ບົດຄວາມສຶກສາທີ 6
ພະເຢໂຫວາເປັນພໍ່ທີ່ຮັກເຮົາຫຼາຍແທ້ໆ
“ພວກເຈົ້າຄວນອະທິດຖານແບບນີ້: ‘ພະເຈົ້າ ພໍ່ຂອງພວກເຮົາ.’”—ມທ. 6:9
ເພງ 135 ພະເຢໂຫວາເຊີນຢ່າງອົບອຸ່ນວ່າລູກຂອງເຮົາຈົ່ງມີປັນຍາເຖີດ
ໃຈຄວາມສຳຄັນ *
1. ເຈົ້າຕ້ອງເຮັດຫຍັງເພື່ອຈະເຂົ້າໄປລົມກັບກະສັດຂອງເປເຣເຊ?
ລອງນຶກພາບວ່າເຈົ້າມີຊີວິດຢູ່ໃນປະເທດເປເຣເຊປະມານ 2.500 ປີແລ້ວ. ເຈົ້າຢາກລົມກັບກະສັດກ່ຽວກັບບັນຫາສຳຄັນເລື່ອງໜຶ່ງ ເຈົ້າຈຶ່ງເດີນທາງໄປເມືອງຊຶເຊເຊິ່ງເປັນເມືອງທີ່ກະສັດຢູ່. ແຕ່ເພື່ອທີ່ຈະເຂົ້າໄປລົມກັບກະສັດໄດ້ ເຈົ້າກໍຕ້ອງຂໍອະນຸຍາດຈາກກະສັດກ່ອນ ເພາະຖ້າບໍ່ເຮັດແບບນັ້ນເຈົ້າອາດຖືກປະຫານຊີວິດ!—ເອເຊທ. 4:11
2. ພະເຢໂຫວາຢາກໃຫ້ເຮົາຮູ້ສຶກແນວໃດເມື່ອລົມກັບພະອົງ?
2 ເຮົາຮູ້ສຶກຂອບໃຈພະເຢໂຫວາຫຼາຍແທ້ໆທີ່ພະອົງບໍ່ເປັນຄືກັບກະສັດເປເຣເຊ! ພະເຢໂຫວາມີລິດອຳນາດຫຼາຍກວ່າຜູ້ປົກຄອງທີ່ເປັນມະນຸດ ແຕ່ພະອົງກໍຍິນດີຮັບຟັງເຮົາຕະຫຼອດເວລາ. ພະອົງຢາກໃຫ້ເຮົາຮູ້ສຶກສະດວກໃຈທີ່ຈະລົມກັບພະອົງ. ຕົວຢ່າງ: ເຖິງວ່າພະເຢໂຫວາຈະເປັນຜູ້ສ້າງອົງຍິ່ງໃຫຍ່ ຜູ້ທີ່ມີລິດເດດສູງສຸດ ແລະເປັນຜູ້ປົກຄອງທີ່ຍິ່ງໃຫຍ່ທີ່ສຸດ ແຕ່ພະອົງກໍຢາກໃຫ້ເຮົາເອີ້ນພະອົງວ່າ “ພໍ່” ເຊິ່ງເປັນຄຳທີ່ເຮັດໃຫ້ຮູ້ສຶກເຖິງຄວາມຮັກ ຄວາມອົບອຸ່ນ ແລະຄວາມໃກ້ຊິດ. (ມທ. 6:9) ເຮົາຮູ້ສຶກດີໃຈແທ້ໆທີ່ພະເຢໂຫວາຢາກໃຫ້ເຮົາສະໜິດກັບພະອົງ!
3. ເປັນຫຍັງເຮົາສາມາດເອີ້ນພະເຢໂຫວາວ່າ “ພໍ່” ແລະເຮົາຈະພິຈາລະນາຫຍັງໃນບົດຄວາມນີ້?
