1. Oshike osho umwe a li e na okuninga opo a dule okupopya nohamba yaPersia?

KALA nee ngeno wa fa u li muPersia omido 2 500 da pita. Ou na oshinima shonhumba osho wa hala okukundafana nohamba, onghee owa li u na okuya kuSusa, oshilando omo hamu kala ohamba. Ashike ofimbo ino ka popya nohamba owa li tete u na okupewa epitikilo. Ngeenge owa ka popya nayo ino pewa epitikilo owa li u na okudipawa. — Est. 4:11.

2. Jehova okwa hala tu kale tu udite ngahelipi ngeenge hatu popi naye?

² Inatu pandula tuu eshi Jehova ina fa ohamba yokuPersia! Jehova okwa tumbala e dule ovapangeli aveshe vopanhu, ashike otwa manguluka okupopya naye efimbo keshe. Okwa hala tu kale twa manguluka okupopya naye. Pashihopaenenwa, nonande Jehova oku na omadinafimaneko ngaashi Omushiti Munenenene, Omunaenghono adishe nosho yo Omwene, okwa hala tu popye naye hatu longifa outumbulilo oo u li pahole “Tate.” (Mat. 6:9) Ohashi tu hafifa unene okushiiva kutya Jehova okwa hala tu kale tu udite twa ehena popepi naye.

3. Omolwashike hatu dulu okwiifana Jehova “Tate,” noshike hatu ka kundafana moshitukulwa eshi?

³ Osha yuka okwiifana Jehova “Tate” molwaashi oku li Ofifiya yomwenyo. (Eps. 36:9) Otu na okudulika kuye molwaashi oku li Tate yetu. Ngeenge otwa ningi osho te tu pula tu ninge, ohatu ka hafela omanangekonoupuna a tunhula. (Heb. 12:9) Omanangekonoupuna oo okwa kwatela mo omwenyo waalushe, kutya nee omeulu ile okombada yedu. Ohatu hafele yo omauwa amwe paife. Oshitukulwa eshi otashi ka kundafana osho tashi ulike kutya Jehova oku li Tate yetu omunahole paife nosho yo kutya omolwashike hatu dulu okukala noushili kutya ite ke tu efa monakwiiwa. Ashike tete, natu ka konakoneni kutya omolwashike hatu dulu okukala nelineekelo kutya Tate yetu womeulu oku tu hole noku na ko nasha nafye.

4. Omolwashike vamwe hava mono shidjuu okutala ko Jehova e li Xe yavo?

⁴ Mbela oho mono shidjuu okutala ko Kalunga e li Xo? Vamwe otashi dulika hava diladila kutya katu na oshilonga kuJehova. Ohava kala va limbililwa kutya Kalunga Omunaenghono adishe ke na ko nasha navo pauhandimwe. Ashike Tate yetu omunahole ina hala tu kale tu udite ngaho. Okwe tu pa omwenyo nokwa hala tu kale tu na ekwatafano liwa naye. Omuyapostoli Paulus okwa li a yelifila ovapwilikini vaye muAtena eshi a popya a ti kutya Jehova “ke li kokule nakeshe umwe womufye.” (Oil. 17:24-29) Kalunga okwa hala keshe umwe womufye a kale ha popi naye ngaashi ashike okaana ha ka popi nomudali wako omunahole nomufilishisho.

5. Oshike hatu lihongo moshimoniwa shomumwameme umwe?

⁵ Vamwe otashi dulika hava mono shidjuu okutala ko Jehova e li Xe yavo molwaashi inava ulikilwa ile va ulikilwa ashike kanini ohole kooxe vopanhu. Omumwameme umwe okwa ti: “Tate okwa li omukwanyanya. Eshi opo nda hovele okukonakona Ombiibeli onda li handi mono shidjuu okweehena popepi naTate womeulu. Ashike onda li nda lundulula etaleko lange eshi nda shiiva Jehova.” Mbela naave osho ho kala u udite ngaho? Ngeenge osho, shiiva kutya mokweendela ko kwefimbo naave oto ka kala wa tala ko Jehova e li Xo a denga mbada.

