1. Ano ang dapat himuon sang isa para maistorya niya ang hari sang Persia?

IMADYINA nga nagakabuhi ka sa Persia mga 2,500 ka tuig na ang nagligad. Gusto mo mag-istorya sa hari sang pungsod, gani nagkadto ka sa palasyo sang hari sa siudad sang Susan. Pero para maistorya mo ang hari, kinahanglan mo anay ang pahanugot niya. Kon wala ka sing pahanugot, mahimo nga patyon ka!—Est. 4:11.

2. Ano ang gusto ni Jehova kon mag-istorya kita sa iya?

² Nagapasalamat gid kita kay indi pareho sa hari sang Persia si Jehova! Mas gamhanan kag mas importante si Jehova sangsa bisan sin-o nga manuggahom nga tawo, pero maistorya naton sia bisan ano nga oras. Gusto niya nga indi kita matahap mag-istorya sa iya. Halimbawa, bisan pa nga si Jehova ang Daku nga Manunuga, Labing Gamhanan, kag Soberanong Ginuo, gusto niya nga tawgon naton sia nga “Amay.” (Mat. 6:9) Nalipay kita kay gusto ni Jehova nga mangin suod gid kita sa iya!

3. Ngaa matawag naton si Jehova nga “Amay,” kag ano ang binagbinagon sa sini nga artikulo?

³ Nagakaigo lang nga tawgon naton si Jehova nga “Amay” kay sia ang Tuburan sang aton kabuhi. (Sal. 36:9) Bangod sia ang aton Amay, responsibilidad naton nga tumanon sia. Kon himuon naton ang ginapatuman niya sa aton, pakamaayuhon niya kita. (Heb. 12:9) Nalakip sa sining pagpakamaayo ang kabuhi nga wala sing katapusan sa langit ukon sa duta. Kag bisan subong, may ginabaton man kita nga mga pagpakamaayo. Binagbinagon sa sini nga artikulo kon paano ginapakita sa aton ni Jehova nga isa sia ka mahigugmaon nga Amay kag kon ngaa makasigurado kita nga indi gid niya kita pagpabay-an sa palaabuton. Pero binagbinagon anay naton kon ngaa makasalig  kita nga palangga gid kita sang aton Amay sa langit kag gusto niya kita buligan.

4. Ngaa nabudlayan ang iban nga kabigon si Jehova bilang ila Amay?

⁴ Nabudlayan ka bala nga kabigon ang Dios bilang imo Amay? Ang iban nagabatyag nga indi sila importante para kay Jehova bangod gamhanan gid sia. Nagabatyag sila nga wala nagaulikid sa ila ang Labing Gamhanan nga Dios. Pero indi gusto sang aton mahigugmaon nga Amay nga amo sini ang aton batyagon. Ginhatagan niya kita sang kabuhi kag gusto niya nga mangin suod kita sa iya. Ginpaathag ni apostol Pablo ini nga kamatuoran sa iya mga tagpalamati sa Atenas. Dayon nagsiling sia nga si Jehova ‘indi malayo sa tagsa sa aton.’ (Binu. 17:24-29) Gusto sang Dios nga ang kada isa sa aton magpalapit sa iya pareho sa isa ka bata nga nagapalapit sa iya mahigugmaon nga ginikanan nga nagaulikid sa iya.

5. Ano ang matun-an naton sa eksperiensia sang isa ka sister?

⁵ Nabudlayan ang iban nga kabigon si Jehova bilang ila Amay bangod wala sila ginpalangga sang ila mismo amay. Binagbinaga ang ginsiling sang isa ka sister. “Masakit maghambal si Tatay,” siling niya. “Sang nagtuon ako sang Biblia, daw nabudlayan ako magpati nga puede ako mangin suod sa isa ka langitnon nga Amay. Pero sang nakilala ko si Jehova, nagbag-o ang akon pagtamod.” Amo man bala sini ang imo ginabatyag? Kon huo, indi ka dapat maluyahan sang buot. Makabig mo man sa ulihi si Jehova nga imo pinakamaayo nga Amay.

6. Suno sa Mateo 11:27, ano ang isa ka paagi nga ginabuligan kita ni Jehova nga kabigon sia bilang aton mahigugmaon nga Amay?

