1. O muthu wa mesenene kuzwela ni sobha ya Pelesa ka tokalele kubhanga ihi?

XINGANEKA kwila, eye wala mu ixi ya Pelesa, 2.500 a mivu kudima. Wa mesena kuzwela ni sobha ya ixi. Kyenyiki, uya mu mbanza mwa kala, o mbanza ya Suzane. Maji eye ki wa tokala kubhixila bhu pholo ya sobha se ka kwixana. Se u kibhanga, atena ku kujibha!—Este. 4:11.

2. O kwila twa tokala kukala ni hele ya kuzwela ni Jihova?

² Tu sakidila kyavulu, mukonda Jihova ka difu ni sobha yiyi ya Pelesa. Jihova wa beta-kota, mutumini woso-woso mu ixi ndenge. Né kiki, mwene uxikina kuzwela n’etu mu kithangana kyoso-kyoso. Mwene ka mesena kwila tu kala ni hele ya kuzwela nê. Mu kifika, sumbala Jihova wala ni majina avulu a mawujitu, kala Mubhagi wonéne, Mutenyayoso, Ngana Sukeku, mwene wa mesena kwila, tu zwela nê, kala ki tu zwela ni “Tata” yetu mu xitu. (Mat. 6:9) Kwijiya kwila Jihova wa mesena kuma tu mu zukama mu ukexilu yú, ku tu sangulukisa o muxima!

3. (a) Mukonda dyahi Jihova tu tena ku mwixana “Tata?” (b) Ihi i twanda dilonga mu milongi yiyi?

³ Kuma Jihova mwene wa tu bhana o mwenyu, tu tena ku mwixana “Tata.” (Jisá. 36:9) Kuma-phe mwene Tata yetu, twa tokala ku mu belesela jinga. Se tu bhanga yoso ya tu bhinga, twanda tambula mabesá avulu. (Jihe. 12:9) Bhu kaxi ka mabesá yá, kwala o kidyelelu kya kutambula o mwenyu wa kalelaku, kikale ku dyulu mba mu ixi. Né kindala kiki, twa mu katula kyá mbote. O milongi yiyi yanda zwela kyebhi Jihova kya dikila o ibhindamu yetu kindala kiki, kala tata ya henda, ni mukonda  dyahi tu tena kudyelela kwila, ku hádya nuka wanda twehelela. Maji kyadyanga, tu zwele hanji se mukonda dyahi tu tena kudyelela kwila, o Tata yetu ya dyulu wa tu zolo, wa mesena ku tu kwatekesa.

4. Mukonda dyahi amoxi kya abhonza kutala Jihova kala Tata yâ?

⁴ O kwila ki kubhonza kuxinganeka Nzambi kala Tata yê? Amoxi adimona kutola, ni kwila kala ni valolo, mu kudisokesa ni Jihova. Ene ka xikina kwila, o Nzambi Mutenyayoso wa ate o muxima. Maji, o Tata yetu ya henda ka mesena kwila tu divwa kiki. Mwene wa tu bhana o mwenyu, wa mesena kwila, tu kala ni ukamba ni mwene. Kyoso poxolo Phawulu kya zwela o kidi kiki, wa jimbulula ku jingivwidi jê kwila, Jihova “kana muthu wa mu kala dikanga.” (Ika. 17:24-29) Nzambi wa mesena kwila, etwenyoso tu zwela nê kala ki tweji zwela ni tata ya kazola mu xitu.

5. Ihi i tu tena kudilonga ku musoso wa phange ya muhatu?

⁵ Amukwá kya abhonza kutala Jihova kala Tata yâ, mukonda o jitata jâ mu xitu, ka alondekesa henda mu undenge wâ. Tala ya zwela o phange ya muhatu: “Tata yami wexile mu ngi xongwena kyavulu. Kyoso ki nga mateka kudilonga o Bibidya, kya ngi bhonzele kuzukama kwa Tata yami ya dyulu. Maji kyoso ki nga bandekesa o kwijiya kwami kwalungu ni Jihova, o ixinganeku yami ya lunguluka.” O kwila kyene we ki wene mu divwa? Se kyene, kana kuluwala. Mu kubhita kithangana, wanda tena kumona kwila, Jihova mwene o Tata ya beto-kota.

