1. Jméni xi tjínnele kisʼin jngo chjota xi koanmele ya kikjákaonajmí je rey xi tsʼe Persia.

SI̱KJAʼAITSJENLA tsa yalani naxinandá Persia tsakiyoaa nichxin kjoan 2,500 nóján. Nga mená je rey chja̱kaonajmiá, tjínnele ya naxinandá Susa kjuian, jñani tíjna je rey. Tonga títjonkjoanla machjén nga si̱jékjoaa nga ya koanngián, tsa mai yajin sikʼienná (Est. 4:11).

2. Jósʼin mele je Jeobá nga kʼoétsʼoalee.

² Nʼio bʼailee kjoanda je Jeobá nga tsín kʼoakjoan joni rey xi tsakatéxoma ya Persia. Ningalani ngisa tse nganʼio tjínle kʼoa ngisa ngʼa tíjna tikʼoajinni toʼya chjotaxáni, koaan chja̱kaonajmiá tokʼiani. Kui xi mele nga kʼoéyanajmílee tojmeni, nga tsín kuinókjoaan nga kʼoétsʼoalee. Je Jeobá nkjín koya josʼin bʼaijaʼaínle, jolani nga je kisindaná, nga nʼio tse nganʼio tjínle kʼoa nga je batéxomale ngayeje jmeni xi tjín. Ninga kʼoalani, je Jeobá kui xi mele nga Nʼai kʼuínlee (Mat. 6:9). Nʼio tsjoa satío tokoán nga kui xi mele je Jeobá nga si̱chriantʼalee.

3. Ánni nga koa̱n “Nʼai” kʼuínnilee je Jeobá, kʼoa jmé xi chótʼayajiaan i̱ kjoaʼmiya jebi.

³ Koaan nga “Nʼai” kʼuínlee je Jeobá nga̱ jé títsjoáná kjoabijnachon (Sal. 36:9). Nga Nʼainá mani tjínnele si̱tjosonlee. Tsa kʼoasʼiaan jmeni xi tsoná, tsee kjoanichikontʼain so̱koná (Heb. 12:9). Tobʼelañá, koaan kuiyoaa ngantsjai nichxin i̱ Sonʼnde kʼoa tsa ya ngʼajmi. Tonga kʼoati tse kjoanichikontʼain tjínná ndʼaibi. I̱ kjoaʼmiya jebi kui chótʼayajiaan jósʼin bakóná je Jeobá nga tsjoakená kʼoa  ánni nga tsín jao tjínni tokoán nga tsínkʼia tsjiónkonná nichxin xi nroaján. Títjonkjoanla kui kataʼyaa ánni nga tsín jao tjínni tokoán nga nʼio tsjoakená je Nʼainá xi tíjna ngʼajmi kʼoa nga síkuindaná.

4. Ánni nga ñʼai ma kʼanile je chjota nga Nʼai sʼin bekon je Jeobá.

⁴ A ñʼai maná nga Nʼainá sʼin ʼyatokoán je Jeobá. Tsakui nichxin tjínkʼa chjota xi kʼoasʼin síkjaʼaitsjen nga tsín chjí bekonná je Jeobá , kʼoa tsa tsín makjainle nga mandosinle xi tʼatsaan. Tonga je Nʼainá nʼio tsjoakená kʼoa tsín mele nga kʼoasʼin si̱kjaʼaitsjeen. Jé títsjoáná kjoabijnachon kʼoa kui xi mele nga je si̱chriantʼalee. Nga kui jebi kinchja̱ni je pastro Pablo ya Atenas kʼoakitso “nga tsín tsa kjin tíjnaná nga jngójngoá” je Jeobá (Hech. 17:24-29). Je Niná kui xi mele nga kʼoatisʼin chja̱kaonajmiá josʼin fákaonajmí jngo tiʼndí je nʼaile.

5. Jmé xi bakóyaná jokoan jngo tichjaa.

⁵ Xi ijngosani anni nga ñʼai ma kʼanile nga Nʼai sʼin bekon je Jeobá, tsakui nichxin kuinga je nʼaile likui tsakakóle kjoatsjoacha. Jngo tichjaa xi i̱ kitso: “Je nʼaina tsʼen koan. Kʼianga tosʼa kiskotʼaya je Biblia ñʼai koanna nga kisichriantʼale je Nʼainá xi tíjna ngʼajmi. Tonga nga jekoanni, nga ngisa nda tsaʼbe xi tʼatsʼe Jeobá alikui tikʼoasʼin kisikjaʼaitsjenña”. Tsa kʼoatisʼin nikjaʼaitsjeen, koaan kʼoakʼoé tokoán nga koa̱n Nʼainá sʼin jchatokoán je Jeobá.

