TSHIENA-BUALU TSHIA KULONGA 6
Yehowa Tatu wetu mmutunange bikole
“Nudi ne bua kusambila mushindu eu: ‘Tatu wetu udi mu diulu.’”—MAT. 6:9.
MUSAMBU WA 135 Yehowa udi ukusengelela ne: “Muananyi, ikala ne meji”
KADIOSHA *
1. Ntshinyi tshivua muntu ne bua kuenza kumpala kua kuya kudi mukalenge wa Pelasa?
FUANYIKIJABI ne: uvua musombele mu Pelasa kukadi bidimu bitue ku 2 500. Udi musue kuya mu Shushana, tshimenga tshia bukalenge, bua kuambila mukalenge bualu. Bua kufika muaba udiye, anu yeye mukuanyishile. Wewe muye kudiye kayi mukubikile, badi mua kukushipa!—Ese. 4:11.
2. Mbimpe tumvue bishi patudi tuyukila ne Yehowa?
2 Tudi ne disanka dia bungi bua mudi Yehowa kayi bu mukalenge wa Pelasa to! Yehowa mmupite bamfumu ba pa buloba apa kule ne kule, ne mmusue bua tuikale tumuambila malu dîba dionso. Mmusue bua tudiumvue badilekelele patudi tuyukila nende. Tshilejilu, nansha mudi Yehowa ne mianzu minene bu mudi Mufuki Munene, Wa Bukole Buonso, ne Mukalenge Mutambe Bunene, patudi tuyukila nende mmusue bua tuikale tumubikila ne: “Tatu,” anu mutu bana babikila tatuabu. (Mat. 6:9) Bidi bitulenga ku muoyo bikole bua mudi Yehowa musue bua tumumone bu tatu wetu mushindu eu!
3. Bua tshinyi tudi tubikila Yehowa ne: “Tatu”? Tshiena-bualu etshi netshiakule bua bualu kayi?
3 Bidi bikumbana kubikila Yehowa ne: “Tatu” bualu yeye ke Mpokolo wa muoyo wetu. (Mis. 36:9) Bu mudiye Tatu wetu, buetu bujitu nkumutumikila. Tuetu tuenza malu adiye utulomba bua kuenza, netupete mabenesha a katshia. (Eb. 12:9) Mu mabenesha au mudi muoyo wa tshiendelele, mu diulu anyi pa buloba. Tudi kabidi ne masanka lelu. Tshiena-bualu etshi netshileje mudi Yehowa wenza malu bu Tatu wa dinanga lelu ne bua tshinyi tudi mua kutuishibua ne: kakutulekela mu matuku atshilualua nansha kakese. Kadi tuanji kumona bua tshinyi tudi ne bua kuikala ne dishindika dia ne: Tatu wetu wa mu diulu mmutunange bikole ne udi ututabalela.
YEHOWA NTATU WA DINANGA UDI UTUTABALELA
Yehowa mmusue bua kuikala netu mu malanda mimpe anu mutu tatu wa dinanga musue bua kuikala mu malanda mimpe ne muanende (Tangila tshikoso 4)
4. Bua tshinyi bitu bikolela bamue bantu bua kumona Yehowa bu Tatu wabu?
4 Bitu bikukolela bua kuitaba ne: Nzambi nTatu webe anyi? Kudi bantu batu badimona bu tupasu ku mêsu kua Yehowa. Kabena bitaba ne: Nzambi Wa Bukole Buonso utu utabalela muntu yonso wa kudibu to. Kadi Tatu wetu wa dinanga ki mmusue bua tumone malu mushindu au to. Mmutupeshe muoyo ne mmusue bua tudie nende malanda. Mupostolo Paulo mumane kuambila bantu bavua bamuteleja mu Atena bualu ebu, wakabumvuija ne: Yehowa ‘kena kule ne yonso wa kutudi to.’ (Bien. 17:24-29) Nzambi mmusue bua yonso wa kutudi ayukile nende anu mutu muana udiyila kudi muledi wende wa dinanga udi umutabalela bua kuyukila nende.
5. Bualu bua muanetu wa bakaji kampanda budi butulongesha tshinyi?
5 Bidi mua kukolela bantu bakuabu bua kumona Yehowa bu Tatuabu bualu batatuabu kabavua babaleje dinanga dia nsongo anyi kabavua mene babanange to. Muanetu kampanda wa bakaji wakamba ne: “Tatuanyi uvua ne bulaku bua dikema. Pangakatuadija kulonga Bible, bivua binkolela bua kuitaba ne: ndi ne Tatu wa mu diulu. Kadi pangakafika ku dimanya Yehowa, ngakabanga kumona malu mushindu mukuabu.” Utu umona pebe malu mushindu au anyi? Biobi nanku, ikala mutuishibue ne: wewe pebe neufike ku dimona Yehowa bu Tatu udi mupite batatu bonso.
