1. ¿Mbaʼépa ojapo vaʼerã yma peteĩ persóna oñeʼẽséramo pe rréi de Pérsiandi?

EÑEIMAHINAMÍNA reikoha Pérsiape ha reñeʼẽseha pe rréi ndive peteĩ mbaʼére. Upearã reviaha Súsape, pe siuda oikohápe pe rréi. Péro nde reikuaa ni mbaʼevéicharõ ndereikéi vaʼerãha pe rréi rendápe haʼe nomeʼẽiramo ndéve permíso. Rejapóramo upéva, ikatu voi rejejuka hína (Est. 4:11). Upeichaite vaʼekue yma Pérsiape, ojapo 2.500 áñorupi.

2. ¿Mbaʼéichapa Jehová oipota jahecha chupe ñañemongeta jave hendive?

² ¡Ajépa jaagradesete Jehová ndojoguái haguére pe rréi de Pérsiape! Jehová ningo iñimportanteve ha ipoderosoiteve oimeraẽ governánte oĩvagui ko yvy ape ári, upéicharõ jepe ñande ikatu ñañeʼẽ hendive ñandegustaha óra, ha oipota voi jajapo upéva jakyhyjeʼỹre. Jehová ningo oreko heta título ohechaukáva haʼe iñimportantetereiha, por ehémplo Apohare Tuichaitéva, Todopoderóso ha Ñandejára ogovernáva opa mbaʼe. Péro haʼe oipota jaipuru peteĩ palávra ohechaukáva ikatuha ñañemoag̃ui hese ha jareko peteĩ amista iporãitereíva hendive. Haʼe oipota jaʼe hese haʼeha ñande “Ru” (Mat. 6:9). ¡Ajépa opokoite ñanderehe jahechávo Jehová oipotaha péicha ñañemoag̃ui hese!

3. a) ¿Mbaʼérepa Jehová omerese voi ñahenói chupe ñande “Ru”? b) ¿Mbaʼépa jahecháta ko artíkulope?

³ Jehová ningo omerese voi ñahenói chupe ñande “Ru”, pórke haʼe omeʼẽ vaʼekue “vída enterovépe” (Sal. 36:9). Jehová haʼe rupi ñande Ru, ñande ñaneñeʼẽrendu vaʼerã chupe. Jajapóramo umi mbaʼe haʼe ojeruréva ñandéve, katuete jahupytýta hetaiterei vendisión (Heb. 12:9). Por ehémplo, ikatu hína jaiko pára siémpre, tahaʼe yvágape térã ko yvýpe. Péro avei koʼág̃a ideprovécho ñandéve ñaneñeʼẽrendúramo chupe. Ko artíkulope jahecháta mbaʼéichapa koʼág̃ama voi Jehová ohechauka haʼeha ñande Túa ñanderayhuetéva, ha mbaʼérepa ikatu ñaime segúro haʼe núnka nañanderejamoʼãiha. Péro  primero ñaanalisáta mbaʼérepa ikatu jajerovia ñande Ru yvagapegua ñanderayhuetereiha ha okuidaha ñanderehe.

4. ¿Mbaʼérepa algúnope ikatu ijetuʼu ohecha hag̃ua Jehovápe Itúaramo?

⁴ ¿Ijetuʼúpa ndéve rehecha hag̃ua Jehovápe nde Túaramo? Ikatu oĩ algúno opensáva ñande ndahaʼeiha mbaʼeve Jehová renondépe. Haʼekuéra oduda pe Dios Todopoderóso ikatúne hag̃ua ojepyʼapy hesekuéra. Péro ñande Ru ñanderayhuetéva ndoipotái ñañeñandu péicha. Haʼe ningo omeʼẽ vaʼekue ñandéve la vída, ha oipota ñañemoag̃ui hese ha jaiko iñamígoramo. Apóstol Pablo omyesakãrõ guare upéva Aténaspe, heʼi vaʼekue: “Añetehápe ningo haʼe noĩri voi mombyry ñandehegui” (Hech. 17:24-29). Peteĩ túa ohechaukáramo itaʼýra térã itajýrape ohayhuha chupe, katuete pe mitã ndokyhyjemoʼãi oñemoag̃ui hag̃ua hese ha oñeʼẽ chupe. Ha Jehová ningo oipota peichaite avei ñañeñandu hendive.

