдрәтли Һөкмдар кими али сифәтләрлә вәсф олунса да, Она сәмими шәкилдә мүраҹиәт етмәјимизи, «Ата» демәјимизи истәјир (Мәт. 6:9). Јеһованын бизимлә сых, исти мүнасибәт гурмаг истәмәси неҹә дә хошдур!

3. Јеһоваја нә үчүн «Ата» дејә мүраҹиәт едә биләрик вә бу мәгаләдә нәји арашдыраҹағыг?

³ Јеһоваја «Ата» дејә мүраҹиәт етмәјимиз јериндәдир, ахы О бизә һәјат бәхш едиб (Зәб. 36:9). Атамыз олдуғу үчүн Она итаәт етмәлијик. Онун бујурдуғу кими даврансаг, мисилсиз немәтләр дадаҹағыг (Ибр. 12:9). Бу немәтләрә ја ҝөјдә, ја да јер үзүндә әбәди јашамаг дахилдир. Итаәткарлыг ҝүнү бу ҝүн дә бизә фајда ҝәтирир. Мәгаләдән Јеһованын бир Ата кими гајғымыза неҹә галдығыны вә бизи һеч вахт тәрк етмәјәҹәјинә нә үчүн әмин ола биләҹәјимизи  өјрәнәҹәјик. Амма ҝәлин әввәлҹә мүзакирә едәк ҝөрәк, Јеһованын бизи үрәкдән севдијинә вә гајғымыза галдығына нә үчүн әмин ола биләрик.

4. Нәјә ҝөрә бәзиләри үчүн Јеһоваја Ата кими јанашмаг чәтиндир?

⁴ Јеһоваја Ата кими јанашмаг сизин үчүн чәтиндир? Бәзиләри Јеһованын әзәмәти гаршысында өзләрини ҹылыз вә дәјәрсиз һисс едир. Күлли-Ихтијар Аллаһын онларла шәхсән марагландығына инана билмирләр. Амма мәһәббәтли Аллаһымыз Јеһова белә дүшүнмәјимизи истәмир. О бизә һәјат вериб вә Онунла достлуг мүнасибәти гурмағымызы истәјир. Һәвари Булус да афиналылара бу һәгигәти вурғулајараг билдирмишди ки, Јеһова «һеч биримиздән узаг дејил» (Һәв. 17:24—29). Јеһова истәјир ки, ушаг мәһәббәтли вә гајғыкеш валидејнинә үз тутдуғу кими, биз дә Она үз тутаг.

5. Бир баҹынын һадисәсиндән нә өјрәнирик?

⁵ Бәзиләри ата севҝиси ја аз ҝөрүб, ја да үмумијјәтлә ҝөрмәјиб, буна ҝөрә дә онлара Јеһованы бир Ата кими гәбул етмәк чәтиндир. Бир баҹы демишди: «Атам мәнә гаршы чох кобуд олуб. Мүгәддәс Китабы өјрәнмәјә башлајанда Јеһоваја Ата кими јанашмаг мәнә чәтин иди. Амма Ону таныдыгҹа һәр шеј дәјишди». Сиз дә нә вахтса бу ҹүр һиссләр кечирмисиниз? Әҝәр еләдирсә, әмин ола биләрсиниз ки, заманла сиз дә Јеһованын ән јахшы Ата олдуғуну ҝөрәҹәксиниз.

6. Мәтта 11:27 ајәсинә әсасән, Јеһова һансы үсулла Она гајғыкеш Ата кими јанашмағымыза көмәк едир?

