1. ¿Tiʼ iltoq tiʼj tuʼn tbʼant tuʼn jun xjal qa tajtoq tuʼn tyolin tukʼil aj kawil te Persia?

QO XIMEN tiʼj qa atztoq in qo anqʼin toj tnam Persia ex ma tzikʼ junlo 2,500 abʼqʼi. Qaj tuʼn qyolin tiʼj jun tiʼ tukʼil rey ex il tiʼj tuʼn qxiʼ toj tnam Susa jatumel taʼ ja te kawbʼil. Pero naʼmxtoq qxiʼ yolil tukʼil rey, il tiʼj tuʼn t-xi qqanin ambʼil te, ¿tiquʼn? Tuʼnju jaku qo kubʼ bʼyoʼn qa mintiʼ ma bʼant jlu quʼn (Est. 4:11).

2. ¿Tiquʼn mintiʼ tuʼn qtzaj xobʼ aj qyolin tukʼil Jehová?

² In xi qqʼoʼn nim chjonte te Jehová tuʼnju nya ik te tmod ik tzeʼn qe aj kawil te Persia. A Jehová mas nim toklen twitz alkyexku juntl aj kawil, pero jaku bʼant tuʼn qyolin tukʼil toj alkyexku ambʼil ex taj tuʼn tbʼant jlu quʼn. In chex qʼamet junjuntl título tiʼj Jehová ik tzeʼn Bʼinchal tkyaqil, Nimxix Tipumal ex aj Kawil tibʼaj tkyaqil. Noqtzun tuʼnj, taj Jehová tuʼn t-xi qqʼamaʼn Tat te moqa «Qman» (Mat. 6:9). Nim in qo tzalaj tuʼnju taj Jehová tuʼn tten jun tbʼanel qamiwbʼil tukʼil.

3. ¿Tiquʼn jaku txi qqʼamaʼn Tat te Jehová ex tiʼ kʼelel qnikʼ tiʼj toj xnaqʼtzbʼil lu?

³ Jaku txi qqʼamaʼn Tat te Jehová tuʼnju o tzaj tqʼoʼn qchwinqlal (Sal. 36:9). Ex tuʼnju a Qtat, il tiʼj tuʼn qnimen te. Qa ma kubʼ qbʼinchaʼn aju in tzaj tqanin qe, ktzajel qkʼamoʼn tbʼanel kʼiwlabʼil (Heb. 12:9). Jun kyxol qe jlu, atzun tuʼn qanqʼin te jumajx toj kyaʼj moqa twitz Txʼotxʼ. Pero ax ikx toj ambʼil jaʼlo in tzaj qkʼamoʼn nim kʼiwlabʼil. Toj xnaqʼtzbʼil lu, kʼelel qnikʼ tiʼj tzeʼn in kubʼ tyekʼin Jehová qa ik  tmod ik tzeʼn jun mambʼaj at nim tkʼujlabʼil ex tiquʼn jaku tzʼok qeʼ qkʼuʼj tiʼj qa mlayx qo kyaj ttzaqpiʼn toj ambʼil tzul. Noqtzun tuʼnj, tnejel qo yolil tiʼj tiquʼn jaku tzʼok qeʼ qkʼuʼj tiʼj qa kʼujlaʼnxix qoʼ tuʼn Qtat at toj kyaʼj ex qa in xqʼuqin qiʼj.

4. ¿Tiquʼn kwest in nela toj kywitz junjun tuʼn tok kyqʼoʼn Jehová te Kytat?

⁴ ¿Kwestpe in nela toj qwitz tuʼn tok qqʼoʼn Jehová te Qtat? Bʼalo ateʼ junjun jaku kubʼ kyximen qa mintiʼ in nok tqʼoʼn Jehová twitz qiʼj. Ex mintiʼ in nok qeʼ kykʼuʼj tiʼj qa in ximen aju Dios at Nimxix Tipumal tiʼj teyele junjun qe. Pero nya taj Qman Jehová tuʼn tkubʼ qximen jlu tuʼnju kʼujlaʼn qoʼ tuʼn. A o tzaj qʼonte qchwinqlal ex taj tuʼn qok te tamiw. Atzun jlu xi tchikʼbʼaʼn apóstol Pablo kye xjal toj tnam Atenas tuʼnju tqʼama qa «mya najchaq taʼ [Dios] ttxlaj junjun qe» (Hech. 17:24-29). Taj Jehová tuʼn miʼn qtzaj xobʼ ex tuʼn qok laqʼeʼ ttxlaj ik tzeʼn in bʼant tuʼn jun kʼwal tukʼil ttat.

