1. Cosa necesita hace el un persona si quierre le man cuento con el rey de Persia?

IMAGINA que ya vivi tu na Persia maga 2,500 año ya el ya pasa. Quierre tu man cuento con el rey acerca na un cosa, poreso ya anda tu na ciudad de Susan, donde ta queda el rey. Pero, gendeh gayot tu anda con el rey si nuay contigo dale permiso. Cay si hace tu se, puede contigo mata!​—Est. 4:11.

2. Cosa quierre si Jehova que sinti kita si man cuento con ele?

² Ta rindi gayot kita gracias cay si Jehova gendeh igual con ese rey de Persia! Mas alto si Jehova si compara con maskin quien rey. Pero maskin pa ansina, puede kita man cuento con ele maskin cosa hora. Quierre le que gendeh kita man alang-alang man cuento con ele. Por ejemplo, maskin pa si Jehova tiene titulo igual como Creador, Todopoderoso y Soberano Señor, quierre le que llama kita con ele como el diaton “Tata.” (Mat. 6:9) Alegre gayot kita cay quierre si Jehova que tiene kita ansina de cerca relacion con ele.

3. Porque kita puede llama con Jehova el diaton “Tata” y cosa discuti na este articulo?

³ Justo lang que llama kita con Jehova el diaton “Tata” cay ele el Tuburan del diaton vida. (Sal. 36:9) Ciendo ele el diaton Tata, tiene kita responsibilidad que obedece con ele. Si hace kita si cosa le ta manda kanaton, hay ricibi kita manada bendicion. (Heb. 12:9) Incluido aqui el vida hasta para cuando, na cielo man o aqui na tierra. Ta beneficia ya tambien kita ahora pa lang. Este articulo hay discuti si paquemodo si Jehova ta dale mira ahora que un amable Tata le y porque kita puede asigura que  gendeh gayot le deja kanaton na futuro. Pero, considera kita una si porque kita puede asigura que el diaton Tata na cielo ta ama gayot kanaton y quierre le ayuda kanaton.

4. Porque el otro tan dificil mira con Jehova como el diila Tata?

⁴ Tan dificil ba tu mira con Dios como el de tuyu Tata? El cuanto ta sinti que bien diutay sila y nuay valor si compara con Jehova. Gendeh sila ta creé que interesao el Dios Todopoderoso con el cada uno kanila. Pero, no quierre el diaton amable Tata que sinti kita igual ansina. Ya dale le kanaton vida y quierre le que tiene kita relacion con ele. Despues menciona con ese verdad, si apostol Pablo ya explica con el maga gente na Atenas que si Jehova “gendeh . . . lejos canaton.” (Act. 17:24-29) Quierre el Dios que el cada uno kanaton hay atraca con ele igual si paquemodo el un anak ta atraca con el de suyu amable mayores.

5. Cosa kita puede aprende na experiencia del un hermana?

⁵ El otro posible tan dificil mira con Jehova como el diila Tata cay el diila mismo tata nuay kanila dale mira amor y cariño. Considera con el cosa ya habla el un hermana. “Pirmi conmigo ta ultraja el de mio tata,” ya habla le. “Cuando ya principia yo estudia con el Biblia, dificil para conmigo que queda cerca con el diaton Tata na cielo. Pero cuando ya conoce yo con Jehova, ya cambia se todo.” Ta sinti ba tambien tu igual ansina? Puede tu asigura que puede tambien tu mira con Jehova como el de con todo buen Tata.

6. Asegun na Mateo 11:27, cosa el un manera que ta ayuda kanaton si Jehova para mira con ele como el diaton amable Tata?

⁶ El un manera que ta ayuda kanaton si Jehova para mira con ele como el diaton amable Tata amo por medio na cosa ya habla y ya hace si Jesus que escribido na Biblia. (Le con el Mateo 11:27.) Ya puede gayot imita si Jesus con el personalidad del de suyu Tata, poreso ya puede le habla: “Quien ya mira conmigo, ya mira ya tamen con el Tata.” (Juan 14:9) Manada beses ya menciona si Jesus con el papel de Jehova como un Tata. Na cuatro Evangelio, ya usa si Jesus con el palabra “Tata” maga 165 beses que ta refiri con Jehova. Porque si Jesus mucho beses tan cuento acerca con Jehova? Un razon amo para queda convincido el maga gente que si Jehova amo un amable Tata.​—Juan 17:25, 26.

7. Cosa kita puede aprende con Jehova na manera que ya trata le con el de suyu Anak?

⁷ Considera si cosa kita puede aprende con Jehova na manera que ya trata le con el de suyu Anak, si Jesus. Ta oi pirmi si Jehova con el maga rezo de Jesus. Y nuay lang le basta oi con ese maga rezo sino ya contesta le con ese. (Juan 11:41, 42) Maskin cosa probanza pa ya experiencia si Jesus, ya sinti le con el amor y suporta del de suyu Tata.​—Luc. 22:42, 43.