⁶ Јеһова мүхтәлиф үсуллардан истифадә едәрәк Она гајғыкеш Ата кими јанашмағымыза көмәк едир. Мисал үчүн, О, Иса Мәсиһин сөз вә давранышларыны Мүгәддәс Китаба јаздырыб. (Мәтта 11:27 ајәсини охујун.) Иса Јеһованын хүсусијјәтләрини елә мүкәммәл әкс етдирирди ки, һәтта белә демишди: «Мәни ҝөрән Атаны да ҝөрүб» (Јәһ. 14:9). Иса Мәсиһ Јеһованын Ата кими дашыдығы ролу барәдә тез-тез данышырды. Тәкҹә дөрд Мүждәјә нәзәр салсаг, Исанын Јеһоваја тәхминән 165 дәфә «Ата» дејә мүраҹиәт етдијини ҝөрә биләрик. Иса нә үчүн Јеһоваја тез-тез «Ата» дејә мүраҹиәт едирди? Сәбәбләрдән бири инсанлары Јеһованын мәһәббәтли Ата олдуғуна әмин етмәк иди (Јәһ. 17:25, 26).

7. Оғлу илә рәфтарындан Јеһова һагда нә өјрәнә биләрик?

⁷ Јеһованын Оғлу илә рәфтарындан да Онун һагда чох шеј өјрәнә биләрик. Јеһова Исанын дуаларыны һәмишә динләјирди. Һәтта нәинки динләјирди, һәмчинин онлара ҹаваб верирди (Јәһ. 11:41, 42). Иса истәнилән сынаг заманы Јеһованын дәстәјини вә севҝисини һисс едирди (Лука 22:42, 43).

8. Јеһова Исанын гајғысына неҹә галырды?

⁸ Иса баша дүшүрдү ки, һәјаты вә јашамаг үчүн лазым олан һәр шеји она Јеһова бәхш едиб. Буна ҝөрә дә демишди: «Онун сајәсиндә јашајырам» (Јәһ. 6:57). Иса Атасына там ҝүвәнирди, Јеһова да ону јашамаг үчүн зәрури олан һәр бир шејлә тәмин едирди. Ән өнәмлиси исә Јеһова Исанын руһани тәләбатларыны өдәјирди (Мәт. 4:4).

9. Јеһованын Исаја гајғыкеш Ата олдуғу нәдән ҝөрүнүр?

⁹ Јеһова гајғыкеш Ата кими Исаја әминлик вермишди ки, она арха-дајагдыр (Мәт. 26:53; Јәһ. 8:16). Јеһова ону бүтүн әзаблардан горумаса да, дөзмәјә көмәк едирди. Иса әмин иди ки, чәкәҹәји  истәнилән әзаб мүвәггәти олаҹаг (Ибр. 12:2). Јеһова Исанын гајғысына галдығыны ону динләмәклә, лазыми шејләрлә тәмин етмәклә, өјрәтмәклә вә она дајаг олмагла ҝөстәрирди (Јәһ. 5:20; 8:28). Јеһова ејни тәрздә бизим дә гејдимизә галыр. Ҝәлин буну неҹә етдијинә нәзәр салаг.

10. Зәбур 66:19, 20 ајәләринә әсасән, Јеһова бизә севҝисини неҹә ҝөстәрир?

¹⁰ Јеһова дуаларымызы динләјир. (Зәбур 66:19, 20 ајәләрини охујун.) Јеһова дуаларымызын сајына мәһдудијјәт гојмур, әксинә, бизи дөнә-дөнә дуа етмәјә тәшвиг едир (1 Салон. 5:17). Биз Јеһоваја истәнилән вахт вә истәнилән јердә һөрмәтҹил тәрздә дуа едә биләрик. О, һәмишә бизә вахт ајырмаға һазырдыр вә бизи диггәтлә динләјир. Јеһованын дуаларымызы динләдијини биләндә Она мәһәббәтимиз даһа да артыр. Мәзмурчу демишди: «Јеһованы севирәм, чүнки ешидир сәсими» (Зәб. 116:1).

11. Јеһова дуаларымыза неҹә ҹаваб верир?

¹¹ Јеһова садәҹә дуаларымызы динләмир, һәм дә онлара ҹаваб верир. Һәвари Јәһја демишди: «Онун ирадәсинә мүвафиг нә диләјириксә, О ешидир» (1 Јәһ. 5:14, 15). Ола билсин, Јеһова дуаларымыза бизим ҝөзләдијимиз тәрздә ҹаваб вермәсин. Чүнки бизим үчүн нәјин даһа јахшы олдуғуну билир вә буна ҝөрә дә бәзән дуамыза ја «јох» ҹавабы верир, ја да «ҝөзлә» дејир (2 Кор. 12:7—9).

