1. Persiachea Raza fuddem vochonk eklean kitem korunk zai aslem?

SUMAR 2,500 vorsam adim, tumi Persiant jietat mhunn chintat. Tumi tea desachea Raza lagim ulounk sodhtat. Tor, tumi Raza ravta tem xar Suzanak voitat. Porvangi nastana tea raza fuddem vochonk tumi chintchim pasun na. Karonn tumi oxem korit zalear Raza tumkam mornnachi xikxa diunk xoktalo.—Esther 4:11.

2. Aplea lagim uloitana amkam koxem dislolem zai mhunn Jehova axeta?

² Jehova tea Persiachea Raza sarko na mhunn ami kitlim khuxal. Munxam modem aslolea khoincheach odhikaream poros, Jehova vorto zaun asa torui ami khoinchea-i vellar tachea lagim ulounk zata. Ani koslich addkoll nastana ami tachea lagim ulounk zai mhunn to axeta. Udharonnak, Jehovak Rochnnar, Sorvpodvedar, ani Sorvespor Dev mhunnttla. Tori astana, ami taka “Bapa” mhunn apoil’lem taka zai. (Mt. 6:9) Hea toren, ami taka lagim asat oxem amkam dislolem taka zai. Hem kitlem khuxalkaiechem!

3. Jehovak ami ‘Bap’ kiteak mhunnonk zata, ani hea lekhant ami kitem bhasabhas kortolim?

³ Jehova amchea jivitachi Zhor zaun asa. Tannem amkam jivit dilam dekhun ami taka ‘Bap’ mhunnonk xoktat. (St. 36:9) To amcho Bapui zal’lean ami tachem aikonk zai. Ani to amkam sangta tem ami kortat tednam amkam borim besanvam mellttat. (Heb. 12:9) Tea besanvamnim amkam sorgar vo prithumer sasnachem jivit pasun mellon asa. Ani tea bhair, aiz pasun amkam besanvam asat. Jehova aiz ek mogall Bapui koso zaun asa, ani to amkam fuddarak kednanch sanddchona mhunn ami kiteak khatri dovrunk zata, tea vixim hea lekhant ami bhasabhas kortolim. Punn poilim, amcho sorgincho Bap amcho khub mog korta ani kallji gheta mhunn ami kiteak khatri dovrunk zata tea vixim polloum-ia.

4. Jehova aplo Bapui mhunn manun gheunk thoddeank kiteak kotthin zata?

⁴ Jehova tumcho Bapui mhunn manun gheunk tumkam kotthin zata kai? Jehova itlo vorto aslolean ami mhotvachim nhoi mhunn thoddeank disonk puro. Tor, Sorvpodvedar Devak amchi dor ekleachi kallji asa kai mhunn te dubhavtat. Punn, amkam toxem dislolem amchea mogall Bapak naka. Dekhun tannem amkam jivit dilam ani ami tachea sangata ixttagot zoddloli taka zai. Hem sot sanglea uprant, Apostl Paulun Atenant aslolea aplea aiknnareank sanglem, Jehova ‘dor eklea thaun pois na.’ (Itihas 17:24-29) Jea toren ek lhan bhurgo aplea mogall ani kallji gheupi avoi-bapai lagim uloita teach toren, ami dor eklean aplea lagim uloilolem Devak zai.

5. Eka Kristi bhoinnichea onnbhovantlean ami kitem xiktat?

⁵ Thoddeank aplea bapai thaun mog ani doia mellonk na dekhun Jehova aplo Bapui mhunn manun gheunk kotthin zaunk puro. Udharonnak, ek Kristi bhoinn kitem sangta tem polloum-ia: “Mhozo bapui mhaka dukhoita toslim utram mhunnttalo. Hanv Bible xikonk laglem tednam, Jehova mhozo sorgincho Bapui mhunn manun gheunk mhaka kotthin zalem. Punn hanv tachea vixim xiklem tednam mhojem chintop bodol’lem.” Hea bhoinni bhaxen tumkam-i dista? Toxem zalear, niraxi zainakat. Tumi Jehova vixim xikot ravlear to sogleant boro Bapui mhunn tumkam pasun kollon ietolem.

