អត្ថបទសិក្សា ៦
ព្រះយេហូវ៉ា បិតារបស់យើងស្រឡាញ់យើងខ្លាំងណាស់
«អ្នករាល់គ្នាត្រូវអធិដ្ឋានតាមរបៀបនេះវិញ៖ ‹ឱបិតារបស់យើង›»។—ម៉ាថ. ៦:៩
ចម្រៀងលេខ១៣៥ ពាក្យអង្វររបស់ព្រះយេហូវ៉ា៖ ‹កូនអើយ ចូរបង្ហាញប្រាជ្ញា›
សេចក្ដីសង្ខេប *
១. តើបុគ្គលម្នាក់ត្រូវធ្វើអ្វី បើគាត់ចង់និយាយជាមួយនឹងស្ដេចស្រុកពើស៊ី?
សូមស្រមៃគិតថាអ្នកកំពុងរស់នៅស្រុកពើស៊ីប្រហែលជា២.៥០០ឆ្នាំមុន។ អ្នកចង់និយាយទៅកាន់ស្ដេចនៅស្រុកនោះអំពីរឿងមួយ ដូច្នេះអ្នកធ្វើដំណើរទៅក្រុងស៊ូសានជាក្រុងដែលស្ដេចរស់នៅ។ ប៉ុន្តែ មុនអ្នកអាចនិយាយទៅកាន់ស្ដេចនោះ អ្នកត្រូវទទួលការអនុញ្ញាតពីគាត់សិន។ បើពុំនោះទេ អ្នកអាចបាត់បង់ជីវិត!—អេធ. ៤:១១
២. តើព្រះយេហូវ៉ាចង់ឲ្យយើងមានអារម្មណ៍យ៉ាងណាចំពោះការនិយាយជាមួយនឹងលោក?
២ យើងពិតជាសប្បាយរីករាយណាស់ដែលព្រះយេហូវ៉ាមិនដូចស្ដេចស្រុកពើស៊ីនោះ! ព្រះយេហូវ៉ាសំខាន់ជាងនិងមានឫទ្ធានុភាពខ្លាំងជាងអ្នកគ្រប់គ្រងនៅផែនដីឆ្ងាយណាស់ តែយើងអាចនិយាយជាមួយនឹងលោកនៅពេលណាក៏បាន។ លោកចង់ឲ្យយើងមានអារម្មណ៍ស្រួលទាក់ទងជាមួយនឹងលោក។ ជាឧទាហរណ៍ ព្រះយេហូវ៉ាបានត្រូវហៅថាជាអ្នកបង្កើតដ៏ឧត្តម ព្រះដែលមានឫទ្ធានុភាពខ្លាំងក្លាបំផុត និងម្ចាស់ដ៏ឧត្តមបំផុតជាដើម ប៉ុន្តែលោកនៅតែចង់ឲ្យយើងហៅលោកដោយប្រើពាក្យដ៏កក់ក្ដៅគឺ«បិតា»។ (ម៉ាថ. ៦:៩) ពេលយើងដឹងថាព្រះយេហូវ៉ាចង់ឲ្យយើងមានអារម្មណ៍ជិតស្និទ្ធបែបនេះជាមួយនឹងលោក យើងសប្បាយចិត្តណាស់!
៣. ហេតុអ្វីយើងអាចហៅព្រះយេហូវ៉ាថា«បិតា» ហើយតើយើងនឹងពិចារណាអ្វីក្នុងអត្ថបទនេះ?
