1. Parasa ena king oi hereva henia totona dahaka do oi karaia?

MANI OI LALOA oi be lagani 2,500 gunanai Parasa dekenai oi noho. Bona oi ura king oi hereva henia dainai, king ia noho siti ladana Susa dekenai oi lao. To, king ia noho gabuna oi vareai totona, iena gwaumaoro oi abia be namo. Bema unai bamona oi karaia lasi, emu mauri oi haboioa diba!​—⁠Est. 4:11.

2. Iehova hereva henia dalana be edena bamona ita laloa?

² Ita moale bada, badina Iehova be unai Parasa ena king bamona lasi! Ena be Iehova ese lohia taudia ibounai ia hereaia, to nega idauidau ai Ia ita hereva henia diba. Ia ura mai gari lasi ida ia ita hereva henia. Hegeregere, ena be Iehova be inai bamona ladana, Havaraia Tauna Badana, Siahu Ibounai Diravana, bona Siahu Ibounai Lohiabada ia abia, to ia ura ia ita guriguri henia neganai inai hereva “Tamana” ita gaukaralaia. (Mat. 6:9) Ita moale badina Iehova ia ura ia kahirakahira ita lao!

3. Dahaka dainai Iehova ita gwauraia diba “Tamana,” bona inai atikol ai dahaka do ita herevalaia?

³ Iehova ita gwauraia diba “Tamana”​—⁠ia be iseda mauri ena Badina. (Sal. 36:9) Ia be iseda Tamana dainai, ia ita kamonai henia be namo. Bema iena ura hegeregerena ita kara, hahenamo namodia momo do ita moalelaia. (Heb. 12:9) Unai hahenamo ta be mauri hanaihanai, guba ai eiava tanobada ai. Unai bamona hahenamo haida be hari ita moalelaia noho. Inai atikol ai Iehova be hari lalokau Tamana ta bamona ia kara dalana, bona dahaka dainai ita diba momokani vaira negai ita do ia  rakatania lasi karana do ita herevalaia. To ginigunana, dahaka dainai ita diba momokani iseda guba Tamana ese ita ia lalokau henia bona laloa bada dalana mani ita herevalaia.

4. Dahaka dainai ia auka haida ese Iehova be edia Tamana bamona idia laloa totona?

⁴ Nega haida ia auka Dirava be emu Tamana bamona oi laloa totona, a? Reana haida idia laloa Iehova vairanai idia be anina lasi. Unai dainai idia laloa Siahu Ibounai Diravana be idia ia laloa lasi. To, iseda lalokau Tamana ia ura lasi unai bamona ita mamia. Badina ita dekenai mauri ia henia bona ia ura iena turana ai ita lao. Aposetolo Paulo ese unai ia hamomokania, Atena ai ia idia kamonai henia taudia dekenai ia hahedinaraia Iehova be “ita ta ta amo ia noho daudau lasi.” (Kara 17:24-29) Dirava ia ura ita ta ta ese ia ita hereva henia, natuna ta ese tama eiava sina lalokauna ia hereva henia bamona.

5. Keristani taihu ta ena ekspiriens amo dahaka ita dibaia?

⁵ Haida dekenai ia auka Iehova be edia Tamana bamona idia laloa totona, badina edia tamana korikoridia ese idia ia lalokau henidia lasi. Keristani taihu ta ena hereva mani ita laloa. Ia gwau: “Egu tamana be nega momo lau ia hereva auka henia. Baibel lau stadilaia matamaia neganai, ia auka Iehova be egu guba Tamana bamona lau laloa totona. To Iehova lau dibaia murinai, unai bamona lau laloa lou lasi.” Oi danu be unai bamona hemami oi abia, a? Bema oibe, namona be oi abia dae Iehova be emu Tamana namona ai ia lao diba.

6. Mataio 11:27 ena hereva bamona, Iehova be iseda lalokau Tamana bamona ita laloa totona, ita ia durua dalana ta be dahaka?

