LONGI DIA 6
Yave wa Se Dieto Otoma Kutuzolanga
“I wau wuwu nufwete sambila: ‘E Se dieto koko zulu.’”—MAT. 6:9.
NKUNGA WA 135 Mbok’a Yave: “Lungalala, e Mwan’ame”
MANA TULONGOKA *
1. Adieyi diavavuanga kwa muntu ozolele mokena yo ntinu a Parasa?
YINDULA vo kuna nz’ankulu ozingilanga, kuna nsi ya Parasa. Ozolele mokena yo ntinu mu kuma kia diambu dimosi. Muna kuma kiaki, wele kuna mbanz’a kimfumu kuna Susani. Kansi, vitila wamokena yo ntinu divavanga vo wavewa o nswa. Avo otezele mokena yo ntinu lembi vewa o nswa, vondwa ovondwa.—Estere 4:11.
2. O Yave aweyi kazolele vo twamokenenanga yandi?
2 Diakiese mu zaya wo vo Yave kena nze ntinu a Parasa ndioyo ko! Yave osundidi o nkuma yo nene ke mu konso ntinu ko. Kana una vo i wau, tulenda mokena yandi konso ntangwa tuzolele. Ozolele vo twamokenanga yandi kondwa kwa wonga. Muna bong’e nona, kana una vo Yave oyikilwanga vo Mvangi Anene, Mpungu-ngolo ye Mfumu, ozolele vo twambokelelanga vo “Se” yovo “Tata.” (Mat. 6:9) Ekwe kiese tuna kiau mu zaya vo Yave ozolele vo twamfinama!
3. Ekuma tulenda bokelela Yave vo “Se” dieto? Nkia mambu tuvovela mu longi diadi?
3 Diambote twabokelelanga Yave vo “Se” kadi yandi i Nto a mioyo mieto. (Nku. 36:9) Wau vo i Se dieto, tuna ye mbebe ya kunlemvokela. Avo tunlemvokele, nsambu zayingi tutambula. (Ayib. 12:9) Zimosi muna nsambu zazi i vua moyo a mvu ya mvu, kiakala kuna zulu yovo ova ntoto. Kana nkutu owau, avo tulemvokele Nzambi tulenda mpe tambula e nsambu. Mu longi diadi tuvovela una Yave kesongelanga vo i Se dieto dianzodi. Tuvovela mpe e kuma tulenda kadila ye ziku vo Yave ke kutubembola nkutu ko. Kansi entete, yambula twabadika e kuma tulenda kadila ye ziku vo Se dieto dia zulu otoma kutuzolanga yo kutulunga-lunga.
YAVE WA SE DIETO OTOMA KUTUZOLANGA
Yave ozolele kala nkundi eto nze una se dianzodi kevangilanga e kikundi yo wan’andi (Tala e tini kia 4)
4. Ekuma dikadilanga diampasi kwa wantu ankaka mu badikila Yave vo Se diau?
4 Nga diampasi kwa ngeye mu badikila Nzambi vo Se diaku? Wau vo Yave osundidi muna mawonso, ediadi difilanga wantu ankaka mu yindula vo ke tuna mfunu ko kwa yandi. Ke bekwikilanga ko vo Nzambi a Mpungu-ngolo otokanenanga e wete dia konso muntu mu yeto. Kansi, Se dieto dianzodi ke zolanga ko vo twakala ye ngindu zazi. Yandi watuvana o moyo, ozolele vo twakala akundi andi. Paulu wa ntumwa wavova e ludi kiaki kwa esi Atenai yo kudikila vo Yave “kavavukidi konso muntu ko muna yeto.” (Mav. 17:24-29) Nzambi ozolele vo konso muntu mu yeto kamokenanga yandi nze una o mwana kemokenenanga yo se diandi dianzodi.
5. Adieyi tulongokele muna nona kia mpangi mosi ankento?
5 Diampasi kikilu dikalanga kwa wantu ankaka mu badikila Yave nze Se diau kadi mase mau ke babasonga zola ko ngatu ngemba. Tala dina kavova mpangi mosi ankento: “Se diame bamina kaka kambaminanga. Muna kuma kiaki, vava yayantika longoka e Bibila, diampasi diakala kwa mono mu finama Se diame dia zulu. Kansi, e ngindu zame zasoba vava yatoma zaya e fu ya Yave.” Nga i wau mpe omonanga? Avo i wau omonanga, kukendaladi ko. Kuna kulanda, ongeye mpe obakula vo Yave i Se disundidi o zola tuna diau.