5. ¿Tiʼ xnaqʼtzbʼil in nel qiʼn tiʼjju bʼaj tiʼj jun ermana?

⁵ Ateʼ junjuntl mintiʼ e ok kʼujlaʼn kyuʼn kytat tej kyjaw chʼiy. Tuʼntzunju in kubʼ kyximen qa mlay tzʼok Jehová te Kytat. Jun techel, tqʼama jun ermana jlu: «Mintiʼ kubʼ tyekʼin nmane tkʼujlabʼil wiʼje. Tuʼntzunju, kwest ela toj nwitze tuʼn tok nqʼoʼne Jehová te Nmane tej t-xi tzyet tuʼn nxnaqʼtzane tiʼj Tyol. Pero chʼexpaj jlu tej tok wojtzqiʼne Jehová». ¿Axpe jlu in bʼaj qiʼj? Qa ikju, qeʼk qkʼuʼj tiʼj qa jaku tzʼok qqʼoʼn Jehová te mas tbʼanel Qtat twitz alkyexku juntl.

6. Ik tzeʼn in tzaj tqʼamaʼn Mateo 11:27, ¿tzeʼn o tzʼonin Jehová qiʼj tuʼn tok qqʼoʼn te Qtat ex tuʼn tel qnikʼ tiʼj qa kʼujlaʼn qoʼ tuʼn?

⁶ ¿Tzeʼn o tzʼonin Jehová qiʼj tuʼn tok qqʼoʼn te Qtat ex tuʼn tel qnikʼ tiʼj qa kʼujlaʼn qoʼ tuʼn? Jun tumel, tzaj tqʼoʼn ambʼil tuʼn kykux tzʼibʼin qe tyol Jesús ex qe tbʼinchbʼen toj Xjan Uʼj (kjawil uʼjit Mateo 11:27). Kubʼ tyekʼin Jesús qe tbʼanel tmod Ttat, tuʼntzunju tqʼama jlu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Nim maj tqʼama qa ik tten Jehová ik tzeʼn jun Tatbʼaj. Axpe ikx, tqʼama Jesús junlo 165 maj yol Tat kyoj qeju kyaje uʼj in che yolin tiʼj tanqʼibʼil. ¿Tiquʼn tqʼama nim maj yol lu tiʼj Jehová? At nim tiquʼn, jun kyxol qe jlu, tajtoq tuʼn tel kynikʼ xjal tiʼj qa in nok Jehová te jun tbʼanel Tatbʼaj (Juan 17:25, 26).

7. ¿Tiʼ xnaqʼtzbʼil in nel qiʼn tiʼj Jehová aj qximen tiʼj tmod kubʼ tyekʼin tukʼil Tkʼwal?

⁷ Qo xnaqʼtzan tiʼj tmod Jehová kubʼ tyekʼin tukʼil Tkʼwal ex qo ximen tiʼj tiʼ xnaqʼtzbʼil in tzaj tqʼoʼn jlu qe. Kukx tzaj tbʼiʼn Jehová qe tnaʼj Dios Jesús ex tzaj ttzaqʼweʼn (Juan 11:41, 42). Kubʼ tnaʼn Jesús tkʼujlabʼil Jehová ex ok tkeʼyin tzeʼn onin tiʼj tej tok weʼ twitz nya bʼaʼn (Luc. 22:42, 43).

8. ¿Alkye tten xqʼuqin Jehová tiʼj Jesús?

⁸ El tnikʼ Jesús tiʼj qa a Jehová xi qʼonte tchwinqlal ex tkyaqilju at tajbʼen te. Tuʼntzunju tqʼama jlu: «Itzʼ qine tuʼn Nmane» (Juan 6:57). Ok qeʼ tkʼuʼj Jesús tiʼj Ttat tuʼn tkyaqil tanmi, atzunte Jehová, tzaj tqʼoʼn aju attoq tajbʼen te. Pero aju mas nim toklen, kukx xqʼuqin Jehová tiʼj tamiwbʼil Tkʼwal ten tukʼil (Mat. 4:4).

9. ¿Tzeʼn kubʼ tyekʼin Jehová qa kʼujlaʼntoq Jesús tuʼn?