⁶ Iehova be iseda lalokau Tamana bamona ita laloa diba, badina ita durua totona Baibel ai Iesu ena hereva bona ia karaia gaudia edia sivarai ia torea. (Mataio 11:27 duahia.) Iesu be ena Tamana ena kara ia hahedinaraia goevagoeva, unai dainai ia gwau: “Lau ia itaia tauna be Tamana danu ia itaia vadaeni.” (Ioa. 14:9) Danu, nega momo Iesu ese Iehova ia gwauraia ia be Tamana namona. Evanelia bukadia 4 lalonai, Iesu ese Iehova ia herevalaia neganai, inai hereva “Tamana” be nega 165 bamona ia gaukaralaia. Dahaka dainai Iesu ese Iehova ia herevalaia momo? Badina ta be, taunimanima do idia abia dae Iehova be lalokau Tamana ta.​—Ioa. 17:25, 26.

7. Iehova ese ena Natuna ia kara henia dalana amo dahaka ita dibaia?

⁷ Mani Iehova ese ena Natuna, Iesu ia kara henia dalana amo ita dibaia gauna ita herevalaia. Iehova be hanaihanai Iesu ena guriguri ia kamonai henia, bona ia kamonai sibona lasi, to Iesu ena guriguri ia haerelaidia danu. (Ioa. 11:41, 42) Herevana Iesu be dahaka hahetoho ia davaria, to ena Tamana ena lalokau bona heduru ia mamia.​—Luka 22:42, 43.

8. Edena dala ai Iehova ese Iesu ia durua?

⁸ Iesu ia abia dae momokani ena Tamana be iena mauri ena Badina bona Durua Tauna, unai dainai ia gwau: “Tamana dainai lau mauri.” (Ioa. 6:57) Iesu be ena Tamana ia abidadama henia, bona Iehova ese ia durua gaudia ibounai ia henia. To mai anina bada gauna be, Iehova ese ena hetura karana Iesu ida ia laloa bada.​—Mat. 4:4.

9. Edena dala ai Iehova ese Iesu dekenai ia hahedinaraia ia be lalokau Tamana?

⁹ Iehova be lalokau Tamana ta dainai, ia ura Iesu ia diba iena Tamana ese hanaihanai ia do ia durua. (Mat. 26:53; Ioa. 8:16) Iehova be Iesu ia davaria hisihisi ibounai ia koua lasi, to ia durua unai hahetoho idauidau ia haheaukalaia totona. Iesu ia diba ia davaria hisihisi be do idia noho daudau lasi. (Heb. 12:2) Iehova  ese Iesu ia laloa bada dainai ia kamonai henia, ia durua gaudia ia henia, treinini ia henia bona ia durua. (Ioa. 5:20; 8:28) Mani iseda guba Tamana ese unai bamona daladia ai ita ia laloa bada karana ita herevalaia.

10. Salamo 66:19, 20 ena hereva bamona, edena dala ai Iehova ia hahedinaraia ita ia lalokau henia?

¹⁰ Iehova be iseda guriguri ia kamonai. (Salamo 66:19, 20 duahia.) Ia ura lasi iseda guriguri karana ita hadokoa, to nega ibounai ia ita guriguri henia. (1 Tes. 5:17) Herevana edeseniai ita noho, mai hemataurai ida nega idauidau ai iseda Dirava ita guriguri henia diba. Ia be nega ibounai ia noho hegaegae iseda guriguri ia kamonai totona. Iehova ese iseda guriguri ia kamonai henia karana ita laloa neganai, unai ese ita ia durua ia kahirakahira ita lao totona. Salamo torea tauna ia gwau: “[Iehova] ese egu guriguri . . . ia kamonai noho, unai dainai ia dekenai lau lalokau henia.”​—Sal. 116:1.