5. ¿Mbaʼépa ohasa vaʼekue peteĩ ermána, ha mbaʼépa ñaaprende upévagui?

⁵ Ótrope g̃uarã ikatu ijetuʼu ohecha hag̃ua Jehovápe Itúaramo pórke itúa ndohechaukaguasúi vaʼekue ohayhuha chupe térã katu ndohechaukaiete voi. Por ehémplo peteĩ ermána omombeʼu: “Che túa chetrata vaieterei vaʼekue ha siémpre iñeʼẽ arhél chéve. Upévare añepyrũrõ guare astudia la Biblia, ijetuʼu vaʼekue chéve añeimahina hag̃ua arekoha peteĩ Túa yvágape, ha ikatuha añemoag̃ui hese. Péro aikuaa rire Jehovápe, okambiaite upéva”. ¿Ndépa reñeñandu avei ko ermánaicha? Oiméramo upéicha, ikatu reime segúro nde avei ikatuha rehecha Jehovápe nde Túaramo, ha ndaiporiha ótro túa ikatu vaʼerã oñembojoja hese.

6. Ohechaukaháicha Mateo 11:27, ¿mbaʼéichapa Jehová ñanepytyvõ jahecha hag̃ua chupe ñande Túa ñanderayhúvaicha?

⁶ Jehová ningo ojapóma heta mbaʼe jahecha hag̃ua chupe ñande Túa ñanderayhúvaicha, por ehémplo oskrivika la Bíbliape umi mbaʼe Jesús heʼi ha ojapo vaʼekue (elee Mateo 11:27). Jesús osegi vaʼekue Jehová ehémplo enteroite mbaʼépe, ha upévare ikatu vaʼekue heʼi: “Upe chéve cherecháva ohecháma avei pe Túape” (Juan 14:9). Jesús ningo pyʼỹinte heʼi vaʼekue Jehová haʼeha peteĩ Túa. Por ehémplo, jaleévo umi 4 lívro omombeʼúva umi mbaʼe Jesús heʼi ha ojapo vaʼekue, umívapente voi jatopa Jesús oipuru hague haimete 200 vése umi palávra “Ru”, térã “Túa” oñeʼẽ hag̃ua Jehováre. ¿Mbaʼérepa Jesús oipuru vaʼekue hetaiterei vése umi palávra? Pórke haʼe oipota vaʼekue umi hénte oĩ segúro Jehová haʼeha peteĩ Túa oporohayhúva, ha upéva peteĩ mbaʼe omomýi vaʼekue chupe ojapo hag̃ua upéva (Juan 17:25, 26).

7. ¿Mbaʼépa ikatu ñaaprende Jehovágui jahechávo mbaʼéichapa haʼe otrata vaʼekue Itaʼýrape?

⁷ Jahechamína mbaʼépa ñaaprende Jehovágui jahechávo mbaʼéichapa haʼe otrata vaʼekue Itaʼýra Jesúspe. Jehová ningo siémpre ohendu vaʼekue Jesús ñemboʼe, péro ndahaʼéi ohendúnteva, síno ombohovái avei umíva (Juan 11:41, 42). Tahaʼe haʼéva umi mbaʼe ohasáva, Jesús siémpre oñandu vaʼekue Itúa ohayhu ha oapojaha chupe (Luc. 22:42, 43).

8. ¿Mbaʼéichapa Jehová ohechauka okuidaha Jesúsre?

⁸ Jesús oikuaa porã vaʼekue Jehová omeʼẽ hague chupe la vída, ha avei omeʼẽha chupe entéro mbaʼe oikotevẽva osegi hag̃ua oikove. Upévare haʼe heʼi vaʼekue: “Che aikove pe Túa rupive” (Juan 6:57). Jesús okonfia vaʼekue Itúare ipyʼaite guive, ha Jehová omeʼẽ chupe umi mbaʼe oikotevẽva osegi hag̃ua oikove. Péro iñimportanteveha, Jehová oipytyvõ vaʼekue Jesúspe osegi hag̃ua ifiél chupe (Mat. 4:4).

