1. ¿Kasa naaʼinrajatka wanee wayuu süpüla naashajaainjachin nümaa chi aluwataakai saaʼu Persia?

JÜLÜJATAA paaʼin chajachin pia Persia, eeirü maʼaka 2.500 juya süchikijee tia. Puʼunaka chaa Susamüin eere kepiain chi aluwataaikai, paaʼinrüin tia süpüla püküjainjachin nümüin süchiki wanee kasa. Nnojoipejeʼe süpüla pikerolüin nümaʼanamüin chi aluwataaikai sümaa nnojolin neenajiralain pia. Pütüjaa aaʼu outeechin pia paaʼinrüle tia (Est. 4:11).

2. ¿Kasa nüchekaka achiki Jeʼwaa wanaa sümaa waashajaain nümaa?

² Talatüsü waaʼin süka naatajatüin nukuwaʼipa Jeʼwaa noulia na aluwataaliikana saaʼu Persia. Mayaainjeʼe pülashin maʼin Jeʼwaa jee kojutuleein maʼin nia nuulialeʼeya wanee aluwataai, nnojotsü nüneeküin wanee kaʼi süpüla waashajaain nümaa, nücheka achikit nnojoliinjanain mmoluwaain waya wanaa sümaa waashajaain nümaa. «Kakumajalakai kasakat Süpüshuaʼa», «Pülashikai maʼin» otta «Laülaakai saaʼu kasakat süpüshuaʼa», eeshi nümünüle amüin Jeʼwaa. «Taata», shiapejeʼe nücheküin achiki wamüin nümüin (Mat. 6:9). ¿Aashin talatüin waaʼin süka wayaawatüin saaʼu shiain nücheküin achiki Jeʼwaa aleewain maʼin waya nümaa?

3. (1) «Taata», ¿jamüshii wamüinjanaka nümüin Jeʼwaa? (2) ¿Kasa wekirajaainjatka anain sünain ekirajaayakat tüü?

³ «Taata», müshiijaʼaya waya nümüin Jeʼwaa süka katüin woʼu nutuma (Sal. 36:9). Süka Washin nia jüüjüüinjana waya sümüin tü nümakat wamüin. Waaʼinrüle tia, eʼreena waya kasa anasü sünainjee (Heb. 12:9). Süpüshi tia, shia katüinjatüin woʼu waneepia, jaʼitashii chainjanale waya iipünaa jee yaainjanale waya saaʼu Mmakat. Eʼrapejeʼeya waya kasa anasü maaʼulu yaa. Sünain ekirajaayakat tüü, wekirajaajeerü anain tü naaʼinrakat Jeʼwaa  wapüleerua süka alin waya nüpüla otta jamüin watüjaaka saaʼu nnojoleenain waya nüpütüin wamüiwaʼa. Wekirajaa palajana süchiki tü naaʼinrakat wapüleerua chi Washi iipünaajachikai süka alin waya nüpüla otta süka nükaalinjeein waya.

4. ¿Jamüsü kapüleeka namüin waneinnua wayuu nanoujain sünain Nashin Jeʼwaa?

⁴ ¿Eesü kapüleere wamüin wanoujain sünain Washin Jeʼwaa? Eeshii na wayuu jülüjakana aaʼin nnojoluin kachipünaain wayuu naaʼin Jeʼwaa süka miyoʼuin maʼin nia naashin. Eesü wainmajüle naaʼin saaʼu naaʼinmajüle waya Maleiwa waneʼewai wakua. Nnojotpejeʼe nücheküin Jeʼwaa müinjatüin tü jülüjakat waaʼin nüchiki. Katüsü woʼu nutuma Jeʼwaa otta nücheküin süchiki aleewainjanain waya nümaa. Nüküjain chi aluwataaushikai Pablo süchiki tia wanaa sümaa chajachin nia Atenas. Naashin Pablo nnojoishi wattain woulia Jeʼwaa waneʼewai wakua (Aluw. 17:24-29). Nücheka achikit Jeʼwaa warütkaainjanain nünainmüin maʼaka nürütkaain wanee jintüi nünainmüin chi nüshikai süka alin maʼin nia nüpüla.

