1. Ki enn dimounn ti bizin fer avan ki li koz ar enn Lerwa Pers?

ESEY mazine ki to’nn retourn 2,500 an dan lepase ek ki to pe viv dan Pers. To anvi koz ar lerwa sa pei-la konsernan enn problem, alor to al lavil Siz kot lerwa reste. Me avan ki to reisi koz ar lerwa, to bizin gagn so permision. Si to esey koz ar li san so permision, to kapav perdi lavi.​—Est. 4:11.

2. Kouma Zeova anvi ki nou santi nou kan nou koz ar Li?

² Nou bien kontan ki Zeova pa kouma sa Lerwa Pers la! Zeova bien pli siperyer ki ninport ki dirizan imin. Pourtan, nou kapav koz ar Li ninport kan. Li anvi ki nou santi nou alez pou koz ar Li. Par exanp, mem si Zeova ena bann tit ki inpresionan, kouma Gran Kreater, Tou-Pwisan, ek Souverin Segner, Li anvi ki nou apel Li “Papa,” enn mo ki tous nou leker. (Mat. 6:9) Nou extra kontan ki Zeova anvi ki nou santi nou bien pros ar Li!

3. Kifer nou kapav apel Zeova “Papa,” ek ki nou pou examine dan sa lartik-la?

³ Li normal ki nou apel Zeova “Papa” parski Limem Lasours nou lavi. (Ps. 36:9) Se nou Papa, alor nou bizin obeir Li. Si nou fer seki Li demann nou, nou pou gagn boukou benediksion. (Ebre 12:9) Parmi sa bann benediksion-la ena lavi eternel, ki li dan lesiel ouswa lor later. Nou gagn osi bann benediksion depi asterla mem. Dan sa lartik-la, nou pou gete kouma Zeova azir kouma enn Papa ki ena lamour ek kifer nou kapav sir ki zame Li pa pou abandonn nou. Me pou koumanse, anou gete kifer nou kapav sir ki  nou Papa ki dan lesiel bien kontan nou ek ki Li gagn nou traka.

4. Kifer sertin trouv sa difisil pou konsider Zeova kouma zot Papa?

⁴ Eski to trouv sa difisil pou konsider Zeova kouma to Papa? Sertin kapav panse ki Zeova telman gran ki nou pena linportans pou Li. Zot trouv sa difisil pou krwar ki Bondie Tou-Pwisan gagn zot traka personelman. Me nou Papa ki ena lamour pa anvi ki nou ena sa santiman-la. Li’nn donn nou lavi ek Li anvi ki nou vinn pros ar Li. Pol ti explik sa verite-la bann dimounn ki ti pe ekout li dan Atenn. Apre li ti dir zot ki Zeova “pa lwin ar sakenn parmi nou.” (Zist. 17:24-29) Bondie anvi ki nou koz ar Li parey kouma enn zanfan normalman koz avek so paran ki kontan li ek ki gagn so traka.

5. Ki nou aprann ar lexperyans enn ser?

⁵ Ena sertin ki trouv sa difisil pou konsider Zeova kouma zot Papa, parski zot pa finn gagn ditou ouswa finn gagn bien tigit lamour ek lafeksion ar zot prop papa. Par exanp, enn ser rakonte: “Mo papa ti bien violan. Kan mo ti fek koumans etidie Labib, mo ti trouv sa bien difisil pou santi mwa pros ar enn Papa ki dan lesiel. Me apre ki mo finn aprann konn Zeova, sa finn sanze.” Eski to ena mem santiman ki sa ser-la? Si wi, to kapav sir ki twa osi to kapav trouv Zeova kouma meyer Papa ki ena.

6. Dapre Matie 11:27, kouma Zeova finn ed nou pou konsider Li kouma enn Papa ki kontan nou?

⁶ Enn fason ki Zeova finn ed nou pou konsider Li kouma enn Papa ki kontan nou, se kan Li’nn fer ekrir bann parol ek bann aksion Zezi dan Labib. (Lir Matie 11:27.) Zezi ti imit personalite so Papa telman bien ki li ti kapav dir: “Seki finn trouv mwa finn trouv mo Papa.” (Zan 14:9) Kan li ti koz lor Zeova, souvan Zezi ti dekrir Zeova kouma enn “Papa.” Par exanp, dan bann Levanzil, Zezi ti apel Zeova “Papa” apepre 165 fwa. Kifer Zezi ti koz sa kantite-la lor Zeova? Enn parmi bann rezon se pou konvink bann dimounn ki Zeova Li enn Papa ki kontan nou.​—Zan 17:25, 26, NW.

7. Ki nou aprann lor Zeova ar fason ki Li ti konsider so Garson?

⁷ Anou gete seki nou aprann lor Zeova ar fason ki Li ti konsider so Garson, Zezi. Zeova finn touletan ekout bann lapriyer Zezi. Li pa ti zis ekout so bann lapriyer, me Li ti osi reponn zot. (Zan 11:41, 42) Dan ninport ki difikilte li ti ete, Zezi ti touletan santi lamour ek soutien so Papa.​—Lik 22:42, 43.

