1. Kunnasim nga maka-uvovug i tadday nga patul na Persia?

IMAJINAMMU nga maddiakka ta Persia 2,500 dagun ngana i nappasa. Ikaya mu makiyuvovug ta patul meyannung ta tadday nga gannug yatutta nabbiahe ka ta palasio na Susan. Ngem nige mu makiyuvovug ta patul, mawag nga kiddawammu i permisona. Nu makiyuvovug ka nisa nga awan tu permisona, posible nga matay ka!​—Est. 4:11.

2. Anni i kayà ni Jehova nga matageno tam nu makiyuvovug ittam nisa?

² Dakal i appabalo tam nga ari tu kagitta ni Jehova i patul na Persia! Arayyu nga mas makapangngua anna mas importante si Jehova anne ta maski sinni nga tolay nga mammaguray. Maski paga nu kunnatun, puede ittam nga makiyuvovug nisa ta maski anni nga oras. Ikayana nga ariattam mappasiran nga makiyuvovug nisa. Angngariganna, maski nu kappabbaw i titulo ira ni Jehova gitta na Kadakallan nga Namaratu, Makapangngua-sa-ngamin, anna Soberano nga Yafu, ikayana nga agalattam yayya ta meddu nga pagagal nga “Ama.” (Mat. 6:9) Magayayya ittam nga kayà ni Jehova nga maddukko ittam nisa!

3. Ngatta puede tam agalan si Jehova nga “Ama,” anna anni i mekonsidera taw nga artikulo?

³ Mepangngo laman nga agalattam si Jehova nga “Ama” megafu ta yayya i Paggafuan na inango tam. (Sal. 36:9) Megafu ta yayya i Yama tam, egga i responsibilidad tam nga tuttulan yayya. Nu kuattam i ikikkiddona nittam, malawa tam i kappabbaw ira nga bendision. (Heb. 12:9) Nelagum tatun nga bendision i mannanayun nga inango ta langi onu ta davvun. Magayayya gapa ittam ta benefisio ira ta maddaggun. Ikonsidera naw nga artikulo i pamakurug ira nga si Jehova i minaggiddu nga Yama tam ta maddaggun anna nu ngatta makasiguradu ittam nga arianna ittam vuluvuga pagurayan ta mappange. Ngem ikonsidera tam labbi nu ngatta makapakkomfiansa ittam  nga kuruga iddukan anna ikavurungan ittam na nelangitan nga Yama tam.

4. Ngatta marigatan i karuan nga imammatan si Jehova bilang Yamada?

⁴ Marigatakka kari nga imammatan i Dios bilang Yamam? Matageno na karuan nga sobra i katannang ni Jehova yatutta ari ittam nabalor nisa. Madduda ira nu ikavurungan na Makapangngua-sa-ngamin nga Dios i kataggi-tadday nira. Ngem ari tu kunnatun i kayà na minaggiddu nga Yama tam nga matageno tam. Niddanna ittam tu inango anna kayàna nga maddukko ittam nisa. Kabalin na pakkagi ni apostol Pablo tatun nga kinakurug, niyesplikana ta maggigginna ira ta Atenas nga “ari tu arayyu [si Jehova] ta kataggi-tadday nittam.” (King. 17:24-29) Ikaya na Dios nga makiyuvovug i kataggi-tadday nittam nisa gitta na pakiyuvovug na tadday nga abbing ta minaggiddu anna minangngikavurung nga maganana.

5. Anni i magigiammu tam ta ekspiriensa na tadday nga sister?

⁵ Marigatan i karuan nga imammatan si Jehova bilang Yamada megafu ta ariadda kuruga natageno i aya anna kinasippo ta mismu nga yamada. Ikonsidera i kinagi na tadday nga sister: “Mataka-taki i pakiyuvovug na yamà. Turi ta ollu nga ginigiammù i Biblia, marigatan ngà nga maddukko ta nelangitan nga Yama. Ngem turi ta nakilalà si Jehova, nanguli i ngamin.” Kunnatun kari gapa i matageno mu? Nu kunnatun, makasiguradu ka nga duttal lagapa i tiempo nga matageno mu gapa nga si Jehova i kapianan nga Yama.