៣ គឺសមត្រឹមត្រូវឲ្យយើងហៅលោកថា«បិតា» ពីព្រោះលោកគឺជាអ្នកបង្កើតយើង។ (ទំនុក. ៣៦:៩) ដោយសារលោកជាបិតារបស់យើង យើងត្រូវស្ដាប់បង្គាប់លោក។ ពេលយើងធ្វើតាមអ្វីដែលលោកសុំឲ្យយើងធ្វើ យើងនឹងទទួលពរដ៏អស្ចារ្យ។ (ហេ. ១២:៩) ពរមួយដែលយើងអាចទទួលគឺជីវិតដែលគ្មានទីបញ្ចប់ មិនថានៅស្ថានសួគ៌ឬនៅផែនដីក្ដី។ នៅឥឡូវនេះ យើងក៏ទទួលប្រយោជន៍ដែរ។ ក្នុងអត្ថបទនេះ យើងនឹងពិចារណាអំពីរបៀបដែលព្រះយេហូវ៉ាបង្ហាញនៅឥឡូវនេះថាលោកជាបិតាដែលស្រឡាញ់យើង និងអំពីមូលហេតុដែលយើងអាចប្រាកដថាលោកនឹងមិនបោះបង់យើងនៅថ្ងៃអនាគត។ ប៉ុន្តែមុនដំបូង សូមយើងពិចារណាអំពីមូលហេតុដែលយើងអាចជឿជាក់ថាបិតារបស់យើងនៅស្ថានសួគ៌ស្រឡាញ់យើងនិងយកចិត្តទុកដាក់ចំពោះយើងខ្លាំងណាស់។
ព្រះយេហូវ៉ាជាបិតាដែលស្រឡាញ់និងយកចិត្តទុកដាក់ចំពោះអ្នក
ព្រះយេហូវ៉ាចង់មានភាពជិតស្និទ្ធជាមួយនឹងយើង ដូចឪពុកដែលយកចិត្តទុកដាក់ចំពោះកូនចង់មានភាពជិតស្និទ្ធជាមួយនឹងកូន (សូមមើលវគ្គ៤)
៤. ហេតុអ្វីបុគ្គលខ្លះពិបាកចាត់ទុកព្រះយេហូវ៉ាថាជាបិតារបស់ពួកគេ?
៤ តើអ្នកពិបាកចាត់ទុកព្រះថាជាបិតារបស់អ្នកឬទេ? បុគ្គលខ្លះប្រហែលជាមានអារម្មណ៍ថាខ្លួនតូចតាចនិងមិនសំខាន់ បើប្រៀបធៀបនឹងព្រះយេហូវ៉ា។ ពួកគេសង្ស័យថាព្រះដែលមានឫទ្ធានុភាពខ្លាំងក្លាបំផុតមិនយកចិត្តទុកដាក់ចំពោះពួកគេម្នាក់ៗឡើយ។ ក៏ប៉ុន្តែ បិតាដែលស្រឡាញ់យើងមិនចង់ឲ្យយើងមានអារម្មណ៍បែបនេះទេ។ លោកបានផ្ដល់ជីវិតឲ្យយើង ហើយចង់ឲ្យយើងមានចំណងមិត្តភាពជាមួយនឹងលោក។ ក្រោយពីសាវ័កប៉ូលប្រាប់អំពីចំណុចនេះ គាត់បានពន្យល់ពួកអ្នកដែលស្ដាប់គាត់នៅក្រុងអាថែនថា ព្រះយេហូវ៉ា«មិននៅឆ្ងាយពីយើងម្នាក់ៗ»ឡើយ។ (សកម្ម. ១៧:២៤-២៩) ព្រះចង់ឲ្យយើងម្នាក់ៗនិយាយជាមួយនឹងលោក ដូចដែលកូនចូលចិត្តនិយាយជាមួយនឹងឪពុកម្ដាយដែលស្រឡាញ់និងយកចិត្តទុកដាក់ចំពោះពួកគេ។
៥. តើយើងរៀនអ្វីពីបទពិសោធន៍របស់បងស្រីគ្រិស្តសាសនិកម្នាក់?
៥ អ្នកខ្លះប្រហែលជាពិបាកចាត់ទុកព្រះយេហូវ៉ាថាជាបិតា ដោយសារឪពុករបស់ពួកគេមិនសូវបានបង្ហាញសេចក្ដីស្រឡាញ់និងសេចក្ដីសប្បុរសចំពោះពួកគេទេ។ សូមគិតអំពីការរៀបរាប់របស់បងស្រីគ្រិស្តសាសនិកម្នាក់។ គាត់និយាយថា៖ «ឪពុកខ្ញុំជាមនុស្សដែលនិយាយស្តីដែលគ្មានមេត្ដា។ ពេលខ្ញុំចាប់ផ្ដើមរៀនគម្ពីរ ខ្ញុំពិបាកមានអារម្មណ៍ជិតស្និទ្ធជាមួយនឹងបិតាមួយដែលនៅស្ថានសួគ៌។ ប៉ុន្តែអារម្មណ៍បែបនេះបានផ្លាស់ប្ដូរ ក្រោយពីខ្ញុំបានស្គាល់ព្រះយេហូវ៉ា»។ តើអ្នកមានអារម្មណ៍ដូចនេះឬទេ? បើដូច្នេះ សូមជឿជាក់ថាអ្នកក៏អាចចាត់ទុកព្រះយេហូវ៉ាថាជាបិតាដ៏ល្អបំផុតបានដែរ។
៦. យោងទៅតាមម៉ាថាយ ១១:២៧ តើអ្វីជារបៀបមួយដែលព្រះយេហូវ៉ាបានជួយយើងឲ្យចាត់ទុកលោកថាជាបិតាដែលស្រឡាញ់យើង?
