1. Etɛ axɔ́su Pɛsi tɔn gɔ́n yiyi ka byɔ?

MǏ NI ɖɔ ɖɔ a ɖò gbɛ̀ ɖò xwè 2 500 mɔ̌ ɖíe ɖò Pɛsi. A jló na ɖɔ xó dó nǔɖe jí nú axɔ́su ɔ, enɛ wu ɔ, a yì fí e é ɖè é ɖò Suzi. Amɔ̌ cobonu a na ɖɔ xó nú axɔ́su ɔ ɔ, é ɖó na na gbè we hwɛ̌. É ma nyí mɔ̌ ǎ ɔ, è sixu hu we!—Ɛst. 4:11.

2. Nɛ̌ Jehovah ka ba ɖɔ nǔ ni nɔ cí nú mǐ dó xó ɖiɖɔ n’i wu?

² Mǐ dókú tawun ɖɔ Jehovah kún cí axɔ́su Pɛsi tɔn enɛ ɖɔhun ó! Jehovah hugǎn gbɛtɔ́ ɖebǔ e ko nyí acɛkpatɔ́ lɛ é flaflá tɔn, é ɖò mɔ̌ có, mǐ sixu ɖɔ xó n’i hwebǐnu. É ba ɖɔ mǐ ni vo bo ɖɔ xó nú emi. Ði kpɔ́ndéwú ɔ, Jehovah ɖó tɛnmɛ-nyikɔ ɖaxó ɖaxó lɛ, ɖi Gbɛɖotɔ́ ɖaxó, Acɛbǐnɔ kpo Aklunɔ Nǔbǐwukpétɔ́ kpo có, é ka ba ɖɔ mǐ ni nɔ zán xókwín “Tɔ́” e nyí xókwín wanyiyi tɔn ɖé é dó ɖɔ xó xá emi. (Mat. 6:9) Ba e Jehovah ba ɖɔ mǐ ni vɛ́ kpo emi kpo gbɔn mɔ̌ é byɔ lanmɛ nú mɛ tawun!

3. Etɛwu mǐ ka sixu nɔ ylɔ́ Jehovah ɖɔ “Tɔ́”? Etɛ lɛ jí xóta elɔ ka na ɖɔ xó dó?

³ É sɔgbe ɖɔ mǐ ni nɔ ylɔ́ Jehovah ɖɔ “Tɔ́,” ɖó é wɛ nyí Jɔtɛn gbɛ̀ mǐtɔn tɔn. (Ðɛh. 36:10) Ðó é nyí Tɔ́ mǐtɔn wutu ɔ, mǐ ɖó na nɔ setónú n’i. Enyi mǐ nɔ wà nǔ e é byɔ mǐ lɛ é ɔ, mǐ na ɖu vivǐ nyɔna jiwǔ lɛ tɔn. (Ebl. 12:9) Gbɛ̀ mavɔmavɔ ɖò jixwé alǒ ayikúngban jí ɖò nyɔna enɛ lɛ mɛ. Mǐ nɔ lɛ́ ɖu vivǐ nǔ gegě tɔn dìn. Xóta elɔ na ɖɔ xó dó nǔ ɖěɖee xlɛ́ ɖɔ Jehovah nyí Tɔ́ wanyiyinɔ mǐtɔn dìn é, kpo nǔ e wu mǐ sixu kúdeji ɖɔ é kún na jó mǐ dó gbeɖé ɖò sɔgudo ó é kpo jí. Amɔ̌ jɛ nukɔn hwɛ̌ ɔ, mǐ ni gbéjé nǔ e wu mǐ sixu kúdeji  ɖɔ Tɔ́ mǐtɔn jixwé tɔn ɔ yí wǎn nú mǐ tawun bo nɔ lɛ́ kpé nukún dó mǐ wu é kpɔ́n.