3 ຖືກແລ້ວທີ່ຈະເອີ້ນພະເຢໂຫວາວ່າ “ພໍ່” ເພາະພະອົງເປັນແຫຼ່ງກຳເນີດຂອງຊີວິດເຮົາ. (ເພງ. 36:9) ເນື່ອງຈາກພະອົງເປັນພໍ່ຂອງເຮົາ ດັ່ງນັ້ນ ເຮົາທີ່ເປັນລູກຈຶ່ງມີໜ້າທີ່ຕ້ອງເຊື່ອຟັງພະອົງ. ເມື່ອເຮົາເຮັດຕາມທີ່ພະອົງບອກ ເຮົາກໍຈະໄດ້ຮັບພອນທີ່ດີເລີດຫຼາຍຢ່າງ. (ຮຣ. 12:9) ໜຶ່ງໃນພອນເຫຼົ່ານັ້ນກໍຄືຊີວິດຕະຫຼອດໄປບໍ່ວ່າຈະຢູ່ໃນສະຫວັນຫຼືຢູ່ໃນໂລກ ແລະເຮົາກໍຍັງໄດ້ຮັບປະໂຫຍດໃນຕອນນີ້ຄືກັນ. ໃນບົດຄວາມນີ້ເຮົາຈະເບິ່ງວ່າພະເຢໂຫວາສະແດງໃຫ້ເຫັນແນວໃດວ່າພະອົງເປັນພໍ່ທີ່ຮັກແລະເປັນຫ່ວງເຮົາຫຼາຍໃນຕອນນີ້ ແລະເຮົາຈະໝັ້ນໃຈ ໄດ້ແນວໃດວ່າພະອົງຈະບໍ່ຖິ້ມເຮົາໃນອະນາຄົດ. ທຳອິດໃຫ້ເຮົາມາເບິ່ງວ່າເປັນຫຍັງເຮົາໝັ້ນໃຈໄດ້ວ່າພະເຢໂຫວາພໍ່ເທິງສະຫວັນຮັກແລະສົນໃຈເຮົາແທ້ໆ.
ພະເຢໂຫວາເປັນພໍ່ທີ່ຮັກແລະສົນໃຈເຮົາ
ພະເຢໂຫວາຢາກສະໜິດກັບເຮົາຄືກັບພໍ່ທີ່ຮັກທີ່ຢາກສະໜິດກັບລູກ (ເບິ່ງຂໍ້ 4)
4. ເປັນຫຍັງບາງຄົນຮູ້ສຶກຍາກທີ່ຈະເບິ່ງວ່າພະເຢໂຫວາເປັນຄືກັບພໍ່?
4 ເຈົ້າຮູ້ສຶກວ່າຍາກບໍທີ່ຈະຄິດວ່າພະເຢໂຫວາເປັນພໍ່? ບາງຄົນຮູ້ສຶກວ່າພະເຢໂຫວາຍິ່ງໃຫຍ່ໂພດ ເຮົາຄືຊິບໍ່ສຳຄັນຕໍ່ພະອົງດອກ. ພວກເຂົາບໍ່ຢາກເຊື່ອວ່າພະເຈົ້າທີ່ຍິ່ງໃຫຍ່ສູງສຸດຈະສົນໃຈພວກເຂົາເປັນສ່ວນຕົວ. ແຕ່ພະເຢໂຫວາບໍ່ຢາກໃຫ້ເຮົາຮູ້ສຶກແບບນັ້ນ. ພະອົງໃຫ້ຊີວິດເຮົາແລະຢາກໃຫ້ເຮົາສະໜິດກັບພະອົງ. ຫຼັງຈາກທີ່ໂປໂລເວົ້າຄວາມຈິງກ່ຽວກັບພະເຢໂຫວາແລ້ວ ລາວກໍອະທິບາຍໃຫ້ຜູ້ຟັງທີ່ຢູ່ເມືອງອາແຖນວ່າພະເຢໂຫວາ “ບໍ່ໄດ້ຢູ່ໄກຈາກພວກເຮົາແຕ່ລະຄົນເລີຍ.” (ກຈກ. 17:24-29) ພະເຈົ້າຢາກໃຫ້ເຮົາແຕ່ລະຄົນລົມກັບພະອົງຄືກັບລູກລົມກັບພໍ່ແມ່ທີ່ຮັກແລະເປັນຫ່ວງລາວ.
5. ເຮົາໄດ້ບົດຮຽນຫຍັງຈາກປະສົບການຂອງພີ່ນ້ອງຍິງຄົນໜຶ່ງ?
5 ບາງຄົນອາດຮູ້ສຶກຍາກທີ່ຈະເບິ່ງວ່າພະເຢໂຫວາເປັນພໍ່ ເພາະພໍ່ແທ້ໆຂອງພວກເຂົາບໍ່ຄ່ອຍສະແດງຄວາມຮັກຫຼືບໍ່ເຄີຍສະແດງເລີຍ ແລະບໍ່ສົນໃຈພວກເຂົາ. ພີ່ນ້ອງຍິງຄົນໜຶ່ງບອກວ່າ: “ພໍ່ຂ້ອຍເປັນຄົນທີ່ມັກປ້ອຍດ່າ. ເມື່ອຂ້ອຍເລີ່ມສຶກສາຄຳພີໄບເບິນ ຂ້ອຍຮູ້ສຶກຍາກທີ່ຈະເຂົ້າໃຈວ່າພະເຢໂຫວາພໍ່ໃນສະຫວັນຮັກຂ້ອຍ. ແຕ່ຫຼັງຈາກທີ່ໄດ້ຮູ້ຈັກພະເຢໂຫວາດີແລ້ວ ຂ້ອຍກໍເລີຍເຂົ້າໃຈວ່າພະເຢໂຫວາເປັນພໍ່ທີ່ຮັກຂ້ອຍແທ້ໆ.” ເຈົ້າຮູ້ສຶກແບບນີ້ບໍ? ຖ້າແມ່ນ ຂໍໃຫ້ເຈົ້າໝັ້ນໃຈວ່າເຈົ້າກໍສາມາດເບິ່ງພະເຢໂຫວາເປັນຄືກັບພໍ່ທີ່ດີທີ່ສຸດໄດ້ຄືກັນ.