6. Tojo tso Mateo 11:27, jósʼin bakóná je Jeobá nga Nʼainá mani kʼoa nga tsjoakená.

⁶ Jósʼin tíbakóná je Jeobá nga Nʼainá mani kʼoa nga tsjoakená. Jngo koya josʼin bakó kuinga kijna je Biblia jñani faʼaitʼa jmeni xi kitso kʼoa jmeni xi kisʼin je Jesús (tʼexkiai Mateo 11:27). * Je Jesús nʼio nda tsakakó jokjoan je Nʼaile, kʼoa i kitso: “Je xi tsabena nga an, tsabe Nʼainá” (Juan 14:9). Je Jesús nkjín kʼa kisikʼaxki̱ nga Nʼainá mani je Jeobá. Kʼoa nga ño Evangelio mela 200 kʼa faʼaitʼa nga Nʼai kitsole. Ánni nga nʼio nkjín kʼa kinchja̱ni tʼatsʼe Jeobá. Jngo koya anni kuinga katabe je chjota nga je Jeobá jngoo Nʼai xi tsjoakená (Juan 17:25, 26).

7. Jmé xi bakóyaná xi tʼatsʼe Jeobá kʼianga chotʼayajiaan josʼin tsabekon je ʼNdíle.

⁷ Kataʼyala josʼin tsabekon Jeobá je Jesús kʼoa jmeni xi bakóyaná. Je Niná kinrʼoéle ngantsjai kʼianga tsakʼétsʼoa je Jesús (Juan 11:41, 42). Je Jesús tsabee josʼin tsakakóle Jeobá nga tsjoake kʼoa tsakasenkao kʼianga kjoa jaʼatojin (Luc. 22:42, 43).

8. Jósʼin kisikuinda Jeobá je Jesús.

⁸ Je Jesús koanjinle nga je Nʼaile kitsjoale kjoabijnachon kao ngayeje jmeni xi koanchjénle. I kitso: “Tijnakoan xi totʼatsʼe Nʼainá” (Juan 6:57). Je Jesús jé Nʼaile kisinʼiotʼa, kʼoa je Jeobá kitsjoale jme xi koanchjénle nga tsakʼejnakon. Tonga je xi ngisa tjínle kjoandosin kuinga tsakasenkao nga kixi kitʼale (Mat. 4:4).

9. Jósʼin tsakakó je Jeobá nga tsjoake je Jesús.

⁹ Joni jngo Nʼai xi nʼio tsjoakená, je Jeobá tsakakóle je Jesús nga tsjoánganʼiole ngantsjai (Mat. 26:53; Juan 8:16). Ningalani kitsjoaʼnde sakʼoa nga kjoa jaʼatojin je Jesús, tsakasenkao nga kichokjoajinle. Je Jesús koanjinle nga tokjoaʼato je  kjoa xi kjoaʼatojin (Heb. 12:2). Je Jeobá tsakakó nga tsjoake je ʼNdíle kʼianga kinrʼoéle, nga kitsjoale jmeni xi koanchjénle kʼoa nga tsakasenkao (Juan 5:20; 8:28). Kataʼyala nga kʼoatisʼin síkuindaná tsanda ñá je Nʼainá xi tíjna ngʼajmi.

10. Tojo tso Salmo 66:19, 20, jósʼin bakóná Jeobá nga tsjoakená.

¹⁰ Je Jeobá nrʼoé kʼianga bʼetsʼoalee (tʼexkiai Salmo 66:19, 20). * Je Jeobá kui xi mele nga ntsjaintsjai kʼoétsʼoalee kʼoa nga kʼoéyanajmílee tojmeni (1 Tes. 5:17). Xi ijngosani, koaan kʼoétsʼoalee tokʼiani kʼoa tojñani tiyoaa. Je Jeobá tíjnanda ngantsjai nga nrʼoéná jmeni xi ʼmilee. Kʼianga ʼyaa nga nrʼoéná ngisaa machriantʼalee. Jngo xi kiski salmo, i kitso: “Tsjoake̱ña je Jeobá nga̱ nrʼoéna nga nchjale” (Sal. 116:1).