⁶ Ang isa ka paagi nga ginabuligan kita ni Jehova nga kabigon sia bilang aton mahigugmaon nga Amay amo nga ginpasulat niya sa Biblia ang mga ginsiling kag ginhimo ni Jesus. (Basaha ang Mateo 11:27.) Nailog sing perpekto ni Jesus ang mga kinaiya sang iya Amay, gani nakasiling sia: “Ang bisan sin-o nga nakakita sa akon nakakita man sa Amay.” (Juan 14:9) Masami nga ginasugid ni Jesus ang ginahimo ni Jehova bilang isa ka Amay. Sa apat ka Ebanghelyo, mga 165 ka beses nga gintawag ni Jesus si Jehova nga “Amay.” Ngaa madamo sang ginsugid si Jesus parte kay Jehova? Ang isa ka rason amo nga para mangin kumbinsido ang mga tawo nga si Jehova isa ka mahigugmaon nga Amay.—Juan 17:25, 26.

7. Ano ang matun-an naton sa kon paano gintratar ni Jehova ang iya Anak?

⁷ Binagbinaga kon ano ang matun-an naton parte kay Jehova sa kon paano niya gintratar ang iya Anak nga si Jesus. Pirme ginpamatian ni Jehova ang mga pangamuyo ni Jesus. Wala lang niya ginpamatian ang mga pangamuyo ni Jesus kundi ginsabat man niya ini. (Juan 11:41, 42) Bisan ano man ang mga kabudlayan nga naeksperiensiahan ni Jesus, pirme gid niya nabatyagan ang gugma kag bulig sang iya Amay.—Luc. 22:42, 43.

8. Sa ano nga mga paagi ginsakdag ni Jehova si Jesus?

⁸ Nakahibalo si Jesus nga ang iya Amay amo ang Tuburan kag Manugsakdag sang iya kabuhi, amo nga nakasiling sia: “Nagakabuhi ako bangod sa Amay.” (Juan 6:57) Nagsalig sing bug-os si Jesus sa iya Amay, kag ginhatagan sia ni Jehova sang iya mga kinahanglanon para mabuhi. Ang pinakaimportante sa tanan, ginbuligan ni Jehova si Jesus nga magpabilin nga matutom sa iya.—Mat. 4:4.

9. Paano ginpamatud-an ni Jehova kay Jesus nga isa sia ka mahigugmaon nga Amay nga nagaulikid sa iya?

⁹ Bangod isa ka mahigugmaon nga Amay si Jehova, ginsigurado niya nga nakahibalo si Jesus nga ginabuligan sia sang iya Amay. (Mat. 26:53; Juan 8:16) Wala ginproteksionan ni Jehova si Jesus sa tanan nga makahalit sa iya, pero ginbuligan Niya sia nga mabatas ang mga pagtilaw. Nakahibalo si Jesus nga temporaryo lang ang halit nga mahimo antuson niya. (Heb. 12:2) Ginpamatud-an ni Jehova nga palangga niya si Jesus paagi sa pagpamati sa iya, paghatag sang iya mga kinahanglanon, paghanas sa iya, kag pagbulig sa  iya. (Juan 5:20; 8:28) Hibaluon naton kon paano ang aton mahigugmaon nga Amay sa langit nagaulikid sa aton sa pareho nga mga paagi.

10. Suno sa Salmo 66:19, 20, paano ginapakita ni Jehova nga palangga niya kita?

¹⁰ Ginapamatian ni Jehova ang aton mga pangamuyo. (Basaha ang Salmo 66:19, 20.) Indi niya gusto nga limitahan naton ang aton pangamuyo sa iya. Ginapalig-on niya kita nga pirme magpangamuyo. (1 Tes. 5:17) Mahimo kita magpangamuyo sa aton Dios bisan sa ano nga oras kag bisan diin kita. May tion gid sia para pamatian ang aton mga pangamuyo. Kon ginaapresyar naton nga ginapamatian ni Jehova ang aton mga pangamuyo, mas higugmaon pa gid naton sia. “Ginahigugma ko si Jehova,” siling sang salmista, “bangod ginapamatian niya ang akon tingog.”—Sal. 116:1.

