1. Nama patut digaga orang sebedau betemu enggau raja Persia?

UJI gambarka, nuan diau ba menua Persia kira-kira 2,500 taun kelia. Nuan deka bejaku enggau raja ba menua nya pasal siti-siti pekara. Lalu nuan mansang ngagai Susa, kuta alai raja nya diau. Tang sebedau ulih bejaku enggau raja, nuan patut minta pemendar. Enti enda, nuan deka dibunuh!—Est. 4:11.

2. Jehovah deka kitai ngembuan asai ati ke baka ni lebuh bejaku enggau Iya?

² Kitai amat beterima kasih laban Jehovah enda baka raja Persia nya! Taja pan Jehovah bekuasa agi ari semua pemerintah ba dunya tu, tang kitai ulih bejaku enggau Iya ba sebarang maya. Iya deka kitai senang bejaku enggau Iya. Ambika chunto, taja pan Jehovah nya Petara ti nempa semua utai, Pemadu Bekuasa, sereta Pemadu Tinggi, Iya deka kitai ngumbai Iya, “Apai.” (Mat. 6:9) Tu ngasuh kitai gaga ati laban Jehovah deka kitai semak ngagai Iya!

3. Nama kebuah kitai ngumbai Jehovah nya “Apai,” lalu nama deka dikerandauka kitai ba artikel tu?

³ Kitai endang patut ngumbai Jehovah nya “Apai” laban Iya Pun pengidup kitai. (Mas. 36:9) Ketegal Iya Apai kitai, kitai patut ngasika Iya. Lebuh kitai ngereja utai ke diasuh Iya, kitai deka bulih berekat ti badas. (Heb. 12:9) Berekat nya nyengkaum bulih pengidup ti meruan belama iya enda ngira di serega tauka ba dunya. Kitai mega tau bulih berekat kemayaharitu. Artikel tu deka berandauka chara Jehovah nunjukka Diri  sayauka kitai lalu kebuah kitai ulih andalka Iya enda ninggalka kitai. Tang sebedau nya, aram kitai meda kebuah kitai ulih andalka Iya amat sayau lalu deka nulung kitai.

4. Nama kebuah sekeda orang tusah deka ngumbai Jehovah nya Apai sida?

⁴ Kati nuan tusah deka ngumbai Jehovah nya Apai nuan? Sekeda orang engka ngumbai Iya kelalu badas nyentukka sida ngumbai diri enda beguna ba Iya. Sida mega ngumbai Iya enda ibuhka sida seiku-seiku. Tang, Jehovah enggai kitai berasai baka nya. Iya meri kitai pengidup lalu deka kitai ngembuan kaul ti manah enggau Iya. Indah rasul Paul nunjukka tu endang amat. Iya nerangka ngagai orang ba Atens pasal Jehovah ke “enda jauh ari kitai siku-siku.” (SKR. 17:24-29) Jehovah deka tiap iku kitai bejaku enggau Iya baka anak ke deka bejaku enggau apai ti sayau sereta ibuhka iya.

5. Nama ulih dipelajarka kitai ari seiku menyadi Kristian indu kitai?

⁵ Sekeda ke bukai engka tusah deka ngumbai Jehovah nya Apai sida laban apai sida empu enda ngayanka penyayau sereta penyiru ngagai sida. Ku seiku menyadi Kristian indu kitai madahka: “Apai aku enda kala manah jaku enggau aku. Lebuh aku berengkah belajarka Bup Kudus, tusah aku deka ngembuan kaul ti manah enggau Jehovah. Tang pengudah aku ngelala Iya, runding aku pasal Iya pan berubah.” Kala nuan ngasaika nya? Enti kala, anang lemi semengat. Nyau kelama, nuan mega tentu ulih ngasaika Jehovah nya Apai ti pemadu badas.

6. Nitihka Matthew 11:27, nama chara dikena Jehovah nulung kitai meda penyayau Iya ke kitai?

⁶ Siti chara Jehovah nulung kitai meda penyayau Iya ke kitai, iya nya ari jaku sereta ulah Jesus ke bisi disebut ba Bup Kudus. (Bacha Matthew 11:27.) Jesus neladan Apai iya nyentukka iya nyebut: ‘Barang sapa udah meda aku, udah meda Apai.’ (Jhn. 14:9) Jesus suah bejaku pasal Jehovah ke nyadi Apai. Ba empat iti bup Injil, Jesus nyauka 200 kali ngangauka Jehovah nya “Apai.” Nama kebuah Jesus suah ngumbai Jehovah nya Apai? Siti kebuah nya ngambika orang pechaya Jehovah nya Apai ti sayauka kitai.—Jhn. 17:25, 26.

7. Nama ulih dipelajarka kitai ari chara Jehovah ngintu Jesus?

⁷ Peratika chara Jehovah ngintu Anak Iya, Jesus. Jehovah seruran ninga sereta nyaut sampi iya. (Jhn. 11:41, 42) Enda ngira nama penanggul ke ditapi, Jesus ulih ngasaika penyayau sereta tulung ari Apai iya.—Luk. 22:42, 43.

