1. Ni dɔ tun b’a fɛ ka kuma Pɛrɛsi masacɛ fɛ, a tun ka ɲi ka mun lo kɛ fɔlɔ?

MIIRI k’a filɛ ko i be Ɛsitɛri ka wagati la Pɛrɛsi jamana na. I b’a fɛ ka kuma masacɛ fɛ. O kama, i be taga Suzi o min ye masadugu ye. Nka, a tɛ kun i la i ka kuma masacɛ fɛ n’a ma sira d’i ma. N’i y’o kɛ k’a sɔrɔ sira ma d’i ma, i be se ka faga o kosɔn!​—Ɛsit. 4:11.

2. Jehova b’a fɛ an k’ale jati cogo di?

² An ninsɔn ka di kosɔbɛ sabu Jehova tɛ komi Pɛrɛsi masacɛ! Jehova fanga ani a lɔyɔrɔ ka bon ka tɛmɛ adamadenw ka kuntigiw bɛɛ ta kan fɔɔ ka taga ka na. Nka, an be se ka kuma a fɛ wagati bɛɛ. A t’a fɛ an ka siran ka kuma ale fɛ. Ɲɛyirali fɛ, Jehova be ni bonyatɔgɔ kabakomanw ye i n’a fɔ Danbaga, Sebagayabɛɛtigi ani duniɲa kuru bɛɛ Masaba. Nka, a b’a fɛ an k’ale weele ko an “Faa.” (Mat. 6:9). An ninsɔn ka di kosɔbɛ k’a ye ko Jehova b’a fɛ an k’ale jati o cogo la!

3. Mun na an be se ka Jehova weele an “Faa”? An bena mun lo lajɛ barokun nin na?

³ A bɛnnin lo an ka Jehova weele an “Faa” sabu ale lo ye niin Dibaga ye (Zab. 36:10). Komi an Faa lo, an ka ɲi ka mɛnni kɛ a fɛ. N’an b’o kɛ, an bena dugabaw sɔrɔ (Eburuw 12:9). O dugaw dɔ ye ɲɛnamaya banbali ye sankolo la wala dugukolo kan. An be duga dɔw sɔrɔla sisan yɛrɛ. Barokun nin na, an bena a ye fɛɛn min b’a yira ko Jehova y’an Faa kanutigi ye kabini sisan. An bena a ye fana fɛɛn min kama an be se ka la a la ko a tɛna an to yen  abada. An k’a filɛ fɔlɔ fɛɛn min kama an be se ka la a la ko an sankolola Faa b’an kanu kosɔbɛ ani ko a b’a janto an na.

4. Mun na a ka gwɛlɛ dɔw ma ka Jehova jati u Faa ye?

⁴ Yala a ka gwɛlɛ i ma ka Ala jati i Faa ye wa? Dɔw be se k’a jati ko komi Jehova lɔyɔrɔ ka bon kosɔbɛ, u tɛ foyi ye a ɲɛɛ kɔrɔ. U tɛ la a la ko Sebagayabɛɛtigi Ala b’a janto olu la. Nka, an Faa kanutigi t’a fɛ an k’o miiri. A ye niin di an ma ani a b’a fɛ an ka jɛnɲɔgɔnya kɛ n’ale ye. Ciden Pol y’o tiɲɛn kumaw lo fɔ a lamɛnbagaw ye Atɛni dugu la. O kɔ, a y’a fɔ u ye ko Jehova “yɔrɔ man jan an si la.” (Kɛw. 17:24-29). Ala b’a fɛ an kelen kelen bɛɛ ka kuma ale fɛ i ko deen be kuma a bangebaga kanutigi fɛ cogo min na.

5. Balimamuso dɔ ka koo y’i dɛmɛ ka mun lo faamu?

⁵ A ka gwɛlɛ dɔ wɛrɛw ma ka Jehova jati u Faa ye sabu u yɛrɛ wolofaw m’a yira u la k’u b’u kanu kosɔbɛ wala u yɛrɛ ma o yira u la fewu. An k’a filɛ balimamuso dɔ ye min fɔ. A ko: “N’ facɛ tun ka fari kojugu. O kama, n’ ye bibulukalan daminɛ tuma min na, a tun ka gwɛlɛ n’ ma ka n’ magwɛrɛ Faa dɔ la min be sankolola la. Nka, n’ ye Jehova lɔn tuma min na, koow yɛlɛmana pewu.” Yala i be n’o miiriya ɲɔgɔn ye wa? N’o lo, la a la ko ele fana be se ka Jehova jati Faa ye min ɲɔgɔn tɛ yen.