11. Paano ginasabat ni Jehova ang aton mga pangamuyo?

¹¹ Wala lang ginapamatian sang aton Amay ang aton mga pangamuyo kundi ginasabat man niya ini. Si apostol Juan nagapasalig sa aton: “Bisan ano ang ipangamuyo naton suno sa [kabubut-on sang Dios], magapamati sia sa aton.” (1 Juan 5:14, 15) Mahimo nga sabton ni Jehova ang aton mga pangamuyo sa paagi nga wala naton ginapaabot. Nakahibalo sia kon ano ang pinakamaayo para sa aton, gani kon kaisa, indi ang iya sabat ukon gusto niya nga maghulat kita.—2 Cor. 12:7-9.

12-13. Sa ano nga mga paagi ginahatag sang aton Amay sa langit ang aton mga kinahanglanon?

¹² Ginahatagan kita ni Jehova sang aton mga kinahanglanon. Ginahimo niya kon ano ang ginapatuman niya sa tanan nga amay. (1 Tim. 5:8) Ginahatagan niya ang iya mga anak sang ila mga kinahanglanon para mabuhi sila. Indi niya gusto nga kabalak-an naton ang parte sa aton pagkaon, bayo, ukon puluy-an. (Mat. 6:32, 33; 7:11) Bilang isa ka mahigugmaon nga Amay, ginsigurado man niya nga matigayon naton ang aton mga kinahanglanon sa palaabuton.

¹³ Ang pinakaimportante sa tanan, ginahatagan kita ni Jehova sang aton mga kinahanglanon para mangin suod kita sa iya. Paagi sa iya Pulong, gintudluan niya kita kon sin-o sia, kon ano ang iya katuyuan, kon ngaa gintuga niya kita, kag kon ano ang matabo sa palaabuton. Ginbuligan niya kita nga makilala sia paagi sa aton mga ginikanan ukon paagi sa iban nga nagtudlo sa aton. Kag padayon niya kita nga ginabuligan nga mangin abyan sia paagi sa mahigugmaon nga mga gulang sa kongregasyon kag hamtong nga mga kauturan. Ginatudluan man kita ni Jehova paagi sa aton mga miting sang kongregasyon kaupod ang aton mga kauturan. Pila lang ini sa mga paagi nga ginapakita ni Jehova nga interesado sia sa aton bilang aton Amay.—Sal. 32:8.

14. Ngaa ginahanas kita ni Jehova, kag paano niya ini ginahimo?

¹⁴ Ginahanas kita ni Jehova. Indi pareho ni Jesus, indi kita perpekto. Gani para hanason kita, ginadisiplina kita sang aton mahigugmaon nga Amay kon kinahanglanon. Ginapahanumdom kita sang iya Pulong: “Ang ginahigugma ni Jehova ginadisiplina niya.” (Heb. 12:6, 7) Ginadisiplina kita ni Jehova sa madamo nga paagi. Halimbawa, mahimo may mabasahan kita sa Biblia ukon may mabatian sa miting nga makaparealisar sa aton nga dapat naton bag-uhon ang aton ginahunahuna ukon ginahimo. Ukon mahimo buligan kita sang mga gulang. Ano man ang paagi sang pagdisiplina sa aton ni Jehova, ginahimo niya ini bangod palangga niya kita.—Jer. 30:11.

15. Paano kita ginabuligan ni Jehova nga mabatas ang mga pagtilaw?

¹⁵ Ginabuligan kita ni Jehova nga mabatas ang mga pagtilaw. Pareho sa isa ka mahigugmaon nga amay nga ginabuligan ang iya kabataan sa tion sang mga kabudlayan, ginabuligan kita sang aton Amay sa langit nga mabatas ang mga pagtilaw. Ginahatagan niya kita sang iya balaan nga espiritu. Ginaamligan kita sini para indi mahalitan ang  aton kaangtanan sa iya. (Luc. 11:13) Ginabuligan man kita ni Jehova kon magluya ang aton buot. Halimbawa, ginhatagan niya kita sang makalilipay nga paglaum. Ina nga paglaum sa palaabuton nagabulig sa aton nga mabatas ang mga kabudlayan. Hunahunaa ini: Ano man ang malain nga matabo sa aton, dulaon sang aton mahigugmaon nga Amay ang bisan ano nga halit sini sa aton. Temporaryo lang ang tanan nga mga pagtilaw, pero ang mga pagpakamaayo nga ginahatag sa aton ni Jehova magapadayon asta sa wala sing katapusan.—2 Cor. 4:16-18.