4. Etɛwu é ka nɔ vɛwǔ nú mɛɖé lɛ bɔ ye na kpɔ́n Mawu dó mɔ Tɔ́ yetɔn?

⁴ É nɔ vɛwǔ nú we bɔ a na kpɔ́n Mawu dó mɔ Tɔ́ towe wɛ à? Mɛɖé lɛ sixu mɔ ɖɔ emi hwe bo kún sɔ nǔtí ɖò Jehovah kpá ó. Ye nɔ xò nǔ kpɔ́n ɖɔ Mawu Nǔbǐwukpétɔ́ ɔ nɔ kpé nukún dó ye mɛ ɖokpo ɖokpo wu. Amɔ̌, Tɔ́ wanyiyinɔ mǐtɔn nɔ ba ɖɔ nǔ ni nɔ cí mɔ̌ nú mǐ ǎ. É na mǐ gbɛ̀ bo ba ɖɔ mǐ ni ɖó kancica ɖé kpo emi kpo. Hwenu e Mɛsɛ́dó Pɔlu ɖɔ xó dó nǔgbo enɛ jí gudo é ɔ, é tinmɛ nú tóɖóetɔ́ tɔn lɛ ɖò Atɛni ɖɔ Jehovah kún “lín dó ɖokpo ɖokpo mǐtɔn [ó].” (Mɛ. 17:24-29) Lee vǐ ɖé nɔ ɖɔ xó nú mɛjitɔ́ wanyiyinɔ e nɔ lɛ́ kpé nukún dó mɛ wu é ɖé faa gbɔn é wɛ Mawu ba ɖɔ ɖokpo ɖokpo mǐtɔn ni nɔ ɖɔ xó nú emi gbɔn.

5. Etɛ nǔ e nɔví nyɔnu ɖé ɖɔ é ka kplɔ́n mǐ?

⁵ É nɔ vɛwǔ nú mɛ ɖevo lɛ bɔ ye na kpɔ́n Jehovah dó mɔ Tɔ́ yetɔn, ɖó tɔ́ e jì ye é nɔ ɖè wanyiyi kpo xomɛnyínyɔ́ kpo xlɛ́ sɔmɔ̌ ǎ, alǒ é nɔ ɖè ɖebǔ xlɛ́ ǎ. Kpɔ́n nǔ e nɔví nyɔnu ɖé ɖɔ é. É ɖɔ: “Tɔ́ ce nylahun tawun. Hwenu e un jɛ Biblu kplɔ́n jí tlolo é ɔ, é vɛwǔ nú mì bɔ un na vɛ́ kpo Tɔ́ jixwé tɔn ɖé kpo. Amɔ̌, hwenu e un wá tuùn Jehovah é ɔ, nǔ bǐ huzu.” Nǔ cí mɔ̌ nú hwi lɔ wɛ à? Enyi mɔ̌ hǔn, kúdeji ɖɔ hwiɖesu sixu wá mɔ ɖɔ Jehovah nyí Tɔ́ ɖagbe hugǎn ɔ.

6. Sɔgbe xá Matie 11:27 ɔ, ɖɔ ali e nu Jehovah d’alɔ mǐ bɔ mǐ nɔ kpɔ́n ɛ dó mɔ Tɔ́ wanyiyinɔ mǐtɔn ɖè é ɖokpo.

⁶ Ali e nu Jehovah d’alɔ mǐ bɔ mǐ nɔ mɔ ɖɔ é nyí Tɔ́ wanyiyinɔ mǐtɔn ɖè é ɖokpo wɛ nyí ɖɔ é bló bɔ è wlan xó kpo nǔwalɔ Jezu tɔn lɛ kpo dó Biblu mɛ. (Xà Matie 11:27.) Jezu ɖè jijɔ Tɔ́ tɔn tɔn lɛ xlɛ́ bɔ nǔ bǐ vɔ ɖ’ewu; é sín enɛ wu bɔ é sixu ɖɔ: “Mɛ e mɔ mì ɔ ko mɔ Tɔ́ ɔ.” (Jaan 14:9) Jezu ɖɔ xó dó azɔ̌ e wà wɛ Jehovah ɖè Tɔ́ ɖé ɖɔhun é wu hwɛhwɛ. Ðò Wɛnɖagbe-Wema ɛnɛ lɛ kɛɖɛ mɛ ɔ, hwɛhwɛ wɛ Jezu zán xókwín “Tɔ́” ɔ dó dó gesí Jehovah. Etɛwu Jezu ka ɖɔ xó dó Jehovah wu sɔmɔ̌? Hwɛjijɔ ɖokpo wɛ nyí ɖɔ gbɛtɔ́ lɛ ni ganjɛwu ɖɔ Jehovah nyí Tɔ́ wanyiyinɔ ɖé.—Jaan 17:25, 26.