6. Segun ta Mateo 11:27, anni i tadday ta kingngua ni Jehova tapenu duffunan ittam nga imammatan yayya bilang minaggiddu nga Yama tam?

⁶ Tadday ta kingngua ni Jehova tapenu duffunan ittam nga imammatan yayya bilang minaggiddu nga Yama tam ay gukaban na pangirekord ta uvovug anna kingngua ira ni Jesus ta Biblia. (Bibbigan i Mateo 11:27.) Perfekto nga naparigan ni Jesus i personalidad na Yamana yatutta makagina: “I nakasingan niakan ay nasingan na ngana gapa i Yama.” (Juan 14:9) Kanayun nga ikagi ni Jesus i meyannung ta papel ni Jehova bilang tadday nga Yama. Ta appa nga Evanghelio ngana laman ta orihinal nga niketurana, ma-165 nga beses nga tinukoy ni Jesus si Jehova nga “Ama.” Ngatta kanayun nga ikakkagi ni Jesus i meyannung kani Jehova bilang Yamana? Tadday nga rason ay tapenu makumbinsi i totolay nga si Jehova ay minaggiddu nga Yama.​—Juan 17:25, 26.

7. Anni i magigiammu tam meyannung kani Jehova ta pinattratuna ta Anana?

⁷ Ikonsidera nu anni i magigiammu tam meyannung kani Jehova ta pinattratuna ta Anana nga si Jesus. Kanayun nga gininna ni Jehova i pakimallo ira ni Jesus. Arianna laman gininna danatun, nu ari, sinabbagna paga. (Juan 11:41, 42) Maski anni nga kapurueba i neparubang kani Jesus, kanayunna nga natageno i aya anna suporta na Yamana.​—Luc. 22:42, 43.

8. Kunnasi nga niyawa ni Jehova i pakawagan ni Jesus?

⁸ Nirekunnisi ni Jesus nga i Yamana i Paggafuan anna Manustini ta inangona turi ta kinagina: ‘Matolay ngà gapa megafu ta Yama.’ (Juan 6:57) Buu i pattalo ni Jesus ta Yamana anna niyawa ni Jehova i pisikal ira nga pakawaganna. Pinaka-importante, zinuffunan ni Jehova si Jesus nga mattalupaddian nga matalo nisa.​—Mat. 4:4.

9. Kunnasi nipasingan ni Jehova nga tadday yayya nga minaggiddu anna minangngikavurung nga Yama kani Jesus?

⁹ Bilang minaggiddu nga Yama, siniguradu ni Jehova nga ammu ni Jesus nga uffunanna yayya. (Mat. 26:53; Juan 8:16) Maski nu  ari pinrotektan ni Jehova si Jesus ta ngamin nga makataki nisa, zinuffunanna yayya nga attamman i kapurueba ira. Ammu ni Jesus nga temporario laman i maski anni nga mamappeligro nisa. (Heb. 12:2) Pinakurug ni Jehova nga ikavurunganna si Jesus gukaban na pagginna nisa, pangiyawa ta pakawaganna, passanay nisa, anna passuporta nisa. (Juan 5:20; 8:28) Ikonsidera tam ngana nu kunnasi nga kunnatun i pangikavurung nittam na nelangitan nga Yama tam.

10. Segun ta Salmo 66:19, 20, kunnasi nga ipasingan ni Jehova nga iddukanna ittam?

¹⁰ Gigginnan ni Jehova i pakimallo tam ira. (Bibbigan i Salmo 66:19, 20.) Arianna kayà nga gaggaddattam i appakimallo tam; pagarammanna ittam lallagu nga kanayun nga makimallo. (1 Tes. 5:17) Awayya tam makimallo ta Dios ta maski anni nga oras anna maski sitaw i diattam. Kanayunna lagapa nga ginnan i pakimallo tam ira. Nu ammu tam nga gigginnan ni Jehova i pakimallo tam ira, mas iddukattam yayya. “Ayatak-ku i Yafu [nga Jehova],” kunna salmista, “gafu ta . . . ginnan nà.”​—Sal. 116:1.