៦ របៀបមួយដែលព្រះយេហូវ៉ាជួយយើងឲ្យចាត់ទុកលោកថាជាបិតាដែលស្រឡាញ់យើង គឺដោយឲ្យមនុស្សកត់ទុកពាក្យសម្ដីនិងការប្រព្រឹត្តរបស់លោកយេស៊ូក្នុងគម្ពីរ។ (សូមអាន ម៉ាថាយ ១១:២៧) លោកយេស៊ូមានបុគ្គលិកលក្ខណៈដូចបិតារបស់លោកបេះបិទ រហូតដល់លោកអាចនិយាយបានថា៖ «អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។ (យ៉ូន. ១៤:៩) លោកយេស៊ូច្រើនតែរៀបរាប់អំពីព្រះយេហូវ៉ាថាជាបិតា។ គ្រាន់តែក្នុងសៀវភៅដំណឹងល្អទាំងបួនប៉ុណ្ណោះ លោកយេស៊ូបានប្រើពាក្យ«បិតា»ប្រហែលជា១៦៥ដង ដើម្បីសំដៅលើព្រះយេហូវ៉ា។ ហេតុអ្វីលោកយេស៊ូបានមានប្រសាសន៍ច្រើនដងអំពីព្រះយេហូវ៉ា? មូលហេតុមួយគឺដើម្បីឲ្យមនុស្សជឿជាក់ថាព្រះយេហូវ៉ាជាបិតាដែលស្រឡាញ់យើង។—យ៉ូន. ១៧:២៥, ២៦
៧. តើយើងរៀនអ្វីអំពីព្រះយេហូវ៉ាពីរបៀបដែលលោកបានប្រព្រឹត្តចំពោះបុត្ររបស់លោក?
៧ សូមពិចារណានូវអ្វីដែលយើងរៀនអំពីព្រះយេហូវ៉ាពីរបៀបដែលលោកបានប្រព្រឹត្តចំពោះលោកយេស៊ូដែលជាបុត្ររបស់លោក។ ព្រះយេហូវ៉ាតែងតែស្ដាប់សេចក្ដីអធិដ្ឋានរបស់លោកយេស៊ូ មិនត្រឹមតែប៉ុណ្ណោះ លោកក៏បានតបឆ្លើយនឹងសេចក្ដីអធិដ្ឋានទាំងនោះផងដែរ។ (យ៉ូន. ១១:៤១, ៤២) ទោះជាលោកយេស៊ូជួបប្រទះនឹងទុក្ខលំបាកអ្វីក៏ដោយ លោកតែងតែឃើញថាបិតារបស់លោកស្រឡាញ់និងគាំទ្រលោក។—លូក. ២២:៤២, ៤៣
៨. តើព្រះយេហូវ៉ាបានបំពេញសេចក្ដីត្រូវការរបស់លោកយេស៊ូយ៉ាងដូចម្ដេច?
៨ ពេលលោកយេស៊ូបានមានប្រសាសន៍ថា៖ «ខ្ញុំរស់ដោយសារបិតា» លោកបានទទួលស្គាល់ថាបិតាលោកគឺជាអ្នកផ្ដល់ជីវិតដល់លោកនិងជាអ្នកផ្គត់ផ្គង់លោក។ (យ៉ូន. ៦:៥៧) លោកយេស៊ូបានទុកចិត្តទាំងស្រុងលើបិតាលោក ហើយព្រះយេហូវ៉ាបានផ្ដល់អ្វីដែលលោកត្រូវការដើម្បីរស់នៅ។ សំខាន់បំផុត ព្រះយេហូវ៉ាបានជួយលោកយេស៊ូឲ្យនៅស្មោះត្រង់ចំពោះលោក។—ម៉ាថ. ៤:៤
៩. តើព្រះយេហូវ៉ាបានបង្ហាញយ៉ាងណាថាលោកជាបិតាដែលស្រឡាញ់និងយកចិត្តទុកដាក់ចំពោះលោកយេស៊ូ?