12, 13. Сәмави Атамыз бизи нәләрлә тәмин едир?

¹² Јеһова бизи зәрури шејләрлә тәмин едир. О, бүтүн аталардан тәләб етдији кими давраныр (1 Тим. 5:8). Јеһова өвладларынын мадди тәләбатларыны өдәјир. О, гидаја, ҝејимә, јахуд һарада јашајаҹағымыза ҝөрә нараһат олмағымызы истәмир (Мәт. 6:32, 33; 7:11). Јеһова гајғыкеш Ата кими, һәтта ҝәләҹәк тәләбатларымыз үчүн дә тәдбир ҝөрүб.

¹³ Ән әсасы исә, Јеһова бизим руһани тәләбатларымызы өдәјир. О, Кәламы васитәсилә Өзү, нијјәти, һәјатын мәнасы вә ҝәләҹәк һагда һәгигәти әјан едир. Һәгигәти өјрәнмәјә башлајандан бизимлә шәхсән марагланыб, валидејнләримиз вә ја бизи өјрәдән кәсләрин васитәсилә Ону танымағымыза көмәк едиб. Јеһова гајғыкеш ағсаггаллар вә јеткин баҹы-гардашлар васитәсилә бизә бу саһәдә көмәк етмәјә давам едир. Үстәлик, јығынҹагларда руһани аиләмизлә бирҝә тәлим алырыг. Јеһова бу вә диҝәр јолларла һәр биримизә ата гајғысы ҝөстәрир (Зәб. 32:8).

14. Јеһова бизи нә үчүн тәрбијәләндирир вә буну неҹә едир?

¹⁴ Јеһова бизә тәлим верир. Иса Мәсиһдән фәргли олараг, биз гејри-камилик. Буна ҝөрә дә Јеһова тәлиминин бир һиссәси олараг јери ҝәләндә бизә тәрбијә верир. Онун Кәламында дејилир: «Јеһова кими севирсә, ону тәрбијә едир» (Ибр. 12:6, 7). Јеһова бизи мүхтәлиф јолларла тәрбијәләндирир. Мисал үчүн, Кәламындан охудуғумуз вә јығынҹагда ешитдијимиз фикирләр васитәсилә сәһвләримизи ҝөрүб, дүзәлдә биләрик. Јахуд да ола билсин, лазым олан көмәк ағсаггаллардан ҝәлсин. Јеһова бизи һансы јолларла тәрбијә едир-етсин, буну һәмишә мәһәббәтдән ирәли ҝәләрәк едир (Әрм. 30:11).

15. Јеһова бизи неҹә горујур?

¹⁵ Јеһова сынаглар заманы бизә дајаг олур. Чәтин анларында өвладларына дајаг олан гајғыкеш ата кими, сәмави Атамыз чәтинликләримиз заманы бизә дајаг олур. О, мүгәддәс руһундан истифадә едәрәк бизи  руһани зәрәрдән горујур (Лука 11:13). Јеһова һәмчинин руһдан дүшдүјүмүз заман бизә дајаг олур. Мисал үчүн, бизә мөһтәшәм үмид бәхш едир. Ҝәләҹәјә олан бу үмид сынаглара дөзмәјә көмәк едир. Чүнки билирик ки, башымыза нә ҝәлир-ҝәлсин, мәһәббәтли Атамыз бизә әзаб верән истәнилән јараны тамамилә сағалдаҹаг. Үзләшдијимиз истәнилән сынаг мүвәггәтидир, Јеһованын вердији немәтләр исә әбәдидир (2 Кор. 4:16—18).

16. Адәм сәмави Атасына итаәтсизлик едәндә нә баш верди?

¹⁶ Јеһованын бизи севдијини Онун јерүзү аиләсиндә јаранан илк проблеми неҹә һәлл етмәсиндән ҝөрмәк олар. Адәм сәмави Атасына итаәтсизлик етмәклә һәм өзү, һәм дә ҝәләҹәк өвладлары үчүн Јеһованын хошбәхт аиләсиндәки јери итирди (Ром. 5:12; 7:14). Буна рәғмән, Јеһова Адәмин ҝәләҹәк өвладларына көмәк етмәк үчүн тәдбир ҝөрдү.

