EKICWEKA C’OKWEGA 6
Tata witu Yehova, natukunda munonga
‘Ni ahabw’eco mushabe muti: Tata ow’omu iguru.’—MAT 6:9.
ECESHONGORO CA 135 Okuhiga kwa Yehova: “Mwana Wangye, Gira Obwengye”
EMPINYE *
1. Omuntu akaba ashemerire kubanza yakora ki mbere y’okugambana n’omugabe wa Buperesi?
REKA tugire ngu ori omu bwire bwa kare munonga omu Buperesi. Hine eki ori kwenda kugambira omugabe, rero waza omu rurembo rw’omugabe rwa Suusa. Konka otakagambine n’omugabe, ashemerire kubanza yakuha orusya. Konka wagezaho kugamba na we atakuhire orusya, nikibasa kutuma wafa!—Esiteeri 4:11.
2. Yehova nayenda ngu twehurire bata aha bikwatirine n’okugamba na we?
2 Mbehi tikiri kutushemeza kumanya ku Yehova atari nk’omugabe wa Buperesi! N’obu Yehova ari kukirira kimwe omutegeki wena, nitubasa kugamba na we obwire obwari bwo bwona. Nayenda ngu tumwehisye. Ecokureberaho: N’obu Yehova ayine amazina g’ekitinisa nk’‘Omuhangi witu Mukuru, Owobushoborozi bwona kandi Mukama otahwaho,’ nayenda ngu tugambe na we turi kukoresa izina ry’ekitinisa ‘Tata.’ (Mat 6:9) Mazima nitushemererwa twamanya ku Yehova ari kwenda ngu tumuhike!
3. Ahabw’enki tushemerire kweta Yehova ‘Tata,’ kandi shi ni enki eki twaza kwega omuri eki kicweka?
3 Tuhikire kweta Yehova ‘Tata’, aha kuba niwe burugo bw’amagara gitu. (Zab 36:9) Ahabw’okuba ni Tata, tushemerire kumworobera. Ku turakore ebi ari kwenda, nitwija kubona emigisha myingi. (Heb 12:9) Eyo migisha harimu amagara agatahwaho, omu iguru n’omu nsi. Kandi na hati nitugasirwa. Eki kicweka caza kutwereka oku omuri obu bwire Yehova ari kwereka ku ni Tata ori kutukunda n’ekiri kutuma twayesiga ku atarije kutusigaho omu biro by’omu misho. Reka tutandike turi kureba enshonga eri kutuma twayesiga ku Tata ow’omu iguru ari kutukunda kandi ku ari kutufaho.
YEHOVA NI TATA ORI KUTUKUNDA KANDI ARI KUTUFAHO
Yehova nayenda kutuhika hihi, nk’oku omuzire oyine rukundo ari kufa aha bana beye (Reba paragurafu ya 4)
4. Ahabw’enki kiri kugumira bamwe kureba Yehova nka Tata?
4 Mbehi nikikugumira kureba Yehova nka Tata? Abamwe ku bari kwegeranisa na Yehova bahurira batine mugasho. Nibabanganisa yaba Ruhanga ari kubafaho buri omwe. Konka, Yehova we tari kwenda ngu twehurire basyoya. Akatuha amagara kandi nayenda ngu tube banywani beye. Entumwa Paulo ku yamazire kugambira abantu b’omuri Aseene ebyo bintu, akabashobororera ku Yehova ‘atari hare n’omuntu wena omuri itwe.’ (Byak 17:24-29) Ruhanga nayenda ngu twena tugambe na we nk’oku omwana ari kugamba n’omuzire weye ori kumunda kandi ori kumufaho.
5. Ni enki eki turi kwegera ahari munyanyazi omwe?
5 Abandi bo nikibagumira kureba Yehova nka Tata ori kubakunda ahakuba b’ishe b’omubiri tibaraberekire rukundo ninga shi ngu babafeho. Tekateka aha bigambo bya munyanyazi omwe owagizire ati: “Tata akaba nakunda kunjuma. Ku natandikire kwega Bibuli, kwehisya hihi Tata ow’omu iguru kikangumira. Konka ku namanyire ge Yehova, ebintu byona bikahinduka.” Mbehi n’iwe ni ko ori kwehurira? Yaba kiri kisyoya, yesige ku Yehova ari Sho ori kukukunda.