៩ ដោយសារព្រះយេហូវ៉ាជាបិតាដែលប្រកបដោយសេចក្ដីស្រឡាញ់ ព្រះបានធ្វើឲ្យប្រាកដថាលោកយេស៊ូដឹងថាលោកបានទទួលការគាំទ្រពីបិតា។ (ម៉ាថ. ២៦:៥៣; យ៉ូន. ៨:១៦) ទោះជាព្រះយេហូវ៉ាមិនបានការពារលោកយេស៊ូពីអ្វីៗទាំងអស់ដែលអាចធ្វើឲ្យលោករងទុក្ខក្ដី លោកបានជួយលោកយេស៊ូឲ្យស៊ូទ្រាំនឹងទុក្ខលំបាកផ្សេងៗ។ លោកយេស៊ូបានដឹងថាទុក្ខលំបាកណាក៏ដោយដែលលោកជួបប្រទះ គឺគ្រាន់តែបណ្ដោះអាសន្នប៉ុណ្ណោះ។ (ហេ. ១២:២) ព្រះយេហូវ៉ាបានបង្ហាញការយកចិត្តទុកដាក់ចំពោះលោកយេស៊ូដោយស្ដាប់ ផ្គត់ផ្គង់ បង្ហាត់បង្រៀន និងគាំទ្រលោក។ (យ៉ូន. ៥:២០; ៨:២៨) ឥឡូវ សូមយើងពិចារណាអំពីរបៀបដែលបិតារបស់យើងនៅស្ថានសួគ៌ក៏យកចិត្តទុកដាក់ចំពោះយើងដូចនេះដែរ។
របៀបដែលបិតាដែលស្រឡាញ់យើងយកចិត្តទុកដាក់ចំពោះយើង
ឪពុកដែលស្រឡាញ់កូន (១) ស្ដាប់ (២) ផ្គត់ផ្គង់ (៣) បង្ហាត់បង្រៀន និង(៤) ការពារកូន។ បិតានៅស្ថានសួគ៌ដែលស្រឡាញ់យើងយកចិត្តទុកដាក់ចំពោះយើងតាមរបៀបស្រដៀងនឹងនេះ (សូមមើលវគ្គ១០-១៥) *
១០. នៅទំនុកតម្កើង ៦៦:១៩, ២០ តើព្រះយេហូវ៉ាបង្ហាញយ៉ាងណាថាលោកស្រឡាញ់យើង?
១០ ព្រះយេហូវ៉ាស្ដាប់សេចក្ដីអធិដ្ឋានរបស់យើង។ (សូមអាន ទំនុកតម្កើង ៦៦:១៩, ២០) លោកមិនចង់ឲ្យយើងដាក់កម្រិតលើសេចក្ដីអធិដ្ឋានរបស់យើងទេ តែលោកអញ្ជើញយើងឲ្យអធិដ្ឋានជារឿយៗ។ (១ថែ. ៥:១៧) យើងអាចអធិដ្ឋានទៅព្រះរបស់យើងនៅពេលណាក៏បាន មិនថាយើងនៅកន្លែងណាក្ដី។ លោកមិនដែលរវល់ពេករហូតដល់លោកមិនស្ដាប់យើងទេ ផ្ទុយទៅវិញលោកតែងតែយកចិត្តទុកដាក់ស្ដាប់សេចក្ដីអធិដ្ឋានរបស់យើង។ ពេលយើងដឹងថាព្រះយេហូវ៉ាស្ដាប់សេចក្ដីអធិដ្ឋានរបស់យើង យើងកាន់តែស្រឡាញ់លោក។ អ្នកតែងទំនុកតម្កើងនិយាយថា៖ «ខ្ញុំស្រឡាញ់ព្រះយេហូវ៉ា ដ្បិតទ្រង់តែងស្ដាប់សំឡេងខ្ញុំ»។—ទំនុក. ១១៦:១
១១. តើព្រះយេហូវ៉ាតបឆ្លើយសេចក្ដីអធិដ្ឋានរបស់យើងតាមរបៀបណា?