6. ຕາມມັດທາຍ 11:27 ພະເຢໂຫວາຊ່ວຍເຮົາໃຫ້ເບິ່ງພະອົງເປັນຄືກັບພໍ່ໂດຍທາງໃດ?
6 ວິທີໜຶ່ງທີ່ພະເຢໂຫວາຊ່ວຍເຮົາໃຫ້ເບິ່ງພະອົງວ່າເປັນພໍ່ກໍໂດຍທາງຄຳເວົ້າແລະການກະທຳຂອງພະເຢຊູທີ່ບັນທຶກໃນຄຳພີໄບເບິນ. (ອ່ານມັດທາຍ 11:27) ພະເຢຊູຮຽນແບບບຸກຄະລິກແລະນິດໄສໃຈຄໍຂອງພະເຢໂຫວາພໍ່ຂອງເພິ່ນໄດ້ຢ່າງສົມບູນແບບ ດັ່ງທີ່ເພິ່ນບອກວ່າ: “ຜູ້ທີ່ໄດ້ເຫັນຂ້ອຍກໍໄດ້ເຫັນພະເຈົ້າຜູ້ເປັນພໍ່.” (ຢຮ. 14:9) ພະເຢຊູມັກເວົ້າເລື້ອຍໆວ່າພະເຢໂຫວາເປັນພໍ່. ໃນປຶ້ມຂ່າວດີ 4 ເຫຼັ້ມ ພະເຢຊູມັກເອີ້ນພະເຢໂຫວາວ່າ “ພໍ່” ເກືອບ 200 ເທື່ອ. ເປັນຫຍັງພະເຢຊູຈຶ່ງເອີ້ນພະເຢໂຫວາວ່າພໍ່ຫຼາຍເທື່ອແທ້? ເຫດຜົນໜຶ່ງກໍຄື ເພື່ອໃຫ້ຄົນເຮົາໝັ້ນໃຈວ່າພະເຢໂຫວາເປັນພໍ່ທີ່ຮັກເຮົາ.—ຢຮ. 17:25, 26
7. ເຮົາໄດ້ຮຽນຮູ້ຫຍັງຈາກວິທີທີ່ພະເຢໂຫວາປະຕິບັດຕໍ່ພະເຢຊູ?
7 ຂໍໃຫ້ເຮົາມາເບິ່ງວິທີທີ່ພະເຢໂຫວາປະຕິບັດກັບພະເຢຊູລູກຊາຍຂອງພະອົງ. ພະເຢໂຫວາຟັງຄຳອະທິດຖານຂອງພະເຢຊູສະເໝີ. ພະອົງບໍ່ພຽງແຕ່ຟັງ ແຕ່ພະອົງຍັງໄດ້ຕອບຄຳອະທິດຖານນຳ. (ຢຮ. 11:41, 42) ບໍ່ວ່າພະເຢຊູຈະປະສົບຄວາມຍາກລຳບາກແບບໃດ ເພິ່ນກໍຮູ້ສຶກວ່າພະເຢໂຫວາເປັນພໍ່ທີ່ຮັກແລະຊ່ວຍເຫຼືອເພິ່ນສະເໝີ.—ລກ. 22:42, 43
8. ພະເຢໂຫວາເບິ່ງແຍງພະເຢຊູໃຫ້ມີສິ່ງຈຳເປັນຫຍັງແດ່?
8 ພະເຢຊູບອກວ່າ: “ຂ້ອຍມີຊີວິດຢູ່ໄດ້ຍ້ອນພະອົງ.” ເພິ່ນຮູ້ວ່າພະເຢໂຫວາພໍ່ຂອງເພິ່ນເປັນຜູ້ໃຫ້ຊີວິດແລະເປັນຜູ້ຄ້ຳຈູນຊີວິດເພິ່ນ. (ຢຮ. 6:57) ພະເຢຊູໄວ້ວາງໃຈພະເຢໂຫວາແທ້ໆວ່າພະອົງຈະເບິ່ງແຍງເພິ່ນໃຫ້ມີສິ່ງຈຳເປັນເພື່ອຈະມີຊີວິດຢູ່ໄດ້ ແລະສິ່ງສຳຄັນທີ່ສຸດຄືເພິ່ນເຊື່ອວ່າພະເຢໂຫວາຈະຊ່ວຍເພິ່ນໃຫ້ຮັກສາຄວາມສັດຊື່.—ມທ. 4:4
9. ພະເຢໂຫວາພິສູດໃຫ້ເຫັນແນວໃດວ່າພະອົງເປັນພໍ່ທີ່ຮັກແລະສົນໃຈພະເຢຊູ?
