1. Txini yafuneya wi muttu akose akala wafuna aloge na mwene wa Pérsia?

KAVITANALELE buli o Pérsia, vyaka 2.500 mundduni. Weyo onfuna ologe na mwene wa elabo ejile, egali dhawene onokosa oleddo mpaka sidadi ya Susa, wenewo onkala mweneya. Mbwenye kugatagihile odhowa ologa na mwene ohiromile okuweliwa na iyene. Kokosa dhawene ogahipiwa!—Est. 4:11.

2. Niniwamo dhavi nigalogaga na Yehova?

² Iyo ninotamaalela vaddiddi vowi Yehova kahiyo ninga mwene wa Persia! Yehova munddimuwa vina dwamakamaka opitta alamuleli otene aliwo, masiki dhawene, ninologa na iyene mudhidhi bu mudhidhi. Yehova onfuna wi nikane ofuru wa ologa na iyene. Motagiha, masiki vakaaniliye mazina mena a nttittimiho ninga Muttanddi Munddimuwa, Namawodha-wodha, Nabuya, vina Namadhulu-dhulu, iyene ononiwoba wi nimukuwelege nilabihedhaga nzu ntti “Baba.” (Mt. 6:9) Jowagalaliha oziwa wi Yehova onfuna wi nikale ofiyedhana na iyene ninga Babi!

3. Ninfwanyelela nni omukuwela Yehova na nzu ntti “Baba,” nanda txini enfunihu wona mwari mwa mutoma obu?

³ Iyo nigamukuwelaga Yehova na nzu ntti “Baba”—kanipupuruwile sabwani iyene ddili Fukuwa ya egumi yehu. (Masal. 36:10) Velani iyene ddi Babi wehu, iyo nikana sabwa ya omwiwelela. Nigakosa esile dhinnirumiye, ninele wakela mareliho otikiniha. (Aheb. 12:9) Marelihoya anowiwanana na wakela egumi yamukalakala, peno wirimu obe velaboni ya vati. Masiki ovanene ninowakela mareliho sabwa ya omwiwelela Mulugu. Mutoma obu onele osekeserha vizinddiyelo dhinoniha wi Yehova Babi onnikwela vina sabwaya enfwanyelihu okuluvela wi iyene txipo kananinyanyale musogorho. Mbwenye voroma, ninfuna none sabwaya enfanyeelelihu okuluvela wi Babihu  wa wirimu ononikwela vina ononitanala.

4. Attu ena anrutxeliwani omoona Yehova ninga Babi wawa?

⁴ Weyo onorutxiwaga omoona Yehova ninga Babi wawo? Attu ena anubuwela wi ang’ono vina kali elobwene agaviladdaniha na Yehova. Awene anowaganyedha agewa wi Mulugu Wowodha-wodha onomuzuzumela muttu ddi muttu. Mbwenye Babihu wokwela, kanubuwela dhahene. Iyene onivaha egumi vina onfuna wi nikaane mandano ofiyedheya na iyene. Murumiwi Paulo wahatapulelamo anamewa aye o Atena ebaribari eji vina wahenjedhedha wi Yehova “kalapelane na muthu-muthu wa iyo.” (Mer. 17:24-29) Mulugu onfuna wi muttu-muttu wa iyo alogege na iyene dhahene ninga munkosela babi na mwanaye.

5. Ninsunzavo eni na yotagiha ya murogora?

⁵ Attu ena anorutxiwa omoona Yehova ninga Babi wawa sabwani ababiwa omaningoni kaalelile nokwela nne vina kaatonyihedhile ntanaalo. Koona empadduweli murogora dhahi. Iyene ohiloga, “Babani wali muttu wanna owali vaddiddi.” Nona “Muromelimi omusunza Bibilia, yanddirutxa okala ofiyedheya na Babi wa wirimu. Mbwenye mmuziwelimi Yehova mowakwana-mwene, dhotene dhahitxinja.” Weyo onowubuwelaga dhahene? Akala pumwenemo, kakuluvela wi enowodheya omoona Yehova ninga Babi wororomeleya.

6. Mowiwanana na Mateu 11:27, Yehova onnikamihedha dhavi wi nimonege ninga Babi wokwela?

⁶ Mukalelo mmodha onnikamihedha Yehova omoona ninga Babihu wokwela b’olebiha mBibiliani mazu vina merelo a Yezu. (Kengesa Mateu 11:27.) Yezu otagiha mowakwana omuttu wa Babe ofiyedha ologa: “Oddonile miyo, omona Baba.” (Jo. 14:9) Yezu ohiloga dila dhinjene mukalelo oli Yehova ninga Babi. Mwari mwa Mittaka minayi, Yezu olabihedha mazu aba “Baba” dila dhowakwana 165 amwaddagana Yehova. Yezu ologelini venjene mwaha wa Yehova? Ttangwi modha jawi attu anfwanyela okuluvela wi Yehova Babi wokwela.—Jo. 17:25, 26.

