TANE MEKUN 6
Iehova, Keme Së, a Hnimi Së
“Haawe, thithi jë tune la: ‘Kakati fe.’”—MAT. 6:9.
NYIMA 135 Ithuemacany Ka Keukawa Qaathei Iehova: “Neköng, Inamacanepi”
MEKUN KA TRU *
1. Nemene la nyine troa pane kuca qëmekene troa ithanata kowe la joxu ne Peresi?
PANE mekune jë laka, easë e Peresi nge 2 500 hë lao macatre enehila. Easa tro Susani, ke easa ajane troa ithanata koi joxu. Ngo qëmekene troa ithanata me nyidrë, loi e troa pane sipon wanga troa humuthi së!—Esetera 4:11.
2. Nemene la hna ajan hnei Iehova Akötresie?
2 Easa madrin ke, tha ceitui Iehova kö memine la joxu ne Peresi! Ka draië catre kö Iehova hune la itre atre mus. Ngo, Nyidrëti a ajane tro sa ithanata koi Nyidrë o drai. Nyipici laka, Iehova la Atre Xupi Së, Akötresie Ka Tru Trene Men, nge Joxu Ka Sisitria. Ngo aja i Nyidrëti tro sa hë Nyidrë ka hape, “Kaka.” (Mat. 6:9) Easa madrin ke, Iehova a ajane tro sa easenyi catre koi Nyidrë!
3. Pine nemene matre meköti tro sa hë Iehova ka hape “Kaka,” nge nemene la hne së hna troa ce wang?
3 Meköti tro sa hë Iehova ka hape, “Kaka” ke, Nyidrëti la Qeqe ne mel. (Sal. 36:9) Iehova la Keme së, matre nyipiewekë tro sa drengethenge Nyidrë. Nyimutre la itre manathith hne së hna troa kapa qa ngön. (Heb. 12:9) Kola qaja la mel ka tha ase palua kö e koho hnengödrai maine e celë fen. Ngo hetrenyi la itre xaa manathith enehila. Tro sa ce wang la aqane amamane Iehova laka, Nyidrëti la Keme së. Tro fe sa ce wang la kepin matre xecie hnyawa koi së laka, tha tro kö Nyidrëti a nuaxöji së elany. Ngo tro sa pane ce wang la ka amamane ka hape, Iehova a hnimi së me thupë së.
IEHOVA KEME SË A HNIMI SË ME THUPË SË
Iehova a ajane troa easenyi catr koi së, tune la kem a ajane troa easenyi catr kowe la itre nekönatr (Wange ju la paragarafe 4)
4. Pine nemene matre jol koi itre xan troa goeë Iehova ceitu me ketre Kem?
4 Hapeu, jole kö koi së troa goeë Akötresie tune la Keme së? Ame koi itre xan, draië catre palaha Iehova matre, tha tro kö Nyidrëti a nyipiewekë së. Ame koi angatr, tha semesine angatre kö hnene la Akötresie Ka Tru Trenge Men. Ngo tha ajane kö Iehova tro sa hane mekun tun. Nyidrëti la ka xupi së nge aja i Nyidrëti tro sa imelekeu hnyawa me Nyidrë. Celë hi la hna qaja hnei Paulo aposetolo. Öni nyidrë kowe la itre atre Athenai ka hape, “tha ka nanyi kö [Iehova] koi së.” (Itre hu. 17:24-29) Akötresieti a ajane tro sa ithanata koi Nyidrë, tune la nekönatr a ithanata kowe la keme i nyën.
5. Nemene la ini hne së hna xom qa ngöne la hna melën hnene la ketre trejin?
5 Ame koi itre xan, jole catr troa goeë Iehova tune la ketre Kem ke, tha hna hnimi angatre kö hnene la sipu keme i angatr. Önine la ketre trejine föe: “Ka calogitr catre kaka. Ame lo eni a nyiqane ini tus, jole catre koi ni troa easenyi koi Iehova, Keme së e koho hnengödrai. Ngo ame hë la eni a atrepengöi Nyidrëti hnyawa, hna saze la mekunang.” Hapeu, celë fe kö la mekuna i epun? Maine eje hi, catre pi. Ijiji epuni fe troa hane easenyi catre koi Iehova me öhn laka, Nyidrëti la Keme së ka ihnim.
