1. Unsay kinahanglang buhaton sa usa kon gusto niyang makig-estorya sa hari sa Persia?

IMADYINA nga nabuhi ka sa Persia mga 2,500 ka tuig kanhi. Gusto nimong makig-estorya sa hari bahin sa usa ka butang, busa mibiyahe ka paingon sa siyudad sa Susan diin nagpuyo ang hari. Dili gyod ka mangahas sa pagduol sa hari kon wala ka niya hatagig permiso. Kay kon buhaton nâ nimo, posibleng patyon ka!​—Est. 4:11.

2. Unsay gusto ni Jehova nga atong bation bahin sa pagpakig-estorya kaniya?

² Mapasalamaton kaayo ta nga si Jehova dili pareho nianang Persianong hari! Si Jehova labaw kaayo kay kang bisan kinsang tawhanong magmamando, pero puwede tang makig-estorya niya bisan kanus-a. Gusto niya nga dili ta magpanuko sa pagduol kaniya. Pananglitan, bisag si Jehova may dungganong mga titulo sama sa Dakong Maglalalang, Labing Gamhanan, ug Soberanong Ginoo, gusto niyang makig-estorya ta niya gamit ang mabinationg pulong nga “Amahan.” (Mat. 6:9) Makapalipay gyod nga gusto ni Jehova nga mobati tang suod kaniya!

3. Nganong haom nga tawgon natong “Amahan” si Jehova, ug unsay hisgotan niining artikuloha?

³ Haom lang nga tawgon natong “Amahan” si Jehova kay siya ang Tuboran sa atong kinabuhi. (Sal. 36:9) Kay siya man ang atong Amahan, responsibilidad nato nga sundon siya. Kon atong buhaton ang iyang gipabuhat kanato, matagamtam nato ang nindot nga mga panalangin. (Heb. 12:9) Apil sa maong mga panalangin ang walay kataposang kinabuhi, sa langit man o sa yuta. Matagamtam sab nato ang mga kaayohan karon. Hisgotan niining artikuloha kon sa unsang paagi gipakita ni Jehova karon nga siya usa ka mahigugmaong Amahan ug kon nganong makaseguro ta nga dili gyod ta niya biyaan sa umaabot. Pero,  hisgotan una nato kon nganong makasalig ta nga ang atong langitnong Amahan nahigugma gyod nato ug gustong motabang kanato.

4. Nganong malisdan ang pipila sa paghunahuna kang Jehova ingong ilang Amahan?

⁴ Malisdan ka ba sa paghunahuna sa Diyos ingong imong Amahan? Ang uban mobati tingali nga ubos kaayo sila kon itandi kang Jehova ug dili sila importante kaniya. Magduhaduha sila nga ang Diyos nga Labing Gamhanan nagmahal kanila ingong indibiduwal. Pero, dili gusto sa atong mahigugmaong Amahan nga mobati tag ingon niana. Gihatagan ta niyag kinabuhi ug gusto niya nga masuod ta kaniya. Human isulti ni apostol Pablo kini nga kamatuoran, gipatin-aw niya sa iyang mga mamiminaw sa Atenas nga si Jehova “dili layo sa matag usa kanato.” (Buh. 17:24-29) Gusto sa Diyos nga makig-estorya ta niya sama sa usa ka bata nga makig-estorya gyod sa iyang mahigugmaon ug mapinanggaong ginikanan.

5. Unsay atong makat-onan sa eksperyensiya sa usa ka sister?

⁵ Ang uban malisdan sa paghunahuna kang Jehova ingong ilang Amahan kay wala kaayo o wala gyod sila pakitaig pagmahal sa ilang tawhanong amahan. Tagda ang giingon sa usa ka sister: “Sakit kaayong manulti ang akong amahan. Pagsugod nakog tuon sa Bibliya, nalisdan ko sa pagpakigsuod sa usa ka langitnong Amahan. Pero dihang nailhan nako si Jehova, nausab kanang tanan.” Mibati ba sab kag ingon niana? Kon mao, ayawg kadismayar. Sa ngadtongadto, bation sab nimo nga si Jehova ang kinamaayohang Amahan.