១១ បិតាយើងមិនគ្រាន់តែស្ដាប់ តែលោកក៏តបឆ្លើយសេចក្ដីអធិដ្ឋានរបស់យើងដែរ។ សាវ័កយ៉ូហានពង្រឹងទំនុកចិត្តយើងដោយនិយាយថា៖ «អ្វីក៏ដោយដែលយើងអធិដ្ឋានសុំ ដែលសមស្របតាមបំណងប្រាថ្នារបស់ព្រះ នោះព្រះនឹងស្ដាប់យើង»។ (១យ៉ូន. ៥:១៤, ១៥) ព្រះយេហូវ៉ាប្រហែលជាតបឆ្លើយចំពោះសេចក្ដីអធិដ្ឋានរបស់យើងតាមរបៀបដែលយើងមិននឹកស្មានទេ។ លោកដឹងអំពីអ្វីដែលល្អបំផុតសម្រាប់យើង ដូច្នេះជួនកាលលោកតបឆ្លើយថាមិនបាន ឬក៏ថាលោកចង់ឲ្យយើងរង់ចាំ។—២កូ. ១២:៧-៩
១២-១៣. តើបិតារបស់យើងនៅស្ថានសួគ៌ផ្គត់ផ្គង់យើងតាមរបៀបណាខ្លះ?
១២ ព្រះយេហូវ៉ាផ្គត់ផ្គង់យើង។ លោកធ្វើអ្វីដែលលោកតម្រូវឲ្យឪពុកទាំងឡាយធ្វើ។ (១ធី. ៥:៨) លោកបំពេញសេចក្ដីត្រូវការក្នុងជីវិតប្រចាំថ្ងៃរបស់កូនៗលោក។ លោកមិនចង់ឲ្យយើងខ្វល់ខ្វាយអំពីអាហារ សម្លៀកបំពាក់ ឬទីលំនៅឡើយ។ (ម៉ាថ. ៦:៣២, ៣៣; ៧:១១) ដោយសារព្រះយេហូវ៉ាជាបិតាដែលស្រឡាញ់យើង លោកបានធ្វើឲ្យប្រាកដថាយើងនឹងទទួលអ្វីទាំងអស់ដែលយើងត្រូវការនៅថ្ងៃអនាគត។
១៣ សំខាន់បំផុត ព្រះយេហូវ៉ាផ្ដល់ឲ្យយើងនូវអ្វីដែលយើងត្រូវការដើម្បីរក្សាចំណងមិត្តភាពជាមួយនឹងលោក។ តាមរយៈបណ្ដាំរបស់លោក លោកបានបើកបង្ហាញសេចក្ដីពិតអំពីលោក គោលបំណងរបស់លោក ខ្លឹមសារនៃជីវិត និងអ្វីដែលនឹងកើតឡើងនៅថ្ងៃអនាគត។ លោកបានបង្ហាញចំណាប់អារម្មណ៍ចំពោះយើងផ្ទាល់ពេលយើងរៀនសេចក្ដីពិតនៅដើមដំបូង ដោយប្រើឪពុកម្ដាយរបស់យើង ឬអ្នកបង្រៀនឯទៀតដើម្បីជួយយើងឲ្យស្គាល់លោក។ ម្យ៉ាងទៀត លោកបន្តជួយយើងឲ្យទៅជាមិត្តរបស់លោក តាមរយៈពួកអ្នកចាស់ទុំក្នុងក្រុមជំនុំដែលស្រឡាញ់យើង និងបងប្អូនឯទៀតដែលមានភាពចាស់ទុំ។ មួយវិញទៀត ព្រះយេហូវ៉ាណែនាំយើងតាមរយៈកិច្ចប្រជុំក្រុមជំនុំជាកន្លែងដែលយើងទទួលការបង្ហាត់បង្រៀនជាមួយនឹងបងប្អូនយើង។ តាមរបៀបទាំងនេះនិងរបៀបផ្សេងទៀត ព្រះយេហូវ៉ាបង្ហាញការយកចិត្តទុកដាក់ក្នុងនាមជាបិតា ចំពោះយើងទាំងអស់គ្នា។—ទំនុក. ៣២:៨
១៤. ហេតុអ្វីព្រះយេហូវ៉ាបង្ហាត់បង្រៀនយើង ហើយតើលោកធ្វើដូច្នេះយ៉ាងដូចម្ដេច?