8. Na cosa maga manera si Jehova ya dale el necesidad de Jesus?

⁸ Sabe si Jesus que el de suyu Tata el ya dale y ya sustene con el de suyu vida. Poreso, ya habla le: “El Tata . . . amo el tuburan de vida y, por medio disuyo, ta vivi yo.” (Juan 6:57) Si Jesus ya confia con el de suyu Tata y ya dale si Jehova el de suyu fisical necesidad. Y mas importante, ya dale si Jehova el espiritual necesidad de Jesus.​—Mat. 4:4.

9. Na cosa manera ya dale mira si Jehova que un amable Tata le con Jesus?

⁹ Como un amable Tata, ya asigura si Jehova que sabe si Jesus que ta suporta con ele el de suyu Tata. (Mat. 26:53; Juan 8:29) Maskin pa nuay protege si Jehova con Jesus na todo peligro, ya ayuda Le para puede aguanta si Jesus  na maga probanza. Sabe si Jesus que temporario lang el peligro y dolor que hay experiencia le. (Heb. 12:2) Ya dale mira si Jehova que ta ama le con Jesus cuando ya oi le con ele, ya dale el de suyu necesidad, yan train y ya suporta con ele. (Juan 5:20; 8:28) Mira kita ahora si paquemodo el diaton Tata na cielo ta ayuda kanaton na ansina manera.

10. Asegun na Salmo 66:19, 20, paquemodo ta dale mira si Jehova que ta ama le kanaton?

¹⁰ Ta oi si Jehova con el diaton maga rezo. (Le con el Salmo 66:19, 20.) No quierre le que pone kita limitacion na diaton rezo, sino quierre le que reza kita pirmi con ele. (1 Tes. 5:17) Puede kita reza con Dios maskin cosa hora y maskin onde pa kita. Pirmi le tiene tiempo para oi kanaton. Si puede kita realiza que ta oi si Jehova con el diaton maga rezo, mas ama kita con ele. “Ta ama yo con Jehova,” ya habla el salmista, “cay ta oi le con el de mio voz.”​—Sal. 116:1.

11. Paquemodo ta contesta si Jehova con el diaton maga rezo?

¹¹ El diaton Tata gendeh lang ta oi con el diaton maga rezo, sino ta contesta tambien con ese. Si apostol Juan ta asigura kanaton: “Maskin cosa ta pidi kita con [Dios] comforme na su querer, Ele ay oi canaton.” (1 Juan 5:14, 15) Siempre, posible que gendeh contesta si Jehova con el diaton maga rezo na manera que ta expecta kita. Mas sabe le si cosa el bueno para kanaton. Poreso tiene vez, gendeh le ta dale el cosa kita ta pidi o quierre le que espera kita.​—2 Cor. 12:7-9.

12-13. Na cosa maga manera ta dale si Jehova el diaton maga necesidad?

¹² Ta dale si Jehova el diaton maga necesidad. Ta hace le si cosa le ya manda con el todo tata. (1 Tim. 5:8) Ta dale le el material necesidad del de suyu maga anak. No quierre le que man lingasa kita acerca na diaton comida, camisa y casa. (Mat. 6:32, 33; 7:11) Como un amable mayores, ya asigura tambien si Jehova que dale le el diaton maga necesidad na futuro.

¹³ El mas importante, ta dale si Jehova el diaton espiritual necesidad. Por medio na de suyu Palabra, ya revela le con el verdad acerca con ele, de suyu proposito, si porque le ya crea kanaton y si cosa sucede na futuro. Ya usa le con el diaton maga mayores o con otro para enseña kanaton acerca con ele. Y ta continua kita ricibi ayuda estaba na maga amable anciano y otro mature hermano y hermana na congregacion. Mas pa, ta enseña kanaton si Jehova por medio na maga miting na congregacion, donde ta aprende kita junto na diaton espiritual familia. Na este maga manera y otro pa, ta dale mira si Jehova que interesao le con el cada uno kanaton como diaton Tata.​—Sal. 32:8.

14. Porque kanaton tan train si Jehova y paquemodo le se ta hace?

¹⁴ Tan train kanaton si Jehova. Gendeh igual con Jesus, maga imperfecto kita. Poreso, ta disciplina kanaton si Jehova como parte del diaton training. El de suyu Palabra ta hace acorda kanaton: “El Señor ta diciplina con aquellos con quien Le ta ama.” (Heb. 12:6, 7) Ta disciplina kanaton si Jehova na manada manera. Por ejemplo, tiene kita cosa puede le na de suyu Palabra o oi na maga miting que puede corecta con el diaton pensamiento o accion. O posible, el maga anciano el ayuda kanaton. Maskin paquemodo pa kanaton disciplina si Jehova, pirmi le este ta hace cay ta ama le kanaton.​—Jer. 30:11.