6. Metwokumwe naMateus 11:27, omonghedi ilipi Jehova e tu kwafela tu mu tale ko e li Tate yetu omunahole?

⁶ Onghedi imwe omo Jehova e tu kwafela tu mu tale ko e li Tate yetu omunahole osheshi a shangifa eendjovo nosho yo oilonga yaJesus mOmbiibeli. (Lesha Mateus 11:27.) Jesus okwa li ha hopaenene filufilu oukwatya waXe nomolwaasho a popya a ti: “Keshe ou a mona nge, okwa mona yo Tate.” (Joh. 14:9) Jesus okwa popya lwoikando shi na sha nonghandangala oyo Jehova a dana e li Xe. Jesus okwa longifa outumbulilo “Tate” lwoikando 165 lwaapo momavangeli ane ta ulike kuJehova. Omolwashike a popya lwoikando kombinga yaJehova? Etomheno limwe ololo kutya opo a kwafele ovanhu va itavele kutya Jehova oku li Xe omunahole. — Joh. 17:25, 26.

7. Oshike hatu lihongo konghedi omo Jehova a li ha ungaunga nOmona?

⁷ Didilika osho hatu lihongo konghedi omo Jehova a li ha ungaunga nOmona, Jesus. Jehova okwa kala alushe ha pwilikine komailikano aJesus. Ka li ashike ha pwilikine kuo, ndele okwe a nyamukula yo. (Joh. 11:41, 42) Nonande Jesus okwa li ha shakeneke omashongo okwa kala alushe e shii kutya Xe oku mu hole note mu yambidida. — Luk. 22:42, 43.

8. Omeenghedi dilipi Jehova a li a kwafela Jesus?

⁸ Jesus okwa li e shii kutya Xe oku li Odjo nOfifiya yomwenyo eshi a ti: ‘Ondi li po omolwaTate.’ (Joh. 6:57) Jesus okwa li e lineekela filufilu muXe, na Jehova okwa li he mu pe osho a li a pumbwa opo a dule okukala nomwenyo. Naasho sha fimanenena, Jehova okwa li ha kwafele Jesus opo a dule okukala omudiinini kuye. — Mat. 4:4.

9. Jehova okwa ulikila ngahelipi Jesus kutya oku li Xe omunahole nomufilishisho?

⁹ E li Xe omunahole, Jehova okwa kala alushe ha shilipaleke kutya ota yambidida Jesus. (Mat. 26:53; Joh. 8:16) Nonande Jehova ka li he mu amene filufilu komaupyakadi, okwa li e mu kwafela e lididimikile omashongo. Jesus okwa li e shii kutya omaupyakadi aeshe oo a taalela oopakafimbo. (Heb. 12:2) Jehova okwa ulika kutya oku na ko nasha naJesus mokukala alushe ha pwilikine kuye, he mu pe ekwafo, moku mu deula nomoku mu yambidida. (Joh. 5:20; 8:28) Paife natu  ka konakoneni nghee Tate yetu womeulu ha ulike kutya oku na ko nasha nafye meenghedi da faafana naado.

10. Metwokumwe nEpsalme 66:19, 20, Jehova oha ulike ngahelipi kutya oku tu hole?

¹⁰ Jehova oha pwilikine komailikano etu. (Lesha Epsalme 66:19, 20.) Ine tu tulila po ongaba kutya otu na okwiilikana lungapi ile kutya omailikano etu oku na okukala e fike peni. (1 Tes. 5:17) Onghee ohatu dulu okwiilikana efimbo keshe kashi na nee mbudi kutya otu li peni. Iha kala unene e lipyakidila; oha pwilikine komailikano etu nokuyandja elitulemo kuo. Ohatu ka ehena popepi naJehova ngeenge otu shii kutya Jehova oha pwilikine komailikano etu. Omupsalme okwa ti: “Ondi hole Omwene, osheshi oha udu ondaka yange.” — Eps. 116:1.