6. Ka kɛɲɛ ni Matiyo 11:27 ye, Jehova y’an dɛmɛ cogo minw na walisa an k’ale jati an Faa kanutigi ye, u la dɔ ye juman ye?

⁶ Jehova y’an dɛmɛ walisa an k’ale jati an Faa kanutigi ye. A y’an dɛmɛ cogo minw na, u la dɔ ye ko a y’a kɛ u ye Yezu ka kumaw n’a ka kɛwalew sɛbɛ Bibulu kɔnɔ (Matiyo 11:27 kalan). Yezu y’a Faa ladegi cogo dafanin na fɔɔ a ko: “Ni mɔgɔ min ɲaa lara ne kan, o tigi ye n Faa fana ye.” (Zan 14:9). Yezu y’a yira siɲɛ caaman na ko Jehova y’an Faa ye. Evanzili naani nunu dɔrɔn kɔnɔ, Yezu ye Jehova weele siɲɛ 165 ɲɔgɔn ko “Faa.” Mun na Yezu kumana Jehova koo la siɲɛ caaman ten? Fɛɛn minw kama a y’o kɛ, o dɔ ye ko a tun b’a fɛ mɔgɔw ka la a la ko Jehova ye Faa kanutigi ye.​—Zan 17:25, 26.

7. Jehova y’a Dencɛ minɛ cogo min na, an be kalan jumanw lo sɔrɔ o la?

⁷ Jehova y’a Dencɛ Yezu minɛ cogo min na, an k’a filɛ an be kalan minw sɔrɔ o la. Jehova tun be Yezu ka deliliw lamɛn tuma bɛɛ. A tun b’o deliliw jaabi fana (Zan 11:41, 42). Gwɛlɛya o gwɛlɛya tun mana Yezu sɔrɔ, a tun b’a ye tuma bɛɛ ko a Faa b’a kanu ani ko a b’a dɛmɛ.​—Luka 22:42, 43.

8. Yezu mako tun be min na, Jehova y’o di a ma cogo di?

⁸ Yezu tun b’a lɔn ko a Faa lo ye niin di a ma ani ko a mako be min na walisa ka to niin na, a Faa lo b’o fana di a ma. A ko: “Ne be nii na [n’ Faa] barika la.” (Zan 6:57). Yezu y’a jigi bɛɛ la a Faa Jehova kan ani Jehova y’a makoɲɛfɛnw di a ma. Min yɛrɛ kɔrɔtanin lo ka tɛmɛ, o ye ko Jehova y’a mako wasa Alako ta fan fɛ.​—Mat. 4:4.

9. Jehova y’a yira cogo di ko a be Yezu kanu ani ko a b’a janto a la?

⁹ Jehova ye Faa kanutigi ye minkɛ, a y’a to Yezu y’a lɔn ko ale be n’a ye (Mat. 26:53; Zan 8:16). Jehova ma Yezu tanga tɔɔrɔw ma. Nka, a y’a dɛmɛ ka kɔrɔbɔliw muɲu. Yezu tun b’a lɔn ko tɔɔrɔ o tɔɔrɔ  tun mana a sɔrɔ, o tun ye wagati dɔɔni koo lo ye (Eburuw 12:2). Jehova y’a yira ko a b’a janto Yezu la a kɛtɔ k’a lamɛn, k’a mako wasa, ka fɔrɔmasɔn di a ma ani k’a dɛmɛ (Zan 5:20; 8:28). An k’a filɛ sisan cogo min na an sankolola Faa b’a janto an na i ko a y’a janto Yezu la cogo min na.

10. Ka kɛɲɛ ni Zaburuw 66:19, 20 ye, Jehova b’a yira cogo di ko a b’an kanu?

¹⁰ Jehova b’an ka deliliw lamɛn (Zaburuw 66:19, 20 kalan). An be se k’a deli koo minw na, siɲɛ daa min na ani wagati hakɛ min na, a ma daan sigi o la. A yɛrɛ b’an jija an k’ale deli tuma bɛɛ (1 Tes. 5:17). An be se ka Ala deli ni bonya ye tuma o tuma ani an mana kɛ yɔrɔ o yɔrɔ. A labilanin lo tuma bɛɛ k’an lamɛn. N’an b’a faamu ko Jehova b’an ka deliliw lamɛn, o b’a to an b’a kanu kosɔbɛ. Zaburu sɛbɛbaga dɔ ko: “Masaba koo ka di ne ye, bari a be ne ka daalili lamɛn.”​—Zab. 116:1.

