1. ?Sɛ Pɛrsifuɛ’m be famiɛn’n w’a yiaman sran kun naan sran sɔ’n to i lɔ’n, ngue sa yɛ ɔ kwla ɲɛn i-ɔ?

MAAN ɔ yo wɔ kɛ a tran laa nvle nga be flɛ i kɛ Pɛrsi’n i nun sa. Cɛn kun’n, ɔ waan á kó wún famiɛn’n i wun naan á kán ndɛ kun klé i. I sɔ’n ti’n, a tu ajalɛ kɔ Sizi kan famiɛn’n tran lɔ’n. Sanngɛ a si kɛ sɛ ɔ waan á wún famiɛn’n i wun’n, ɔ fata kɛ ɔ man wɔ atin ka. Afin sɛ w’a yiaman wɔ naan a ko to i lɔ’n, be kwla kun wɔ.​—Ɛst. 4:11.

2. ?Kɛ é kán ndɛ é klé Zoova’n, wafa sɛ yɛ ɔ kunndɛ kɛ e flɛ i-ɔ?

² Kɛ mɔ Zoova timan kɛ Pɛrsifuɛ’m be famiɛn sɔ’n sa ti’n, ɔ yo e fɛ dan. Asiɛ’n su famiɛn wie fi kwlá fɛmɛn i wun sunnzunman Zoova. Ɔ nin i sɔ ngba’n, ɔ kunndɛ kɛ e kan e klun ndɛ e kle i blɛ kwlaa nun, yɛ e fa e wun e mɛntɛn i. Titi’n, kɛ é kán Zoova i ndɛ’n, e se kɛ ɔ ti Like kwlaa yifuɛ, nin Ɲanmiɛn m’ɔ kwla sa kwlaa yo’n, nin Nglo nin asiɛ’n be siefuɛ. Sanngɛ kɛ é kán ndɛ é klé i’n, ɔ kunndɛ kɛ e flɛ i kɛ e “Si.” (Mat. 6:9) Nanwlɛ, kɛ Zoova kunndɛ kɛ e fa e wun e mɛntɛn i’n, ɔ yo e fɛ dan.

3. (1) ?Ngue ti yɛ e kwla flɛ Zoova kɛ e “Si” ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

³ E kwla flɛ Zoova kɛ e “Si,” afin i ti yɛ maan e o nguan nun-ɔn. (Jue. 36:10) I sɔ’n ti’n, ɔ fata kɛ e ɲin yi i, kpɛkun e yo like kwlaa ng’ɔ se e kɛ e yo’n. Sɛ e yo sɔ’n, ɔ́ yrá e su. (Ebr. 12:9) I wie yɛle kɛ ɔ́ yó maan é ɲán nguan m’ɔ leman awieliɛ’n asiɛ’n su wa annzɛ ɲanmiɛn su lɔ. Kpɛkun ɔ yo maan e ɲan suyralɛ kaka andɛ. Like suanlɛ nga nun’n, é wá kán ninnge nga Zoova yo be dɔ nga su fa kle kɛ ɔ ti e Si naan ɔ klo e’n, be ndɛ. Kpɛkun é kán like nga ti yɛ e kwla lafi su kɛ e ɲrun lɔ’n, ɔ su yiman e ase le’n, i ndɛ wie. Sanngɛ maan e dun mmua e kan like nga ti yɛ e kwla lafi su kɛ e Si m’ɔ o ɲanmiɛn su lɔ’n klo e naan ɔ nian e lika’n, i ndɛ.

4. Kɛ ɔ yo naan sran wie’m be bu Ɲanmiɛn kɛ be Si sa’n, ɔ ti kekle man be. ?Ngue ti-ɔ?

⁴ Kɛ ɔ yo naan sran wie’m be bu Ɲanmiɛn kɛ be Si sa’n, ɔ ti kekle man be. Afin be waan Zoova ti dan naan be timan like fi i ɲrun. Kpɛkun be bumɛn i kɛ be ndɛ lo i bɔbɔ. Sanngɛ e Si Ɲanmiɛn kunndɛman kɛ e wun yo e sɔ. I yɛ ɔ mannin e nguan-ɔn, yɛ ɔ kunndɛ kɛ e fa e wun e mɛntɛn i. I nun nga akoto Pɔlu kán ndɛ klé Atɛninfuɛ mun’n, ɔ boli ndɛ sɔ’n su. I sin’n, ɔ seli be kɛ Zoova “nin e nun wie fi nunman mmua.” (Yol. 17:24-29) Kɛ nga bakan kun fɛ i wun mɛntɛn i si m’ɔ nin i be koko yalɛ sa’n, Zoova kunndɛ kɛ e tinuntinun e fa e wun e mɛntɛn i naan e kan e klun ndɛ e kle i.