6. Matev 11:27-a pormonnem, Jehova amcho mogall Bapui mhunn ami manun gheunk tannem kel’li ek vatt khoinchi?

⁶ Jehovak ami amcho mogall Bapui mhunn manun ghetlolim taka zai. Taka lagon, tannem kel’li ek vatt mhunnttlear, Jezuchim utram ani korneo tannem Bible-ant amchea pasot boroun dovorleat. (Matev 11:27 vachat.) Jezun aplea Bapaiche gunn itle purnn toren dakhoile ki to oso mhunnonk pavlo: “Jim konn Mhaka polletat, tim Mhojea Bapak polletat.” (Juanv 14:9) Jezun choddxea pavtti, Jehovak eka Bapaik sor kelo. Fokot char Xubhvorthomanamnim, Bap hem utor Jezun sumar 165 pavtti Jehova vixim sangtana uzar kelem. Jezu, Jehova vixim itlo kiteak uloilo? Ek karonn mhunnttlear, Jehova ek mogall Bapui mhunn to lokank khatri diunk sodhtalo.—Juanv 17:25, 26.

7. Jehova jea toren aplo Put Jezu sangata vaglo tantuntlean ami kitem xikonk zata?

⁷ Jehova jea toren aplo Put Jezu sangata vaglo tantuntlean ami kitem xikonk zata tem polloum-ia. Udharonnak, Jehovan sodanch Jezuchim magnnim aikolim. Itlench nhoi, tannem tachea magnneancho zobab pasun dilo. (Juanv 11:41, 42) Jezuk zal’lea soglea trasanchea vellar tannem aplea Bapacho mog ani tenko sodanch onnbhovlo.—Lukas 22:42, 43.

8. Khoinchea vattamnim Jehovan Jezuk goroz tem soglem dilem?

⁸ Jehovan apnnank jivit dilam ani jivo uronk goroz tem soglem dilam mhunn Jezun manun ghetlem mhunn tachea hea utramnim kollon ieta. Tannem mhunnttlem: “Bapa thaun hanv jivit gheta.” (Juanv 6:57) Jezuk aplea Bapacher purnn bhavarth aslo ani Jehovan taka jieunk goroz tem soglem dilem. Punn chodd gorjechem mhunnttlear, Jehovan Jezuk apnnak visvaxi ravonk modot keli.—Mt. 4:4.

9. Apunn Jezucho mogall ani kallji gheupi Bapui mhunn Jehovan koxem dakhoilem?

⁹ Jehovan Jezuk sodanch adar dilo. Hea pasot aplo Bap apnnank sodanch tenko ditolo mhunn Jezuk khatri asli. (Mt. 26:53; Juanv 8:16) Jehovan Jezuk soglea trasantlean vattaunk na, punn te tras sosunk tannem taka modot keli. To sosta te sogle tras thoddeach tempache mhunn Jezu zannam aslo. (Heb. 12:2) Jehovan Jezuchem aikolem, taka goroz tem dilem, taka proxikxonn dilem ani tenko dilo. Hea  toren apleak tachi kallji asa mhunn Jehovan dakhoilem. (Juanv 5:20; 8:28) Tosoch, amcho sorgincho Bapui aiz amkam koso modot korta tem polloum-ia.

10. Stotr 66:19, 20-a pormonnem, Jehova amcho mog korta mhunn koso dakhoita?

¹⁰ Jehova amchim magnnim aikota. (Stotr 66:19, 20 vachat.) Ami thodde pavtti nhoi, punn zaite pavtti magnnem korunk to amkam urba dita. (1 Tes. 5:17) Ami khoinchea-i vellar ani khoinchea-i zagear asum, Jehovak ami respedan magnnem korunk zata. To amchem aikonk sodanch vell kaddtta ani amchea magnneank kan dita. Jehova amchim magnnim aikota mhunn ami zannam zatat tednam, ami tacho chodd mog korunk pavtat. Stotrkaran sanglem: “Sorvesporachea mogan mhojem kalliz bhorlam, kiteak mhoji vinovnni Tannem aikun ghetli.”—St. 116:1.