11. Jósʼin bakóná je Jeobá nga nrʼoé kʼianga bʼetsʼoalee.

¹¹ Ali tsa tonrʼoéjinná je Jeobá kʼianga bʼetsʼoalee, kʼoati tsjoáná jme xi nijélee. Je pastro Juan i kitso: “Tsa nijé tojmeni kjoa josʼin mele nga je, je nrʼoéná” (1 Juan 5:14, 15). Kʼianga jme xi nijelee je Jeobá, sakʼoaa tsín ñaki kʼoakjoansʼin bichómani josʼin nikjaʼaitsjeen. Kʼoa nga be jmeni xi ngisa machjénná, sakʼoaa tsín tokjoan bitjoson jmeni xi nijé, kʼoa sakʼoaa tsín bitjoson nga̱ be je Jeobá nga tsín skénndiaaná (2 Cor. 12:7-9).

12, 13. Jósʼin tsjoáná Jeobá jmeni xi machjénná.

¹² Je Jeobá tsjoáná jmeni xi machjénná. Kʼoasʼín josʼin mele nga sʼin je xi xijchá ma (1 Tim. 5:8). Je Jeobá tsjoáná jmeni xi biyochonñá. Alikui mele nga kui si̱kjáojiaan tʼatsʼe tsojmi xi chinee, najño kʼoa tsa ndʼia (Mat. 6:32, 33; 7:11). Nga tsjoakená, tongini tíbʼéndajin nga tsín jme xi ñʼai koa̱nná nichxin xi nroaján.

¹³ Tonga je xi ngisa tjínle kjoandosin kuinga basenkaoná nga ndasʼin kuiyoaa ngixko̱n. Je Jeobá kui xá kitsjoaniná je Biblia nga bakóyaná jotjínni xi tʼatsʼe, jme xi tjínndajinle, jme xá tiyochonñá kʼoa jmeni xi koa̱n nichxin xi nroaján. Koanndosinle xi tʼatsaan saʼnda nga tosʼa kichotʼayá je Biblia, jé xijcháná kʼoa tsa xi kitsoyaná Biblia tsakasenkaoná nga tsaʼyaa xi tʼatsʼe Jeobá. Kʼoa tosi tonda tíbasenkaoná je Jeobá, tobʼelañá, jé tísíchjén xi chjotajchínga sʼin tjío ya jinjtín kʼoa xi kjaʼaísa ndsʼee xi jetjínle kjoafaʼaitsjen. Xi ijngosani, kʼianga biyojtián kao je ndsʼee, je Jeobá bakóyaná xi tʼatsʼe. Nga kʼoasʼín, je Nʼainá Jeobá bakóná nga mandosinle xi tʼatsaan (Sal. 32:8).

14. Ánni nga bakóyaniná je Jeobá, kʼoa jmé xi síchjén nga bakóyaná.

¹⁴ Je Jeobá bakóyaná. Ñá alikui mangósoán xi kao Jesús, nga̱ chjotajée maa. Kuinga batekjáya sakʼoaniná kʼianga tjen ndiaale. Je Biblia kʼoatso nga batekjáyale je xi tsjoake (Heb. 12:6, 7). Nkjín koya josʼin batekjáyaná je Jeobá, tobʼelañá, kʼianga bʼexkiaa je Biblia kʼoa tsa kʼiaje̱ nga satíoná kjoajtín kui síkjaʼaitsjenjinná jñani tjínnele si̱ndayasaa yaoná. Kʼoa sakʼoaa je xi chjotajchínga sʼin tjío síchjén nga tsjoáná kjoafaʼaitsjen. Nga kʼoasʼin batekjáyaná Jeobá kʼoasʼin bakóni nga tsjoakená (Jer. 30:11).

15. Jósʼin síkuindaná je Jeobá.

¹⁵ Je Jeobá basenkaoná nga chókjoajinná je kjoa xi bitjatojiaan. Je Nʼainá  xi tíjna ngʼajmi síkuindaná kʼianga kjoa bitjatojiaan, tojo sʼín jngo nʼai xi tsjoake je ʼndíxtile. Jé nganʼiotsjele basenkaoná nga tosi tonda nda kuiyoaa ngixko̱n Jeobá (Luc. 11:13). Xi ijngosani, basenkaoná kʼianga nikjáojiaan, tobʼelañá, tsjoáná kjoachoya xi basenkaoná nga chókjoajinná je kjoa xi bitjatojiaan. Si̱kjaʼaitsjenla jebi: nga tsjoakená je Nʼainá Jeobá, nichxin xi nroaján kjoaʼaxin ngayeje xi kjoañʼai síkjaʼáná. Je kjoañʼai xi tichjaʼá ndʼaibi totífaʼato, tonga je kjoanichikontʼain xi tsjoáná Jeobá alikui kjoetʼa (2 Cor. 4:16-18).

