1. Aha do na ikkon diulahon sasahalak molo naeng makkatai tu raja Persia?

BAYAKKON ma hamu mangolu hira-hira 2.500 taon naung salpu di Persia. Naeng makkatai ma hamu tu raja na di luat i taringot sada parsoalan, alani i ikkon lao ma hamu tu kota Susan. Alai ikkon jolo mangido ijin ma hamu asa boi makkatai tu raja i. Molo dang, boi do dibunu hamu!​—Est. 4:11.

2. Aha do na dihalomohon Jahowa molo naeng makkatai hita tu Ibana?

² Mandok mauliate do hita ala Jahowa dang songon raja Persia i! Umgogo do Jahowa sian sude pamaretta di portibi on. Alai boi do hita makkatai tu Ibana ganup tikki. Lomo rohana asa unang mabiar hita jonok tu Ibana. Nang pe adong do piga-piga gelar ni Jahowa songon, Sitoppa saluhut, na Sun Hinagogo, dohot Tuan Natumimbul, alai lomo do rohana asa tapakke gelarna na asing, i ma “Ama” tikki makkatai tu Ibana. (Mat. 6:9) Massai las do rohatta ala lomo roha ni Jahowa asa jonok hita tu Ibana!

3. Boasa tama tajou Jahowa “Ama”, jala aha do na lao taulas di parsiajaran on?

³ Tama do hita manjou Jahowa “Ama”, alana Ibana do na mangalehon hangoluan tu hita. (Ps. 36:10) Ala Jahowa gabe Ama di hita, ikkon taoloi do Ibana. Tikki taulahon aha na dipangido Ibana, dapotta ma godang pasu-pasu. (Heb. 12:9) Sada sian pasu-pasu i, i ma hangoluan na saleleng ni lelengna di surgo manang di tano on. Jala saonari pe, boi do tadapot laba ala unduk tu Ibana. Di parsiajaran on, lao taulas ma songon dia Jahowa gabe Ama na parholong tu hita jala boasa boi pos rohatta dang tadikkononna hita. Alai parjolo sahali, taulas ma boasa boi pos rohatta na dihaholongi jala disarihon Jahowa do hita.

4. Boasa piga-piga halak maol makkilala Debata songon Ama di nasida?

⁴ Maol do di hamu makkilala Debata i songon Ama? Adong piga-piga halak na makkilala dang mararga dirina ala dao do umsangap Jahowa sian nasida. Didok roha ni nasida, dang olo Debata Natumimbul mamparrohahon hita ganup marsada-sada. Alai sasittongna, dang lomo roha ni Jahowa molo tahilala songon i. Dilehon Ibana do hita hangoluan jala lomo do rohana asa marale-ale hita tu Ibana. Dung paboahon taringot on, dipaboa si Paulus do tu halak Atena, “ndang dao [Jahowa] sian ganup hita on.” (Ul. 17:24-29) Lomo do roha ni Debata asa makkatai hita tu Ibana songon dakdanak na makkatai tu natua-tuana.

5. Aha do na boi taparsiajari sian pengalaman ni sahalak dongatta?

⁵ Asing ni i, adong do na maol makkilala Debata songon Ama di nasida. Ra, ala dang hea nasida dihaholongi bapakna. Parrohahon ma na didok sahalak dongatta borua. Didok ibana, “Kasar hian do bapakku. Tikki parjolo sahali marsiajar Bibel, maol do hubayakkon na boi do ahu jonok tu Ama na di surgo i. Alai dung hutanda Jahowa, gabe muba ma ngolukku.” Hea do hamu makkilala na sarupa? Molo hea, pos ma rohamuna, boi do hilalaonmu molo Jahowa i Ama na parholong.

6. Hombar tu Mateus 11:27, aha do sada cara ni Jahowa mangurupi hita asa boi tahilala ibana Ama na parholong?

⁶ Sada cara Jahowa mangurupi hita asa boi tahilala ibana Ama na parholong, i ma marhite aha na dihatahon dohot na diulahon Jesus na disurat di Bibel. (Jaha Mateus 11:27.) Massai denggan do ditiru Jesus parange ni Amana. I do alana didok Jesus do, “Manang ise na mangida ahu, nunga diida ibana Ama i.” (Joh. 14:9) Jotjot do Jesus manggombarhon Jahowa songon sahalak Ama. Di opat bukku Injil, dipakke Jesus do hata “Ama” hira-hira 165 hali tikki makkatai taringot Jahowa. Boasa didok ibana songon i? Asa boi pos roha ni akka halak molo Jahowa i Ama na parholong.​—Joh. 17:25, 26.