⁹ Tuʼnju jun tbʼanel Mambʼaj te Jehová, xi tyekʼin te Jesús qa in nonintoq tiʼj (Mat. 26:53; Juan 8:16). Ax tok, tzaj tqʼoʼn ambʼil tuʼn tikʼ Jesús kyoj junjun nya bʼaʼn, pero onin tiʼj tuʼn tikʼx tuʼn. Ojtzqiʼntoq  tuʼn Jesús qa nya te jumajx che teltoq nya bʼaʼn ok bʼinchaʼn tiʼj (Heb. 12:2). Ex kubʼ tyekʼin Jehová qa in xqʼuqintoq tiʼj Tkʼwal tej ttzaj tbʼiʼn tnaʼj Dios, tej ttzaj tqʼoʼn aju at tajbʼen te, tej ttzaj tqʼoʼn xnaqʼtzbʼil te ex tej tonin tiʼj (Juan 5:20; 8:28). Atzun jaʼlo, qo xnaqʼtzan tiʼj tzeʼn in qo ok t-xqʼuqin Jehová ik tzeʼn jlu.

10. Ik tzeʼn in tzaj tqʼamaʼn Salmo 66:19 ex 20, ¿tzeʼn in kubʼ tyekʼin Jehová tkʼujlabʼil qiʼj?

¹⁰ In tzaj tbʼiʼn Jehová qe qnaʼj Dios (kjawil uʼjit Salmo 66:19, 20). Mintiʼ in tzaj tqʼamaʼn Jehová qe jteʼ maj jaku qo yolin tukʼil ex tiʼ jaku txi qqʼamaʼn te, sino in tzaj tqʼoʼn txokbʼil qiʼj tuʼn kukx qnaʼn Dios te (1 Tes. 5:17). Ax ikx, jaku qo naʼn Dios te Jehová toj alkyexku ambʼil ex noq jaxku tumel atoʼ. Kukx in nok tbʼiʼn Jehová qe qnaʼj Dios tuʼnju mintiʼ te in sikt. Aj tel qnikʼ tiʼj qa in tzaj tbʼiʼn Jehová qe qnaʼj Dios, mas in qo ok laqʼeʼ ttxlaj. Tqʼama jun salmista jlu: «At nkʼujlalile tiʼj Qman tuʼnju ma tzaj tbʼiʼn nyole» (Sal. 116:1).

11. ¿Tzeʼn in tzaj ttzaqʼweʼn Jehová qe qnaʼj Dios?

¹¹ Nya oʼkx in tzaj tbʼiʼn Qtat toj kyaʼj qe qnaʼj Dios, sino ax ikx in che tzaj ttzaqʼweʼn. In tzaj tqʼuqbʼaʼn apóstol Juan qkʼuʼj kyuʼn yol lu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn» (1 Juan 5:14, 15). Jaku qo tzaj ttzaqʼweʼn Jehová toj jun tten mintiʼ ximen quʼn. Tuʼnju ojtzqiʼn tuʼn alkye mas bʼaʼn te qe, at maj mintiʼ in tzaj tqʼoʼn aju in xi qqanin te moqa taj tuʼn qyon chʼin ambʼil (2 Cor. 12:7-9).

12, 13. ¿Alkye tten in tzaj tqʼoʼn Jehová aju at tajbʼen qe?

¹² In tzaj tqʼoʼn Jehová aju at tajbʼen qe. In xi tqanin Jehová kye mambʼaj tuʼn t-xi kyqʼoʼn aju at tajbʼen kye toj kyja ik tzeʼn te in bʼant tuʼn (1 Tim. 5:8). Nya taj Jehová tuʼn ttzaj bʼaj qkʼuʼj tiʼj qwa, tiʼj qxbʼalun ex tiʼj jatumel tuʼn qanqʼin (Mat. 6:32, 33; 7:11). Ex tuʼnju kʼujlaʼn qoʼ tuʼn, axpe ikx o kubʼ t-ximen tuʼn tten tkyaqilju at tajbʼen qe toj ambʼil tzul.

