1. Chumanyi chelileñayi muntu neyi nakukeña kuhanjeka namwanta wakuPeresi?

FWIKIJENU munashakami muPeresi yaaka 2,500 yinahitihu. Munakukeña nenu muhoshi namwanta wamunidi iluña, dichi munayi kuchipañu chamuShushani. Ilaña henohu kanda muyi nakuhosha namwanta mwatela kutambula ntahi lusesa kudi yena. Muloña neyi muya chakadi kutambula lusesa, akuyijaha.—Esita 4:11.

2. Yehova wakeñaña nindi tutiyeña ñahi neyi tunakuhanjeka nindi?

² Twazañalalaña hakwiluka netu Yehova hekala neyi mwanta wakuPeresiku. Yehova wabadika anyuuli ejima awantu, ilaña tunateli kuhanjeka nindi mpinji yidi yejima. Wakeñaña nindi twikali akasunuka kuhanjeka nindi. Chakutalilahu, hela chakwila Yehova wukweti nkumbu jidi neyi Nleñi Wabadika, Wañovu Jejima nawa Mwanta Wabadika, wakeñaña nindi tuhanjekeña nindi kuzatisha izu dapela dakwila nawu “Tata.” (Mat. 6:9) Twatiyaña kuwaha hakwiluka netu Yehova wakeñaña nindi tuswini kwakwihi nayena.

3. Muloñadi chitwatela kumutenena Yehova netu “Tata,” nawa achinu chibaaba chikuhosha hayumanyi?

³ Chatelela kumutena Yehova netu “Tata” muloña diyi Kaseloki kawumi. (Mas. 36:9) Chineli diyi Tata yetu, twatela kumwovwahila. Neyi twila mwatulejañayi, twakadiluñisha nkisu jajivulu. (Heb. 12:9) Muniji nkisu mwabombela wumi wahaya nyaaka, hela mwiwulu chili hamaseki. Nichayinu mpinji twadiluñishaña. Achinu chibaaba chikushimuna chuma chamwekeshaña nawu Yehova hiTata yetu wukweti kukeña nichitwatela kukuhwelela netu kumbidi wakatushiya wanyi. Ilaña tusambilenu ntahi kuhanjeka chitwatela kukuhwelela netu Tata yetu  wamwiwulu watukeña nankashi nawa watwakamenaña.

4. Muloñadi chichayikalilaña amakwawu kumumona Yehova nawu hiTata yawu?

⁴ Komana chayikalilaña kumumona Nzambi nenu hiTata yenu? Amakwawu anateli kutoñojoka nawu Yehova wabadika nawa nawu hitwalema kudi yenaku. Ajinookaña nawu Nzambi Wañovu Jejima wayakamenaña wanyi hamuntu-hamuntu. Ilaña, Tata yetu wukweti kukeña wakeñaña wanyi nindi tujinookeña. Watwinka wumi nawa wakeñaña nindi twikali amabwambu jindi. Hanyima yakuhosha iyi nsañu, kapostolu Pawulu wayilumbulwilili antiyilili jindi muAtenisi nindi Yehova “hekala kwakulehi nanetu ejimaku.” (Yilw. 17:24-29) Nzambi nakukeña nindi wejima wetu tuhanjekeña nindi neyi chahanjekañayi mwana nanvwali yindi wukweti kukeña nawa wakamenaña.

5. Chumanyi chitunadizili kuchuma chamumwekeneni iwu muhela mukwaKristu?

⁵ Amakwawu chayikalilaña kumumona Yehova neyi hiTata yawu muloña wakwila atata jawu akumujimba ayimwekesheleli kukeña niluwi wanyi. Talenu chahosheliyi muhela wumu mukwaKristu. Wahosheli nindi: “Atata adiña atama muchima. Chinatachikili kudiza Bayibolu chankalilili kuswina kwakwihi naTata yetu wamwiwulu. Ilaña chinamwilukili Yehova, yuma yejima yahimpikili.” Komana ninenu dichimwatiyaña? Neyi dimu bayi muneñaku, mukuhita kwampinji mwakeluka nenu Yehova hiTata yenu wamuwahi.