7. Etɛ ali e nu Jehovah wà nǔ xá Vǐ tɔn ɖè é ka sixu kplɔ́n mǐ?

⁷ Mǐ ni kpɔ́n nǔ e ali e nu Jehovah wà nǔ xá Vǐ tɔn Jezu ɖè é sixu kplɔ́n mǐ é. Jehovah nɔ ɖótó ɖɛ Jezu tɔn lɛ tɛgbɛ. É ka ɖótó kɛɖɛ ǎ, loɔ, é lɛ́ na sinkɔn nú ye. (Jaan 11:41, 42) Mɛtɛnkpɔn ɖebǔ na bo kpannukɔn Jezu ɔ, é nɔ mɔ ɖɔ Tɔ́ emitɔn yí wǎn nú emi bo nɔ lɛ́ nɔ gudo nú emi.—Luk. 22:42, 43.

8. Ali tɛ lɛ nu Jehovah ka sú hudo Jezu tɔn lɛ sín dò ɖè?

⁸ Jezu tuùn ɖɔ Tɔ́ emitɔn wɛ nyí Jɔtɛn gbɛ̀ emitɔn tɔn, bo nɔ lɛ́ kpé nukún dó gbɛ̀ emitɔn wu, enɛ wu ɔ, é ɖɔ emi “ɖò gbɛ̀ ɖò acɛ tɔn mɛ.” (Jaan 6:57) Jezu ganjɛ Tɔ́ tɔn wu bǐ mlɛ́mlɛ́, bɔ Tɔ́ tɔn sú nǔ e hudo è ɖò agbaza lixo lɛ é sín dò. Taji bǐ ɔ, Jehovah kpé nukún dó Jezu wu ɖò gbigbɔ lixo.—Mat. 4:4.

9. Nɛ̌ Jehovah ka xlɛ́ Jezu ɖɔ emi nyí Tɔ́ wanyiyinɔ e nɔ lɛ́ kpé nukún mɛ wu é ɖé gbɔn?

⁹ Ðó Jehovah nyí Tɔ́ wanyiyinɔ ɖé wutu ɔ, é bló bɔ Jezu tuùn ɖɔ é ɖò gudo nú emi. (Mat. 26:53; Jaan 8:16) Jehovah cyɔn alɔ Jezu jí sín nǔagɔwiwa lɛ bǐ sí ǎ có, é ka d’alɔ ɛ bɔ é dɛ ɖò mɛtɛnkpɔn lɛ nu. Jezu tuùn ɖɔ hwenu klewun ɖé wɛ wuvɛ̌ ɖebǔ e emi sixu mɔ é na nɔ ayǐ na. (Ebl.  12:2) Jehovah nɔ ɖótó Jezu, sú hudo tɔn lɛ sín dò, kplɔ́n nǔ i bo lɛ́ nɔ gudo n’i dó xlɛ́ ɖɔ emi kpé nukún wǔtu tɔn. (Jaan 5:20; 8:28) Dìn ɔ, mǐ ni kpɔ́n lee Tɔ́ mǐtɔn jixwé tɔn ɔ nɔ kpé nukún mǐ lɔ wu gbɔn mɔ̌ gbɛn é.

10. Sɔgbe xá Ðɛhan 66:19, 20 ɔ, nɛ̌ Jehovah ka nɔ xlɛ́ ɖɔ emi yí wǎn nú mǐ gbɔn?

¹⁰ Jehovah nɔ ɖótó ɖɛ mǐtɔn lɛ. (Xà Ðɛhan 66:19, 20.) É ba ɖɔ mǐ ni ɖó dogbó nú ɖɛ mǐtɔn lɛ ǎ; é byɔ mǐ ɖɔ mǐ ni nɔ xoɖɛ hwebǐnu. (1 Tɛ. 5:17) Mǐ sixu sɛkpɔ́ Mawu mǐtɔn hwebǐnu kpo sísí kpo, enyi mǐ na bo ɖò fí ɖebǔ ɔ nɛ. Alɔnu tɔn nɔ ján dín bonu é na gɔn tó ɖó mǐ gbeɖé ǎ; é ɖò gbesisɔmɛ, bo nɔ lɛ́ tɛ́ tó hwebǐnu. Enyi mǐ mɔ ɖɔ Jehovah nɔ ɖótó ɖɛ mǐtɔn lɛ ɔ, mǐ nɔ lɛ́ sɛkpɔ́ ɛ d’eji. Ðɛhanwlantɔ́ ɔ ɖɔ: ‘Un yí wǎn nú Jehovah, ɖó un súxó ylɔ́ ɛ ɔ, é nɔ sè.’—Ðɛh. 116:1.