9. ¿Mbaʼéichapa Jehová ohechauka vaʼekue ohayhuha Jesúspe?

⁹ Jehová haʼe rupi peteĩ Túa oporohayhúva, oikuaauka vaʼekue Itaʼýrape oapojaha chupe (Mat. 26:53; Juan 8:16). Jehová ndoprotehéiramo jepe Jesúspe pono ojehu chupe mbaʼeve ivaíva, haʼe oipytyvõ vaʼekue chupe oaguanta hag̃ua umi pruéva ijetuʼuetéva. Jesús oikuaa vaʼekue  umi mbaʼe ikatúva oiko hese sapyʼaite g̃uarãnteha (Heb. 12:2). Jehová ohechauka vaʼekue ohayhuha Jesúspe ohendúvo chupe, omeʼẽvo chupe entéro mbaʼe oikotevẽva, ohekomboʼévo ha avei oipytyvõvo chupe (Juan 5:20; 8:28). Jahechamína koʼág̃a mbaʼéichapa ñande Ru yvagapegua ohechauka ñanderayhuha ha okuidaha avei péicha ñanderehe.

10. Ohechaukaháicha Salmo 66:19, 20, ¿mbaʼéichapa Jehová ohechauka ñanderayhuha?

¹⁰ Jehová ohendu ñane ñemboʼe (elee Salmo 66:19, 20). Jehová ndoipotái ñamoĩ límite ñañemboʼe hag̃ua chupe, por ehémplo mboy vésepa ñañemboʼéta, mbaʼe rehepa ñañeʼẽta térã mboýpa ipuku vaʼerã ñane ñemboʼe. Upéva rangue haʼe oipota ñañemboʼe meme chupe (1 Tes. 5:17). Ñande ikatu ñañemboʼe Jehovápe oimeha óra ha ñaime ñaimehápe. Haʼe ningo ndahaʼéi ku hembiapoitereíva ñanerendu hag̃ua, upéva rangue haʼe siémpre oñemotiémpo ohendu hag̃ua ñane ñemboʼe. Jahechakuaa jave Jehová ñanerenduha ñañemboʼe jave chupe, koʼýte jahayhuve chupe. Pe salmísta heʼi vaʼekue: “Che ahayhu Jehovápe, pórke haʼe cherendu” (Sal. 116:1).

11. ¿Mbaʼéichapa Jehová ombohovái ñane ñemboʼe?

¹¹ Ñande Ru ndahaʼéi ohendúnteva la ñane ñemboʼe, síno ombohovái avei umíva. Apóstol Juan ohechauka porã upéva heʼívo: “Oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta” (1 Juan 5:14, 15). Péro heta vése Jehová nombohováiri ñane ñemboʼe ñande ñahaʼarõ hagueichaite. Haʼe ningo oikuaa mbaʼépa iporãve ñandéve g̃uarã, upévare sapyʼánte nomeʼẽi ñandéve pe jajeruréva chupe, térã oipotánte ñahaʼarõmie (2 Cor. 12:7-9).

12, 13. ¿Mbaʼéichapa Jehová ohechauka okuidaha ñanderehe omeʼẽvo ñandéve umi mbaʼe ñaikotevẽva?

¹² Jehová omeʼẽ ñandéve umi mbaʼe ñaikotevẽva. Jehová ningo oipota umi tuakuéra omeʼẽ ifamíliape umi mbaʼe oikotevẽva hikuái, ha haʼe upeichaite avei ojapo (1 Tim. 5:8). Jehová ningo omeʼẽ itaʼýra ha itajyrakuérape umi mbaʼe oikotevẽva oikove hag̃ua. Haʼe ndoipotái jajepyʼapyeterei pe tembiʼúre, aóre térã moõpa jaikóta (Mat. 6:32, 33; 7:11). Jehová haʼe rupi peteĩ Túa oporohayhúva, oñenkargáma voi de antemáno jareko hag̃ua entéro mbaʼe ñaikotevẽtava amo gotyove jepe.