6. Base sa Mateo 11:27, unsa ang usa ka paagi nga gitabangan ta ni Jehova sa paghunahuna kaniya ingong atong mahigugmaong Amahan?

⁶ Ang usa ka paagi nga gitabangan ta ni Jehova sa paghunahuna kaniya ingong atong mahigugmaong Amahan mao ang pagparekord diha sa Bibliya sa mga gisulti ug gibuhat ni Jesus. (Basaha ang Mateo 11:27.) Perpekto kaayong gisundog ni Jesus ang personalidad sa iyang amahan nga siya nakaingon: “Kadtong nakakita kanako nakakita usab sa Amahan.” (Juan 14:9) Si Jesus sagad naghisgot kang Jehova ingong Amahan. Sa upat ka Ebanghelyo, halos 200 ka beses nga gitawag ni Jesus si Jehova ingong “Amahan.” Nganong pirmeng maghisgot si Jesus bahin kang Jehova? Ang usa ka rason maoy aron makombinsir ang mga tawo nga si Jehova usa ka mahigugmaong Amahan.​—Juan 17:25, 26.

7. Unsay atong makat-onan bahin kang Jehova sa iyang paagi sa pagtratar sa iyang Anak?

⁷ Konsideraha kon unsay atong makat-onan bahin kang Jehova sa iyang paagi sa pagtratar sa iyang Anak, si Jesus. Kanunayng namati si Jehova sa mga pag-ampo ni Jesus. Pero wala lang siya mamati sa mga pag-ampo ni Jesus; iya sab ning gitubag. (Juan 11:41, 42) Bisag unsang pagsulay ang giatubang ni Jesus, kanunay niyang gibati ang gugma ug pagsuportar sa iyang Amahan.​—Luc. 22:42, 43.

8. Sa unsang mga paagi gitagana ni Jehova ang panginahanglan ni Jesus?

⁸ Giila ni Jesus nga ang iyang amahan mao ang Tuboran ug Tigsustento sa iyang kinabuhi dihang siya miingon: “Ako nabuhi tungod sa Amahan.” (Juan 6:57) Si Jesus bug-os nga misalig sa iyang Amahan, ug si Jehova nagtagana sa iyang pisikal nga mga panginahanglan. Labaw sa tanan, giatiman ni Jehova si Jesus sa espirituwal.​—Mat. 4:4.

9. Giunsa pagpakita ni Jehova kang Jesus nga siya mahigugmaon ug mapinanggaon nga Amahan?

⁹ Ingong mahigugmaong Amahan, gipaneguro ni Jehova nga mahibalo si Jesus nga gisuportahan siya sa iyang Amahan. (Mat. 26:53; Juan 8:16) Bisan tuod wala panalipdi ni  Jehova si Jesus batok sa tanang kadaot, Iyang gitabangan siya nga makalahutay sa mga pagsulay. Nahibalo si Jesus nga ang bisan unsang kadaot nga iyang maagoman temporaryo lang. (Heb. 12:2) Gipakita ni Jehova nga iyang gimahal si Jesus pinaagi sa pagpaminaw kaniya, pagtagana sa iyang panginahanglan, pagbansay kaniya, ug pagsuportar kaniya. (Juan 5:20; 8:28) Atong tan-awon karon kon giunsa ta pag-atiman sa atong langitnong Amahan sa samang mga paagi.

10. Sumala sa Salmo 66:19, 20, giunsa pagpakita ni Jehova nga gimahal ta niya?

¹⁰ Si Jehova maminaw sa atong mga pag-ampo. (Basaha ang Salmo 66:19, 20.) Dili niya gusto nga limitahan nato ang atong mga pag-ampo; hinunoa giawhag ta niya nga mag-ampo kanunay. (1 Tes. 5:17) Makaampo ta sa atong Diyos bisan kanus-a ug bisan asa ta. Dili siya sobra ka puliki nga dili na makapaminaw kanato; hinunoa kanunay siyang mamati sa atong mga pag-ampo. Kon atong makita nga si Jehova maminaw sa atong mga pag-ampo, mas masuod ta kaniya. Ang salmista miingon: “Gihigugma nako si Jehova kay siya mamati sa akong tingog.”​—Sal. 116:1.