១៤ ព្រះយេហូវ៉ាបង្ហាត់បង្រៀនយើង។ ខុសពីលោកយេស៊ូ យើងជាមនុស្សមិនល្អឥតខ្ចោះ។ ដូច្នេះដើម្បីបង្ហាត់បង្រៀនយើង បិតាដែលស្រឡាញ់យើងប្រដៅតម្រង់យើងនៅពេលដែលចាំបាច់។ បណ្ដាំរបស់លោករំលឹកយើងថា៖ «ព្រះយេហូវ៉ាប្រដៅអស់អ្នកដែលលោកស្រឡាញ់»។ (ហេ. ១២:៦, ៧) ព្រះយេហូវ៉ាប្រដៅយើងតាមរបៀបផ្សេងៗ។ ជាឧទាហរណ៍ អ្វីដែលយើងអានពីបណ្ដាំរបស់ព្រះ ឬឮនៅកិច្ចប្រជុំប្រហែលជាកែតម្រង់យើង។ ឬក៏ប្រហែលជាជំនួយដែលយើងត្រូវការមកពីពួកអ្នកចាស់ទុំ។ ទោះជាព្រះយេហូវ៉ាប្រដៅតម្រង់យើងតាមរបៀបណាក្ដី លោកតែងតែធ្វើដូច្នេះ ដោយសារលោកស្រឡាញ់យើង។—យេ. ៣០:១១
១៥. តើព្រះយេហូវ៉ាការពារយើងតាមរបៀបណាខ្លះ?
១៥ ព្រះយេហូវ៉ាគាំទ្រយើងពេលមានទុក្ខលំបាក។ ដូចឪពុកដែលយកចិត្តទុកដាក់ចំពោះកូន តែងគាំទ្រកូនក្នុងអំឡុងគ្រាលំបាក បិតារបស់យើងនៅស្ថានសួគ៌គាំទ្រយើងនៅពេលដែលមានទុក្ខលំបាក។ លោកប្រើសកម្មពលបរិសុទ្ធរបស់លោកដើម្បីការពារយើងពីអ្វីណាក៏ដោយដែលអាចបង្ខូចចំណងមិត្តភាពរបស់យើងជាមួយនឹងលោក។ (លូក. ១១:១៣) ព្រះយេហូវ៉ាក៏ជួយយើងពេលយើងធ្លាក់ទឹកចិត្តឬព្រួយបារម្ភ។ ជាឧទាហរណ៍ លោកផ្ដល់ឲ្យយើងនូវសេចក្ដីសង្ឃឹមដ៏អស្ចារ្យសម្រាប់ថ្ងៃអនាគត។ នេះជួយយើងឲ្យស៊ូទ្រាំនឹងការលំបាកដែលយើងមាន។ ហេតុអ្វី? ពីព្រោះទោះជាមានអ្វីអាក្រក់កើតឡើងចំពោះយើងក៏ដោយ បិតាដែលស្រឡាញ់យើងនឹងធ្វើឲ្យយើងជាសះស្បើយពីរបួសទាំងអស់ដែលធ្វើឲ្យយើងរងទុក្ខ។ ការលំបាកណាក៏ដោយដែលយើងមានគឺគ្រាន់តែបណ្ដោះអាសន្នប៉ុណ្ណោះ តែពរដែលព្រះយេហូវ៉ាផ្ដល់ឲ្យគឺស្ថិតស្ថេរជារៀងរហូត។—២កូ. ៤:១៦-១៨
បិតាយើងនឹងមិនបោះបង់យើង
១៦. តើអ្វីបានកើតឡើងពេលអាដាមមិនស្ដាប់បង្គាប់បិតាដែលស្រឡាញ់គាត់?
១៦ កាលដែលយើងគិតអំពីអ្វីដែលព្រះយេហូវ៉ាបានធ្វើពេលអាដាមមិនស្ដាប់បង្គាប់លោក យើងអាចឃើញច្បាស់ថាលោកស្រឡាញ់យើង។ ពេលអាដាមមិនស្ដាប់បង្គាប់ព្រះយេហូវ៉ាដែលជាបិតារបស់គាត់នៅស្ថានសួគ៌ ទាំងគាត់ទាំងកូនចៅរបស់គាត់មិនអាចធ្វើជាសមាជិកក្រុមគ្រួសារដ៏រីករាយរបស់លោកឡើយ។ (រ៉ូម ៥:១២; ៧:១៤) ក៏ប៉ុន្តែ ព្រះយេហូវ៉ាបានចាត់វិធានការដើម្បីជួយកូនចៅរបស់អាដាម។
១៧. តើព្រះយេហូវ៉ាបានធ្វើអ្វីភ្លាមៗ ក្រោយពីអាដាមបានបះបោរប្រឆាំង?
