1. Bika byapandele kulinga munu uje washakele kusimutwiya na mwene wa Pelesha?

LINGENI ngwe muli na kuyoya mu simbu ya kusañulu, co muli na kuyoya mu Pelesha. Kuli byuma bimo bimushaka kusimutwiya na mwene, co muya ku nganda ya Susa kuje kwakala mwene. Oloni munapande kulomba lisesa simbu kanda musimutwiye na mwene. Nga musimutwiya nendi kwa kujeneka lisesa, co bamitsiya.—Esita 4:11.

2. Yehova ashaka ngwendi tulizibe bati omwo tusimutwiya nendi?

² Twabezika manene mwafwa Yehova kafwile ngwe mwene wa Pelesha. Yehova wapwa muka-kuyula wakama manene kutubakana mwene woshe woshe wa hano hasi. Oloni twasa kusimutwiya nendi. Ashaka ngwendi tuzituke omwo tusimutwiya nendi. Yehova bakamusanesa majwi a kufwa ngwe Ishamatanga, Muka-nzili Yoshe, na Mwene wa Hakamwa ya Byoshe, oloni ali na kutulanya ngwendi tumusane ngwetu ‘Tate’ omwo tusimutwiya nendi. (Mateo 6:9) Twabwahelela manene mwafwa Yehova ashaka ngwendi tushwenye kuyehi nendi.

3. Bika bitusanena Yehova ngwetu ‘Tate,’ co byuma muka bitusimutwiya muno mu cilongesa?

³ Twasa kusana Yehova ngwetu ‘Tate,’ mwafwa ikeye muka-kwana mwonyo. (Myaso 36:9) Wapwa Tate yetu, ngeci tunapande kumwononoka. Nga twononoka byatuleka, co tulikuwa bibezikiso byabingi. (Heve 12:9) Ebi bibezikiso binambateselela, kuyoya, myaka yoshe ipwe mwilu nambe hano hasi. Nameme simbu  ino, twasa kulikuwa bibezikiso bikwabo. Muno mu cilongesa tusimutwiya bukaleho bumwesa ngwabwo Yehova wapwa Tate yetu wa cizemo. Tusimutwiya lalo byuma bitulingisa tukulahele ngwetu kulutwe kakatuyengula. Tusimutwiyeni tahi bitulingisa tukulahele ngwetu Tate yetu wa mwilu watuzema manene na kutwaka mbunge.

4. Bika bili na kulingisa bamo kubakaluwile kumona ngwabo Njambi napu cisemi cabo?

⁴ Kuma kuli na kumikaluwila kumona Njambi ngweni napu Ishweni ndi? Bamo bakamono ngwabo Yehova wapwa wakama manene, co kubasa kupwa ba seho kuli ikeye. Ngeci, kubesi kutaba ngwabo Njambi Muka-nzili Yoshe waka mbunge munu na munu. Oloni Tate yetu wa cizemo kesi kushaka ngwendi tulizibe ngoco. Natwana mwonyo, co ashaka ngwendi tumushakezeke mangana tumuwane. Kapositolo Paulu wendekele awa majwi kuli baka-Atena, co wabalekele lalo ngwendi Yehova “kakele kulyala netu embwe.” (Vili 17:24-29) Njambi ashaka ngwendi umo na umo wetu asimutwiye nendi ngwe mwanike mwakasimutwiya na cisemi cendi uje wamuzema.

5. Bika bitulilongesa kuli ndokazi umo?

⁵ Bakwabo kunasa kubakaluwila kumona Yehova kupwa Ishabo, mwafwa baishabo kubabamwesele cizemo. Tusimutwiyeni byuma byendekele ndokazi umo. Wendekele ngwendi: “Batate bakele na kunjitenukila manene. Munjashangumukile kulilongesa Mbimbiliya, njasinganyekele ngwange kunjasa kushwenya kuyehi na Tate yetu wa mwilu. Oloni munjazibukile Yehova, njatengulwile bisinginganyeka byange.” Neni muli na kusinganyeka ngoco ndi? Nga mukemwo, co keti muzeye. Mukwita kwa simbu mulimwena ngweni Njambi wapwa wamubwa.