5. ?Ngue yɛ aniaan bla kun i su ndɛ’n kle e-ɔ?

⁵ Like nga ti yɛ sran wie’m be kwlá buman Zoova kɛ be si sa’n, i kun ekun yɛle kɛ be si’m b’a kleman be kɛ be klo be. Amun nian ndɛ nga aniaan bla kun kannin’n. Ɔ seli kɛ: “Titi’n, ndɛ tɛtɛ mun yɛ min si kan kle min-ɔn. Ɔ maan, kɛ n boli Biblu’n nun like suanlɛ bo’n uflɛ nun’n, kɛ ɔ yo naan n fa min wun mantan e Si m’ɔ o ɲanmiɛn su lɔ’n, ɔ yoli kekle mannin min. Sanngɛ kɛ n ma sili Zoova kpa’n, min wun w’a yoman min sɔ kun.” Atrɛkpa’n, kɛ amun wun yo amun sɔ wie-ɔ. Sɛ amun wun yo amun sɔ kusu’n, nán amun sa sin bubu amun. Kɛ amún wá sí Zoova kpa’n, amún wá wún i kɛ ɔ ti Siɛ kpa kun m’ɔ leman wunsu-ɔ.

6. ?Kɛ nga Matie 11:27 fa kan’n sa’n, ninnge nga Zoova yoli naan y’a wun i wlɛ kɛ ɔ ti e Si naan ɔ klo e’n, be nun kun yɛle benin?

⁶ Ninnge nga Zoova yoli naan y’a wun i wlɛ kɛ ɔ ti e Si naan ɔ klo e’n, be nun kun yɛle kɛ ɔ yoli maan be klɛli ndɛ nga Zezi kannin’n, ɔ nin ninnge ng’ɔ yoli be’n Biblu’n nun. (An kanngan Matie 11:27 nun.) Zezi yili i Si i nzuɛn’n i nglo dan ti’n, ɔ seli kɛ: “Sran ng’ɔ wun min’n, nn w’a wun Siɛ’n wie.” (Zan 14:9) Kpɛ sunman’n, kɛ Zezi kán Zoova i ndɛ’n, ɔ se kɛ ɔ ti e Si. I kpa bɔbɔ’n, Zezi i su ndɛ nga Matie, nin Marki, nin Liki ɔ nin Zan be klɛli’n nun’n, Zezi fali ndɛ mma kɛ “Siɛ” annzɛ “Si” sa’n, fa kannin Zoova i ndɛ kpɛ kaka. ?Ngue ti yɛ Zezi kannin Zoova i ndɛ kpɛ sunman sɔ-ɔ? Afin ɔ kunndɛ kɛ sran’m be si kɛ Zoova ti Siɛ kpa kun naan ɔ klo e.​—Zan 17:25, 26.

7. ?Ngue yɛ wafa nga Zoova nin i Wa Zezi be nantili’n kle e-ɔ?

⁷ Maan e fa e ɲin e sie i wafa nga Zoova nin i Wa Zezi be nantili’n su. Zoova sieli i su tieli Zezi i srɛlɛ mun. Sanngɛ nɛ́n i ngba-ɔ. Ɔ tɛli be su wie. (Zan 11:41, 42) Kannzɛ sa kekle sunman be tɔli Zezi su’n, sanngɛ ɔ wunnin i wlɛ kɛ i Si Zoova klo i naan ɔ suɛn i bo.​—Lik. 22:42, 43.

8. ?Ngue yɛ Zoova yo mannin Zezi i-ɔ?

⁸ Zezi si kɛ i Si yɛ ɔ yili i-ɔ. Yɛ sɛ i Si sɔ’n nunman lɛ’n, ɔ kwlá kaman nguan nun. I sɔ’n ti’n ɔ seli kɛ: “Siɛ’n ti’n n wo nguan nun.” (Zan 6:57) Zezi lafili i Si su tankaan kpa. Zoova kusu mɛnnin i ninnge nga i sa miannin be wun’n. Sanngɛ ng’ɔ ti cinnjin kpa’n, yɛle kɛ Zoova ukɛli i maan ɔ kwla suli i titi.​—Mat. 4:4.

9. ?Wafa sɛ yɛ Zoova yili i nglo kɛ ɔ ti Zezi i Si naan ɔ klo i-ɔ?