9 ເນື່ອງຈາກພະເຢໂຫວາເປັນພໍ່ທີ່ມີຄວາມຮັກ ພະອົງໄດ້ເຮັດໃຫ້ພະເຢຊູໝັ້ນໃຈວ່າພະອົງຈະຊ່ວຍເຫຼືອເພິ່ນ. (ມທ. 26:53; ຢຮ. 8:16) ເຖິງວ່າພະເຢໂຫວາບໍ່ໄດ້ປົກປ້ອງພະເຢຊູຈາກບັນຫາທຸກຢ່າງ ແຕ່ພະອົງກໍຊ່ວຍເພິ່ນໃຫ້ອົດທົນໄດ້. ພະເຢຊູຮູ້ວ່າສິ່ງບໍ່ດີຕ່າງໆທີ່ເພິ່ນປະສົບ ຈະຢູ່ພຽງຊົ່ວຄາວ. (ຮຣ. 12:2) ພະເຢໂຫວາພິສູດໃຫ້ເຫັນວ່າຮັກພະເຢຊູໂດຍຟັງເພິ່ນ ເບິ່ງແຍງເພິ່ນໃຫ້ມີສິ່ງຈຳເປັນ ຝຶກສອນເພິ່ນ ແລະຊ່ວຍເຫຼືອເພິ່ນ. (ຢຮ. 5:20; 8:28) ຕອນນີ້ໃຫ້ເຮົາມາເບິ່ງວ່າພະເຢໂຫວາພໍ່ໃນສະຫວັນສົນໃຈເຮົາຄ້າຍຄືກັນແນວໃດ.
ພະເຢໂຫວາສະແດງແນວໃດວ່າເປັນພໍ່ທີ່ສົນໃຈເຮົາ?
ພໍ່ທີ່ຮັກລູກຈະ (1) ຟັງລູກ (2) ຈັດໃຫ້ລູກມີສິ່ງຈຳເປັນ (3) ຝຶກສອນ (4) ປົກປ້ອງລູກ. ພະເຢໂຫວາພໍ່ຂອງເຮົາໃນສະຫວັນກໍຮັກແລະເປັນຫ່ວງເຮົາໃນແບບທີ່ຄ້າຍກັນ (ເບິ່ງຂໍ້ 10-15) *
10. ຕາມຄຳເພງ 66:19, 20 ພະເຢໂຫວາສະແດງໃຫ້ເຫັນແນວໃດວ່າພະອົງຮັກເຮົາ?
10 ພະເຢໂຫວາຟັງຄຳອະທິດຖານຂອງເຮົາ. (ອ່ານຄຳເພງ 66:19, 20) ພະອົງບໍ່ໄດ້ຈຳກັດວ່າເຮົາຕ້ອງອະທິດຖານຫຼາຍໜ້ອຍສ່ຳໃດ ແຕ່ພະອົງຢາກໃຫ້ເຮົາອະທິດຖານເຖິງພະອົງເລື້ອຍໆ. (1 ທຊ. 5:17) ເຮົາສາມາດອະທິດຖານເຖິງພະເຢໂຫວາຕອນໃດກໍໄດ້ຫຼືຢູ່ໃສກໍໄດ້. ພະອົງບໍ່ເຄີຍຫຍຸ້ງຫຼາຍເກີນໄປຈົນບໍ່ໄດ້ຟັງຄຳອະທິດຖານຂອງເຮົາ ແຕ່ພະອົງຕັ້ງໃຈຟັງເຮົາສະເໝີ. ເມື່ອເຮົາຮູ້ວ່າພະເຢໂຫວາຟັງຄຳອະທິດຖານຂອງເຮົາ ເຮົາກໍຈະຮັກພະອົງຫຼາຍຂຶ້ນ. ຜູ້ຂຽນຄຳເພງບອກວ່າ: “ຂ້ອຍໄດ້ຮັກພະເຢໂຫວາເຫດວ່າພະອົງໄດ້ຟັງສຽງປາກຂອງຂ້ອຍ.”—ເພງ. 116:1
11. ເມື່ອເຮົາອະທິດຖານ ພະເຢໂຫວາເຮັດແນວໃດ?
