1. Ania idi ti aramiden ti maysa a tao no kayatna ti makisarita iti ari ti Persia?

IPAPANMO nga agnanaedka idiay Persia agarup 2,500 a tawenen ti napalabas. Adda kayatmo nga ibaga iti ari, isu a nagbiaheka a mapan iti siudad ti Susan. Saanmo man laeng a napanunot nga umasidegka iti ari nga awan ti pammalubosna, ta mabalin a ti biagmo ti kasukat dayta!​—Est. 4:11.

2. Ania ti kayat ni Jehova a mariknatayo no umasidegtayo kenkuana?

² Anian a yamantayo ta ni Jehova ket saan a kas iti dayta nga ari ti Persia! Adayo a natantan-ok ni Jehova ngem iti asinoman nga agturay a tao, ngem mabalin a makasaritatayo iti aniaman nga oras. Kayatna a mariknatayo a nawayatayo nga umasideg kenkuana. Kas pagarigan, nupay addaan ni Jehova kadagiti natan-ok a titulo a kas iti Naindaklan a Namarsua, Mannakabalin-amin, ken Katan-okan nga Apo, iyaw-awisna nga awagantayo iti nadungngo nga awag nga ‘Ama.’ (Mat. 6:9) Anian a ragsaktayo ta kayat ni Jehova a mariknatayo a nasingedtayo kenkuana!

3. Apay nga umiso nga awagantayo ni Jehova kas “Ama,” ken ania ti mailawlawag iti daytoy nga artikulo?

³ Umiso nga awagantayo ni Jehova kas “Ama” ta isu ti Ubbog ti biagtayo. (Sal. 36:9) Gapu ta isu ti Amatayo, responsabilidadtayo ti agtulnog kenkuana. No aramidentayo ti ibagana, awatentayto dagiti nagsasayaat a bendision. (Heb. 12:9) Karaman kadagita a bendision ti agnanayon a biag, idiay man langit wenno ditoy daga. Adda met dagiti gunggona a tagtagiragsakentayo itan. Ilawlawag daytoy nga artikulo no kasano nga agtigtignay ita ni Jehova kas naayat nga Ama ken no apay a masiguradotayo a saannatayto a pulos baybay-an iti masanguanan. Ngem sakbayna, usigentayo no apay a makapagtalektayo a maseknan ken dungdungnguennatayo ti nailangitan nga Amatayo.

4. Apay a marigatan ti dadduma a mangibilang ken Jehova kas Amada?

⁴ Marigatanka kadi a mangibilang iti Dios kas Amam? Baka marikna ti dadduma a nakanumnumo ken nakababbabada no maikompara ken Jehova. Agduaduada no maseknan kadakuada ti Mannakabalin-amin a Dios. Ngem saan a kayat ti naayat nga Amatayo a kasta ti mariknatayo. Inikkannatayo iti biag ken kayatna a maaddaantayo iti nasinged a relasion kenkuana. Kalpasan nga imbaga ni apostol Pablo daytoy a kinapudno, inlawlawagna kadagiti agdengdengngeg idiay Atenas a ni Jehova ket “saan nga adayo iti tunggal maysa kadatayo.” (Ara. 17:24-29) Kayat ti Dios nga umasidegtayo kenkuana kas iti iyaasideg ti maysa nga ubing iti naayat ken maseknan a nagannakna.

5. Ania ti masursurotayo iti kapadasan ti maysa a Kristiano a babai?

⁵ Mabalin a marigatan ti dadduma a mangibilang ken Jehova kas Amada gapu ta bassit wenno awan ti ayat ken dungngo a nariknada iti bukodda nga ama. Usigentayo ti komento ti maysa a Kristiano a babai. “Nagsakit ti panagsasao ni tatangko,” kunana. “Idi nangrugiak nga agadal iti Biblia, diak ammo no kasano ti agbalin a nasinged iti maysa a nailangitan nga Ama. Ngem nagbaliw dayta idi naam-ammok ni Jehova.” Kasta kadi met ti riknam? No wen, masiguradom a mariknamto met a ni Jehova ti kasayaatan pay laeng nga Ama.

