1. Vyuma muka atelelelenga kulinga mutu numba ahanjike namwangana waPeleja?

ACHISHINGANYEKENU muli nakutwama muPeleja, kafwe myaka 2,500 kunyima. Jino muli nakusaka kulweza mwangana chihande chimwe, kaha namukatuka nakuya kunganda kuShushane. Oloze mwatela kulomba lisesa numba muhanjike namwangana, nge chiku navamijiha.—Ese. 4:11.

2. Yehova asaka twivwenganga ngachilihi hakuhanjika nenyi?

² Twawahilila chikuma mwomwo Yehova kapwa ngana muze apwile mwangana waPelejako. Numba tuhu atwama nangolo chikuma kuhambakana kala muka-kuyula wahano hamavu, oloze tunahase kushimutwila nenyi kala lwola. Asaka tukasunukenga kumuchima hakuhanjika nenyi. Chakutalilaho, numba tuhu apwa Tengi Wamunene, Wangolo Josena, kaha nawa Mwata Wakulitulaho, oloze atulweza tumusanyikenga ngwetu, “Setu.” (Mateu 6:9) Ocho kuwaha kana tweji kwivwanga hakutachikiza ngwetu Yehova asaka tumumonenga kupwa chisemi wazangi enu vayaya!

3. Mwomwo ika twatela kusanyika Yehova ngwetu “Tata,” kaha vyuma muka natushimutwila muchihande chino?

³ Tunahase kusanyika Yehova ngwetu “Tata” mwomwo ikiye atuhana kuyoya. (Samu 36:9) Shikaho, hakuwana nge apwa Setu, twatela kumwononokanga. Nge natulinga ngocho, kaha mwatulingila vyuma vyamwaza vyavivulu. (Hepe. 12:9) Mwatuhana vyuma vyamwaza oholyapwa nakukatuhana nawa kuyoya chahaya myaka yosena kulutwe. Chino chihande nachishimutwila vyuma eji kulinganga Yehova hakupwa Setu, navyuma vyatela  kutulingisa tufwelele ngwetu mwatwalangaho lika kutuzakama. Tuputukenu jino kushimutwila havyuma vyatela kutulingisa tufwelele ngwetu Setu wamwilu atuzanga nakutuzakama.

4. Mwomwo ika cheji kukaluhwilanga vatu vamwe kumona Yehova kupwa hiSevo?

⁴ Uno cheji kumikaluhwilanga kumumona Kalunga kupwa hiSenu tahi? Vatu vamwe vanahase kulimona kupwa vakukuminamo mwomwo Yehova apwa wamunene chikuma. Veji kushinganyekanga ngwavo Kalunga Wangolo Josena keshi kuhasa kuvazakamako. Oloze Setu wazangi kasaka tushinganyekenga ngochoko. Atuhana kuyoya, kaha nawa asaka tutunge usoko naikiye. Kaposetolo Paulu ashindakanyine vishina vyosenevi vivali, kufumaho alwezele vaka-Atene ngwenyi Yehova “[katwama] kwakusuku nayetu tuvosena mutu himutuko.” (Vili. 17:24-29) Kalunga asaka mutu himutu ahanjikenga kuli ikiye ngana muze mwana eji kupwanga wakukasunuka kuhanjika kuli chisemi chenyi uze amuzanga nakumuzakama.

5. Vyuma muka tunalinangula kumujimbu wandumbwetu umwe wapwevo?

⁵ Vatu veka nawa veji kuhonanga kumona Yehova kupwa hiSevo mwomwo visemi javo kavavasolwelele zangiko. Ndumbwetu umwe wapwevo ambile ngwenyi: “Tata apwilenga nahanjikiso yayipi chikuma. Kahomu ngwaputukile kulinangula Mbimbiliya changukaluhwilile chikuma kupandama kuli Yehova. Oloze omu ngwamutachikijile kanawa hakiko vyuma vyosena vyalumukile.” Kutala omu mukiko mweji kwivwanga nayenu tahi? Nge mukiko, kaha tachikizenu ngwenu nayenu munahase kumona Yehova kupwa hichisemi chenu.

