1. Aha do na maningon ibahen sasada halak anggo sihol pajumpah pakon raja i Persia?

BAYANGKON ma hira-hira 2.500 tahun na salpu ham manggoluh i Persia. Sihol do ham patugahkon sada parsoalan hubani raja i nagori ai. Halani ai, maningon laho ma ham hu kota Susan. Tapi paima laho ham hujai, maningon do lobei ipatugah ham anggo ham sihol pajumpah pakon raja ai. Anggo lang, iuhum matei ma holi ham.​—Est. 4:11.

2. Sonaha pangahapta halani boi dohor bani Jahowa?

² Tontu martarima kasih do hita halani Jahowa lang songon raja Persia ai. Daoh do gogohan Jahowa marimbangkon raja-raja i dunia on. Tapi, sadihari pe boi do hita marsahap hu Bani. Umpamani, hassi pe Jahowa ai Panompa, Pargogoh Na So Tarimbang, ampa Na Tang Sitimbulan, tapi marosuh do Ia anggo hita mandilo-Si “Bapa”. (Mat. 6:9) Tontu malas tumang do uhurta halani Jahowa sihol ase hita dohor hu Bani.

3. Mase hita boi mandilo Jahowa ai “Bapa”, janah aha ma na laho iulas hita?

³ Hita boi mandilo Jahowa ai “Bapa” halani Ia do na mambere hagoluhan hubanta. (Ps. 36:10) Halani Ia Bapanta, maningon unduk ma hita hu Bani. Sai ipasu-pasu Ia do hagoluhanta anggo ra hita mangkorjahon harosuh-Ni. (Heb. 12:9) Anjaha bani ari simagira, dapot hita ma hagoluhan sadokah ni dokahni i tanoh on atap pe i surga. Bani artikel on, ulas hita ma sonaha Jahowa patuduhkon anggo Ia Bapa na parholong, janah mase pos uhurta seng ongga tadingkonon-Ni hita. Tapi paima ai, ulas hita ma lobei mase holong tumang uhur ni Jahowa hubanta janah sihol mangurupi hita.

4. Mase dong halak na payah mambayangkon Jahowa ai songon Bapa?

⁴ Ai payah do iahap ham mambayangkon Jahowa ai songon Bapa? Dong na mangahap etek tumang do dirini anggo ibandingkon pakon Jahowa. Lang porsaya ia anggo Naibata ai parduli hu bani. Tapi, lang marosuh Naibata anggo sonai pangahapta. Ibere Ia do hagoluhan hubanta janah sihol do Ia ase hita marhasoman pakon-Si. Dobkonsi ipatugah apostel Paulus pasal ai hubani halak Aten, nini do, “Seng daoh [Jahowa] humbani ganup hita.” (Lah. 17:24-29) Jadi, Jahowa sihol ase hita marsahap hu Bani dos songon dakdanak na marsahap hubani namatorasni.

5. Aha ma na boi iparlajari hita humbani pangalaman ni sada hasomanta?

⁵ Tapi dong piga-piga halak na lang boi mambayangkon Jahowa ai songon Bapa halani bapani sandiri lang mangkaholongisi. Pardiateihon ma na ihatahon sada hasomanta naboru, “Kasar tumang do bapangku. Jadi sanggah parlobei sahali ahu marlajar Bibel, payah do huahap laho dohor bani Bapa Jahowa. Tapi gabe mubah ma pangahapku ai dobkonsi hutanda Ia.” Anggo ongga do homa sonai pangahap ni ham, ulang ma maretek ni uhur. Dokah-dokah, gabe boi ma iahap ham anggo Jahowa ai Bapa na sibujuran.

6. Domu bani Mateus 11:27, sonaha Jahowa mangurupi hita ase boi mambayangkon Ia songon Bapa na parholong?

⁶ Marhitei parsahap ampa parlahou ni Jesus na isurat ibagas Bibel, iurupi Jahowa do hita ase boi mambayangkon Ia songon Bapa. (Basa Mateus 11:27.) Pas tumang do itiru Jesus paruhuran ni Jahowa. Halani ai ma ase ihatahon ia, “Na mangidah ahu, na mangidah Bapa in do.” (Joh. 14:9) Gati do idilo Jesus Jahowa ai Bapa. Anjaha bani ompat Injil dong hira-hira 165 hali idilo ia sonai. Mase ibahen Jesus sonai? Ia sihol ase porsaya halak anggo Jahowa ai Bapa na parholong.​—Joh. 17:25, 26.

7. Aha do na boi iparlajari hita humbani cara ni Jahowa patuduhkon holong-Ni hubani Jesus?

⁷ Paruhurhon ma aha na boi iparlajari hita humbani cara ni Jahowa patuduhkon anggo Ia Bapa na parholong hubani Jesus, anak-Ni ai. Tongtong do itangar Jahowa tonggoni. Tapi lang pitah ai, ibalosi do homa. (Joh. 11:41, 42) Atap sonaha pe sitaronon ni Jesus, boi do iahapkon ia anggo Bapani tongtong mangkaholongi janah ra mangurupisi.​—Luk. 22:42, 43.