11. Jehova oha nyamukula ngahelipi omailikano etu?

¹¹ Tate yetu iha pwilikine ashike komailikano etu, ndele ohe a nyamukula yo. Omuyapostoli Johannes okwe tu shilipaleka eshi a ti: “Keshe osho hatu mu [Kalunga] indile pahalo laye ote tu udu.” (1 Joh. 5:14, 15) Oshoshili kutya otashi dulika Jehova aha nyamukule omailikano etu monghedi oyo twa teelela. Okwe tu halela osho sha denga mbada, nomolwaasho omafimbo amwe otashi dulika a tye ahowe ile a hala tu teelele manga. — 2 Kor. 12:7-9.

12-13. Omeenghedi dilipi Tate yetu womeulu he tu file oshisho?

¹² Jehova ohe tu file oshisho. Naasho osho a teelela ovashamane aveshe va ninge. (1 Tim. 5:8) Okwa pa ovana vaye aveshe osho va pumbwa opo va dule okukala nomwenyo. Ina hala tu kale hatu lipula noikulya, noikutu ile neenhele dokukala. (Mat. 6:32, 33; 7:11) Molwaashi oku li Xe omunahole, ota ka wanifa po eemhumbwe detu adishe nokuli nomonakwiiwa.

¹³ Osho sha fimanenena, Jehova ohe tu pe ashishe osho twa pumbwa opo tu kale tu na ekwatafano liwa naye. Okwe tu hololela oshili kombinga yaye, yelalakano laye, onghalamwenyo tai ti sha nosho yo osho e tu tuvikilila monakwiiwa okupitila mEendjovo daye. Okwe tu fila yo oshisho eshi a longifa ovadali vetu ile umwe womoshiwana shaye opo ve tu honge Ombiibeli tu dule oku mu shiiva. Ota twikile yo oku tu kwafela tu ninge ookaume kaye mokulongifa ovakulunhuongalo nOvakriste vakwetu ovo va pyokoka. Natango, Jehova ota twikile oku tu honga okupitila pokwoongala ngeenge twa ongala pamwe novamwatate novamwameme. Eenghedi adishe odo twa kundafana nosho yo dimwe vali otadi ulike kutya Jehova, e li Tate yetu, oku na ko nasha nafye atushe. — Eps. 32:8.

14. Omolwashike Jehova he tu deula, nohe shi ningi ngahelipi?

¹⁴ Jehova ohe tu deula. Kakele kuJesus oo a li a wanenena, fye ovalunde. Tate yetu omunahole ohe tu vele ombedi apa sha pumbiwa, oyo i li yo oshitukulwa shedeulo. Eendjovo daye ode tu lombwela da ti: “Jehova oha yandje outekuduliko kwaavo e hole.” (Heb. 12:6, 7) Jehova ohe tu vele ombedi meenghedi dihapu. Pashihopaenenwa, otashi dulika tu mone kutya otwa pumbwa okulundulula onghedi yetu yokudiladila ile yokukatuka ngeenge twa lesha sha mOmbiibeli ile twe shi uda pokwoongala. Ile tashi dulika tu pewe ekwafo olo twa pumbwa kovakulunhuongalo. Kashi na nee mbudi kutya otwa pewa outekuduliko wa tya ngahelipi kuJehova, alushe ohe shi ningi pahole. — Jer. 30:11.

15. Omeenghedi dilipi Jehova he tu amene?

¹⁵ Jehova ohe tu yambidida ngeenge tu li moupyakadi. Ngaashi ashike xe wopanhu  omunahole ha kwafele omona ngeenge e li moudjuu, Tate yetu womeulu naye ohe tu yambidida ngeenge tu li moupyakadi. Jehova oha longifa omhepo yaye iyapuki opo i tu amene koinima oyo tai dulu okunyona po ekwatafano letu naye. (Luk. 11:13) Ohe tu amene yo pamaliudo. Pashihopaenenwa, okwe tu pa yo eteelelo litunhula. Eteelelo olo ohali tu kwafele tu lididimikile omaudjuu. Diladila kwaashi: Kashi na nee mbudi kutya otwa ehamekwa koinima ii i fike peni, Tate yetu omunahole ote ke tu velula koinima aishe oyo. Omashongo aeshe oo twa taalela oopakafimbo, ashike omanangekonoupuna oo hatu ka pewa kuJehova otaa kalelele. — 2 Kor. 4:16-18.