6. Bilondeshile Matayi 11:27, ngumue mushindu kayi udi Yehowa mutuambuluishe bua kumumona bu Tatu wetu wa dinanga?
6 Umue mushindu udi Yehowa mutuambuluishe bua kumumona bu Tatu wetu wa dinanga nkufundisha mêyi a Yezu ne bienzedi biende mu Bible. (Bala Matayi 11:27.) Yezu uvua mufuane Tatuende mu kalu ne kalu, kumufikishabi too ne ku diamba ne: “Muntu yonso udi mummone mmumone kabidi Tatu.” (Yone 14:9) Yezu uvua ne tshibidilu tshia kuakula bua malu adi Yehowa wenza bua kuleja mudiye Tatu wetu. Mu Evanjeliyo inayi nkayayi, Yezu mmubikile Yehowa ne: “Tatu” misangu mitue ku 165. Bua tshinyi Yezu uvua mumubikile ne: Tatu misangu mipite bungi nanku? Bumue bua ku malu avuaye muenzele nanku mbua kufikisha bantu ku ditaba ne: Yehowa nTatu wa dinanga.—Yone 17:25, 26.
7. Mushindu uvua Yehowa wenzela Muanende malu udi utulongesha tshinyi?
7 Tumonayi tshitudi tulongela ku mushindu uvua Yehowa wenzela Muanende Yezu malu. Yehowa uvua anu uteleja masambila a Yezu. Kavua anu uateleja patupu to, uvua kabidi uandamuna. (Yone 11:41, 42) Yezu wakatuilanana ne ntatu ya bungi; nansha nanku, uvua umona muvua Tatuende mumunange ne umukuatshisha.—Luka 22:42, 43.
8. Mmu mishindu kayi ivua Yehowa ukumbajila Yezu majinga ende?
8 Pavua Yezu muambe ne: ‘Ndi ne muoyo bua bualu bua Tatu,’ uvua mumanye bimpe ne: Tatuende uvua Mpokolo wa muoyo wende ne Mumukuatshishi. (Yone 6:57) Yezu uvua weyemena Tatuende ne muoyo mujima, ne Yehowa pende uvua umukumbajila majinga ende a ku mubidi. Bualu bua mushinga mukole buvua ne: Yehowa uvua umutabalela bua ashale ne lulamatu.—Mat. 4:4.
9. Mmunyi muvua Yehowa muleje Yezu ne: uvua Tatuende wa dinanga uvua umutabalela?
9 Bu mudi Yehowa Tatu wa dinanga, uvua wenza muende muonso bua Yezu amanye ne: Tatuende uvua umukuatshisha. (Mat. 26:53; Yone 8:16) Nansha muvua Yehowa kayi ukuba Yezu bua njiwu kayimufikidi, uvua umuambuluisha bua kunanukila mu ntatu. Yezu uvua mujadike ne: bualu bubi buonso buvua mua kumufikila buvua bua tshitupa tshîpi. (Eb. 12:2) Yehowa uvua uteleja Yezu, umukumbajila majinga ende, umulongesha, ne umukuatshisha bua kuleja muvuaye umutabalela. (Yone 5:20; 8:28) Tumonayi mpindieu mudi Tatu wetu wa mu diulu ututabalela mu mishindu ya muomumue.
MUDI TATU WETU WA DINANGA UTUTABALELA
Tatu wa dinanga udi 1) uteleja bana bende, 2) ubakumbajila majinga abu, 3) ubalongesha, ne 4) ubakuba. Tatu wetu wa mu diulu wa dinanga udi ututabalela mu mishindu ya muomumue (Tangila tshikoso 10-15) *
10. Bilondeshile Misambu 66:19, 20, mmunyi mudi Yehowa uleja ne: mmutunange?
10 Yehowa udi uteleja masambila etu. (Bala Misambu 66:19, 20.) Ki mmusue tuikale tumusambila tutshintshikila to; udi utulomba bua tuikale tumusambila pa tshibidilu. (1 Tes. 5:17) Tudi mua kusambila Nzambi wetu ne kanemu konso dîba dionso, nansha tuetu muaba kayi. Katu ne bia bungi bia kuenza bidi mua kumupangisha bua kututeleja to; matshi ende atu anu kutudi. Patudi tujingulula ne: Yehowa utu uteleja masambila etu, bidi bitusaka bua kumunanga bikole. Mufundi kampanda wa misambu wakamba ne: “Ndi munange Yehowa bualu udi uteleja dîyi dianyi.”—Mis. 116:1.