⁹ Kɛ siɛ kpa kun sa’n, Zoova yoli maan Zezi wunnin i wlɛ kɛ ɔ suɛn i bo sa kwlaa nun. (Mat. 26:53; Zan 8:16) Zoova w’a sasaman Zezi naan sa kekle’m be to fuɛn i. Sanngɛ kɛ sa’m be tɔli i su’n, ɔ ukɛli i naan w’a kwla jran kekle. Zezi si kɛ sa kwlaa nga be o i su’n, be su kaman lɛ sa trilili. (Ebr. 12:2) Zoova yili i nglo kɛ ɔ klo Zezi. Yɛle kɛ ɔ sieli i su tieli i srɛlɛ mun, ɔ mɛnnin i ninnge nga i sa mian be wun’n, ɔ kleli i like,  kpɛkun ɔ suɛnnin i bo. (Zan 5:20; 8:28) Andɛ kusu’n, e Si m’ɔ o ɲanmiɛn su lɔ’n, ɔ nian e lika sɔ wie. Maan e fa e ɲin e sie i wafa ng’ɔ yo sɔ’n i su.

10. ?Kɛ nga Jue Mun 66:19, 20 fa kan’n sa’n, wafa sɛ yɛ Zoova yi i nglo kɛ ɔ klo e-ɔ?

¹⁰ Zoova tie e srɛlɛ mun. (An kanngan Jue Mun 66:19, 20 nun.) Aliɛ ba kun nun’n, Zoova w’a kleman kpɛ nɲɛ ng’ɔ fata kɛ e srɛ i’n. Sanngɛ ɔ wla e fanngan kɛ e srɛ i kpɛ sunman. (1 Tes. 5:17) Blɛ kwlaa nga e klo’n, ɔ nin lika kwlaa nga e o lɛ’n, e kwla srɛ Zoova. Zoova seman kɛ ɔ leman blɛ tieman e srɛlɛ’n. Sanngɛ ɔ sie i su tie e srɛlɛ’n blɛ kwlaa nun. Kɛ e wun i wlɛ kɛ Zoova tie e srɛlɛ’n, e klo i kpa ekun. Cɛn kun’n, jue tofuɛ kun seli kɛ: “N klo Anannganman, afin ɔ ti min aniɛn’n, ɔ ti srɛwa tantrantan nga n srɛ’n.”​—Jue. 116:1.

11. ?Wafa sɛ yɛ Zoova tɛ e srɛlɛ’m be su-ɔ?

¹¹ Kɛ e srɛ e Si Ɲanmiɛn’n ɔ tie, kpɛkun ɔ tɛ e su wie. Akoto Zan seli kɛ: “Srɛlɛ kwlaa nga e srɛ i m’ɔ ti i klun su’n, ɔ sie i su tie.” (1 Zan 5:14, 15) Sanngɛ ɔ ju wie’n, Zoova tɛman e srɛlɛ’m be su kɛ nga e bɔbɔ e fa sunnzun sa. Afin ɔ si like ng’ɔ ti kpa man e’n. I sɔ’n ti’n, ɔ ju wie’n like nga e srɛ i’n, ɔ fa manman e annzɛ ɔ kunndɛ kɛ e minndɛ kan naan y’a ɲan like sɔ’n.​—2 Kor. 12:7-9.

12-13. ?Wafa sɛ yɛ e Si m’ɔ o ɲanmiɛn su lɔ’n yi i nglo kɛ ɔ nian e lika-ɔ?

¹² Zoova nian e lika. Like nga Zoova se siɛ’m be kɛ be yo’n, i bɔbɔ di su wie. (1 Tim. 5:8) Yɛle kɛ ɔ fa ninnge nga i mma’m be sa mian be wun’n man be. Ɔ kunndɛman kɛ e koko aliɛ, nin tralɛ, ɔ nin lawlɛ be ti. (Mat. 6:32, 33; 7:11) Kɛ mɔ Zoova ti e Si m’ɔ klo e’n ti’n, ɔ fali ajalɛ wie mun naan y’a kwla ɲan ninnge kwlaa nga e sa wá mían be wun e ɲrun lɔ’n.

¹³ Zoova fa ninnge kwlaa ng’ɔ fata kɛ e ɲan be naan y’a kwla su i kpa titi’n man e. I nuan Ndɛ’n nun’n, ɔ kannin sran wafa ng’ɔ ti’n, nin like ng’ɔ kunndɛ kɛ ninnge ng’ɔ yili be’n be yo’n, nin like nga ti yɛ ɔ yili e’n, ɔ nin sa nga bé wá jú e ɲrun lɔ’n, be ndɛ kleli e. Asa ekun’n, ɔ sinnin e osufuɛ wie annzɛ sran uflɛ lika yoli maan e sili i. Kpɛkun ɔ sin asɔnun kpɛnngbɛn mun nin aniaan nga b’a tin i sulɛ nun’n, be lika uka e wie. Asa kusu’n, aɲia’m be bo’n, ɔ kle e like. Zoova yo ninnge kwlaa sɔ mun naan e si kɛ ɔ ti e Si naan e ndɛ lo i dan.​—Jue. 32:8.