17. Адәмин үсјанындан дәрһал сонра Јеһова нә етди?

¹⁷ Јеһова Адәми ҹәзаландырды, лакин онун өвладларыны үмидсиз гојмады. О, дәрһал вәд верди ки, итаәткар бәшәријјәти Өз аиләсинә ҝери гајтараҹаг (Јар. 3:15; Ром. 8:20, 21). Буну әзиз Оғлу Иса Мәсиһин фидјә гурбанлығы сајәсиндә мүмкүн етди. Оғлуну уғрумузда гурбан вермәси Јеһованын бизи дәрин мәһәббәтлә севдијинин сүбутудур (Јәһ. 3:16).

18. Нәјә ҝөрә әмин ола биләрик ки, Јеһовадан узаг дүшсәк белә, бизи өвлады кими гәбул етмәјә һазырдыр?

¹⁸ Гејри-камил олсаг да, Јеһова аиләсинин бир үзвү олмағымызы истәјир вә һеч вахт бизә јүк кими јанашмыр. Јеһованы мәјус едәндә, јахуд Ондан узаг дүшәндә биздән әлини үзмүр. Иса Мәсиһ Јеһованын  бир Ата кими бизи нә гәдәр чох севдијини ҝөстәрмәк үчүн итмиш оғул мәсәлини чәкмишди (Лука 15:11—32). Мәсәлдәки ата өвладынын нә вахтса ҝери гајыдаҹағына үмидини һеч вахт итирмир. Оғлу евә ҝери дөнәндә атасы ону бөјүк севинҹлә гаршылајыр. Биз дә мәһәббәтли Атамыз Јеһовадан узаг дүшмүшүксә, амма төвбә етмишиксә, әмин ола биләрик ки, О бизи гәбул етмәјә һазырдыр.

19. Јеһова Адәмин ҝүнаһы уҹбатындан бәшәријјәтә дәјән зәрәри неҹә арадан галдыраҹаг?

¹⁹ Сәмави Атамыз Адәмин ҝүнаһы уҹбатындан бәшәријјәтә дәјән бүтүн зәрәри арадан галдыраҹаг. Адәмин үсјанындан сонра Јеһова гәрара ҝәлди ки, инсанлар арасындан 144 000 нәфәри өвладлыға ҝөтүрсүн вә онлар Оғлу илә бирҝә ҝөјдә падшаһ вә каһин кими хидмәт етсинләр. Јени дүнјада Иса Мәсиһ вә онун һакимијјәт шәрикләри итаәткар бәшәријјәтә камиллијә јетишмәјә көмәк едәҹәк. Итаәткарлыглары сонунҹу дәфә сынанандан сонра Јеһова онлара әбәди һәјат бәхш едәҹәк. Һәмин вахт Атамыз камил оғул вә гызларынын бүтүн дүнјаны бүрүдүјүнә бахыб фәрәһләнәҹәк. Бу, чох мөһтәшәм бир дөвр олаҹаг!

20. Јеһова бизә мәһәббәт бәсләдијини неҹә ҝөстәриб вә нөвбәти мәгаләдә нәдән данышаҹағыг?

²⁰ Јеһова бизи үрәкдән севдијини сүбут едиб. О, мүкәммәл Атадыр. Јеһова дуаларымызы динләјир, һәм руһани, һәм дә мадди ҹәһәтдән бизи тәмин едир. О бизи өјрәдир, бизә дајаг олур. Һәмчинин ҝәләҹәкдә бизә мөһтәшәм немәтләр бәхш едәҹәк. Атамызын бизи севдијини вә гајғымыза галдығыны билмәк көнлүмүзү севинҹлә долдурур! Нөвбәти мәгаләдә бир өвлад кими Онун мәһәббәтинә неҹә гаршылыг верә биләҹәјимиздән данышаҹағыг.