5. ¿Kasa watüjaka sünainjee tü sümakat wanee wawala?

⁵ Eetaashii na wayuu kapüleekana amüin nanoujain sünain Nashin Jeʼwaa, süka jamüin, maalin naya nüpüla nashi. Anuu sünüiki wanee wawala süchiki tia: «Airuʼutpuʼusü maʼin nünüiki chi tashikai tamüin. Tekirajaaiwaʼaya sünain tü Wiwüliakat, kapüleesü tamüin aleewain taya nümaa chi Washi iipünaajachikai. Eeʼiratapejeʼe tia teʼraajapa maʼin nukuwaʼipa Jeʼwaa». ¿Müsüche waaʼin maʼaka saaʼin tia wawalakat? Müle shia, soteesü waaʼin eein süpüla weeʼiratüin tü jülüjakat waaʼin nüchiki Jeʼwaa otta wayaawateerü saaʼu nnojoluin eein wanee wayuu aipüraikai maʼin maʼaka naaʼin chi Washikai Jeʼwaa.

6. Saashin Mateo 11:27, ¿kasa naaʼinraka Jeʼwaa süpüla wayaawatüin saaʼu alin waya nüpüla?

⁶ ¿Kasa naaʼinraka Jeʼwaa süpüla wayaawatüin saaʼu alin waya nüpüla? Nüshajirüin Jeʼwaa suluʼu tü Wiwüliakat tü naaʼinrakat jee tü nümakat Jesuu (paashajeʼera Mateo 11:27, TNM). Ayatüsü maʼin nukuwaʼipa Jeʼwaa nutuma Jesuu, müshijeseʼe nümüin: «Chi eekai niʼrüin taya, niʼrüin chi Tashikaʼiya» (Juan 14:9). Kojuyatua naashajaain Jesuu süchiki tü naaʼinrakat Jeʼwaa napüleerua na nüchooinkana. Jamüsüjaʼa suluʼu tü karaloʼutakat, Mateo, Marcos, Lucas otta Juan, kojuyatua «Taata», nümüin Jesuu nümüin Jeʼwaa, eetaasü maʼaka saaʼin 165tua nüküjain tia. ¿Jamüshiche naashajaaka maʼin Jesuu nüchiki Jeʼwaa? Shia süpüla shiyaawatüinjatüin wayuu saaʼu niain Jeʼwaa chi Washi aipüraikai maʼin (Juan 17:25, 26).

7. ¿Kasa watüjaka sünainjee tü naaʼinrakat Jeʼwaa nüpüleerua chi Nüchonkai?

⁷ Jülüja waaʼin tü watüjakat sünainjee tü naaʼinrakat Jeʼwaa nüpüleerua chi Nüchonkai. Naapajüin Jeʼwaa waneepia nünüiki Jesuu nuchuntapa nümüin otta asoutushi nia nümüin (Juan 11:41, 42). Jaʼitasü kasain alatüin nümüin Jesuu, niyaawata aaʼulu eein chi Nüshikai nümaa otta alin maʼin nia nüpüla (Luc. 22:42-44).

8. ¿Kasa naaʼinraka Jeʼwaa nüpüleerua Jesuu?

⁸ Nütüjaa aaʼu Jesuu katüin noʼu nutuma chi Nüshikai otta naapüin nümüin tü kasa choʼujaakat nümüin süpüla katüinjatüin noʼu. Müshijeseʼe nümüin nüchiki chi Nüshikai: «Naapüin tamüin kataa oʼu» (Juan 6:57). Niʼitaain maʼin naaʼin Jesuu nünain chi Nüshikai otta naapüin Jeʼwaa tü kasa choʼujaakat nümüin. Nükaalinjapejeʼe nia süpüla noonooinjachin waneepia sümaa nünüiki (Mat. 4:4).