6. Kala kilondekesa Matesu 11:27, Jihova u tu kwatekesa ku mu mona kala Tata ya henda mu mawukexilu ebhi?

⁶ Jihova u tu kwatekesa ku mu mona kala Tata ya henda bhu kaxi ka izwelu ni ibhangelu ya Jezú yosoneke mu Bibidya. (Tanga Matesu 11:27.) Jezú wa kayela kyambote o idifwa ya Tat’ê, katé kya tenene kwamba kwila: “Woso wa ngi mono eme, wa mono we Tata.” (Nzwá 14:9) Jezú wa tumbula kyavulu Jihova ni kizwelu Tata. Mu madivulu a Matesu, Máluku, Luka ni Nzwá, Jezú wa tumbula o kizwelu “Tata” mu 165 a jiveji, mu kuzwela yalungu ni Jihova. Mukonda dyahi Jezú wa tumbula kyavulu Jihova mu ukexilu yú? Mwene wa bhange kiki, phala kuxikinisa o athu kwila, Jihova Tata ya henda.—Nzwá 17:25, 26.

7. Ihi i tu dilonga mu ukexilu wa Jihova kutalatala Mon’ê?

⁷ Tu tale se ihi i tu dilonga mu ukexilu wa Jihova wa kutalatala Mon’ê, Jezú. Mu ithangana yoso, Jihova wevu o misambu ya Jezú. Mwene k’evu ngó, maji wa tambwijila o misambu ya Jezú. (Nzwá 11:41, 42) Mu ibhidi ya dibhana nayu Jezú, mwene wa tambula o henda ni kikwatekesu kya Tat’ê.—Luka 22:42, 43.

8. Jihova wa dikila o ibhindamu ya Jezú mu mawukexilu ebhi?

⁸ Jezú wa xikinine kwila, Tat’ê mwene o Fixi ni Kifikidilu kya mwenyu wê kyoso kyambe: “Eme o mwenyu nga u mwena kwa Tata.” (Nzwá 6:57) Jezú wa dyelele ni muxima woso kwa Tat’ê, o Jihova wa dikidila o ibhindamu yoso ya mwenyu wê. Jihova wa kwatekesa Jezú phala n’a mu kale jinga fiyele.—Mat. 4:4.

9. Kyebhi Jihova kya londekesa kwila, wexile Tata wa zolele kyavulu Jezú?

⁹ Kuma mwene Tata ya henda, Jihova wa bhange yoso phala Jezú n’a mono kwila, Mwene weji mu kwatekesa. (Mat. 26:53; Nzwá 8:16) Sumbala Jihova ka lange Jezú mu ima yoso-yoso yeji tena ku mu kwama, Mwene wa mu kwatekesa kukolokota mu ibhidi. Jezú wejidile kwila, o hadi yoso yeji tala, yeji bhit’é mu kithangana ni mbandu. (Jihe. 12:2) Jihova wa londekesa kwila wa zolele Jezú mu ku mwívwa, mu kudikila o ibhindamu yê, mu ku mu longa  ni ku mu kwatekesa. (Nzwá 5:20; 8:28) Kindala tu mone kyebhi o Tata yetu ya dyulu kya tu kwatekesa we mu mawukexilu a difu kiki.

10. Kala kilondekesa Jisálamu 66:19, 20 kyebhi Jihova kya londekesa kwila wa tu zolo?

¹⁰ Jihova wívwa o misambu yetu. (Tanga Jisálamu 66:19, 20.) Mwene ka mesena kwila tu sosolola o misambu yetu, mu veji dya kiki wa mesena kwila tu sambela kwa mwene izuwa yoso. (1 Tes. 5:17) Tu tena kusamba kwa Nzambi yetu mu ithangana yoso kabasa o kididi bhu twala. Mwene wala polondo phala kutwivwa ni ku tu bhana o mátwi. Kyoso ki twijiya kwila Jihova wívwa o misambu yetu, etu tu mu zola dingi. O mukwa Jisálamu wambe: “Nga zolo Jihova, mukonda wa ng’ivu dízwi dyami ni kudyonda kwami.”—Jisá. 116:1.

