1. Ika emén a mochen fós ngeni ewe kingen Persia, met epwe akkomw féri?

ANCHANGEI pwe ka manaw lóóm lóóm lón ewe mwúún Persia. Ka mochen fós ngeni ewe king usun och mettóch, iwe ka sái ngeni telinimwan we Susa. Nge kese fókkun tongeni fetáleiti ewe king ika kese akkomw angei mumutá. Ika kese ina, neman kopwe ninniiló!​—Est. 4:11.

2. Met Jiowa a mochen ach sipwe meefi lupwen sia fós ngeni?

² Sia fókkun kilisou pwe Jiowa esap usun ena kingen Persia! Jiowa a fókkun tekia seni meinisin sounemenem wóón fénúfan, nge a etiwakich ach sipwe fós ngeni ese lifilifil fansoun. A mochen ach sipwe meefi kinamwe le fós ngeni. Áwewe chék, inaamwo ika Jiowa a eáni ekkewe itelap Chón Fératá mi Lapalap, Ewe mi Unusen Manaman, me Samol mi Lapalap, nge a mochen ach sipwe kér ngeni Sam, ewe itelap mi pwári tongfengen. (Mat. 6:9) A fókkun chúng letipach ren an mochen ach sipwe meefi pwe sia fókkun chiechi ngeni!

3. Pwata sia tongeni kér ngeni Jiowa Semach, me met sipwe pwóróus wóón lón ei lesen?

³ A fich ach sipwe kér ngeni Jiowa Semach pún manawach a pop seni i. (Kölf. 36:9) Pokiten i Semach, iwe wisach ach sipwe álleasochisi. Lupwen sia féri met a mochen sipwe féri, sia angei watteen feiéch. (Ipru 12:9) Manaw esemuch ina eú me lein ekkena feiéch, nge ekkóch repwe eáni lón láng me ekkóch wóón fénúfan. Sia pwal kúna feiéch iei. Ei lesen epwe pwóróus usun ekkewe mettóch mi ánnetatá pwe Jiowa  i Semach mi tong iei, me pwata sia tongeni lúkúlúk pwe esap fókkun likitikicheló lón ekkan fansoun repwe feito. Nge akkomw, sipwe pwóróus wóón ekkewe popun sia tongeni lúkúlúk pwe Semach we lón láng a enletin tongekich me túmúnúkich.

4. Pwata a weires ngeni ekkóch ar repwe meefi pwe Jiowa Semer?

⁴ Mi weires ngonuk óm kopwe meefi pwe Kot Semom? Ekkóch ra meefi pwe ese wor lamoter lupwen ra ekieki usun Jiowa. Rese kan lúkú pwe Kot ewe mi Unusen Manaman a tongeer wóón wilikaper. Iwe nge, Semach we mi tong ese mochen an epwe ina usun meefiach. A ngenikich manaw me a mochen ach sipwe riri ngeni. Mwirin án Aposel Paulus fós usun ekkena mettóch lón Aten, a áweweei ngeni chókkewe mi aúseling ngeni pwe Jiowa “esap wesewesen toau seni eman me eman leich.” (Föf. 17:24-29) Kot a mochen pwe emén me emén leich epwe kan fós ngeni i usun chék emén semirit mi kan mochen fós ngeni seman we mi tongei me chúngú.

5. Met sia tongeni káé seni meefien emén fefin Chón Kraist?

⁵ Neman a weires ngeni ekkóch ar repwe meefi pwe Jiowa Semer pokiten pwisin semer kewe rese kan tongeer me kirekiréch ngeniir. Áwewe chék, iei alon emén fefin Chón Kraist: “Semei we a fókkun arochoroch.” A pwal erá: “Lupwen ua kerán poputá le káé Paipel, a weires ngeniei ai upwe meefi pwe ua tongeni arap ngeni emén Sam lón láng. Nge mwirin ai sissileeló Jiowa, a fókkun siwil ai ekiek.” A pwal ina usun meefiom? Ika ina, iwe kosap lichippúng. Ló, ló, ló, ka tongeni pwal meefi pwe Jiowa i ewe Sam mi múrinné seni meinisin.

6. Me ren Mateus 11:27, ifa eú alen án Jiowa álisikich le meefi pwe i Semach mi tong?

⁶ Eú alen án Jiowa álisikich le meefi pwe i Semach mi tong, ina ren an apachaalong lón ewe Paipel minne Jesus a féri me apasa. (Álleani Mateus 11:27.) Jesus a unusen áppirúfichi napanapen Seman we, iwe a tongeni erá ei: “Iö a künaei, a küna Semei.” (Joh. 14:9) Jesus a kan áweweei pwe Jiowa emén Sam. Lón ekkewe rúáánú Puken Kapas Allim, fán chómmóng Jesus a néúnéú ewe kapas Sam fán iten Jiowa. Pwata Jesus a fós fán chómmóng usun Jiowa? Eú popun, pún epwe alúkúlúkú ngeni aramas pwe Jiowa emén Sam mi tong.​—Joh. 17:25, 26.