6. Kwesekeja naMatewu 11:27, njilanyi yimu mwatukwashilañayi Yehova kulonda tumumoneña netu hiTata yetu wukweti kukeña?

⁶ Yuma yejima yeliliyi Yesu yasonekawu muBayibolu hinjila yimu yamwekeshaña nawu Yehova hiTata yetu watukeña. (Tañenu Matewu 11:27.) Yesu wembujolileña Tata yindi, nawa wahosheli nindi: “Muntu wejima wunamoni ami, dikwila nawu namoni niTata.” (Yow. 14:9) Kakavulu Yesu wamuteneneña Yehova nindi Tata. Munyikanda yaNsañu Yayiwahi yiwana, Yesu wamuteneni Yehova nindi “Tata” kapampa 165. Muloñadi Yesu chahosheleleñayi kakavulu hadi Yehova? Chuma chimu chaletesheli chidi chakwila nawu wakeñeleña nindi antu amwiluki Yehova nawu hiTata yetu wukweti kukeña.—Yow. 17:25, 26.

7. Yumanyi yitwadizilaña kudi Yehova kwesekeja nachelileñayi hadi Mwanindi?

⁷ Shinshikenu yuma yitwadizilaña kudi Yehova kwesekeja nachelileñayi hadi Mwanindi, Yesu. Yehova watiyileña kulomba kwaYesu mpinji yejima. Watiyileña kulomba kwindi nawa wamwakwileña. (Yow. 11:41, 42) Hela chakwila Yesu wahitili mukukala kwamboka-mboka, welukileña nindi Tata yindi wadiña wamukeña nawa nindi wamukwashileña.—Luka 22:42, 43.

8. Munjilanyi Yehova mwamwakameneneñayi Yesu?

⁸ Yesu welukili nindi Tata yindi diyi Wamwinkeli wumi nawa Wamuhembeleña chelili yahoshi nindi: “Nikweti wumi muloña waTata.” (Yow. 6:57) Yesu wamukuhweleleli chikupu Tata yindi nawa Yehova wamwinkeleña yuma yejima yakeñeleñayi kulonda yahandi. Chuma chasweja kulema, Yehova wamukwashili Yesu kutwalekahu kwikala washinshika.—Mat. 4:4.

9. Yehova wamwekesheli ñahi nindi wadiña nakumwakamena Yesu?

⁹ Chineli hiTata wukweti kukeña, Yehova wamukwashileña Yesu kwiluka nindi wadiña nakumwakamena. (Mat. 26:53; Yow. 8:16) Hela chakwila Yehova hamukiñili Yesu  kuyuma yejima yadi kumukatishaku, wamukwashili kuumika kweseka kwejima. Yesu welukili chikupu nindi kukala kwejima kwamweniyi kwadiña kwakapinji kantesha hohu. (Heb. 12:2) Yehova wamwekesheli nindi wamwakameneni Yesu kuhitila mukumutiyilila, mukumwinka yuma yejima, kumudizisha nikumukwasha. (Yow. 5:20; 8:28) Ichi dinu tutalenu Tata yetu wamwiwulu chatwakamenañayi munjila yoyimu.

10. Masamu 66:19, 20 yamwekeshaña ñahi nawu Yehova watukeña?

¹⁰ Yehova watiyaña kulomba kwetu. (Tañenu Masamu 66:19, 20.) Watukonkomwenaña nindi tulombeña mpinji yejima. (1 Tes. 5:17) Tunateli kulomba kudi Nzambi yetu kala mpinji, hichidi namuloña nakutudiku. Yena hakasikaku, ilaña wakeñaña kutiya kulomba kwetu. Neyi twiluka netu Yehova watiyaña kulomba kwetu, twaswinaña kwakwihi nayena. Ñimbi yamasamu wahosheli nindi, ‘Ami namukeña Yehova muloña watiyaña izu dami.’—Mas. 116:1.