6. Thenge la Mataio 11:27, Iehova a xatua së tune kaa troa goeë Nyidrë ceitu me ketre Kem ka ihnim?
6 Iehova a xatua së troa goeë Nyidrë ceitu me ketre Kem. Hnei Nyidrëti hna amë la itre trengewekë me itre aqane ujë i Iesu, e hnine la Tusi Hmitrötr. (E jë la Mataio 11:27.) Hnei Iesu hna nyitipune la Keme i nyidrë, matre öni nyidrë: “Ame la atre öhnyi ni, ketre öhne fe hë angeic la Kem.” (Ioane 14:9) Hnei Iesu hna anyimua qeje Iehova ka hape, Keme së. Ame ngöne hi la foa lao Evangelia, traqa koi 165 la itre ijine Iesu a hë Iehova ka hape, “Kem.” Pine nemen? Ame la pane kepin ke, aja i nyidrëti troa amamane kowe la itre atr laka, Iehova la Keme i nyidrë ka ihnim.—Ioane 17:25, 26.
7. Nemene la ini hne së hna xom qa ngöne la aqane ujë i Iehova Nyidrë kowe la Nekö i Nyidrë?
7 Hetre ini hne së hna xom qa ngöne la aqane ujë i Iehova koi Iesu, Nekö i Nyidrë. Hnei Iehova palahi hna dreng me sa la itre thithi Iesu. (Ioane 11:41, 42) Nyimutre ju hë la itre jol ka traqa koi Iesu, ngo hnene palahi la Keme i nyidrëti hna hnimi nyidrë me xatua nyidrë.—Luka 22:42, 43.
8. Nemene la aqane thupë Iesu hnei Iehova?
8 Atre hi Iesu laka, Keme i nyidrëti la Qeqe ne mel. Öni Iesu: “Eni a mele hnei nyidrë.” (Ioane 6:57) Hnei Iesu hna mejiune kowe la Keme i nyidrë, nge hnei Iehova palahi hna thupëne la mele i nyidrë. Ame la ka sisitria ke, hnei Iehova hna xatua Iesu troa mele nyipici.—Mat. 4:4.
9. Nemene la aqane amamane Iehova laka, Nyidrëti la Keme ka ihnim me ka thupë Iesu?
9 Pine laka Nyidrëti la Keme ka ihnim, matre hnei Iehova hna amamane koi Iesu laka, tro kö Nyidrëti a troa xatua Iesu. (Mat. 26:53; Ioane 8:16) Eje hi laka, tha hnei Iehova kö hna thupë Iesu kowe la nöjei akötre i nyidrë, ngo hnei Nyidrëti hna xatua Iesu troa xomihnine la itre jol. Atre hi Iesu laka, tha ka cile huti kö la itre akötre i nyidrë. (Heb. 12:2) Hnei Iehova hna amamane laka, Nyidrëti a hnimi Iesu. Hnei Nyidrëti hna drei Iesu, me thupë nyidrë, me xatua nyidrë. (Ioane 5:20; 8:28) Tro sa ce wang la aqane thupë së me xatua së hnene la Keme së e koho hnengödrai.
AQANE THUPË SË HNENE LA KEME SË KA IHNIM
Kem ka ihnim a (1) dreng me (2) hamëne la ka nyipiewekë me (3) ini, me (4) thupëne la itre nekönatr. Celë hi aqane thupë së hnene la Keme së e koho hnengödrai (Wange ju la paragarafe 10-15) *
10. Thenge la Salamo 66:19, 20, nemene la aqane amamane Iehova la ihnimi Nyidrë?
10 Iehova a dreng la itre thithi së. (E jë la Salamo 66:19, 20.) Tha Nyidrëti kö a ami ifegon la itre thithi së. Nyidrëti pe a upi së troa catre thith. (1 Thes. 5:17) Ijije hi tro sa thithi koi Akötresie e nöjei ijin, ngacama easë ngöne la ketre götran. Tha hace kö koi Nyidrë troa dreng la itre thith; aja i Nyidrëti pe troa dreng la itre thithi së. Ame la easa öhn laka, Iehova a dreng la itre thithi së, easë easenyi catr koi Nyidrë. Önine la ketre atre cinyihan la Salamo: “Ini a hni Iehova qa ngöne la hnei nyidëti hna [drenge] la aqane ewekëng.”—Sal. 116:1.