14. (1) ?Ngue ti yɛ Zoova kle e like-ɔ? (2) ?Wafa sɛ yɛ ɔ yo i sɔ-ɔ?

¹⁴ Zoova kle e like. E liɛ’n e timan kɛ Zezi sa. Afin fɔ o e nun. Ɔ maan ɔ ju wie’n, e like klelɛ nun’n sɛ ɔ nin i fata’n e Si Ɲanmiɛn tu e fɔ. I nuan Ndɛ’n se kɛ: “Sran nga Zoova klo i’n, ɔ tu i fɔ.” (Ebr. 12:6, 7) Ninnge nga Zoova fa tu e fɔ’n be sɔnnin. I wie yɛle Biblu’n nin e aɲia mun. Wie liɛ’n kɛ e kanngan Biblu’n nun’n e wun ndɛ wie annzɛ kɛ e kɔ aɲia’m be bo’n e ti ndɛ wie m’ɔ yo maan e kaci e akunndan’n nin e ayeliɛ’n. Asa ekun’n, ɔ sin asɔnun kpɛnngbɛn’m be lika tu e fɔ wie. Kannzɛ wafa nga Zoova tu e fɔ’n ɔ ti fanunfanun’n, sanngɛ nán e wla fi su kɛ klolɛ mɔ Zoova klo e’n, i ti yɛ ɔ yo sɔ-ɔ.​—Zer. 30:11.

15. ?Ngue nun yɛ Zoova sasa e-ɔ?

¹⁵ Kɛ sa’m be tɔ e su’n, Zoova suan e bo. Kɛ nga siɛ kpa kun fa suɛn i mma’m be bo blɛ kekle nun sa’n, e Si m’ɔ o ɲanmiɛn su lɔ’n suan e bo blɛ kekle nun wie. Ɔ fɛ i wawɛ’n sasa e ninnge nga be kwla yo maan e nin i e afiɛn saci’n, be lika. (Lik. 11:13) Kpɛkun kɛ e sa sin bubu e’n, ɔ suan e bo. I wie yɛle kɛ ɔ yo maan e fa e ɲin e sie i ninnge nga é wá ɲán be e ɲrun lɔ’n, be su. I sɔ’n yo maan e ɲan wunmiɛn e jran e su sa’m be ɲrun kekle. Maan e fa e ɲin e sie  i ndɛ nga su: Kannzɛ sa nga be tɔ e su’n be ti kekle sɛ’n, sanngɛ e Si Ɲanmiɛn ta e nda kɛ ɔ́ yó maan be kwlaa bé wíe. Asa ekun’n, sa nga be o e su andɛ’n, be su kaman lɛ sa trilili. Sanngɛ ninnge nga Zoova maan é wá ɲán be’n, be liɛ’n bé ká lɛ tititi.​—2 Kor. 4:16-18.

16. ?Kɛ Adan yoli ɲin kekle i Si Ɲanmiɛn su’n, ngue sa yɛ ɔ juli-ɔ?

¹⁶ Kɛ Adan yoli ɲin kekle’n, like nga Zoova yoli’n ɔ yi i nglo kɛ ɔ klo e. Afin kɛ Adan yoli ɲin kekle i Si Ɲanmiɛn su’n, sɛ é kwlá sé’n, ɔ ti kɛ w’a tu Zoova i awlo’n nun sa. Ɔ maan i bɔbɔ nin i mma ng’ɔ́ wá wú be’n, be su yoman Zoova i awlo’n nunfuɛ kun. (Rɔm. 5:12; 7:14) Sanngɛ Zoova w’a yaciman Adan i mma’m be lɛ sa ngbɛn, ɔ yoli like kun fa tili be wun ɲanman nun.

17. ?Kɛ Adan yoli sa tɛ’n, ngue yɛ Zoova ka lɛ yoli-ɔ?

¹⁷ Zoova tuli Adan i fɔ. Sanngɛ ɔ tali nda kɛ ɔ́ úka Adan i mma mun. Yɛle kɛ, kɛ Adan yoli sa tɛ’n, Zoova ka lɛ fali ajalɛ naan Adan i mma kwlaa nga bé ɲin wá yí i’n, b’a kwla kaci i awlo nun sran ekun. (Bob. 3:15; Rɔm. 8:20, 21) Kɛ ɔ ko yo naan i sɔ liɛ’n w’a yo ye’n, Zoova fɛli i Wa Zezi fa yili e ti tɛ. Kɛ ɔ yoli sɔ’n, ɔ yili i nglo weiin kɛ ɔ klo e dan.​—Zan 3:16.