11. Yehova wakulaña ñahi kulomba kwetu?

¹¹ Tata yetu watiyaña kulomba kwetu nawa wakwakulaña. Kapostolu Yowanu watuleja nindi: “Chuma chejima chitunateli kumulomba [Nzambi] kwesekeja namwaya nkeñelu yindi, yena watutiyaña.” (1 Yow. 5:14, 15) Hela chochu, Yehova hanateli kwakula kulomba kwetu munjila yitunakuhweleliku. Weluka yuma yinateli kutukwasha, dichi mpinji yikwawu ñakwilu yindi yinateli kwikala inehi hela wukukeña nindi tuchiñilili.—2 Kor. 12:7-9.

12-13. Munjilanyi mwatwinkelañayi Tata yetu wamwiwulu yuma yitunakukeña?

¹² Yehova watwinkaña yuma yitunakukeña. Welaña yuma yakeñañayi nindi atata jawantu eleña. (1 Tim. 5:8) Wayinkaña anyanindi yuma yinakukeñawu. Hakeñaña nindi twakameneña hayakuda, yakuvwala hela hakukamaku. (Mat. 6:32, 33; 7:11) Chineli hinvwali wukweti kukeña, Yehova wakatwinka yuma yejima yitukakeñaña kumbidi.

¹³ Chuma chasweja kulema, Yehova watuloñeshelaña yakuda yakuspiritu. Mwizu dindi, namwekeshi chekalayi, nkeñelu yindi, chatuleñeleliyi niyuma yakamwekana kumbidi. Wazatishili anvwali jetu hela antu amakwawu kulonda atudizishi chalala hadi yena. Nawa natwalekihu kutukwasha kwikala amabwambu jindi kuhitila mudi akulumpi muchipompelu niamanakwetu niahela apama kuspiritu. Kubombelahu, Yehova watudizishilaña hakupompa, kutwadizaña hamu nawamanakwetu niahela. Yuma yejimiyi niyuma yikwawu, yamwekeshaña nawu Yehova hitata watukeña.—Mas. 32:8.

14. Yehova watudizishaña ñahi, nawa welaña ñahi mwenimu?

¹⁴ Yehova watudizishaña. Kwambukaku naYesu, twawanina wanyi. Dichi hakwila nindi yatudizishi, Tata yetu wukweti kukeña watubabeshaña neyi chinatwesheki. Izu dindi datulejaña nawu: “Antu akeñayi Yehova wayibabeshaña.” (Heb. 12:6, 7) Yehova watubabeshaña munjila jashiyashana. Chakutalilahu, yuma yitwatañaña Mwizu dindi nikutiya kukupompa kwetu yinateli kuhimpa yitoñojoka yetu. Hela hekwawu wukwashu wutunakukeña wunateli kufuma kudi akulumpi. Hichidi namuloña nachatubabeshañayi Yehovaku, ilaña watubabeshaña muloña watukeña.—Yere. 30:11.

15. Munjilanyi mwatukiñilañayi Yehova?

¹⁵ Yehova watukwashaña kuumika kweseka. Neyi chakamenañayi tata yawantu  anyanindi mumpinji yakala, Tata yetu wamwiwulu watukwashaña mukweseka kwejima. Wazatishaña spiritu yindi yajila kulonda yitukiñi kuyuma yinateli kutuluwañesha kuspiritu. (Luka 11:13) Cheñi, Yehova watukwashaña neyi tunaneñi. Chakutalilahu, watwinka kuchiñeja kwabadika kuwaha. Iku kuchiñeja kwakumbidi kwatukwashaña kuumika kukala. Ilukenu chumichi: Hela tuhu yuma yatama yikutumwekena, Tata yetu wukweti kukeña wakafumishahu yuma yejima yatukatishaña. Kukala kwejima kutunakumona kwakapinji kantesha hohu, ilaña nkisu yitwatambwilaña kudi Yehova, yahaya nyaaka.—2 Kor. 4:16-18.