11. Jehova amchea magnneancho zobab koso dita?

¹¹ Amcho Bapui amchim magnnim fokot aikona, punn tancho zobab pasun dita. Apostl Juavan amkam hi khatri dili: “Kitem-i ami Devache khuxe pormannem Tache lagim magum, To amkam aikota.” (1 Juanv 5:14, 15) Amchea magnneancho zobab ghoddie amkam zai toso Jehova dina hem khorem, punn amkam kitem borem tem to zannam. Tor, kednam-kednam ami magtat tem to amkam dina vo zobabak lagon ami vatt pollounk zai mhunn to axeta.—2 Kor. 12:7-9.

12-13. Amcho sorgincho Bap khoinchea vattamnim amkam goroz tem soglem dita?

¹² Jehova amkam goroz tem dita. Jehova sangta ki eka bapain aplea familicho samball korunk zai. (1 Tim. 5:8) Ani teach toren, Jehova aplea familicho samball korta. To aplea bhurgeank jieunk goroz tem soglem dita. Jevonn, kopdde, vo asro hea vixim ami uske kelole taka naka. (Mt. 6:32, 33; 7:11) Jehova amcho mogall Bap dekhun, fuddarak amkam kitem goroz asa tachi pasun tannem manddavoll korun dovorlea.

¹³ Chodd mhotvachem mhunnttlear, aplea sangata ghott ixttagot samballunk goroz tem soglem to amkam dita. Bible-a udexim tannem aplea vixim sot, tacho ud’dhex, tannem amkam kiteak rochlim ani fuddarak kitem korcho asa tem tannem sanglam. Ami sot xikonk laglim tednam tannem amcher dor ekleacher dhean dilem. Karonn, amkam aplea vixim xikounk tannem amchea avoi-bapaink vo herank uzar kelim. Ani ami tache ixtt mhunn sodanch uronk to amkam mogall Kristi vhoddil ani her bhav-bhoinnanchim modot dita. Tea bhair, amchea bhav-bhoinnam sangata mittingent to amkam xikoita. Jehova her vattamnim pasun eka Bapai sarko amchi dor ekleachi kallji gheta.—St. 32:8.

14. Jehova amkam proxikxonn kiteak dita, ani to tem koxem dita?

¹⁴ Jehova amkam proxikxonn dita. Ami Jezu bhaxen poripurnn na dekhun ami chuki kortat. Tor amkam proxikxonn ditana amcho mogall Bapui, goroz poddtta tednam amkam xist pasun dita. “Zancho Sorvespor mog korta tankam xist laita” mhunn tachem Utor amchea ugddasak haddtta. (Heb. 12:6, 7) Jehova amkam zaitea vattamnim xist dita. Udharonnak, tachea Utra thaun ami kitem vachtat tednam vo mittingent ami kitem aikotat tednam, amchea chintpant ani vagnnukent bodol korunk zai mhunn amkam disonk xokta. Vo amkam goroz ti modot vhoddilam thaun ieunk xokta. Punn Jehova amkam koxi-i xist dium, to amcho mog korta dekhun ti to dita.—Jer. 30:11.

15. Jehova amkam khoinchea vattamnim rakhta?

¹⁵ Tras sosunk Jehova amkam adar dita. Kotthin poristhitint jea toren ek bapui aplea bhurgeank adar dita, teach toren tras ietat tednam amcho sorgincho Bap amkam adar dita. (Lukas 11:13) Aplea sangata asloli ixttagot  pidd’ddear zata toslea koslea-i vostu thaun amkam rakhunk to amkam povitr xokti dita. Ami nirax zatat vo usketat tednam pasun Jehova amkam modot korta. Udharonnak, to amkam ek boro bhorvonso dita. Fuddara pasot tannem dilolo bhorvonso, aiz ami sostat tea trasancho fuddo korunk amkam modot korta. Hea vixim chintat: Amcher kosle-i tras ieum, amcho mogall sorgincho Bap te sompurnn toren kaddun uddoitolo. Ami aiz sostat te tras fokot thoddeach tempache, punn Jehova dita tim bhesanvam sasnachim.—2 Kor. 4:16-18.