16. Jméni xi koan kʼianga jetsakajngijée je Adán.

¹⁶ Jngo koya josʼin bakó nga tsjoakená Jeobá kui jokisʼin kʼianga tsakajngijée je Adán. Kʼianga tsín kisitjosonle Niná je Adán, je kʼoa kao xtile alikui tiya tsakatiojinnile familiale Niná (Rom. 5:12; 7:14). Tonga je Jeobá kiskosonnile josʼin tsakʼéndajin kjoa jebi.

17. Jméni xi kisʼin Jeobá kʼianga jetsakajngijée je Adán.

¹⁷ Ningalani kjoañʼai kitsjoale Jeobá je Adán, je ntje̱le kitsjoale kjoachoya. Kʼoakitso nga je chjota xi sitjosonle Niná koaan ya koatiojinle je familiale Niná (Gén. 3:15; Rom. 8:20, 21). Kʼiaa kisʼele kjoanda jebi je chjota nga kisikasén Niná je ʼNdíle nga kʼienntjainá, kʼoa kʼoasʼin tsakakóni nga nʼio tsjoakená (Juan 3:16).

18. Kʼiatsa jekinikjinlee je Jeobá, ánni nga tsín jao kʼoésíñá tokoán nga tsjoakená tojosʼin tsjoake jngo nʼai je ʼndíxtile.

¹⁸ Ningalani chjotajée maa, je Jeobá kui xi mele nga ya kuiyojinlee je naxinandále kʼoa je alikui chóbele nga basenkaoná. Je Jeobá alikuikʼia tsjiónkonná  ninga sakʼoa ba sʼe tokoán, kʼoa alikui kʼoejngo kon ninga jekinikjinlee, koyaa je Jeobá nga si̱chriantʼa ijngokʼalee. Je choa̱ xi tsakʼéjna Jesús tʼatsʼe je ti xi ki, kui tsakakó nga nʼio tsjoakená je Jeobá (Luc. 15:11-32). Je nʼaile ti jebi kʼoatsakʼé kon nga kuicho ijngokʼani je tile. Kʼoa kʼianga kichoni je tile, kao kjoatsjoa kiskoéyani. Je Nʼainá Jeobá tíjnanda nga skoéya ijngokʼaná kʼiatsa jekinikjinlee kʼoa tsa kʼoakjimaniná je jéená.

19. Jmé xi sʼin je Jeobá nga kʼoendajin je kjoa xi tsakajngi Adán.

¹⁹ Je Nʼainá Jeobá kʼoendajin ngayeje kjoa xi tsakajngi je Adán. Kʼianga tsín tikisitjosonni, je Jeobá 144,000 chjota kiskoejin nga rey kʼoa nga naʼmi koa̱n ya ngʼajmi. Kʼianga jeʼndenaxó koa̱n i̱ Sonʼnde, je Jesús kao xi ya koatexomakao kuinyakao je chjota nga chjotatsje koa̱n. Kʼianga jechótʼayakao xi tofetʼani je xi i̱ Sonʼnde koatio, je Niná tsjoále kjoabijnachon xi tsínkʼia fetʼa tsa tosi tonda sitjoson. Je Nʼainá tsjoa sʼe̱ kon nga skoe̱ nga chjotatsje koa̱n ngatsʼi je xtile xi koatio i̱ Sonʼnde. Nʼiojin naskánakoa̱nchon nga kʼia.

20. Jósʼin tíbakóná je Jeobá nga tsjoakená, kʼoa jmé xi chótʼayajiaan ya kjoaʼmiya xi ijngo.

²⁰ Je Jeobá tíbakó nga nʼio tsjoakená. Alikui ʼya xi mangóson, tobʼelañá, nrʼoé kʼianga bʼetsʼoalee kʼoa tsjoáná jmeni xi biyochonñá kʼoa xi basenkaoná nga nda biyoaa ngixko̱n. Bakóyaná kʼoa tsjoánganʼioná. Xi ijngosani, tsee kjoanichikontʼain tsjoáná nichxin xi nroaján. Tsjoa maná nga ʼyaa nga tsjoakená je Nʼainá kʼoa nga síkuindaná. Ya kjoaʼmiya xi ijngo kui chótʼayajiaan jósʼiaan nga kʼoailee kjoanda nga tsjoakená je Jeobá joni jngo nʼai.