7. Met sia káé usun Jiowa seni féfférún ngeni Néún we?

⁷ Ekieki met sia káé usun Jiowa seni féfférún ngeni Néún we Jesus. Jiowa a aúseling ngeni meinisin án Jesus kewe iótek. Nge Jiowa ese chék aúseling ngeniir, nge a pwal pélúweniir. (Joh. 11:41, 42) Ese lifilifil met sókkun sóssót Jesus a kúna, nge a meefi án Seman we tong me álillis.​—Luk. 22:42, 43.

8. Ifa usun Jiowa a awora ngeni Jesus minne a osupwang ren?

⁸ Jesus a mirititi pwe Seman we a poputááni me atufichi sópwósópwólóón manawan. Iei alon: ‘Pokiten ewe Sam ngang üa manau.’ (Joh. 6:57) Jesus a unusen lúkúlúk wóón Seman we, me Jiowa a atufichi manawan. Nge ewe mi lamot seni meinisin, Jiowa a álisi Jesus le tuttuppwél ngeni.​—Mat. 4:4.

9. Ifa usun Jiowa a pwáraatá pwe i emén Sam mi fókkun tongei Jesus?

⁹ Jiowa emén Sam mi tong, iwe a alúkúlúkú ngeni Jesus pwe a peni i. (Mat. 26:53; Joh. 8:16) Inaamwo ika Jiowa ese eppeti seni Jesus meinisin met mi tongeni efeiengawa, nge a álisi le likiitú fán weires. Jesus a silei pwe esap nómoffóch ekkewe weires epwe  kúna. (Ipru 12:2) Jiowa a ánneta an tongei Jesus ren an akkaúseling ngeni, akkawora met a osupwang ren, ákkáiti, me ákkálisatá. (Joh. 5:20; 8:28) Iei sipwe pwóróus wóón ifa usun Semach we lón láng a pwal ina usun lón an túmúnúkich.

10. Me ren Kölfel 66:19, 20, ifa usun Jiowa a pwáraatá pwe a tongekich?

¹⁰ Jiowa a aúseling ngeni ach kewe iótek. (Álleani Kölfel 66:19, 20.) Ese mochen ach sipwe aúkúkú ach kewe iótek. A pesekich ach sipwe iótek iteitan. (1 Tes. 5:17) Sia tongeni iótek ngeni Kot ese lifilifil fansoun, me ia sia nóm ie. A chék tattawe me mmólnetá le akkaúseling ngenikich. Lupwen sia weweiti me aúcheani án Jiowa aúselinga ach kewe iótek, a lapóló ach tongei. Iei alon emén soumakken kélfel: “Üa echeni ewe Samol mi Lapalap, pun a rongorong mweliei.”​—Kölf. 116:1.

11. Met Jiowa a féri mwirin an aúseling ngeni ach kewe iótek?

¹¹ Semach we ese chék aúseling ngeni ach kewe iótek, nge a pwal pélúweniir. Ewe aposel Johannes a alúkúlúkú ngenikich: “Are sia tüngor och mine a fich ngeni letipan, a aüselingakich.” (1 Joh. 5:14, 15) Pwúngún, neman Jiowa esap pélúweni ach kewe iótek usun met sia ekieki. A silei met a kon échitikich, me fán ekkóch pélúwan epwe aapw, are a mochen ach sipwe witiwiti pélúwan.​—2 Kor. 12:7-9.

12-13. Ifa usun Semach we lón láng a awora met sia osupwang ren?

¹² Jiowa a awora met sia osupwang ren. A féri minne a mochen meinisin ekkewe sam repwe féri. (1 Tim. 5:8) A atufichi manawen néún kewe. Ese mochen ach sipwe aúreki met sipwe mwéngé, úféúf, are imweni. (Mat. 6:32, 33; 7:11) Pokiten Jiowa i emén Sam mi tong, a pwal mwo nge akkóta kataween ach osupwang lón mwachkkan.

¹³ Nge met a lamot seni meinisin, ina án Jiowa awora met mi lamot pwe sipwe tongeni ririéch ngeni. A néúnéú an we Kapas le pwári ewe enlet usun pwisin i, minne a tipeni, popun sia manaw wóón fénúfan, me usun mwachkkan. A áfánnikich lupwen sia kerán káé ewe enlet ren an néúnéú semach kewe me inach are pwal emén le álisikich le sissilei i. Sia pwal sópweló le angei álillis mi fiti tong me ren ekkewe chónemmwenin mwichefel me pwal ekkóch chienach kewe mi ásimaw lón ewe mwichefel. Pwal eú, Jiowa a áeá án ewe mwichefel kewe mwich le asukulakich, ikewe sia káé fengen me chón ach famili lón pekin lúkú. Jiowa a pwári ngenikich an tong usun chék Semach ren meinisin ekkena mettóch.​—Kölf. 32:8.