¹³ Péro iñimportanteveha, Jehová omeʼẽ ñandéve ñaikotevẽva guive ikatu hag̃uáicha jareko peteĩ amista iporãva hendive. La Biblia rupive haʼe omyesakã mbaʼeichagua persónapa haʼe, mbaʼéichapa haʼe oipota vaʼekue ojeiko, mbaʼérepa ñandeapo rakaʼe ha mbaʼépa oikóta amo gotyove. Haʼe ohechauka vaʼekue ñanepytyvõseha ñañepyrũrõ guare jaikuaa umi mbaʼe omboʼéva la Biblia, upearã ojevale ñande tuakuérare térã peteĩ ermánore ikatu hag̃uáicha jaikuaa porãve chupe. Ha koʼag̃aite peve Jehová osegi ñanepytyvõ mborayhúpe umi ansiáno ha ermáno ha ermána ijerovia mbaretéva rupive. Avei haʼe ñanemboʼe umi rreunión rupive, umívape ñande ñaaprende Jehovágui ñane ermanokuérandi, haʼéva ñane família. Ojapóvo koʼã ha hetave mbaʼe, Jehová ohechauka añetehápe oñeinteresaha ñanderehe peteĩ Túaicha (Sal. 32:8).

14. ¿Mbaʼérepa Jehová ñanerekomboʼe, ha mbaʼéichapa ojapo upéva?

¹⁴ Jehová ñanerekomboʼe. Jesús ningo perfékto vaʼekue, péro ñande nahániri. Upévare sapyʼánte tekotevẽ Jehová ñandekorrehi ikatu hag̃uáicha ñanerekomboʼe. La Biblia ñanemomanduʼa: “Jehová okorrehi umi ohayhúvape” (Heb. 12:6, 7). Haʼe ningo ojapo upéva heta hendáicha. Por ehémplo, ikatu oime ñahendu raʼe peteĩ mbaʼe ojeʼéva rreunionhápe térã jalee la Biblia, ha jahechakuaa tekotevẽha ñakambia ñapensa lája térã peteĩ mbaʼe jajapóva. Térã ikatu avei umi ansianokuéra ñanepytyvõ pe ñaikotevẽhápe. Tahaʼe haʼéva pe oipurúva ñandekorrehi hag̃ua, Jehová siémpre ojapo upéva ñanderayhu rupi (Jer. 30:11).

15. ¿Mbaʼe mbaʼépa Jehová ojapo ñandeprotehe ha oñangareko hag̃ua ñanderehe?

¹⁵ Jehová ñanepytyvõ ñaaguanta hag̃ua umi  situasión ijetuʼúva. Peteĩ túa ohayhúva ifamíliape oipytyvõ itaʼýra o itajýrape ohasa asy jave hikuái. Ñande Ru yvagapegua ningo upeichaite avei ojapo, haʼe ñanepytyvõ ojere vaipa jave ñandéve. Upearã haʼe oipuru ijespíritu sánto, ñandeprotehéva oimeraẽ mbaʼe ikatúvagui ombyai pe amista jarekóva hendive (Luc. 11:13). Jehová ningo oñangareko avei ñanderehe ñañekevrantaiterei térã ñañedesanima jave. Por ehémplo, omeʼẽ ñandéve peteĩ esperánsa iporãitereíva, ha upe esperánsa ñanepytyvõ jasegi hag̃ua ñaaguanta umi provléma. Epensamína ko mbaʼére: Tahaʼe haʼéva pe oikóva ñanderehe, ñande Ru ñanderayhuetéva katuete omyatyrõ jeýta upéva. Umi mbaʼe vai jahasáva ningo sapyʼami g̃uarãnte, péro umi vendisión Jehová omeʼẽtava ñandéve opa ára g̃uarã (2 Cor. 4:16-18).

16. ¿Mbaʼépa oiko raʼe Adán naiñeʼẽrendúirõ guare Itúape?

¹⁶ Ñande ikatu avei jahechakuaa Jehová ñanderayhuetereiha, ñapensávo mbaʼépa haʼe ojapo raʼe Adán naiñeʼẽrendúirõ guare chupe. Ojapo rupi upéva, Adán ha ifamiliare noĩvéima Jehová família apytépe (Rom. 5:12; 7:14). Péro Jehová ojapo álgo oipytyvõ hag̃ua Adán familiarépe.