8. Baka ni Jehovah nulung Jesus?

⁸ Jesus nemu Apai iya, Jehovah, meri iya pengidup. Jesus madahka: “Aku idup laban Apai.” (Jhn. 6:57) Jesus arap bendar ngagai Apai iya, lalu Apai iya meri utai ke diguna iya kena beridup. Keberat agi, Jehovah nulung Jesus ba pengarap ngambika mengkang tetap ati ngagai Iya.—Mat. 4:4.

9. Baka ni Jehovah ngayanka Diri amat sayauka Jesus?

⁹ Ketegal Jehovah nya Apai ti ngembuan penyayau, Iya tentu deka nulung Jesus. (Mat. 26:53; Jhn. 8:16) Taja pan Jehovah enda ngelindung Jesus ari sebarang utai ke ulih ngemediska iya, Jehovah nulung Jesus betan napi penguji. Jesus nemu semua pemerinsa ke ditapi iya nya enda lama aja. (Heb. 12:2) Jehovah ngayanka Diri amat sayauka Jesus. Iya ninga, nyediaka utai ke diguna, ngajar sereta nulung Jesus. (Jhn. 5:20; 8:28) Diatu aram kitai beratika chara Apai kitai, Jehovah, nulung kitai ngena chara ti sama.

10. Nitihka Masmur 66:19, 20, baka ni Jehovah nunjukka Diri sayauka kitai?

¹⁰ Jehovah ningaka sampi kitai. (Bacha Masmur 66:19, 20.) Iya nadai netapka penyampau sampi kitai ngagai Iya. Iya deka kitai seruran besampi ngagai Iya. (1 Tes. 5:17) Enggau chara ti bebasa, kitai ulih besampi ngagai Iya ba sebarang maya enda ngira dini alai kitai. Iya seruran bisi awak mendingka sampi kitai. Lebuh kitai nemu Jehovah mendingka sampi kitai, penyayau kitai ke Iya deka majak nambah. Ku pemasmur madahka: ‘Aku rinduka Jehovah laban Iya udah ninga aku.’—Mas. 116:1.

11. Baka ni Jehovah nyaut sampi kitai?

¹¹ Apai kitai, Jehovah, ninga sereta nyaut sampi kitai. Rasul John nunjukka tu amat. Ku iya: “Enti kitai minta sebarang utai nitihka peneka [Petara], Iya ninga kitai.” (1 Jhn. 5:14, 15) Amat, Jehovah engka enda nyaut sampi kitai nitihka chara ti disadang kitai. Iya nemu utai ti pemadu badas ke kitai. Nya alai kadang-kadang Iya deka kitai nganti dulu tauka Iya enda nyaut sampi kitai enti sampi nya enda sejalai enggau peneka Iya.—2 Kor. 12:7-9.

12-13. Baka ni Jehovah nyediaka utai ke diguna kitai?

¹² Jehovah nyediaka utai ke diguna kitai. Baka apai kitai empu, Jehovah mega nyediaka utai ke diguna kitai. (1 Tim. 5:8) Iya meri kitai utai kena beridup. Iya enggai kitai irau pasal pemakai, gari, tauka endur diau. (Mat. 6:32, 33; 7:11) Ketegal Jehovah sayauka kitai, Iya mega nentuka kitai bisi utai ke diguna kena dudi hari.

¹³ Keberat agi, Jehovah nyediaka utai ke diguna kitai ba pengarap ngambika bulih kaul ti manah enggau Iya. Nengah Bup Kudus, Iya madahka sapa Iya ke bendar, tuju Iya, reti pengidup, sereta pasal jemah ila. Iya ngena apai indai kitai tauka orang bukai ngajar kitai utai ke amat pasal Iya. Lalu kitai enda ngetu bulih bantu ari tuai gempuru sereta bala menyadi ke tegap ba pengarap. Kelimpah ari nya, Jehovah ngajar kitai nengah gempuru. Dia kitai sama belajar enggau bala menyadi Kristian kitai. Enggau chara tu, Jehovah ngayanka Diri ibuhka semua kitai.—Mas. 32:8.

14. Nama kebuah Jehovah ngajar kitai, lalu baka ni Iya ngereja nya?

¹⁴ Jehovah ngajar kitai. Enda baka Jesus, semua kitai enda sempurna. Nya alai enti Jehovah deka ngajar kitai, Iya patut disiplin tauka ngerara kitai. Bup Kudus ngingatka kitai: ‘Jehovah disiplin semua orang ke dikerinduka Iya.’ (Heb. 12:6, 7) Jehovah ngereja nya ngena mayuh chara. Ambika chunto, utai ke dibacha ba Bup Kudus tauka didinga ba gempuru engka ngasuh kitai sedar kitai patut ngaga ubah ba runding tauka ulah. Tauka bala tuai gempuru engka datai meri kitai jaku ajar. Enda ngira baka ni Jehovah disiplin kitai, Iya seruran ngereja nya ketegal Iya sayauka kitai.—Jer. 30:11.