11. Edena dala ai Iehova ese iseda guriguri ia haerelaia?

¹¹ Iseda Tamana be guriguri ia kamonai sibona lasi, to iseda guriguri ia haerelaidia danu. Aposetolo Ioane ese ita ia hagoadaia ia gwau: “Herevana dahaka ita gurigurilaia, bema unai be Dirava ena ura hegeregerena, ia ese ita do ia kamonai henia.” (1 Ioa. 5:14, 15) Momokani, reana Iehova ese ita gurigurilaia gaudia be iseda ura hegeregerena ai do ia haerelaia lasi. Ia diba dahaka be namo ita totona, unai dainai nega haida ena haere be lasi, eiava ia ura ita naria.​—2 Kor. 12:7-9.

12-13. Edena dala idauidau ai iseda guba tamana ese ita ia durua?

¹² Iehova ese mauri durua gaudia ia henia. Iehova ia ura tama momo ese unai bamona do idia karaia. (1 Tim. 5:8) Ia be ena natudia dekenai tauanina durua gaudia ia henia. Ia ura lasi aniani, dabua, eiava noho gabudia totona ita lalohekwarahi. (Mat. 6:32, 33; 7:11) Iehova be lalokau tamana ta dainai, vaira negai ita idia durua diba gaudia ia henia.

¹³ Mai anina bada gauna be, ia ura iseda hetura karana ia ida ita hagoadaia. Baibel amo iena kara, iena ura, mauri ena anina, bona vaira negai do idia vara gaudia ia hadibaia. Iehova ia ura hereva momokani ita dibaia, unai dainai ia ese iseda tama sina eiava ma ta ia gaukaralaia, ia ita dibaia namonamo totona. Bona hanaihanai iseda kongrigeisen elda taudia bona lagani daudau lalonai Iehova idia hesiai henia tadikaka bona taihu amo heduru ita abia. Danu, Iehova ese kongrigeisen heboudia amo ita bona iseda tadikaka taihu ia hadibaia. Unai dala idauidau amo, Iehova be lalokau tamana bamona ia hahedinaraia ita ibounai ia laloa bada.​—Sal. 32:8.

14. Dahaka dainai Iehova be ita dekenai treinini ia henia, bona edena dala ai unai ia karaia?

¹⁴ Iehova ese ita dekenai treinini ia henia. Ita be goevadae lasi taudia, to Iesu be goevadae. Unai dainai treinini ita abia totona, iseda lalokau Tamana be nega maorodia ai matahakani ia henia. Baibel ese ita ia hadibaia: “Iehova ese ia lalokau henia tauna ia matahakani henia.” (Heb. 12:6, 7) Iehova be dala idauidau ai ita dekenai matahakani ia henia. Hegeregere Baibel ai ita duahia gauna ta eiava hebou ai ita kamonai hereva ta ese ita ia durua iseda kara ita haidaua totona. Eiava elda taudia amo heduru ita abia. Ena be dala idauidau ai matahakani ita abia, to Iehova be hanaihanai mai lalokau ida matahakani ia henia.​—Ier. 30:11.

15. Edena dala idauidau ai Iehova ese ita ia gimaia?

¹⁵ Iehova be hahetoho negadiai ita ia durua. Lalokau tama ta ese nega aukadia lalonai ena natudia ia durua hegeregerena, iseda lalokau guba Tamana be hahetoho negadiai ita ia durua. Iena lauma helaga ia gaukaralaia iseda  abidadama idia hadikaia gaudia amo ita ia gimaia totona. (Luka 11:13) Danu ita lalohekwarahi neganai Iehova ese ita ia durua. Hegeregere, ita dekenai vaira nega totona helaro namona ta ia henia, unai ese ita ia durua hekwakwanai idauidau ita haheaukalaia totona. Mani inai oi laloa: Herevana dika idauidau ita davaria, iseda lalokau Tamana ese unai dika ibounai do ia haorea. Ita davaria hahetoho idauidau be do idia noho daudau lasi, to Iehova ese ia henia hahenamo idauidau be do idia noho hanaihanai.​—2 Kor. 4:16-18.

