1. Һәрге кәсәки бьхԝәста тʹәви пʹадше Фарьсе хәбәр да, пешийе гәрәке чь бькьра?

БЬДЬНӘ бәр чʹәʹве хԝә, кӧ һун ԝәкә 2 500 сал пешда, Фарьседа дьжин. Һун дьхԝазьн тʹәви пʹадше ԝи ԝәлати дәрһәԛа тьштәки хәбәр дьн, ләма һун дьчьнә шәһәре Шушане, кʹидәре кӧ пʹадша дьжи. Ле пешийа кӧ тʹәви ԝи хәбәр дьн, һун гәрәке изьне жь ԝи бьхԝазьн. Һәрге һун бьхԝазьн бей изьн тʹәви ԝи хәбәр дьн, һун дькарьн бенә кӧштьне (Әст. 4:11).

2. Йаһоԝа дьхԝазә кӧ әм һьндава ԝида ча бьн?

² Әм гәләк рʹази нә, кӧ Йаһоԝа мина ԝи пʹадше Фарьсе нинә! Рʹаст ә Йаһоԝа жь һәр сәрԝери бьльндтьр у ԛәԝаттьр ә, ле йәкә әм тʹьме дькарьн тʹәви ԝи хәбәр дьн. Әԝ дьхԝазә, ԝәки әм аза тʹәви ԝи хәбәр дьн у незики ԝи бьн. Мәсәлә, сәрнавед Йаһоԝайи ӧса ԛәԝи һәнә  ча Әʹфьрандаре һәри Бьльнд, Сәрԝере Һьмзор, Хԝәйи Хӧдан, ле йәкә әԝ дьхԝазә, кӧ чахе әм тʹәви ԝи хәбәр дьдьн, хәбәрәкә дьлгәрми бьдьнә хәбате, демәк жерʹа бежьн «Баво» (Мәт. 6:9). Әм бәхтәԝар ьн, чьмки Йаһоԝа дьхԝазә һәләԛәтийа мә тʹәви ԝи ӧса незик бә!

3. Чьрʹа әм дькарьн Йаһоԝарʹа бежьн «Баво», у әме ве готареда дәрһәԛа чь шеԝьр кьн?

³ Әм бь рʹасти дькарьн Йаһоԝарʹа бежьн Баво, чьмки әԝ  ә Жийиндаре мә (Зәб. 36:9). Әԝ Баве мә йә, ләма әм борщдар ьн гӧрʹа ԝи бькьн. Һәрге әм ӧса бькьн ча әԝ дьхԝазә, әме кʹәрәмед мәзьн бьстиньн (Ибрн. 12:9). Дькʹәвә нава ԝан кʹәрәма жийина һʹәта-һʹәтайе, йан сәр әʹрде йан сәр әʹзмана. Ле әм ньһа жи кʹәрәма дьстиньн. Ве готареда ԝе бе шеԝьркьрьне, кӧ чь избат дькә, ԝәки Йаһоԝа ча Бав мә һʹьз дькә, у чьрʹа әм гәрәке дӧдьли нәбьн, ԝәки әԝ ԝе ахьрийеда тʹӧ щар мә нәһелә. Ле пешийе ԝәрә әм шеԝьр кьн, кӧ чьрʹа әм баԝәр ьн, ԝәки Баве мәйи әʹзмана мә гәләк һʹьз дькә у дьхԝазә али мә бькә.

4. Чьрʹа һьнәкарʹа чәтьн ә Хԝәде һʹәсаб кьн ча Баве хԝә?

⁴ Ԝәрʹа чәтьн ә Хԝәде һʹәсаб кьн ча Баве хԝә? Һьнәк дьбәкә дьфькьрьн, ԝәки һьмбәри Йаһоԝа мәрьв ӧса бьчʹук ьн, кӧ бәр чʹәʹве ԝи тьштәк ниньн. Ләма әԝана дӧдьли дьбьн, ԝәки Хԝәдейе Һьмзор бона ԝан хәм дькә. Ле Баве мәйи бь һʹьзкьрьн нахԝазә әм ӧса бьфькьрьн. Әԝи әʹмьр дайә мә у әԝ дьхԝазә, ԝәки һәләԛәтийа мә тʹәви ԝи һәбә. Чахе Паԝлос дәрһәԛа ве рʹастийе гот, әԝи Атʹинайеда гӧһдарванед хԝәрʹа шьровәкьр, кӧ Йаһоԝа «жь мә һәр кәси нә дур ә» (Кʹар. Шанд. 17:24-29). Хԝәде дьхԝазә ԝәки һәр кәс жь мә һьндава ԝида ӧса бә, ча зарʹ тʹәви баве хԝәйи бь һʹьзкьрьн у хәмкʹеш хәбәр дьдә.