11. Nemene la aqane sa Iehova la itre thithi së?
11 Iehova Keme së a dreng la itre thithi së me sa. Öni Ioane aposetolo: “E hetre ewekë hne së hna sipon thenge la aja i [Akötresie], tro kö nyidrëti a drei së.” (1 Ioane 5:14, 15) Eje hi, thatre kö së la aqane tro Iehova a sa la itre thithi së. Atre hi Nyidrëti la ka loi koi së. Celë hi matre ame itre xaa ijin, Nyidrëti a thipëne la itre sipo së, maine upi së pena troa pane treqen.—2 Kor. 12:7-9.
12-13. Nemene la itre aqane thupë së hnei Iehova?
12 Iehova a thupë së. Nyidrëti a kuca la itre nyine tro la itre kem a kuca. (1 Tim. 5:8) Nyidrëti a hamëne la ka nyipiewekë kowe la mele ne la itre nekö i Nyidrë. Xele kö Nyidrëti tro sa hnehengazon la nyine xen, me iheetr, maine uma. (Mat. 6:32, 33; 7:11) Pine laka Iehova la Keme së ka ihnim, matre Nyidrëti a thupëne tro sa hetrenyi la ka ijij göi elany.
13 Ame la ka sisitria, Iehova a hamëne la ka nyipiewekë matre tro sa imelekeu hnyawa me Nyidrë. Jëne la Tusi Hmitrötr, hnei Iehova hna amamane la nyipici göi Nyidrë, me göne la aja i Nyidrë, göne la aliene la mele së, me göne la ka troa traqa elany. Nyidrëti a wangatrunyi së, matre Nyidrëti a ini së la nyipici jëne la kem me thine së, maine ketre atr pena. Nge Nyidrëti palahi a xatua së jëne la itre qatre thup me itre xaa trejin ka macaj. Ketre, Iehova a ini së me itre trejine me easë ngöne la itre icasikeu. Celë hi itre xaa aqane amamane Iehova laka, Nyidrëti a thupë së tune la ketre kem.—Sal. 32:8.
14. Pine nemene matre Iehova a ini së, nge nemene la aqane kuca i Nyidrë?
14 Iehova a ini së. Tha ceitu së kö me Iesu ke, itre atr ka tha pexeje kö së. Ngo Iehova a ajane troa ini së. Celë hi matre, Nyidrëti a haji së. Öni Tusi Hmitrötr: “Ame la itre hnei Iehova hna hnim, nyidrëti a hajin.” (Heb. 12:6, 7) Nyimutre la itre aqane haji së hnei Iehova. Ame itre xaa ijin, kola ketri së hnene la hne së hna e Tusi Hmitrötr maine drenge la ketre mekun ngöne hna icasikeu. Maine pena, kola xatua së hnene la itre qatre thup. Eje hi laka, nyimutre la itre aqane haji së hnei Iehova, ngo Nyidrëti a ujë tune lai ke, Nyidrëti a hnimi së.—Iere. 30:11.
15. Nemene la aqane xatua së hnei Iehova?
15 Iehova a xatua së ngöne la itre ijine jol. Tune la keme së, Iehova a xatua së ngöne la kola traqa la itre jol. Jëne la uati hmitrötre i Nyidrë, Iehova a thupë së matre tha tro kö a hetre ethane kowe la aqane imelekeu së me Nyidrë. (Luka 11:13) Ketre, Iehova a thupëne la aliene hni së, nge Nyidrëti a xatua së ngöne la easa kucakuca. Nyidrëti a hamë mejiune koi së. Celë hi ka xatua së troa xomihnine la itre jol. Pane mekune jë: Ngacama nyimutre la itre jol ka traqa, ngo tro kö la Keme së e koho hnengödrai a lep apatrene la itre ewekë ka akötrë së. Tha ka cile huti kö la itre jole së, ngo ka epine palua la itre manathith hne së hna troa kapa qaathei Iehova.—2 Kor. 4:16-18.
THA TRO KÖ A NUAXÖJI SË HNENE LA KEME SË
16. Nemene la ka traqa ngöne la Adramu a tha idrei?
16 Ame la easa goeëne la hnei Iehova hna kuca ngöne lo Adramu a tria, easa öhne la ihnimi Nyidrë. Qaane lo Adramu a tha idrei, tha sine hë angeic la hnepe lapa i Iehova, ketre tune fe la itre matra i angeic. (Rom. 5:12; 7:14) Ngo ame pe, hnei Iehova hna xatuane la itre matra i Adramu.