6. Tukuratize ebiri omuri Matayo 11:27, ni buha buryo bumwe obu Yehova yatukwasizemu kumureba nka Tata ori kutukunda?
6 Oburyo bumwe obu Yehova yatukwasizemu ngu tumurebe nka Tata ori kutukunda n’oku yahandikisize ebigambo bya Yesu n’ebi yakozire omuri Bibuli. (Shoma omuri Matayo 11:27.) Yesu akatoreza ge emitwarize y’Ishe; ni yo nshonga yagizire ati: ‘Ondebire, buri arebire Ishebona.’ (Yoh 14:9) Yesu akaba nakira kugamba ahari Yehova nk’omuzire. Yesu akakoresa ekigambo ‘Tata’ emirundi eri kuhika ahari 165 ari kumanyisa Yehova, omu bitabo by’engiri ina byonka. Ahabw’enki Yesu yagambire ahari Yehova basyoya eyo mirundi yona? Akaba nayenda ngu abantu bikirize ku Yehova ari ‘Tata’ ori kubakunda.—Yoh 17:25, 26.
7. Ni enki eki turi kwegera aha buryo obu Yehova yafire aha mwana weye?
7 Tekateka aha ki turi kwegera aha buryo obu Yehova yafire aha mwana weye, Yesu. Yehova burijo akaba nahurira eshara za Yesu. Akaba Atari kuhurira eshara za Yesu kusha, ahobwe akaba ari n’okuzigarukamu. (Yoh 11:41, 42) N’obu Yesu yabugine ebigezo byingi, akareba ku Ishe yabire ari kumukunda kandi ari kumushagika.—Luk 22:42, 43.
8. Ni bata oku Yehova yafire ahari Yesu?
8 Yesu akagamba ku Yehova ari we ori kumuha ebi ari kwetenga ngu abeho, obu yagambire ngu: ‘Ndi ohurire aha bwa Tata.’ (Yoh 6:57) Yesu akaba nayesigira kimwe Ishe kandi na Yehova akaba namuha ebi ari kwetenga by’omubiri kugira ngu abeho. Ec’omugasho munonga, Yehova akaba nafa ahari Yesu omu by’omwika.—Mat 4:4.
9. Ni bata oku Yehova yayerekire Yesu ku ari Ishe ori kumukunda kandi ori kumufaho?
9 Nk’omuzire ori kukunda omwana weye, Yehova akatuma Yesu yayerebera kuyabire ari kumushagika. (Mat 26:53; Yoh 8:16) N’obu Yehova yabire atari kurinda Yesu omu bizibu byona, akamukwasa kwehanganira ebigezo. Yesu akaba nayesiga ku okubonabonesibwa okwabire nikumuhikaho ku kuri ok’obwire buke. (Heb 12:2) Yehova akereka ku nafa ahari Yesu ari kumuhurikiza, ari kumuha ebi ari kwetenga, ari kumwegesa, kandi ari kumushagika. (Yoh 5:20; 8:28) Reka turebe oku n’itwe ari kutufaho omuri obwo buryo.
TATA ORI KUTUKUNDA NATUFAHO
Omuzire w’omushija (1) nahurikiza ge abana beye, (2) abaha ebi bari kwetenga, (3) abegesa, kandi (4) abarinda. Tata w’omu iguru ori kutukunda natufaho omuri obwo buryo (Reba paragurafu ya 10-15) *
10. Tukuratize ebiri omuri Zaaburi ya 66:19, 20, ni bata oku Yehova ari kutwereka ku natukunda?
10 Yehova nahurira eshara zitu. (Shoma omuri Zaaburi ya 66:19, 20.) Tari kututeraho obugarukiro aha ku tushemerire kumushaba, ahobwe nayenda ngu tumushabe obwire bwona. (1 Tes 5:17) Nitubasa kushaba Ruhanga obwire obwari bwo bwona, ahu twakuba turi hona. Tahugire ngu aremwe kutahurira eshara zitu; natura ayetegwire kutuhurira twaba turi kumushaba. Ku turi kumanya ku Yehova ari kuhurira eshara zitu nitukizaho kumukunda. Omuhandiki wa Zaaburi akagamba ati: ‘Ninkunda [Yehova], ahakuba nahurira iraka ryange.’—Zab 116:1.