6. Sigun iti Mateo 11:27, ania ti maysa a pamay-an a tultulongannatayo ni Jehova a mangibilang kenkuana kas naayat nga Amatayo?

⁶ Ti maysa a pamay-an a tultulongannatayo ni Jehova a mangibilang kenkuana kas naayat nga Amatayo ket babaen ti sasao ken ar-aramid ni Jesus a nairekord iti Biblia. (Basaen ti Mateo 11:27.) Naan-anay a tinulad ni Jesus ti personalidad ni Amana isu a naibagana: “Ti nakakita kaniak nakitana metten ti Ama.” (Juan 14:9) Masansan nga iladawan ni Jesus ni Jehova kas maysa nga Ama. Iti laeng uppat nga Ebanghelio, agarup 160 a daras nga inusar ni Jesus ti termino nga “Ama” a tumukoy ken Jehova. Apay a namin-adu a tinukoy ni Jesus ni Jehova kas Amana? Ti maysa a rason ket tapno makombinsir dagiti tattao a ni Jehova ket naayat nga Ama.—Juan 17:25, 26.

7. Ania ti masursurotayo maipapan ken Jehova iti pamay-an a panangtratona iti Anakna?

⁷ Kitaentayo no ania ti masursurotayo maipapan ken Jehova iti pamay-an a panangtratona iti Anakna a ni Jesus. Kanayon a dinengngeg ni Jehova dagiti kararag ni Jesus. Saan laeng a dimngeg kadagiti kararag ni Jesus no di ket sinungbatanna pay dagita. (Juan 11:41, 42) Aniaman a pakasuotan ti nakaipasanguan ni Jesus, nariknana ti ayat ken suporta ni Amana.—Luc. 22:42, 43.

8. Kadagiti ania a pamay-an nga impaay ni Jehova ti kasapulan ni Jesus?

⁸ Binigbig ni Jesus a ni Amana ti Gubuayan ken Mangsussustiner iti biagna idi imbagana: “Agbiagak gapu iti . . . Ama.” (Juan 6:57) Naan-anay a nagtalek ni Jesus ken Amana, ket impaay ni Jehova ti pisikal a kasapulanna. Kangrunaanna, impaay ni Jehova ti naespirituan a kasapulan ni Jesus.—Mat. 4:4.

9. Kasano nga impakita ni Jehova a naayat ken maseknan nga Ama ken Jesus?

⁹ Kas naayat nga Ama, sinigurado ni Jehova a marikna ni Jesus ti suportana kas Amana. (Mat. 26:53; Juan 8:16) Nupay saan nga inliklik ni Jehova ni Jesus iti amin a pakadangran, tinulonganna a mangibtur kadagiti pakasuotan. Ammo ni Jesus a temporario ti aniaman a pannakadangran a mapasaranna. (Heb. 12:2) Impakita ni Jehova a maseknan ken Jesus babaen ti panangdengngeg, panangsanay, panangsuportana kenkuana, ken panangipaayna iti kasapulanna. (Juan 5:20; 8:28) Kitaentayo itan no kasano nga ipakpakita ti nailangitan  nga Amatayo a maseknan kadatayo kadagiti umasping a pamay-an.

10. Sigun iti Salmo 66:19, 20, kasano nga ipakpakita ni Jehova nga ay-ayatennatayo?

¹⁰ Dengdenggen ni Jehova dagiti kararagtayo. (Basaen ti Salmo 66:19, 20.) Saanna a kayat a limitarantayo dagiti kararagtayo no di ket iparegtana a kanayontayo koma nga agkararag. (1 Tes. 5:17) Mabalintayo ti siraraem nga umasideg iti Diostayo iti aniaman nga oras, sadinoman ti ayantayo. Kanayon nga adda tiempona a dumngeg kadatayo ken nakasagana a dumngeg a naimbag. No mabigbigtayo a dengdenggen ni Jehova dagiti kararagtayo, ad-adda nga umuneg ti ayattayo kenkuana. “Ay-ayatek ni Jehova,” kuna ti salmista, “ta dengdenggenna ti timekko.”—Sal. 116:1.