16. Oshike sha li sha ningwa po eshi Adam ina dulika kuXe omunahole?

¹⁶ Otu wete oumbangi oo tau ulike kutya Jehova oku tu hole okutala kwaasho a li a ninga eshi Adam ina dulika kuye. Eshi Adam ina dulika kuXe womeulu, ye noludalo laye ova kanifa oufembanghenda wokukala moukwaneumbo waJehova. (Rom. 5:12; 7:14) Ashike Jehova okwa li a ya mo olunyala.

17. Konima younashibofa waAdam, Jehova okwa li a ninga po shike?

¹⁷ Jehova okwa li a handukila Adam, ashike okwa ninga po elongekido opo a kwafele oludalo laAdam. Okwa udaneka kutya ovanhu ovaduliki otava ka alulilwa moukwaneumbo waye. (Gen. 3:15; Rom. 8:20, 21) Jehova okwa ninga elongekido olo pakanghameno lekuliloyambo lOmona waye omuholike, Jesus. Jehova okwa ulika kutya oku tu hole unene eshi e tu pa Omona waye. — Joh. 3:16.

18. Omolwashike hatu dulu okukala noushili kutya Jehova okwe tu tala ko tu li ovana vaye, nokuli nonande otwa li twe mu fiya po?

¹⁸ Nonande otu li ovalunde, Jehova okwe tu halela moukwaneumbo waye, noine tu tala ko tu li omutengi kuye. Otashi dulika tu mu udife  nai ile tu mu fiye po, ashike oha kala e na elineekelo kutya ohatu ka alukila kuye. Jesus okwa ulika nghee Jehova e hole ovana vaye okupitila mehokololo lomumati a kanene. (Luk. 15:11-32) Xe omudali womefaneko olo okwa kala e na elineekelo kutya omonamati ota aluka. Eshi omonamati a alukila keumbo, xe okwa li e mu tambula ko nomaoko aeshe. Ngeenge otwa li twa fiya po Jehova notwe livela ombedi, ohatu dulu okukala noushili kutya Tate yetu omunahole okwa halelela oku tu tambula ko.

19. Jehova ota ka kufa po ngahelipi oupyakadi aushe oo wa etifwa kuAdam?

¹⁹ Tate yetu ota ka kufa po oupyakadi aushe oo wa etifwa kuAdam. Konima younashibofa waAdam, Jehova okwa li a hoolola ovanhu 144 000 ovo tava ka pangela ve li eehamba novapristeri meulu pamwe nOmona. Jesus nosho yo ovo tava ka pangela pamwe naye otava ka kwafela ovanhu ovaduliki va fike mewaneneno mounyuni mupe. Konima eshi ovanhu ovadiinini va yelekwa lwaxuuninwa, Kalunga ote ke va pa omwenyo waalushe. Opo nee Tate yetu ota ka kala a hafa eshi e wete ovanamati novanakadona va wanenena. Olo itali ka kala tuu efimbo litunhula!

20. Omeenghedi dilipi Jehova a ulika kutya oku tu hole unene, noshike hatu ka kundafana moshitukulwa tashi landula ko?

²⁰ Jehova okwa ulika kutya oku tu hole unene. Oku li Xe a denga mbada. Oha pwilikine komailikano etu nohe tu pe osho twa pumbwa, kutya nee opainiwe ile opamhepo. Ohe tu deula nohe tu yambidida. Okwe tu tuvikilila yo oinima itunhula monakwiiwa. Ohashi tu hafifa okushiiva kutya Tate yetu oku tu hole nohe tu file oshisho. Moshitukulwa tashi landula ko ohatu ka kundafana eenghedi omo hatu dulu okuulika kutya otwa pandula eshi e tu hole tu li ovana vaye.