11. Nɛ̌ Jehovah ka nɔ na sinkɔn nú ɖɛ mǐtɔn lɛ gbɔn?

¹¹ Tɔ́ mǐtɔn nɔ ɖótó ɖɛ mǐtɔn lɛ, bo nɔ lɛ́ na sinkɔn nú ye. Mɛsɛ́dó Jaan na mǐ ganjɛwu elɔ: “Mǐ byɔ nǔ ɖebǔ nú é sɔgbe xá jlǒ tɔn ɔ, é nɔ ɖótó mǐ.” (1 Jaan 5:14, 15) É ɖò wɛn ɖɔ Jehovah sixu nɔ ma na sinkɔn nú ɖɛ mǐtɔn lɛ lee mǐ ba gbɔn é. É tuùn nǔ e nyɔ́ nú mǐ hugǎn é, enɛ wu ɔ, hweɖelɛnu ɔ, é nɔ bló nǔ e mǐ byɔ é ǎ, alǒ é nɔ ba ɖɔ mǐ ni nɔte.—2 Kɔ. 12:7-9.

12-13. Ali tɛ lɛ nu Tɔ́ mǐtɔn jixwé tɔn ɔ ka nɔ sú hudo mǐtɔn lɛ sín dò ɖè?

¹² Jehovah nɔ sú hudo mǐtɔn lɛ sín dò. É nɔ wà nǔ e é byɔ ɖò tɔ́ lɛ bǐ sí ɖɔ ye ni nɔ wà é. (1 Tim. 5:8) É nɔ kpé nukún dó nǔ e hudo vǐ tɔn lɛ ɖò agbaza lixo lɛ é wu. É ba ɖɔ ado ni nɔ hu mǐ dó nǔɖuɖu, avɔ kpo xɔ kpo wu ǎ. (Mat. 6:32, 33; 7:11) Tɔ́ wanyiyinɔ ɖé ɖɔhun ɔ, Jehovah tlɛ bló tuto bo na sú hudo mǐtɔn sɔgudo tɔn lɛ bǐ sín dò.

¹³ Taji hugǎn ɔ, Jehovah nɔ sú hudo gbigbɔ tɔn mǐtɔn lɛ sín dò. Jehovah gbɔn Xó tɔn gblamɛ bo ɖè nǔgbo ɔ xlɛ́ dó éɖesunɔ, linlin tɔn, nǔ e wu gbɛ̀ ɔ dó tíìn é kpo sɔgudo kpo wu. Azɔn nukɔntɔn e mǐ kplɔ́n nǔgbo ɔ é ɔ, é zán mɛjitɔ́ mǐtɔn lɛ alǒ nǔkplɔnmɛtɔ́ ɖevo dó d’alɔ mǐ bɔ mǐ wá tuùn i; é gbɔn mɔ̌ mɛ dó xlɛ́ ɖɔ ayi tɔn ɖò mǐ jí. É nɔ lɛ́ kpó ɖò alɔ dó mǐ wɛ kpo xomɛnyínyɔ́ kpo gbɔn mɛxo agun tɔn wanyiyinɔ lɛ kpo nɔví ɖevo e zin lɛ é kpo gblamɛ. Gɔ́ na ɔ, Jehovah nɔ kplɔ́n nǔ mǐ gbɔn kplé agun tɔn mǐtɔn lɛ gblamɛ; finɛ wɛ mǐ nɔ kplɔ́n nǔ ɖó kpɔ́ xá xwédo gbigbɔ tɔn mǐtɔn ɖè. Ðò ali enɛ lɛ kpo ɖevo lɛ kpo nu ɔ, Jehovah nɔ xlɛ́ ɖɔ emi nyí tɔ́ ɖé bɔ nǔ mǐ bǐ tɔn nɔ ɖu ayi mɛ nú emi.—Ðɛh. 32:8.

14. Etɛwu Jehovah ka nɔ kplɔ́n mǐ? Nɛ̌ é ka nɔ wà mɔ̌ gbɔn?

¹⁴ Jehovah nɔ kplɔ́n nǔ mǐ. Mǐ nyí mɛ maɖóblɔ̌ Jezu ɖɔhun ǎ. Enɛ wu ɔ, bo na dó kplɔ́n nǔ mǐ ɔ, Tɔ́ mǐtɔn wanyiyinɔ ɔ nɔ gbɛ́ nǔ nú mǐ ɖò hwenu e é byɔ dó é. Xó tɔn flín mǐ ɖɔ: “Mɛ e Aklunɔ yí wǎn na ɔ wɛ é nɔ kplɔ́n.” (Ebl. 12:6, 7) Jehovah nɔ gbɛ́ nǔ nú mǐ ɖò ali gegě nu. Ði kpɔ́ndéwú ɔ, nǔ e mǐ xà ɖò Xó tɔn mɛ é, alǒ sè ɖò kplé mǐtɔn lɛ jí é ɖé sixu jla mǐ ɖó. Alǒ vlafo ɔ, mǐ sixu mɔ alɔdó e sín hudo mǐ ɖó é ɖò mɛxo lɛ gɔ́n. Jehovah na bo gbɛ́ nǔ nú mǐ gbɔn ɖebǔ ɔ, wanyiyi wɛ nɔ sísɛ́ ɛ hwebǐnu bɔ é nɔ wà mɔ̌.—Jel. 30:11.