8. Dan ki fason Zeova ti donn Zezi seki li bizin?

⁸ Zezi ti rekonet ki so Papa inn kree li ek inn donn li seki li bizin pou viv. Li ti dir: “Mo viv par li.” (Zan 6:57) Zezi ti fer so Papa foul konfians, ek Zeova ti donn li seki li bizin lor plan fizik. Me pli inportan, Zeova ti pran Zezi swin lor plan spiritiel ek ti ed li pou res fidel.​—Mat. 4:4.

9. Kouma Zeova inn montre ki Li enn Papa ki bien kontan Zezi?

⁹ Zeova enn Papa ki ranpli ar lamour, alor Li ti fer an sort ki Zezi kone ki Li ti pe soutenir li. (Mat. 26:53; Zan 8:16) Mem si Zeova pa ti protez Zezi kont tou seki ti kapav fer li ditor, Li ti ed li pou andire. Zezi ti kone ki ninport ki soufrans li ti pou gagne ti pou tanporer. (Ebre 12:2, NW) Zeova ti montre ki Li ti kontan Zezi kan Li ti ekout li, form li, soutenir li, ek donn li seki li bizin pou viv. (Zan  5:20; 8:28, NW) Asterla, anou gete kouma Zeova pran nou swin dan mem fason.

10. Dapre Psom 66:19, 20, kouma Zeova montre ki Li kontan nou?

¹⁰ Zeova ekout nou bann lapriyer. (Lir Psom 66:19, 20.) Zeova pa anvi ki nou fixe nou bann limit konsernan kantite fwa ki nou priye, longer nou bann lapriyer, ek seki nou dir kan nou priye. Okontrer, Li ankouraz nou pou “priye toultan.” (1 Tes. 5:17) Nou kapav priye nou Bondie ninport kan ek ninport kotsa nou ete. Zeova zame tro okipe pou ekout nou; Li touletan disponib ek Li touletan donn nou so latansion. Kan nou konsian ki Zeova ekout nou bann lapriyer, nou kontan Li ankor plis. Enn ekrivin Psom ti dir: “Mo kontan LESEGNER [“Zeova,” NW] parski li finn tann mo lapriyer.”​—Ps. 116:1.

11. Kouma Zeova reponn nou bann lapriyer?

¹¹ Nou Papa pa zis ekout nou bann lapriyer, me Li osi reponn zot. Lapot Zan donn nou sa lasirans-la: “Ninport ki kitsoz nou demande ki an-akor avek so volonte, Li ekout nou.” (1 Zan 5:14, 15, NW) Biensir, Zeova kitfwa pa pou reponn nou lapriyer dan fason ki nou pe atann. Li kone ki kitsoz pli bon pou nou. Akoz sa, parfwa So repons kapav non, ouswa Li pou anvi ki nou ena pasians.​—2 Kor. 12:7-9.

12-13. Dan ki fason nou Papa ki dan lesiel donn nou seki nou bizin pou viv?

¹² Zeova donn nou seki nou bizin pou viv. Zeova fer seki Li demann tou bann papa pou fer. (1 Tim. 5:8) Li donn so bann zanfan seki zot bizin pou viv. Li pa anvi ki nou trakase akoz manze, linz, ouswa plas kot nou pou reste. (Mat. 6:32, 33; 7:11) Zeova enn Papa ki ranpli ar lamour, alor Li finn osi pran bann dispozision pou ki nou gagn seki nou bizin dan lavenir.

¹³ Me pli inportan, Zeova donn nou seki nou bizin pou ki nou kapav ena enn bon relasion avek Li. Dan Labib, Li’nn dir nou laverite lor Limem, lor so proze, lor kifer Li’nn kree nou, ek lor seki pou arive dan lavenir. Kan nou ti fek konn laverite, Li’nn montre nou so lafeksion kan Li’nn servi nou fami ouswa enn lot dimounn pou ed nou konn Li. Ek Li kontign ed nou pou vinn so kamarad gras-a led bann ansien ek bann lezot frer ek ser ki ena matirite. Anplis, Zeova ansegn nou atraver nou bann renion. Laba, Li ansegn nou ansam avek nou fami spiritiel. Dan sa fason-la ek dan plizir lezot fason ankor, Zeova montre nou so lafeksion, parey kouma enn Papa.​—Ps. 32:8.