¹³ Pero aju mas nim toklen, in tzaj tqʼoʼn Jehová aju at tajbʼen qe tuʼn tten jun tbʼanel qamiwbʼil tukʼil. Toj Tyol, o tzaj tyekʼin qe alkye axix tok tiʼj, tiʼ t-ximbʼetz at kyiʼj xjal, tiquʼn o qo kubʼ tbʼinchaʼn ex tiʼ kbʼajel toj ambʼil tzul. Tej tel qnikʼ tiʼj axix tok, ximen tiʼj teyele junjun qe ex ajbʼen jun kyxol qe qtat tuʼn moqa jun erman tuʼn tonin qiʼj tuʼn tok qojtzqiʼn. Ex kukx in nonin qiʼj tukʼil kʼujlabʼil aj kyajbʼen ansyan tuʼn ex junjuntl erman ma che chʼiy toj kyokslabʼil. Ax ikx, in tzaj tqʼoʼn ambʼil qe tuʼn qten junx kyukʼil erman kyoj chmabʼil tuʼntzun qtzaj t-xnaqʼtzaʼn ex tuʼn telxix qnikʼ tiʼj. Tuʼn tkyaqil jlu, in nel qnikʼ tiʼj qa jun tbʼanel Tatbʼaj te Jehová ex in ximen qiʼj qkyaqilx (Sal. 32:8).

14. ¿Tiquʼn in qo tzaj tkawin Jehová ex tzeʼn in bʼant tuʼn?

¹⁴ In qo tzaj t-xnaqʼtzaʼn Jehová. Tzʼaqli te Jesús tej tten tzalu twitz Txʼotxʼ, atzun qe aj il qoʼ, tuʼntzunju in qo tzaj t-xnaqʼtzaʼn Jehová. Ex tuʼnju kʼujlaʼn qoʼ tuʼn, at maj in qo tzaj tkawin. In tzaj tqʼamaʼn Tyol qe qa «in che kubʼ tkawin qeju kʼujlaʼn qe tuʼn» (Heb. 12:6, 7). Ex in bʼant jlu tuʼn toj junxichaq tten. Jun techel, jakulo jaw quʼjin jun tiʼ toj Xjan Uʼj moqa in nok qbʼiʼn jun tiʼ toj chmabʼil aju in nonin qiʼj tuʼn tkubʼ qchʼexpuʼn qmod. Ex at maj in che ajbʼen ansyan tuʼn tuʼntzun tonin qiʼj. Noq alkyexku in najbʼen tuʼn, in qo tzaj tkawin Jehová tuʼnju kʼujlaʼn qoʼ tuʼn (Jer. 30:11).

15. ¿Alkye tten in xqʼuqin Jehová qiʼj?

 ¹⁵ In nonin Jehová qiʼj tuʼn qex twitz nya bʼaʼn. Ik tzeʼn in bʼant tuʼn jun mambʼaj at tkʼujlabʼil kyiʼj tkʼwal, in xqʼuqin Qtat at toj kyaʼj qiʼj aj qok weʼ twitz nya bʼaʼn. In najbʼen xewbʼaj xjan tuʼn tuʼntzun tonin qiʼj tuʼn miʼn qchewix toj qokslabʼil (Luc. 11:13). Ax ikx, in nonin qiʼj tuʼn miʼn ttzaj bʼaj qkʼuʼj. Jun techel, in tzaj tqʼoʼn jun tbʼanel qʼuqbʼil qkʼuʼj tiʼj ambʼil tzul ex in nonin jlu qiʼj tuʼn kukx kyikʼx nya bʼaʼn quʼn. Qo ximen tiʼj jlu: kxel tbʼinchaʼn Jehová tiʼj alkyexku nya bʼaʼn in tzaj qiʼj tuʼnju kʼujlaʼn qoʼ tuʼn. Aʼyeju nya bʼaʼn in che tzaj qiʼj jaʼlo, noq chʼin ambʼil che tel, atzun qeju tkʼiwlabʼil Jehová che tel te jumajx (2 Cor. 4:16-18).

16. ¿Tiʼ tzaj tej mintiʼ bʼin Adán te Jehová?

¹⁶ Tej tkubʼ tbʼinchaʼn Adán il, ya mintiʼ ten kyxol qe toj tja Jehová nix qe tyajil (Rom. 5:12; 7:14). Pero kubʼ tyekʼin Jehová tkʼujlabʼil kyiʼj qe tyajil Adán. ¿Alkye tten? Tej tkubʼ t-ximen tuʼn t-xi tbʼinchaʼn tiʼj nya bʼaʼn.

17. ¿Tiʼ bʼant tuʼn Jehová tej otoq kubʼ tbʼinchaʼn Adán il?