11. Sa unsang paagi tubagon ni Jehova ang atong mga pag-ampo?

¹¹ Ang atong Amahan dili lang maminaw sa atong mga pag-ampo kondili motubag pod niini. Si apostol Juan nagpasalig kanato: ‘Bisan unsay atong pangayoon uyon sa kabubut-on sa Diyos, maminaw siya nato.’ (1 Juan 5:14, 15) Siyempre, dili tingali tubagon ni Jehova ang atong mga pag-ampo sa paagi nga atong gidahom. Nahibalo siya kon unsay pinakamaayo para nato, busa usahay dili niya ihatag ang atong gihangyo o usahay kinahanglan pa tang maghulat.​—2 Cor. 12:7-9.

12-13. Sa unsang mga paagi ang atong langitnong Amahan nagtagana sa atong panginahanglan?

¹² Si Jehova nagtagana sa atong panginahanglan. Iyang gibuhat kon unsay iyang gisugo sa tanang amahan. (1 Tim. 5:8) Nagtagana siya sa materyal nga panginahanglan sa iyang mga anak. Dili niya gusto nga mabalaka ta bahin sa atong pagkaon, sinina, o puy-anan. (Mat. 6:32, 33; 7:11) Ingong mahigugmaon nga ginikanan, gipaneguro pa gani ni Jehova nga matagan-an ang tanan natong panginahanglan sa umaabot.

¹³ Labaw sa tanan, si Jehova nagtagana sa atong espirituwal nga panginahanglan. Pinaagi sa iyang Pulong, iyang gipadayag ang kamatuoran bahin kaniya, sa iyang katuyoan, sa kahulogan sa kinabuhi, ug sa umaabot. Gipakitaan ta niyag personal nga pagtagad dihang nagsugod ta pagkat-on sa kamatuoran, nga naggamit sa atong ginikanan o ubang igsoon aron tudloan ta bahin kaniya. Ug padayon ta niyang gitabangan pinaagi sa mahigugmaong mga ansiyano ug sa ubang hamtong nga mga igsoon. Dugang pa, gitudloan ta ni Jehova pinaagi sa atong mga tigom, diin makakat-on ta kauban sa atong espirituwal nga pamilya. Niini ug sa uban pang paagi, gipakita ni Jehova ang iyang inamahan nga pagmahal kanatong tanan.​—Sal. 32:8.

14. Nganong ginabansay ta ni Jehova, ug giunsa niya ni paghimo?

¹⁴ Si Jehova nagbansay kanato. Dili ta sama kang Jesus nga hingpit. Busa ingong bahin sa pagbansay kanato, disiplinahon ta sa atong mahigugmaong Amahan kon gikinahanglan. Ang iyang Pulong nagpahinumdom kanato: “Ang gihigugma ni Jehova iyang ginadisiplina.” (Heb. 12:6, 7) Si Jehova nagdisiplina nato sa daghang paagi. Pananglitan, naa tingali tay mabasa sa iyang Pulong o madungog sa atong mga tigom nga magtul-id kanato. O kaha ang  tabang nga atong gikinahanglan maggikan sa mga ansiyano. Bisag unsa pay paagi ni Jehova sa pagdisiplina kanato, kanunay niya kining gibuhat kay gihigugma ta niya.​—Jer. 30:11.

15. Sa unsang mga paagi si Jehova nanalipod kanato?

¹⁵ Si Jehova nagsuportar kanato aron makalahutay ta sa mga pagsulay. Ingon nga ang usa ka mahigugmaong tawhanong amahan magsuportar sa iyang mga anak panahon sa kalisdanan, suportahan sab ta sa atong langitnong Amahan panahon sa mga pagsulay. Siya naggamit sa iyang balaang espiritu aron panalipdan ta batok sa espirituwal nga kadaot. (Luc. 11:13) Tabangan sab ta ni Jehova dihang maluya ta. Pananglitan, siya naghatag kanatog nindot kaayong paglaom. Kana nga paglaom makatabang nato sa paglahutay sa mga kalisdanan. Konsideraha ni: Bisan unsa pang daotang butang ang mahitabo kanato, wad-on sa atong langitnong Amahan ang bisan unsang epekto niana. Ang bisan unsang pagsulay nga atong maagoman temporaryo lang, pero ang mga panalangin ni Jehova walay kataposan.​—2 Cor. 4:16-18.