11. Kunnasi nga tabbagan ni Jehova i pakimallo tam ira?

¹¹ Ari laman ginnan na Yama tam i pakimallo tam ira, nu ari, tabbaganna paga danatun. Ipasiguradu nittam ni apostol Juan: “Tangngagan [na Dios] ittam ta anni laman nga kiddawat-tam sa nga metuttul ta uray na.” (1 Juan 5:14, 15) Siempre, posible nga ari tabbagan ni Jehova i pakimallo tam ira segun ta ekspektattam. Ammuna nu anni i kapianan para nittam yatutta nu mittan, i tabbagna ay ari, onu ikayana nga maginnag ittam.​—2 Cor. 12:7-9.

12-13. Kunnasi nga iyawa na nelangitan nga Yama tam i pakawagattam ira?

¹² Iyawa ni Jehova i pakawagattam ira. Kuanna nu anni i ikikkiddona nga kuan na ngamin nga yama. (1 Tim. 5:8) Iyawana i material ira nga pakawagan na ánana. Arianna kayà nga mavvurung ittam ta makan, passinnun, onu paddianattam. (Mat. 6:32, 33; 7:11) Bilang minaggiddu nga magana, niyunnug paga ni Jehova nga mapeggan ittam tu ngamin nga kawagattam ta mappange.

¹³ Pinaka-importante, iyawa ni Jehova i espiritual ira nga pakawagattam. Gukaban na Uvovugna, kinagina i kinakurug meyannung nisa, i gakkagna, i kebalinan na pattolay, anna i mesimmu ta mappange. Nipasinganna nittam i personal nga interes turi ta ollollu tam nga nammuan i kinakurug gukaban na panuddu nittam na magana tam onu na tanakuan tapenu mammammu tam yayya. Tulu-tuloy tam paga nga malawa i masippo nga panguffunna gukaban na minaggiddu nga elder ira ta kongregasion anna na wawwaragi nga manakam ta espiritual. Kunnatun gapa, tuttudduan ittam ni Jehova gukaban na study tam ira nu sitaw kavulu tam nga makagigiammu i wawwaragi tam. Ta kunnaw ira nga gannug, ipasingan ni Jehova nga ikavurunganna ittam ngamin nga kunna yama.​—Sal. 32:8.

14. Ngatta sanayan ittam ni Jehova, anna kunnasina nga kuan yatun?

¹⁴ Sanayan ittam ni Jehova. Ari tu kagitta ni Jesus, imperfekto ittam. Yatutta parte na passanay tam i panisiplina nittam na minaggiddu nga Yama tam nu kawagan. Iperaddam nittam na Uvovugna: “Disiplinan na Yafu i ayatan na ira.” (Heb. 12:6, 7) Nadduruma i panisiplina ni Jehova nittam. Angngariganna, baka egga i mabibbig tam ta Uvovugna onu maginna tam ta study nga awayyana nga mangitunung nittam. Onu maggafu ta elder ira i kawagattam nga uffun. Maski nu anni nga klase i panisiplina ni Jehova, kuanna yatun megafu ta ayatanna ittam.​—Jer. 30:11.

15. Kunnasi ittam protektan ni Jehova?

 ¹⁵ Uffunan ittam ni Jehova nga attamman i kapurueba ira. Nu kunnasi nga uffunan na minaggiddu nga yama i ánana ta mariga ira nga situasion, uffunan gapa ittam na nelangitan nga Yama tam nga attamman i kapurueba ira. Usanna i masanto nga espirituna tapenu maprotektan ittam ta maski anni nga makadaral ta relasiottam nisa. (Luc. 11:13) Protektan gapa ittam ni Jehova nu makkafi i nono tam. Angngariganna, iddanna ittam tu kappabbaw nga iddanama. Yatun nga iddanama ta mappange i manguffun nittam nga attamman i kapurueba ira. Ikonsidera yaw: Maski nu anni nga marake nga gannug i mesimmu nittam, alsan noka na minaggiddu nga Yama tam i maski anni nga perwisiu nga maekspiriensa tam. Temporario laman i maski anni nga kapurueba nga ara-arubangattam, ngem i bendision ira nga iyawa ni Jehova ay mannanayun.​—2 Cor. 4:16-18.