¹⁷ Kubʼ tqʼoʼn Jehová tkastiw Adán, pero kubʼ t-ximen tuʼn t-xi tqʼoʼn jun qʼuqbʼil kykʼuʼj qe tyajil. Jun rat naj tzaj ttziyen Jehová qa che okeltoq qe tbʼanel xjal te tkʼwal juntl maj (Gén. 3:15; Rom. 8:20, 21). Bʼant jlu tuʼn tej ttzaj tqʼoʼn Jesús te chojbʼil. Tej kyim Tkʼwal qiʼj, kubʼ tyekʼin Jehová qa nim kʼujlaʼn qoʼ tuʼn (Juan 3:16).

18. Maske o tzʼel qpan qibʼ tiʼj Jehová, ¿tiquʼn jaku tzʼok qeʼ qkʼuʼj tiʼj qa kʼujlaʼn qoʼ tuʼn ik tzeʼn jun tkʼwal?

¹⁸ Maske aj il qoʼ, taj Jehová tuʼn qten kyxol qe toj tja ex mintiʼ in qo ok tqʼoʼn ik tzeʼn jun iqtz. Bʼalo jaku tzaj tbʼis quʼn moqa jaku tzʼel qpan qibʼ tiʼj toj jun ambʼil,  pero mintiʼ in kubʼ t-ximen qa ya mintiʼ qajbʼen. Kubʼ tyekʼin Jesús qa nimxix kʼujlaʼn qoʼ tuʼn Jehová tej tyolin tiʼj jun kʼwal meltzʼaj tukʼil ttat (Luc. 15:11-32). Aju mambʼaj yolin Jesús tiʼj, qʼuqlitoq tkʼuʼj tiʼj qa jakutoq meltzʼaj tkʼwal juntl maj. Ex tej tmeltzʼaj tkʼwal, tzaj tchleʼn tuʼn tkyaqil tkʼuʼj. Qa o tzʼel qpan qibʼ tiʼj Jehová ex o tzʼajtz tiʼj qanmi, jaku tzʼok qeʼ qkʼuʼj tiʼj qa qo xel tkʼamoʼn Qtat at toj kyaʼj.

19. ¿Tiʼ kbʼantel tuʼn Jehová tuʼn t-xi tbʼinchaʼn tiʼj nya bʼaʼn tzaj tuʼn Adán?

¹⁹ Kxel tbʼinchaʼn Jehová tiʼj tkyaqil nya bʼaʼn tzaj tuʼn il bʼant tuʼn Adán. Tej tel tpan tibʼ tiʼj, e jaw tskʼoʼn Jehová 144,000 xjal tuʼn kyok te pal ex te aj kawil tuʼntzun kyten tukʼil Jesús toj kyaʼj. Toj akʼaj twitz Txʼotxʼ, kʼonil Jesús ex qe 144,000 kyiʼj tbʼanel xjal tuʼn kyok te tzʼaqli. Aj tkubʼaj mankbʼil joybʼil tiʼjju tuʼn qnimen te Dios, tzul tqʼoʼn qchwinqlal te jumajx. Nim ktzalajel Qtat at toj kyaʼj aj tok tkeʼyin qa nojni taʼ twitz Txʼotxʼ kyuʼn tkʼwal tzʼaqli. ¡Tbʼanelxix aj tpon ambʼil lu!

20. ¿Tzeʼn o kubʼ tyekʼin Jehová qa nimxix kʼujlaʼn qoʼ tuʼn, ex tiʼ kʼelel qnikʼ tiʼj toj juntl xnaqʼtzbʼil?

²⁰ O kubʼ tyekʼin Jehová qa nimxix kʼujlaʼn qoʼ tuʼn. Ate mas tbʼanel Qtat jaku ten. In tzaj tbʼiʼn qe qnaʼj Dios, in tzaj tqʼoʼn aju at tajbʼen qe tuʼn qanqʼin, in tzaj tqʼoʼn xnaqʼtzbʼil qe tuʼntzun tten jun tbʼanel qamiwbʼil tukʼil ex in nonin qiʼj. Ax ikx ktzajel tqʼoʼn tbʼanelxix tiʼchaq qe toj ambʼil tzul. ¿Mintiʼpe in qo tzalaj tuʼnju kʼujlaʼn qoʼ tuʼn Qman Jehová ex in xqʼuqin qiʼj? Toj juntl xnaqʼtzbʼil kʼelel qnikʼ tiʼj tzeʼn jaku txi qqʼoʼn chjonte te tiʼj tkʼujlabʼil at qiʼj.