8. Aha do na ipasirsir Jahowa bani Jesus?

⁸ Ongga do ihatahon Jesus sonon, “Gabe manggoluh ahu marhitei Bapa in.” (Joh. 6:57) Jadi, Jesus patuduhkon Jahowa do na mambere hagoluhan bani. Pos do uhurni ipasirsir Bapani do haporluanni siganup ari. Janah na sipontingan, iurupi Jahowa do ia ase boi totap setia.​—Mat. 4:4.

9. Sonaha Jahowa patuduhkon holong-Ni bani Jesus?

⁹ Halani Jahowa ai Bapa na parholong, ipatuduh Ia ma bani Jesus anggo Ia tongtong mangurupisi. (Mat. 26:53; Joh. 8:16) Hassi pe lang ipadaoh Jahowa sitaronon ni Jesus, tapi iurupi do Jesus ase boi martahan. Jesus pe, pos do uhurni tongkin dassa sitarononni ai. (Heb. 12:2) Songon na dob iulas hita, ipatuduh Jahowa do  anggo Ia mangkaholongi Jesus marhitei manangar, mansarihon, mangajari, ampa mangurupi Anak-Ni. (Joh. 5:20; 8:28) Ulas hita ma sonaha Bapa Jahowa mambahen na sisonai hubanta.

10. Domu bani Psalmen 66:19, 20, sonaha Jahowa patuduhkon holong-Ni hubanta?

¹⁰ Jahowa manangihon tonggonta. (Basa Psalmen 66:19, 20.) Lang ibatasi Ia piga hali hita martonggo, tapi iojur do hita ase tongtong martonggo. (1 Tes. 5:17) Lang soal sadihari atap ija pe hita, boi do hita martonggo hubani Naibata. Sai iparuhurhon do tonggonta. Sanggah ibotoh hita itangihon Jahowa tonggonta, lambin holong ma hita hu Bani. Janah dos ma pangahapta songon panurat ni Psalmen na mangkatahon, “Holong do uhur hubani Jahowa, halani itangihon do sorangku.”​—Ps. 116:1.

11. Sonaha Jahowa mambalosi tonggonta?

¹¹ Lang pitah itangihon Jahowa tonggonta, tapi ibalosi do homa. Apostel Johannes mangkatahon, “Anggo ipindo hita atap aha domu hubani rosuh ni uhur-Ni, itangihon do hita.” (1 Joh. 5:14, 15) Tontu lang maningon ibalosi Jahowa tonggonta domu bani harosuhta. Ia do na mambotoh na sidearan hubanta. Jadi, sipata ra do lang ibalosi tonggonta, atap sipata rosuh Ia ase sabar hita paimahon.​—2 Kor. 12:7-9.

12-13. Sonaha Jahowa mansarihon hita?

¹² Jahowa mansarihon haporluanta. Ihorjahon Ia do tugas na iparentahkon Ia bani ganup bapa. (1 Tim. 5:8) Ipasirsir Ia do ganup haporluan ni anak-Ni. Lang ra Ia haru uhurta pasal sipanganon, pakeian, atap pe iananta tading. (Mat. 6:32, 33; 7:11) Halani Ia Bapa na parholong, isarihon do homa ganup haporluanta bani ari simagira.

¹³ Na sipontingan, ipasirsir Jahowa do aha na ihaporluhon hita ase lambin orot hu Bani. Marhitei Bibel, ipatugah Ia do sonaha paruhuran-Ni, aha do sura-sura-Ni bani ganup tompaon-Ni, mase Ia manompa hita, ampa pasal ari simagira. Marhitei namatorasta atap halak na mangajari hita marlajar Bibel, iurupi do hita ase boi mananda-Si. Marhitei sintua atap sanina botou, tongtong do iurupi hita laho patoguhkon parhasomananta pakon-Si. I partumpuan, ipodahi do homa hita pakon sanina botou. Jadi, ganupan ai patuduhkon isarihon Jahowa do hita.​—Ps. 32:8.

14. Mase Jahowa mangajari hita, janah sonaha carani?

¹⁴ Jahowa mangajari hita. Sempurna do Jesus, tapi anggo hita lang. Jadi sipata, ra do Jahowa mangajari hita marhitei pinsang-pinsang. Bibel mangkatahon, “Iajar [Jahowa] in do na hinaholongan ni uhur-Ni.” (Heb. 12:6, 7) Bahat do cara ni Jahowa laho mangajari hita. Umpamani, ra do aha na ibasa hita ibagas Bibel atap pe itangar hita i partumpuan, pasingatkon hita anggo hita porlu mambahen hamubahon. Atap, ra do homa sintua mambere podah hubanta. Lang soal sonaha carani, halani holong ni uhur-Ni do ase ipinsang Jahowa hita.​—Jer. 30:11.