6. Kweseka nachisoneka chaMateu 11:27, jila yimwe muka atukafwilamo Yehova mangana tumumonenga kupwa hichisemi wazangi?

⁶ Jila yimwe atukafwilamo Yehova tumumonenga kupwa chisemi chetu wazangi shina hakusoneka vyuma vize alingilenga Yesu navize ahanjikilenga. (Tangenu Mateu 11:27.) Vyuma vyosena alingilenga Yesu vyasolwele omwo apwa Ise, kaha vikiko ahanjikilile ngwenyi: “Weshowo nangumono ami namono naTata nawa.” (Yowa. 14:9) Kakavulu Yesu avulukilenga Yehova ngwenyi apwa Ise. MuMikanda yaMujimbu Wamwaza yiwana, Yesu azachishile lizu “Tata” mapapa akuzomboka 100. Mwomwo ika Yesu avulukililenga Yehova ngwenyi Tata mapapa kakavulu ngana? Chuma chimwe chamulingishile shina asakile vatu vakunyuke ngwavo Yehova apwa chisemi wazangi.—Yowa. 17:25, 26.

7. Chishina muka natulinangula kuli Yehova hakumona omwo azakaminyinengamo Mwanenyi?

⁷ Chishina muka natulinangula hakumona omwo Yehova azakaminyinengamo Mwanenyi Yesu? Lwola lwosena Yehova evwilililenga kukulomba chaYesu, nakumukumbulula nawa. (Yowa. 11:41, 42) Yesu amwene ngwenyi ise atwalileho kumuzanga nakumukafwa chamokomoko navyeseko amwenenga.—Luka 22:42, 43.

8. Uno Yehova azakaminenga ngachilihi Yesu?

⁸ Yesu ejivile ngwenyi Ise ikiye amuhanyine kuyoya, nakumuhana nawa vyuma vyasakiwilenga mukuyoya, kahechi chikiko chamulingishile ahanjike ngwenyi: “Ngwayoya mwomwo yaTata.” (Yowa. 6:57) Afwelelele chikuma Ise, ngocho Yehova amuhanyine vyuma vyasakiwilenga mukuyoya. Chachinenenyi, amuzakaminenga kushipilitu.—Mateu 4:4.

9. Yehova asolwele ngachilihi ngwenyi azangile Yesu nakumuzakama?

⁹ Hakuwana nge Yehova apwa chisemi wazangi, ngocho asakilenga Mwanenyi amone  ngwenyi Ise apwilenga nakumukafwa. (Mateu 26:53; Yowa. 8:16) Numba tuhu Yehova kakingilenga Yesu kuvyeseko vyosenako, oloze amukafwilenga omike. Yesu atachikijile ngwenyi kala ukalu uze apwile nakumona wapwile wakashimbu kakandende kaha. (Hepe. 12:2) Yehova asolwele hatoma ngwenyi azakamine Yesu, hakumwivwilila, nakumuhana vyuma vyasakiwilenga, nakumunangula, nakumukafwa. (Yowa. 5:20; 8:28) Tushimutwilenu omwo Yehova eji kutuzakaminangamo nayetu mujijila jojimwe.

10. Kweseka nachisoneka chaSamu 66:19, 20, Yehova eji kusololanga ngachilihi ngwenyi atuzanga?

¹⁰ Yehova eji kwivwililanga kukulomba chetu. (Tangenu Samu 66:19, 20.) Yehova asaka tumulombenga lwola lwosena. (Teso. 1, 5:17) Tunahase kumulomba kala lwola, kaha nawa kweshokwo tuli. Lwola lwosena apwa wakulizanga kwivwilila kukulomba chetu. Kutachikiza ngwetu Yehova eji kukumbululanga kulomba chetu, cheji kutukafwanga tupandame kuli ikiye. Muka-kwimba jisamu ambile ngwenyi: “Yehova ngwamuzanga mwomwo eji kwivwanga lizu lyami.”—Samu 116:1.