7. Ninsunzavo eni mwaha wa Yehova na mukalelo omweddihiliye Mwanaye?

⁷ Ninfuna nisunze mwaha wa Yehova na mukalelo omweddihiliye Mwanaye, Yezu. Yehova wanvuruwana malobelo a Yezu mudhidhi wotene. Ottiya ovuruwanavi, iyene wannakula malobeloya. (Jo. 11:41, 42) Masiki na makattamiho agumanana Yezu, iyene wanziwa wi Babe wannimukwela vina wanimukamihedha.—Lk. 22:42, 43.

8. Yehova wamukamihedhile Yezu na mikalelo gani?

⁸ Yezu wannonelamo wi Babe wali Nipara na okalawo waye vina ddiyene Wamusapela, nona wahifiyedha ologa: “Ddi iyene onddikalihawo.” (Jo. 6:57) Yezu wannimukuluvela kakamwene Babe, vina Yehova wanimukamihedha na dhojombeliwa dhaye. Yamakamakaya jawi, Yehova wanimukamihedha Yezu okala wororomeleyene.—Mt. 4:4.

9. Yehova wonihile dhavi wi wali Babi wamukwela Yezu?

⁹ Sabwa yokala Babi wokwela, Yehova wahikosa muli mwetemwene wila Yezu aziwe wi okana nikamihedho naye. (Mt. 26:53; Jo. 8:16) Yehova kabarela makattamiho otene agumanana Yezu, mbwenye Iyene wanimukamihedha ovilela masosoya. Yezu wanziwa wi makattamiho-makattamihovi agampattile agahivira mohigoneela. (Aheb. 12:2) Yehova  wahitonyihedha omukwela Yezu modhela onvuruwana, omushagiha, omukamihedha, vina wakwanihedha dhojombeliwa dhaye. (Jo. 5:20; 8:28) Babihu wa wirimu ononikamihedha na mukalelo wakakene ninga munfunelihu wona.

10. Mowiwanana na Masalmo 66:19, 20, Yehova ontonyihedha dhavi wi ononikwela?

¹⁰ Yehova onovuruwana malobelo ehu. (Kengesa Masalmo 66:19, 20.) Iyene kanika maddile malobelo ehu, ottiya ejo iyene ononikokomeza olobela dila dhotene. (1 Tes. 5:17) Na nriho ninonfiyedha Mulugu wehu mudhidhi bu mudhidhi, kintanala valihu. Iyene txipo kanzuzuma na mabasa mpaka ohinivuruwana; oli womala nawale wila avuruwane malobelo ehu. Niganonelamo wi Yehova onovuruwana malobelo ehu, iyo ninele okala wofiyedheya na iyene. Munasalmo ohiloga: “Ddinomukwela Nabuya, vowi ovuruwana mukuwo wa oloba waga.”—Masal. 116:1.

11. Yehova onakula dhavi malobelo ehu?

¹¹ Ottiya ovuruwana bahi malobelo ehu, Babihu onowakula malobeloya. Murumiwi Joau oniroromeliha wi Mulugu, “ononivuruwana nigamuloba elo bari munfuneliye.” (1 Jo. 5:14, 15) Ebaribari wi, Yehova txino kanakula malobelo ehu na mukalelo onjeedhelihu. Iyene onoziwa txini eli yapama wa iyo, nona dila dhina kanakula malobeloya obe onfuna wi nirome ojeedha.—2 Kor. 12:7-9.

12-13. Mikalelo gani dhinoniha wi Babihu wa wirimu ononivaha dhinfunihu?

¹² Yehova ononivaha dhinfunihu. Iyene onkosa yakakene enakokomeziye ababi otene wi akosege. (1 Tim. 5:8) Mulugu onowakwanihedha dhojombeliwa dha anaye. Iyene kanfuna wi iyo nizuzumele dhoja, dhowabala obe vokala. (Mt. 6:32, 33; 7:11) Ninga mambali wokwela, Yehova ohiniroromeliha wila musogorho onele wakwanihedha dhotene dhinnijombela.

¹³ Yamakamakaya jawi, Yehova ononivaha dhilobo dhomuyani. Modhela Mazu aye, ononaddela mukalelo oliye, efunelo yaye, sabwaya emuthukuleli onipaddutxa, vina dhinapadduwe musogorho. Iyene otonyihedha wi onomuzuzumela muttu-muttu, sabwa ya onikukusela osunza ebaribari, aalabihedhaga amambali ehu obe attu ena wi anikamihedhe omuziwa. Ninodhowavi nakelaga nikamihedho na anddimuwa a mmulogoni vina abali na arogora oliba omuyani. Ottiya ejo, Yehova ononisunziha mmatugumanoni, mwenemo munwodhihu osunzihiwa vamodha na amudhihu omuyani. Ttarho esi na dhina, dhinowooniha wi Yehova Babi onnikwela iyo notene.—Masal. 32:8.