15. Ali tɛ lɛ nu Jehovah ka nɔ cyɔn alɔ mǐ jí ɖè?

¹⁵ Jehovah nɔ d’alɔ mǐ ɖò mɛtɛnkpɔn lɛ mɛ. Lee tɔ́ wanyiyinɔ ɖé nɔ d’alɔ vǐ tɔn lɛ ɖò hwenu vɛwǔ lɛ mɛ gbɔn é ɔ, mɔ̌ wɛ Tɔ́ mǐtɔn jixwé tɔn ɔ nɔ d’alɔ mǐ ɖò mɛtɛnkpɔn lɛ mɛ gbɔn. É nɔ zán gbigbɔ  mímɛ́ tɔn dó cyɔn alɔ mǐ jí, bonu nǔɖe má wà nǔ dó mǐ wu ɖò gbigbɔ lixo ó. (Luk. 11:13) Jehovah nɔ lɛ́ cyɔn alɔ mǐ jí ɖò lee nǔ nɔ cí nú mǐ é linu. Ði kpɔ́ndéwú ɔ, é na mǐ nukúnɖiɖó jiwǔ ɖé. Nukúnɖiɖó sɔgudo tɔn enɛ nɔ d’alɔ mǐ bɔ mǐ nɔ dɛ ɖò wuvɛ̌ lɛ nu. Lin tamɛ dó xó elɔ jí: Nǔ nyanya ɖebǔ na bo jɛ dó mǐ jí ɔ, Tɔ́ mǐtɔn wanyiyinɔ ɔ na jla nǔ ɖebǔ e sín wuvɛ̌ mǐ mɔ lɛ é ɖó. Mǐ na bo ɖò mɛtɛnkpɔn ɖebǔ mɛ ɔ, mǐ tuùn ɖɔ hwenu klewun ɖé jɛn é na nɔ ayǐ na, amɔ̌, nyɔna Jehovah tɔn lɛ na nɔ ayǐ kaka sɔyi.—2 Kɔ. 4:16-18.

16. Hwenu e Adamu tlitó nú Tɔ́ tɔn wanyiyinɔ ɔ é ɔ, etɛ ka jɛ?

¹⁶ Mǐ nɔ mɔ xlɛ̌ wanyiyi e Jehovah ɖó nú mǐ é tɔn ɖò lee é wà nǔ gbɔn hwenu e tagba nukɔntɔn ɔ fɔ́n ɖò ayikúngban jí é mɛ. Hwenu e Adamu tlitó nú Tɔ́ tɔn jixwé tɔn ɔ é ɔ, é ba tɛn tɔn kpò ɖò xwédo awǎjijɛnɔ Jehovah tɔn mɛ, kúnkan tɔn lɛ lɔ ba kpò. (Hlɔ. 5:12; 7:14) É ɖò mɔ̌ có, Jehovah wà nǔɖe dó d’alɔ.

17. Ðɔ nǔ e Jehovah wà tlolo ɖò gǔfínfɔ́n Adamu tɔn gudo é?

¹⁷ Jehovah dɔn tó nú Adamu; amɔ̌, é na nukúnɖiɖó ɖé kúnkan tɔn. É d’akpá tlolo ɖɔ mɛ e setónú lɛ é na lɛkɔ wá xwédo emitɔn mɛ. (Bǐb. 3:15; Hlɔ. 8:20, 21) Jehovah bló tuto enɛ gbɔn vɔsisa gbɛxɔnúmɛ tɔn Vǐ vívɛ́ná tɔn Jezu tɔn gblamɛ. Jehovah sɔ́ Vǐ tɔn jó dó ta mǐtɔn mɛ dó xlɛ́ ɖɔ emi yí wǎn nú mǐ tawun.—Jaan 3:16.