16. Unsay nahitabo dihang misupak si Adan sa iyang mahigugmaong Amahan?

¹⁶ Makita nato ang pamatuod nga gihigugma ta ni Jehova sa iyang gihimo dihang unang mitungha ang problema sa iyang pamilya sa yuta. Dihang misupak si Adan sa iyang langitnong Amahan, dili na siya bahin sa malipayong pamilya ni Jehova, hasta ang iyang mga kaliwat. (Roma 5:12; 7:14) Pero dihay gihimo si Jehova aron tabangan ang mga kaliwat ni Adan.

17. Human morebelde si Adan, unsa dayoy gihimo ni Jehova?

¹⁷ Gisilotan ni Jehova si Adan, pero naghatag siyag paglaom para sa mga kaliwat niini. Nagsaad dayon siya nga ang matinumanong mga tawo mahimong bahin pag-usab sa iyang pamilya. (Gen. 3:15; Roma 8:20, 21) Si Jehova  naghimo niini nga kahikayan pinaagi sa halad lukat sa iyang pinalanggang Anak, si Jesus. Pinaagi sa paghatag sa iyang Anak para kanato, gipamatud-an ni Jehova nga gihigugma ta niya pag-ayo.​—Juan 3:16.

18. Nganong makaseguro ta nga gusto ni Jehova nga apil ta sa iyang pamilya, bisan kon mahitipas ta?

¹⁸ Bisag dili ta hingpit, gusto ni Jehova nga apil ta sa iyang pamilya, ug wala siya maghunahuna nga nagpabug-at lang ta kaniya. Tingali mapasakitan nato siya o kaha mahitipas ta, pero kanunay siyang naglaom nga mobalik ta kaniya. Giilustrar ni Jesus kon unsa ka lawom ang inamahang pagmahal ni Jehova pinaagi sa pag-asoy bahin sa usa ka anak nga milayas. (Luc. 15:11-32) Ang amahan niana nga ilustrasyon wala gyod mawad-ig paglaom nga mobalik ang iyang anak. Dihang miuli ang anak, kinasingkasing niya kining gidawat. Kon mahitipas ta pero mahinulsolon, makaseguro ta nga ang atong mahigugmaong Amahan andam ug kinasingkasing nga modawat kanato.

19. Unsaon pag-ayo ni Jehova ang kadaot nga gipahinabo ni Adan?

¹⁹ Ayohon sa atong Amahan ang tanang kadaot nga gipahinabo ni Adan. Human morebelde si Adan, si Jehova midesisyon nga magsagop ug 144,000 ka indibiduwal gikan sa katawhan aron mag-alagad ingong mga hari ug saserdote sa langit uban sa iyang Anak. Si Jesus ug ang kauban niyang mga magmamando motabang sa matinumanong mga tawo nga mahimong hingpit didto sa bag-ong kalibotan. Human sila makalabang sa kataposang pagsulay sa pagkamatinumanon, hatagan sa Diyos ang maong mga tawo ug kinabuhing walay kataposan. Ang atong Amahan malipay unya dihang iyang makita nga ang yuta mapuno sa hingpit niyang mga anak. Pagkanindot unya nianang panahona!

20. Sa unsang mga paagi gipakita ni Jehova nga gimahal ta niya pag-ayo, ug unsay hisgotan sa sunod nga artikulo?

²⁰ Napamatud-an na ni Jehova nga gimahal ta niya pag-ayo. Siya ang kinamaayohang Amahan. Siya maminaw sa atong mga pag-ampo ug nagtagana sa atong mga panginahanglan, sa materyal ug espirituwal. Siya nagbansay ug nagsuportar kanato. Nag-andam pod siyag nindot kaayong mga panalangin para kanato. Malipay ta sa pagkahibalo nga gihigugma ug gipangga ta sa atong Amahan! Hisgotan sa sunod nga artikulo ang mga paagi nga kita, ingong iyang mga anak, makapakita sab ug gugma kaniya.