11. Mmunyi mudi Yehowa wandamuna masambila etu?
11 Tatu wetu udi uteleja masambila etu, uandamuna kabidi. Mupostolo Yone udi utujadikila ne: “Tshintu tshionso tshitudi tulomba [Nzambi] bilondeshile disua diende, udi utumvua.” (1 Yone 5:14, 15) Bushuwa, Yehowa kena pamuapa mua kuandamuna masambila etu mutudi batekemene to. Mmumanye tshidi tshikengela kutuenzela menemene, nunku imue misangu udi mua kumona ne: kabiena bikengela kutuandamuna to, anyi udi mua kujinga bua tuanji kuindila.—2 Kol. 12:7-9.
12-13. Mmu mishindu kayi idi Tatu wetu wa mu diulu utukumbajila majinga etu?
12 Yehowa udi utukumbajila majinga etu. Udi wenza tshidiye mulombe batatu bonso bua kuenza. (1 Tim. 5:8) Udi upesha bana bende bintu bidibu nabi dijinga. Ki musue bua tusamishe mutu bua biakudia, bua bia kuvuala, anyi bua muaba wa kulala to. (Mat. 6:32, 33; 7:11) Bu mudi Yehowa Tatu wa dinanga, mmulongolole too ne bua kutukumbajila majinga etu onso a matuku atshilualua.
13 Bualu bua mushinga mukole budi ne: Yehowa udi utukumbajila majinga etu a mu nyuma. Mu Dîyi diende, udi utuleja tshidiye menemene, malu adiye mulongolole bua kuenza, tshivuaye mutufukile, ne tshienzeka kumpala eku. Wakaleja muvuaye utabalela yonso wa kutudi pavuaye mutulongeshe bua kufika ku dimumanya ku diambuluisha dia baledi betu anyi dia muntu mukuabu. Utshidi utuambuluisha kabidi ku butuangaji bua bakulu badi batunange ne bena Kristo netu bakuabu badi bakole mu nyuma. Yehowa udi kabidi utulongesha mu bisangilu mutudi tulonga pamue ne dîku dietu dia mu nyuma. Mu mishindu eyi ne mu mikuabu, Yehowa udi uleja mudiye Tatu udi utabalela yonso wa kutudi.—Mis. 32:8.
14. Bua tshinyi Yehowa udi utulongesha? Mmunyi mutuye utulongesha?
14 Yehowa udi utulongesha. Bu mutudi katuyi bu Yezu, tudi bapange bupuangane. Nanku Tatu wetu wa dinanga udi utunyoka bua kutulongesha padibi bikengedibua. Dîyi diende didi dituvuluija ne: “Yehowa udi unyoka bantu badiye munange.” (Eb. 12:6, 7) Yehowa utu utunyoka mu mishindu ya bungi. Tshilejilu, bualu kampanda butudi babale mu Bible anyi bumvue mu bisangilu budi mua kutululamija. Peshi pamuapa diambuluisha ditudi nadi dijinga didi difumina kudi bakulu. Nansha Yehowa mutupeshe dinyoka dia mushindu kayi, dinanga ke ditu anu dimusaka bua kuenza nanku.—Yel. 30:11.
15. Mmu mishindu kayi idi Yehowa utukuba?
15 Yehowa udi utukuatshisha mu ntatu. Anu mutu tatu wa dinanga ukuatshisha muanende mu bikondo bikole, Tatu wetu wa mu diulu utu utukuatshisha petu mu ntatu. Udi utukuba ne nyuma wende muimpe ku tshintu tshionso tshidi mua kutunyangila nende malanda. (Luka 11:13) Yehowa utu kabidi utuambuluisha bua katuteketshi mu mikolo. Tshilejilu, mmutupeshe ditekemena dia matuku atshilualua dia katshia. Ditekemena edi didi dituambuluisha bua kunanukila mu ntatu. Elabi meji bua bualu ebu: Nansha tuetu bapete njiwu ya mushindu kayi, Tatu wetu wa dinanga neatuondope, mubidi wetu upingana anu muawu ne kale. Ntatu itudi tupeta nansha yoyi ya bishi, nya tshitupa tshîpi; kadi mabenesha adi Yehowa utupesha nga tshiendelele.—2 Kol. 4:16-18.
TATU WETU KAKUTULEKELA NANSHA
16. Ntshinyi tshiakenzeka pakatombokela Adama Tatu wende wa dinanga?
16 Tshivua Yehowa muenze bua bualu bua kumpala buvua buenzeke mu dîku diende dia pa buloba ntshijadiki tshia ne: mmutunange. Pavua Adama mutombokele Tatuende wa mu diulu, wakajimija muaba wende mu dîku dia Yehowa dia disanka, kuwujimijilaye kabidi ndelanganyi yende. (Lomo 5:12; 7:14) Kadi Yehowa wakenza bualu kampanda bua kuambuluisha ndelanganyi eyi.