14. Pwata Jiowa a ákkáitikich, me ifa usun a kan féri ena?

¹⁴ Jiowa a ákkáitikich. Sise usun Jesus pún sise unuséch. Iwe, Jiowa a kan emiritikich atun mi fich pwe ina kinikinin an ákkáitikich. An we Kapas a áchema ngenikich: “Ewe Samol a fönöü iö a echeni.” (Ipru 12:6, 7) A sóssókkopat alen án Jiowa emiritikich. Áwewe chék, minne sia álleani lón an we Kapas are rongorong lón ekkewe mwich neman epwe emiritikich. Are neman ewe álillis sia osupwangan epwe feito seni ekkewe mwán mi ásimaw. Ese lifilifil ifa usun Jiowa a emiritikich, nge an emirit a chék lóngólóng wóón tong.​—Jer. 30:11.

15. Ifa usun Jiowa a kan túmúnúkich?

¹⁵ Jiowa a ákkálisikich lón ach kewe weires. Semach we lón láng a ákkálisikich lón ach kewe weires usun chék án emén sam  mi tong ákkálisi néún kewe lón ar kewe weires. Jiowa a kan áeá an we ngún mi fel le túmúnúkich seni met a tongeni atai ach riri ngeni. (Luk. 11:13) Jiowa a álisikich lupwen sia lichippúng are lólilen. Áwewe chék, a ngenikich eú ápilúkúlúk allim. Ena ápilúkúlúk a álisikich le likiitú fán weires. Ekieki ei mettóch: ese lifilifil met sókkun mettóch mi ngaw repwe fis ngenikich, nge Semach we mi tong epwe unusen amóeló pwúnúngawen ekkena mettóch. Ekkewe weires sia nóm faar resap nómoffóch, nge ekkewe feiéch Jiowa a ngenikich repwe nónnóm feilfeiló chék.​—2 Kor. 4:16-18.

16. Met a fis lupwen Atam a álleasolapa Seman we mi tong?

¹⁶ Minne Jiowa a féri lupwen Atam a ú ngeni, a pwári an tongekich. Lupwen Atam a álleasolapa Seman we lón láng, i me mwirimwirin kewe rese chúen chóni án Jiowa we famili mi pwapwa. (Rom 5:12; 7:14) Iwe nge, Jiowa a awora álillis.

17. Met Jiowa a mwittir féri mwirin án Atam ú ngeni?

¹⁷ Jiowa a apwúngú Atam, nge a pwonei an epwe álisi mwirimwirin Atam kewe. A mwittir pwonei pwe aramas mi álleasochis repwe chónisefáli an we famili. (Ken. 3:15; Rom 8:20, 21) Án Jiowa akkóta ena a lóngólóng wóón ewe méén kepich án Néún we mi áchengicheng Jesus. Ren án Jiowa awora Néún we fán ásengesich, a ánnetatá úkúkún an tongekich.​—Joh. 3:16.

18. Pwata sia tongeni lúkúlúk pwe Jiowa a mochen pwe sipwe néún, ikaamwo sia fen mwálech seni?

¹⁸ Inaamwo ika kich sise unuséch, nge Jiowa a mochen pwe sipwe chón an we famili, me ese fókkun meefi pwe a áweires an epwe álisikich. Neman sipwe elichippúngú  Jiowa are mwálech seni ren och fansoun, nge esap fangetánikich. Jesus a áweweei úkúkún alóllóólun án Jiowa tongekich lupwen a eáni eú kapas áwewe usun emén nau mi mwálecheló. (Luk. 15:11-32) Ewe sam lón ena kapas áwewe ese fókkun fangetáni an ápilúkúlúk pwe néún we epwe liwinsefál. Lupwen ewe nau a liwin, ewe sam a pwapwa le etiwato. Ika sia fen mwálech seni Jiowa nge sia aier, sia tongeni lúkúlúk pwe Semach we mi tong a mmólnetá me tipemecheres le etiwasefálikich.

19. Ifa usun Jiowa epwe amóeló meinisin pwúnúngawen án Atam kewe féffér?

¹⁹ Semach we epwe amóeló meinisin pwúnúngawen án Atam kewe féffér. Mwirin án Atam ú ngeni Jiowa, Jiowa a akkóta an epwe mwuuti 144,000 aramas ar repwe fiti Néún we le king me souasor lón láng. Jesus me chienan kewe sounemenem repwe álisi aramas mi álleasochis ar repwe unuséchúló lón ewe ótót sefé. Mwirin án chókkana pássini ewe sáingoon sóssótun ar álleasochis, Kot epwe ngeniir manaw esemuch. Iwe Semach we epwe pwapwa le kúna án unusen fénúfan masou ren néún kewe mi unuséch. Epwele ifan me amwararen ena fansoun!

20. Ifa usun Jiowa a pwári pwe a enletin tongekich, me met sipwe pwóróus wóón lón en lesen mwirin ei?

²⁰ Jiowa a pwáraatá pwe a enletin tongekich. I ewe sókkun Sam mi múrinné seni meinisin. A aúseling ngeni ach kewe iótek me a awora met sia osupwang ren lón pekin aion me lón pekin lúkú. A ákkáitikich me ákkálisikich. A pwal akkóta feiéch mi echipwér fán itach lón mwachkkan. A achchúngú letipach ach silei pwe Jiowa a fókkun tongekich me chúngúkich! Lón en lesen mwirin ei, sipwe pwóróus wóón ifa usun kich néún kewe sia tongeni pwári ach kilisou ren an tong.