11. Ania ti mabalin a sungbat ni Jehova iti kararagtayo?

¹¹ Saan laeng a denggen ti Amatayo dagiti kararagtayo no di ket sungbatanna pay dagita. Ipasigurado ni apostol Juan: “Uray ania ti dawatentayo maitunos iti pagayatan [ti Dios], denggennatayo.” (1 Juan 5:14, 15) Siempre, mabalin a saan a kas iti ekspektarentayo ti panangsungbat ni Jehova kadagiti kararagtayo. Ammona ti kasayaatan para kadatayo, isu a no dadduma, saan ti sungbatna wenno kayatna nga aguraytayo.—2 Cor. 12:7-9.

12-13. Kasano nga ipapaay ti nailangitan nga Amatayo ti kasapulantayo?

¹² Ipapaay ni Jehova ti kasapulantayo. Ar-aramidenna ti ibagbagana nga aramiden ti amin nga amma. (1 Tim. 5:8) Ipapaayna ti material a kasapulan dagiti annakna. Saanna a kayat a madanagan wenno maringgorantayo iti kanen, pagbado, wenno pagyanantayo. (Mat. 6:32, 33; 7:11) Kas naayat nga ama, inyurnos pay ketdi ni Jehova a penkennanto ti amin a kasapulantayo iti masanguanan.

¹³ Kapatgan iti amin, ipapaay ni Jehova dagiti naespirituan a kasapulantayo. Babaen ti Saona, impakaammona ti kinapudno maipapan iti bagina, ti panggepna, ti rason a pinarsuanatayo, ken ti masanguanan. Inusarna dagiti nagannaktayo wenno ti sabsabali tapno matulongannatayo a mangam-ammo kenkuana. Ken agtultuloy nga umaw-awattayo iti naayat a tulong dagiti panglakayen iti kongregasion ken ti dadduma pay a kakabsat a nataengan iti naespirituan. Kasta met, isursuronatayo ni Jehova babaen kadagiti gimong ti kongregasion a kaduatayo ti naespirituan a pamiliatayo. Kadagitoy ken iti dadduma pay a pamay-an nga ipakpakita ni Jehova kadatayo ti interesna kas Amatayo.—Sal. 32:8.

14. Apay a sansanayennatayo ni Jehova, ken kasano nga aramidenna dayta?

¹⁴ Sansanayennatayo ni Jehova. Saan a kas ken Jesus, imperpektotayo. Isu a kas paset ti panangsanay ti naayat nga Amatayo, disiplinaennatayo no kasapulan. Ipalagip ti Saona: “Disiplinaen ni Jehova dagidiay ay-ayatenna.” (Heb. 12:6, 7) Disdisiplinaennatayo ni Jehova iti adu a pamay-an. Kas pagarigan, mabalin a mailintegtayo babaen ti mabasatayo iti Saona wenno ti mangngegtayo kadagiti gimong. Wenno nalabit aggapu kadagiti panglakayen ti kasapulantayo a tulong. Aniaman ti pamay-an ni Jehova a mangdisiplina kadatayo, kanayon nga aramidenna dayta gapu iti ayat.—Jer. 30:11.

15. Kasanonatayo a protprotektaran ni Jehova?

¹⁵ Supsuportarannatayo ni Jehova no adda pakasuotantayo. Kas iti naayat nga ama a mangsuporta kadagiti annakna no adda pakarigatanda, suportarannatayo met ti nailangitan nga Amatayo no adda pakasuotantayo. Us-usarenna ti nasantuan nga espirituna tapno protektaranna ti espiritualidadtayo. (Luc. 11:13) Protektaran met ni Jehova ti  emosiontayo. Kas pagarigan, impaayannatayo iti nakaskasdaaw a namnama. Dayta a namnama iti masanguanan ti tumulong kadatayo a mangibtur kadagiti pakarigatan. Panunotentayo daytoy: Aniaman ti dakes a mapasamak kadatayo, naan-anayto a pukawen ti naayat nga Amatayo dagiti epekto dayta. Temporario laeng ti aniaman a pakasuotantayo, ngem agnanayon dagiti bendision nga ipaay ni Jehova.—2 Cor. 4:16-18.