15. Sonaha Jahowa mangurupi hita?

¹⁵ Jahowa mangurupi hita ase boi martahan. Songon bapa na parholong na mangurupi niombahni sanggah sunsah,  sonai ma homa Jahowa mangurupi hita sanggah marsitaronon. Marhitei tonduy na pansing, iurupi do hita ase ulang maseda parhasomananta pakon-Si. (Luk. 11:13) Iurupi do homa hita sanggah maretek ni uhur. Umpamani, ibere do banta pangarapan na jenges tumang. Marhitei pangarapan ai, gabe iurupi ma hita ase boi martahan sanggah ibagas sitaronon. Dingat ma sasapon-Ni do holi ganup na mambahen hita marsitaronon. Jadi tongkin dassa sitaronon on. Tapi anggo pasu-pasu ni Jahowa, tongtong do ai ronsi sadokah ni dokahni.​—2 Kor. 4:16-18.

16. Sonaha ma ujungni halani si Adam manlawan dompak Naibata?

¹⁶ Taridah do holong tumang uhur ni Jahowa hubanta humbani aha na ibahen Ia sanggah manlawan si Adam hu Bani. Dobkonsi mardousa, si Adam lang be ihira gabe kaluarga ni Naibata, sonai homa ginomparni. (Rom 5:12; 7:14) Tapi, dong na ibahen Jahowa laho mangurupi ganup ginompar ni si Adam.

17. Dobkonsi mardousa si Adam, aha do na ibahen Jahowa?

¹⁷ Iuhum Jahowa do si Adam. Tapi marjanji do Ia laho mangurupi ginompar ni si Adam ase boi mulak use gabe kaluargani. (1 Mus. 3:15; Rom 8:20, 21) On boi saud marhitei tobusan ni Jesus, anak na hinaholongan-Ni in. Ibere Ia do Jesus laho mangkopkop hita. On patuduhkon holong tumang do uhur-Ni hubanta.​—Joh. 3:16.

18. Mase pos uhurta anggo Jahowa sihol ase hita gabe anak-Ni hassi pe sipata mandaoh hita hun Bani?

¹⁸ Hassi pe hita lang gokan dear, tapi sihol do Jahowa ase hita gabe bagian humbani kaluarga-Ni. Lang ongga pangahapni  anggo hita lang be tarurupi. Hassi pe sipata borit uhur-Ni ibahen hita, atap mandaoh hita hun Bani, tapi sai mangarap do Ia ase mulak use hita. Igambarhon Jesus do sonaha banggal ni holong ni Bapani in hubani ganup anak-Ni marhitei limbaga pasal anak na magou. (Luk. 15:11-32) Bani limbaga ai, sai mangarap do bapani ase mulak anakni. Sanggah mulak anak-Ni, mintor podas do ia mangalo-alosi. Jadi anggo mandaoh hita tapi ujungni ra mambahen hamubahon, pos do uhurta anggo Bapanta na parholong sirsir manjalo hita.

19. Sonaha Jahowa padearhon hasedaon na ibahen si Adam?

¹⁹ Padearon ni Bapa in do holi ganup hasedaon na ibahen si Adam. Dob mardousa si Adam, ipilih Naibata ma 144.000 halak hun tanoh on laho mamarentah gabe raja pakon Malim i surga rap pakon Jesus. Holi i dunia na baru, iurupi sidea ma ganup jolma na ra manangihon Naibata ase boi gabe manisia na sempurna. Dobkonsi ujian na parpudi, bereon ni Jahowa ma hagoluhan na sadokah ni dokahni bani sidea na i tanoh on. Malas tumang uhur ni Jahowa mangidah tanoh on igoki anak-anak-Ni na sempurna. Tontu marmalas ni uhur ma ganup halak ijai.

20. Sonaha Jahowa patuduhkon holong tumang uhur-Ni hubanta, janah aha ma na laho iulas hita bani artikel na mangihut?

²⁰ Domma ipatuduh Jahowa holong tumang do uhur-Ni hubanta. Ia do Bapa na sidearan. Itangar Ia do tonggonta janah ipasirsir do haporluanta siganup ari. Iurupi do homa hita ase totap marhasoman pakon-Si. Anjaha iajari do homa hita. Ibere do hubanta pasu-pasu bani ari simagira. Tontu malas tumang uhurta mambotoh holong do Bapanta in hubanta anjaha isarihon do hita. Bani artikel na mangihut, iulas hita ma sonaha hita patuduhkon anggo hita mangkargai holong-Ni in.