16. Adanvan aplea mogall Bapachem aikonk na tednam kitem zalem?

¹⁶ Adanvan aplem aikonk na tea vellar Jehovan kitem kelem tea vixim ami chintat tednam, tantuntlean amkam tacho mog dison ieta. Adanvan Devachem aikonk na tednam to ani tachi sonsot Jehovachea familicho bhag zaun uronk na. (Rom. 5:12; 7:14) Punn Jehovan tachea sonstik modot korunk kitem tori kelem.

17. Adanv aplea add gelea uprant, Jehovan rokddench kitem kelem?

¹⁷ Jehovan Adanvak xikxa dili, punn tache sonstik apunn modot kortolo mhunn tannem bhas dili. Apleachem aikotat toslea munxank apunn portun aplea familicho bhag zaunk ditolo mhunn tannem rokddench utor dilem. (Ut. 3:15; Rom. 8:20, 21) Munxakullak modot korunk Jehovan, Jezuchea bolidana udexim soddvonn diunk manddavoll keli. Hachea voilean, Jehova amcho kitlo mog korta tem amkam dison ieta.—Juanv 3:16.

18. Ami Jehova thaun pois gelear pasun porot tachi bhurgim zalolim taka zai mhunn ami kiteak khatri dovrunk zata?

¹⁸ Ami oporipurnn aslear pasun ami Jehovachea familicho bhag zalolim taka zai ani amkam modot korunk taka vojem koxem disona. Ami ghoddie taka niraxi korunk puro, vo tachea thaun pois vochonk puro, punn  ami porot tachea sorxim ietolim mhunn taka bhorvonso asa. Jehova aplea bhurgeancho kitlo mog korta tem dakhounk Jezun, bapaik sanddun gel’lea eka putachi vopar sangli. (Lukas 15:11-32) Aplo put kednanch ieunchoch na mhunn tea voparent aslolea bapain chintunk na. Tacho put porot ghora ieta tednam tacho bapui, taka khuxalkaien ieukar dita. Teach bhaxen, ami Jehova thaun pois gelear pasun, poschatap kortat zalear amcho mogall Bapui amkam porot aplea lagim gheunk toiar asa mhunn ami khatri dovrunk zata.

19. Adanvak lagon zalole vaitt porinnam Jehova koso sarko kortolo?

¹⁹ Adanvak lagon zalole sogle vaitt porinnam amcho Bapui portun sarko kortolo. Adanv Deva add gelo tednam, aplea Puta sangata sorgar raza ani iadnik zaunk Jehovan munxakulla thaun 1,44,000 zannank aplim bhurgim mhunn apnnaunk tharailim. Novea sonvsarant Devachem aikotat toslea lokank poripurnn zaunk, Jezu ani tachea sangata razvottki cholovpi modot kortole. Uprant nimanne porikxent, te Devachem aikotat zalearuch Dev tankam sasnachem jivit ditolo. Aplea poripurnn puta-dhuvamnim hi prithum bhorta tem polloun amcho Bapui khuxal zatolo. To vell kitlo khuxalkaiecho astolo!

20. Jehova amcho khub mog korta mhunn tannem koxem dakhoilam, ani fuddlea lekhant ami kitem bhasabhas kortolim?

²⁰ Jehova amcho khub mog korta mhunn tannem amkam dakhoilam. To amcho sogleant boro Bapui zaun asa. To amchi magnnim aikota, amcheo kuddicheo gorzo purnn korunk ani tachea lagim ixttagot samballunk goroz tem soglem to amkam dita. To amkam proxikxonn ani adar dita, ani toxench tannem amchea pasot fuddarak borim besanvam dovorleant. Amcho Bapui amcho mog korta ani amchi kallji gheta tem ami zannam zatat tednam ami khuxal zatat. Ami tachim bhurgim zalolean, tannem dakhoil’lea moga pasot ami tachim upkari asat mhunn koxem dakhounk zata, tem ami fuddlea lekhant bhasabhas kortolim.