6. Kwesekesa na Mateo 11:27, ngila muka imo yanapangesa Yehova mukutukwasa tuzibuke ngwetu wapwa Tate yetu wa cizemo?

⁶ Ngila imo yanapangesa Yehova mukutukwasa tuzibuke ngwetu wapwa Tate yetu wa cizemo, inapu kutabesa byuma byendekele Yesu nebi byalingile babisoneke mu Mbimbiliya. (Tandeni Mateo 11:27.) Yesu watembwininine mwamubwa bifwa bya Ishe, ngeci wasele kwendeka ngwendi: “Woshe uje nanjimono namono Tate.” (Yowa 14:9) Bisimbu byabingi, Yesu wakele na kusana Yehova ngwendi wapwa Tate. Mu mikanda iwana ya Biñanda Byabibwa, Yesu wapangesele lijwi lya ‘Tate’ lwa kweta ku 165, kutalesa kuli Yehova. Bika byalingisile Yesu endeke manene hali Yehova? Washakele kukwasa banu bazibuke ngwabo Yehova wapwa Tate yetu wa cizemo.—Yowa 17:25, 26.

7. Bika bitulilongesa kuli Yehova mwakwaselelemo Munendi?

⁷ Tucisimutwiyeni bitulilongesa kuli Yehova mwakwaselelemo Munendi Yesu. Yehova wakele na kutambula malombelo a Yesu na kuwakumbulula. (Yowa 11:41, 42) Yesu waliwanene na byeseko byabingi, oloni wamwene ngwendi Ishe wamuzema, co lalo wakele na kumukwasa.—Luka 22:42, 43.

8. Yehova wakwasele bati Yesu?

⁸ Yesu wazibukile ngwendi Ishe ikeye babenya mwonyo na muka-kwana byuma bitushaka mu buyoye. Ngeci wendekele ngwendi wakele na kuyoya, mwafwa ya Ishe. (Yowa 6:57) Yesu wakulahelele manene Ishe, ngeci Yehova wamwanene byuma bije byamukwasele atwaleleleho kuyoya. Oloni cuma cakama, Yehova wakwasele Yesu apwe wa kulongwa.—Mateo 4:4.

9. Ha kupwa Tate, Yehova wamwesele bati cizemo cendi kuli Yesu na kumwaka mbunge?

 ⁹ Ha kupwa Tate wa cizemo, Yehova wakwasele Yesu azibuke ngwendi Ishe ali na kumukwasa. (Mateo 26:53; Yowa 8:16) Yehova kanyungililile Yesu ku byuma byoshe bije byasele kumubulumuna, oloni wamwanene nzili ya kukolesa mu tuyando. Yesu wazibukile ngwendi bukalu bwoshe bwaliwanene nabwo bwapwile lika bwa simbu yaindondo. (Heve 12:2) Yehova wamwesele ngwendi wakele Yesu mbunge omwo wamutolililile na kumwana byuma byakulikwasa nabyo na kumulongesa na kumukwasa. (Yowa 5:20; 8:28) Tusimutwiyenioni mwali na kutukwaselamo Tate yetu wa mwilu ngwe mwakwaselelemo Yesu.

10. Kwesekesa na Myaso 66:19, 20, Yehova ali na kumwesa bati cizemo cendi kuli yetu?

¹⁰ Yehova ali na kutolilila ku malombelo etu. (Tandeni Myaso 66:19, 20.) Katwakelele cilengo ca kulombela, oloni washaka ngwendi tulombele kushwa kumo. (1 Tesa 5:17) Twasa kulomba kuli Njambi ha simbu yoshe yoshe na ku mwela woshe woshe kutuli. Nalibwahesela kututolilila, mwafwa kesi kujuka kutolilila ku malombelo etu. Nga tunanguka ngwetu Yehova ali na kutolilila ku malombelo etu, co tumuzema manene. Muka-kwimba wendekele ngwendi: “Njizema Shukulu Kalunga, omwo nazibi malombelo ange.”—Myaso 116:1.