18. Enyi mǐ na bo tlɛ jó Jehovah dó ɔ, etɛwu mǐ ka sixu kúdeji ɖɔ é ba ɖɔ mǐ ni nyí vǐ emitɔn lɛ?

¹⁸ Mǐ nyí hwɛhutɔ́ có, Jehovah ba ɖɔ mǐ ni nɔ xwédo emitɔn mɛ, é ka nɔ mɔ gbeɖé ɖɔ mǐ nyí agban nú emi ǎ. Mǐ sixu dó xomɛsin n’i alǒ jó è dó nú táan ɖé, amɔ̌, é nɔ  jó gbè dó mǐ wu ǎ. Jezu xlɛ́ lě dò Jehovah yí wǎn nú vǐ tɔn lɛ sɔ́ é ɖò lǒ e é dó dó vǐ ɖuvanɔ ɔ wu é mɛ. (Luk. 15:11-32) Vǐtɔ́ e xó lǒ ɔ ɖɔ é nɔ ɖó nukún tɛgbɛ ɖɔ vǐ emitɔn na lɛkɔ. Hwenu e vǐ ɔ lɛkɔ wá é ɔ, tɔ́ ɔ yí i kpo akpakpa sɔ́ mɛ kpo. Enyi mǐ jó Jehovah dó bo ka wá lɛkɔ sín hwɛ mǐtɔn lɛ gudo ɔ, mǐ sixu kúdeji ɖɔ Tɔ́ mǐtɔn wanyiyinɔ ɔ ɖò gbesisɔmɛ bo na yí mǐ.

19. Nɛ̌ Jehovah ka na vɔ́ nǔ e Adamu ko hɛn gblé lɛ é jlaɖó gbɔn?

¹⁹ Tɔ́ mǐtɔn na vɔ́ nǔ e Adamu ko hɛn gblé lɛ é bǐ jlaɖó. Hwenu e Adamu fɔ́n gǔ gudo é ɔ, Jehovah wá gbeta ɔ kɔn bo na sɔ́ mɛ 144 000 ɖò gbɛtɔ́ lɛ mɛ dó ɖó vǐ, bɔ ye na nyí axɔ́su kpo vɔsanúxwlémawutɔ́ kpo ɖò jixwé xá Vǐ tɔn. Jezu kpo mɛ ɖěɖee na kp’acɛ xá ɛ lɛ é kpo na d’alɔ gbɛtɔ́ tónúsétɔ́ lɛ bɔ ye na nyí mɛ maɖóblɔ̌, ɖò gbɛ̀ yɔyɔ̌ ɔ mɛ. Ye gbɔn mɛtɛnkpɔn gudo tɔn ɔ mɛ gudo ɔ, Mawu na na ye gbɛ̀ mavɔmavɔ. Enɛ gudo ɔ, hwenu e Tɔ́ mǐtɔn na mɔ ɖɔ vǐ sunnu kpo vǐ nyɔnu kpo maɖóblɔ̌ emitɔn lɛ kɛɖɛ wɛ gɔ́ ayikúngban ɔ jí é ɔ, xomɛ na hun i. Táan ɖagbe tawun ɖé wɛ enɛ na nyí.

20. Ali tɛ lɛ nu Jehovah ka nɔ xlɛ́ ɖɔ emi yí wǎn nú mǐ tawun ɖè? Etɛ jí mǐ ka na ɖɔ xó dó ɖò xóta e bɔ d’ewu é mɛ?

²⁰ Jehovah xlɛ́ ɖɔ emi yí wǎn nú mǐ tawun. Tɔ́ ɖagbe hugǎn ɔ wɛ n’i. É nɔ sè ɖɛ mǐtɔn lɛ bo nɔ sú hudo mǐtɔn agbaza tɔn lɛ kpo gbigbɔ tɔn lɛ kpo sín dò. É nɔ kplɔ́n mǐ bo nɔ lɛ́ nɔ gudo nú mǐ. É lɛ́ ɖó nyɔna jiwǔ lɛ ɖò sɛxwetɛn nú mǐ. Tuùn e mǐ tuùn ɖɔ Tɔ́ mǐtɔn yí wǎn nú mǐ bo nɔ lɛ́ kpé nukún mǐ wu é nɔ hun xomɛ nú mǐ tawun. Ðò xóta e bɔ d’ewu é mɛ ɔ, mǐ na ɖɔ xó dó lee mǐ vǐ tɔn lɛ sixu xlɛ́ ɖɔ wanyiyi tɔn sù nukún mǐtɔn mɛ gbɔn é jí.