5. Әм жь мәсәла хушкәкә мә чь педьһʹәсьн?

⁵ Һьнәкарʹа чәтьн ә Хԝәде һʹәсаб кьн ча Баве хԝә, чьмки баве ԝан ԝанрʹа һьндьк һʹьзкьрьн у дьлгәрми дайә кʹьфше, йан жи ԛә нәдайә кʹьфше. Дина хԝә бьдьне хушкәкә мә чь дьбежә: «Баве мьн гәләк щар пе чʹерʹа у гьлийед нәщайиз мьнрʹа хәбәр дьда. Ләма жи чахе мьн щара пешьн дәстпекьр Кʹьтеба Пироз һин бьм, мьнрʹа чәтьн бу незики Баве хԝәйи әʹзмана бьм. Ле чахе мьн Йаһоԝа һе рʹьнд нас кьр, ньһерʹандьна мьн һатә гӧһастьне». Ле һун жи хԝә ӧса тʹәхмин дькьн? Һәрге әре, дьлтәнг нәбьн. Һьнә ԝәʹдә шунда, һуне жи бькарьбьн сәр хԝә тʹәхмин кьн, ԝәки Йаһоԝа Бавәки лапи баш ә.

6. Ль гора Мәтта 11:27, чь щурʹәйи Йаһоԝа али мә дькә, ԝәки әм ԝи ча Бавәки бь һʹьзкьрьн һʹәсаб кьн?

⁶ Щурʹәк кӧ Йаһоԝа ча али мә дькә, ԝәки әм ԝи ча Бавәки бь һʹьзкьрьн һʹәсаб  кьн, әԝ ә кӧ әԝи гьли у кьред Иса Кʹьтеба Пирозда дайә ньвисаре. (Бьхунә Мәтта 11:27.) Иса бь тʹәмами чʹәʹв дьда Баве хԝә, ләма әԝи гот: «Йе кӧ әз дитьмә, Бав дитийә» (Йуһʹн. 14:9). Гәләк щар Иса чахе дәрһәԛа Йаһоԝа хәбәр дьда, сәр ԝи дьгот Бав. Иса ԝәкә 165 щара һәма тʹәне чар кʹьтебед пешьнә Мьзгинийеда сәр Йаһоԝа дьбежә «Бав». Чьрʹа әԝи ӧса зәʹф дәрһәԛа Йаһоԝа хәбәр дьда? Мәʹник әԝ ә, сәва мәрьв баԝәр буна, кӧ Йаһоԝа Бавәки бь һʹьзкьрьн ә (Йуһʹн. 17:25, 26).

7. Әм чь педьһʹәсьн дәрһәԛа Йаһоԝа жь ве йәке, кӧ әԝ һьндава Кӧрʹе хԝәда ча бу?

⁷ Бьфькьрьн кӧ әм дәрһәԛа Йаһоԝа чь педьһʹәсьн жь ԝе йәке, кӧ әԝи ча хԝә дьда кʹьфше һьндава Кӧрʹе хԝә Иса. Йаһоԝа тʹьме дӧайед ԝи дьбьһист. Әԝи нә кӧ  тʹәне дӧайед ԝи дьбьһист, ле ӧса жи щаба дӧайед ԝи дьда (Йуһʹн. 11:41, 42). Иса рʹасти чь чәтьнайа жи дьһат, тʹьме һʹьзкьрьн у пьштгьрийа Баве хԝә сәр хԝә тʹәхмин дькьр (Луԛа 22:42, 43).

8. Йаһоԝа чьда бона Иса хәм дькьр?

⁸ Иса фәʹм дькьр, кӧ Баве ԝи Канийа жийина ԝи йә, ләма әԝи гот: «Бь дәсте Баве әз сах ьм» (Йуһʹн. 6:57). Иса бь тʹәмами итʹбарийа хԝә Баве хԝә дьани, у Йаһоԝа бона һʹәԝщед ԝи тʹьме хәм дькьр. Ле йа лапә фәрз әԝ ә, кӧ Йаһоԝа бона һʹәԝщед ԝийә рʹӧһʹани хәм дькьр (Мәт. 4:4).

9. Йаһоԝа ча избат кьр, кӧ бь һʹьзкьрьн бона Иса хәм дькьр?