15. Na cosa maga manera ta ayuda kanaton si Jehova?

¹⁵ Ta suporta kanaton si Jehova na diaton probanza. Igual na un amable tata que ta suporta con el de suyu maga anak na tiempo de dificultad, el diaton Tata na cielo ta ayuda tambien  kanaton si tiene kita probanza. Ta usa le con el de suyu sagrao espiritu para protege kanaton na maga espiritual peligro. (Luc. 11:13) Ta ayuda tambien le kanaton si ta sinti kita luya o lingasa. Por ejemplo, ya dale le kanaton un bonito esperanza que puede ayuda kanaton si ta enfrenta kita maga dificultad. Pensa este: Maskin cosa pa sucede kanaton, el diaton amable Tata hay quita con el dolor y mal cosas que ya experiencia kita. Temporario lang el diaton maga probanza, pero el bendicion de Jehova hasta para cuando.​—2 Cor. 4:16-18.

16. Cosa ya sucede cuando ya desobedece si Adan con el de suyu amable Tata?

¹⁶ Puede kita mira que ta ama kanaton si Jehova na cosa le ya hace cuando ya tiene problema el de suyu familia na tierra. Cuando ya desobedece si Adan con el de suyu Tata, ele y el de suyu maga descendiente gendeh mas parte del familia de Jehova. (Roma 5:12; 7:14) Pero, tiene cosa ya hace si Jehova para ayuda.

17. Despues man rebelde si Adan, cosa dayun ya hace si Jehova?

¹⁷ Ya castiga si Jehova con Adan, pero ya dale le esperanza con el de suyu maga descendiente. Ya promete dayun si Jehova que el todo obediente gente hay queda otravez parte del de suyu familia. (Gen. 3:15; Roma 8:20, 21) Ya hace este posible si Jehova por medio na rescate del de suyu Anak, si Jesus. Cuando ya dale le con el de suyu Anak para kanaton, ya dale mira si Jehova que ta ama gayot le kanaton.​—Juan 3:16.

18. Porque kita puede asigura que quierre si Jehova que queda kita parte del de suyu familia, maskin pa yan lejos kita con ele?

¹⁸ Maskin pa imperfecto kita, quierre si Jehova que queda kita parte del de suyu familia y gendeh le ta pensa que pesades lang kita. Posible que puede kita hace sinti duele con ele o man lejos con ele por cuanto tiempo, pero ta  esperanza siempre si Jehova que bira kita con ele. Na istoria de Jesus acerca na un anak quien ya sale, ya dale le mira si paquemodo de hondo el amor de Jehova para na de suyu maga anak. (Luc. 15:11-32) El tata na ilustracion nuay gayot descanza esperanza que bira el de suyu anak. Cuando ya bira na casa el anak, bien alegre con ele ya ricibi el de suyu tata. Si yan lejos kita con Jehova pero ya arripinti na uliji, puede kita asigura que preparao y alegre el diaton amable Tata que ricibi otravez kanaton.

19. Paquemodo quita si Jehova con el todo mal efecto que ya causa si Adan?

¹⁹ El diaton Tata hay quita con el todo mal efecto que ya causa si Adan. Despues man rebelde si Adan, si Jehova ya decidi que iscuji 144,000 gente para sirvi como rey y sacerdote na cielo junto con el de suyu Anak. Si Jesus y aquellos quien junto rula con ele hay ayuda con el maga obediente gente para queda perfecto na nuevo mundo. Despues sila pasa con el ultimo probanza, el Dios hay dale kanila vida hasta para cuando. Llega ese tiempo, el diaton Tata alegre mira con el tierra que lleno del de suyu maga obediente anak hombre y mujer. Que bien bonito tiempo gayot se!

20. Na cosa maga manera ya dale mira si Jehova que ta ama gayot le kanaton y cosa kita discuti na siguiente articulo?

²⁰ Ya dale mira si Jehova que ta ama gayot le kanaton. Ele el de con todo buen Tata. Ta oi le con el diaton maga rezo y ta dale el diaton material y espiritual necesidad. Tan train y ta suporta le kanaton. Tiene tambien le bonito bendicion para kanaton na futuro. Alegre gayot kita cay sabe kita que ta ama y ta ayuda kanaton el diaton Tata! El siguiente articulo hay discuti maga manera que puede kita dale mira que ta aprecia kita con el de suyu amor.