7. Aha do na boi taparsiajari sian cara ni Jahowa maradoppon Anakna?

⁷ Pikkirhon ma muse aha na boi taparsiajari sian cara ni Jahowa maradoppon Anakna. Sai ditangihon jala dialusi Jahowa do tangiang ni Jesus. (Joh. 11:41, 42) Aha pe hasusaan na diadopi Jesus, sai dihilala ibana do holong ni Amana i.​—Luk. 22:42, 43.

8. Songon dia Jahowa manarihon Jesus?

⁸ Diattusi Jesus do, Amana i do na mangalehon ngolu jala paradehon akka na porlu di ibana. I do alana didok Jesus, “Ahu mangolu alani Ibana.” (Joh. 6:57) Pos do roha ni Jesus tu Amana. Jala sai dilehon Jahowa do na dihaporluhon ibana asa toktong mangolu. Na rumikkot, diurupi Jahowa do Jesus asa boi toktong setia tu Ibana.​—Mat. 4:4.

9. Songon dia do Jahowa patuduhon molo Ibana Ama na parholong di Jesus?

⁹ Ama na parholong do Jahowa. Dipapos Ibana do roha ni Jesus jala marjanji do Ibana sai dongananna do Jesus. (Mat. 26:53; Joh. 8:16) Nang pe dang sai dipasiding Jahowa hasusaan na diadopi Jesus, alai sai diurupi Ibana do Jesus asa toktong martahan. Diboto Jesus do, holan satokkin do hasusaan na diadopi ibana. (Heb. 12:2) Dipatudu Jahowa do holongna tu Jesus marhite manangihon, manarihon, mangalatik, jala mangurupi ibana.  (Joh. 5:20; 8:28) Saonari, taida ma songon dia Jahowa mangulahon na sarupa tu hita.

10. Hombar tu Psalmen 66:19, 20, songon dia Jahowa patuduhon holongna tu hita?

¹⁰ Ditangihon Jahowa do tangiangta. (Jaha Psalmen 66:19, 20.) Dang ditottuhon Jahowa ikkon piga hali hita martangiang, alai dijujui Ibana do asa jotjot hita martangiang. (1 Tes. 5:17) Tikki sadihari jala didia pe, boi do hita martangiang tu Debata. Sai ditangihon Ibana do tangiangta. Tikki taboto na sai ditangihon Jahowa tangiangta, gabe lam holong ma rohatta tu Ibana. Sahalak panurat psalmen mandok, “Holong do rohangku di Jahowa, ai ditangihon do ahu.”​—Ps. 116:1.

11. Songon dia do Jahowa mangalusi tangiangta?

¹¹ Dang holan ditangihon, alai dialusi Jahowa do tangiangta. Apostel Johannes mandok, “Manang aha na tapangido hombar tu lomo ni rohana, tangihononna do hita.” (1 Joh. 5:14, 15) Dialusi Jahowa do tangiangta, alai ra dang songon na tapikkirhon. Diboto Ibana do aha na dumenggan tu hita. I do alana sipata dang songon na tapangido i alusna, manang dipangido Ibana hita asa sabar paimahon.​—2 Kor. 12:7-9.

12-13. Songon dia do cara ni Jahowa manarihon hita?

¹² Disarihon Jahowa do hita. Diulahon Jahowa do tugasna gabe sahalak ama. (1 Tim. 5:8) Dilehon Ibana do aha na porlu di ianakkonna ganup ari. Dang lomo rohana hita holsoan taringot sipanganon, pakkean dohot inganatta tading. (Mat. 6:32, 33; 7:11) Ala Ama na parholong do Jahowa, paradeonna do akka na tahaporluhon di ari naeng ro.

¹³ Na rumikkot, diparade Jahowa do aha na tahaporluhon lao patoguhon parale-aleotta tu Ibana. Marhite Bibel, dipaboa Ibana hasittongan taringot dirina, sakkapna, tujuan ni ngolu dohot na lao masa di ari na naeng ro. Diparrohahon Ibana do hita tikki parjolo sahali mananda hasittongan marhite natua-tuatta manang sasahalak na mangurupi hita marsiajar Bibel. Jala toktong do hita di urupi angka sintua di huria dohot dongan na togu parale-aleonna tu Debata. Adong muse tudu-tudu na dilehon Ibana marhite parpunguan. Rap marsiajar do hita dohot akka dongan sahaporseaon. Marhite akka cara on, dipatudu Jahowa do na disarihon hita.​—Ps. 32:8.