⁹ Йаһоԝа чаԝа Баве һʹьзкьри, ӧса кьр ԝәки Иса бьзаньбә, кӧ Әԝ бона ԝи хәм дькә (Мәт. 26:53; Йуһʹн. 8:16). Рʹаст ә Йаһоԝа Иса хԝәй нәдькьр жь һʹәму тьштед кӧ дькарьбун зийан бьдана ԝи, ле әԝи али ԝи дькьр, ԝәки щерʹьбандьнада тәйах кә. Иса заньбу, ԝәки әԝ рʹасти чь тәнгасийе жи бе, ԝе ԝәʹдәлу бә (Ибрн. 12:2). Йаһоԝа избат кьр, кӧ әԝ Иса һʹьз дькә, гава дӧайед ԝи дьбьһист, бона ԝи хәм дькьр, ԝи һин дькьр у пьштгьрийа ԝи дькьр (Йуһʹн. 5:20;  8:28). Ньһа ԝәрә әм пебьһʹәсьн, кӧ Баве мәйи әʹзмана ча бь ԝи щурʹәйи бона мә жи хәм дькә.

10. Ль гора Зәбур 66:19, 20, Йаһоԝа ча дьдә кʹьфше кӧ әԝ мә һʹьз дькә?

¹⁰ Йаһоԝа дӧайед мә дьбьһе. (Бьхунә Зәбур 66:19, 20.) Әԝ нахԝазә, ԝәки дӧайед мә бь синор бьн, дәԝсе әԝ мә һелан дькә, ԝәки әм тʹьме ԝирʹа дӧа бькьн (1 Тʹеслн. 5:17). Әм дькарьн Хԝәдайе хԝәрʹа һәртʹьм дӧа бькьн, фьрԛи тʹӧнә әм кʹидәре бьн. Әԝ дӧайед мә пьшт гӧһе хԝәва набежә у тʹьме һазьр ә гӧһ бьдә мә. Чахе әм дьвиньн, ԝәки Йаһоԝа дӧайед мә дьбьһе, әм дьһа незики ԝи дьбьн у ԝи һʹьз дькьн. Зәбурбеж гот: «Әз Хӧдан һʹьз дькьм, Әԝи дәнге заринийа мьн бьһист» (Зәб. 116:1).

11. Йаһоԝа ча щаба дӧайед мә дьдә?

¹¹ Баве мә нә кӧ тʹәне дӧайед мә дьбьһе, ле ӧса жи щаба дӧайед мә дьдә. Йуһʹәннайе шанди дьбежә: «Һәгәр әм тьштәки ль гора хԝәстьна [Хԝәде] же бьхԝазьн, әԝ дәнге мә дьбьһе» (1 Йуһʹн. 5:14, 15). Бәле, Йаһоԝа дьбәкә ӧса щаба дӧайед мә нәдә чаԝа кӧ әм һивийе нә, чьмки әԝ дьһа рʹьнд занә чь бона мә баш ә. Ләма жи щара щаба ԝи на йә, йан жи әԝ дьхԝазә, ԝәки әм һивийе бьн (2 Корн. 12:7-9).

12-13. Баве мәйи әʹзмана чь щурʹәйи бона мә хәм дькә?

¹² Йаһоԝа мә хԝәй дькә у бона мә хәм дькә. Әԝ хԝәха жи тинә сери ԝан тьшта, чь кӧ жь бава дәʹԝа дькә (1 Тимтʹ. 5:8). Әԝ бона һʹәԝщед зарʹед хԝә алийе материалида, хәм дькә. Йаһоԝа нахԝазә әм бәрхԝә кʹәвьн бона хԝарьне, кʹьнщхԝәкьрьне, йан жи бона ве йәке кӧ кʹидәре бьжин (Мәт. 6:32, 33; 7:11). Йаһоԝа чаԝа баве бь һʹьзкьрьн, һәла һе жи хәм кьрийә бона ве йәке, ԝәки ахьрийеда һʹәму тьшт чь кӧ мәрʹа лазьм бә бал мә һәбә.

