1. Na cava me cakava e dua ke via vosa vua na tui Perisia?

KAYA mada ke o tiko e Perisia ena rauta na 2,500 na yabaki sa oti. O via tukuna e dua na ka vua na tui ni vanua ya, o mani gole sara ina koro vakaturaga o Susani. O na doudou ga mo lai tu ena mata ni tui ke sa vakadonuya mai nomu kerekere. Ke sega, o na rawa sara ga ni vakamatei!—Esit. 4:11.

2. Na cava e vinakata o Jiova nida via vosa vua?

² Eda marau ni sega ni vakataki tui Perisia o Jiova! E cecere sara vei ira na iliuliu e vuravura, ia eda rawa ni vosa vua ena gauna cava ga. E vinakata meda doudou ni torovi koya. Kena ivakaraitaki, e kilai o Jiova me Dauveibuli Cecere, Kalou Kaukaua Duadua, e Turaga Cecere Duadua tale ga, ia e sureti keda meda kacivi koya ‘Tamada.’ (Maciu 6:9) Eda marau gona ni vinakata o Jiova meda veivolekati!

3. Na cava meda kacivi Jiova kina me ‘Tamada’? Cava eda na vulica ena ulutaga qo?

³ E donu vinaka nida vakatokai Jiova me ‘Tamada,’ ni iVurevure ni bula. (Same 36:9) Ni Tamada, e noda itavi meda talairawarawa vua. Nida cakava na ka e vinakata, eda na marautaka e levu na veivakalougatataki. (Iper. 12:9) Qori e okati kina noda rawata na bula tawamudu e vuravura se lomalagi. Eda vakalougatataki tale ga ena gauna qo. Eda na vulica ena ulutaga qo na sala e vakaraitaka kina o Jiova ni Tama dauloloma kei na vuna meda nuidei kina ni na sega vakadua ni biuti keda ena gauna se bera mai. Ia meda dikeva  mada e liu na vuna meda nuidei kina ni lomani keda vakalevu na Tamada vakalomalagi, e kauaitaki keda tale ga.

4. Na cava e dredre kina vei ira eso mera raici Jiova me Tamadra?

⁴ Vakacava e dau dredre mo raici Jiova me Tamamu? Eso era nanuma nira tawayaga nira vakasamataki Jiova. Era vakatitiqataka ni kauaitaki ira sara ga na Kalou Kaukaua Duadua. Ia e sega ni vinakata o Jiova me va qori noda rai. E solia vei keda na bula, e vinakata tale ga meda veiwekani voleka kei koya. Ni vakamatatataka na rai qori na yapositolo o Paula vei ira e Aceni, e vakamacalataka sara ni o Jiova e ‘sega ni yawa vei keda yadua.’ (Caka. 17:24-29) E vinakata gona na Kalou meda vosa vua me vaka ga nona vosa e dua na gone vua na nona itubutubu dauloloma, e dau veikauaitaki.

5. Na cava eda vulica ena ka e tukuna e dua na tacida yalewa?

⁵ Eso ena rairai dredre mera raici Jiova me Tamadra ni sega ni lomani ira vakalevu o tamadra dina, se a sega sara ga ni lomani ira se kauaitaki ira. Dikeva na ka e tukuna e dua na tacida yalewa. E kaya, “E dau vosataki au vakalialia o tamaqu. Niu tekivu vuli iVolatabu, e dredre meu veivolekati kei na Tamada vakalomalagi. Ia e veisau qori niu mai kilai Jiova vinaka.” Vakacava e dau va qori nomu rai? Kua ni yalolailai, toso na gauna o na rawa ni raici Jiova me Tamamu vinaka duadua.

6. Me vaka e tukuni ena Maciu 11:27, cava e dua na sala e vukei keda kina o Jiova meda raici koya me Tamada dauloloma?

⁶ Dua na sala e vukei keda kina o Jiova meda raici koya me Tamada dauloloma, oya ni raica me volatukutukutaki ena iVolatabu na ka e tukuna o Jisu kei na ka e cakava. (Wilika Maciu 11:27.) E ucui Tamana vinaka sara ga o Jisu, e rawa gona ni tukuna: “O koya sa raici au sa raici Tamaqu tale ga.” (Joni 14:9) Ni dau vakamacalataki Jiova o Jisu, e vakayagataka vakalevu na vosa Tamaqu. Ni laurai na va na Kosipeli, e rauta ni 125 na vanua e cavuta kina o Jisu na vosa “Tamaqu” me dusi Jiova. Na cava e vakamacalataki Jiova kina vakalevu o Jisu? Dua na vuna oya meda nuidei ni o Jiova e Tama dauloloma.—Joni 17:25, 26.