11. Yehova akakumbulula bati malombelo etu?

¹¹ Tate yetu ali na kutolilila ku malombelo etu na kuwakumbulula. Kapositolo Yowano wendekele ngwendi, byoshe bitulomba kuli Njambi kwesekesa na cizango cendi, atuziba. (1 Yowa 5:14, 15) Oloni bisimbu bimo, Yehova kesi kukumbulula malombelo etu mu ngila itushaka. Azibuka byuma bitukwasa, ngeci simbu imo kesi kukumbulula nambe akatondo ngwendi tubandamene.—2 Koli 12:7-9.

12-13. Yehova ali na kutwana bati bitutonda?

¹² Yehova ali na kutwana bitutonda. Bipangi byanana Yehova ku bisemi ba banalume, na ikeye ali na kubipanga. (1 Tima 5:8) Ali na kwana bana bendi byuma bibakwasa bayoye. Kashaka ngwendi tulishoshomwene byakulya, bizalo, nambe kwakulala. (Mateo 6:32, 33; 7:11) Ha kupwa Tate yetu wa cizemo, Yehova nabwahesa laja na byuma bitukatonda kulutwe.

¹³ Cuma ca seho manene cali na kutwana Yehova, cinapu byakulya bya ku sipilitu. Mu Mbimbiliya, Yehova nasholola cifwa cendi, biyongola byendi, bituli na kuyoyela nebi bikalingiwa kulutwe. Watwakele mbunge mukemwo wapangesele bisemi betu nambe munu weka mangana atulongese busunga hali Njambi. Co natwalelelaho kutukwasa omwo ali na kupangesa bakulunu ba cikungulukilo na bandolome na bandokazi ba kuhya ku sipilitu. Co lalo Yehova ali na kutulongesa ku biwabo bya cikungulukilo kuje kutuli na kulilongesela hamo na bandolome na bandokazi. Ebi byuma bitunasimutwiya na bikwabo byeka, bimwesa ngwabyo Yehova wapwa Tate uje watwaka mbunge tubaboshe.—Myaso 32:8.

14. Bika byali na kutulongesela Yehova, co ali na kutulongesa bati?

¹⁴ Yehova ali na kutulongesa. Yesu wapwa wa kulumbunuka, oloni yetu kutwalumbunukile. Tate yetu wa cizemo ali na kutulongesa kwitila mu kutunangula nga namono ngwendi kunapande. Mbimbiliya ngwayo: “Shukulu Kalunga [anangula] woshe yazema.” (Heve 12:6, 7) Yehova ali na kutunangula mu bingila byabingi. Cakumwenako, byuma bitutanda mu Mbimbiliya nambe kuziba ku biwano binasa kutukwasa tutengulule bisinganyeka byetu na bilinga byetu. Co lalo bakulunu ba cikungulukilo  banasa kutunangula. Yehova ali na kupangesa bingila bya kulisezaseza mukutunangula, oloni simbu yoshe akalingi ngoco mu cizemo.—Njele 30:11.

15. Yehova ali na kutukwasa bati?

¹⁵ Yehova akatukwasa tukolese nga tuli mu byeseko. Ngwe cisemi mwakakwasa bana bendi baje bali mu bukalu, na Tate yetu wa mwilu atukwasa tukolese nga tuli mu byeseko. Akatwana sipilitu yendi ya kujela mangana tulinyungilile ku byuma bije byasa kutsiya busamba bwetu nendi. (Luka 11:13) Co lalo akatutakamesa nga tunazeye. Cakumwenako, nakulahesa kutulingila byuma byabibwa kulutwe. Ebi byuma byanatukulahesa bitukwasa tukolese nga tuli mu bukalu, mwafwa Tate yetu wa cizemo akabumanesa bwoshe kulutwe. Byeseko bituliwana nabyo binapu bya simbu yaindondo, oloni bibezikiso bitukatambula kuli Yehova binapu bya myaka yoshe.—2 Koli 4:16-18.