14. Kifer Zeova form nou, ek kouma Li fer sa?

¹⁴ Zeova form nou. Zezi ti enn zom parfe, me nou nou inparfe. Alor, pou form nou, parfwa nou Papa bizin disiplinn nou. Labib rapel nou ki Zeova “koriz dimoun ki li kontan.” (Ebre 12:6, 7) Zeova disiplinn nou dan plizir fason. Par exanp, seki nou lir dan Labib ek tande dan renion kapav ed nou pou konpran ki nou ena bann sanzman pou fer. Ouswa kitfwa nou gagn led ki nou bizin gras-a bann ansien. Me dan ninport ki fason ki Zeova disiplinn nou, Li touletan fer sa parski Li kontan nou.​—Zer. 30:11.

15. Dan ki fason Zeova protez nou?

¹⁵ Zeova ed nou pou andir bann leprev. Parey kouma enn Papa ki ena lamour soutenir so bann zanfan kan zot pas par bann moman difisil, nou Papa ki dan lesiel soutenir nou kan nou pas par bann leprev. Li  servi so lespri sin pou protez nou kont ninport ki kitsoz ki kapav gat nou relasion avek Li. (Lik 11:13) Zeova ed nou osi kan nou dekouraze ek trakase. Par exanp, Li donn nou enn lespwar extraordiner. Lespwar ki Li donn nou pou lavenir ed nou pou andir bann difikilte. Reflesi enn kout: Ninport ki move kitsoz ki ariv nou, nou Papa ki bien kontan nou pou repar tou sa bann ditor-la. Bann difikilte ki nou pe gagne zot tanporer, me bann benediksion Zeova zot dire pou touletan.​—2 Kor. 4:16-18.

16. Ki ti arive kan Adan ti dezobeir so Papa?

¹⁶ Nou trouv lamour ki Zeova ena pou nou kan nou reflesi lor seki Zeova ti fer kan ti ena bann problem dan premie fami imin. Kan Adan ti dezobeir Zeova, li ti nepli form parti dan fami Zeova ek so bann desandan osi ti perdi sa privilez-la. (Rom. 5:12; 7:14, NW) Selman, Zeova ti fer enn kitsoz pou ed bann desandan Adan.

17. Apre ki Adan ti dezobeir Zeova, ki dispozision Zeova ti pran?

¹⁷ Zeova ti pini Adan, me Li ti promet pou ed bann desandan Adan. Li ti pran bann dispozision deswit pou ki bann dimounn ki obeir Li revinn bann manb so fami. (Zen. 3:15; Rom. 8:20, 21) Li ti fer sa gras-a sakrifis Zezi, so Garson ki Li bien kontan. Kan Li’nn donn so garson pou nou, Zeova finn montre ki kantite Li kontan nou.​—Zan 3:16.

18. Kifer nou kapav sir ki Zeova anvi ki nou vinn so bann zanfan, mem si nou’nn elwagne ar Li?

¹⁸ Mem si nou inparfe, Zeova anvi ki nou form parti so fami ek zame Li pa konsider nou kouma enn fardo. Mem si parfwa nou desevwar Li ouswa nou elwagn nou ar Li, Zeova touletan gard lespwar ki nou pou retourn ver Li. Zezi ti montre ki  kantite Zeova kontan so bann zanfan kan li ti servi parabol sa garson ki ti perdi la. (Lik 15:11-32) Dan sa parabol-la, papa-la ti touletan gard lespwar ki so garson retourne. Kan garson-la ti retourn lakaz, papa-la ti akeyir li lebra gran ouver. Si dan lepase nou ti elwagn nou ar Zeova me ki asterla nou’nn repanti, nou kapav sir ki nou Papa ki bien kontan nou dispoze pou akeyir nou.

19. Kouma Zeova pou repar bann ditor ki finn ena akoz Adan?

¹⁹ Nou Papa pou repar tou bann ditor ki finn ena akoz Adan. Apre rebelion Adan, Zeova ti desid pou adopte 144,000 dimounn pou al servi dan lesiel kouma lerwa ek pret avek so garson, Zezi. Dan lemond nouvo, Zezi ek bann ki pou regn ansam avek li pou ed bann dimounn obeisan pou vinn parfe. Pandan leprev final, lobeisans sa bann dimounn-la pou teste enn dernie fwa. Apre sa, Bondie pou donn zot lavi eternel. Sa lepok-la, nou Papa pou bien kontan parski later pou ranpli ar so bann garson ek tifi ki’nn vinn parfe. Sa pou vremem enn lepok extraordiner!

20. Kouma Zeova montre ki Li bien kontan nou, ek ki nou pou examine dan prosin lartik?

²⁰ Zeova finn montre ki Li extra kontan nou. Limem meyer Papa ki ena. Li ekout nou bann lapriyer ek Li donn nou seki nou bizin lor plan materyel ek spiritiel. Li form nou ek soutenir nou. Li pou osi fer bann kitsoz extraordiner pou nou dan lavenir. Sa vremem tous nou kan nou kone ki nou Papa kontan nou ek gagn nou traka! Dan prosin lartik, nou pou gete kouma nou kapav montre nou rekonesans pou lamour ki Li ena pou nou.