11 ພະເຢໂຫວາພໍ່ໃນສະຫວັນບໍ່ພຽງແຕ່ຟັງເຮົາອະທິດຖານ ແຕ່ພະອົງຍັງຕອບເຮົານຳ. ອັກຄະສາວົກໂຢຮັນຮັບຮອງເລື່ອງນີ້ວ່າ: “ຖ້າພວກເຮົາຂໍສິ່ງໃດກໍຕາມທີ່ສອດຄ່ອງກັບຄວາມຕ້ອງການຂອງພະອົງ ພະອົງຈະຟັງພວກເຮົາ.” (1 ຢຮ. 5:14, 15) ພະເຢໂຫວາອາດບໍ່ໄດ້ຕອບຄຳອະທິດຖານໃນແບບທີ່ເຮົາຄິດໄວ້ ແຕ່ເຮົາໝັ້ນໃຈວ່າພະເຢໂຫວາຮູ້ວ່າສິ່ງໃດດີທີ່ສຸດສຳລັບເຮົາ ດັ່ງນັ້ນ ບາງເທື່ອພະອົງອາດຈະຕອບວ່າບໍ່ ຫຼືບໍ່ກໍຢາກໃຫ້ເຮົາລໍຖ້າກ່ອນ.—2 ກຣ. 12:7-9
12-13. ພະເຢໂຫວາໄດ້ຈັດກຽມໃຫ້ເຮົາມີສິ່ງຈຳເປັນໂດຍວິທີໃດແດ່?
12 ພະເຢໂຫວາໃຫ້ສິ່ງຈຳເປັນກັບເຮົາ. ພະອົງຢາກໃຫ້ຜູ້ເປັນພໍ່ເບິ່ງແຍງຄົນໃນຄອບຄົວ ແລະພະອົງກໍເຮັດແບບນັ້ນນຳ. (1 ຕມ. 5:8) ພະອົງເບິ່ງແຍງລູກຂອງພະອົງໃຫ້ມີສິ່ງຈຳເປັນສຳລັບການໃຊ້ຊີວິດ. ພະອົງບໍ່ຢາກໃຫ້ເຮົາຕ້ອງກັງວົນກັບອາຫານ ເຄື່ອງນຸ່ງ ຫຼືທີ່ຢູ່ອາໄສ. (ມທ. 6:32, 33; 7:11) ຍ້ອນພະເຢໂຫວາເປັນພໍ່ທີ່ມີຄວາມຮັກ ພະອົງຈຶ່ງໄດ້ຈັດກຽມໃຫ້ເຮົາມີສິ່ງຈຳເປັນເພື່ອອະນາຄົດຂອງເຮົາ.
13 ທີ່ສຳຄັນທີ່ສຸດ ພະເຢໂຫວາຈັດກຽມໃຫ້ເຮົາມີສິ່ງຈຳເປັນຕ່າງໆເພື່ອຈະມີສາຍສຳພັນທີ່ດີກັບພະອົງ. ໂດຍທາງຄຳພີໄບເບິນ ພະອົງໄດ້ບອກໃຫ້ເຮົາຮູ້ຄວາມຈິງກ່ຽວກັບພະອົງ ຈຸດປະສົງຂອງພະອົງ ເປັນຫຍັງພະອົງຈຶ່ງສ້າງເຮົາ ແລະອະນາຄົດຈະເປັນແນວໃດ. ພະອົງສະແດງໃຫ້ເຮົາເຫັນວ່າສົນໃຈເຮົາຕອນທີ່ຮຽນຄວາມຈິງໃໝ່ໆໂດຍໃຫ້ພໍ່ແມ່ແລະຄົນອື່ນໆສອນເຮົາໃຫ້ຮູ້ຈັກພະອົງ. ຕໍ່ມາເຮົາໄດ້ຮັບຄວາມຊ່ວຍເຫຼືອຈາກຜູ້ດູແລໃນປະຊາຄົມ ແລະພີ່ນ້ອງຊາຍຍິງຄົນອື່ນໆທີ່ອາວຸໂສດ້ານຄວາມເຊື່ອ. ນອກຈາກນັ້ນ ພະອົງຍັງສອນເຮົາຜ່ານທາງການປະຊຸມປະຈຳປະຊາຄົມເຊິ່ງເຮົາໄດ້ຮຽນໄປພ້ອມກັບພີ່ນ້ອງຮ່ວມຄວາມເຊື່ອທີ່ເປັນຄືກັບຄອບຄົວ. ໂດຍວິທີເຫຼົ່ານີ້ແລະວິທີອື່ນໆ ພະເຢໂຫວາສະແດງໃຫ້ເຫັນວ່າພະອົງເປັນພໍ່ທີ່ສົນໃຈເຮົາໝົດທຸກຄົນຫຼາຍແທ້ໆ.—ເພງ. 32:8
14. ເປັນຫຍັງພະເຢໂຫວາຈຶ່ງຝຶກສອນເຮົາ ແລະພະອົງຝຶກສອນເຮົາແນວໃດແດ່?