14. Boasa dilatik Jahowa hita, jala songon dia Ibana mangulahon i?

¹⁴ Dilatik Jahowa do hita. Jolma na so sempurna do hita, dang songon Jesus. Alani i lao mangalatik hita, sipata dipissang Jahowa do hita. Didok do di Bibel, “Dipinsang Jahowa do sude halak na hinaholonganna.” (Heb. 12:6, 7) Marragam do cara ni Jahowa mamissang hita. Umpamana, marhite aha na tajaha di Bibel manang na tatangihon di parpunguan, gabe taboto ma adong na porlu tapauba di diritta. Manang boi do i tadapot sian akka sintua. Songon dia pe cara ni Jahowa mamissang hita, taboto alani holongna do i tu hita.​—Jer. 30:11.

15. Songon dia do cara ni Jahowa manjaga hita?

¹⁵ Diurupi Jahowa do hita asa boi martahan. Songon sahalak ama na mangurupi ianakkonna di tikki susa, hita pe diurupi Jahowa do asa toktong martahan tikki marsitaonon. Dilehon do tondi  parbadiana lao manjaga hita asa unang sega parale-aleotta tu Jahowa. (Luk. 11:13) Diurupi Jahowa do hita tikki marsak. Umpamana, dilehon Ibana do pakkirimon na massai denggan. On mangurupi hita asa martahan mangadopi akka hasusaan. Ingot ma: Aha pe sitaonon na masa tu hita, na lao salpuhonon ni Debata do i. Holan satokkin do hasusaan na taadopi, alai manoktong do pasu-pasu na dilehon Jahowa.​—2 Kor. 4:16-18.

16. Aha do na masa tikki si Adam dang mangoloi Jahowa?

¹⁶ Boi do taida holong ni Jahowa molo tarimangi aha na diulahon Ibana tikki mangalo si Adam tu Ibana. Dung mardosa si Adam, dang bagian sian keluarga ni Jahowa be ibana dohot akka pinomparna. (Rom 5:12; 7:14) Alai adong do na diulahon Jahowa lao mangurupi akka pinoppar ni si Adam.

17. Aha do na diulahon Jahowa dung mangalo si Adam?

¹⁷ Dihukum Jahowa do si Adam. Alai, marjanji do Jahowa lao mangurupi akka pinopparna. Jala lao paluaonna do akka halak na mangoloi Ibana asa gabe bagian sian keluargana. (1 Mus. 3:15; Rom 8:20, 21) Alani tobusan ni Jesus, boi do tadapot pasu-pasu i. Dilehon Jahowa do Anakna humokkop hita. On patuduhon na massai holong do rohana tu hita.​—Joh. 3:16.

18. Boasa pos rohatta na lomo do roha ni Jahowa asa gabe anakna hita, nang pe hea tatadikkon Ibana?

¹⁸ Nang pe dang sempurna hita, lomo do roha ni Jahowa asa gabe bagian sian keluargana hita. Dang hea maol dihilala Ibana lao mangurupi hita. Ra, hea do  tabahen haccit rohana manang tatadikkon Ibana. Alai, sai hirim do roha ni Jahowa asa mulak muse hita tu Ibana. Dipatudu Jesus do sadia balga holong ni Jahowa tu ianakkonna marhite tudosan taringot anak na mago. (Luk. 15:11-32) Sai hirim do roha ni ama na dipaboa di tudosan i asa mulak muse anakna i. Tikki mulak anakna i, pittor dijakkon ibana do. Molo hea tatadikkon Jahowa alai olo hita marhamubaon, pos ma rohatta rade do Jahowa manjakkon hita muse.

19. Songon dia Jahowa padenggatton akka naung sega na dibahen si Adam?

¹⁹ Lao padengganon ni Jahowa ma akka naung sega na dibahen si Adam. Dung mangalo si Adam, dipillit Jahowa ma 144.000 halak sian tano on lao gabe raja dohot malim rap dohot Jesus di surgo. Di tano na imbaru, diurupi nasida ma akka halak na setia asa gabe jolma na sempurna. Dung marhasil nasida mangadopi ujian na parpudi, lehonon ni Jahowa ma hangoluan na salelengna tu nasida. Tikki i, massai las do roha ni Debata mangida tano on marisi akka anakna naung sempurna. Tontu, massai denggan do ngolutta di tikki i!

20. Songon dia Jahowa patuduhon na massai holong do rohana tu hita, jala aha do na lao taulas di parsiajaran na mangihut?

²⁰ Nungnga dipatudu Jahowa na massai holong do rohana tu hita. Ibana ma Ama na massai burju tu hita. Ditangihon Ibana do tangiangta jala diparade do aha na tahaporluhon ganup ari dohot akka na patoguhon parale-aleotta tu Ibana. Dilatik jala diurupi do hita. Dilehon do muse pakkirimon tu ari na naeng ro. Las do rohatta ala mamboto na massai holong jala disarihon Jahowa do hita! Di parsiajaran na mangihut, lao taulas ma songon dia caranta mandok mauliate alani holongna.