¹³ Ле йа лапә фәрз, Йаһоԝа бона рʹӧһʹанийа мә хәм дькә. Әԝи бь сайа Хәбәра хԝә әʹйан кьр рʹастийа дәрһәԛа хԝә, нета хԝә, у ӧса жи әʹйан кьр, кӧ әԝи чьрʹа әм әʹфьрандьнә у ахьрийеда ԝе чь бьԛәԝьмә. Хенщи ве йәке, әԝи бь де-баве мә йан жи мәрьвед дьн али мә кьр, ԝәки әм дәрһәԛа ԝи пебьһʹәсьн. Хԝәде бь сайа рʹуспийед щьвате у хушк-бьред рʹӧһʹанида гьһишти, али мә дькә, ԝәки әм достийа хԝә тʹәви ԝи ӧнда нәкьн. Йаһоԝа ӧса жи мә бь сайа щьвата ширәт дькә, кʹидәре кӧ әм тʹәви малбәта хԝәйә рʹӧһʹани, һин дьбьн. Бь ԝи щурʹәйи у диса бь щурʹед дьн, Йаһоԝа мә һәр кәсирʹа һʹьзкьрьна хԝә дьдә кʹьфше (Зәб. 32:8).

14. Чьрʹа Йаһоԝа мә һин дькә, у ча әԝ ве йәке дькә?

¹⁴ Йаһоԝа мә һин дькә. Әм һьмбәри Иса нәԛәданди нә. Ләма жи Баве мә сәва мә һин кә, ԝәʹдәда жь һʹьзкьрьне мә ширәт дькә. Хәбәра ԝи мәрʹа дьбежә: «Хӧдан кʹе һʹьз дькә, ԝи ширәт дькә» (Ибрн. 12:6, 7). Йаһоԝа бь гәләк щурʹа мә ширәт дькә. Мәсәлә, чахе әм Кʹьтеба Пироз дьхуньн, йан жи сәр щьвата гӧһ дьдьнә бәрнаме, әм щара тедәрдьхьн, кӧ чьда әм гәрәке хԝә бьгӧһезьн. Йан жи щара әм аликʹарийе жь рʹуспийа дьстиньн. Фьрԛи тʹӧнә Йаһоԝа чь щурʹәйи мә ширәт дькә, әԝ тʹьме ве йәке дькә, чьмки мә һʹьз дькә (Йерәм. 30:11).

15. Йаһоԝа чь щурʹәйи мә хԝәй дькә?

¹⁵ Йаһоԝа тәнгасийада али мә дькә. Мина баве кӧ ԝәʹде чәтьнайа али зарʹед хԝә дькә, ӧса жи Баве мәйи әʹзмана ԝәʹде тәнгасийа те һәԝара мә. Әԝ пе рʹӧһʹе хԝәйи пироз мә жь зийана рʹӧһʹани хԝәй дькә (Луԛа 11:13). Хенщи ве йәке, чахе әм  дьлтәнг ьн, Йаһоԝа ӧса жи емосийалида мә хԝәй дькә. Мәсәлә, әԝ һевийа пʹьрʹ баш дьдә мә бона ахьрийе. Әԝ һеви али мә дькә кӧ бәр дәрәщед гьран тәйах  кьн. Бир нәкьн ве йәке: Фьрԛи тʹӧнә әм рʹасти чь кӧл-дәрда жи бен, Баве мәйи һʹьзкьри ԝе һʹәму зийанед кӧ мә стандийә, бь тʹәмами ԛәнщ кә. Һʹәму щерʹьбандьнед мә ԝәʹдәлу нә, ле кʹәрәмед кӧ Йаһоԝа бьдә мә, ԝе һʹәта-һʹәтайе бьминьн (2 Корн. 4:16-18).

16. Чь ԛәԝьми чахе Адәм гӧрʹа Баве хԝәйи һʹьзкьри нәкьр?

¹⁶ Әм һʹьзкьрьна Йаһоԝа әшкәрә дьвиньн ве йәкеда, кӧ әԝи чь кьр гава щара пешьн малбәта ԝида йа сәр әʹрде проблем пешда һат. Чахе Адәм гӧрʹа Баве хԝәйи әʹзмана нәкьр, әԝи ида малбәта Йаһоԝада щийе хԝә ӧнда кьр, нә әԝ, нә жи зӧрʹәтед ԝи ида пʹара ве малбәте нибун (Рʹом. 5:12; 7:14). Ле Йаһоԝа бона хатьре зӧрʹәта Адәм, тьштәки мәхсус кьр.

17. Паши нәгӧһдарикьрьна Адәм, Йаһоԝа дәрберʹа чь кьр?