14 ພະເຢໂຫວາຝຶກສອນເຮົາ. ເຮົາບໍ່ຄືກັບພະເຢຊູເພາະເຮົາເປັນມະນຸດບໍ່ສົມບູນແບບ. ດັ່ງນັ້ນ ເພື່ອຝຶກສອນເຮົາ ພະເຢໂຫວາໄດ້ສັ່ງສອນແລະແກ້ໄຂເຮົາເມື່ອຈຳເປັນ. ຄຳພີໄບເບິນບອກວ່າ: “ພະເຢໂຫວາຮັກຜູ້ໃດ ພະອົງກໍສັ່ງສອນຜູ້ນັ້ນ.” (ຮຣ. 12:6, 7) ພະເຢໂຫວາສັ່ງສອນເຮົາໃນຫຼາຍວິທີ. ຕົວຢ່າງເຊັ່ນ: ສິ່ງທີ່ເຮົາອ່ານໃນຄຳພີໄບເບິນຫຼືໄດ້ຍິນໃນການປະຊຸມອາດເຮັດໃຫ້ເຮົາສຳນຶກວ່າຕ້ອງປ່ຽນຄວາມຄິດແລະປັບປຸງຕົວເອງ. ບາງເທື່ອສິ່ງທີ່ເຮົາຕ້ອງແກ້ໄຂມາຈາກຜູ້ດູແລໃນປະຊາຄົມ. ບໍ່ວ່າພະເຢໂຫວາຈະສັ່ງສອນເຮົາໂດຍວິທີໃດ ພະອົງກໍເຮັດດ້ວຍຄວາມຮັກສະເໝີ.—ຢເຣ. 30:11
15. ພະເຢໂຫວາຊ່ວຍເຮົາແລະປົກປ້ອງເຮົາແນວໃດ?
15 ພະເຢໂຫວາຊ່ວຍເຮົາເມື່ອປະສົບບັນຫາ. ຄືກັບພໍ່ທີ່ໄດ້ຊ່ວຍລູກໃນເວລາທີ່ຍາກລຳບາກ ພະເຢໂຫວາພໍ່ໃນສະຫວັນກໍຈະຊ່ວຍເຮົາເມື່ອເຮົາປະສົບບັນຫາ. ພະອົງໃຊ້ພະລັງບໍລິສຸດປົກປ້ອງເຮົາຈາກສິ່ງໃດກໍຕາມທີ່ຈະມາທຳລາຍສາຍສຳພັນຂອງເຮົາກັບພະອົງ. (ລກ. 11:13) ນອກຈາກນັ້ນ ພະເຢໂຫວາຍັງຊ່ວຍເຮົາຕອນທີ່ເຮົາຮູ້ສຶກອຸກໃຈແລະທໍ້ໃຈນຳ. ຕົວຢ່າງ: ພະອົງໃຫ້ຄວາມຫວັງທີ່ສົດໃສກັບເຮົາ. ຄວາມຫວັງໃນອະນາຄົດນີ້ຈະຊ່ວຍເຮົາໃຫ້ອົດທົນກັບຄວາມຍາກລຳບາກຕ່າງໆໄດ້. ລອງຄິດເບິ່ງ ບໍ່ວ່າຈະມີເລື່ອງທີ່ບໍ່ດີຫຍັງເກີດຂຶ້ນກັບເຮົາ ພະເຢໂຫວາກໍຈະແກ້ໄຂເລື່ອງທີ່ບໍ່ດີທັງໝົດ. ບັນຫາຕ່າງໆທີ່ເຮົາປະສົບຈະມີຢູ່ຊົ່ວຄາວ ແຕ່ພອນຕ່າງໆທີ່ພະເຢໂຫວາໃຫ້ຈະມີຢູ່ຕະຫຼອດໄປ.—2 ກຣ. 4:16-18
ພະເຢໂຫວາພໍ່ຂອງເຮົາຈະບໍ່ປະຖິ້ມເຮົາຈັກເທື່ອ
16. ເກີດຫຍັງຂຶ້ນເມື່ອອາດາມບໍ່ເຊື່ອຟັງພະເຢໂຫວາ?
16 ເຮົາເຫັນຄວາມຮັກທີ່ພະເຢໂຫວາມີຕໍ່ເຮົາເມື່ອຄິດເຖິງສິ່ງທີ່ພະອົງເຮັດຕອນທີ່ອາດາມບໍ່ເຊື່ອຟັງ. ເມື່ອອາດາມບໍ່ເຊື່ອຟັງພະເຢໂຫວາພໍ່ໃນສະຫວັນ ລາວກໍເຮັດໃຫ້ຕົວເອງກັບລູກຫຼານສູນເສຍສິດທິພິເສດທີ່ຈະໄດ້ຢູ່ໃນຄອບຄົວທີ່ມີຄວາມສຸກຂອງພະເຢໂຫວາ. (ຣມ. 5:12; 7:14) ແຕ່ພະເຢໂຫວາກໍໄດ້ເຮັດບາງຢ່າງເພື່ອຊ່ວຍລູກຫຼານຂອງອາດາມ.