11. Ni bata oku Yehova ari kugarukamu eshara zitu?
11 Tata witu tari kuhurira eshara zitu kusha, ahobwe nanazigarukamu. Entumwa Yohaana akatuhamiza ati: ‘Ku tushaba ekintu cona nk’oku akunda, atuhurira.’ (1 Yoh 5:14, 15) Yehova tari kutugarukamu omu buryo obu turi kuba turi kutekateka ngu ni bwo burungi. Namanya ecakutubera kirungi; ni yo shonga hariho obu ari kutwesiza ninga shi aba aturekire.—2 Kor 12:7-9.
12-13. Ni bata oku Tata ow’omu iguru ari kutuha ebi turi kwetenga?
12 Yehova natuha ebi turi kwetenga. Na we nakora eki ari kushaba abazire b’abashija ngu bakore. (1 Tim 5:8) Naha abana beye eby’omubiri ebi bari kwetenga. Tari kwenda ngu twemereze omutima aha bikwatirene n’ebyokurya, ebijwaro n’ah’okuba. (Mat 6:32, 33; 7:11) Nk’omuzire oyine rukundo, Yehova natutebekanisiza ebi turi kwetenga omu biro by’omu misho.
13 Ec’omugasho munonga, Yehova natuha eby’omwika ebi turi kwetenga. Akakoresa Ekigambo ceye yatushururira amazima agari kumukwataho, ekigendererwa ceye, enshonga ahabw’enki yatuhangire, n’ebirije kubaho omu biro by’omu misho. Akatwereka ku natufaho obu twayegire amazima obw’okubanza, akoresize abazire bitu ninga shi ondijo muntu ngu atuyambe kumumanya. Kandi akagumizamu kutwereka ku natushagika birabire aha bareberezi b’ekibina n’abandi benetata na banyanyazi abakuzire omu by’omwika. Nambwenu, Yehova natwegesa akoresize ekibina, ahu turi kwegera turi hamwe n’ab’omu maka gitu. Omuri obwo buryo bwona, Yehova natwereka ku ni Tata ori kutufaho twena.—Zab 32:8.
14. Ahabw’enki Yehova ari kutwegesa, kandi shi nakikora ata?
14 Yehova natwegesa. Tituri nka Yesu, ahakuba we akaba ahikire. Obwe rero kugira ngu atwegese, natuhana caba kiri kwetengesa. Ekigambo ceye nikitugambira ngu: ‘Owu Mukama akunda ni we ahana.’ (Heb 12:6, 7) Yehova natuhana omu miringo myingi. Ecokureberaho: Ebi turi kushoma omu Kigambo ceye ninga ebi turi kuhurira omu nterane nibibasa kutuhabura. Ninga shi akoresa abareberezi omu kutuhana. Oku okuhana kwa Yehova kwakuba kuri kona, nakikora ahabwa rukundo.—Yer 30:11.
15. Ni bata oku Yehova ari kuturinda?
15 Yehova natukwasa kwehanganira ebigezo. Nk’oku omuzire ari kukwasa omwana weye omu bigezo, ni ko Tata ow’omu iguru ari kutukwasa twabugana ebigezo. Natuha omwika gweye oguri kwera, ngu guturinde ebiri kubasa kushisha obunywani bwitu na we. (Luk 11:13) Nambwenu Yehova natukwasa twaba twemerize omutima. Ecokureberaho: Natuha amasiko g’omu biro by’omu misho. Ago masiko nigatukwasa kwehanganira ebizibu. Yijuka eki: Ekintu cona kibi ekiri kutuhikaho, Tata w’omu iguru naba nakireba. Ebigezo byona ebi turi kubugana ni eby’obwire buke, konka emigisha eyi Yehova ari kutuha ni ey’ebiro byona.—2 Kor 4:16-18.
TATA W’OMU IGURU TARITUSIGAHO NA KAKE
16. Ni enki ecabireho Adamu na Eva bamara kugomera Ishe?
16 Kutekateka aha ki Yehova yakozire obu Adamu na Eva bamugomire, nikituhamiza ku Yehova ari kutukunda. Obu Adamu yagomire Ishe w’omu iguru, akaferwa omwanya ogu yabire arimu omuri paradiso, kandi kikahika n’aha bantu bona. (Rom 5:12; 7:14) Konka Yehova akagira eki yakora ngu akwase abakomokire ahari Adamu.