11. Kyebhi Jihova kya tambwijila o misambu yetu?

¹¹ Tat’etu k’evu ngó o misambu yetu maji u tu tambwijila we. Poxolo Nzwá wa tu dyelelesa kuma: “Kima kyoso ki tu mu bhinga, se kya xikina mu vondadi [ya Nzambi,] mwène u tu ivwa.” (1 Nzwá 5:14, 15) Mu kidi, nange Jihova ka tambwijila o misambu yetu mu ukexilu u twa fikile. Mwene wejiya o ima ya beta-kota phala etu. Sayi bhabha mwene ka tu bhana o ima i twa bhingi mba u tu bhangesa kukingila.—2 Kol. 12:7-9.

12-13. O Tata yetu ya dyulu u dikila o ibhindamu yetu mu ukexilu webhi?

¹² Jihova u dikila o ibhindamu yetu. Mwene u bhanga o kima kya kingila ku jitata joso mu xitu. (1 Tim. 5:8) Mwene u bhana ku twana twê o ima ya bhindamena phala kukala ku mwenyu. Mwene ka mesena kwila tu kala ni hele yalungu ni kudya, izwatu mba dibhata. (Mat. 6:32, 33; 7:11) Kuma mwene Tata ya henda, Jihova u bhanga yoso phala ku tu bhana yoso i twanda bhindamena ku hádya.

¹³ Kya beta-kota Jihova u tu bhana i twa bhindamena phala kukala ni ukamba wambote ni mwene. Bhu kaxi ka Maka mê mwene u tu tangela se mwene nanyi, yebhi o vondandi yê, mukonda dyahi wa tu bhange, ni ihi yanda bhita ku hádya. Mwene wa londekesa o henda yê kokwetu kyoso ki twa mateka kudilonga o kidi, bhu kaxi ka jitata jetu mba muthu wengi wa tu kwatekesa ku mwijiya. Tu suluka mu kutambula o kikwatekesu kyê kya henda bhu kaxi ka tufunga twa kilunga ni jiphange ja ka mukwa a kulu mu nzumbi. Jihova u tu longa we bhu kaxi ka yônge ya kilunga, kumoxi ni mwiji wetu mu nzumbi. Kala Tata ya henda Jihova u londekesa kwila wa tu te muxima, wa tu suwu, mu ukexilu yú ni mu mawukexilu akamukwa.—Jisá. 32:8.

14. Mukonda dyahi Jihova u tu longa ni kyebhi kya bhanga kiki?

¹⁴ Jihova u tu longa. Jezú wexile muthu wayuka, maji etu tu akwa ituxi. Kyenyiki, mu ku tu longa, sayi ithangana o Tata yetu ya henda, wanda bhinga ku tu bazela. O Mak’â mê a tu lembalesa: “[Jihova] woso wa mu zola u mu longa.” (Jihe. 12:6, 7) Jihova u tu bazela mu mawukexilu avulu. Mu kifika, sayi bhabha tu tanga kima mu Bibidya mba twívwa kima mu kyônge, ki tu londekesa kwila, twa bhingi kulungulula ukexilu wa kuxinganeka mba kima ki twene mu bhanga. Mba-phe tu tambula o kikwatekesu ki twa bhindamena bhu kaxi ka tufunga. Kabasa ukexilu wa ku tu bazela, Jihova ukibhanga mukonda wa tu zolo.—Jel. 30:11.

15. Jihova u tu langa mu mawukexilu ebhi?

¹⁵ Jihova u tu kwatekesa kukolokota mu ibhidi. O tata ya henda mu xitu, u kwatekesa mon’ê mu ithangana ya ibhidi. Kyene we kimoxi ni Tata yetu ya dyulu, mwene u tu kwatekesa mu ithangana yabhonzo. Mwene u tu  bhana o nzumbi yê ikôla. O nzumbi ikôla, i tu langa ku kima kyoso-kyoso ki tena kuzanga o ukamba wetu ni mwene. (Luka 11:13) Jihova u tu kwatekesa we kyoso ki tu luwala. Mu kifika, mwene wa tu bhana kidyelelu kya katunda. O kidyelelu kiki kyalungu ni hádya, ki tu kwatekesa kukolokota mu ithangana yabhonzo. Xinganeka ngó: O Tata yetu ya henda, Jihova, wanda zubha o hadi yoso i twa mu bhita nayu lelu. O ibhidi i twa mu dibhana nayu, ki yanda nangenena, maji o mabesá a tu bhana Jihova, anda nangenena katé ku hádya ni hádya.—2 Kol. 4:16-18.