7. Na cava eda vulica vei Jiova ena ka e cakava vei Luvena?

⁷ Dikeva mada na veika eda vulica vei Jiova ena ka e cakava vei Luvena o Jisu. E dau rogoca o Jiova na masu kece nei Jisu. E sega ni rogoca wale ga nona masu, e sauma sara ga. (Joni 11:41, 42) Se mani veivakatovolei cava e sotava o Jisu, e kila ni dau lomani koya tu ga o Tamana, e dau tokoni koya.—Luke 22:42, 43.

8. Na cava e vakarautaka o Jiova vei Jisu?

⁸ E kila o Jisu ni o Tamana e iVurevure ni nona bula, e dau vakarautaka tale ga na ka e gadreva. Sa rauta me tukuna: “Au bula . . . ena vuku i Tamaqu.” (Joni 6:57) E nuitaki Tamana vakatabakidua o Jisu. Io, e vakarautaka o Jiova na ka me bula kina. Koya e bibi sara, e tokoni Jisu me yalodina tiko ga.—Maciu 4:4.

9. E vakaraitaka vakacava o Jiova vei Jisu ni Tama dauloloma, e dau veikauaitaki?

⁹ Ni Tama dauloloma o Jiova, e vinakata me nuidei o Jisu ni na tokoni koya. (Maciu 26:53; Joni 8:16) E sega ni tarova o Jiova na leqa kece e sotava o Jisu, ia e vukei koya me vosota. E kila o Jisu ni na lekaleka ga na nona vakararawataki.  (Iper. 12:2) E vakaraitaka o Jiova ni lomani Jisu ena nona dau rogoca nona masu, vakarautaka na ka e yaga vua, vakavulici koya, e tokoni koya tale ga. (Joni 5:20; 8:28) Meda dikeva mada na sala e vukei keda tale ga kina va qori o Jiova.

10. Me vaka e tukuni ena Same 66:19, 20, e vakaraitaka vakacava o Jiova ni lomani keda?

¹⁰ O Jiova e rogoca noda masu. (Wilika Same 66:19, 20.) E sega ni vinakata meda yalana noda ivakarau ni masu, e uqeti keda meda masu wasoma. (1 Ces. 5:17) Eda rawa ni masu vei Jiova ena veidokai ena gauna se vanua cava ga. E dau cakacaka o Jiova, ia e tu vakarau ena veigauna me rogoci keda. Nida kila ni dau rogoca o Jiova na noda masu, eda na volekati koya. E kaya na daunisame: “Au lomani Jiova ni rogoca o koya na domoqu.”—Same 116:1.

11. E dau sauma vakacava o Jiova na noda masu?

¹¹ E dau rogoca o Jiova noda masu, e sauma tale ga. E vakadeitaka na yapositolo o Joni: “Eda kila se cava ga eda kerea me salavata kei na lomana, ena rogoci keda o koya.” (1 Joni 5:14, 15) E macala ni na rairai sega ni sauma o Jiova noda masu ena sala eda namaka. Ia ni kila na ka e vinaka vei keda, ena sega ni cakava na ka eda kerea ena so na gauna, se vinakata meda wawa.—2 Kor. 12:7-9.

12-13. Na cava e vakarautaka vei keda o Jiova?

¹² E vakarautaka o Jiova na ka e yaga vei keda. E cakava na ka e vakaroti ira kece kina na tama. (1 Tim. 5:8) E vakarautaka o Jiova na ka vakayago mera bula kina na luvena. E sega ni vinakata meda lomaocaocataka na keda, noda isulu, se vanua meda tiko kina. (Maciu 6:32, 33; 7:11) Ni Tama dauloloma o Jiova, e raica me vakarautaki na veika ena yaga vei keda ena gauna se bera mai.

¹³ Koya e bibi sara, e vakarautaka o Jiova na veika vakayalo meda veivolekati kina kei koya. E vakayagataka nona Vosa meda kila kina na ka dina me baleti koya, nona inaki, na vuna e buli keda kina, kei na veika ena yaco ena gauna se bera mai. E kauaitaki keda yadua sara ga ni vakayagataki rau noda itubutubu se dua tale me vakavulici keda ena iVolatabu meda kilai koya kina. E vukei keda o Jiova me dei noda veitokani kei koya ni vakayagataki ira na qase ni ivavakoso kei ira na mataveitacini matua. E vakavulici keda tale ga ena soqoni vaKarisito kece. Io, e vakaraitaka o Jiova ena sala qori kei na levu tale ni kauaitaki keda kece me vaka na tama.—Same 32:8.