17. ¿Mbaʼépa Jehová ojapo vaʼekue ensegidaiténte voi Adán opeka rire?

¹⁷ Jehová okastiga vaʼekue Adánpe, péro opromete oipytyvõtaha ifamiliarépe. Haʼe ensegidaiténte voi opromete umi yvypóra iñeʼẽrendúva chupe ikatutaha oike jey ifamília apytépe (Gén. 3:15; Rom. 8:20, 21). Ikatu hag̃uáicha ojapo upéva, Jehová ojevale vaʼekue Itaʼýra ohayhuetéva sakrifísiore. Ontregávo Jesúspe ñanderehehápe, Jehová ohechauka porãiterei vaʼekue mbaʼeichaite pevépa ñanderayhu (Juan 3:16).

18. Oiméramo jepe ñañemomombyry raʼe Jehovágui, ¿mbaʼérepa ikatu ñaime segúro haʼe ñanderayhuha ha oipotaha ñaĩ ifamília apytépe?

¹⁸ Ñande ñaneimperféktoramo jepe, Jehová oipota ñaime ifamília apytépe. Haʼe ningo núnka nañanderechamoʼãi peteĩ kárgaicha. Sapyʼánte ikatu ñadesepsiona chupe, térã ñañemomombyry chugui peteĩ tiémpore, péro Jehová núnka nopensái  nañanepohãveimaha. Jesús ohechauka vaʼekue mbaʼeichaite pevépa Jehová ohayhu ifamíliape, omombeʼúrõ guare pe ehémplo oñeʼẽva pe taʼýra ofalla vaʼekuére (Luc. 15:11-32). Upe ehémplope, pe túa siémpre ohaʼarõ kuri itaʼýra ou jey, ha ohechárõ guare itaʼýra ou jeyha hógape, haʼe vyʼápe orresivi chupe. Oiméramo ñande ñañemomombyry raʼe Jehovágui péro koʼág̃a ñañarrepentíma, ikatu ñaime segúro ñande Ru ñanderayhuetéva vyʼápe ñanderresivi jeytaha.

19. ¿Mbaʼéichapa Jehová omyatyrõta umi mbaʼe vai oiko vaʼekue Adán opeka haguére?

¹⁹ Ñande Ru ningo omyatyrõmbaitéta umi mbaʼe vai oiko vaʼekue Adán opeka haguére. Adán opuʼã rire Ñandejárare, Jehová odesidi oadoptataha 144.000 yvypórape, ohótava yvágape oservi hag̃ua rréi ha saserdóteramo Itaʼýra ndive. Jesús ha umi ogovernátava hendive oipytyvõta umi yvypóra iñeʼẽrendúvape oiko hag̃ua chuguikuéra perfékto pe múndo pyahúpe. Ha ohasa rire hikuái pe pruéva finál, Jehová omeʼẽta chupekuéra vída etérna. Upe tiémpope ñande Túa ovyʼaitereíta ohechávo ko yvy henyhẽha itaʼýra ha itajyrakuéra perféktogui. ¡Ajépa iporãite umi mbaʼe ñaneraʼarõva!

20. a) ¿Mbaʼéichapa Jehová ohechauka ñanderayhuetereiha? b) ¿Mbaʼépa jahecháta pe ótro artíkulope?

²⁰ Jehová ningo ohechauka ñanderayhuetereiha. Ndaipóri voi ótro túa haʼeichagua. Haʼe ohendu ñane ñemboʼe ha omeʼẽ ñandéve umi mbaʼe ñaikotevẽva, tahaʼe jaikove hag̃ua térã jareko hag̃ua peteĩ amista iporãva hendive. Haʼe avei ñanerekomboʼe ha ñanepytyvõ. Ha ojapóta hetaiterei mbaʼe porã ñanderehehápe amo gotyove. ¡Ajépa opokoite ñanderehe jaikuaávo ñande Ru ñanderayhuetereiha ha okuidaha ñanderehe! Ha ñande haʼe rupi itaʼýra, jahechaukase jaagradeseha chupe péicha ñanderayhu haguére. ¿Mbaʼéichapa ikatu jajapo upéva? Pe ótro artíkulope jahecháta upéva.