9. ¿Kasa naaʼinraka Jeʼwaa süpüla niiʼiyatüin naalin Jesuu nüpüla?

⁹ Wayaawata aaʼu aipüralin maʼin Jeʼwaa sünainjee nüküjain nümüin Jesuu eejeechin nia waneepia nümaa (Mat. 26:53; Juan 8:16). Mayaainjeʼe nuuʼulaain Jeʼwaa sülatüin kasa mojusü nümüin Jesuu, nükatsüinrüin naaʼin soʼunnaa tia süpüla nüchecherüin naaʼin. Nütüjaa aaʼu Jesuu motsomüin neʼe sümaa tü müliaa niʼrakat (Heb. 12:2, TNM). Niiʼiyatüin Jeʼwaa naalin Jesuu  nüpüla süka naapajüin nünüiki, naapüin nümüin tü choʼujaakat nümüin, nikirajüin nia otta nükaalinjain nia (Juan 5:20; 8:28). Wekirajaa sünain tü naaʼinrakat chi Washi iipünaajachikai süpüla nükaalinjain waya maʼaka nükaalinjain Jesuu.

10. Sünainjee tü sümakat Salmo 66:19, 20, ¿kasa naaʼinraka Jeʼwaa süpüla niiʼiyatüin waalin nüpüla?

¹⁰ Naapajüin wanüiki Jeʼwaa (paashajeʼera Salmo 66:19, 20). * Nücheküin Jeʼwaa wachuntuin waneepia nümüin sooʼopünaa kasa süpüshuaʼa (1 Tes. 5:17). Eeshii süpüla wachuntuin nümüin waneepia jaʼitashii jalain waya, waaʼinrüinjatpejeʼe tia sümaa kojutuin nia wamüin. Aleeweena maʼin waya nümaa Jeʼwaa, wayaawatapa saaʼu naapajüin wanüiki waneepia. Anuu nünüiki wanee wayuu ashajakai wanee salmo: «Aishi maʼin tapüla Jeʼwaa süka naapajüin tanüiki» (Sal. 116:1).

11. ¿Kasa naaʼinraka Jeʼwaa süpüla nusoutuin shiʼipajee tü wamakat nümüin?

¹¹ Nnojotsü naapajüin neʼe wanüiki Jeʼwaa, asoutushi nia shiʼipajee. Anuu tü nümakat chi aluwataaushikai Juan süchiki tia: «Müleka wachuntüle nümüin tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14, 15). Eepejeʼe naatale sukuwaʼipa tü naaʼinrakat Jeʼwaa süpüla nusoutuin wamüin. Süka nütüjaain saaʼu tü anakat wamüin, eesü nnojorüle naapüin tü wachuntakat nümüin jee nnojoire nusoutamaatüin wamüin (2 Cor. 12:7-9, TNM).

12, 13. ¿Kasa naaʼinraka Jeʼwaa süpüla naapüin tü choʼujaakat wamüin?

¹² Naapüin Jeʼwaa tü choʼujaakat wamüin. Naaʼinrüin Jeʼwaa tü nuluwataakalü anain na laülaakana süpüleerua napüshi. Naapüin tü choʼujaakat wamüin, wayakana nüchooinkana (1 Tim. 5:8). Nnojotsü nücheküin achiki Jeʼwaa shapaainjatüin waaʼin saaʼu tü weküinjatkat, tü washeʼinjatkat jee tü wepiainjatkat (Mat. 6:32, 33; 7:11). Süka alin maʼin waya nüpüla Jeʼwaa nukumajüin sukuwaʼipa süpüla eeinjatüin wamaʼana tü kasa choʼujaajeetkat wamüin mapeena.