6. Landila e sono kia Matai 11:27, aweyi Yave kekutusadisilanga mu kumbadikila vo Se dieto dianzodi?
6 O sonekesa e mvovo ye mavangu ma Yesu muna Bibila, i mpila imosi ina Yave kekutusadisilanga mu kumbadikila vo Se dieto dianzodi. (Tanga Matai 11:27.) Wau vo Yesu watoma tanginina e fu ya Se diandi, i dianu kavovela vo: “Konso ona umbwene, omwene mpe o Se.” (Yoa. 14:9) Nkumbu miayingi, Yesu wayikilanga Yave vo Se diandi. Muna bong’e nona, muna nkanda yá mia Nsangu Zambote, Yesu tezo kia nkumbu 165 kasadila o mvovo “Se” yovo “Tata” muna yikila Yave. Ekuma Yesu katoma yikilanga Yave vo Se diandi? Kimosi muna kuma i kwikidisa o wantu vo Yave Se dianzodi kikilu.—Yoa. 17:25, 26.
7. Adieyi tulenda longoka mu kuma kia Yave muna mpila kakadilanga yo Mwan’andi?
7 Tala dina tulenda longoka mu kuma kia Yave muna mpila kakadilanga yo Yesu wa Mwan’andi vava kakala ova ntoto. Yave wawanga e sambu ya Yesu. Kawanga kaka e sambu ya Yesu ko, kansi wavaninanga yo mpe e mvutu. (Yoa. 11:41, 42) Konso ntangwa kanuananga ye mpasi, Yesu wamonanga o zola yo lusadisu lwa Se diandi.—Luka 22:42, 43.
8. Aweyi Yave kalungisilanga e nsatu za Yesu?
8 Yesu wazaya wo vo Se diandi wamvana o moyo ye yawonso kavuanga o mfunu mu kwamanana zinga, kiaki i kuma kavovela vo: “Omono muna Se ikadilanga o moyo.” (Yoa. 6:57) Yesu wabundanga kikilu Se diandi e vuvu. Yave walungisanga e nsatu za kinsuni za Mwan’andi. Edi disundidi o mfunu, Yave walungisa e nsatu za Yesu muna mwanda.—Mat. 4:4.
9. Aweyi Yave kasongela vo Se dianzodi kakala kwa Yesu?
9 Wau vo Yave Se dianzodi, wavanga mawonso kimana Yesu kakala ye ziku vo olenda bunda e vuvu muna lusadisu lwandi. (Mat. 26:53; Yoa. 8:16) Kana una vo Yave katanina Yesu ko muna mambu mawonso mampasi kawanana mau, wansadisa mu zizidila mo. Yesu wazaya wo vo konso mpasi zadi kumbwila, za kolo kiandwelo kwandi. (Ayib. 12:2) Yave wasonga o zola kwandi muna Yesu muna winikina e sambu yandi, lungisa e nsatu zandi, kunlonga yo kunsadisa. (Yoa. 5:20; 8:28) Owau, yambula twavovela una Se dieto dia zulu kekutusongelanga o zola nze una kasongela kwa Yesu.
AWEYI O SE DIETO KEKUTUSONGELANGA O ZOLA?
Se diambote osonganga o zola kwa wan’andi muna (1) kubawinikinanga, (2) lungisanga e nsatu zau, (3) kubalonganga yo (4) kubasadisa. O Se dieto dianzodi mpe i wau kekutulunga-lungilanga (Tala e tini kia 10-15) *
10. Landila e sono kia Nkunga 66:19, 20, aweyi Yave kesongelanga vo zola kekutuzolanga?
10 Yave owanga e sambu yeto. (Tanga Nkunga 66:19, 20.) Yave ozolele vo twasambanga kwa yandi ntangwa zawonso, kadi ke kutukakidilanga ko. (1 Tes. 5:17) Kuna luzitu lwawonso, tulenda samba kwa Nzambi konso ntangwa tuzolele ye konso fulu twina. Otoma sianga e sungididi muna sambu yeto, ke vena ye salu ko kikunkakidilanga mu wá e sambu yeto. Vava tubakulanga vo Yave owanga e sambu yeto, o zola kweto muna yandi kuwokelanga. O ntozi a nkunga wavova vo: “Izolanga Yave kadi owanga e nding’ame.”—Nku. 116:1.