16. Anni i nesimmu turi ta ari sinuppal ni Adan i minaggiddu nga Yamana?

¹⁶ Masingattam i aya ni Jehova nittam nu nonopattam i kingnguana turi ta narrebelde si Adan. Turi ta ari nga sinuppal ni Adan i nelangitan nga Yamana, ari ngana yayya parte na familia ni Jehova, maski i gaka-gakana. (Roma 5:12; 7:14) Ngem egga i kingngua ni Jehova tapenu uffunan i gaka-gaka ni Adan.

17. Kabalin na pinarrebelde ni Adan, anni i insigida nga kingngua ni Jehova?

¹⁷ Kinastigo ni Jehova si Adan ngem nipromesana nga uffunanna i gaka-gaka ni Adan. Insigida nga nipromesana nga mabbalin uli tu parte na familiana i minattuppal ira nga totolay. (Gen. 3:15; Roma 8:20, 21) Niyunnug yatun ni Jehova gukaban na sakrifisio nga tavvu na meddu nga Anana nga si Jesus. Ta pangiyawa ni Jehova ta Anana para nittam, napakurugna nga kuruga iddukanna ittam.​—Juan 3:16.

18. Ngatta makasiguradu ittam nga ikaya ni Jehova nga mabbalin ittam tu parte na familiana maski nu neyawawan ittam?

 ¹⁸ Maski nu imperfekto ittam, ikaya ni Jehova nga mabbalin ittam tu parte na familiana anna arianna vuluvuga nonopan nga mamakadammo ittam. Awayyana nga natakitattam si Jehova onu neyawawan ittam tu manganannuan, ngem kanayunna nga iddanaman nga manoli ittam nisa. Niyilustra ni Jesus nu kunnasi kadakal i pangaya ni Jehova ta ánana ta istoria na ana nga lalaki nga neyawawan. (Luc. 15:11-32) Tatun nga ilustrasion, ari nga nagimmang i yama nga magiddanama nga manoli i anana. Ta pallabbe na ana ta baleda, magayayya yayya nga inalawa uli na yamana. Nu minarayyu ittam kani Jehova ngem mabbabawi ittam, makasiguradu ittam nga sigga-paran i minaggiddu nga Yama tam nga alawatan ittam uli.

19. Kunnasi noka pakappian ni Jehova i perwisiu nga kingngua ni Adan?

¹⁹ Pakappian noka na Yama tam i ngamin nga perwisio nga kingngua ni Adan. Kabalin na parrebelde ni Adan, ginakkag ni Jehova nga mangampun tu 144,000 nga totolay nga masserbi bilang patul anna papari ta langi kavulu i Anana. Uffunan noka ni Jesus anna na kakavvuluna nga mammaguray i minattuppal nga totolay nga mabbalin tu perfekto ta napabagu nga mundo. Nu mattalupaddian ira nga minattuppal kabalin na ultimu nga kapurueba, iyawa noka nira na Dios i mannanayun nga inango. Magayayya noka i Yama tam nga makasingan nga napannu i davvun tu perfekto nga ánana. Anni mabba kasta noka natun nga tiempo!

20. Kunnasi nga nipasingan ni Jehova nga kuruga iddukanna ittam anna anni i gigiammuattam ta tumunug nga artikulo?

²⁰ Nipasingan ni Jehova nga kuruga iddukanna ittam. Yayya i kapianan nga Yama. Ginnanna i pakimallo tam ira anna iyawana i material anna espiritual nga pakawagattam. Sanayan anna uffunanna ittam. Aru gapa i kappabbaw ira nga bendision nga iyawana nittam ta mappange. Magayayya ittam nga mammuan nga iddukan anna ikavurungan ittam na Yama tam! Gigiammuattam ta tumunug nga artikulo nu kunnasi tam mepasingan i pappabalo tam ta ayana bilang ánana.