11. Yehova eji kukumbululanga ngachilihi kulomba chetu?

¹¹ Setu eji kwivwililanga kukulomba chetu nakutukumbulula. Kaposetolo Yowano atufwelelesa ngwenyi: “Vyeshovyo natumulomba [Kalunga] kweseka namwaya muchima wenyi, mwatwivwa.” (Yowa. 1, 5:14, 15) Shimbu jimwe Yehova keshi kukumbulula kulomba chetu kweseka nomwo tuli nakusakako. Hakuwana nge atachikiza kanawa vyuma vize navitunganyalisa, shikaho nahase kukana kutulingila vyuma tunamulombo, chipwe kukatulingilavyo halwola lweka.—Koli. 2, 12:7-9.

12-13. Uno Yehova eji kutuzakamanga mujijila muka?

¹² Yehova eji kutuhananga vyuma vyasakiwa mukuyoya. Eji kulinganga vyuma vyosena vize alweza visemi vamalunga valingenga. (Chimo. 1, 5:8) Eji kuzakamanga vana venyi hakuvahana vyuma vyakulikafwa navyo mukuyoya. Kasaka tulizakaminenga havyakulya, navyakuvwala nazuvo yakusavalako. (Mateu 6:32, 33; 7:11) Hakuwana nge apwa chisemi wazangi, alongesa vyuma mangana tuvosena tukapwenga navyuma vyakulikafwa navyo mukuyoya kulutwe.

¹³ Chachinenenyi, Yehova eji kutuzakamanga kushipilitu. Mazu enyi eji kutulwezanga omwo apwa navyuma ajina, novyo ahakilako kuyoya navyuma navikasoloka kulutwe. Yehova atuzakamine hakutunangula muchano wenyi kuhichila muli visemi jetu chipwe muli mutu uze atunangwile tumutachikize. Kaha oholyapwa ali nakutukafwa kuhichila muli tulama muchikungulwilo navandumbwetu veka vakuhya kushipilitu. Eji kutunangulanga nawa omu tweji kupwanga kukukunguluka chachikungulwilo hamwe navandumbwetu. Yehova eji kutusolwelanga zangi mujijila kaneji najijila jeka nawa.—Samu 32:8.

14. Mwomwo ika Yehova eji kutuzangamishilanga, kaha eji kulinganga ngachilihi ngocho?

¹⁴ Yehova eji kutunangulanga. Yesu apwile wakukupuka, oloze etu katwakupukako. Shikaho, Yehova eji kutunangulanga kuhichila mukutuzangamisa kachi nge chili nakusakiwa kulinga ngocho. Mazu enyi atulweza ngwawo: “Vaze azanga Yehova eji kuvazangamisanga.” (Hepe. 12:6, 7) Eji kutuzangamisa mujijila jajivulu. Chakutalilaho, vyuma natutanga muMazu enyi chipwe vize natulinangula kukukunguluka vinahase kutwolola. Lwola lweka nawa nahase kuzachisa tulama muchikungulwilo. Kala jila mwazachisa Yehova hakutuzangamisa, twatela kutachikiza ngwetu zangi ikiko yeji kumulingisanga atuzangamise.—Yele. 30:11.

15. Yehova eji kutukafwanga ngachilihi?

 ¹⁵ Yehova eji kutukafwanga tumike muvyeseko. Setu wamwilu eji kutukafwanga nge tuli muvyeseko, ngana muze chisemi eji kukafwanga vana venyi mulwola lwalukalu. Eji kutuhananga shipilitu yenyi mangana yitukafwe tukinge usoko wetu naikiye. (Luka 11:13) Yehova eji kutukafwanga nawa nge tunahombo. Chakutalilaho, atuhana lutalililo luze lweji kutukafwanga tumike muvyeseko. Chamokomoko navyuma vyosena vyavipi vize navitusolokela, twatela kwanukanga ngwetu Setu mwakafumisako ukalu wetu wosena. Shikaho, vyeseko vyosena vize tuli nakumona, vinapu vyakatando kakandende kaha, oloze vyuma eji kutulingilanga Yehova vyahaya myaka yosena.—Koli. 2, 4:16-18.