16. Chumanyi chamwekeni chelili Adama yadikañi naTata yindi wukweti kukeña?

¹⁶ Twamonaña Yehova chatukeñayi neyi tutoñojoka cheliliyi hampinji yadikañiliyi Adama. Adama chadikañiliyi naTata yindi wamwiwulu, wafumini muchisaka chaYehova chamuzañalu kushilahu nianyanindi. (Rom. 5:12; 7:14) Hela chochu, kudi chuma cheliliyi Yehova kulonda yakwashi anyana kaAdama.

17. Chelili Adama yadikañi, chumanyi cheliliyi Yehova?

¹⁷ Yehova wamubabesheli Adama, ilaña wakanini nindi wakayikwasha anyana kaAdama. Wakanini nindi antu akamwovwahilaña wakayifuntisha muchisaka chindi. (Kutach. 3:15; Rom. 8:20, 21) Yehova waloñesheli iyi njila kuhitila mwifutu danyiloña daMwanindi akeñayi, Yesu. Yehova wamwekesheli nindi watukeña nankashi hakutwinka Mwanindi kulonda yatufwili.—Yow. 3:16.

18. Muloñadi chitukukuhwelela netu Yehova nakukeña nindi twikali anyanindi hela chakwila tunafumi kudi yena?

¹⁸ Hela chakwila twawanina wanyi, Yehova nakukeña nindi twikali muchisaka chindi nawa hatumonaña nindi tudi chisendaku.  Yehova hatushiyañaku hela chakwila tunasenuki. Yesu wazatishili chakutalilahu chamwana wajimbeli nakumwekesha chakeñayi Yehova anyanindi. (Luka 15:11-32) Tata yawantu munichi chakutalilahu wakuhweleleli nindi mwanindi wakafunta. Mwana chafuntiliyi, tata yindi wamutambwilili namuzañalu. Neyi tunavulumuni kudi Yehova ilaña tubalumuka mumuchima, twatela kukuhwelela netu Tata yetu wukweti kukeña wadiloñesha kutwanakena.

19. Yehova wakafumishahu ñahi kutama kwejima kwaletayi Adama?

¹⁹ Tata yetu wakafumishahu kutama kwejima kwaletayi Adama. Chelili Adama yadikañi, Yehova wafukwilihu kutonda a 144,000 mukachi kawantu kulonda akekali anyanta nawa atupristu mwiwulu hamu naMwanindi. Mwituña dadiha, Yesu nia 144,000 akakwasha antu ovwahila kwikala awanina. Hanyima yakuhita mukweseka kwakukumishaku, Nzambi wakayinka wumi wahaya nyaaka. Kuhiñahu dinu Tata yetu wakazañalala hakumona kaayi kanenzali nawantu awanina. Iyi mpinji yakawaha chikupu.

20. Munjilanyi mwamwekeshelañayi Yehova nindi watukeña chikupu, nawa tukahanjekadi muchibaaba chinalondelihu?

²⁰ Yehova wamwekeshaña nindi watukeña chikupu. HiTata wamuwahi chikupu. Watiyaña kulomba kwetu nawa watwinkaña yuma yitwakeñaña yejima, yuma yakumujimba niyakuspiritu. Watudizishaña nikutukwasha. Wakatwilila niyuma yayiwahi kumbidi. Chatuzañaleshaña hakwiluka netu Tata yetu watukeña nawa netu watwakamenaña. Muchibaaba chinalondelihu tukahanjeka njila mutunateli kumwekeshela netu twasakililaña hakukeña kwindi.