17. Ntshinyi tshivua Yehowa muenze musangu umue pavua Adama mumutombokele?
17 Yehowa wakanyoka Adama, kadi kakashiya ndelanganyi ya Adama kayiyi ne ditekemena to. Wakalaya musangu umue ne: bantu bavua bamutumikila bavua ne bua kupingana mu dîku diende. (Gen. 3:15; Lomo 8:20, 21) Yehowa wakalongolola bualu ebu ku diambuluisha dia mulambu wa Muanende Yezu wa kutupikula nawu. Pakafilaye Muanende bua bualu buetu, wakaleja ne: mmutunange bikole.—Yone 3:16.
Tuetu basesuke mu njila wa Nzambi kadi banyingalale, Yehowa Tatu wetu wa dinanga mmudiakaje bua kutuakidila ne udi ne muoyo wa kuenza nanku (Tangila tshikoso 18)
18. Bua tshinyi mbimpe tuikale batuishibue ne: Yehowa mmusue bua tuikale bana bende nansha tuetu basesuke mu njila wende?
18 Nansha mutudi bapange bupuangane, Yehowa mmusue bua tuikale mu dîku diende, ne katu utumona bu bujitu nansha. Tudi mua kumuela mâyi ku makasa anyi kusesuka mu njila wende, kadi utu anu utekemena ne: netuakajilule nende malanda. Yezu wakafila tshilejilu tshia muana mujimine bua kuleja mudi Yehowa Tatu udi mutunange bikole. (Luka 15:11-32) Tatu wa mu tshilejilu etshi uvua anu mutekemene ne: muanende nealukile. Pakapingana muana ku nzubu, tatuende wakamuakidila ne disanka dia bungi. Tuikale batuishibue ne: tuetu basesuke mu njila wa Yehowa kadi banyingalale, Tatu wetu wa dinanga mmudiakaje bua kutuakidila ne udi ne muoyo wa kuenza nanku.
19. Mmunyi muajikija Yehowa malu mabi onso adi Adama mukebeshe?
19 Tatu wetu neajikije malu mabi onso adi Adama mukebeshe. Adama mumane kutomboka, Yehowa wakalongolola bua kusungula bantu 144 000 mu ba pa buloba bua kukokesha bu bakalenge ne bakuidi mu diulu pamue ne Muanende. Yezu ne bakokeshi nende aba nebambuluishe bantu badi batumikila Nzambi bua kulua bapuangane mu bulongolodi bupiabupia. Pikalabu bakadi babatete bua musangu wa ndekelu bua kumanya ni badi batumikila, Nzambi neabapeshe muoyo wa tshiendelele. Dîba adi, Tatu wetu neikale ne disanka dia kumona buloba buwule tente ne bana bende bapuangane. Tshikondo atshi netshikale tshimpe tshia dikema!
20. Mmu mishindu kayi idi Yehowa muleje ne: mmutunange bikole? Tshiena-bualu tshialonda netshiakule bua tshinyi?
20 Yehowa mmuleje mudiye mutunange bikole. Yeye ke Tatu udi mupite batatu bonso. Udi uteleja masambila etu ne utukumbajila majinga etu a ku mubidi ne a mu nyuma. Udi utulongesha ne utukuatshisha. Mmutulamine kabidi mabenesha mimpe a dikema. Bidi bitusankisha bikole bua kumanya ne: Tatu wetu mmutunange ne udi ututabalela! Tshiena-bualu tshialonda netshiakule bua mishindu itudi tuetu bana bende mua kuleja ne: tudi ne dianyisha bua mudiye mutunange.
MUSAMBU WA 108 Dinanga dia Nzambi dia lulamatu
^ tshik. 5 Misangu ya bungi, tutu tumona Yehowa bu Mufuki wetu ne Mukalenge wetu Mutambe Bunene. Kadi tudi ne malu adi atusaka bua kumumona bu Tatu wa dinanga udi ututabalela. Tshiena-bualu etshi netshiakule bua malu au. Netumone kabidi bua tshinyi tudi mua kuikala batuishibue ne: Yehowa kakutulekela to.
^ tshik. 59 DIUMVUIJA DIA TSHIMFUANYI: Tshimfuanyi tshionso tshia ku bimfuanyi binayi tshidi tshileja tatu ne muanende: tatu uteleja muanende bimpe, tatu ukumbajila muanende majinga ende, tatu ulongesha muanende, ne tatu ukankamija muanende. Tshianza tshia Yehowa tshidi tshizola panyima pa bimfuanyi tshidi tshituvuluija mudi Yehowa ututabalela mu mishindu ya muomumue.