16. Chuma muka chasolokele omu Alama alikangile kuli Ise wazangi Yehova?

¹⁶ Kushinganyeka hachuma alingile Yehova omu vatu valingile shili, cheji kutulingisanga tumone chikupu ngwetu Yehova atuzanga. Omu Alama alikangile kuli Ise wamwilu, ikiye navana venyi kavapwile cheka mutanga yaYehovako. (Loma 5:12; 7:14) Oloze Yehova awahishile vyuma mangana akafwe vana vaAlama.

17. Vyuma muka alingile Yehova hanyima yakulikanga chaAlama?

¹⁷ Yehova azangamishile Alama oloze ajinyine kukafwa vana vaAlama vakapwe nalutalililo. Ngocho ashikile vatu vakwononoka ngwenyi navakakinduluka mutanga yenyi. (Kupu. 3:15; Loma 8:20, 21) Yehova ahanyine ndando yakusokola yaMwanenyi kupwa hijila yize mwakakindulwishilamo vana vaAlama mutanga yenyi. Kusuula Mwanenyi kwiza nakutufwila chasolola hatoma nge atuzanga chikuma.—Yowa. 3:16.

18. Chuma muka nachitukafwa tufwelele ngwetu Yehova nahase kututambula cheka mutanga yenyi nge tunaseuka?

¹⁸ Numba tuhu katwakupukako, oloze Yehova  asaka tupwenga mutanga yenyi, kaha kachimona kupwa hichiteli kutukafwako. Shimbu jimwe tunahase kuseuka nakufuma mutanga kana, oloze Yehova atalilila ngwenyi natukinduluka kuli ikiye. Yesu ahanjikile chifwanyisa chamwana wakujimbala hakulumbununa omu Yehova atuzakama. (Luka 15:11-32) Chisemi walunga uze avulukile Yesu muchifwanyisa kana atwalileho lika kufwelela ngwenyi mwanenyi mwakakinduluka. Kahomu mwanenyi akindulukile, ise amutambwile namuchima wenyi wosena. Shikaho kachi nge nayetu tunaseuka nakufuma mutanga yaYehova, oloze tunapihilila nakwalumuka, kaha twatela kufwelela ngwetu Setu wazangi Yehova mwatukafwa nakututambula cheka namuchima wenyi wosena.

19. Uno Yehova mwakakumisa ngachilihi ukalu wosena uze weza mwomwo yakulikanga chaAlama?

¹⁹ Setu Yehova mwakafumisako ukalu wosena uze weza mwomwo yakulikanga chaAlama. Kufuma hakulikanga chaAlama, Yehova ajinyine kusakula vatu 144,000 vakapwe vamyangana navapilishitu hamwe naMwanenyi mwilu. Kaha mukaye kakahya, Yesu navaze mwakayula navo navakalingisa vatu vakapwe vakukupuka. Kahomu vatu navakahita mucheseko chamakumishilo, Kalunga mwakavahana kuyoya chahaya myaka yosena. Halwola kana, Setu Yehova mwakawahilila chikuma hakumona hamavu hanazale navatu vakukupuka. Chikupu vene lwola kana nalukapwa lwamwaza chikuma.

20. Mujijila muka asolwelamo Yehova ngwenyi atuzanga, kaha vyuma muka nachihanjika chihande chinakavangizaho?

²⁰ Yehova nasolola hatoma chikupu ngwenyi atuzanga chikuma. Chikupu vene apwa hichisemi chetu wamwenemwene. Eji kwivwililanga kukulomba chetu nakutuhana vyuma vyasakiwa mukuyoya nakushipilitu. Eji kutunangulanga nakutukafwa. Kaha nawa natushiki kukatulingila vyuma vyamwaza kulutwe. Tweji kuwahililanga chikuma kutachikiza ngwetu Setu wazangi atuzakama chikuma. Chihande chinakavangizaho nachihanjika havyuma twatela kulinga mangana tusolole ngwetu twasakwilila chikuma Yehova hazangi yenyi.