17. ຫຼັງຈາກອາດາມກະບົດ ພະເຢໂຫວາໄດ້ເຮັດຫຍັງທັນທີ?
17 ພະເຢໂຫວາລົງໂທດອາດາມ ແຕ່ພະອົງກໍບໍ່ໄດ້ຖິ້ມລູກຫຼານຂອງລາວໃຫ້ຢູ່ແບບບໍ່ມີຄວາມຫວັງ. ຫຼັງຈາກທີ່ອາດາມກະບົດ ພະເຢໂຫວາກໍສັນຍາທັນທີວ່າຄົນທີ່ເຊື່ອຟັງຈະໄດ້ກັບມາຢູ່ໃນຄອບຄົວຂອງພະອົງອີກ. (ຕົ້ນ. 3:15; ຣມ. 8:20, 21) ພະເຢໂຫວາໄດ້ເຮັດຕາມຄຳສັນຍານັ້ນໂດຍສົ່ງພະເຢຊູລູກຊາຍສຸດທີ່ຮັກຂອງພະອົງມາ ເປັນຄ່າໄຖ່. ການທີ່ພະເຢໂຫວາເຮັດແບບນີ້ສະແດງໃຫ້ເຫັນວ່າພະອົງຮັກເຮົາຫຼາຍແທ້ໆ.—ຢຮ. 3:16
ຖ້າເຮົາເຄີຍອອກຈາກທາງຂອງພະເຢໂຫວາ ແຕ່ຕອນນີ້ໄດ້ກັບໃຈແລ້ວ ພະເຢໂຫວາພໍ່ທີ່ຮັກເຮົາກໍເຕັມໃຈແລະພ້ອມສະເໝີທີ່ຈະຕ້ອນຮັບເຮົາກັບມາ. (ເບິ່ງຂໍ້ 18)
18. ເປັນຫຍັງເຮົາໝັ້ນໃຈໄດ້ວ່າພະເຢໂຫວາຢາກໃຫ້ເຮົາເປັນລູກຂອງພະອົງເຖິງວ່າເຮົາຈະອອກຈາກທາງຂອງພະອົງ?
18 ເຖິງວ່າເຮົາຈະເປັນມະນຸດບໍ່ສົມບູນແບບ ແຕ່ພະເຢໂຫວາກໍຢາກໃຫ້ເຮົາຢູ່ໃນຄອບຄົວຂອງພະອົງ ແລະພະອົງບໍ່ເຄີຍເບິ່ງວ່າເຮົາເປັນພາລະ. ເຮົາອາດຈະອອກຈາກທາງຂອງພະເຢໂຫວາ ໄລຍະໜຶ່ງເຊິ່ງເຮັດໃຫ້ພະອົງຜິດຫວັງ ແຕ່ພະອົງກໍບໍ່ເຄີຍໝົດຫວັງໃນໂຕເຮົາ. ພະເຢຊູເຮັດໃຫ້ເຫັນວ່າພະເຢໂຫວາເປັນພໍ່ທີ່ຮັກແລະເປັນຫ່ວງລູກແທ້ໆໂດຍເລົ່າເລື່ອງລູກທີ່ຫຼົງຫາຍໄປ. (ລກ. 15:11-32) ໃນເລື່ອງນັ້ນ ພໍ່ຫວັງສະເໝີວ່າມື້ໜຶ່ງລູກຊາຍຈະກັບມາ. ເມື່ອລູກກັບມາເຮືອນແລ້ວ ພໍ່ກໍຕ້ອນຮັບລາວດ້ວຍຄວາມດີໃຈແຮງ. ຖ້າເຮົາເຄີຍອອກຈາກທາງຂອງພະເຢໂຫວາ ແຕ່ຕອນນີ້ໄດ້ກັບໃຈແລ້ວ ເຮົາກໍໝັ້ນໃຈໄດ້ວ່າພະເຢໂຫວາພໍ່ທີ່ຮັກເຕັມໃຈແລະພ້ອມສະເໝີທີ່ຈະຕ້ອນຮັບເຮົາກັບມາ.
19. ພະເຢໂຫວາເຮັດແນວໃດເພື່ອແກ້ໄຂຄວາມເສຍຫາຍທີ່ເກີດຈາກອາດາມ?