14. Na cava e vakavulici keda kina o Jiova? E vakavulici keda vakacava?

¹⁴ E vakavulici keda o Jiova. Eda sega ni vakataki Jisu nida ivalavala ca. Dua gona na sala e vakavulici keda kina na Tamada dauloloma, oya ni vakadodonutaki keda ena gauna veiganiti. E tukuni ena nona Vosa: “O koya e lomana o Jiova e vakavulica.” (Iper. 12:6, 7) E levu na sala e vakavulici keda se vakadodonutaki keda kina o Jiova. Kena ivakaraitaki, eda na rairai liaca eso na ka meda vakavinakataka nida wilika nona Vosa, se na ka eda rogoca ena soqoni. De dua ena vakadodonutaki keda o Jiova ni vakayagataki ira na qase ni ivavakoso. Ia se sala cava e vakayagataka o Jiova, e dau yavutaki tu ga ena loloma.—Jere. 30:11.

15. E taqomaki keda vakacava o Jiova?

¹⁵ E vukei keda o Jiova meda vosota na veivakatovolei. Me vaka ga na Tama  dauloloma e tokoni ira na luvena ena gauna dredre, e tokoni keda tale ga na Tamada vakalomalagi nida vakatovolei. E vakayagataka nona yalo tabu me taqomaki keda mai na veika ena vakaleqa noda bula vakayalo. (Luke 11:13) E vukei keda tale ga o Jiova ena gauna eda yalolailai kina. Kena ivakaraitaki, e vakarautaka vei keda e dua na inuinui totoka. Na inuinui qori ena uqeti keda meda vosota na veika dredre. Vakasamataka mada qo: Se mani vakacava na leqa eda sotava, ena vakaotia kece qori na Tamada dauloloma. E lekaleka ga na veika dredre, ia e tawamudu na veivakalougatataki i Jiova.—2 Kor. 4:16-18.

16. Na cava e yaco ni talaidredre o Atama vua na Tamana dauloloma?

¹⁶ Eda vakadinadinataka nona lomani keda o Jiova ena sala e walia kina na leqa ena were o Iteni. Ni talaidredre o Atama, sa sega ni qai lewena na vuvale mamarau nei Jiova, wili kina o ira kece na nona kawa. (Roma 5:12; 7:14) E mani cakava o Jiova e dua na ka me vukei ira kina.

17. Ni talaidredre o Atama, na cava e cakava o Jiova?

¹⁷ E totogitaki Atama o Jiova, ia e vakarautaka e dua na inuinui vei ira nona kawa. E yalataka nira na mai lewe tale ni nona vuvale o ira kece na talairawarawa. (Vkte. 3:15; Roma 8:20, 21) Me rawati qori, e vakarautaka o Jiova na isoro ni veivoli i Luvena lomani. Ni soli Luvena o Jiova ena vukuda, e vakaraitaka na levu ni nona lomani keda.—Joni 3:16.

18. Na cava meda nuidei kina ni lomani keda o Jiova me vaka nida luvena, ke da biuti koya mada ga?

¹⁸ Eda tamata ivalavala ca, ia e vinakata o Jiova meda lewe ni nona vuvale,  ena sega vakadua ni oca me vukei keda. Eda na rairai vakararawataki koya se biuti koya ena so na gauna, ia e vakanuinui tu nida na lesu vua. E vakamacalataka o Jisu na loloma vakatama i Jiova ena italanoa ni gone cidroi. (Luke 15:11-32) E vakanuinui tu ga o tamana ni na lesu mai o luvena ena dua na gauna. Ena gauna e lesu yani kina o luvena, e tu vakarau o tamana me ciqomi koya. Ke da biuti Jiova ia eda veivutuni, meda nuidei ni na tu vakarau na Tamada dauloloma me ciqomi keda tale.

19. Ena vakaotia vakacava o Jiova na leqa e vakavuna o Atama?

¹⁹ Ena vakaotia na Tamada vakalomalagi na leqa kece e vakavuna o Atama. Ena gauna e talaidredre kina o Atama, e vakatulewataka o Jiova me digitaka e le 144,000 mai vuravura mera veiliutaki kei Luvena mai lomalagi, mera tui, mera bete tale ga. Era na qai vukei ira kece na talairawarawa mera bula uasivi ena vuravura vou. Nira yalodina ena iotioti ni veivakatovolei, ena qai vakaicovitaki ira na Kalou mera bula tawamudu. Ena marau dina na Tamada ni raica nira tawana na vuravura na luvena uasivi. Qori e dua dina na gauna vakairogorogo!

20. E vakaraitaka vakacava o Jiova ni lomani keda vakalevu? Cava eda na vulica ena ulutaga tarava?

²⁰ E vakaraitaka o Jiova na levu ni nona lomani keda. E Tamada vinaka duadua. E dau rogoca noda masu, e vakarautaka na ka e yaga vei keda vakayago, vakayalo tale ga. E vakavulici keda, e tokoni keda. E levu tale ga na veivakalougatataki e yalataka tu. Eda marau gona nida kila ni lomani keda na Tamada vakalomalagi, e kauaitaki keda tale ga! Eda na vulica ena ulutaga tarava na sala meda vakavinavinakataka kina na nona loloma.