16. Ania ti napasamak idi nagsukir ni Adan iti naayat nga Amana?

¹⁶ Makitatayo ti pammaneknek nga ay-ayatennatayo ni Jehova no panunotentayo ti inaramidna kadagiti timmaud a problema idi nagbasol ni Adan. Idi nagsukir ni Adan iti nailangitan nga Amana, saanen a paset ti naragsak a pamilia ni Jehova, ken uray dagiti kaputotanna. (Roma 5:12; 7:14) Ngem bimmallaet ni Jehova tapno tumulong.

17. Kalpasan ti panagsukir ni Adan, ania ti dagus nga inaramid ni Jehova?

¹⁷ Dinusa ni Jehova ni Adan, ngem saanna a binaybay-an nga awanan namnama dagiti di pay nayanak a kaputotan ni Adan. Dagus nga inkarina nga agbalinto manen a paset ti pamiliana dagiti natulnog a tattao. (Gen. 3:15; Roma 8:20, 21) Pinagbalin ni Jehova a posible daytoy babaen ti pangsubbot a daton ti dungdungnguenna nga Anak, ni Jesus. Ti panangited ni Jehova iti Anakna para kadatayo ket pammaneknek a dungdungnguennatayo unay.—Juan 3:16.

18. Apay a masiguradotayo a kayat ni Jehova nga agbalintayo nga annakna, uray no immadayotayo kenkuana?

¹⁸ Nupay imperpektotayo, kayat ni Jehova nga agbalintayo a paset ti pamiliana, ken saannatayo a pulos ibilang a dadagsen. Mabalin a mapagladingittayo ni Jehova wenno adda gundaway a mayaw-awantayo, ngem mangnamnama latta nga agsublitayo. Inyilustrar ni Jesus  ti nauneg a panagayat ni Jehova kadagiti annakna iti estoriana maipapan iti napukaw nga anak. (Luc. 15:11-32) Ti ama iti dayta nga ilustrasion ket saan a nagsardeng a mangnamnama nga agsubli ti anakna. Idi nagsubli ti anakna, siraragsak nga inawatna manen. No immadayotayo ken Jehova ngem agbabawitayo, masiguradotayo a ti naayat nga Amatayo ket nakasagana ken sidadaan a mangawat manen kadatayo.

19. Kasanonto a solbaren ni Jehova dagiti problema a pinataud ni Adan?

¹⁹ Solbarento ti Amatayo ti amin a problema a pinataud ni Adan. Kalpasan ti panagsukir ni Adan, inkeddeng ni Jehova nga amponen ti 144,000 nga indibidual ditoy daga nga agserbinto kas ar-ari ken papadi idiay langit a kadua ti Anakna. Tumulongto ni Jesus ken dagiti kakaduana nga agturay tapno agbalin a perpekto dagiti natulnog a tattao inton baro a lubong. No malasatanda ti maudi a pannubok iti kinatulnog, ipaayanto ida ti Dios iti agnanayon a biag. Nakaragragsakton ti Amatayo inton makitana a napno ti daga iti perpekto nga annakna. Talaga a nakasaysayaatto dayta a tiempo!

20. Kadagiti ania a pamay-an nga ipakpakita ni Jehova a dungdungnguennatayo, ken ania ti ilawlawag ti sumaruno nga artikulo?

²⁰ Ipakpakita ni Jehova a dungdungnguennatayo. Isu ti kasayaatan nga Ama. Dengdenggenna dagiti kararagtayo ken ipapaayna dagiti kasapulantayo, iti material ken naespirituan. Sansanayennatayo ken supsuportarannatayo. Adda pay dagiti nagsasayaat a bendision nga isagsaganana para kadatayo. Makaparegta a maammuan nga ay-ayatennatayo ti Amatayo ken maseknan kadatayo! Ilawlawag ti sumaruno nga artikulo dagiti pamay-an a maipakitatayo kas annakna nga agyamyamantayo iti ayatna.