16. Ihi ya bhiti kyoso Adá kya bhukumukina Tat’ê ya dyulu?

¹⁶ Tu mona kuma Jihova wa tu zolo, mu kuxinganeka o ima ya bhange kyoso Adá kya mu bhukumukina. Kyoso Adá kya bhukumukina Tat’ê ya dyulu, mwene wa texi o ujitu wê ni wa mbutu yê ya kubhanga mbandu ya mwiji wa Jihova. (Loma 5:12; 7:14) Maji Jihova wa bhange kima phala kukwatekesa o mbutu ya Adá.

17. Kyoso Adá kya bhukumuka, ihi ya bhange Jihova sé kulaleka?

¹⁷ Jihova wa kaxtikala Adá, maji wa bhana kidyelelu ku twana twa Adá. Sé kulaleka, mwene wa kanena kwila, o athu eji belesela, eji kala dingi ni ujitu wa kubhanga mbandu ya mwiji wê. (Dim. 3:15; Loma 8:20, 21) Jihova wa jikula o njila yiyi bhu kaxi ka sata ya kukula ya Mon’ê wa kazola, Jezú. Mu kubhana Mon’ê phala ku tu bhulula, Jihova wa londekesa kwila, wa tu zolo kyavulu.—Nzwá 3:16.

18. Mukonda dyahi tu tena kudyelela kwila, Jihova wa tu mesena hanji kala tu an’ê né mwene se twa mu bhele dikunda?

¹⁸ Sumbala tu akwa ituxi, Jihova wa mesena kwila, tu bhanga mbandu ya mwiji wê. Mwene  nuka wanda tu mona kala tu dibunda dya neme. Sayi bhabha tu tena ku mu luwalesa, mba ku mu bhana dikunda. Maji mu ithangana yoso, Jihova wanda mesena kwila, tu vutuka kwa mwene. Jezú wa londekesa o henda yonene ya Jihova ku athu, bhu kaxi ka kifika kya mona wa texikile. (Luka 15:11-32) O tata mu kifika, wa dyelele kwila, o mona weji vutuka. Kyoso o mona kya vutuka, o tata wa mu tambulula ni henda yoso. Se twa bhanene dikunda kwa Jihova, maji kindala twa dyela, tu tena kudyelela kwila, Jihova wala polondo phala ku tu tambulula mu kilunga kyê.

19. Jihova wanda yudika kyebhi o ima ya zange Adá?

¹⁹ O Tata yetu wanda yudika o ima yoso ya zange Adá. Kyoso Adá kya bhukumuka, Jihova wa solo kusumba an’a mu ixi. Ene a tenesa 144.000, anda sidivila kala jisobha ni akunji ku dyulu, kumoxi ni Mon’ê. Ku mundu wobhe, Jezú ni yó anda tumina n’ê, anda kwatekesa o athu a belesela katé kyanda kituka athu ayuka. Kyoso kyanda bhita o polova ya sukina, Nzambi wanda ku abhana o mwenyu wa kalelaku. Kyenyiki, o Tata yetu wanda kala ni kisangusangu kya kumona o ixi yezala ni twana twê twa yuka. Kyanda kala kizuwa kya kusanguluka!

20. (a) Jihova wa londekesa kwila wa tu zolo mu mawukexile ebhi? (b) Ihi i twanda dilonga mu milongi ya kayela?

²⁰ Jihova wa londekesa kwila wa tu zolo kyavulu. Mwene o Tata ya beto-kota. Mwene wívwa o misambu yetu, udikila o ibhindamu yetu mu xitu ni mu nzumbi. Mwene u tu longa, u tu kwatekesa. Ku hádya wanda tu bhana mabesá avulu a katunda. Ki tu sangulukisa kyavulu kwijiya kwila, o Tata yetu ya henda, wa tu te muxima! Kuma tu an’â, o milongi ya kayela yanda tu longa mawukexilu u tu tena kulondekesa we o henda yetu kwa Jihova.