17. Thupene la Adramu a tha idrei, nemene la hnei Iehova hna canga kuca?
17 Hnei Iehova hna ameköti Adramu, ngo hnei Nyidrëti fe hna thingehnaean troa xatuane la itre matra i Adramu. Hnei Nyidrëti hna canga perofetan ka hape, ame la itre ka drengethenge, tre, tro hmaca angatr a sine la hnepe lapa i Nyidrë. (Gen. 3:15; Rom. 8:20, 21) Celë hi matre, hnei Iehova hna hamëne la thupene mel, ene la mel hna huujën hnei Iesu, Nekö ne Hnimina i Nyidrë. Hnei Iehova hna amamane la ihnimi Nyidrëti koi së, ngöne la Nyidrëti a hamëne la Nekö i Nyidrë thatraqai së.—Ioane 3:16.
Maine hne së hna tria me ietra, tro kö Iehova, Keme së ka ihnim, a kepe së hmaca (Wange ju la paragarafe 18)
18. Nemene la ka amamane laka, Iehova a ajane troa kepe së ceitu me nekö i Nyidrë, ngacama hne së hna tria?
18 Ngacama itre atr ka tha pexeje kö së, ngo Iehova a ajane tro sa sine la hnepe lapa i Nyidrë, nge tha hace kö koi Nyidrëti troa xatua së. Ame itre xaa ijin, easa tria me nuetriji Iehova, ngo tha tro jë kö Nyidrëti a nuaxöji së. Hnei Iesu hna amamane la etrune la ihnimi Iehova kowe la itre nekö i Nyidrë, jëne la ceitune ne la nekön. (Luka 15:11-32) Ame ngöne la ceitune celë, ka mejiune palahi la kem troa bëeke hnene la nekö i nyidrë. Ame la angeic a bëek, kem a kepe angeice hnyawa. Maine hne së hna tria me iananyi me Iehova ngo hne së pe hna ietra, tha tro kö sa luelu laka, aja i Nyidrëti troa kepe së hmaca.
19. Nemene la aqane tro Iehova a apatrene la itre ethane la aqane ujë i Adramu?
19 Tro kö la Keme së a apatrene la itre ethane la aqane ujë i Adramu. Thupene la Adramu a tria, hnei Iehova hna iëne la 144 000 lao atr, matre troa joxu me atre huuj e koho hnengödrai me Iesu, Nekö i Nyidrë. Ame ngöne la fene hnyipixe, Iesu me itre ka ce musi me nyidrë a troa xatuane la itre atr ka drengethenge troa pexeje trootro. Thupene la itupath tixenuë, Akötresieti a troa hamë angatr la mel ka tha ase palua kö. Tro la Keme së a madrin elany ke, tiqa ha la fen hnene la itre nekö i Nyidrëti ka pexej. Drei la ketre ijine ka lolo!
20. Nemene la aqane amamane Iehova la ihnimi Nyidrë, nge nemene la hne së hna troa ce wang ngöne la ketre tane mekun?
20 Hnei Iehova hna amamane la ihnimi Nyidrëti koi së. Nyidrëti la Keme së. Nyidrëti a drenge la itre thithi së me hamë së la ka nyipiewekë, göne la mele së me göne la aqane imelekeu së me Nyidrë. Nyidrëti a ini së me xatua së. Ketre, nyimutre la itre manathithi hne së hna troa kapa elany qaathei Nyidrë. Easa madrine ke, kola hnimi së me thupë së hnene la Keme së! Tro la ketre tane mekun a amamane la aqane tro sa amamane la hni ne ole së kowe la ihnimi Nyidrë.
NYIMA 108 Ihnimi Nyipici i Akötresie
^ Iehova la Atre Xupi së me Atre Mus. Ngo Nyidrëti fe la Keme së ka ihnim nge ka thupë së. Tro la tane mekun celë a amamane la itre kepin, matre ijije hi tro sa goeë Nyidrë tune lai. Tro fe sa ce wang la kepin matre xecie hnyawa koi së laka, tha tro jë kö Iehova a nuaxöji së.
^ GÖTRANE: Foa lao iatr a amamane la ketre kem me kuku: kem a drenge hnyawa la nekö i nyidrë, kem a thupëne la nekö i nyidrëti jajiny, kem a inine la nekö i nyidrëti trahmany, nge nyidrëti a akeukawane la hni nyën. Hna desëne la wanakoime i Iehova matre troa amamane laka, nyimutre la itre aqane thupë së hnei Nyidrë.