11. Jehova b’an ka deliliw jaabi cogo di?

¹¹ An Faa t’an ka deliliw lamɛn dɔrɔn, a b’u jaabi fana. Ciden Zan b’an hakili sigi ko: “N’an ye fɛɛn o fɛɛn daali Ala fɛ, n’o kɛra a sago ye, an jigi b’a la ko a be mɛnni kɛ an fɛ.” (1 Zan 5:14, 15). N’a sɔrɔ Jehova tɛna an ka deliliw jaabi i ko an b’a fɛ cogo min na. A b’a lɔn min ka fisa an ma. O kama, an be min ɲini a fɛ, tuma dɔw la a t’o kɛ an ye wala a b’a fɛ an ka kɔnɔni kɛ fɔlɔ.​—2 Kor. 12:7-9.

12-13. An sankolola Faa b’an mako wasa cogo di?

¹² Jehova b’an mako wasa. A be min ɲini denfaw bɛɛ fɛ, ale yɛrɛ b’o kɛ (1 Tim. 5:8). A b’a deenw makoɲɛfɛnw di u ma. A t’a fɛ an ka hami dumuni, fani wala siyɔrɔ koo la (Mat. 6:32, 33; 7:11). Jehova ye Faa kanutigi ye minkɛ, a yɛrɛ ye labɛn kɛ walisa an k’an makoɲɛfɛnw bɛɛ sɔrɔ sini ma.

¹³ Min yɛrɛ kɔrɔtanin lo kosɔbɛ, o ye ko Jehova b’an mako wasa Alako ta fan fɛ. Bibulu sababu fɛ, a ye tiɲɛn yira an na a yɛrɛ ani a sagonata koo la. An ka ɲɛnamaya kuun ye min ye ani siniɲasigi bena kɛ min ye, a y’o fana yira an na. A y’an dɛmɛ a kɛtɔ ka tɛmɛ an bangebagaw wala mɔgɔ wɛrɛw fɛ k’an kalan ale koo la. A be tɛmɛ diinan mɔgɔkɔrɔ kanutigiw ani balima kolɔnbaga wɛrɛw fɛ k’an dɛmɛ halibi walisa an ka kɛ a teriw ye. Jehova be tɛmɛ kafo ka lajɛnw fana fɛ walisa ka an n’an balimaw kalan. A be tɛmɛ o fɛɛrɛw ani fɛɛrɛ wɛrɛw fɛ k’a yira an na ko ale y’an Faa ye ani ko a b’a mako don an kelen kelen bɛɛ la.​—Zab. 32:8.

14. Mun na Jehova be fɔrɔmasɔn di an ma? A b’o kɛ cogo di?

¹⁴ Jehova be fɔrɔmasɔn di an ma. Yezu tun dafanin lo. Nka, anw dafanin tɛ. O la n’an Faa kanutigi be fɔrɔmasɔn dira an ma, a b’an kolo tuma dɔw la. A b’a fɔ an ye a ka Kuma kɔnɔ ko: “Mɔgɔ min koo ka di Matigi [Jehova] ye, a b’o le ladi.” (Eburuw 12:6, 7). A b’an ladi wala k’an kolo cogo caaman na. Ɲɛyirali fɛ, an be se ka fɛɛn dɔ kalan a ka Kuma kɔnɔ wala ka fɛɛn dɔ mɛn lajɛn na ani an b’a ye ko an ka ɲi ka yɛlɛmani don an ka miiriyaw wala an ka kɛwalew la. Wala an mako be dɛmɛ min na, diinan mɔgɔkɔrɔw be se k’o di an ma. Jehova mana tɛmɛ fɛɛrɛ o fɛɛrɛ fɛ walisa k’an kolo, a b’o kɛ sabu a b’an kanu.​—Zer. 30:11.

15. Jehova b’an dɛmɛ cogo jumanw na?

¹⁵ Jehova b’an dɛmɛ an ka kɔrɔbɔliw muɲu. Faa kanutigi b’a deenw dɛmɛ  wagati gwɛlɛw na. O cogo kelen na, an sankolola Faa b’an dɛmɛ kɔrɔbɔliw tuma na. A b’a ka hakili senu di an ma walisa k’an latanga Alako ta fan fɛ (Luka 11:13). Jehova b’an dɛmɛ fana n’an fari fagara. Ɲɛyirali fɛ, a ye jigiya ɲuman di an ma. O jigiya b’an dɛmɛ k’an ka gwɛlɛyaw muɲu. A to i hakili la ko koo jugu minw bɛɛ be kɛra an na, an Faa kanutigi bena daan sigi u la ani k’u nɔfɛkow bɛɛ ban. Gwɛlɛya o gwɛlɛya b’an kan, o ye banta ye. Nka, Jehova ka dugaw tɛ ban abada!​—2 Kor. 4:16-18.