16. Adamu ese ena lalokau Tamana ia gwau-edeede henia neganai dahaka ia vara?

¹⁶ Iehova ese Adamu dekenai ia vara hekwakwanai ia hamaoromaoroa dalana amo ena lalokau karana ita itaia. Adamu ese ena guba Tamana ia gwau-edeede henia neganai, ia bona ena bese taudia be Iehova ena ruma bese lalonai do idia noho ena hahenamo ia haboioa. (Roma 5:12; 7:14) To, Iehova be Adamu ena bese taudia durua totona kara ta ia karaia.

17. Adamu ia gwau-edeede neganai, Iehova be karaharaga dahaka ia karaia?

¹⁷ Iehova ese Adamu ia panisia, to Adamu ena bese taudia dekenai helaro ia henia. Karaharaga Iehova be gwauhamata ia karaia, ia idia kamonai henia taudia be iena bese taudia ai do idia lao. (Gen. 3:15; Roma 8:20, 21) Iena lalokau Natuna, Iesu, ena mauri davalaia boubouna amo unai ia karaia. Ita dainai iena Natuna ena mauri ia henia karana amo, Iehova ia hahedinaraia ita ia lalokau henia bada.​—Ioa. 3:16.

18. Dahaka dainai ita diba momokani ena be Iehova ita badinaia lasi, to ia ura iena natudia ai ita lao?

¹⁸ Herevana ita be goevadae lasi taudia, to Iehova ia ura ena bese taudia ai ita lao bona ia laloa lasi ia dekenai hekwakwanai do ita henia. Reana ia ita hahisia eiava nega haida ia ita  badinaia lasi, to Iehova be ita dekenai ia hesiku lasi. Iesu ese ia gwauraia boio merona ena haheitalai amo iena Tamana ena lalokau bada karana ia hahedinaraia. (Luka 15:11-32) Unai haheitalai ese ia herevalaia tamana be ia hesiku lasi ena natuna mero do ia giroa mai negana ia naria totona. Natuna mero be ruma dekenai ia giroa lou neganai, iena tamana ese mai moale ida ia welkam henia. Bema Iehova ena orea ita rakatania to ita helalo-kerehai bona ia dekenai ita giroa lou, ita diba momokani iseda lalokau Tamana be ia noho hegaegae ita ia welkam henia totona.

19. Edena dala ai Iehova ese Adamu ia havaraia dika ibounai do ia haorea?

¹⁹ Iseda Tamana be Adamu ese ia havaraia dika ibounai do ia haorea. Adamu ia gwau-edeede murinai, Iehova ese tanobada amo taunimanima 144,000 ia abia hidi iena Natuna ida guba dekenai king bona hahelaga gaukara do idia karaia totona. Tanobada matamata lalonai, Iesu bona ia ida do idia lohia taudia ese kamonai taudia do idia durua goevadae taudia ai idia lao totona. Hahetoho ginigabena ai idia kwalimu neganai, Dirava ese idia dekenai mauri hanaihanai helarona do ia henia. Iseda Tamana be do ia moale bada badina tanobada be goevadae natudia ese do idia noholaia. Unai be moale bada dinana!

20. Edena dala ai Iehova ia hahedinaraia ita ia lalokau henia bada, bona stadi atikol 7 ese dahaka do ia herevalaia?

²⁰ Iehova be dina ta ta ai ia hahedinaraia ita ia lalokau henia. Ia be Tamana namona. Ia be iseda guriguri ia kamonai henia, mauri durua gaudia ia henia, bona iseda hetura karana ia ida ia hagoadaia. Ita dekenai treinini ia henia bona ita ia durua. Danu vaira negai ita dekenai hahenamo idauidau do ia henia. Ita moale bada badina ita diba iseda Tamana ese ita ia lalokau henia bona laloa bada! Stadi atikol 7 ese, iena lalokau karana ita laloa bada daladia do ia herevalaia.