11. Aweyi Yave kevaninanga e mvutu za sambu yeto?
11 O Se dieto ke wanga kaka sambu yeto ko, kansi ovananga mpe e mvutu za sambu yeto. Yoane wa ntumwa watusikidisa vo: “Konso diambu tulomba mun’owu wa luzolo [lwa Nzambi], wá ke kutuwá.” (1 Yoa. 5:14, 15) Kieleka, dilenda kala vo Yave ke vana e mvutu za sambu yeto ko muna mpila ina tuzolele. Wau vo Yave ozeye edi diambote kwa yeto, ezak’e ntangwa e mvutu zandi zilenda kala ve yovo twavingila mu fikolo.—2 Kor. 12:7-9.
12-13. Aweyi o Se dieto dia zulu kelungisilanga e nsatu zeto?
12 Yave olungisanga e nsatu zeto. Mana kevanganga o Yave i mau mpe kevavanga vo mase bavanga. (1 Tim. 5:8) Olungisanga e nsatu za kinsuni za wan’andi. Yave kazolele ko vo twatokananga kwayingi mu kuma kia madia, mvuatu ye nzo. (Mat. 6:32, 33; 7:11) Wau vo Yave i Se dianzodi, ovanga mawonso kimana kalungisa e nsatu zeto kuna sentu.
13 Edi disundidi o mfunu, Yave olungisanga mpe e nsatu zeto za mwanda. Muna Diambu diandi, Yave wasengomona e ludi mu kuma kia yandi kibeni, kani diandi, kuma katuvangila ye mana kevanga kuna sentu. Muna songa vo ovuanga konso muntu mu yeto o mfunu, Yave wasadila mase meto yovo muntu ankaka muna kutusadisa twanzaya. Okwamanananga kutusadisa mu kala akundi andi muna sadila akuluntu ana betoma kutuzolanga ye mpangi zankaka zazikuka muna mwanda. Vana ntandu, Yave okutulonganga muna tukutakanu kumosi ye mpangi zeto. Muna mpila yayi, Yave osonganga vo otokanenanga e wete dia konso muntu mu yeto.—Nku. 32:8.
14. Ekuma Yave kekutulongelanga? Aweyi kevangilanga wo?
14 Yave okutulonganga. Nswaswani yo Yesu, yeto tu wantu alembi lunga. Ezak’e ntangwa, muna kutulonga divavanga vo Se dieto dianzodi katuvana e tumbu. Muna Diambu diandi, okutuvovesanga vo: “Yave otumbanga awana kezolanga.” (Ayib. 12:6, 7) Yave okututumbanga mu mpila zayingi. Muna bong’e nona, tulenda tanga diambu muna Bibila yovo wá longi muna lukutakanu yo bakula vo tufwete soba e ngindu ye mavangu meto. Yovo akuluntu balenda kutuvana lusadisu tuvuidi o mfunu. Kiakala nkia mpila ina Yave kekututumbilanga, ovanganga wo kadi zola ketoma kutuzolanga.—Yer. 30:11.
15. Mu nkia mpila o Yave kekutusadisilanga?
15 Yave okutusadisanga vava tunuananga ye mpasi. Nze una se dianzodi kesadisilanga wan’andi mu ntangw’ampasi, o Se dieto dia zulu mpe okutusadisanga vava tunuananga ye mpasi. Yave osadilanga mwand’andi avelela muna kututanina muna konso diambu dilenda sia e ngwizani eto yo yandi mu vonza. (Luka 11:13) Yave okutusadisanga mpe vava tukendalalanga. Kasikil’owu, okutuvananga e vuvu kiasikila mu kuma kia kusentu. E vuvu kiaki kikutusadisanga mu zizidila e mpasi. Yindula e diambu edi: Kana nkutu nkia mpasi zitubwididi, o Se dieto dianzodi osukisa mambu mawonso mampasi. Konso mpasi tunuananga zau owau, za kolo kiandwelo kwandi. Kansi e nsambu za Yave zikwamanana yakwele mvu.—2 Kor. 4:16-18.