16. Mun lo kɛra tuma min na Adama ma mɛnni kɛ a Faa kanutigi fɛ?

¹⁶ Jehova ye min kɛ tuma min na Adama ma mɛnni kɛ a fɛ, o b’a yira ko a b’an kanu. Kabi tuma min na Adama ma mɛnni kɛ a sankolola Faa fɛ, ale n’a deenw tɛ Jehova ka denbaya kɔnɔ tugun (Ɔrɔm. 5:12; 7:14). Nka, Jehova ye labɛn dɔ kɛ walisa ka Adama bɔnsɔnw dɛmɛ.

17. Adama ka jurumu kɛnin kɔ, Jehova sinna ka mun lo kɛ?

¹⁷ Jehova ye Adama ɲangi, nka a ye layidu ta ko a bena Adama bɔnsɔnw dɛmɛ. Jurumu kɛnin kɔ, a sinna ka layidu ta ko Adama bɔnsɔn minw bena mɛnni kɛ ale fɛ, olu bena kɛ a ka denbayamɔgɔw ye (Zɛnɛzi 3:15; Ɔrɔm. 8:20, 21). A bena o kɛ a Dencɛ kanulen Yezu ka kunmabɔsara barika la. Jehova kɛtɔ k’a Dencɛ di an kosɔn, a y’a yira ko a b’an kanu kosɔbɛ.​—Zan 3:16.

18. Mun na an be se ka la a la ko Jehova b’a fɛ an ka kɛ a deenw ye, hali n’an y’an mabɔ a la?

¹⁸ Hali n’an ye jurumutɔw ye, Jehova b’a fɛ an ka kɛ a ka denbayamɔgɔw ye. A t’a jati abada ko an ye doni ye ale fɛ. N’a sɔrɔ an ye Jehova dusu tiɲɛ wala an y’an mabɔ a la. O bɛɛ n’a ta, a jigi b’a la ko an bena kɔsegi ale ma. Walisa k’a  yira Jehova b’a deenw kanu cogo min na, Yezu ye ntalen la deen tununin dɔ koo la (Luka 15:11-32). O ntalen kɔnɔ, facɛman jigi tun b’a la kosɔbɛ ko a dencɛ bena kɔsegi soo. Tuma min na dencɛman kɔsegira, a faa y’a bisimila ni ninsɔndiya ye. N’an y’an mabɔ Jehova la, nka an nimisanin lo, an ka la a la ko an Faa kanutigi labɛnnin lo k’an bisimila.

19. Jehova bena Adama ka jurumu nɔfɛkow bɛɛ ban cogo di?

¹⁹ An Faa bena Adama ka jurumu nɔfɛkow bɛɛ ban. Adama ka murutili kɔ, Jehova y’a latigɛ ka mɔgɔ 144 000 sugandi dugukolo kan k’u kɛ a deenw ye. O mɔgɔw bena kɛ masaw ni sarakalasebagaw ye sankolo la n’a Dencɛ ye. Adamaden minw be mɛnni kɛ Jehova fɛ, Yezu n’a marakɛɲɔgɔnw bena olu dɛmɛ u ka kɛ mɔgɔ dafaninw ye duniɲa kura kɔnɔ. Minw bena to kantigiya la kɔrɔbɔli laban na, Ala bena ɲɛnamaya banbali di u ma. O wagati la, an Faa ninsɔn bena diya k’a ye ko dugukolo fanin lo a dencɛw n’a denmuso dafaninw na. O wagati bena diya yɛrɛ le!

20. Jehova y’a yira cogo di ko a b’an kanu kosɔbɛ? An bena mun lo ye barokun nata la?

²⁰ Jehova y’a yira ko a b’an kanu kosɔbɛ. A ye Faa ye min ɲɔgɔn tɛ yen. A b’an ka deliliw lamɛn ani a b’an mako wasa farisogo ani Alako ta fan fɛ. A be fɔrɔmasɔn di an ma ani a b’an dɛmɛ. A bena dugabaw lase an ma sini ma fana. An ninsɔn ka di yɛrɛ le k’a lɔn ko an Faa b’an kanu ani ko a b’a janto an na! An minw y’a deenw ye, an be se k’a yira cogo di ko an b’a waleɲuman lɔn a ka kanuya kosɔn? An bena o lo ye barokun nata la.