១៧ ព្រះយេហូវ៉ាបានដាក់ទោសអាដាម តែលោកបានសន្យាថាលោកនឹងជួយកូនចៅរបស់គាត់។ ភ្លាមៗនោះលោកបានសន្យាថាមនុស្សដែលស្ដាប់បង្គាប់នឹងត្រូវទទួលឲ្យចូលក្នុងក្រុមគ្រួសាររបស់លោកឡើងវិញ។ (លោ. ៣:១៥; រ៉ូម ៨:២០, ២១) ព្រះយេហូវ៉ាអាចធ្វើដូច្នេះបានតាមរយៈគ្រឿងបូជាលោះរបស់លោកយេស៊ូដែលជាបុត្រជាទីស្រឡាញ់របស់លោក។ ដោយឲ្យបុត្ររបស់លោកដើម្បីយើង ព្រះយេហូវ៉ាបង្ហាញថាលោកស្រឡាញ់យើងខ្លាំងណាស់។—យ៉ូន. ៣:១៦
បើយើងបានឃ្លាតឆ្ងាយពីព្រះយេហូវ៉ាជាបិតាដែលស្រឡាញ់យើង តែបានប្រែចិត្ត លោកប្រុងប្រៀបទទួលស្វាគមន៍យើងឲ្យត្រឡប់មកវិញ (សូមមើលវគ្គ១៨)
១៨. ហេតុអ្វីយើងអាចប្រាកដថាព្រះយេហូវ៉ាចង់ឲ្យយើងធ្វើជាកូនរបស់លោក ទោះបើយើងបានឃ្លាតឆ្ងាយពីលោកក្ដី?
១៨ ទោះជាយើងជាមនុស្សមិនល្អឥតខ្ចោះក្ដី ព្រះយេហូវ៉ាចង់ឲ្យយើងនៅក្នុងក្រុមគ្រួសាររបស់លោក ហើយលោកមិនដែលចាត់ទុកយើងថាជាបន្ទុកឡើយ។ យើងប្រហែលជាធ្វើឲ្យព្រះយេហូវ៉ាខកចិត្ត ឬឃ្លាតឆ្ងាយពីលោកអស់មួយរយៈ ប៉ុន្តែព្រះយេហូវ៉ាតែងតែសង្ឃឹមថាយើងនឹងត្រឡប់មករកលោកវិញ។ លោកយេស៊ូបានលើកឧទាហរណ៍អំពីកូនដែលបានបាត់ ដើម្បីបង្ហាញអំពីសេចក្ដីស្រឡាញ់ដ៏ជ្រាលជ្រៅដែលព្រះយេហូវ៉ាមានចំពោះកូនរបស់លោក។ (លូក. ១៥:១១-៣២) ឪពុកក្នុងឧទាហរណ៍នោះមិនដែលអស់សង្ឃឹមថាកូនប្រុសរបស់គាត់នឹងមិនត្រឡប់មកវិញទេ។ ពេលកូននោះបានវិលត្រឡប់មកផ្ទះវិញ ឪពុកនោះបានមកស្វាគមន៍គាត់យ៉ាងកក់ក្ដៅ។ ស្រដៀងគ្នាដែរ បើយើងបានឃ្លាតឆ្ងាយពីព្រះយេហូវ៉ា តែបានប្រែចិត្ត យើងអាចប្រាកដថាបិតាដែលស្រឡាញ់យើងប្រុងប្រៀបទទួលស្វាគមន៍យើងឲ្យត្រឡប់មកវិញ។
១៩. តើព្រះយេហូវ៉ានឹងធ្វើឲ្យល្អប្រសើរឡើងវិញរាល់អ្វីដែលអាដាមបានធ្វើឲ្យខូចខាតយ៉ាងដូចម្ដេច?