17. Adamu na Eva ku bamazire kugomera Yehova, ni enki eki yakozire?
17 Yehova akahana Adamu na Eva, konka tararekire ngu bijukuru babo babeho batine amasiko. Akahika ari kubaraganisa ku babire barije kushuba bakaba omu ka yeye. (Kut 3:15; Rom 8:20, 21) Yehova akakikora ari kohereza Omwana weye nk’Ekitambo. Yehova akereka ku ari kutukunda obu yatuhire Omwana weye ngu afe ahabwitu.—Yoh 3:16.
N’obu twakugwa tukaruga ahari Ruhanga bwanyima tukehana, Tata w’omu iguru, Yehova, naba ayetegwire kutwakira. (Reba paragurafu ya 18)
18. Ahabw’enki turi kwesiga ku Yehova ari kubasa kutwakira n’obu twakumurugaho tukagwa?
18 N’obu tutahikire, Yehova natwenda omu ka yeye kandi tari kutureba nk’abari kumuremesa. Nitubasa kuhwa amani ninga tugwe, konka Yehova tariruha kutukwasa. Yesu akakoresa ecokureberaho c’omwana w’ekirare, yatwereka oku Yehova ari kutukunda munonga. (Luke 15:11-32) Omushija ori kugambwa omuri eyo nkuru tararekire kwesiga ku omwana weye yabire aragaruke omu ka. Omwana ku yagarukire omu ka, ishe akamwakira ashemerirwe. N’obu twakugwa tukaruga ahari Yehova bwanyima tukehana, nituba twine obwesige ku Tata ori kutukunda ari kuba ayetegwire kutwakira.
19. Ni bata oku Yehova arije kuboneza ebintu byona ebi Adamu yashishire?
19 Tata nayija kuboneza ebintu byona ebi Adamu yashishire. Adamu ku yamazire kugoma, Yehova akasharamu kutorana abantu 144,000 abarije kutegeka n’Omwana weye bari abagabe n’abatambi. Yesu n’abaritegeka na we baryakwasa abantu abari korobera Ruhanga bature omu nsi ensya bari abantu abahikire. Ku barisingura ekigezo ca bwanyima, Ruhanga aryabaha amagara agatahwaho. Eco kiryatuma Tata w’omu iguru yashemerererwa kureba ensi yona iyijwire batabani beye na bahara beye. Obwo ku burije kuba buri obwire burungi!
20. Ni bata oku Yehova ari kutwereka ku natukunda munonga, kandi shi nituza kushwijuka ki omu kicweka ekiri kukurataho?
20 Yehova akatwereka ku natukunda munonga. Ni Tata ori kutukunda. Nahurira eshara zitu kandi atuha ebi turi kwetenga, eby’omubiri n’eby’omwika. Natwegesa kandi atushagika. Nambwenu atwinire ebirungi ebi atubikire. Nikitushemeza munonga kumanya ku Yehova ari kutukunda kandi ku ari kutufaho! Ekicweka ekiri kukurataho nikija kutwegesa kumanya oku turi kubasa kusima Yehova ahabw’okutwereka rukundo yeye nk’abana beye.
ECESHONGORO CA 108 Rukundo ya Ruhanga etarikuhwaho
^ par. 5 Yehova ni Omuhangi kandi Omutegeki Owobushoborozi bwona. Konka twine enshonga eziri kutuma twamurereba nka Tata ori kutukunda munonga kandi ari kutufaho. Twaza kureba ezo nshonga omuri eki kicweka. Twaza n’okwega enshonga turi kwikiriza ku Yehova atari kubasa kutunaga.
^ par. 59 EBISHUSHANI: Buri kishushani omuri ebi bishushani bina nicereka omwana n’ishe: Ishe w’omwana ari kumuhurikiza ge, ari kuha muhara weye ebi ari kwetenga, ari kwegesa omwana weye, kandi ari kumuhumuriza. Ekishushani c’engaro za Yehova ekiri enyima y’ebyo bishushani nicereka ku ari kubasa kutufaho omu buryo nk’obwo.