18. ?Kannzɛ bɔbɔ sa wie ti e nin Zoova e afiɛn sacili’n, sanngɛ ngue yɛ ɔ kunndɛ kɛ e yo-ɔ?

¹⁸ Kannzɛ bɔbɔ fɔ o e nun’n, sanngɛ Zoova kunndɛ kɛ e kaci i awlo’n nun sran. Ɔ bumɛn i kɛ e ti i ti su trɔ. Ɔ ju wie’n, e nun wie’m be yo sa tɛ, annzɛ be yaci jasin fɛ’n i bolɛ annzɛ be tu be asɔnun’n nun. Ɔ nin i sɔ ngba’n Zoova lafi su kɛ bé sá be sin i wun ekun. Wafa nga Zoova klo i mma mun’n, i ɲin fite ba ng’ɔ yoli i wun wanzo’n i su ɲanndra nga Zezi buli’n nun.  (Lik. 15:11-32) Ɲanndra sɔ’n nun’n, siɛ’n lafili su kpa kɛ i wa’n sɛ́ i sin awlo cɛn kun. Ɔ maan kɛ ba’n sɛli i sin sakpa’n, i si sɔli i nun klanman. Ndɛ sɔ’n kle kɛ sɛ sa wie ti e nin Zoova e afiɛn sacili’n, nán maan e sa sin bubu e. Afin sɛ sa sɔ’n yo e nsisɔ naan e kaci e sa, kpɛkun e sa e sin Zoova wun’n, e kwla lafi su kɛ e Si Ɲanmiɛn m’ɔ klo e’n, ɔ́ sɔ́ e nun klanman.

19. ?Wafa sɛ yɛ Zoova wá síesíe sa kwlaa nga Adan i sa tɛ m’ɔ yoli’n kpɛli be ba’n niɔn?

¹⁹ E Si Ɲanmiɛn wá síesíe sa kwlaa nga Adan i sa tɛ m’ɔ yoli’n kpɛli be ba’n. Kɛ Adan yoli ɲin kekle’n, Zoova fali ajalɛ kɛ ɔ́ kpá sran 144.000 naan be nin i Wa Zezi be ko di famiɛn nin Ɲanmiɛn ɲrun jranfuɛ junman ɲanmiɛn su lɔ. Mɛn klanman nun’n, Zezi nin be nga be nin i bé dí famiɛn’n, bé wá yó maan fɔ su tranman be nga be ɲin yili Zoova’n be nun kun. Kpɛkun kɛ be ko sa sran mun ko nian’n, be nga bé wá sú Zoova lele bé guɛ́ i ti nin i bo’n, ɔ́ mán be nguan m’ɔ leman awieliɛ. Blɛ sɔ’n nun’n, e Si Ɲanmiɛn i klun wá jɔ́ i mma’m be wun dan. Afin be kwlaa nga bé wá trán asiɛ’n su wa’n, bé yó sran kpa yɛ fɔ su tranman be nun kun. Nanwlɛ, blɛ sɔ’n wá yó aklunjuɛ dilɛ blɛ dan.

20. (1) ?Wafa sɛ yɛ Zoova yi i nglo kɛ ɔ klo e-ɔ? (2) ?Ngue yɛ é wá kɛ́n i ndɛ like suanlɛ nga i sin liɛ’n nun-ɔn?

²⁰ Sa sunman kle kɛ Zoova klo e dan. Asa ekun’n, ɔ ti siɛ kun m’ɔ leman wunsu-ɔ. Kɛ e srɛ i’n ɔ tie yɛ ɔ fa ninnge nga e sa mian be wun naan y’a kwla tran nguan nun’n, ɔ nin ninnge ng’ɔ fata kɛ e ɲan be naan y’a kwla su i’n, man e. Ɔ kle e like yɛ ɔ suan e bo blɛ kekle nun. I dunman nun’n, e le like kpa kun mɔ e kwla fa e wla e gua su-ɔ. Nanwlɛ, kɛ e si kɛ e Si Ɲanmiɛn klo e naan ɔ nian e lika’n, ɔ yo e fɛ dan. Like suanlɛ nga i sin liɛ’n nun’n, é wá kán wafa nga e kusu e kwla yi i nglo kɛ e klo Zoova wie’n, i ndɛ.