YAVE WA SE DIETO KE KUTUBEMBOLA KO
16. Nkia diambu diavangama vava Adami kakolamena o Se diandi dianzodi?
16 Tumonanga e ziku kia zola kwa Yave muna mpila ina kasingikila e mambu vava Adami kankolamena. Mu kuma kia dina Adami kavanga, oyandi kumosi ye mbongo andi bavidisa e fulu kiau muna kanda dia Yave. (Roma 5:12; 7:14) Kansi, Yave wavanga diambu muna sadisa e mbongo ya Adami.
17. Vava Adami kakolama, adieyi Yave kavanga vana vau?
17 Yave watumba Adami, kansi wavana e vuvu kwa mbongo ya Adami. Vana vau wasia o nsilu vo awana bekunlemvokela bevutuka muna kanda diandi. (Tuku 3:15; Roma 8:20, 21) Yave walungisa o nsilu wau muna vana Yesu wa Mwan’andi anzolwa se kimenga. Muna vana o Mwan’andi muna wete dieto, Yave wasonga vo zola ketoma kutuzolanga.—Yoa. 3:16.
Avo twayambula sadila Yave, kansi owau tuvilukidi o ntima, o Se dieto dianzodi wakubama kena muna kututambula (Tala e tini kia 18)
18. Kana nkutu vo twayambula sadila Yave, ekuma tulenda kadila ye ziku vo Yave ozolele vo twakala muna kanda diandi?
18 Kana una vo tu wantu alembi lunga, Yave ozolele vo twakala muna kanda diandi. Kuna kwa yandi o kutusadisa ke zitu ko. Tulenda kunkendeleka yovo kumvengomoka, kansi Yave ke dimbulanga vuvu ko. Muna songa una Yave ketoma zolelanga o wan’andi, Yesu watá kingana kia mwana wavila. (Luka 15:11-32) O se oyikwanga mu kingana kiaki kadimbula e vuvu ko vo o mwan’andi ovutuka. Vava mwana kavutuka kuna nzo, o se watoma kuntambula. Avo twayambula sadila Yave, kansi owau tuvilukidi o ntima, tulenda kala ye ziku vo o Se dieto dianzodi wakubama kena muna kututambula.
19. Aweyi Yave kefokolwela e mpasi zawonso katwasa Adami?
19 O Se dieto ofokola e mpasi zawonso katwasa Adami. Vava Adami kakolama, Yave wasola wantu 144.000 ova ntoto mu sala se atinu ye anganga yo Mwan’andi. Muna nz’ampa, o Yesu ye awana keyala yau besadisa akwa kwikizi mu kituka se wantu alunga. Awana bevioka muna lutonto lwansuka, Nzambi okubavana moyo a mvu ya mvu. O Se dieto otoma yangalala kikilu vava kemona o ntoto wazala yo wan’andi alunga. Ntangw’a kiese kikilu ikala!
20. Mu nkia mpila Yave kesongelanga vo otoma kutuzolanga? Adieyi tuvovela muna longi dilanda?
20 Kieleka, Yave osonganga vo otoma kutuzolanga. Yandi i Se disundidi. Yave owanga e sambu yeto, olungisanga e nsatu zeto za kinsuni ye za mwanda. Okutulonganga yo kutusadisa. Mambu mambote mpe kevanga mu kuma kieto kuna sentu. Ekwe kiese tuna kiau mu zaya vo o Se dieto okutuzolanga yo kutulunga-lunga! Muna longi dilanda, tuvovela e mpila ina oyeto tulenda songela o zola muna Yave wa Se dieto.
NKUNGA WA 108 Zola kwa Nzambi
^ tini. 5 Nkumbu miayingi tubadikilanga Yave vo Mvangi ye Mfumu eto. Kansi, tuvuidi kuma yayingi mu kumbadikila vo Se dianzodi ona otoma kutulunga-lunganga. Mu longi diadi, tuvovela e kuma yayi. Tulongoka mpe e kuma twinina ye ziku vo Yave ke kutubembola nkutu ko.
^ tini. 59 FWANISWA: Mafoto mayá mama mesonganga se yo mwan’andi: O se owinikinanga o mwan’andi ye sungididi kiawonso; se olungisanga e nsatu za mwan’andi ankento; se olonganga mwan’andi yo se ofiaulwisanga mwan’andi. E kandazi kia koko kwa Yave kina kuna nim’a mafoto, kikutusungamesanga vo Yave mpe i wau kekutulunga-lungilanga.