16. Ano ang natabo sang wala gintuman ni Adan ang iya mahigugmaon nga Amay?

¹⁶ Makita naton ang pamatuod sang gugma ni Jehova sa aton kon hunahunaon naton ang ginhimo niya sang nagrebelde si Adan sa iya. Sang wala nagtuman si Adan sa iya Amay sa langit, sia kag ang iya mga kaliwat indi na bahin sang pamilya ni Jehova. (Roma 5:12; 7:14) Pero may ginhimo si Jehova para buligan ang mga kaliwat ni Adan.

17. Pagkatapos magrebelde si Adan, ano ang ginhimo gilayon ni Jehova?

¹⁷ Ginsilutan ni Jehova si Adan, pero nagpromisa sia nga buligan niya ang mga kaliwat ni Adan. Nagpromisa sia gilayon nga mangin bahin liwat sang iya pamilya ang matinumanon nga mga tawo. (Gen. 3:15; Roma 8:20, 21) Ginpaposible ini ni Jehova paagi sa halad-gawad sang iya pinalangga nga Anak nga si Jesus. Ginpamatud-an ni Jehova nga palangga gid niya kita paagi sa paghatag sang iya Anak para luwason kita.—Juan 3:16.

18. Ngaa makasigurado kita nga gusto ni Jehova nga mangin bahin kita sang iya pamilya bisan pa nagpahilayo kita sa iya?

¹⁸ Bisan indi kita perpekto, gusto ni Jehova nga mangin bahin kita sang iya pamilya, kag wala sia nagabatyag nga nagapabug-at lang kita sa iya. Mahimo nga mapasubo naton si Jehova ukon mapahilayo  kita sa iya, pero nagalaum gid sia nga magbalik kita sa iya. Ginlaragway ni Jesus kon ano kadaku ang gugma ni Jehova sa iya mga anak paagi sa pag-istorya parte sa isa ka anak nga nagpalayo sa iya pamilya. (Luc. 15:11-32) Sa ilustrasyon, padayon nga naglaum ang amay nga magabalik ang iya anak. Sang nagbalik ang anak, malipayon nga ginbaton sia sang iya amay. Kon napahilayo kita kay Jehova pero naghinulsol kita, makasigurado kita nga handa gid ang aton mahigugmaon nga Amay sa pagbaton sa aton kon magbalik kita sa iya.

19. Paano dulaon ni Jehova ang halit nga resulta sang ginhimo ni Adan?

¹⁹ Dulaon sang aton Amay ang tanan nga halit nga resulta sang ginhimo ni Adan. Pagkatapos magrebelde si Adan, nagdesisyon si Jehova nga mag-adoptar sang 144,000 ka katawhan nga mangin hari kag saserdote sa langit kaupod ang iya Anak. Buligan ni Jesus kag sang kaupod niya nga mga gumalahom ang matinumanon nga mga tawo para mangin perpekto sila sa bag-ong kalibutan. Kon mangin matutom sila sa katapusan nga pagtilaw sang ila pagkamatinumanon, hatagan sila sang Dios sing kabuhi nga wala sing katapusan. Magakalipay gid ang aton Amay nga mapuno ang duta sang iya perpekto nga mga anak. Makalilipay gid ini nga tion!

20. Paano ginapamatud-an ni Jehova nga palangga gid niya kita, kag ano ang binagbinagon sa masunod nga artikulo?

²⁰ Ginapamatud-an ni Jehova nga palangga gid niya kita. Sia ang pinakamaayo nga Amay. Ginapamatian niya ang aton mga pangamuyo kag ginahatagan niya kita sang aton mga kinahanglanon para mabuhi kita kag para makapabilin nga matutom sa iya. Ginahanas niya kita kag ginabuligan. Kag pakamaayuhon gid niya kita sa palaabuton. Nalipay gid kita nga mabal-an nga ginapalangga kita sang aton Amay kag nagaulikid sia sa aton! Binagbinagon sa masunod nga artikulo kon paano naton mabalusan ang iya gugma sa aton bilang iya mga anak.