14. Yehova onnishagihela nni, nanda iyene onkosa dhavi?

¹⁴ Yehova ononishagiha. Mottiyana na Yezu, iyo nili attu ohiligana. Nona ninga mpaddi wa onishagiha, Babihu wokwela ononisaddeya egakala yofuneya. Nzu naye ninonubutxedha: “Nabuya onimulaga onimukweliye.” (Aheb. 12:6, 7) Yehova ononilaga na mikalelo dhottiyana-ttiyana. Motagiha, iyene ononisaddeya modhela elobo enengesihu mBibiliani obe elobo eniwihu mmatugumanoni. Obe txino nikamihedho ninfunihu ninda mwa anddimuwa a mulogo. Yehova ononisaddeya nokwela.—Jer. 30:11.

15. Mikalelo gani dhinoniha wi Yehova ononibarela?

¹⁵ Yehova ononikamihedha ovilela makattamiho. Dhahene ninga babi wokwela  onimukamihedha mwanaye mmakattamihoni orutxa, Babihu wa wirimu ononivaha guru dha ovilelana makattamiho. Iyene onolabihedha muya waye wokoddela wi onibarele na elobo-txilobo egadhile oputtula mandano ehu na iyene. (Lk. 11:13) Yehova ononibarela nigakaana dhubuwelo dhokumula. Motagiha, iyene ononivaha njedhelo nowagalaliha. Njedhelo ntti ninonikamihedha ovilela makattamiho orutxa. Kanidduwale wi Babihu wokwela, onele ogomiha makattamiho-makattamihovi annitabutxa ovanene. Makattamiho angumanihuna anovira mohigoneela, mbwenye mareliho annivaha Yehova b’amukalakala.—2 Kor. 4:16-18.

16. Txini epadduwile na Adamu vattiyiliye omwiwelela Babe wokwela?

¹⁶ Ninowona okwela wa Yehova nigobuwela yakosiliye vapadduwile makattamiho oroma velaboni ya vati. Adamu vattiyiliye omwiwelela Babe wa wirimu, iyene vamodha na attu otene ayeleela murala wowagalala opaddutxile Yehova. (Rom. 5:12; 7:14) Mbwenye Yehova, wahikosavo elobo wi akamihedhe ana Adamu.

17. Txini ekosile Yehova momaguva muttegile Adamu?

¹⁷ Yehova wahimutxinutxa Adamu, mbwenye wahavaha njedhelo anaye. Momaguva-mwene iyene wahipikirhela wi attu owiwelela agahiyelela okosa mpaddi wa amudhaye. (Wita 3:15; Rom. 8:20, 21) Yehova wahikosa masasanyedho, modhela mukutto wa yobolo operhekile Mwanaye wokweleya, Yezu. Sabwa ya onilevela Mwanaye, Yehova ohoniha wi ononikwela vaddiddi.—Jo. 3:16.

18. Sabwaya jani enfwanyelihu okuluvela wi Yehova ononinfuna ninga anaye, masiki nigattiya omwiwelela?

¹⁸ Masiki valihu attu ohiligana, Yehova onfuna wi iyo nikale amudhaye, vina kannoona  iyo ninga muttorho waye. Txino ninodha omunyimula obe ottiya omwiwelela, masiki dhawene Yehova txipo kananinyanyale. Wila atonyihedhe mukalelo onakwela Yehova anaye, Yezu wahiloga musibo wa mwana wopawula. (Lk. 15:11-32) Babi ologiwe vamusiboni obu txipo kattiyile omujeedhela mwanaye. Vaganile mwanaye wiyelela vatakulu, babe wahimwakela n’ottaba. Akala ninottiya omwiwelela Yehova, nanda nitxinuwa, ninofwanyela okuluvela wi Babihu wokwela oli womala nawale wila anakele wili.

19. Yehova anakuputte dhavi obure wotene ototeyile na Adamu?

¹⁹ Babi wehu onele okuputta obure wotene ototeyile na Adamu. Mmalele Adamu ottega, Yehova ohigana wasakula vari va nlogo, attu 144.000 wila akale anamakutta vina amwene wirimu vamodha na Mwanaye. Yezu vamodha na abale analamulele na iyene, anele wakamihedha attu awiwelela okala oligana mwilaboni eswa. Abale anaviluwe nororomeleya nsaka na wehiwa womariha, Mulugu onele wattuva egumi yohimala. Babihu onele wagalala wawona anaye alobwana na ayana velaboni ya vati bali oliganene. Mohaganyedha nsaka ntto ninakale nowagalaliha!

20. Mikalelo gani dhintonyihedha wi Yehova ononikwela vaddiddi, nanda txini enasunzihu na nsunzo ninfarela?

²⁰ Txibarene, Yehova onotonyihedha wi ononikwela vaddiddi. Iyene Babi wororomeleya. Onovuruwana malobelo ehu, ononivaha dhinfunihu, dhojombeliwa dhomuyani na dhomaningoni. Ononishagiha vina ononikamihedha. Musogorho onele onivaha mareliho ohagalaliha. Jowagalaliha oziwa wi Babihu wa wirimu ononikwela vina ononizuzumela! Nsunzo ninfarela ninele osekeserha mikalelo dhinawodhihu omutonyihedha okwela wehu ninga anaye.