16. Bika byatundilemo Adama mwabyanene kwononoka Ishe wa cizemo?

¹⁶ Byuma byalingile Yehova omwo Adama wabiisile, bimwesa ngwabyo Yehova watuzema. Adama wabyanene kwononoka Ishe wa mwilu. Ngeci, ikeye na bana bendi boshe batundile mu naanga yaibwa ya Yehova. (Loma 5:12; 7:14) Oloni Yehova walingile byuma bimo mangana akwase bana ba Adama.

17. Bika byalingile Yehova omwo Adama wamutengulukilile?

¹⁷ Yehova wanene Adama kashitiko, oloni wakulahesele bana ba Adama byuma byabibwa. Wakulahesele ngwendi baje bamwononoka akabelwisa mu naanga yendi. (Kusha 3:15; Loma 8:20, 21) Yehova wabwahesele eyi ngila omwo watwanene ndando ya kupatula ya Munendi Yesu. Omwo watwanene Munendi, Yehova wamwesele ngwendi watuzema manene.—Yowa 3:16.

18. Bika twendekela ngwetu Yehova anga watuzema nameme tunatundu kuli ikeye?

 ¹⁸ Yetu banu kutwalumbunukile, oloni Yehova atonda ngwendi tukale mu naanga yendi, co kesi kutumona ngwendi tuli na kumwana cikela embwe. Tunasa kuzibisa Yehova kubabala ku mbunge, nambe kutunda mu naanga yendi, oloni nakulahela ngwendi twasa kwiluka kuli ikeye. Yesu wakwasele banu bamone bukama bwa cizemo ca Yehova omwo watele cisimo ca mwana uje wazimbalele. (Luka 15:11-32) Ishe ya uje mwana, wakulahelele ngwendi uje munendi wazimbalele akeluka. Uje mwana mwelukile kwimbo, ishe wamutambwile na maboko abali. Nga tunatundu kuli Yehova oloni tunatenguluka, co twasa kukulahela ngwetu nga twiluka, Tate yetu wa cizemo atutambula na maboko abali.

19. Yehova akamanesa bati bukalu bwananene Adama?

¹⁹ Tate yetu akamanesa bukalu bwoshe bwananene Adama. Hanima yakumutengulukila kuli Adama, Yehova wayongwele kwangula banu ba kupwa 144,000 hano hasi mangana bakapwe bimyene na tupilisitu mwilu hamo lika na Munendi. Mu kaye kakaha, Yesu na baje bakayula nabo bakakwasa banu ba kwononoka bapwe ba kulumbunuka. Banu ba kwononoka mubakahyana ceseko ca mamaneselelo, Njambi akabana mwonyo wa myaka yoshe. Tate yetu akabwahelela mwakamona kano kaye kanashulu na bana bendi ba banalume na banakazi ba kulumbunuka. Eyi simbu ikapwa yaibwa manene.

20. Yehova natumwesa bati ngwendi watuzema manene, co bika bitusimutwiya mu cilongesa cinatako?

²⁰ Yehova natumwesa ngwendi watuzema manene. Wapwa Tate wamubwa. Akazibi malombelo etu, co ali na kutwana bitutonda ku mubila na ku sipilitu. Ali na kutulongesa na kutukwasa. Co lalo akatwana byuma byabibwa kulutwe. Twabwahelela kuzibuka ngwetu Tate yetu watuzema, co lalo watwaka mbunge. Mu cilongesa cinatako tusimutwiya mutwasa kumweselamo kukandelela ku cizemo ca Njambi ha kupwa bana bendi.