¹⁷ Рʹаст ә Йаһоԝа Адәм щәза кьр, ле әԝи зӧрʹәтед Адәм кӧ һе нәһатьбун дьне, бе һеви нәһишт. Әԝи дәрберʹа соз да, ԝәки мәрьвед гӧһдар ԝе вәгәрʹьн нав малбәта ԝи (Дәстп. 3:15; Рʹом. 8:20, 21). Йаһоԝа ԝе әԝи сози бинә сери сәр һʹиме ԛӧрбана Иса, Кӧрʹе хԝәйи дәлал. Йаһоԝа Кӧрʹе хԝә бона мә бәрва да, у пе ве йәке избат кьр, ԝәки әԝ ча ԛайим мә һʹьз дькә (Йуһʹн. 3:16).

18. Чьрʹа әм дькарьн дӧдьли нәбьн, ԝәки Йаһоԝа диса мә ча зарʹед хԝә һʹәсаб дькә, һәрге жи әм жь ԝи дур кʹәтьнә?

¹⁸ Рʹаст ә әм гӧнәкʹар ьн, ле Йаһоԝа дьхԝазә әм нәфәред малбәта ԝи бьн, у әԝ тʹӧ щар нафькьрә, ԝәки әм бона ԝи баргьран ьн. Дьбәкә әм дьле ԝи дешиньн йан жи һьнә ԝәʹдә жь ԝи дур дькʹәвьн,  ле йәкә тʹьме чʹәʹве Йаһоԝа рʹийа мә йә, кӧ әм вәгәрʹьн бал ԝи. Иса чахе сәрһатийа кӧрʹе ӧндабуйи гьли кьр, да кʹьфше ԝәки Йаһоԝа ча бав зарʹед хԝә чьԛас зәʹф һʹьз дькә (Луԛа 15:11-32). Ве сәрһатийеда бав тʹӧ щар һевийа хԝә ӧнда нәдькьр, кӧ кӧрʹе ԝи ԝе диса вәгәрʹә. Гава кӧрʹе ԝи вәгәрʹийа мал, әԝи бь дьл у щан кӧрʹе хԝә ԛәбул кьр. Һәрге әм жь Йаһоԝа дур кʹәтьнә, ле әм пʹошман дьбьн у тʹобә дькьн, әм гәрәке дӧдьли нәбьн, кӧ Баве мәйи һʹьзкьри һазьр ә у дьхԝазә мә пашда вәгәрʹинә.

19. Йаһоԝа ԝе ча һʹәму зийанед кӧ мә жь Адәм стандийә, бьдә һьлдане?

¹⁹ Баве мә ԝе һʹәму зийанед кӧ мә жь Адәм стандийә, бьдә һьлдане. Паши рʹабәрибуна Адәм, Йаһоԝа сафи кьр, ԝәки 144 000 мәрьва бьжберә кӧ бькә зарʹед хԝә, сәва әԝана сәр әʹзмана тʹәви Кӧрʹе ԝи, ча пʹадша у кʹаһин хьзмәт кьн. Иса у әԝед кӧ тʹәви ԝи сәрԝертийе бькьн, дьнйа тʹәзәда ԝе али мәрьвед гӧһдар бькьн, ԝәки әԝана бьбьнә беԛьсур. Паше, чахе әԝана щерʹьбандьна хьлазийеда амьн бьминьн, Хԝәде ԝе ԝана пе жийина һʹәта-һʹәтайе хәлат кә. Һьнге Баве мә ԝе гәләк әшԛ у ша бә, чьмки ԝе бьвинә кӧ әʹрд бь кӧрʹ у ԛизед ԝийи беԛьсур тʹьжи йә. Әԝ ԝәʹдә ԝе чьԛас мәхсус у хԝәш бә!

20. Йаһоԝа ча нишан дькә, ԝәки әԝ мә гәләк һʹьз дькә, у готара дьнда әме дәрһәԛа чь шеԝьр кьн?

²⁰ Йаһоԝа әшкәрә мәрʹа нишан дькә, кӧ әԝ чьԛас ԛайим мә һʹьз дькә. Әԝ Бавәки лапи баш ә! Әԝ дӧайед мә дьбьһе у мә хԝәй дькә, һьн материалида һьн жи рʹӧһʹанида. Әԝ мә ширәт дькә у али мә дькә. Әԝ ӧса жи ахьрийеда ԝе кʹәрәмед пʹьрʹ баш сәр мәда бьбаринә. Дьле мә гәрм дьбә чахе әм заньн, ԝәки Баве мә Йаһоԝа, мә һʹьз дькә у бона мә хәм дькә! Готара дьнда әме шеԝьр кьн, кӧ әм чаԝа зарʹед ԝи, чь щурʹәйи дькарьн нишан кьн, кӧ әм һʹьзкьрьна ԝи дьшекьриньн.