19 ພະເຢໂຫວາຈະແກ້ໄຂຄວາມເສຍຫາຍທັງໝົດທີ່ເກີດຈາກອາດາມ. ຫຼັງຈາກທີ່ລາວກະບົດ ພະເຢໂຫວາໄດ້ຕັດສິນໃຈເລືອກເອົາ 144.000 ຄົນໃຫ້ເປັນປະໂລຫິດແລະກະສັດໃນສະຫວັນເພື່ອປົກຄອງຮ່ວມກັບພະເຢຊູລູກຊາຍຂອງພະອົງ. ໃນໂລກໃໝ່ ພະເຢຊູແລະຄົນທີ່ຮ່ວມປົກຄອງກັບເພິ່ນຈະຊ່ວຍມະນຸດທີ່ເຊື່ອຟັງໃຫ້ເປັນມະນຸດທີ່ສົມບູນແບບ. ຫຼັງຈາກການທົດສອບການເຊື່ອຟັງຄັ້ງສຸດທ້າຍ ພະເຈົ້າຈະໃຫ້ຄົນທີ່ເຊື່ອຟັງໄດ້ຊີວິດຕະຫຼອດໄປ. ແລ້ວຕອນນັ້ນພະອົງຈະມີຄວາມສຸກຫຼາຍທີ່ເຫັນລູກຊາຍລູກສາວເປັນມະນຸດທີ່ສົມບູນແບບເຕັມໂລກນີ້. ນັ້ນຄືຊິເປັນເວລາທີ່ມີຄວາມສຸກຫຼາຍແທ້ໆ!
20. ພະເຢໂຫວາສະແດງໃຫ້ເຫັນແນວໃດວ່າຮັກເຮົາຫຼາຍແທ້ໆ ແລະເຮົາຈະພິຈາລະນາຫຍັງໃນບົດຄວາມຕໍ່ໄປ?
20 ພະເຢໂຫວາໄດ້ສະແດງວ່າຮັກເຮົາແທ້ໆ. ພະອົງເປັນພໍ່ທີ່ດີທີ່ສຸດ ພະອົງຟັງຄຳອະທິດຖານຂອງເຮົາ ແລະຈັດໃຫ້ເຮົາມີສິ່ງຈຳເປັນທາງຮ່າງກາຍແລະທາງຄວາມເຊື່ອ. ພະອົງຝຶກສອນແລະຊ່ວຍເຫຼືອເຮົາ ແລະພະອົງຍັງໄດ້ຈັດກຽມພອນຢ່າງຫຼວງຫຼາຍໄວ້ໃຫ້ເຮົາໃນອະນາຄົດ. ນີ້ເຮັດໃຫ້ເຮົາຮູ້ສຶກອົບອຸ່ນໃຈອີ່ຫຼີທີ່ຮູ້ວ່າພະເຢໂຫວາຮັກແລະສົນໃຈເຮົາແທ້ໆ! ໃນບົດຄວາມຕໍ່ໄປ ເຮົາຈະພິຈາລະນາວ່າເຮົາຈະສະແດງຄວາມຂອບໃຈສຳລັບຄວາມຮັກຂອງພະອົງໄດ້ແນວໃດ.
ເພງ 108 ຄວາມຮັກທີ່ໝັ້ນຄົງຂອງພະເຈົ້າ
^ ຂໍ້ 5 ສ່ວນຫຼາຍເຮົາມີແຕ່ຄິດວ່າພະເຢໂຫວາເປັນຜູ້ສ້າງແລະເປັນຜູ້ປົກຄອງທີ່ມີລິດອຳນາດທີ່ຍິ່ງໃຫຍ່ທີ່ສຸດເທົ່ານັ້ນ. ແຕ່ເຮົາມີຫຼາຍເຫດຜົນທີ່ຈະເບິ່ງວ່າພະເຢໂຫວາເປັນພໍ່ທີ່ຮັກແລະສົນໃຈເຮົາ. ບົດຄວາມນີ້ເຮົາຈະພິຈາລະນາເຫດຜົນເຫຼົ່ານັ້ນ ແລະເຮົາຍັງຈະມາເບິ່ງວ່າເປັນຫຍັງເຮົາສາມາດໝັ້ນໃຈໄດ້ວ່າພະເຢໂຫວາຈະບໍ່ປະຖິ້ມເຮົາ.
^ ຂໍ້ 59 ຄຳອະທິບາຍຮູບພາບ: ທັງສີ່ຮູບນີ້ແມ່ນຮູບຂອງພໍ່ກັບລູກ: ພໍ່ຕັ້ງໃຈຟັງລູກເວົ້າ ພໍ່ຈັດສິ່ງຈຳເປັນໃຫ້ລູກສາວ ພໍ່ກຳລັງຝຶກສອນລູກຊາຍ ແລະພໍ່ໃຫ້ກຳລັງໃຈລູກຊາຍ. ຮູບມືຂອງພະເຢໂຫວາທີ່ຢູ່ທາງຫຼັງຂອງສີ່ເຫດການນີ້ເຕືອນເຮົາວ່າ ພະເຢໂຫວາຮັກແລະເປັນຫ່ວງເຮົາໃນແບບທີ່ຄ້າຍກັນ.