¹³ Tü alanaʼaleekat nutuma Jeʼwaa, shia nikirajüin waya süpüla aleewainjanain waya nümaa. Nüküjain wamüin suluʼu tü Wiwüliakat süchiki jamüin maʼin nukuwaʼipa, süchiki tü naaʼinrajatkat mapeena, jamüin nukumajaka waya otta nüküjain wamüin süchiki tü alatajatkat mapeena. Nükaalinjain waya Jeʼwaa woʼttaiwaʼaya sünain ekirajawaa sünain tü Wiwüliakat. Eeshiijaʼa nikirajüle waya nakajee na wayuu kachooinkana waya jee shiale nükajee wanee wawala. Ayatshiʼiya waya nükaalinjain Jeʼwaa süpüla aleewainjanain waya nümaa, naaʼinrüin tia nakajee na laülaashiikana, nakajee na wawalayuu laülaakana aaʼin sünain anoujaa otta sükajee tü outkajawaakat. Nikirajüin waya wanaa namaa na wawalayuukana. Sünainjee süpüshuaʼa tü kasa naaʼinrakat Jeʼwaa wapüleerua, wayaawata aaʼu kapülain naaʼin wakuwaʼipa waneʼewai wakua (Sal. 32:8).

14. (1) ¿Jamüshii nikirajaka waya Jeʼwaa? (2) ¿Jamüsü sukuwaʼipa nutuma?

¹⁴ Nikirajüin waya Jeʼwaa. Wayuu maainjalasai Jesuu, akaajasaʼa wayakana waleʼeruʼusü tü kaainjalaakat, müshiijeseʼe nüchiaain waya Jeʼwaa süpüla nikirajüin waya. Saashin tü Wiwüliakat «nüchiaain Jeʼwaa chi wayuu eekai alin nüpüla» (Heb. 12:6, 7, TNM). Wainma sukuwaʼipa tü naaʼinrakat Jeʼwaa süpüla nüchiaain waya. Nüchiaain waya sükajee tü sümakat tü Wiwüliakat jee sükajee tü aküjünakat sünain tü outkajawaakat, naaʼinrüin tia süpüla wanouteʼerüin wakuwaʼipa. Eeshii nüchiaale waya nakajee na laülaashiikana. Nüchiaain waya Jeʼwaa süka alin waya nüpüla, jaʼitasü naatawalin sukuwaʼipa nutuma (Jer. 30:11).

15. ¿Kasa nükaalinjeenaka anain waya Jeʼwaa?

¹⁵ Nükaalinjain waya Jeʼwaa süpüla wachecherüin waaʼin soʼunnaa tü alatakat wamüin. Nükaalinjain waya Jeʼwaa soʼunnaa weʼrüin müliaa  maʼaka nükaalinjain nüchonnii wanee wayuu. Nükaalinjain waya nükajee chi naaʼinkai suulia tü kasa eekat süpüla amojujeʼerüin wakuwaʼipa nümaa (Luc. 11:13). Otta nükaalinjain waya wanaa sümaa shapaain maʼin waaʼin. Naaʼinrüin tia sükajee nüküjain wamüin süchiki tü kasa anasü naaʼinrüinjatkat mapeena. Suluʼujee tia, wachecherüin waaʼin soʼunnaa weʼrüin müliaa. Müiria nnojoluin eein tü kasa müliakalü atuma waaʼin. Motsomüin neʼe sümaʼa tü müliaa weʼrakat maaʼulu, akaajasaʼa tü kasa anasü naapeetkat Jeʼwaa wamüin, eejeerü süpüla kaʼikat süpüshuaʼa (2 Cor. 4:16-18).

16. ¿Kasa alataka sünainjee naainjala Adán?

¹⁶ Wayaawatüin waalin nüpüla Jeʼwaa sünainjee tü naaʼinrakat shiʼipajee tü naainjalakalü Adán. Nnojoliinnapa waya nüpüshin Jeʼwaa sünainjee naainjala Adán (Roma 5:12; 7:14). Mayaainjeʼe müin tia, nnojoishii waya niyüülajüin Jeʼwaa.

17. ¿Kasa nüküjamaataka Jeʼwaa süchikijee kaainjalain Adán?