15. Baka ni Jehovah nulung kitai?

¹⁵ Jehovah nulung kitai lebuh napi penguji. Baka apai kitai empu ke nulung kitai ba maya ti tusah, Apai kitai Jehovah nulung kitai napi penguji. Iya meri kitai roh kudus ngambika ulih ngelindung diri ari utai ti tau ngerusak kaul kitai enggau Iya. (Luk. 11:13) Jehovah mega nulung kitai lebuh kitai irau tauka asa ati. Ambika chunto, Iya meri kitai pengadang ti badas. Pengadang tu nulung kitai betan napi penguji. Peratika tu: Enda ngira nama utai jai ke nyadi dalam pengidup kitai, Apai kitai deka muai pemerinsa kitai. Semua penguji ke ditapi kitai nya enda lama aja. Tang berekat ke diberi Jehovah ngagai kitai meruan belama iya.—2 Kor. 4:16-18.

16. Nama nyadi pengudah Adam enda ngasika Jehovah?

¹⁶ Penyayau Jehovah ke kitai nyata dipeda lebuh kitai mikirka pasal utai ke digaga Iya pengudah Adam enda ngasika Apai iya, Jehovah. Ulah ti enda ngasi ngujungka Adam enggau peturun iya enda agi nyadi sebagi ari ruang bilik Jehovah. (Rom. 5:12; 7:14) Taja pia, Jehovah bisi ngereja utai kena nulung peturun Adam.

17. Pengudah Adam enda ngasika Jehovah, nama utai ke digaga Jehovah enggau jampat?

¹⁷ Jehovah ngukum Adam. Tang Iya besemaya deka nulung peturun Adam lebuh meri sida pengadang. Jehovah enggau jampat ngaga semaya ngagai sida ke ngasika Iya. Iya deka sida nyadi sebagi ari ruang bilik Iya baru. (P-kal. 3:15; Rom. 8:20, 21) Jehovah ngereja tu nengah genselan tebus Anak Iya, Jesus. Enggau tu, Jehovah nunjukka Diri amat sayauka kitai.—Jhn. 3:16.

18. Baka ni kitai nemu Jehovah deka kitai pulai baru ngagai Iya taja pan kitai udah limpang ari Iya?

¹⁸ Taja pan kitai enda sempurna, Jehovah deka kitai nyadi sebagi ari ruang bilik Iya. Lalu Iya enda ngasaika kitai ngenusahka Iya. Kitai engka ngasaka ati Jehovah tauka limpang ari Iya, tang Iya seruran ngarapka kitai pulai baru ngagai Iya. Jesus ngambarka penalam penyayau Apai iya ba cherita pasal seiku anak ke tesat. (Luk. 15:11-32) Ba cherita nya, seiku apai enda ngetu ngarapka anak iya ke limpang pulai baru. Lebuh anak nya pulai baru, apai iya gaga ati nerima iya. Enti kitai udah limpang ari Jehovah tang udah nya  nesal ati, kitai pechaya Iya sedia lalu deka nerima kitai pulai baru.

19. Baka ni Jehovah deka ngaduka baru semua pengerusak ke datai ari Adam?

¹⁹ Jehovah deka ngaduka baru semua pengerusak ke datai ari Adam. Pengudah Adam enda ngasika Jehovah, Jehovah mutuska deka ngiru 144,000 iku orang nyadi raja enggau imam ba serega. Sida deka merintah enggau Jesus Kristus. Ba dunya baru, Jesus enggau 144,000 iku nya deka nulung nembiak Jehovah ke ngasi, nyadi sempurna. Pengudah sida selamat ari penguji ti penudi, Jehovah deka merekatka sida ke ngasi nya enggau pengidup ti meruan belama iya ba dunya. Apai kitai, Jehovah, tentu gaga ati lebuh meda dunya tu penuh enggau nembiak Iya ti sempurna. Tu endang maya ti ngagaka ati!

20. Baka ni Jehovah nunjukka Diri amat sayauka kitai, lalu nama deka dikerandauka kitai ba artikel ti nangkanka tu?

²⁰ Jehovah udah nunjukka Diri amat sayauka kitai. Iya Apai ti badas. Iya ninga sampi kitai sereta nyediaka utai ke diguna ba pengidup enggau pengarap kitai. Iya ngajar sereta nulung kitai. Iya mega deka ngereja utai ti badas ke kitai jemah ila. Tu tentu ngagaka ati kitai lebuh nemu Jehovah sayau sereta ibuhka kitai! Artikel ke nangkanka tu deka bejuraika chara kitai ulih nunjukka diri beterima kasih ke pengerindu ti diayanka Iya.