១៩ បិតារបស់យើងនឹងធ្វើឲ្យល្អប្រសើរឡើងវិញរាល់អ្វីដែលអាដាមបានធ្វើឲ្យខូចខាត។ ក្រោយពីការបះបោររបស់អាដាម ព្រះយេហូវ៉ាបានសម្រេចចិត្តទទួលយក១៤៤.០០០នាក់ពីចំណោមមនុស្សជាតិឲ្យធ្វើជាកូនរបស់លោក ហើយពួកគេនឹងបម្រើជាស្តេចនិងសង្ឃនៅស្ថានសួគ៌ជាមួយនឹងបុត្រលោក។ នៅពិភពលោកថ្មី លោកយេស៊ូនិងពួកអ្នកដែលគ្រប់គ្រងជាមួយនឹងលោក នឹងជួយមនុស្សដែលស្ដាប់បង្គាប់ឲ្យទៅជាមនុស្សល្អឥតខ្ចោះ។ ក្រោយពីពួកគេឆ្លងផុតការសាកល្បងចុងក្រោយដោយបង្ហាញថាពួកគេស្ដាប់បង្គាប់ព្រះ លោកនឹងផ្ដល់ជីវិតដែលគ្មានទីបញ្ចប់ដល់ពួកគេ។ ពេលនោះ បិតារបស់យើងនឹងអរសប្បាយដោយឃើញផែនដីដែលពោរពេញទៅដោយកូនប្រុសស្រីដ៏ល្អឥតខ្ចោះរបស់លោក។ នោះនឹងជាគ្រាដ៏អស្ចារ្យមែន!
២០. តើព្រះយេហូវ៉ាបានបង្ហាញយ៉ាងណាថាលោកស្រឡាញ់យើងជាខ្លាំង ហើយតើយើងនឹងពិចារណាអ្វីក្នុងអត្ថបទបន្ទាប់?
២០ ព្រះយេហូវ៉ាបានបង្ហាញថាលោកស្រឡាញ់យើងខ្លាំងណាស់។ លោកជាបិតាដ៏ល្អបំផុត។ លោកស្ដាប់សេចក្ដីអធិដ្ឋានរបស់យើង ហើយផ្ដល់អ្វីដែលយើងត្រូវការក្នុងជីវិតប្រចាំថ្ងៃ និងអ្វីដែលយើងត្រូវការដើម្បីរក្សាចំណងមិត្តភាពជាមួយនឹងលោក។ លោកបង្ហាត់បង្រៀននិងគាំទ្រយើង។ លោកក៏នឹងធ្វើអ្វីដ៏អស្ចារ្យសម្រាប់យើងនៅពេលអនាគតដែរ។ យើងសប្បាយរីករាយដោយដឹងថាបិតារបស់យើងស្រឡាញ់និងយកចិត្តទុកដាក់ចំពោះយើង! ក្នុងអត្ថបទបន្ទាប់ យើងនឹងពិចារណាអំពីរបៀបដែលយើងជាកូនព្រះ អាចបង្ហាញថាយើងមានចិត្តកតញ្ញូចំពោះសេចក្ដីស្រឡាញ់របស់លោក។
ចម្រៀងលេខ១០៨ សេចក្ដីស្រឡាញ់ស្មោះត្រង់របស់ព្រះ
^ វគ្គ 5 យើងច្រើនតែចាត់ទុកព្រះយេហូវ៉ាថាជាអ្នកបង្កើតយើងនិងជាអ្នកគ្រប់គ្រងសកលលោក។ ប៉ុន្តែ យើងមានមូលហេតុត្រឹមត្រូវដើម្បីចាត់ទុកលោកថាជាបិតាដែលស្រឡាញ់និងយកចិត្តទុកដាក់ចំពោះយើង។ ក្នុងអត្ថបទនេះ យើងនឹងពិចារណាអំពីមូលហេតុទាំងនេះ។ យើងក៏នឹងរៀនអំពីមូលហេតុដែលយើងអាចប្រាកដថាព្រះយេហូវ៉ានឹងមិនបោះបង់ចោលយើង។
^ វគ្គ 59 ការពណ៌នាអំពីរូបភាព: រូបភាពទាំងបួនបង្ហាញអំពីឪពុកជាមួយនឹងកូនរបស់គាត់៖ ឪពុកស្ដាប់កូនប្រុសយ៉ាងយកចិត្តទុកដាក់ ឪពុកផ្ដល់អ្វីដែលកូនស្រីត្រូវការ ឪពុកបង្ហាត់បង្រៀនកូនប្រុស និងឪពុកសម្រាលទុក្ខកូនប្រុស។ គំនូរអំពីដៃរបស់ព្រះយេហូវ៉ាដែលនៅខាងក្រោយរូបភាពទាំងបួន រំលឹកយើងថាព្រះយេហូវ៉ាយកចិត្តទុកដាក់ចំពោះយើងតាមរបៀបស្រដៀងនឹងនេះដែរ។