¹⁷ Mayaainjeʼe süsalain naainjala Adán nutuma Jeʼwaa, nnojoishii niyüülajüin na nuuʼuliwoʼukana Adán. Nüküjamaatüin Jeʼwaa nükaalinjeenain na wayuu oonookana sümaa nünüiki süpüla nüpüshinjanain naya nachikuaʼa (Gén. 3:15, TNM; Roma 8:20, 21). Naaʼinrüin tia sükajee naapajiraain nikii chi Nüchonkai waaʼu. Süka alin maʼin waya nüpüla Jeʼwaa, naapüin chi Nüchonkai süpüla outajachin nia saaʼu waainjala (Juan 3:16).

18. ¿Jamüsü watüjaaka saaʼu alin waya nüpüla Jeʼwaa mayaainjeʼe wakayalaain nuulia?

¹⁸ Mayaainjeʼe nnojoluin lotuin wakuwaʼipa, nücheka achikit Jeʼwaa nüpüshinjanain waya otta nnojotsü mojushiin nümüin nükaalinjain waya. Eesüjaʼa mojule naaʼin Jeʼwaa watuma otta wakayalaapünaale nuulia, nnojoliipejeʼe niyüülajüin waya. Wayaawatüin saaʼu alin maʼin waya nüpüla Jeʼwaa sünainjee tü nüküjakat Jesuu nüchiki wanee emüliee maaʼinsai (Luc. 15:11-32). Jülüjasü  naaʼin waneepia nüshi chi emüliee maaʼinsaikai nüleʼejeechin soʼu wanee kaʼi chi nüchonkai. Shiasaʼa nüleʼejapa chi nüchonkai, talatüshi maʼin nia nümaa. Wakayalaale nuulia Jeʼwaa, talateechi maʼin nia wamaa waleʼejüle wachikuaʼa nünainmüin sümaa wayaawajaain suulia waainjala.

19. ¿Kaseerü naainjaka Jeʼwaa süpüla nunoutuin sukuwaʼipa tü kasa mojusü eekat sünainjee naainjala Adán?

¹⁹ Nunouteerü chi Washikai Jeʼwaa tü kasa mojusü eekat sünainjee naainjala Adán. Süchikijee kaainjalain Adán, nukumajüin Jeʼwaa sukuwaʼipa süpüla nüneeküin 144.000 wayuu süpüla naluwataainjanain chaa iipünaa wanaa nümaa Jesuu otta süpüla sacerdooteinjanain naya. Jesuu namaa na 144.000 aneekuushikana, nakaalinjeena na wayuu kepiainjanakana suluʼu tü Mma jeketkat süpüla anainjanain maʼin naya. Nalatapa süchiki tü ooʼulaküneetkalü akajee naaʼin na wayuu oonookana waneepia nümaa Jeʼwaa, kateerü noʼu waneepia nutuma. Talateerü maʼin naaʼin Jeʼwaa niʼrapa lotuin nakuwaʼipa na nüchonnii kepiakana saaʼu tü Mmakat. Anashaateerü maʼin tia, ¿aashimüin?

20. (1) ¿Kasa naaʼinraka Jeʼwaa saaʼu alin maʼin waya nüpüla? (2) ¿Kasa wekirajaainjatka anain sünain tü wane ekirajaayakat?

²⁰ Aishii maʼin waya nüpüla Jeʼwaa. Nnojoishi eein wanee wayuu aipüraikai maʼin maʼaka naaʼin chi Washikai Jeʼwaa. Naapajüin wanüiki, naapüin tü choʼujaakat wamüin, nükaalinjain waya süpüla woonooin waneepia sümaa nünüiki, nikirajüin waya otta nükaalinjain waya. Watteerü saalii tü kasa naaʼinreetkat Jeʼwaa wapüleerua mapeena. Talatüsü maʼin waaʼin süka watüjaain saaʼu alin maʼin waya nüpüla jee nükaalinjain waya. Sünain tü wane ekirajaayakat, wekirajaajeerü anain tü waaʼinrajatkat kojutule wamüin alin waya nüpüla Jeʼwaa.